رواية ( شمس وسط الظلام) البارت(39)و(40) بقلم :- أسماء أبوشادي
___________________________
مهاب واقف أدام باب غرفة العمليات.
قمة القلق على زوجته وحبيبته
قمة الوجع على خسارة اول بيبي له
قمة الخوف. من أنه يخسر حبيبته
أول مرة في حياته يخاف
خوف بشع واقف بيدعي ربنا انها تخرج من العملية بالسلامة. وأنها تكون بخير
تليفونه مابطلش رن لكن هو متجاهله مابيردش مش عايز يكلم حد. مافيش في الدنيا كلها اهم من شمسه اللي جوه بتخسر جنينها واللي اكتشف النهاردة إنها ممكن تسيبه في اي لحظة ومش هيقدر يشوفها تاني. وهيعيش من غيرها باقي عمره
تليفون شمس اللي معاه رن وكانت داليا اللي بتتصل عشان تطمن على شمس وتسألها رجعت البيت ولا لسه عند عمها
مهاب رد عليها. وحط التليفون على أذنه
داليا بمرح / االووووووو يا ست شوسي ياللي بتدلعي وسايبانا احنا نحضر المحاضرات ونتمرمط في الجامعة
مهاب بصوت حزين خايف مهزوز متوتر قلقان كل الأحاسيس البشعة / ايوة يا داليا
داليا بأستغراب / ابيه مهاب.
مهاب / ايوة
داليا بصت في التليفون تتأكد انها طلبت رقم شمس. وبعدين كلمته / طب يا ابيه هي شمس رجعت القصر ولا هي نسيت تليفونها. يعني ماردتش عليا ليه
مهاب / داليا تعالي مستشفى ( ………..) عشان اكيد شمس هتحتاجلك بعد ما تخرج من العمليات. ( مهاب قفل الخط )
@@@@@@@@@@@@
داليا كانت قاعدة هي وعمر في الكافترية قامت بسرعة وقالت لعمر ان شمس في المستشفى. وعمر اصر إنه يروح معاها ويوصلها بنفسه
شمس اتصلت برودي عرفتها
رودي كانت في المكتبة مع احمد. وطبعا هو راح معاها على المستشفى لأنه هو اللي جايبها على الجامعة بعربيته وعربيتها هي في البيت.
وصلوا علي المستشفى تقريبا مع بعض
اتقابلوا على باب المستشفى
سألوا في الاستقبال. و وصفلهم غرفة العمليات اللي شمس فيها
طلعوا شافوا مهاب وهو واقف رايح جاي والقلق ظاهر على ملامحه
قبل ما هما يسألوه عن حالة شمس. كانت هي خارجة ادامهم على التورلي بعد ما العملية خلصت عشان ينقلوها غرفة عادية
اخدوها غرفة عادية والكل ماشي ورا الممرضين وهما بينقلوها بس وقفوا برة ادام الغرفة ومهاب بس اللي دخل معاه ونقلوها من على الترولي للسرير اللي موجود في الغرفة. وعلقولها المحاليل
شمس وشها اصفر جدا وشفايفها لونها بيميل للون الأزرق وملامحها ظاهر عليها التعب جدا
الدكتور اللي كان متابعها من الاول دخل لأنه كان موجود معاها في العملية. خوفا من ان قلبها يتعب اثناء الاجهاض
الدكتور خرج ومهاب خرج معاه برة عشان يطمن على حالتها
مهاب / إيه الاخبار يا دكتور
الدكتور / الحمد لله هي كويسة والعملية كانت سهلة جدا لأنها لسه ماخلصتش الشهر التالت من الحمل. وأن شاء الله كام يوم بس وهنبدأ العلاج عشان نعالج عضلات القلب وبعدها نحدد ميعاد العملية
مهاب سابهم ودخل تاني لشمس
( داليا و رودي كانوا بيعيطوا لأنهم عرفوا ان شمس اجهضت وزعلوا جدا. بس لما سمعوا كلام الدكتور استغربوا ومش فاهمين حاجة وقلقوا اكتر )
داليا بتوتر / عملية إيه تاني يا دكتور
الدكتور / عملية في القلب هي محتاجاها
رودي بشهقة / ايه. أنت بتقول ايه مستحيل
داليا / انت بتتكلم عن شمس. اللي هي لسه عاملة عملية اجهاض
