سمعت صوت من ورايا بيقول ” اه يا حاتم عندك ام تانية واب تاني ” كان صوت ابويا ، بصيت عليه وانا في صدمة وانا بقول ” انا مش فاهم حاجة !” ، ابويا اتكلم وقال ” حاتم احنا مكناش عايزين انك تعرف حاجة ” ، رديت وانا في صدمة ” يعني حضرتك مش ابويا ولا في الصورة دى امي !؟ ” ، ابويا او اللي كان ابويا قال ” بص يا حاتم هي اللي في الصورة دى بالفعل مش امك لكن ” ، قولتله ” لكن ايه !؟ ” كمل كلامه وقال ” انا اخدتك وربيتك افضل من اى عيل من عيالي وحبيتك اكتر منهم بس انت لازم تعرف الحقيقة ” ، قربت عليه وانا في حالة من الاندهاش و صدمة وبقوله ” ايه الحقيقة بقي ” ، رد وقال ” عايز تعرف الحقيقة ؟ ، روح البيت واقعد فيه وانت هتعرف كل حاجة لوحدك ” ، قال الجملة دى وسابني ومشي ، حسن كان لسه واقف وباصص ليا وعلي ملامحوا الحزن ، قربت منه وقولت ” حسن انا عايز وافهم ارجوك ” ، حسن اتكلم وقال ولسه علي ملامحوا الحزن ” لو عايز تعرف اعمل اللي قال عليه ابوك او اللي كان ابوك ” ، حسن التاني سابني ومشي ، خرجت ورحت البيت ، بيت الراوي ، دخلت البيت وقعدت علي الكرسي وانا بفكر في كلام عم فتحي وبالذات لما قال دور في ماضيك ، فجأة لقيت ايدين شخص اتحطت علي كتفي ، بصيت علي الايد اللي علي كتفي وجسمي بيترعش ، كانت ايدين واحدة ست ، سمعت صوتها بيقول ” متخافش يا حاتم هتعرف كل حاجة يا بني ” ، قومت من مكاني بسرعة عشان اشوف مين دى لكن ملقتش حد ، قعدت تاني علي الكرسي ، حسيت بصداع شديد في راسي ، حطيت راسي علي التربيزة اللي قدامي ، بعد شوية سمعت صوت حد في البيت بيقول ” انتي متأكدة انوا مش راجع دلوقتي ” ، من علي الكرسي وانا بقرب علي الاوضة اللي خارج منها الصوت ، سمعت صوت واحدة بتقول ” هو مش عايز يخلف و مش قادر لكن انا اقدر ” ، سمعت صوت الشخص اللي معاها في الاوضة بيقول ” لكن الولد هيبقي ابني انا مش هو ” ، الست ردت عليه وقالت وهي بتضحك ضحكة عالية ” مش هتفرق كتير ” ، بعد شوية لقيتهم خارجين من الاوضة اتصدمت لما شوفتهم ، الراجل اللي كان معاها في الاوضة كان ابويا ، ابويا اللي رباني ، اما الست فا دى كانت اللي شوفتها في الصورة وكان معلم عليها علامة اكس بالأحمر ، فجأة لقيتهم اختفوأ ، كنت واقف مش فاهم حاجة ومصدوم ، فجأة سمعت صوت من ورايا بيقول ” عزيزة انت حامل !؟ ” ، بصيت ورايا كان واحد لابس بالطوا الدكتور وماسك ورق في ايدوا وكان بيكلم نفس الست اللي شوفتها مع ابويا من شوية ، ردت عليه وقالت وهي بتقرب منه بحنية” ايوه يا حبيبي حامل بس كنت عاملهالك مفاجأة ” ، الشخص كان باصص ليها بغضب وهو بيقول بأندهاش ” حامل !! طب ازاى !؟ “
يتبع .. الظاهر انوا مش مصدق انها حامل لانوا عارف حاجة !
