“” عهد مظلم””
قصه حقيقيه من قصص المتابعين لشخص رفض ذكر أسمه وطلب المساعدة
أنا عايش عمري كله بعاني من أمراض نفسية بسبب عائلتي،
لما تميت ال 16 سنه من عمري كان جدي تعبان مريض بمرض نادر مش موجود بعد فترة من المرض أصبح ضعيف وجسمه كله تقرحات كان شكله مزعج جدا للعين ده غير الريحه اللي احنا كنا بنشمها منه كانت بتشبه ريحة الأموات بس جدتي وامي قالوا لي إنه بيدفع تمن اللي عمله لدرجه أنه في مره حاول يقتل جدتي عشان كانت بتنصحه يبعد عن الشر والسحر وأنه يأذي الناس كان جدي بيشتغل في السحر عشان يقدر يمتلك ثروه كبيره انا ما كنتش مصدقها بس احنا فعلاً بنمتلك أرض وبيوت لدرجه ان احنا مش قادرين نزرع كل الأرض اللي عندنا
اتدهورت حاله جدي بشكل كبير لدرجه ان هو كان بيطالبنا ان إحنا نقتله عشان يخلص من الألم والعذاب اللي هو بيشوفه كان منظره صعب مافيش دكتور قدر يساعده، أصعب حاجه ان انسان في السن ده يشوف اللي انا شفته
انا فاكر يوم وفاته كويس جدا كنا قاعدين كلنا جنبه وانا نظري كان على الارض بس سمعت صوت خطوات خفيفه كده بتقرب منه بس مفيش حد بيتحرك كلنا كنا قاعدين في الغرفه رفعت عيني وشفت شخص بيقرب منه بس محدش من اللي موجود في المكان لاحظ الموضوع ده انا وجدي بس اللي شايفينه بقول ان جدي شافه لاني كنت متابع عينيه وهي بتشوف الشخص ده كنت شايف في عينيه الرعب اللي ما قدرتش اوصفه كان شخص طويل لون بشرته اسود بيملك ابتسامه مرعبه لأسنان مدببه كل اللي بحكيه ده حصل في ثواني ما اقدرش اقول دقايق قرب من جدي وحط ايده على صدره بدأ جدي يصرخ بصوت عالي ويقول “لا لسه مجاش الوقت مكنش ده اتفاقنا” عاد الجمله دي ثلاث مرات ومات الكل كان موجود بس محدش قدر يساعدة وأحنا شايفين الرعب اللي في عينه وهو بيطلع انفاسه الأخيره.
في العيله وفي القريه كلها قالوا إن الشيطان أخد جسدة أنا عمري ما قلت كده بس اللي شفته وعاصرته حاسس انه كده فعلا
في اليوم الأول لوفاه جدي كان البيت مليان بالأهل والأصدقاء والمعارف وناس من أهل القريه اول لما شغلنا القران النور قطع ومن هنا كانت بداية أصعب ليلة شوفتها لما الناس بدأت تدعي وتشغل قرآن كنت بحس إن جسد جدي بيتهز والقرآن شغال بطريقة صعب تفسيرها لدرجة أني حسيت أنه كان قرب يقع من علي السرير، كنت بسمع همسات الناس بينهم وبين بعض وهما بيقولوا ربنا بينتقم منه عشان عامل وعد مع الشيطان.
تم تحديد موعد دفنة في صلاة الضهر، بس كان في صعوبة أننا نشيلة كان تقيل جدا، كان رجاله كتير بتشيل ورغم أن وزن جدي مش تقيل بس محدش كان قادر يشيل لحد أما قربنا ندخلة المسجد رفض جسمة يدخل المسجد بكل الطرق عشان كده قولنا هنصلي عليه عند المقابر لكن الشيخ رفض الصلاة عليه لحد اما واحد من العيلة صلي عليه، بس اللي لاحظته أن كل اللي كان بيقرب منه كان بيشم ريحة وحشه ريحة عفن تقدر تقول ريحه شخص ميت من زمان، بعد الصلاة عليه حاولنا ندخله القبر لكن محدش عرف كأن في قوة بتمنعنا من ده ومع محاولتنا المتكررة قررنا نعمله قبر جمب البيت ونحطه فيه لوحده
في نفس اليوم باليل حصل عاصفة شديدة وصلت لدرجة الأعصار مع أمطار كنت بشوف الشجر بيتمايل بطريقة غريبة وكأنه بيتخلع من مكانه، طول الليل وأنا بسمع صوت، صوت أنين لشخص بيعاني من الألم بس اعتقد كنت أنا بس اللي بسمع الصوت ده، حاولت أنام عشان اهرب من اليوم الصعب ده، صحينا علي كلام الناس وهيا بتقول أن قبر جدي اللي جمب البيت اتفتح والجثمان مش موجود فيه وحكاية جدي بقت الأسطورة الشعبية للقرية والبلاد المجاورة كله بيقول أن الشيطان خد جثمان وروح جدي، أنا فكرت كتير أنه ممكن يكون بسبب العاصفة والأمطار أو يكون في حيوان هو اللي دخل وخد الجثمان فضلت احط مبررات كتير عقلي نفسه مش مصدقها
