رواية ( شمس وسط الظلام ) البارت(9) بقلم:- أسماء أبوشادي
______________
البنات في الكافتريه بتاعة الجامعه
دكتور احمد ( فاكرينه اللي دخلهم قبل كدة وشمس ورودي قالوا انهم اتخانقوا معاه قبل كدة / آنسة شمس ممكن اتكلم معاكي شوية على انفراد
شمس ورودي بصوا لبعض بأستغراب وعدم فهم
شمس / ليه يا دكتور في حاجة
أحمد / لا ابدا أنا مش هاخد من وقتك كتير 5 دقايق بس
شمس قلقت بس اضطرت توافق / تمام اتفضل حضرتك على الطربيزة دي
( وشاورت على طربيزة بعيدة شوية عن صحابها لكن مش اوى )
رودي بصت لشمس بتوتر بس شمس حاولت تطمنها وكأنهم بيكلموا بعض بعينهم وداليا لاحظت كدة وقالت لنفسها يااااه ياما نفسي يكون عندي حد يفهمني كدة من نظرة عنيا
__________
دكتور احمد / آنسة شمس من غير لف او دوران أنا اسف على الموقف اللي حصل قبل كدة
شمس بأستغراب / ولا يهمك حضرتك دا خلاص عدى من زمان. بس هو حضرتك لسه فاكر تعتذر دلوقتي
دكتور احمد / الصراحة انا مش عايزك علشان كدة انا. انااااا
شمس / أتكلم يا دكتور انا سامعة حضرتك
دكتور احمد / أنا عايز رقم الفون بتاع باباكي علشان اطلب أيدك منه ودا طبعا لو انتي وافقتي عليا
شمس بصدمة وذهول / إيه حضرتك قولت إيه
أحمد / بقولك أنا معجب بيكي وعايز اتقدملك وبسألك وعايز اعرف ردك عشان اخطبك رسمي
شمس / أنا صراحة مش عارفة اقول لحضرتك إيه بالظبط
أحمد / هو انتي مرتبطة
شمس بأستغراب ( هو بيسأل بعد ما أتقدم ) / لا حضرتك انا مش مرتبطة
أحمد / خلاص انا هسيبك تفكري وتقوليلي رأيك يوم الأحد في بعد المحاضرة
_________________
رودي كانت قاعدة مع داليا بس عنيها على شمس ومركزة مع ملامحها خايفة يكون بيقولها حاجة تدايقها. وقررت إنها لوحست إنه زعلها هتروح تتخانق معاه
بس شوية ولقيت شمس راجعلهم
رودي بتساؤل / خير كان عايزك ليه
داليا / طيب استأذن انا على ماتخلصوا كلامكوا
شمس / لا يا داليا خليكي عيب عليكي انتي صاحبتي
ثم نظرت إلى رودي
هقولك حاجة مستحيل تتخيليها الأستاذ بيطلب إيدي
رودي بصدمة وفم مفتوح / هه
شمس / ههههههههههههه اهو هو دا نفس رد فعلي أنا كمان
داليا بحيرة / طيب وليه يعني انتوا اتصدمتوا من كدة عادى أنتي يا شمس جميلة جدا وأي حد يحبك دا انا كداليا حبيتك ومسحورة بجمالك هو أنتي مابتشوفيش نفسك في المراية ولا ايه
رودي / ههههههههههههه ههههههههههههه معزورة اصلك ماتعرفيش احنا عملنا ايه فيه قبل كدة
داليا بفضول / طيب قوليلي إيه اللي حصل بدل ما انا مش فاهمه اي شئ كدة
شمس / بصي يا ستي دكتور احمد احنا من فترة كدة السنة اللي فاتت خلونا داخلين الكليه وعاكسنا وأحنا مكناش نعرف انه دكتور في الجامعة. إلا بعدها بفترة وساعتها هزقناه وشتمناه شتايم مخدهاش حرامي غسيل والاخت رودي قامت معاه بالواجب وهو صراحة اتصدم ومشي
رودي / ولما لقيناه دخلنا الترم ده قولنا يبقى هيحطنا في دماغه. وفعلا طلع حاطط شمس في دماغه اهوه ههههههههههههه ههههههههههههه
داليا / ههههههههههههه ههههههههههههه ههههههههههههه دا انا لو مكانه كنت فرتكتكوا
