كل يوم بيعدي نسمه بتقرب اكتر من ادهم وعلي
بقت مسؤله عن كل حاجه تخص ادهم شغله مواعيده حتى اكله
في مره وهو غرقان في شغله هيا دخلت عنده ومعاها اكل حطته على الترابيزه وراحت لادهم شدت من ايده قلمه وقفلت اللاب وقفلت الملفات فبصلها باستغراب ورجع لورا في كرسيه
ادهم: وبعدين؟
نسمه: وبعدين تقوم تاكل يالا
ادهم: الملف ده لازم يخلص لاني هقابل العميل بتاعه بالليل
نسمه: هيخلص بس دلوقتي هتاكل يالا.
ادهم: طيب اطلبي الاكل ولما يجي هناكل
نسمه: الاكل على الترابيزه قوم انت بس
ادهم قام معاها وقعد وهيا جنبه وفتحت الاكل وهو استغرب جدا
ادهم: ايه ده ان شاءالله؟
نسمه: رنجه
ادهم: رنجه وهنا في الشغل؟
نسمه: ولولا ان احنا في الشغل كنت جبت بصل كمان
ادهم: بصل؟ ما تتخيليش انا بكره البصل قد ايه؟
طيب انتي كلي ده وانا هطلب اكل
نسمه: انت هتاكل معايا فاهم؟
افتكر ليلى وبدايه علاقتهم مع بعض والاكلات الغريبه اللي كانت بتأكلهاله
نسمه: يالا مد ايدك
ادهم: امد ايدي في ايه ودي تتاكل ازاي اصلا سيادتك ولا جايبه شوكه ولا سكينه!؟
نسمه: لانها بتتاكل بالعيش
ادهم: كلي انتي انا هقوم اط…
قاطعته: هتاكل معايا
قطعت لقمه وغمزتها بالرنجه ومدت ايدها لبوقه
ادهم: سيادتك هتاكليني؟
نسمه: لو مش عندك مانع؟
ادهم فكر للحظه وبعدها فتح بوقه وهيا حطتها في بوقه وفعلا كانت بتاكل وتأكله معاها لانه رفض نهائي يحط ايده
ليلى راحت عند ابوها ومع اخواتها وابنها مندمج معاهم وهيا قاعده سرحانه
ادهم واحشها جدا وبقاله فتره مجاش
كل شويه تمسك التليفون علشان تكلمه وترجع في قرارها واخيرا اخدت القرار
ليلى: ماجده ينفع اسيب كيمو معاكي ساعه كده؟
ماجده: طبعا شوفي وراكي ايه وما تقلقيش عليه.
ليلى خرجت وراحت لادهم تشوفه بنفسها وتشوف كمان سكرتيرهه اللي مش بيبطل كلام عنها وصلت لمكتبه وواقفه بره وسامعه ضحكهم وهزارهم
ادهم: نسمه خلاص كفايه كده
نسمه: واحده كمان علشان خاطري واحده بس يالا
ليلى بره هتجنن واحده ايه اللي هيا عايزاها منه
راحت فتحت الباب ودخلت وهنا كانت نسمه بتحط اللقمه في بوقه
الاتنين بصوا للباب وادهم اول ما شافها وقف
نسمه بصتلها باستغراب
نسمه: تحب اطلعها بره؟
ادهم: لا لا سيبينا لوحدنا.