الدكتور بأسف / ايوة بتكلم معاها. أنا فاكركوا انتوا جيتوا معاها لما شوفتها اول مرة في المستشفى. وقت ما كانت تعبانة
رودي / ايوة. احنا كنا معاها. بس لما سألنا حضرتك قولت ان دا إجهاد وقلة نوم مش اكتر
الدكتور / للاسف هي اللي طلبت مني اقولكوا كدة لأنها ماكنتش عايزة حد يعرف بمرضها
عمر / طيب هي حالتها خطيرة اوي يا دكتور
الدكتور / للاسف هي حالتها اتأخرت عن وقت ماشوفتها أول مرة وخصوصا بعد الحمل والاجهاض كمان
الدكتور وضحلهم حالة شمس بالتفصيل وسابهم ومشي
رودي ببكاء شديد / أزاي أنا ماحستش بيها أزاي سيبتها وقتها. أزاي ماكنتش بلاحظ تعبها و وجعها. دي يا ما قالت قلبي بيوجعني
داليا ببكاء شديد / وأنا. انا اللي عايشة معاها في بيت واحد وطول الوقت معاها ماحستش بيها ولا بوجعها
( عمر قرب من داليا بيحاول يهديها بس هي زقته بعيد عنها بقوة )
ابعد عني. انا بعدت عنها من يوم ما انت دخلت حياتي انشغلت بيك عنها اتخليت عنها في وقت ماهي كانت محتاجاني. حتى يوم ما تعبت. قعدت معاك انت وسيبتها تمشي لوحدها. مع انها كانت تعبانة
رودي / أيوة فعلا احنا بعدنا عنها أوي وسبناها لوحدها لو كنا حسينا بيها ماكنتش حالتها وصلت للدرجة دي
أحمد / يا رودي دا نصيبها يعني انتوا كنتوا هتعملوا إيه وهي اساسا ماكنتش عايزاكوا تعرفوا وطلبت من الدكتور مايقلكوش حاجة كنتوا هتعرفوا أزاي
رودي بصوت عالي وبكاء/ كنا هنعرف. لو كنا جنبها وحسينا بيها إنما أنا كمان يومها سبتها وقعدت معاك في المكتبة هي دايما جنبي وعمرها ما سابتني أبدا لكن انا انا سيبتها مع ان التعب كان باين عليها
( ظلت داليا تبكي وعمر يحاول يهديها و رودي تبكي وأحمد يحاول يهديها. كانوا بيلوموا نفسهم لأنهم ماحسوش بيها ولا بتعبها وانشغلوا باللي حبوهم عن صديقتهم )
@@@@@@@@@@@@@@@@@@
داخل غرفة شمس.
مهاب كان قاعد على كرسي جنبها. ماسك ايديها اللي مافيهاش محاليل ولا أبر وبيتكلم معاها مع انها لسه نايمة من مفعول المخدر والبنج
مهاب بحزن / كنتي عايزة تسبيني وتموتي. هونت عليكي. دا انا اتغيرت عشانك بقيت انسان تاني غير اللي اعرفه ومستعد اعمل اي حاجة عشانك
كنت بتألم لمجرد اني حاسس ان قلبك في حد تاني غيري. ويوم ما اعرف ان قلبك ليا لوحدي أعرف انك هتسبيني وتمشي. اختارتي الموت عن حياتك معايا. طب ليه. لييييييه دا انتي لو جرالك حاجة انا اموت فيها. وخبيتي عني مرضك و وجع قلبك ليه مش بتقولي انك بتحبيني هو اللي بيحب حد بيبقى عايز يسيبه وبيخبي عنه وجعه والمه دا انا بتنفس بهواكي نظرة منك بتخليني انسى الكون كله. أنتي شمسي وأنتي حياتي. أنتي شمس حياتي
الباب خبط ودخلت داليا وهي بتبكي
داليا / ممرضة ادتني السلسة بتاعة شمس اللي كانت لبساها قولت أدخل البسهالها
مهاب اخدها منها / هاتيها أنا هلبسهالها
داليا اديتهاله / طيب انا عايزة اقعد جنبها عشان اطمن عليها و رودي كمان عايزة تدخل
مهاب بيحاول يتماسك ومايظهرش ضعفه بسبب حالة شمس ادام حد / اصبروا لما تصحى وابقوا ادخلوا
داليا وهي بتمسح دموعها من أثر البكاء / حا حاضر
( داليا خرجت. ومهاب رفع راس شمس بهدوء ولبسها السلسلة في رقبتها وافتكر أول مرة لما لبسها السلسلة دي يوم عيد ميلادها. وافتكر شكلها وهي نايمة وقتها.