شمس / فرتكة فرتكة تخطيط ومعاه التكتكة
رودي / وقولتيله إيه يا شموستي رداً على هذا الطلب اللي ما يعلم بيه إلا ربنا
شمس / ولا نطقت وهو قالي اسيبك ت فكري يومين وهقوله رأيي يوم الأحد بعد ما يدينا المحاضرة. بس انتوا رأيكوا إيه
رودي./ بصي شوفي نفسك عايزة ترطبتي ولا لاء وبعدين فكري هل لو هترطبتي هيكون هو الراجل المناسب ليكي ولا لاء
شمس / ساكتة ليه يا داليا مش انتي كمان صحبتي قولي رايك
داليا / فكري واهوه اللي مريحك اعمليه لأن دا قرارك ولازم تاخديه بنفسك
شمس بأبتسامة / والله يا بنات انتوا عسل خلونا بقى في المهم احنا عندنا يومين أجازة ماتيجوا نخلص فيهم البحث وأفكاره وبعدين نناقشه مع دكتور عمر
رودي بحماس / اشطا أنا موافقة نتكلم بكرة فون ونتواصل مع بعض وبعدين نتقابل السبت في اي كافيه ونجمع كل حاجة
داليا بزعل / للأسف أنا مش هقدر اقابلكوا يوم السبت
شمس / ليه يا داليا وراكي حاجة
داليا بتوتر تحاول تخفيه / ابدا بس عندي ظروف ماتسمحليش إني اخرج مكان غير الجامعة وكدة
شمس بأبتسامة/ خلاص مش مشكلة نتجمع الأحد بعد المحاضرات ونظبط الدنيا ونبقى نناقش فيه دكتور عمر يوم الاثنين
رودي / تمام يلا بقى عشان نروح
_________________________
رودي وشمس ركبوا العربية وراحوا عند جامعة القاهرة ياخدوا جميلة من هناك وشمس أستغربت من شكل جميلة لأنها كانت مكتئبة جدا وشكلها كأنها مانمتش خالص
شمس / مالك يا جميلة
جميلة عنيها دمعت / مافيش
رودي / يالهوووي. مالك يا بت وماتقوليش مافيش أومال الدموع دي سببها إيه
جميلة ببكاء / جالي عريس وماما عايزاني أوافق عليه وأنا مش عايزة ازعلها لأنها نفسها تفرح بيا وفي نفس الوقت انتوا عارفين اني بحب مروان ومش هقدر اكون لحد تاني
شمس / خلاص يا حبيبتي ماتعيطيش وأهدي كدة أنا هقولك حاجة واحدة
مروان فعلا راجل ومافيش زيه في الدنيا في حنيته ورجولته وكل حاجة فيه
وأنا مش بقول كدة لأنه مارو اللي كل حاجة ليا في الدنيا لا أنتي عارفة كدة كويس
بس كمان أنتي احلى بنت في الدنيا ومليون واحد يتمناكي
جميلة / انا مش عايزة المليون أنا عايزة مروان وبس
شمس / لو من نصيبك هيكون ليكي
رودي / بصي يا جميلة صلي استخارة ولو ارتاحتي اقبلي العريس مارتحتيش قولي لأمك وفهميها وارفضي
شمس / بس اوعي يا جميلة توافقي عليه عشان أمك ولا عشان تتخطي حب مارو لأنك كدة هتبقي بتظلمي نفسك وبتظلميه معاكي
__________________
عادت الفتيات كل منهم إلى بيتها
شمس دخلت البيت وفكرت في حال جميلة وبعدين قررت انها تتدخل وتلمح لمروان بموضوع جميلة بكرة بعد مايزوروا قبر أمها
( مارو من وهي شمس.صغيرة بياخدها كل يوم جمعة تزور قبر أمها )
وبعدين سابت التفكير في الموضوع ده وابدأت تشتغل على البحث عشان تقدر تخلص الأفكار اللي بتشتغل عليها
_____________________
في شركة العدلي وفي غرفة الاجتماعات
كان الوضع متوتر جدا بسبب أن العميل اللي كان في الميتنج ده حاول أنه يخدع مهاب العدلي بس هو كشفه