ليلى: جيت في وقت مش مناسب ولا ايه؟
قربت شافت الاكل اللي على التربيزه
ليلى: رنجه؟ ما تتخيلوش ريحتكم زفره قد ايه؟
ادهم: انتي سايبه كريم فين ومع مين؟
ليلى: هو انت لسه فاكره ( بصت لنسمه) انت عندك اللي شاغلك عنه
نسمه: لو سمحتي تلميحاتك دي مش عجباني
ليلى: وانتي كلك على بعضك مش عجباني اتفضلي شيلي الاكل ده واطلعي بره
نسمه: افندم؟ وسيادتك تبقي مين علشان تدي اوامر كده؟؟
ليلى: انا مراته وام ابنه ولا ماقالكيش انه متجوز؟
نسمه بصت لادهم
ادهم: نسمه سيبينا لوحدنا لو سمحتي
نسمه خرجت بره وهيا متفاجئه مصدومه هيا فعلا ما كنتش تعرف انه متجوز
محدش قال قدامها خالص انه متجوز
فكرت انها تمشي! بس تمشي ليه؟ هو مقالهاش اي حاجه وعمره ما تخطي اي حدود معاها؟
ادهم: مراتي؟ مكنتش اعرف ان انتي مراتي؟
ليلى: سوري كنت مراتك مبسوط؟
ادهم: دلوقتي بقيتي كنت؟ انتي عايزه ايه؟ بتكرهيني؟ بتحبيني؟ عايزاني ولا مش عايزاني؟
ليلى سكتت ومش عارفه ترد
ادهم: ساكته يعني؟ بتغيري عليا ليه؟
ليلى: انا ما بغيرش عليك
ادهم: اه صح امال كنتي هتضربيها ليه؟
ليلى: وسيادتها كانت بتأكلك ليه؟ ايه اللي بينك وبينها؟
ادهم: شيئ ما يخصكيش
ليلى: بقى كده؟
ادهم: ايوه كده بتسألي بصفتحك ايه؟
ليلى: ام ابنك.
ادهم: ام ابني ملهاش حق تسأل سؤال زي ده
ليلى: اوكي عارف انا مش عايزه اعرف ولا انت هاممني ولا فارق معايا روح اتجوزها لو حبيت
سابته ومشيت وهو قعد على مكتبه ونسمه دخلتله
ادهم: معلش سيبيني لوحدي
نسمه: حاضر بس هيا دي مراتك فعلا؟
ادهم: كانت
نسمه: يعني ايه؟
ادهم: طليقتي مش مراتي ينفع بقى تسيبيني لوحدي؟
ادهم اخر النهار راح لمراته فتحتله وسابت الباب مفتوح ودخلت من غير ولا كلمه
دخلت على المطبخ كانت بتعمل اكل كريم.
هو دخل لقي ابنه بيلعب باسه ودخل وراها
ادهم: ايه مش هتكلميني؟
ليلى: عايز حاجه؟
ادهم: عايز اعرف عايزه توصلي لايه؟
ليلى: مش عايزه انت حر في حياتك
قرب منها ووقف وراها ومسكها من اكتافها الاتنين وضغط عليهم جامد
قرب قوي وهمس في ودانها
ادهم: وانا مش عايز ابقي حر! مش عايز! انا عايزك انتي وبس.
باسها في رقبتها وهيا واقفه مستسلمه لفها ليه واتقابلت عنيهم في نظره جوع وحرمان واصرار ان الجوع ده لازم ينتهي باسها ادهم بشره وحرمان وهيا تجاوبت معاه بنفس القوه
شالها واخدها اوضه النوم قطع هدومها اللي هيا لابساها وهو قلع قميصه وهيا صفارات الانذار بتضرب وبتتجاهلها
شوقها ليه اكبر من اي حاجه تانيه فخرستهم تماما وسابت نفسها في حضنه
وبدات تستمتع بوجودها في حضنه قاطعهم تليفونه بيرن ويرن ومش عايز يسكت.