فرق كبير بين شكلها وقتها وشكلها دلوقتي. وهي بلبس المستشفى )
مهاب قعد جنبها ومسك ايديها تاني. بعد شوية. شمس ابتدت تفتح عنيها وتحرك ايديها
مهاب لاحظ أنها ابتدت تصحى / شمس. شمس سمعاني
شمس بخفوت وهي بتبص حواليها / أنا فين
مهاب / انتي في المستشفى يا حبيبتي
شمس افتكرت اخر حاجة قبل ماتفقد وعيها وحطت ايديها على بطنها بضعف واتكلمت بتوتر وخوف
شمس / اوعى تكون قتلت اللي في بطني يا مهاب
مهاب بله ريقه / هنعوضه بإذن الله يا شمس بس لما صحتك تكون احسن و
شمس قطعته ورفعت راسها من على المخدة / لاء. لا لا لا أنت ماعملتش كدة. صح انت ماقتلتش بنتي
مهاب مسكها بيحاول ينيمها تاني / اهدي يا شمس ماكنش لازم تحملي من الاول كان لازم تعرفيني كل حاجة
شمس بصراخ / لاااااااااااا لاااااااااا حرااااااااااااام عليكوووووووااااا بتعملوا فيا كدة ليه لااااااا
داليا و رودي دخلوا بسرعة بعد ماسمعوا صوت شمس
مهاب اول ماشافهم / نادوا على الدكتور بسرعة. بسرررررعة
رودي شافت زرار جنب السرير ضغطت عليه. بسرعة و عمر قال لداليا خليكي انا هروح انادي على الدكتور
قربوا منها وشمس بتنهار اكتر واكتر
شمس / لاااااااا ياااارب ليييييه. ليه انا. ليه بيحصلي كل دا. سبتني أنا وخدتها هي ليه كنت خدني معاها أنا تعبت .يااااارب ارحمنيييييي وخودني من هنا. ارجووووك يااااارب عاااااااااااا انا عملت ايه عشان يحصلي كدة ايه ذنبي. لااااااااااااا حراااااااااااام تعبت تعبتتتت كفااااااااااااية خودني من هناااااا يا مارو. يا مااااااروووو تعالى خدني من هنا يا امييييي خدوني معاكواااا للقبر هو احسن من هناااا كفاية عليا
مهاب حضنها جامد وهي بتحاول تبعده عنها وايدها اللي كان فيها المحاليل بتنزل دم من مكان الابرة
دكاترة كتير دخلوا أوضة شمس وعطوها حقنه مهدأ وهي في حضن مهاب بعد ماثبتوا زراعها بالقوة
شمس ابتدا جسمها يرخى ولسه بتتكلم
شمس بضعف / اااااه واحد عزبني طول عمر و وجع قلبي والتاني قتل بنتي. عشان يخليني عايشة في الدنيا دي تاني عشان اتعذب و و و ( نامت شمس )
داليا و رودي منهارين على حالة شمس ومن اللي شافوه واللي سمعوه منها. ضموا بعض وبيبكوا بقوة. والدكتور طلب منهم يخرجوا
وفعلا خرجوا برة و معاهم عمر واحمد. اللي مذهولين من حالة شمس. البنت القوية اللي بيشوفوها في الجامعة الأولى على الكلية كلها كل سنة والمتميزة والشخصية المحبوبة عند كل دكاترة الجامعة حتى الدكاترة الأجانب بقت بحالة تبكي الحجر فعلا
الدكتور طلب من مهاب يسيب شمس لوحدها وهو رفض وفضل قاعد بعد ما مسح دموعه قبل ما حد يشوفها
شمس نايمة بس بتخترف بكلام بتنادي على مروان وعلى امها وتطلب منهم يخدوها. وبتلوم على الدنيا وبتطلب من ربنا الرحمة من الدنيا والحياة
___________________________________
أشرقت شمس يوم جديد على ابطالنا الكل تعيس حزين مهموم. لم يشعروا بدفء تلك الشمس. وكيف يشعرون وشمسهم لم تشرق
نعم إنها شمس الجميع. لم يعرفها احد إلا واحبها مرحة طفلة في افعالها لكن عاقلة في تفكيرها ممكن ماتكونش ذكية أوي لكن لديها ذاكرة حديدية تجعلها تملك جزء من المعلومات لا يستهان به. لا تسمع او تشاهد أو تقرأ شئ الا وحفظته. يظن الجميع إنها محظوظة بتلك النعمة وبيحسدوها عليها. بس مش عارفين ان النسيان هو اكبر نعمة. أيوة النسيان نعمة كبيرة نسيان الالم الجرح الوجع الفراق الإهانة الوحدة. أزاي نقدر نعيش من غير ما ننسى ربنا رحيم بينا لأنه بيساعدنا نعيش بتلك النعمة إلا وهي النسيان
الناس حسدوها على جمالها زاكرتها ضحكتها بس مايعرفوش إيه اللي هي عاشته ولا شافته طول حياتها. بيبصوا علي وشها المنور. ومش شايفين الظلام اللي هي شايفاه في حياتها
مهاب رفض انه يسيب شمس أمبارح لوحدها. و طلب من داليا و رودي انهم يمشوا ويبقوا ييجوا الصبح
داليا امبارح اتصلت بمازن وقالتله كل حاجة. وهو راحلها. عشان يطمن على شمس لكن هي كانت نايمة. أخد داليا ورجعوا على البيت بعد ما داليا رفضت أن عمر يوصلها. وكمان رودي طلبت من مازن يروحها في طريقهم ورفضت ان احمد يوصلها
سامح و سهى و نوال و رؤوف هما كمان راحوا المستشفى عشان يطمنوا على شمس بعد ما عرفوا اللي حصل امبارح من داليا ومازن
مهاب قاعد جنب شمس اللي صحيت لكن ما بتتكلمش والدكاترة حاولوا يخلوها تتكلم لكن هي رافضة تتكلم وبتتجاهل مهاب اللي بيحاول يكلمها من وقت ما صحيت. كأنها في عالم تاني مش عايزة تتكلم مع اي حد ولا تشوف حد راقدة على سريرها وشعرها حواليها علي المخدة. شبه الملاك لكن ملاك حزين. عيونها شمس لكن وقت الغروب والدموع فيها شبه الغيوم اللي بتخفي الشمس
العيلة دخلت واتفاجأوا بمنظر شمس. ومهاب كمان اللي بقى واحد تاني تايه حاسس بالعجز على حال حبيبته والغربية إنه سايب شمس كدة بشعرها ادام الدكاترة اللي بيدخلولها و ادامهم هما كمان.