مهاب بهدوء وملامح مرعبة / أنت اتكلمت كتير اوى وصدعتني وبردو ماوضحتش إيه سبب المشكلة دي
العميل بتوتر / يا مهاب باشا أنا قولت لحضرتك دا خطاأ مش مقصود. ووضحتلك التفاصيل
مهاب / اممممم يعني احنا اتفقنا على حاجة وأنت عملت حاجة تانية خالص. لا والشحنة فيها أكل والناس هتاكله ومنهم اطفال وكان كتير اوي هيموتوا ( ثم تكلم بصوت جهوري) وأنت بتقول خطأ. انت مش عارف انت بتتعامل مع مين يا كلب
بس ماتقلقش أنا هعرفك أنت بتتعامل مع مين كويس
العميل بتوتر وخوف شديد / تقصد ايه يا مهاب باشا هتعمل ايه
مهاب بضحكة خبيثة / هعمل اللي إي اب كان هيعمله لو ابنه مات من الأكل ده لو كان دخل مصر برررررة ( ثم نظر إلى موظفينه ) خدوه ارموه برة الكلب ده
__________________
بالليل في شقة عبد الحميد المصري وبالتحديد في غرفة شمس
شمس انتهت من أفكار البحث
شمس بتنهيدة / الحمد لله اخيرا خلصت مش باقي غير اني أراجع عليه ومش هعمل كدة غير يوم السبت وبكرة بقى اقضي اليوم مع مارو.
( فتحت شمس الفيس ولكن داليا في هذا الوقت كانت تعمل على أفكار البحث
وبعد قليل قررت أنها ترتاح شوية وتفتح الفيس عشان تكلم شمس )
داليا / هاي شمس
شمس / هاي دودي وحشتيني أنا فتحت من بدري وكنت مستنياكي
داليا / وانتي كمان والله وحشتيني بس انا كنت مشغولة بالبحث بس تعبت قولت اكلمك شوية لأني خلاص مابقاش ينفع يعدي يوم وماكلمكيش
شمس / وأنا كمان والله يا قلبي خلاص وتعودت عليكي وبرتاح أوي وأنا بتكلم معاكي عشان كدة حكيتلك كل حاجة عني وعن أبوية وامي ومارو أنا ارتحتلك أوي يا دودي
( اتكلموا مع بعض شوية وداليا حكت لشمس اللي حصل في الجامعة زي مابتحكي كل يوم وما ان انتهت داليا )
شمس / طيب ليه رفضتي تقابليه يوم السبت في الكافيه
داليا / بسبب ديكتاتور بيتنا ابيه مهاب
شمس / ليه يعني يا بنتي أنتي هتقابليهم عشان تدرسي معاهم
داليا / هو مانعني من الخروج غير للجامعة وكمان بيبعت السواق يوصلني
شمس / طيب أستأذنيه وقوليله أنتي رايحة ليه وهو هيوافق
داليا / لا أنتي بتحلمي. وبعدين انا مستحيل أقف قصاده واطلب منه كدة دا ينفخ فيا يطيرني
شمس / ليه يا بنتي هو أنتي تتطابق حاجة غلط ولا حرام خليكي شجاعة
داليا / بلا شجاعة بلا فزاعه أنا مش مستغنية عن نفسي
( ظلوا يتحدثون قليلا ثم أغلقوا الفيس سويا وعادت داليا للعمل على البحث. وذهبت شمس إلى النوم )
شمس أفتكرت موضوع الدكتور أحمد وظلت تفكر إلى أن غلبها النوم
________________________
في صباح يوم الجمعة
في شقة عبد الحميد المصري
عبد الحميد يجلس على طاولة الطعام هو وزوجته بيفطروا
مروان خرج من غرفته الساعة 8 الصبح بيتاوب من اثار النوم
مروان وهو بيبوس رأس أمه / صباح الخير يا حاج
عبدالحميد / صباح النور يا ابني
مروان / إيه يا حاجة هي شمس ماصحيتش
شمس سمعت صوت مروان وخرجت / عيب عليك يا كبيري أنا صاحية 7 صليت و ساعدت ماما في تحضير الفطار وكويت للحاج الجلبية البيضة عشان يصلي فيها الجمعة.
