رواية انتقام بمنطق الحب الفصل 24 الجزء الرابع والعشرون في منزل يونس
رغد وهي تبتعد أردفت : أوعى في يوم من الأيام أنزل من نظرك يا يونس أنا معترفة إني غلطت وغلطة كبيرة بس والله عرفت به متأخر أوي وبعدين أنا وافقت بك عشان كنت بحبك وأنت عارف الكلام ده من زمان أوي
يونس : عارف يا رغد الكلام ده الغلط مش عيب، بس العيب أن الواحد ميكونش معترف بغلطته وأنتي غلطتي وأعترفتي وأنا اتقبلت الموضوع ده وصدقيني الموضوع ده مش هيأثر على علاقتنا لانه كان ماضي قبل دخولي لحياتك
أكمل حديثة : بكرة هنروح نشوف عروسة إياد أمتى ؟
رغد : الساعة 9في كازينو النيل
يونس: روفيدة ؟
رغد : روفيدة هوديها عند ماما مينفعش أصلاً تروح معانا مشوار زي ده
ثان يوم
داخل المركز الطبي
إياد : صباح الفل يا أميرة حياتي
أميرة : صباح النور يا دكتور
إياد : دكتور ؟!
أميرة: أيوة جوه المركز دكتور لغاية لم خطوبتنا تكون رسمي
إياد : ده تقل ولا استفزاز
أميرة: زي ما تحسبها من وجهه نظرك
إياد : المهم الساعة 8ونصف تكوني جاهزة
أميرة : حاضر ، اتفضل على شغلك بقى
إياد : أنا أول مرة أشوف كده إن الموظفة هي اللي تؤمر مش العكس
أميرة : معايا المستحيل ممكن يلا يا إياد بقى أمشي ، أنت عارف العيون كتيير هنا
في منزل والدي رغد
تتحدث نادية مع رغد على الهاتف : ماشي يا حبيبتي هستناكم مع السلامة
وأغلقت الخط
علي : في ايه ؟ رغد كويسة ؟
نادية : زي الفل مالك مخضوض كده ليه ؟
علي : افتكرت في مشكلة حصلت بينها وبين يونس
نادية : لا أطمن أمورها ماشية وزي الفل بس هي هتجييب روفيدة عندنا كام ساعة كده عشان خارجة هي ويونس
علي : فين ؟
نادية : …………….
في منزل يونس
روفيدة : لا أنا عايزة أخرج معاكم مش عايزة أروح عند تيتا
رغد بهدوء: يا روحي مينفعش المشوار ده للكبار بس بنوتي الشطورة هتسمع الكلام عشان اجيب لها حاجة حلوة معايا وأنا وبابي في الويك إند نخرجها ونجيب لها اللي هي عايزاه لو سمعت الكلام
روفيدة : بجد ؟
رغد : بجد هااا تروحي معانا مشوار الكبار ولا تروحي عند تيتا ونخرج في الويك إند ؟
روفيدة : خلاص ماشي هروح أقعد مع تيتا
يونس : يلا يا رغد أنا جاهز
رغد : وأنا كمان يلا بينا
وغادروا من منزلهم
في الإسكندرية
مي : لسه زعلان مني عشان خرجت من غير ما أقولك؟
يامن : أيوة يا مي لأنها مش أول مرة تعمليها ؟
مي : بيكون غصب عني يا يامن ومشوار العيادة النفسية ده مكنتش هقدر أستنى أكتر من كده واعتذرت منك ليه زعلان بقى
يامن : خلاص يا مي اللي حصل بقى
مي : طالما خلاص ياريت تتكلم معايا كويس مش تحسسني إني أرتكبت جريمة
يامن : زعلي منك ده خوف عليكي مش عقاب يا مي خصوصا من ساعة ما حازم خطفك ومكنتش عارف أوصلك إحساسي بالخوف والذنب ناحيتك كان قاتلني ومكنتش بحبك ساعتها لكن بعد ما حبيتك خوفي ناحيتك بقى أضعاف أنتي مش بس حبيبتي أنتي حياتي يا مي وأم عيالي
مي : عارفة الكلام ده والله عشان كده مش بتحمل زعلك مني تغيرك ناحيتي بيخنقني بس من دلوقتي ورايح كل خطوة هتكون بإذنك مش هعمل حاجة من وراك أبداً
في القاهرة
في كازينو النيل
رغد : أنتي جميلة أوي يا أميرة
أميرة : حبيبتي والله يا رغد أنا تشرفت بيكي ومعرفتك
رغد : وأنا أكتر والله فعلا طلع معاك حق يا إياد أميرة لذيذة وتدخل القلب بسرعة لا وكمان حلوة عرفت تختار
يونس : ربنا يتمم لكم على خير
إياد : يعني تستاهل ؟!