داليا بدموع / شمس أنا داليا ردي عليا يا شمس. انا مش قادرة اشوفك كدة ارجوكي يا شمس ماتعمليش في نفسك كدة
رودي ببكاء / شوسي أنتي اقوى من كدة دا انتي اللي بتقويني يا شمس
الدكتور / خلاص يا جماعة ماتضغطوش عليها سيبوها براحتها هي بس تتجاوز المرحلة دي وأن شاء الله هترجع زي الاول
@@@@@@@@@@@@@@@@@@
بعد يومين
مهاب اخد شمس على القصر وقاعدة معاها دايما مابيروحش الشركة ابدا ومابيبعدش عنها لحظة واحدة. وفي ممرضة موجوده معاها عشان تعطي شمس الادوية والمحاليل لأنها رافضة الأكل
بتمر الأيام وشمس على حالتها. الممرضة بتديها الدوا والعلاج. وأحيانا بتاكل لكن مش اوي. ولسه ما بتتكلمش وبتتجاهل كل اللي حواليها
عيلة شمس عرفوا اللي حصل وراحوا زاروها كلهم.حتى عاصم راح وقلبه كان بيتعذب على حالة بنته واخواتها ومحمد ابن عمها لكن برضوه شمس تجاهلتهم وعمها طلب من الكل أنهم يسبوه يقعد معاها لوحدهم شوية وهما فعلا عملوا كدة
عبدالحميد قرب على شمس وحضنها وملس على شعرها وفضل يتكلم معاها شوية.ويقرأ لها ايات من القرآن الكريم ويحكيلها قصص الأنبياء واد ايه ربنا ابتلاهم. وقصص كتير عن الصبر.على الابتلاء
شمس رفعت وشها لعمها وأخيرا قطعت الصمت اللي دام اكتر من اسبوعين
شمس بصوت خافت حزين مكسور / خودني من هنا أنا عايزة امشي معاك واروح اوضة مارو
عبدالحميد حضنها تاني وبكى على بكائها وافتكر كلام ابنه وهو بيموت لما قاله
إنها امانة وهيسأله عليها يوم القيامة
عبدالحميد خرج لمهاب اللي كان قاعد في صالون جناحه وقاله ان شمس اتكلمت.
مهاب فرح جدا ان اخيرا شمس اتكلمت لكن زعل لما عرف إنها عايزة تمشي مع عمها. بس وافق لأن دا في مصلحتها و امر الممرضة إنها تروح مع شمس. وكل يوم هتروحلها تفضل معاها طول النهار وتمشي بالليل بعد ما شمس تاخد ادويتها وعلاجها
@@@@@@@@@@@@
شمس رجعت بيت عمها.
رجعت تعيش في اوضة مارو
___________________________
رواية ( شمس وسط الظلام) البارت(40) بقلم :- أسماء أبوشادي
__________________________________
رجعت شمس مع عمها
عادت لكي تعيش في بيت المصري. تركت قصر العدلي.وعادت لغرفة مروان
تلك الغرفة الصغيرة التي مساحتها لم تبلغ ولو ربع مساحة أصغر غرفة بالقصر.