منى بأبتسامة / وكالعادة مارضيتش تفطر
شمس / نعم أفطر أزاي يعني دا يوم الجمعة وأنتي عارفة انى لا يمكن أفطر بدون مارو
مروان / طيب يا قمري أنا 10 دقايق هتوضى وأصلي الصبح ونمشي
منى / وأنا على ماتروحوا وتيجوا هكون حضرتلكوا فطار
شمس / لا يا ست الكل ماتتعبيش نفسك احنا هنفوت على الحسين نفطر هناك ونصلي الجمعة كمان ولا ايه رأيك يا مااارو
مروان وهو داخل الحمام / مية مية يا قلب مارو
عبدالحميد / بس تتأخرش يا مارو عشان تروح الورشة ومحمد ييجي يحضر لبسه وحاجته عشان هيمشي على الجيش الصبح
شمس / الإجازة بتاعته بتخلص بسرعة أوي
____________________
شمس زارت قبر أمها ومروان جاب ميا ( ماء) وسقى الزرع اللي جنب القبر ( اللي هو زرعه ودايما بيهتم بيه وبعدين راحوا على مطعم بجوار مسجد الحسين عشان يفطروا
شمس بتفكر أزاي تكلم مارو في موضوع جميلة. وبعدين قررت أنها الأول هتحكيله عن موضوع الدكتور أحمد اللي اتقدملها وبعدها تكلمه
__________________
رواية ( شمس وسط الظلام) البارت(10) بقلم:- أسماء أبوشادي
__________________________
تقتليني بكلمة ,منكي وتُحيني بكلمة أخرى
نظرة منكي تساوي أمامي العالم بما فيه
أضحكي حبيبتي فبضحكتك يضحك قلبي
كوني دائما سعيدة واعلمي أن هناك عاشقً لكي على اتم استعداد للدفاع عنكي حتى من اقرب الناس إليكي وإليه
احميكي حتى من نفسي أحبك أحبك بجنون
ليس لحبي لكي مثيل لا تطلبي مني أن اُدخل أمرأة غيرك إلى حياتي. فأنتي لي كل الكون كم أتمنى أن أخبرك بحبي لكي
نعم أكبر أحلامي هو ان اعطيكي وردةً حمراء وأقول لكي. أعشقك ) ( أميرة السعادة)
@@@@@@@@@@@
في مطعم بجوار مسجد الحسين
شمس / الحمد لله شبعت
مارو / تمام هطلب بقى شاي عشان نحبس ونروح الجامعة العربية قبل الصلاة عشان الزحمة
شمس / أوك. ‘. مارو كنت عايزة أقولك حاجة كدة حصلت معايا أمبارح في الجامعة
مروان بقلق / احكي اللي أنتي عايزاه يا قمري في حد ضايقك
شمس / حكت له ماحدث بينها وبين أحمد والكلام الذي قاله لها
( ااااه من سكينا ً يغرز بقلبي من اعز الناس )
شمس / بس كدة وانا بقى صراحة احترت شوية في الموضوع ده
مروان بأحساس الضياع / طيب أنتي إيه رأيك في كلامه وكلام صحابك كمان
شمس بأبتسامة / بص أنا هقولك كل اللي في قلبي. أنا حاليا مش بفكر أرتبط لأن أهم شئ عندي مستقبلي وكمان يوم ما ارتبط مش هيبقى بالطريقة دي. أنا عايزة أتجوز عن حب فاهمني يعني ايه. ( قررت أنها تلمحله عن موضوع جميلة ) يعني أتجوز أنسان يكون بيحبني أوي ومش اي حب لاء حب بجنون يعشقني عشق
( كل اللي اتمناه مارو في الوقت ده إنه يقولها أنا أهوه الشخص اللي بتحلمي بيه ادام عنيكي ومش هتلاقي حد يحبك اده )
مروان / يعني انتي مش شيفاه مناسب ليكي ولا مش حاسه أنه بيحبك
