خالد: ليلى اتقبض عليها
ادهم: ايه؟ اتقبض عليها؟ انت بتهزر صح؟
خالد: اه بهزر وجاي اتخانق معاك هزار واقولك حل عنا هزار
ادهم: اتقبض عليها ازاي يعني وليه؟
خالد: انت بتسالني انا؟ ما تروح تسال جدك
ادهم كان هيتجنن ا ول ما سمع اسم جده وبص لابوه
علي: اكيد ده سوء تفاهم
خرجوا كلهم وراحو للقسم اللي ليلى موجودة فيه
واول ما دخلوا لوكيل النيابه اللي بيحقق مع ليلى لقوا سليم قاعد هو وريهام وليلي واقفه متكلبشه وبتعيط.
اول ما ادهم دخل جريت عليه ورمت نفسها في حضنه وبتعيط
ادهم: ايه اللي بيحصل هنا ده؟
وكيل النيابة: ارجعي مكانك يا بت انتي
ادهم: اسمها ليلى ولما تتكلم معاها تتكلم بادب انت فاهم؟
وكيل النيابة: افندم؟ وتطلع مين سيادتك؟
ادهم: اطلع زي ما اطلع انت تتكلم عدل وبعدين انت قابض عليها بتهمه ايه ان شاءالله؟؟
وكيل النيابة: وانت مال اهلك
علي: لو سمحت انا على سليم خطاب وده ابني ادهم خطاب ومعلش اعذر ابني على تهوره.
وكيل النيابة: افندم؟ انا كده مش فاهم حاجه
( بص لسليم) هما دول ابنك وحفيدك؟
سليم: ايوه ابني وحفيدي
وكيل النيابة: امال في ايه؟
ادهم: المفروض سيادتك اللي تقول في ايه وقابض على خطيبتي ليه؟
وكيل النيابة: خطيبتك؟ دي خطيبتك؟
ادهم: ايوه خطيبتي
وكيل النيابة: جد حضرتك بيتهمها بسرقه مليون جنيه منه والتحريات اثبتت انها فعلا اتفتح لها حساب في البنك امبارح بالمليون جنيه دي.
ادهم: وفين دليل السرقه؟ وبعدين من امتي اللي بيسرق بيروح يحط الفلوس في البنك؟
وكيل النيابة: انا معرفش جدك عملها محضر بالسرقه
ادهم: جدي كتب شيك وعطاه لليلى وليلى عطتهولي وانا فتحتلها حساب بالبنك بالمبلغ ده والمحامي بتاعي عمل الموضوع ده وده سهل تتاكدوا منه مفيش سرقه حصلت.
استمر التحقيق والمحامي بتاع على جه
طول الوقت كان ادهم قاعد تايه مكسور متكتف مهزوز مش عارف يعمل ايه؟
نظرات الاتهام اللي شايفها في عيون خالد او ماجده او عم فتحي مش قادر يستحملها
اما نظرات ليلى فكانت، هو مش عارف يفسرها هيا نظرات استنجاد؟ نظرات اتهام انت السبب؟ ولا نظرات خيبه امل؟ ولا نظرات فقدان ثقه؟ ولا هيا ايه بالظبط؟
وخلال كام ساعه كان الموضوع خلص وادهم اخد ليلى يروحها بيتها وطول الطريق الكل ساكت بيقطع الصمت ده دموع ليلى اللي عامله زي السكاكين بتقطع في قلبه.
ريهام وسليم كمان روحو وخيبه امل مرسومه على وش ريهام
سليم: مالك في ايه؟
ريهام: في ايه؟ في ان احنا رجعنا بخيبه امل قد كده وطلع كله فشنك
سليم: مين قالك كده؟ الموضوع ماشي زي ما انا عايز بالظبط
ريهام: ازاي بقى وبسلامتها خرجت منها ببساطه؟
سليم: طيب ما هي لازم تخرج امال ايه
ريهام: ولما هيا هتخرج وانت عارف كده كان لازمته ايه بقى الوش ده كله؟
سليم: ده ليه كل لازمه هتشوفي دلوقتي لازمته ايه.
ريهام: لااااا انت تفهمني.