ولكن بهذه الغرفة تجد ما لا وجدته بذلك القصر. شعرت ان مروان معها. تعيش في زكريات طفولتها التي لم تنساها ابدا
مر يومان عليها
كل يوم أما رودي تيجي او داليا
لأنهم اتفقوا من يوم ما كانت شمس في المستشفى. أنهم يبدلوا مع بعض كل يوم. واحدة فيهم تروح الجامعة وتحضر المحاضرات وتسجلها وبعدين ترجع وتديها للتانية تذاكر ويقعدوا جنب شمس ويشرحولها المحاضرة مع انها مابتبقاش مهتمة. ولا بتسمع لهم الا انهم مابييأسوش وعارفين ان صحبتهم اي كلمة بتسمعها بتتسجل في عقلها فورا
في اليوم التالي أتت سهى و نوال لكي يطمأنا على شمس. كانت داليا هي اللي قاعدة مع شمس في اليوم دا
نوال بحنية أمومة / عاملة ايه يا شمس النهاردة.
تنهدت سهى عندما رأت ان شمس لاتزال على حالها لا تبالي لمن حولها.
ولكن نوال لم تصمت فترغرقت عيناها بالدموع.واختنق صوتها بالبكاء وتحدثت إلى شمس / تعرفي أنا حاسة بوجعك أوي. وعارفة أن اللي انتي فيه صعب جدا انك تتحمليه بس صدقيني أنا اكتر واحدة حاسة بيكي
نظرت شمس لها بأستخفاف فهي ترى كل من حولها يشفقون عليها لا اكثر ثم أدارت وجهها للجهة الأخرى. فأكملت نوال وهي تدير وجه شمس لها مرة اخرى / أنا حاسة بيكي لأني أنا كمان مريت بنفس تجربة الاجهاض ومش مرة واحدة. لا 3 مرات يعني عيشت المرحلة دي 3 مرات. فرحتي اتكسرت 3 مرات
وكل مرة كنت ببقى نفسي اموت
ماتستغربيش أنا عارفة انه مش باين عليا واللي يشوفني مايقولش اني شوفت هموم وإني اسعد إنسانة في الكون لأني عايشة حياتي رغم سني.
بس انا كنت بتخطى كل مرة باعجوبة كبيرة
حاجة صعبة اوي انك تفقدي ابنك أو بنتك من قبل حتى ماتشوفيه وتاخديه في حضنك وجع كبير نتيجة خسارة اكبر
شمس نظرت في عيونها واتكلمت بضعف وبكاء / بس دي مش اول مرة اتوجع ولا اول مرة اخسر. أنتي بتقولي انك خسرتي 3 مرات وبتقولي أنهم كسروكي و وجعوكي
انا بقى طول عمري بخسر ولا مرة كسبت ولا مرة فرحت من قلبي وفرحتي دامت
انا مش بس زعلانة اني خسرت الجنين
( شهقت شمس من أثر البكاء ولكن لم يجرأ احد على مقاطعتها فهم كانوا ينتظرون تلك اللحظة من ايام حتى تتحسن حالتها )
انا قلبي واجعني أوي.صدقيني انا ارتحت لما عرفت ان نهاية حياتي قربت أيوة ارتحت أنا ماعنديش رغبة اني أعيش انا عمري ما اعترضت على قضاء ربنا وأمره. دايما بحمد ربنا وبصبر على ابتلاءه
لكن انا تعبت من حقي ارتاح. لما عرفت ان عمري قرب ينفذ. قولت خلاص ربنا هيرحمني وهيعتقني من الحياة. بس طلع ان حتى دا مش مكتوبلي مش عارفة ليه انتوا مصممين اني اعيش ليه مش عايزين تسيبوني أمشي وارتاح من الدنيا دي
داليا ببكاء على حال شمس / عشان بنحبك ومانقدرش نعيش من غيرك وصعب اننا نشوفك بالحالة دي
شمس بصوت عالي بعض الشئ وبكاء بانهيار وشهقات / حطوا نفسكوا مكاني
أنتي بتقولي مش قادرة تعيشي من غير صاحبتك. طب انا ازاي عايشة بعد كل حاجة شوفتها في حياتي وبعد كل الوجع اللي طول عمري عايشة فيها
بتقولي انكوا صعب تشوفوني بالحالة دي
طب انا اللي عايشة الحالة دى نفسها انا اللي بتألم أنا اللي بتوجع انا اللي بخسر مش انتوا
سهى / يعني عايزانا نقف نتفرج عليكي وأنتي بتموتي نشوفك وانتي بتتوجعي ونسيبك لوحدك لحد لما تموتي بالبطئ
شمس بهدوء واستنكار / وانتوا فاهمين ان انا كدة مش لوحدي ههههههههههههه انا طول عمري لوحدي. حتى لو وسط كل الناس اللي اعرفهم. انا لوحدي. لوحديييييي
نوال / لا يا حبيبتي أنتي مش لوحدك. كلنا جنبك ابوكي وأخواتك وعمك وعيلتك كلها وأحنا كمان عيلتك و داليا و رودي ومازن الكل جنبك. و اهمهم مهاب. مهاب اللي بيعشقك واتغير كتير عشانك ومن يوم ما عرف بتعبك ومرضك وهو مابقاش مهاب و