شمس / اولا انا شيفاه مناسب جدا لكن هو معجب بشكلي بتميزي عن غيري من البنات إنما أنا عايزة حد يحبني لنفسي لعقلي لقلبي لكل حاجة فيا يحبني بضعفي وصوتي بنجاحي وفشلي
مروان / طيب يا قلب مارو أنا كدة فهمتك أنتي بقى هتردي عليه بأيه
شمس بأبتسامة/ هقوله إني مش هقدر ارتبط دلوقتي لأني عايزة اركز في مستقبلي وبس يعني هرد بزوق وكدة
مروان / تمام. أنا بثق جدا في قراراتك واسلوبك في التفكير والكلام
شمس / طيب إيه بقى
مروان بعدم فهم / إيه يا قلبي
شمس / أنت مش ناوي بقى تتأهل يا عم الحاج نفسي افرح بيك بقى وأشيل عيالك
مروان ( أول مرة ابقي نفسي مااسمعش صوتك وأنتي بتكلميني / ههههههههههههه لا يا قلبي الموضوع دا مش في دماغي خالص
شمس / يعني ايه مش في دماغك يا مارو لا بقى ماليش فيه أنا عايزاك تتجوز بقى يا مارو انت كدة هتعنس
مروان بأستغراب لأن شمس أول مرة تتكلم معاه في الموضوع ده / أنتي ليه يعني اتكلمتي في الموضوع دا دلوقتي
شمس / لأني بصراحة عندي ليك عروسة محترمة جدا ومافيش زيها وصدقني لو خسرتها مش هتلاقي زيها أبدا ولو اتجوزتها هتبقي أسعد إنسان في الدنيا
مروان بأبتسامة بيحاول يداري بيها وجعه والمه / بصي يا قمرتي أنا حاليا مش عايز أتجوز ومش بفكر في الموضوع ده وصدقيني يوم مافكر هجيلك أنتي عشان تختاريلي العروسة اللي انتي عايزاها
شمس / طيب مش تعرف أنا بكلمك عن مين الأول
مروان / لا يا قمري ملوش لزوم أعرف وقت لما أقرر اتجوز ابقى اعرف ويلا بقى عشان نلحقلنا مكان في الجامع
( سكتت شمس لأن مافيش كلام تاني تقوله وقاموا واتوضئوا ودخلوا المسجد. )
مروان في مصلى الرجال وهو يسجد بين يد الله / يارب أسعدها وفرحها وأبعد عنها كل شئ يأذيها وقبل ما اي شر يمسها يجيلي أنا يارب
شمس وهي تصلي في مصلى النساء / يارب فرح مروان وجميلة يارب ولو ليهم نصيب في بعض يارب جمعهم وفرح قلبهم
وداليا ودكتور عمر يارب اهدلهم الحال وضربهم من بعض يارب فك كرب كل مسلم وأبعد عنه أحزانه
____________________
انتهوا من الصلاة وخرجوا وذهبوا إلى سوبر ماركت في طريقهم
واشترى مروان حاجات كتير معلبة عصائر وجبن وبسكويتات وعلب تونة وحاجات كتير
( علشان محمد ياخدهم معاه الجيش ) واشترى كمان شيكولاته لشمس ونسكافيه وكابتشينو وقهوة )
شمس / على فكرة انا لسه عندي نسكافيه كتير اشتريت تاني ليه بس وكمان بالكمية دي ولا انت جايب لمحمد نسكافيه معايا
مروان / لا من أمتي وأنا بجيب لمحمد نسكافيه دا ليكي عشان عارف انك مدمنة
( انتهى اليوم بدون أحداث جديدة )
___________________
بعد مرور شهر
لم يحدث به إي شئ سوى رد شمس على دكتور احمد
وكمان الدكتور عمر عرف داليا اد ايه حلوة من جواها وكمان زكية وعجبه البحث اللي البنات عملوه
وجميلة رفضت العريس
وداليا قربت أوي من البنات وبقت بتكلمهم في الفون وبقوا اصحاب جدا وكمان مهاب بقى بيسمحلها تخرج برة الجامعة بس مع السواق وممنوع خروج بعد الساعة 6 المغرب