ادهم مش عايز يرد لانه خايف انه لو قام مش هيرجع تاني
ليلى زقته: رد على تليفونك يمكن يكون في حاجه
ادهم اتنهد بصوت عالي وطلع تليفونه وبص للاسم وليلي كمان بصت للاسم واول ما شافته قامت من جنبه وهو مسكها من ايدها
ادهم: ما تقوميش مش هرد
زقت ايده بعيد وشدت ايدها ولبست روب طويل ووقفت وعطته ظهرها
فضل يبص لظهرها كتير وهو مش عارف يعمل ايه؟
اخيرارد على تليفونه
ادهم: ايوه يا نسمه في حاجه،؟
سمعها: طيب خلاص هاجي خلاص ربع ساعة واكون عندك سلام
قفل تليفونه وقام لبس قميصه وليلي بتراقبه
خلص لبس وبصلها
ادهم: شوفي دي كانت اخر محاوله مني اقرب منك! انا مش هفضل عمري كله ادفع في ثمن غلطه ما ارتكبتهاش
ليلى: مرتكبتهاش؟ شفتك بعيني في حضنها عريان تماما
ادهم: وانا مش فاكر ده ولا فاكر اني لمستها ولا فاكر اي حاجه؟ ربنا ما بيحاسبش المجنون او النايم او بمعني تاني اللي عقله مش موجود.
وانا عقلي مش مسجل ده يبقي كان عقلي مش موجود ساعتها يعني ربنا نفسه مش هيحاسبني لو عملت حاجه غلط ساعتها! ده ربنا! انتي بقى مصره تعاقبيني؟
ليلى: انا مش مصدقاك
ادهم: وخلاص مش عايزك تصدقي معدتش عايزك يا ليلى كفايه ذل بقى
ومن هنا ورايح انتي ام ابني وبس
انا هكمل حياتي بعيد عنك وهتجوز من تاني وهعيش
ليلى: نسمه صح؟
ادهم: ده شيئ ما يخصكيش
سابها ومشي وهيا فضلت تعيط وتفكر هو ممكن فعلا يكون بيقول الحقيقه؟
نسمه روحت بيتها واول ما شافت امها عيطت وقالتلها ان ادهم متجوز وعنده عيل
والام فكرتها انها ياما قالتلها ملهاش دعوه بالعالم دول
ادهم تاني يوم خرج من مكتبه وراح لنسمه فبصتله
نسمه: افندم عايز حاجه؟
ادهم: هردلك عزومه امبارح تعالي معايا
نسمه حاولت تعترض بس هو شدها من ايديها واخدها على مطعمه قعدوا واتغدوا في صمت
نسمه: انت ليه مخبي انك متجوز؟
ادهم: اولا انا مش مخبي
ثانيا انا مش متجوز احنا متطلقين.
نسمه: انتو عندكم عيل
ادهم: اهمم وبعدين
نسمه: المفروض تحاربوا علشانه؟
ادهم: ومين قالك ان احنا ماحاربناش؟
حكالها ادهم قصه حبه كامله من يوم ما شافها لحد ما اتطلقوا
نسمه: خساره
ادهم: خساره ايه؟
نسمه: حب زي ده تنهوه كده؟ ادهم هيا لسه عايزاك وبتحبك بدليل غيرتها امبارح وبعدين قالت مراتك مقالتش طليقتك وده علشان تثبت ان ليها حق فيك
ادهم: نسمه انا جربت كل حاجه وكل السكك مقفوله.
نسمه: لا مش مقفوله له متواربه لكن مش مقفوله
ادهم: وحتي لو مش مقفوله فانا قفلتها امبارح
نسمه: ليه كده؟ روحلها النهارده واستسمحها وبوس ايديها وخدها في حضنك وهيا هتحن
ادهم فضل مع نسمه يتكلمو كتير
نسمه: عندك صوره لابنك؟ واوعي تقول انه الصوره اللي على المويبل دي؟
ادهم: اه هو ليه؟
نسمه: كنت فكراه من عيال الاعلانات دي
ادهم: عيال الاعلانات دي عيال ولا ايه؟
ادهم اكتشف ان الكلام مع نسمه مريح جدا وانه بيحبها جدا بس حبه ليها مختلف عن حبه لليلي تماما
نسمه كمان اكتشفت انها مش بتحب ادهم حب راجل وست بس وهيا معاه حاسه بالامان.
على كمان بيحب يتكلم معاها ويقرب منها وهو كمان حكلها قصة حياته.