سليم: في ان انا كنت عايز اوصل رساله وهي وصلت زي ما انا عايز
ريهام: رساله ايه؟ ادهم طلع ليلى وبقي بطل في نظرها وملاكها الحارس
سليم: انتي شايفه كده؟
ريهام: ايوه طبعا احنا اللي رجعنا بخيبه الامل
سليم: لو حد رجع بخيبه امل يبقي مش احنا
ريهام: امال مين؟ ده ليلى وادهم زمانهم بيحتفلو.
سليم: يحتفلو بايه؟ بانها اتحبست بسببه؟ ولا انها اتهمت بالسرقه؟ ولا انها اتهزقت مننا؟ ولا اتهزقت من وكيل النيابه؟ لو في حد خاب امله هيبقي ليلى وادهم كل واحد فيهم خاب امله
ليلى هيخيب املها انها تعيش حياه طبيعيه مع عيله عندهم استعداد يحبسوها
وادهم هيخيب امله في انه يعرف يحمي حبيبته او يحسسها بالامان
انا كنت عارف انها وقت بسيط وهتطلع بس اثارها هيفضل محفور عند الكل فهمتي.
ريهام: انت ايه؟ داهيه بتعرف توصل للي انت عايزه
بس افرض انهم تخطوا المرحله دي وكملوا؟
سليم: اشك وبعدين انا سبق وجربت موضوع خيبه الامل ده وصدقيني بيجيب من الاخر وحتي لو تخطوه خططي ما بتخلصش ما تقلقيش
ريهام: بس ده ابني
سليم: وحفيدي وعايزله واحده تستاهله وهو هيفوق وهيعرف ان احنا بنعمل كده علشان خاطر مصلحته ما تخافيش
ريهام: يعني هيسامحنا؟
سليم: طبعا ده ابنك.
ادهم وصل اخيرا لبيت ليلى ودخلها ودخل معاها
لاول مره يحس انه مش مرغوب فيه
ادهم: انا عارف انكم كلكم بتتهموني ان انا السبب وعندكم حق
عم فتحي: يا ابني لأ بس انت بتعادي اهلك واعلنتوها حرب واحنا بنتاخد في الرجلين
ادهم: عارف وحقكم عليا
خالد: ونصرفها منين دي؟
ادهم: معلش يا خالد
ليلى: انت ليه عملت كده؟ انا مش عايزه فلوس، انت خليتهم يتهموني بالسرقه بعملتك دي
ادهم: متخيلتش ابدا انها ممكن توصل لدي.
ليلى: اهي وصلت والله اعلم المره الجايه هتوصل لايه؟
ادهم: مفيش مره جايه
ليلى: يعني ايه؟
ادهم: يعني هما بيأذوكي علشاني ومش هيبطلو وانا عندي استعداد اكمل قصادهم واحارب بس مش على حسابك انتي
كل حرب بيكون فيها خساير فمش هينفع لو هتكوني انتي الخساير دي
انا بحبك يا ليلى وبعشقك وحياتي من غيرك ملهاش طعم او معني
بس حياه من غير معني ارحم مليون مره من حياه انتي بتتأذي فيها
مش هستحمل انهم يأذوكي تاني.
وبعدين طالما مش هقدر احميكي يبقي ما ينفعش افضل معاكي
ليلى: انت بتقول ايه؟ وعايز توصل لايه؟ انت بتسيبني؟
خالد: هو بيقول اللي لازم يحصل. لا احنا من تووبه ولا هو من توبنا
ادهم: انا اسف يا ليلى بس دي كانت البدايه وسليم لمح انه ممكن يعمل اكتر من كده وانا كنت غبي مفهمتوش او تجاهلته او افتكرته جد واخره هيضايقك بكلمه او كلمتين مش اكتر لكن طالما عمل كده يبقي ممكن يعمل اكتر وانا مش هستحمل حاجه تجرالك بسببي.
فمفيش حل قدامي غير اني ابعد عنك وتعيشي بامان او اقتله
فده اسلم حل اسف ( قلع دبلته وحطها في ايد ليلى) انتي اجمل حاجه حصلتلي في حياتي ومش هبطل احبك ابدا وده وعد مني ولا قبلك ولا بعدك
اتمني تعيشي حياة اجمل مع غيري.
ليلى مصدومه مش قادره تنطق والدموع اتحجرت في عنيها لدرجه انها مش شايفه
ادهم قال كلمته ومشي وسابهم.
