ادهم لف وشه ومشي ودمعه فرت غصب عنه مسحها بسرعه قبل ما يعترف هو بيها
مرضيش يبص وراه لانه لو بصلها هيرجع
مشي وهو ماشي سمع حد بينادي عليه
يا استاذ انت يا استاذ كابتن
ادهم بص لظابط الامن
ادهم: افندم
الظابط: الانسه اللي كانت معاك
ادهم بص ناحيتها ويدوب هيقول مالها لاقاها واقعه في الارض والناس بدؤا يتلموا عليها
جري عليها حاول يفوقها
ادهم: ليلى ليلى فوقي فوقي علشان خاطري.
بيبص حواليه لمح ابوه داخل واول ما شافه جري عليه
علي: ايه اللي حصل مالها؟
ادهم: معرفش مالها وقعت مره واحده
علي: طيب شيلها مستني ايه نطلع بيها على اقرب مستشفي اه صح طيارتك! طيب حطهالي في العربيه وانا هاخدها وانت الحق طيارتك
ادهم شالها واخدها لعربيه ابوه حطها على الكنبه ورى وبيبصلها
علي: ادهم مش هتلحق طيارتك سيبها خلاص انا هخلي بالي منها
ابوه شد الباب من ايده وقفله وادهم واقف مش مستوعب ايه اللي بيحصل.
علي: ادهم
ادهم بص لابوه بنظره تايه
علي: طيارتك روح انت سامع النداء الاخير
ادهم وقف لحظه: في داهيه الطياره يالا على المستشفي لازم اطمن عليها الاول مش هينفع امشي واسيبها كده
ابوه ابتسم وركب العربيه وعجبته فكره ليلى وطريقتها انها تخلي ادهم موجود
ادهم ركب واخد ليلى سندها عليه
وابوه ركب وبيسوق
ادهم: بسرعه يا بابا لو سمحت هيا مش بتفوق نهائي
علي: عايز يطمنه انها ممكن تكون عملت كده علشان يفضل وبس
ادهم: فين شنطتي؟
علي: شنطتك؟ اهي على الكرسي جنبي
شدها ادهم وطلع منها البرفان بتاعه وحاول يفوق ليلى بس مش بتفوق
هنا على قلق هو كان فاكر انها بتمثل مش بجد
علي: هيا مش بتفوق ليه؟
ادهم: معرفش هيا كانت تعبانه وانت جايبها؟
علي: لا كانت بس منهاره من بعدك عنها لكن مش تعب معرفش يا ادهم
ادهم: طيب بسرعه وحياتك وكلم المستشفي قولهم ان احنا على وصول
ادهم: نتصل باهلها نقولهم؟
علي: لا نقولهم ايه لما حتى نوصل ونطمن عليها الاول.
اخيرا وصلوا المستشفي ادهم شالها ونزل والدكاتره قابلوه واخدوها منه
وقف ادهم وابوه في قلق وخوف وترقب مستنين حد يطلع يطمنهم عليها
اخيرا طلع دكتور جريو عليه
ادهم: مالها في ايه اللي حصلها!؟ اتكلم
علي: ادهم اهدي واديله فرصه يتكلم اصلا.
الدكتور: الاول لازم نعرف منكم ايه اللي مرت بيه اليومين اللي فاتوا وايه اللي وصلها للمرحله دي؟
ادهم: مرحله ايه وحالتها ايه؟ ما تتكلم على طول
الدكتور: اولا اغمائها نتيجه لعدم تغذيه يعني بقالها يومين على الاقل ما اكلتش حاجه بمعني ما اكلتش نهائي ده غير انها حالا في حاله صدمه ودخلت في انهيار عصبي
ايه اللي حصلها وصلها لده؟
ادهم بعد خطوه ووقعد على اقرب كرسي وحط راسه بين ايديه هو عارف ان هو اللي وصلها للمرحله دي
هو بيقضي عليها بايده
علي: طيب هيا فاقت؟
الدكتور: لا احنا ركبنالها محاليل علشان نغذيها ونعملها ارواء لانها داخله في مرحله جفاف وده لو استمر هيأثر على الكلي لانها تقريبا وقفت عن العمل بتاعها ولازم تشتغل تاني علشان ما يحصلش مضاعفات اكتر
اما الانهيار بقى فلازم نعرف سببه علشان نقدر نعالجها.