ادهم في شغله دخلت عنده دولي تعيط
دولي: الحقني يا ادهم الحقني
ادهم: ودي لعبه جديده زي بتاعت السفر ولا ايه؟
دولي: لا ابدا المره دي بجد انت لازم تساعدني
ادهم: عايزه ايه؟
دولي: بابا وماما
دولي بتعيط جامد
ادهم: في ايه مالهم؟
دولي: كانو جايين النهارده من المانيا
ادهم: وبعدين؟
دولي: الطياره وقعت يا ادهم
دولي انهارت من العياط وادهم قام يواسيها.
ادهم: انتي جاتلك اخبار مؤكده؟ ساعات بينزلو ويعملوا هبوط اضطراري وساعات بتبقي حاجات بسيطه ما تخافيش وتفائلي
ادهم واقف جنبها اخدها وروحها وحاول هو يوصل لاي حاجه عن ابوها او امها
عدد الناجيين كان قليل جدا وبينتشلو الجثث من المحيط ويبلغوا اهاليهم.
دولي راحت لادهم مكتبه ودموعها سابقاها واول ما شافها وقف وقابلها
ادهم: عرفتي حاجه جديده؟
دولي: اتصلوا بيا وطلبوا مني اجي اتعرف على جثثهم هما ولا لأ؟
انا مش هقدر يا ادهم مش هقدر
بتعيط جامد جدا ادهم ضمها وبيهديها
ادهم: هشششش اهدي يا دولي انا هروح مكانك ما تخافيش
ادهم بيمسح دموعها بايديه.
ادهم حس بحد قدام الباب بس افترض انه نسمه فطنش
دولي: انا هعمل ايه؟؟ اوعي تسيبني وتتخلي عني ارجوك؟ ارجوك يا ادهم خليك جنبي اوعدني؟
ادهم: ما تخافيش انا جنبك وهفضل جنبك وبعدين انا امتي اتخليت عنك علشان اتخلي عنك دلوقتي؟ هاه؟ انا ديما جنبك ولا ايه؟
نامت على كتفه وهو ضاممها
## تصدق انا كنت غبيه لما فكرت اني اصدقك؟
قام واتنفض وبص لمراته وهيا بتبصله بمرار
وما نطقتش ولا كلمه ومشيت.
دولي: انا اسفه انا هروح وراها اشرحلها و
ادهم: لا ما تروحيش سيبيها هيا سبق وحكمت ونفذت حكمها فمعدش يفرق سيبيها
المهم المفروض تروحي امتي؟
دولي: معادي في المطار بعد ساعتين
ادهم: طيب يالا بينا يدوب نلحق نوصل يالا
اخدها ومشي وطول الطريق هما الاتنين ساكتين ومفيش كلام يتقال
ادهم خرج تليفونه يرد عليه وحطه جنبه فدولي مسكته وبتتفرج على الصوره اللي في الخلفيه
دولي: جميل قوي الولد ده! بس من امتي بتحط صور اطفال كده؟
ادهم: ده كريم ابني
دولي: ده ابنك؟
ادهم: ومالك مستغربه ليه؟
دولي: لا عادي! بتشوفه على طول؟
ادهم: لا طبعا مش على طول، بستني وقت اكون فاضي فيه وامه تكون فاضيه وبشوفه
دولي: ده مش كفايه انا ابويا كان منفصل عن امي وكنت ديما بستني الوقت اللي اشوفه فيه ولما يجي يقضيها خناق مع ماما على اي حاجه
حاجه مش عجباه؟ حاجه انا غلطت فيها؟ حاجة هيا غلطت فيها؟ ويعدي الوقت واستني تاني وتاني وتاني.