شمس تقاطعها / ارجوكي. ارجوكي كفاية كدة مش قادرة اتكلم تاني
سهى / خلاص يا حبيبتي احنا هنسيبك دلوقتي ترتاحي بس عايزينك تبقي قوية وتتجاوزي المحنة دي وكمان ترجعي القصر لأن بصراحة انتي اللي كنتي ملخياه مليان بالحياة. وبعد ما مشيتي الحال اتقلب
تجاهلت كلام سهى وكأنها لم تسمع شئ وذهبت كلاً من سهى و نوال. وظلت داليا مع شمس
اقتربت داليا من شمس وجلست بجوارها على السرير
داليا ببكاء / شمس هو انتي زعلانة مني وبطلتي تحبيني
شمس بهدوء / تصدقي يا داليا اني مش زعلانة من اي حد في الدنيا دي. ولا اي حد حتى ابويا بعد كل اللي عمله معايا طول عمره مش زعلانة منه. ولا مهاب زعلانة منه مع انه قتل اللي في بطني واجهضه بدون حتى مايعرفني أو يخيرني يبقى هزعل منك أنتي. مع انك عمرك ما اذتيني
داليا / خلاص يبقى عيشي عشاني أنا. ارجوكي يا شمس ماتسبنيش. خودي علاجك واعملي العملية عشان خاطري أنا و رودي. دي رودي بقت حالتها صعبة خالص ودايما خايفة أنتي مابتشوفيهاش هي ادامك بتتظاهر إنها كويسة لكن والله يا شمس لا هي ولا انا نقدر نعيش من غيرك ابدا
@@@@@@@@@@@@@@@@@
بعد مرور كام يوم اخرين
مهاب ماحاولش يشوف شمس عشان مايتعبهاش وخصوصا أنها رجعت تتكلم مع اللي حواليها صحيح كلام قليل مقتضب لكن بتتكلم و بيطمن على شمس من الممرضة والدكتور اللي بيروحلها البيت هو كمان.
شمس طلبت من داليا و رودي يروحوا الجامعة ويبقوا يجولها بعد الجامعة ومافيش واحدة فيهم تغيب
وأصرت عليهم وهما نفذوا رغبتها عشان مايزعلوهاش
بالليل بعد رحيل داليا و رودي واخدوا الممرضة يوصلوها في طريقهم كمان
دخل عبدالحميد لشمس
عبدالحميد / عاملة ايه يا حبيبتي النهاردة.
شمس / كويسة
عبدالحميد / الحمد لله. ربنا يشفيكي يا بنتي ويبعد عنك كل سوء بتذاكري يا شمس ولا لاء
شمس بأبتسامة مكسورة/ أذاكر هههههههه لاء مش بذاكر
عبدالحميد / وطب و وعدك لمروان انك كل سنة هتطلعي الأولى على جامعتك نسيتيه
شمس أغمضت عنيها بألم من تلك الذكرة. ذكرة موت مارو
عبدالحميد / أنا اسف لو كنت فكرتك ب
شمس قاطعته / أنا مانسيتش عشان حضرتك تفكرني يا عمي
عبدالحميد / طيب هتعملي إيه هتفضلي على الحال دا كتير. لازم تشوفي مستقبلك وتركزي في دراستك ومتضيعيش تعب السنين اللي فاتت
شمس بأستهزاء / مستقبلي
انا ان شاء الله يا عمي لو عيشت هطلع الأولى زي ما وعدت مارو بس مش عشان مستقبلي وسنين عمري اللي هي اصلا كدة كدة ضايعة لاء دا عشان الوعد
عبدالحميد / ان شاء الله هتعيشي و ربنا هيعوضك خير عن كل اللي شوفتيه
شمس بأقتضاب / ان شاء الله
_______________________________
تاني يوم. رودي و داليا في المحاضرة وكانت دي محاضرة دكتور عمر
الباب خبط.بعد بدأ المحاضرة ب 10 دقايق. وطبعا من المعروف عن دكتور عمر أن ممنوع حد يدخل بعده.
عمر سمح للي بيخبط إنه يدخل. وبيحضر كلام توبيخ للي قاطع المحاضرة
( هو كدة كدة مش طايق دبان وشه بسبب داليا )
شمس دخلت بعد ما سمعت الدكتور عمر بيسمحلها تدخل / آسفة على التأخير يا دكتور
داليا و رودي قاموا وقفوا بفرحة من المفاجأة وعمر كمان اتفاجأ بيها
وكل زمايلها كمان.اللي كانوا دايما بيسألوا عليها وعايزين يعرفوا سبب غيابها عن الجامعة اكتر من شهر
عمر بأبتسامة / اتفضلي يا استاذة شمس وخلي بالك دا امتياز ليكي المرة دي بس عشان كنتي في اجازة مرضية
شمس بهدوء / شكرا
ودخلت قعدت جنب صحابها اللي كانوا لسه واقفين.