رغد : تستاهل محدش يعرف يراجع من وراك يا إياد بس خد بالك أوعى دخول أميرة حياتك ياخدك من روفيدة
أميرة : روفيدة مين ؟
رغد : حبيبة وروح إياد
أميرة بضيق : نعم ؟!
إياد : وضحي الأمور يا رغد عشان منروحش في داهية
يونس : رغد بتهزر يا أنسة أميرة روفيدة دي بنتنا عندها أربعة سنين طفلة مش كبيرة
بس فعلا معاها حق لأن علاقة إياد ب روفيدة علاقة قوية جداً
إياد : حقيقي روفيدة مش بالنسبة لي بنت أختي لاء دي بنتي أنا
أميرة : واضح جداً أنها فعلا واخدة مكان كبير في قلب إياد
رغد : واخدة قلبه كله وحياتك
إياد ليونس : ما تسيطر على مراتك يا يونس مالها النهاردة
رغد : ليه هو أنا قولت حاجة غلط ؟
أميرة : لا يا حبيبتي عادي خالص تأكدي أن مكانه بنتك زي ماهي وأن دخولي لحياة إياد مش هيأثر على علاقته بحبايبة بأي شكل سواء كبير أو صغير
إياد : شايفة الرد اللي ياخد القلب والعقل والكيان
رغد : ما خلاص بقى يا عم روميو مكانوش كلمتين
وجهت بصرها لأميرة وأردفت : شايفة الجواز من وجهه نظرك ايه ؟
أميرة : الجواز عبارة عن أتحاد روحين مش مجرد جسدين وخلاص عشان تحقيق الفطرة
هو ميثاق غليظ أبدي بين الراجل والست أنهم الاثنان مكملين لبعض لرحلة حياة لنهاية العمر بتكون قائمة على التفاهم والمودة والرحمة والإستقرار والقبول بين الطرفين
والحب مهم بس مش الأهم الحب جزء من نجاح أي علاقة بس التوافق الفكري والثقافي أهم
إياد : وده اللي عجبني في أميرة طريقة تفكيرها وشخصيتها المختلفة عن كل البنات اللي عرفتها ، أنها مش عايزة تتجوز أي حد وخلاص ، يعتبر تفكيرنا متقارب من بعض
رغد : عندك حق في كل كلمة قولتيها ، بس في نقطة غايبة عنك يمكن تكوني نسيتها هي الأمان صدقيني صفة نادرة جداً بس إحساسها حلو أوي طالما حاسة بالأمان مع شريك حياتك هتشوفيه هو الدنيا والعالم الخاص بيكي اللي بتتحامي فيه من تعب ومرارة الدنيا
يونس : دي حقيقي جداً وخصوصا كمان لو حبك للشخص ده بدون سبب متعرفيش بتحبيه ليه؟ طالما معندكيش سبب حبك للشخص اللي اختارتية أعرفي أنك ماشية في الطريق الصح لأن لو حبيتي حد عشان حاجة معينه مجرد ما يتوقف عنها كل حبك ناحيته هيكون سراب الحب الحقيقي هو حب الروح زي البصمة بالظبط مالوش شبيه
يقطع حديث يونس صوت هاتف رغد
رغد : دي ماما أكيد عشان روفيدة
نهضت وأردفت : مش يلا بينا كفاية كده
بعد أن خرج أربعهم من الكازينو ، صعدوا في سيارة إياد