وكبرت واديني اهوه لسه بستني يخلص شغل؟ يجي من سفر؟ حياتي كلها انتظار
ما تعملش في ابنك كده؟
ادهم: بتتكلمي وكانك مالكيش يد في اللي حصل! هو انتي ناسيه ان احنا اتطلقنا بسببك ولا ايه؟
ما علينا مش وقته يا دولي مش وقته! انا وعدتك اني هقف جنبك وهنفذ وعدي
سكت دولي ودموعها نزلت بصمت كانت عايزه تصرخ وتنطق وتقوله ان هو عمره ما خان ليلى ابدا
دولي: ادهم انت سبق وسألتني انت ازاي بيت عندي صح؟
ادهم: مش وقته احنا وصلنا يالا بينا
اخدها ونزلو وسأل على المكان اللي يروحوه
وصلوا واتفاجؤا بجثث كتير في الارض متغطيه
دولي انهارت من العياط وقعدت في الارض
الظابط: لو سمحتي المفروض حضرتك تيجي تتعرفي على الجثث
ادهم: انا هاجي معاك يالا اتفضل
ادهم بيشد ايده من ايدها وهيا متبته فيها جامد
ادهم: ما تخافيش هرجع على طول
قام ومشي خطوتين ولقاها وراه
دولي: لازم اجي معاك ده ااقل شيئ اعمله.
مسكت ايده وراحو ورى الظابط وسط الجثث لحد ما وقف قدام اتنين وكشفهم، ،
دولي صرخت ووقعت في الارض وادهم مسكها
ادهم: معلش يا دولي معلش البقاء لله
دولي: انا بقيت لوحدي ااااااه
اخدها ادهم وروحها وهيا منهاره تماما فضل جنبها وطلبلها دكتور كشف عليهاوعطاها مهدئ ونامت.
ليلى روحت بيتها النار بتاكل فيها ازاي فكرت تسامحه؟
ازاي فكرت ترجعله؟ هو سبق وخانها ومازال بيخونها
لازم تقطع اي امل جواها وتموته
اخدت ابنها في حضنها وفضلت تعيط
لازم تخرج من اي مكان يخصه
لمت هدومها وهدوم ابنها وراحت لبيت ابوها.
ادهم مع دولي مش عارف يسيبها ويمشي اتصل بالتليفون وطلب خدمه من حد
وهو مستني الباب رن وهو فتح
ادهم: كويس انك جيتي محتاج خدمه منك
نسمه: انت تشاور
ادهم: محتاجك تفضلي هنا لحد ما اروح مشوار وارجع ينفع؟
نسمه: هنا فين وعند مين هنا؟
ادهم: دولي وقبل ما تتكلمي ابوها وامها ماتوا في حادثه الطياره ويدوب جايبها من المطار اتعرفت على جثثهم وحاليا اخدت مهدئ بس مش هينفع نسيبها لوحدها فينفع تساعديني؟
نسمه: انا لله وانا اليه راجعون اه ينفع بس انت رايح فين؟ مفيش حاجه مهمه في الشغل؟
ادهم: رايح لليلي
نسمه:؟ ليه دلوقتي؟
ادهم: جت عندي وشافت دولي في حضني وانا بواسيها وطبعا عقلها مشي في اتجاه بعيد
نسمه: طيب ماهي جت وشافتني باكلك؟
ادهم: دولي مختلفه؟
نسمه: هيا دي دولي اللي كانت السبب؟
ادهم: اايووه هيا خلاص فهمتي ممكن بقى الحقها؟
نسمه: روح بس متحطش امال لانك سيبتها الوقت ده كله.
ادهم: انا معنديش امال اصلا انا بس هوضح اللي حصل تصدق او ما تصدقش معدش يفرق سلام
راح للبيت بس ملقاش حد وعرف انها سابت البيت من شكله وانها لمت هدومها وهدوم ابنها
راح بيت ابوها وخبط ودخل والمره دي شاف نظرات اتهام من الكل وفهم ان ليلى حكتلهم اللي حصل زمان ودلوقتي
ادهم: معني نظراتكم دي انها حكتلكم اللي حصل؟
خالد: شكيت انك خنتها بس اتخدعت بحبك الزايف ليها.