و داليا حضنت شمس بفرحة / حبيبتي نورتي الجامعة
عمر / احم احم. الكلام دا في الكافترية يا استاذة داليا
داليا ببرود وغيظ في نفس الوقت / سوري يا دكتور
@@@@@@@@@@@@@@@@
بعد المحاضرة كل الطلبة قاموا يسلموا على شمس ويرحبوا بيها بعد الغياب دا ويطمنوا على صحتها بعد ما رودي و داليا فسروا سبب غيابها على انها مريضة. ودا كان ظاهر على وجه شمس لأنه زبلان جدا
خلصوا وخرجوا عشان مايتعبوهاش اكتر. بينما عمر اقترب منها
عمر متجاهل داليا كلياً / عاملة ايه يا شمس دلوقتي
شمس / الحمد لله تمام يا دكتور
عمر / نورتي الجامعة. لو احتجتي اي حاجة او اي مساعدة عشان الدراسة أنا موجود ماتتردديش
شمس / متشكرة لحضرتك وإن شاء الله لو احتجت حاجة مش هتردد أبدا
عمر / طب عن اذنك
وذهب عمر من امامهم دون ان يلتفت حتى لداليا بنظرة واحدة.
شمس لاحظت اللي حصل ولاحظت كمان معالم الضيق على وجه داليا ولكنها لم تعلق على الموضوع وخرجوا يروحوا الكافترية.
وهما في طريقهم قابلوا الدكتور احمد. كان ذاهب إلى احد المدرجات ليعطي الطلبة محاضرة
أحمد بفرحة ودهشة / آنسة شمس. منورة الجامعة ألف سلامة عليكي
شمس / منورة بنورك يا دكتور. الله يسلمك
أحمد بأبتسامة وهو بيبص لرودي/ صدقيني أنا مبسوط جدا انك اتحسنتي وجيتي الجامعة
شمس بتبص لرودي اللي متجاهله أحمد / الله يخليك يا دكتور مرسي على زوق حضرتك.
@@@@@@@@@@@@@@@
في الكافترية. قعدوا البنات مبسوطين جدا ان شمس اخيرا راحت الجامعة
شمس بهدوء / ممكن افهم بقى ايه اللي حصل بالظبط في غيابي
داليا و رودي بأستغراب / ايه اللي حصل في ايه
شمس / بصوا انا مافيش اخلاق للحوارت واللف والدوران انتوا فاهمين انا بتكلم على ايه. ومع ذلك هوضح داليا ايه اللي حصل بينك وبين عمر
داليا بأبتسامة كاذبة / حبيبتي ماتشغليش بالك. مافيش حاجة عادي يعني
شمس بحزم / داليا احكي ايه اللي حصل بسرعة
تنهدت داليا. وحكت لشمس على الموقف اللي حصل بينها وبين عمر لأنها عارفة ان شمس مش هتسكت إلا لما تعرف
فلاش بااااااااااااااااااااااااااااااااك
عمر أول ما شاف داليا وهي داخلة الجامعة بعد ما غابت اسبوع هي و رودي.
عمر قرب منها وعلامات الضيق على وشه / ممكن اعرف انتي ما بترديش علي اتصلاتي ليه. وبتتجاهلي مسدجاتي
داليا ببرود / مش فاضية والفترة دي انا مشغولة ومش هعرف اتكلم معاك
عمر بضيق / ولما روحتلك البيت عشان اشوفك. رفضتي تقابليني واتحججتي انك نايمة ليه
داليا بتأفف / اوووووفففف كنت فعلا نايمة مش بتحجج وأنا قولتلك قبل كدة ماتكلمنيش بالأسلوب ده. وياريت يا عمر تسيبني الفترة دي في حالي لانى بجد تعبانة بسبب الظروف اللي احنا فيها
عمر بغضب / اسيبك في حالك ازاي يعني انتي ناسية اني خطيبك انا عايز اعرف انا عملت ايه علشان تتجاهليني بالمنظر ده
داليا عنيها اترغرقت بالدموع / انت ماعملتش حاجة. انا اللي عملت. انا اللي أهملت صاحبتي عشانك وسيبتها وهي تعبانة عشان اقعد معاك وانشغلت عنها بيك
عمر / يا داليا افهمي اللي حصل دا نصيب شمس وبعدين ما انتي علطول جنبها وهي اللي قصدت تخبي عنك وعن كل اللي حواليها ماتحمليش نفسك الذنب
داليا / لو سمحت يا عمر سيبني على راحتي وماتدخلش بعلاقتي بصحابي عشان اللي بينا أكبر من أن إي حد يفهمه