هيا حالا مستقره ومخدره واول ما النهار يطلع هيجوا دكاتره الطب النفسي وهيحتاجو يتكلموا معاكم الاول
حضرتكم علا قتكم بيها ايه؟
علي: ابني خطيبها وانا والده
الدكتور: امال اهلها فين؟
علي: هبلغهم حالا انا قلت بس نطمن الاول عليها
على اتصل بخالد وبلغه باللي حصل وخلال نص ساعه كان خالد ومحمد موجودين ورفضوا يبلغو حد من البنات في الفجر ده
خالد اول ما شاف ادهم جري عليه ومسكه من هدومه.
خالد: عملت فيها ايه تاني؟ ارتحت دلوقتي ارتحت؟ انت طلعتلنا منين هاه؟
ادهم سايبه ومش بيحاول يدافع عن نفسه او يرد حتى
محمد وعلي شدوا خالد بعيد عنه
علي: اهدي بس شويه يا خالد ومش وقته الكلام ده مش وقته
محمد: مالها وايه اللي حصل؟
علي: اغمي عليها واحنا في المطار وجبناها على هنا والدكتور قال انها ما بتاكلش ومفيش اي غذا وصلها نهائي وده سبب الاغماء
خالد: تاكل؟ تاكل ازاي وفي حد سادد نفسها عن الاكل وعن الدنيا كلها.
محمد: لازمته ايه الكلام ده اسكت بقى شويه
وبعدين مش هو اللي قالها تعمل في نفسها كده ( بص لعلي) وايه كمان؟ حاسس ان لسه في باقي لكلامك
علي: عندها انهيار عصبي
خالد: ومين اللي جابهولها؟ حاجه ما سمعتش عنها غير في المسلسلات.
ادهم: هو انت متخيل ان انا مش بتعذب وبموت من جوايا بسبب اللي حصل ده؟ انت متخيل ان مش موجوع زيهاويمكن اكتر؟ بايدي ايه اعمله وما عملتوش؟ قولتلي ابعد عنها واديني سمعت كلامك وبعدت ودي النتيجه اهي
خالد: يعني ده بسببي انا دلوقتي هاه!؟
علي: انتو بتتكلموا في ايه؟ هو يهم مين السبب دلوقتي ولا هيفرق في ايه؟ السبب الظروف اللي احنا كلنا فيها كل الموجودين هنا ليلى مهمه بالنسبالهم وده المهم.
خناقكم مش هيحل حاجه بالعكس لو فاقت وسمعتكم هتتدهور زياده ده اللي عايزينه؟
سكتوا هما الاتنين وكل واحد قعد في مكان بعيد عن التاني
اول ما النهار طلع بلغ اخواتها وابوها وجم كلهم المستشفي وقعدوا جنبها مستنينها تفوق
ادهم فضل قاعد بره ومرضيش يدخل عندها اوضتها ابدا
ادهم خلي ابوه يروح يرتاح شويه واول ما وصل البيت وشاف ريهام وسليم قاعدين
ريهام جريت عليه
ريهام: ابني سافر خلاص؟!
علي: وانتي ابنك يفرق معاكي ولا بتهتمي بيه حتى؟
ريهام: ايوه طبعاانا بعمل كده علشان مصلحته مش عايزاه يندم ابدا
علي: والله لما يعمل اللي هو عايزه ويطلع غلط احسن مليون من اننا نحاربه بالشكل ده ونهدله احلامه ونكرهه في الدنيا واللي فيها
سليم: انت لما تشوف ابنك بيعمل حاجة غلط لازم توقفه.