وشمس قررت أنها هتصارح داليا إنها شمس اللي بتكلمها على الفيس
واتفقوا داليا وشمس أنهم يتقابلوا في كافيه جنب الجامعة عشان يشوفوا بعض لأول مرة
داليا قاعدة على الطربيزة مستنية بكل شوق انها تقابل شمس بعد شهرين من معرفتهم لبعض
وتدخل شمس من باب الكافيه وتدور على داليا وشافتها وراحت عندها
داليا بأستغراب / شمس أنتي بتعملي إيه هنا
شمس بتوتر / تسمحيلي أقعد ( وقعدت )
بصي يا داليا أنا عارفة انك هتزعلي مني بس انا لازم اصارحك
داليا / في ايه يا بنتي قلقتيني اتكلمي علطول
شمس / أنا شمس وسط الظلام
داليا بصدمة / ايه
شمس / أنا كنت عايزة اقولك من الأول والله بس خوفت تتحرجي مني وبعدين قولت لو عرفتي مش هتعرفي تتكلمي معايا
داليا بدموع/ يعني انتي كنتي بتشتغليني أنتي ورودي صح كنتوا بتقربوا مني وتضحكوا عليا عشان تتسلوا بيا صح
شمس / والله أبدا ورودي أصلا ماتعرفش اي حاجة عن موضوع الفيس ده ولا أننا بنتكلم مع بعض خالص ولا اي حد يعرف حاجة
داليا قامت وقفت واتكلمت ببكاء / بس دا مايمنعش إنك خدعتيني أنا اعتبرتك أختي وكل حاجة في حياتي وأنتي خنتي ثقتي فيكي يا. ياااااا ظلام
_____________________
بعدت داليا عن شمس خالص وكانت زعلانة جدا ومجروحة وحاسة بفراغ كبير بعد ما بعدت عن شمس ورودي وكمان شمس الفيس ولحد دلوقتي مش مقتنعة ان الاتنين واحد
الإمتحانات بدأت والسنة بتخلص وشمس قالت لرودي سبب بُعد داليا بس ماقالتش حاجة من خصوصيات داليا
ورودي قررت أن بعد مايخرجوا من الامتحان دا هيتكلموا مع داليا
______________________
في لجنة الامتحانات
هدير تجلس قصاد داليا بينهم وبين بعض متر واحد بس وشمس تجلس خلف هدير أما رودي فهي تجلس امام داليا
داليا كانت مركزة في الامتحان جدا لان خلاص باقي 10 دقايق والامتحان يخلص وتقريبا هي جاوبت على الأسئلة وخلصت بس بتراجع
وكذلك شمس و رودي خلصوا وبيراجعوا بس رودي متوترة جدا وحاسة إنها جاوبت غلط
فبصت وراها لشمس كأنها بتطلب منها تهديها وبالفعل عندما نظرت إليها طمئنوا بعض بالنظرات
وعادت رودي تنظر أمامها وفي هذه الأثناء كانت هدير معها ورقة بها بعض الإجابات ( برشامة تغش منها ) وعندما إنتهت منها وجدت احدى المراقبين يتجه إليها فألقت بالورقة بجوار داليا وعندما اأتى المراقب رأى الورقة بجوار داليا
( وطبعا داليا لبست الموضوع بس شمس شافت كل اللي حصل )
المراقب / احنا لازم نعملك محضر غش اتفضلي معانا
داليا / والله أبدا محلصش حضرتك دي مش ورقتي أنا
المراقب / اتفضلي معايا بالزوق لوسمحتي
( شمس مستنية ان هدير تنقظ صاحبتها وتقول الحقيقة بس للأسف هدير قعدت بكل برود ولاكأنها عملت حاجة )
شمس / لو سمحت حضرتك دي فعلا مش ورقتها هي وأنا قاعدة وشيفاها
المراقب / أومال بتاعة مين يعني
شمس / معرفش حضرتك بس انا متأكدة إنها مش بتاعتها