ادهم: حبي الزايف؟ انا مفيش حد في الدنيا دي حب مراته زيي انا! بس ما علينا انا مش جاي اسمع اتهامات ولا ادافع عن حاجه قديمه احنا خلاص اتطلقنا واللي بينا انتهي
ليلى: جاي ليه طيب؟
ادهم: هقولك معلومه صغيره وامشي
ليلى: تقولي انك مش عارف حضنتها ازاي ولا ان هيا اللي حضنتك ولا انك وعدتها غصب عنك تقف جنبها؟
ادهم: انتي عارفه اقف جنبها في ايه؟ ولا سمعتي كلمه وشوفتي حاجه بنيتي عليها فيلم كامل؟
ليلى: انا عارفه انا شفت ايه وبعدين انت لسه فاكر تجيلي دلوقتي؟ ولا لما خلصت معاها؟
ادهم: شوفتي دولي في حضني تعرفي بقى ان ابوها وامها كانوا في الطياره اللي الاعلام موراهوش غيرها؟ تعرفي انها كانت جيالي علشان اروح معاها تتعرف على جثثهم؟ تعرفي اني قلتلها مش هتخلي عنها وهقف جنبها لحد ما تعدي ازمتها دي؟ وفعلا انا جيتلك بعد ما روحنا المطار وشوفنا جثثهم وروحتها بيتها وطلبتلها دكتور؟
تعرفي كل ده؟ ولا افترضتي اني على علاقه بيها وخلاص؟ وحكمتي ونفذتي حكمك وسيبتي البيت واخدتي ابني معاكي!؟
عم فتحي: لا حول ولا قوة الا بالله
ربنا يصبرها الاب والام خسارتهم صدمه خليك جنبها يا ابني
ادهم: انا مش هدافع عن نفسي يا ليلى بس كل اللي هقوله ان لما حد بيلجألي ما بتخلاش عنه.
دولي فاقت ولقت نسمه جنبها
دولي ؛ادهم فين؟
نسمه: راح ينفذ ما يمكن انقاذه من حياته اللي انتي دمرتيها ومازلتي بتدمري فيها! ولانه خايف عليكي طلب مني اجيلك واقعد جنبك
دولي: انتي شمتانه فيا؟
نسمه: محدش بيشمت في الموت بس ده عقاب ربنا ليكي انك تتحرمي من الناس اللي بتحبيهم زي ما انتي حرمتيهم من بعض
حرمتي زوجه من زوجها وابن من ابوه واب من بيته ومراته وابنه.
دمرتي اسره كامله! ازاي تخيلتي ان ربنا هيسيبك بعد كل ده؟ يمهل ولا يهمل
دولي كل حاجه عملتها في يوم من الايام بتمر قدامها
قامت وقفت
نسمه: انتي عايزه ايه وانا اعملهولك
دولي: اللي عيزاه انا بس اللي اقدر اعمله
نسمه: طيب بتدوري على ايه؟
دولي خرجت CD خلاص لقيته ينفع توصليني اصلح اللي كسرته؟
ادهم عند ليلى شايل ابنه وحاضنه
ادهم: ارجعي البيت سبق وقولتلك انه بقى بيتك مش بيتي وابني يا يعيش هناك يا هاخده يعيش معايا
ليلى: انت بتهددني يا ادهم؟
ادهم: هو انا محتاج اهدد يا ليلى؟ انا بعرفك مش اكتر ليلى اللي بيني وبينك انتهي وده شيئ انتي سبق ووضحتيه باكتر من طريقه وما تخافيش مش هحاول ابني جسور خلاص اتكسرت واتهدمت فارجعي وانتي مطمنه
الباب خبط وخالد فتح وليلي وادهم اتفاجؤا بدولي.
ادهم: انتي جايه هنا ليه؟ وايه اللي قومك؟
ليلى: البقيه في حياتك
دولي: جايه اصلح اللي كسرته من سنه فاتت
ادهم: قولتلك مش وقته وبعدين اللي اتكسر خلاص مش هيتصلح خلاص يا دولي
دولي: لا مش خلاص انتو لازم تعرفوا ايه اللي حصل؟ وازاي حصل؟
ليلى: مفيش حاجة ممكن تقوليها تبرر اللي حصل فريحي نفسك
ادهم: مش قولتلك مالوش لازمه ما تتعبيش نفسك
دولي: لو سمحتو ممكن كمبيوتر او لاب.