في البيت
ادهم وصل البيت ودخل لقي امه وجده مستنينه
سليم: كفاره وحمدلله على سلامه حبيبتك
ادهم: حبيبتي! انت عارف يعني انها حبيبتي؟ متخيلتش ابدا انك ممكن توصل لده
سليم: واكتر من كده كمان
ادهم: لا خلاص مالوش لازمه انت انتصرت وانا رفعت الرايه البيضا
ريهام بفرحه: قصدك ايه؟ سيبتو بعض؟
ادهم باستغراب ازاي امه مش حاسه انه بيموت من جواه
ادهم: اه سيبنا بعض افرحوا بقى انتو الاتنين ان خطتكم نجحت بعد اذنكم.
ادهم سابهم وطلع وريهام بتنادي عليه
ريهام: ادهم حبيبي استني بكره اعرفك على ست ستها ولا يهمك استني
سليم: مش وقته سيبيه لوحده شويه.
#########################
على خرج من القسم فضل ماشي في الشارع
التاريخ بيعيد نفسه من تاني
بس المره دي ابنه بيدفع الثمن.
رجع لذكرياته القديمه
علي: بابا انت فين؟
سليم: هنا في المكتب تعال
علي: انا اسعد انسان في الدنيا
سليم: خير؟
علي: انا بحب وعايز اتجوز
سليم: بجد؟ ومين بقى سعيده الحظ؟
علي: واحده انت ما تعرفهاش
سليم: ابوها مين او من عيله مين؟
علي: مش عيله حد
سليم: يعني ايه مش عيله حد؟ جايه من بره مثلا؟ مش مصريه؟ ايه شوقتني؟
علي: لا مش كده هيا بنت عاديه واهلها ناس على قد حالهم.
سليم: اوعي يكون قصدك على البنت اللي انت ماشي معاها بقالك فتره دي وجبتها شغلتها عندنا
علي: ايوه هيا دي بالظبط
سليم: انت اتجننت؟ انا قولت دي مجرد بنت هتقضي معاها وقت حلو وتروح لحالها واهو ترميلها قرشين وخلاص
دي اخرها ساعتين في شقه مفروش مش تقولي هتجوزها
علي: انت بتقول ايه؟ انا بحبها وعايز اتجوزها
سليم: انت اتجننت رسمي صح؟ فوق لنفسك
علي: هتجوزها حتى لو غصب عنك هتجوزها
سليم: وريني شطارتك.
اتفاجئ على بان اول حاجه امل اتطردت طبعا من شغلها وخالها كمان اترفد من شغله على الرغم انه شغال في مكان بعيد عن سليم بس نفوذ سليم كان واصل
المصايب بدات ترخ فوق راس امل وعيلتها.
على راح لابوه
علي: انت ليك علاقه باللي بيحصل لامل وعيلتها ده؟
سليم: وهو ايه اللي بيحصل؟
علي: انت اكيد عارف ايه اللي بيحصل
سليم: ههههههه روح لحبيبتك يالا ووريني هتعمل ايه معاها
اه روح الحقها لان زمانهم بيطردوا في الشارع
جري على وفعلا لقاهم بيطردوا في الشارع
ومفهمش ايه اللي بيحصل
علي: امل في ايه؟
امل: انا مش عارفه في ايه؟
انا واتطردت وخالي اتطرد وحتي عياله اتطردوا من مدارسهم ودلوقتي صاحب البيت بيطردنا ومن غير سبب
ام امل: ربنا يسامحه اللي كان السبب
علي: طيب هتروحو فين كده؟
خال امل محمد عبد الله: ارض الله واسعه
علي: طيب تعالو معايا لحد ما تستقروا
اخدهم شقه خاصه بيه كان واخدها لسهره مع اصحابه ولحياته الخاصه
قعدوا في الشقه دي كام يوم لحد ما في يوم الباب خبط وامل فتحت لقت قدامها تلات رجاله طوال عراض
امل: خير في ايه؟
# انتي امل؟
امل: ايوه انا
دخلو وزقوها خالها طلع على صوتها
دخل التلات رجاله وضربوا خالها ومراته وامها وحتي هيا كمان
ضربوهم مش جامد بس ضرب اهانه مش اكتر
مشيوا وبعدها دخل سليم
كانو قاعدين في الارض بيعيطوا
سليم: ده اخره اللعب مع الكبار
خال امل: حضرتك مين؟ وبعدين احنا ما لعبناش مع حد كبير ولا نعرف حد اصلا كبير
سليم: بجد امال انتو قاعدين هنا في شقه مين؟
خال ليلى: ده على ابن صاحب الشغل بتاع امل وبيساعدنا.