علي: لو ابني بيعمل غلط هنصحه واقوله ان ده غلط وهسيبه يجرب بنفسه وبعدين ده لما اكون بجد بميز بين الغلط والصح مش قاعد في برج وببص للناس من فوق وبصنفهم زي ما انا عايز كأن الناس مخلقوين عبيد وانت حاجه تانيه
سليم: انت تقصد ايه بالكلام ده؟
علي: انت فاهم اقصد ايه كويس! معترضين ليه على ليلى علشان بنت عاديه وفقيره؟ وايه يعني بس هيا دي اللي هتعرف تحافظ عليه وتسعده؟
سليم: زي ما انت كانت هتحافظ عليك الشحاته اللي كنت تعرفها؟
علي: انت زي ما انت مش هتتغير ابدا
سليم: واتغير ليه انا كده كويس
علي: طالما انت كده كويس يبقي لو سمحت روح بقى بيتك ومالكيش دعوه بيا او بابني
سليم اتصدم بالكلام اللي سمعه وريهام كمان
ريهام: عيب كده انت بتقول ايه يا على؟ عمي هو مش قصده هو بس تعبان علشان ابنه.
علي: لا مش تعبان وعارف انا بقول ايه وكلمه زياده منك هتخرجي معاه فاهمه؟ الظاهر ان سكوتي واحترامي ليكي نساكي نفسك وخلاكم افتكرتم اني ضعيف وشخصيتي ضعيفه لا فوقوا بقى انتو الاتنين
انت النهارده اخر يوم ليك هنا اتفضل روح بيتك ومالكيش دعوه باي شيئ يخص ابني لا من قريب ولا من بعيد وقسما بالله لو اتدخلت في شيء يخصه ولا عملت حاجه تضايقه.
لاحجر عليك واضربلك كام شهادة انك مجنون احبسك في دار مسنين ولا مستشفى مجانين
انا سكتلك كتير بس زمان كنت فعلا ضعيف لكن دلوقتي لا
وانتي لو ما اتلميتيش وقمتي بدورك كأم وبس فرحانه لابنها قسما بالله لاطلقك بالتلاته وابعتك بيت ابوكي
ولعلمك ادهم ما سافرش وهو حاليا جنب ليلى وهيتجوزها فاهمين ولا افهمكم؟
وانتي لو مش عاجبك سيبي البيت واهي عروسه ادهم تيجي مكانك وتبقي هيا هانم البيت يا اما تتلمي وتجهزي لابنك فرح محصلش
وزي ما ابنك سبق وقالك اختاري بنفسك
ودلوقتي انا طالع انام ومحدش يصحيني فاهمه؟ اصحي الاقيك مشيت على بيتك
سابهم وطلع فعلا نام بس النوم لمرتاحي البال.
ليلى لسه ما فاقتش وماجده قاعده جنبها وادهم بره الاوضه رايح جاي ولا بيهدي ولا بيقعد هيتجنن من القلق عليها
ماجده خرجتله بره
ماجده: طيب ادخل جنبها واقعد
ادهم: معلش انا كده كويس ادخلي انتي ارتاحي شويه ولو عايزه تقفلي ستاره الشباك علشان ترتاحي اقفليها
ماجده: وانت هتتطمن عليها ازاي لو قفلتها؟
ادهم: ما تشغليش بالك بيا
ماجده: وانت كمان ما تشغلش بالك بيا
قربت منه ماجده ومسكت ايده.
ماجده: ما تلومش نفسك على اللي حصل انت مالكش ذنب
ادهم: امال الذنب ذنب مين بقى؟ انا كان لازم ابص لبعيد بس كنت اناني مفكرتش غير في نفسي وبس
ماجده: والحب ايه غير انانيه؟ انت بتحبها وعايزها مهما يكون الثمن وهيا كمان
تبقي انانيه فعلا لو الحب ده من طرف واحد لكن انتو الاتنين بتحبوا بعض.