خالد طلع اللاب بتاعه وعطته ال CD وطلبت منه يشغلها
ليلى: انتي جايه تفرجيني على جوزي وهو في حضنك
دولي: انا جايه اوريكي ايه اللي حصل وازاي جوزك نام عندي انا سجلت ال CD ده علشان كل شويه اتفرج عليه بس للاسف مفيش حاجة حصلت اتفرج عليها شوفيه يا ليلى وبعدها اتكلمي
شغلوا ال cd وبدؤا يتفرجوا عليها
دولي بتفتح الباب وادهم بيدخل
ادهم: اديني جيت اهوه واديني شوفتك اهوه خلاص ارتحتي؟
دولي: ادهم انا لسه بحبك.
ادهم: يوووه لحد امتي!؟ دولي ما تضيعيش عمرك تجري ورى وهم وسراب انا بالنسبالك سراب عيشي حياتك واخرجي بره حياتي ما تضيعيش عمرك دوري على حد يحبك وتحبيه وعيشي معاه بعد اذنك انا رايح لمراتي
دولي: عندك حق انا لازم اخرجك بره حياتي لازم
فضلت تعيط
ادهم: انا مش عايز اتاخر تروحي وترجعي بالسلامه اذا رجعتي
دولي: ينفع تقعد شويه؟
قامت وبتصب عصير ليهم
ادهم: قولتلك مش عايز اتاخر
كانت ماسكه في ايديها كوبيتين عصير.
دولي: نشرب مع بعض دول زي اي اصحاب وبعدها روح لمراتك
ادهم: ماشي يا دولي
ادهم شرب العصير ويدوب هيقوم بدأ يدوخ
ادهم: انا لازم امشي
كل ما بيحاول يقف يقع تاني ودولي ماسكاه لحد ما فقد الوعي تماما وهو بيردد انه لازم يمشي ليلى مستنياه.
دولي وقفت تتفرج عليه
ادهم وليلي وعيلتها بيتفرجوا وخالد وقف ال cd
خالد: اعتقد الباقي واضح
دولي: شغله لو سمحت الباقي اهم من اللي فات
ليلى: اهم في ايه انتي خدرتي جوزي وكلمتيني اروحلك اشوفه في حضنك ايه اللي اهم من كده؟
دولي: الباقي يهم ادهم مش انتي شغله لو سمحت
خالد شغل ال cd تاني
دولي واقفه وادهم مغمي عليه قدامها وباب اتفتح وراها وخرج منه سليم وريهام
دولي: اهو اغمي عليه هنعمل ايه؟
ريهام: ازاي هنعرف ليلى؟ وازاي هنخليها تيجي هنا؟
سليم: الاول لازم ندخله اوضت نومك
نادي سليم على اتنين من رجالته شالو ادهم وحطوه على السرير
ريهام: وبعدين؟
سليم: لازم يكون عريان تماما
ريهام: انت عارف ده معناه ايه؟
سليم: ماهو مش هينفع يخونها بهدومه كده؟ ريهام ليلى لو شافته عريان ودولي في حضنه عمرها ما هتسامحه ابدا وبكده هيطلقوا واحنا بعيد تماما عن الموضوع ده الحبيب ممكن يسامح اي حاجه الا الخيانه وبعد ما يطلقوا ابنك هيرجع في حضنك هيزعل شويه وخلاص هينساها الرجاله كده وعلي جوزك اكبر دليل اهو نسي حبه وكمل معاكي
دولي: انا هقلعه هدومه
ريهام: لأ انا اللي هقلعه انتي ما تلمسيهوش فاهمه؟
وفعلا ريهام قلعته وسليم دخل رفع الغطا ونزله تاني
سليم: انا قلتلك عريان
ريهام: وانا مقدرش اكتر من كده ده ابني
سليم: انا هقلعه
ريهام: وده هيفرق في ايه ماهو عريان اهوه؟
سليم: ده هيتحفر في ذاكره مراته ومش هتنساه ابدا ابدا ده دليل خيانته
ريهام: ماهو ممكن ما يقمش من مكانه وما تشوفش انه عريان تماما؟
سليم: واحد بيعشق مراته يفتح عينه يلاقي واحده عريانه في حضنه ومراته قدامه هيعمل ايه؟ هيتنفض من مكانه وهيتفاجئ هو كمان انه عريان وهيحاول يداري نفسه ومش هيلاقي اي كلام يدافع بيه عن نفسه لانه هو قدام نفسه مش فاهم ايه اللي حصل وبالتالي مش هيعرف يدافع عن نفسه فهمتي؟
سليم قلعه وصوره بموبيله
دولي: مش انا اللي هكلم مراته؟
سليم: لأ لو شكت في صوتك ممكن ما تصدقكيش وما تعبركيش، لازم حد ما تعرفوش.