سليم: وبيساعدكم ليه؟ لله في لله؟
خال امل: هو انسان محترم
سليم: متعملش فيها اهبل يا راجل انت
انت عارف انه بيحب امل بنت اختك وعايز يتجوزها وده شيئ مش هسمح بيه ابدا
معدش غير ناس من الرعاع هيناسبوني
امل: هو انت السبب في كل اللي حصلنا؟
سليم: برافو وكل اللي حصل ده عينه بس من اللي هعملو فيكم لو ما نهيتيش العلاقه دي
امل: انا بحب على.
سليم: خلاص حبيه براحتك بس على هطرده من بيتي وهحرمه من كل حقوقه وانتو هتترموا في الشارع وعيال خالك دول هخليهم يسرحوا في الشوارع يبيعوا ورد ومناديل
وابقي خلي على ينفعك
يا تبعدي عنه وهعوضكم يا تفضلي معاه وتتشردوا كلكم في الشارع
سابهم ومشي وهما محدش فيهم نطق او كلمها
على اول ما راحلهم وشاف اثار الضرب عليهم وعرف اللي حصل.
قرر انه يفضل مع حبيبته مهما يكون التمن ورجع اتخانق مع ابوه ولم هدومه ومشي وقرر انه يشتغل ويصرف عليهم.
حاول يشتغل بس اول ما يعرفوا اسمه يرفضوه على طول
ابوه حرص انه ما يلاقيش شغل ابدا
على حاول يشتغل في اي مجال بس ما عرفش وصل بيه الحال انه اشتغل بني يشيل طوب على ضهره ويرجع بالليل مهدود ومتعور في كل جسمه وامل بتشوفه تعيط بصمت
وهو يحاول يخفف عنها ويقولها ان اهم حاجه يفضلو مع بعض
بس حتى الشغل ده اتطرد منه
اشتغل جرسون واتطرد اشتغل صبي في قهوه واتطرد
في اي شغل بيشتغل فيه يومين او تلاته بالكتير ويطرد.
اتقفلت كل الابواب في وشه والحمل كتر عليه
وخال ليلى عياله اتشردوا بسببه وامهم بتبصله باتهام صامت
وامل حزينه عل عيلتها اللي بتتشرد بسببها
امها تعبت واخدها المستشفي وملقاش ثمن علاجها فاضطر يروح لابوه
علي: ارجوك كفايه ساعدني اعالج امها
سليم: واساعدك ليه؟ روح انت وريني شطارتك
مش راجل وتعرف تحمي حبيبتك يالا روحلها حب فيها ووريني الحب هيواجه ايه ولامتي هيفضل؟
علي: انت بتقفلها في وشي ارجوك انا مستعد لاي شيئ.
سليم: هعالجها واشغل خالها وارجع عياله المدارس وحتي امل كمان هشغلها بس بشرط
على كان عارف ايه هو الشرط بس خلاص مش بايده حاجه
علي: انا موافق على شرطك
سليم: روح ودعها وارجع
على راح لحبيبته اللي اول ما شافته عرفت من وشه انه خلاص انتهي
امل: ما تقولش اي حاجه! قولتلك انت فين وانا فين؟ وانا ما ارضهالكش انك تتمرمط بسببي انت مش بني ولا صبي انت راجل كبير قد الدنيا دي فارجوك ما توطيش علشاني.
وكفايه عليا قوي انك حبتني بجد
علي: وهفضل احبك لاخر يوم في عمري هحبك كل حاجه هتتصلح اول ما انا ابعد
امل: عيش نيابه عني وعنك. عيش لينا احنا الاتنين مع السلامه).
فاق من ذكرياته ومسح دمعه نزلت غصبا عنه
وقرر ان كفايه كده قبل كده كان صغير وقليل الحيله ومعرفش يدافع عن حبيبته
بس دلوقتي مش هيسمح ان ابنه يعيش كسره القلب والعجز وقله الحيله
لازم يوقف لابوه
روح بسرعه على بيته كان هدوء مسيطر على البيت
طلع جري لاوضه ادهم واتفاجئ من اللي شافه
علي: انت فاكر نفسك بتعمل ايه؟
ادهم: بصلح غلط عملته
اسف.