ادهم ما تخافش عليها ليلى قويه وهتلاقيها فاقت وتصوت علشان نخرجها من هنا انت عارف انها مجنونه انت بس هاتلها علبه شوكولاته زي اللي جبتهالها قبل كده وهيا هتقوم تتعلق في رقبتك
صح مش انت غني؟
ادهم: اه وبعدين؟
ماجده: من ساعت ما اكتشفنا انك غني وانت مجبتلهاش شوكلاته خالص ليه؟ ولا كان في الاول علشان المفروض بقى انك فقير بس مش مستخسر حاجه في حبيبتك؟
ادهم: لا والله ابدا بس انت شايفه الظروف عامله ازاي الحادثه بتاعتي وبعدها خلافها مع ماما والمشكله اللي حصلت واهو دلوقتي اهو
تتطلع بس من هنا وانا هفرشلها الارض شوكولاته مش علبه بس
حست فعلا ان هو بيحب اختها سابته ودخلت جنب اختها
على راح شغله الصبح ورجع اخر النهار البيت يغير وينزل لادهم يطمن عليه
اول ما دخل البيت شاف سليم وريهام
علي: انت لسه قاعد ليه؟
ريهام: وبعدين يا على معاك؟
علي: ما تدخليش في اللي مالكيش فيه واتفضلي اطلعي اوضتك
ريهام: افندم؟
علي: ايه ماسمعتيش؟ اطلعي اوضتك وبسرعه اتفضلي
اول مره على يزعق في ريهام وهيا خافت وطلعت فعلا اوضتها
سليم: عايز تقول ايه ومش عايز مراتك تسمعه؟
علي: عايز اقولك ان انت كنت غلط ولسه لحد النهارده مازلت مصر تغلط هديت حياتي قبل كده وجاي دلوقتي تهد حياه ابني
سليم: انا بعمل اللي انا شايفه صح؟ والبنت دي مكنتش هتسعدك وانت متجوز ستها.
علي: مين قالك انها مكنتش هتسعدني؟ تعرف انا لسه لحد النهارده بحبها ومفتقدها في حياتي ومعرفتش احب غيرها ابدا
الحياه بيني وبين ريهام بارده عمري ما حبتها ابدا وحتي هيا كمان ماحبتنيش وبعدين عمرنا ما اتفقنا ابدا
سليم: انت معرفتش تحبها ما تجيبش الغلط عليا وبعدين عيبها ايه ريهام هاه؟
علي: انها من نوعيتك النوعيه اللي بتبص للناس من فوق، النوعيه اللي كل همها لبست ايه وده من تصميم مين؟ النوعيه اللي كل يوم والتاني حفله وسهر وبس! النوعيه اللي مرضتش تخلف تاني بعد ادهم علشان تخنت كام كيلو وجسمها هيبوظ؟ تعرف انا كان نفسي يبقي عندي كذا عيل مكنتش عايز ادهم يبقي وحيد زيي انا بس للاسف اختيارك خلي ابني وحيد ودلوقتي جاي تعيده من الاول وجديد وتختارله واحده نفس نوعيه ريهام؟ ده مش هسمح بيه ابدا فاهم؟
ودلوقتي اتفضل السواق بره هياخدك لبيتك
حسين يا حسين
حسين جه يجري: ايوه يا افندم
علي: سليم باشا رايح بيته وصله
حسين: حاضر يا افندم حضرتك اتفضل
سليم: على انا عملت كده حب في حفيدي
علي: انت ما تعرفش تحب اصلا
سليم: انت حرمتني منه طول عمره وسافرته بعيد عني كتير ما تحرمنيش تاني منه.
علي: ايوه بعدته عنك علشان ما تربيهوش على الفوارق وانه فوق البشر واديني اهوه رجعته وخليته يقف جنبي واخيرا حب وهيستقر جيت انت هديت كل حاجه
سليم: ادهم حفيدي ومعنديش غيره ارجوك خليني جنبه
علي: اسف انت ما بتعرفش تفضل جنب حد انت بس بتعرف تدمر كل حاجه جميله
سليم: لا يا على انا بحبه وعايز مصلحته وانت كمان بحبك وعملت اللي عملته بدافع الحب
علي: حب؟ اللي بيحب ما يأذيش انت دمرتني ودمرت امل وبهدلت عيلتها وشردتها.
حب ايه اللي بتعمل بدافعه اوعي تظلم الحب معاك اتفضل امشي وياريت ما تجيش تاني
ادهم لو حب يشوفك هيجيلك بس ما اعتقدش انت هتموت وحدك لانك معندكش حد بيحبك بصدق كل اللي حواليك عايزين فلوسك
هو ده الوسط اللي انت محاوط نفسك بيه خليه ينفعك لكن سيبني انا وابني في حالنا
وسيب ادهم يعيش في حضن حبيبته اللي حبته وهيا فاكره انه فقير وراضيه تعيش معاه في عشه حتى
اتفضل روح مملكتك واشبع بيها.
سابه وطلع وهو مشي مع حسين يوصله وحس انه عجز قوي وانه فعلا وحيد قوي.