انتي كل المطلوب منك لما مراته تيجي تشدي ادهم للسرير تاني وتقوليله يكمل اللي بدأه طبعا مش هوصيكي
دلوقتي دورنا خلص يالا يا ريهام بكره هتسمعي خبرهم
ادهم قام وقفل ال CD
ادهم بصوت مخنوق: كان نفسي اعرف انا ازاي نمت عندك واديني عرفت، المره دي لعبوها صح
لا برافو عليكم انتو التلاته لعبتوها صح!
دولي: انا اسفه عارفه اني اسفي مالوش قيمه بس ما املكش غيره.
ادهم: اسفك مقبول انتي الوحيده اللي ممكن اقبل اسفها انتي حبتيني ودافعتي عن حبك بطريقتك انا متفهم كل اللي عملتيه والغريبه اني مش زعلان منك
ليلى حاولت ابررلها او افهمها او اترجاها تسمعني او حتى تحاول مجرد محاوله تفهم او تصدق حبي ليها وعلي الرغم من كده رفضت وحكمت علياونفذت حكمها ومحا لتش ترجع في حكمها ابدا مهما اعمل!
امي ( صوته اتغص من الدموع) امي جريت ورميت نفسي في حضنها وطلبت منها تسامحني اني ببعد عنها وعيطت تحت رجليها وعاشت معايا وجعي والمي وبرضه فضلت ساكته
جدي بقى سبق ودمر حياه ابويا فمش جديده عليه انه يدمر حياتي. عادي يعني
دولي متشكر على الحقيقه اللي وضحتيها بس سبق وقلتلك ملهاش فايده.
انا وليلي اللي بينا انتهي ومش هقبل رجوعها ليا دلوقتي لان مع الوقت فهمت انه المفروض يكون في ثقه بينا وانها تحاول تسامح او تكمل لاي سبب بس هيا مصدقت مسكت غلطه وعلقتلي مشنقه وشنقتني فعلا وحرمتني منها ومن ابني وده مش هسامحها عليه ابدا
ليلى: ادهم انا اسفه.
ادهم: نعم؟ اسفه على ايه؟ على لفي في الشوارع زي المجنون ادور عليكي وانا هموت تكوني عملتي حاجه في نفسك؟ ولا على ذولي لاهلك علشان اعرف منهم كلمه تطمني عليكي؟ولا وجعي في كل ليله انتي بعيد عني فيها؟ ولا يوم ما خرجتي من المستشفي واخدتي حته من قلبي معاكي ورمتيني بره حياتك؟ ولا طلبك الطلاق مني؟ اسفه على ايه بالظبط؟ عارفه انا في الحظه دي تقريبا ما بكرهش حد في الدنيا دي كلها قد ما بكرهك. بكرهك اكتر من سليم نفسه فاهمه؟