المراقب / طلاما ماتعرفيش يبقى تتفضلي تقعدي لأن أنا لقيت الورقة جنبها هي
داليا ببكاء / والله العظيم مابتاعتي شمس بليز قوليله أنا مستحيل أعمل كدة
شمس / اهدي يا داليا ومتخافيش. حضرتك تقدر لقيت الورقة جنبها هنا وممكن تكون بتاعتها أو بتاعة اللي جنبها
هدير بتوتر / انتي تقصدي إيه يا بتاعه انتي
شمس بعصبية / أنا بتاعة يا غشاشة
طيب بس يا فندم الورقة دي تخص البنت دي وانا شوفتها وهي بترميها جنب داليا وحضرتك تقدر تشوف الخط اللي في الورقة وتقارنه بين خط داليا وخطها في نموذج الإجابات
( تأكد المراقب مما قالته شمس )
المراقب / فعلا دا خطك أنتي اتفضلي معايا
هدير / ماشي هو فعلا خطي بس بعد ما أنا خلصت هي طلبت مني الورقة وغشت منها هي كمان
داليا ببكاء شديد / هدير انتي بتقولي إيه والله دي كدابة
شمس / خلاص يا داليا أهدي هو مش هيصدقها وبعدين انا شاهدة إنها رمت الورقة جنبك لما شافت المراقب جاي
المراقب / خلاص وقت الامتحان خلص وأنتي يا آنسة هدير ابقي قولي اللي أنتي عايزاه في محضر الغش
( داليا وهي واقفة فقدت وعيها ووقعت لكن شمس سندتها وزمايلهم ساعدوها )
______________________
في شركة العدلي
مهاب يجلس على مكتبه الراقي ذو الزوق العالي والفخامة
فتبلغه السكرتيرة بأتصال ويرد مهاب
مهاب / ألوو …… داليا ّ……….وامتى دا ………طب اقفل ………. قولت اقفل حالا ………ولم يعطي فرصة للمتحدث للرد
وخرج من المكتب وذهب إلى عربيته فأذا بالسائق يفتح له باب السيارة ويذهب وتتبعه سيارتين من الحراسة الخاصة به
( قال يعني رايح يحارب ولا يكنش رئيس دولة )
__________________________
وبعد نصف ساعة كانت شمس وداليا وهدير
أمام عميد الكلية وتم فض النقاش وخرجت شمس وهي تمسك بيد داليا وكانت رودي مستنياهم أدام المكتب وسندوها وراحوا على كفترية الجامعة وبيهدوها لأن هدير غلطت فيها أمام العميد
بعد قليل قامت شمس وراحت على مكتب العميد كانت هدير خارجة من المكتب
شمس / انتي بت زبالة وحقيرة و واطية أزاي تعملي كدة في صاحبتك أنتي كدة مش بس غشاشة لا وكمان …و…و…. يا حقيرة
هدير / انتي بيئة أزاي تقوليلي أنا الكلام ده
شمس حست انها ارتاحت شوية بعد ماهزقتها وشتمتها واخدت حق داليا فابتسمت لكي تغيظها / مش هرد عليكي عشان أنا مابحبش أتكلم مع اللي زيك
ومشيت شمس مسرعة وهي تشعر بالنصر ولكي تحكي لصديقتيها عما فعلته مع الحقيرة كما تسميها
مهاب يمشي سريعا داخل الجامعة وقد طلب من حراسته أن يظلوا بالخارج
المشهد كا الآتي
شمس بتمشي بسرعة في الطرقة بأتجاه الخروج للذهاب للكفترية
ومهاب يمشي بنفس الطرقة لكي يدخل لمكتب العميد
________________
توقعاتكوا عن هذا اللقاء
بصوا اتأكدوا أن أي تفاصيل أو حدث مهما كان صغير له تأثير كبير هتفهموه بعدين وأنا حاولت اختصر على اد ما اقدر بس في نفس الوقت بأحداث كتير