اخر النهار الكل اتجمع عند ليلى اخواتها خالد ومحمد وناديه وماجده وحتي كمان اصحابها سمر وهبه وشرين ووفاء
وادهم مازال مصر يفضل بره مش عايز يدخل
الدكتورة النفسيه جت وطلبت ان الكل يخرج ويسبوها ترتاح بس رفضوا وقالولها ان هما هيخرجوها من حالتها بس تفوق
ليلى هنا بدأت تفوق والدكتوره جنبها بتكلمها
ليلى فتحت عنيها وبصت لكل اللي حواليها بذهول كانها متعرفهمش او اول مره تشوفهم.
كله بيكلمها وبيعرفها بنفسه وهيا بتبصلهم
الدكتورة: ليلى انا الدكتوره هاله سامعاني؟
قولي اي حاجه
ادهم طبعا واقف على الشباك هيتجنن عليها
ليلى دموعها نزلت واحده واحده
ليلى: سافر سابني وسافر سابني لوحدي
الدكتورة: مين؟ بتتكلمي عن مين يا ليلى؟
الدكتورة قربت وحاولت تمسك ايديها بس ليلى مره واحده صرخت
ليلى: ابعدي عني انتي عايزه ايه مني؟ ابعدوا كلكم عني مش عايزه حد هنا ابعدوا
الدكتوره طلبت حقنه مهدئه والممرضه جابتها.
وحاولو يكتفوها علشان يدوها الحقنه بس مقدروش وهيا بتصرخ اكتر واكتر اخواتها كمان بيساعدوهم يكتفوها
ليلى بتصرخ وبتنادي على ادهم وبتنادي عليه
وبتقاومهم البنات دموعهم نزلت عليها
ليلى: ادهم؟ ادهم سيبتني ليه لوحدي؟ سيبتني ليهم؟ ادهم ادهم
هنا ادهم ما استحملش تكتفيهم ليها كده ودخل عندهم
ادهم: ابعدوا عنها كلكم ابعدوا
زقهم بعيد كلهم وهو اخدها في حضنه
الدكتورة: احنا لازم نديها الحقنه وبعدين انت انت مين انت؟
ماجده: ده ادهم
ادهم: هششششش اهدي يا ليلى انا اهو جنبك انا ما سافرتش يا حبيبتي انا جنبك
ليلى بتعيط: ادهم عايزه ادهم هاتولي ادهم
ادهم: ليلى انا اهوه جنبك
ليلى: انتو مش عاييزني اروحلو ليه انا عايزه ادهم
ادهم بص للدكتورة باستفسار
الدكتورة: لازم تاخد الحقنه المهدئه
ادهم وافق وهو بنفسه مسك ايد ليلى اللي استسلمت تماما بين ايديه وكان عقلها الباطني حس بالامان بين ايديه.
الممرضه اديتها الحقنه وبدات ليلى تغيب عن الوعي وهيا بتنادي على ادهم
ادهم حطها في السرير براحه
ادهم: هيا مش عارفاني ليه؟؟
الدكتورة: لانها مش شايفاك حاليا بس هيا سكتت معاك وده معناه ان جزء منها حاسس بيك. دلوقتي انا لازم اعرف كل حاجه حصلت وصلتها للحاله دي وليه بتنادي عليك
ادهم: انا مش هسيبها لوحدها
الدكتورة: هيا مش لوحدها وبعدين مش هتفوق قبل 4 ساعات على الاقل وبعدين دي خطوه مهمه في علاجها.
ادهم حكي للدكتوره كل اللي حصل ورجع لليلي تاني ومستنيها تفوق
طلع النهار وهيا لسه نايمه الكل روح وهو اللي فضل جنبها وبدري ماجده جتلها لقتها لسه نايمه وادهم جنبها على الكرسي نايم
استغربت من كميه الحب اللي جواه
ليلى بتفوق اهوه ولسه بتنادي على ادهم
ادهم صحي على صوتها
ادهم: ليلى حبيبتي انا جنبك اهوه انا اسف اني مشيت كنت غلطان بس اوعدك مش هسيبك تاني بس انتي قومي وارجعيلي.
ليلى بصتله وهيا ساكته وهو بيسال نفسه اذا كانت عرفاه ولا زي امبارح هتقوم تصرخ.