جلست أميرة بجانب إياد ، ورغد ويونس خلفهما
رغد : أطلع على بيت ماما يا إياد عشان روفيدة
إياد : حاضر بس أوصل أميرة الأول
رغد : تمام
انطلق إياد بسيارتة أردفت أميرة برعب : براحة يا إياد بخاف من السرعة
رغد : ده كده هادئ ، إياد ده مجنون ده بس عامل حسابنا وحسابك
إياد : خايفة من ايه ؟ مرات إياد لازم تكون قلبها جامد
قال ذلك وهو يزود سرعتة
أميرة بزعر : عشان خاطري يا إياد
إياد بصدمة : نهاااار أسود
يونس : في ايه ؟
إياد : العربية مفيهاش فرامل
الجميع : ايييييه ؟
حاول إياد التحكم في سرعته ولكنه فشل
يونس : حاول تمشي في طريق هادئ مفيهوش نااس عشان ميكونش في ضحايا
رغد وهي تتمسك ب يونس أردفت برعب : هنعمل ايه ؟
أميرة : احنا لازم ننزل منها
إياد : مش هينفع ننزل من العربية وهي سريعة كده
التفت إياد بسيارتة جهه اليسار في طريق خال من الناس والسيارات
يونس : ده طريق ايه ده ؟
إياد بعدم تركيز : مش عارف اهو طريق فاضي وخلاص
أميرة بصراخ : حاسب يا إياد
ولكنه قد فات الأوان وانقلبت السيارة بهم
فقد الجميع وعيهم لدقائق
فاق يونس بتعب وكان وجهه ملطخ بالدماء أردف بهمس: رغد
نظر بجانبة وجد رغد فاقدة وعيها ووجهها أيضاً ملطخ بالدماء وكذلك إياد وأميرة
زحف بصعوبة ورفع قدميه وكسر الزجاج وخرج من السيارة
التفت على الجانب الآخر وجلس على ركبتيه وأخذ يربت على وجهه رغد بذعر: رغد ردي عليا أنتي كويسة
أخذ يضرب الباب بقدمية عده مرات حتي نجح في فتحة وأخرج رغد منها
أردف : رغد سمعاني ردي عليااا
تتأوة رغد بألم : إيااااد يا يونس إياااااد أنا كويسة
عاد مره أخرى تجاه السيارة وجد إياد يتألم أردف
إياد : أميرة يا يونس أميرة ورغد خرجهم الأول
يونس وهو يمد يده له : هخرجها بس تعال أنت الأول
إياد برفض:لا خرج أميرة الأول يا يونس رغد فين ؟
يونس : أنا خرجتها متقلقش هات إيدك يا إياد بلاش عناد
إياد: لا أميرة الأول يلا يا يونس أنا هحاول أخرج لوحدي ساعد أميرة وحياة رغد عندك
اتجه يونس تجاه أميرة وكسر باب السيارة وأخرج أميرة منها وساعدها في الوصول لرغد
أميرة بألم : فين إياد ؟ إيااد
رغد ببكاء : إياد يا يونس ساعد إياد بسرعة
يونس : حاضر خليكم هنا متتحركوش من مكانكم
تركهم يونس وتقدم خطوتين ولكن حدث شيئا لم يكن في الحسبان
انفجرت السيارة مثل إنفجار قنبلة موقوتة
رغد وأميرة بصراخ وصوت واحد: إيااااااااااااااد
يونس …………..
_ أمل أحمد