عمر بغضب / ماشي يا داليا هسيبك براحتك انا غلطان اساسا اني جيت اتكلم معاكي
بااااااااااااااااااااااااااااااااك
داليا / بس كدة ومن يومها ما اتكلمناش مع بعض تاني
شمس بصتلها بغيظ وحنق ثم وجهت نظرها لرودي قائلة / وأنتي يا استاذة رودي. هببتي إيه
رودي ببراءة / أنا. وأنتي تعرفي عني يعني اني بهبب حاجة
شمس مسكت كوباية العصير / اخلصي يا رودي واحكي وراكي ايه
رودي / اهدي بس يا شوسي انتي اخلاقك بقت ضيقة كدة ليه يا عسل. انا هحكيلك كل حاجة
فلااااااااااش بااااااااااااااااااااااااااااااااك
أحمد كان واقف ادام باب المدرج مستني رودي تخرج من المحاضرة
رودي خرجت من المحاضرة وتجاهلته خالص. وهو شافها جري عليها قبل ما تتجاوزه
أحمد بأستغراب / بتهربي مني ليه يا رودي
رودي بلا مبالاة / وانا ههرب منك ليه يعني. هو حضرتك مدايني ولا ماسك عليا زلة
أحمد بدهشة / رودي انتي بتكلميني أنا كدة
رودي بصت حواليها ببرود تصطنع البحث عن احد
أحمد / انتي بتبصي حواليكي كدة ليه
رودي / بشوف اذا كان في حد غيرك واقف ولا لاء.
أحمد بعدم فهم / ليه يعني مش فاهم
رودي باستنكار / مش حضرتك بتسألني أنا بكلمك انت ولا بكلم مين. فأنا بشوف اذا كان حد غيرك واقف وأنت افتكرتني بكلمه هو مش بكلم حضرتك
أحمد بضيق / هو دا اللي ربنا قدرك عليه. يعني انتي مابترديش على مكلماتي ولا بتعبريني و ماشوفتكيش بقالي اكتر من اسبوع. ويوم ما اشوفك تتعاملي معايا بالأسلوب ده
رودي / دكتور احمد إذا سمحت انا مضطرة امشي دلوقتي
( حاولت رودي ان تمر من جانبه ولكنه قبض على رسغها )
أحمد / ممكن افهم انا عملت ايه. صحبتك عيانة. انا ذنبي ايه اكونش أنا السبب في مرضها مثلاً
رودي شدت ايديها منه بقوة كبيرة وبصتله بعدائية / لا يا سمح الله أنت بس كل ماكنت تعرف انى قاعدة مع صحابي تقولي مابتشبعيش من القاعدة معاهم. تعالي المكتبة شوية. كلميني واتس شوية كلميني فون شوية. اديني من وقتك زي ما بتدي صحابك
لحد ما خلتني ابعد عن أقرب صديقة ليا وأقرب واحدة ليا في الدنيا كلها. وبعدت عنها في اكتر وقت خي محتاجاني فيه
أحمد / رودي انا ماكنتش اقصد انا كان نفسي بس نقضي اكبر وقت ممكن مع بعض. زي اي أتنين بيحبوا بعض
رودي / احمد أنت قولتلي قبل كدة ان انا مقضية كل وقتي بين دراستي وصحابي وكنت زعلان وبتقول. انك مش حاسس ان فيه لك مكان في حياتي و وقت من يومي
وأنا بقولك الكلام دا فعلا حقيقي. أنا حاليا كل وقتي لدراستي وصحابي وأي دقيقة هقف اتكلم معاك فيها شمس ابده بيها
وتركته رودي واقف بمكانه مصدوم من كلامها. وندمان إنه كان دايما بيعاتبها بسبب وجودها اكتر الوقت مع صحابها
بااااااااااااااااااااااااااااااااااااااااااااااك
رودي / ايه رأيك أنا كدة بقى غلطانة
شمس بغيظ / لا طبعا. انتوا الاتنين مش غلطانين أبدا أنتي اتجننتي ابت أنتي وهي. يعني عشان انا تعبت شوية. تسودوا عيشتهم دا كويس انهم مقتلونيش لما شافوني.
داليا بغضب/ ليه ان شاء الله.
شمس / وكمان لكي عين بتسألي يعني انتوا عايزين تنكدوا عليهم. ماشي براحتكم لكن ماتجبونيش أنا سبب
رودي / يا حبيبتي أنتي مش سبب ولا حاجة بس احنا فعلا غلطنا لما ماحسناش بيكي وبعدنا عنك
شمس بعصبية / رودي انتوا مابعدتوش ولا حاجة انا اللي كنت ببعد وماكنتش عايزة حد يعرف. واللي انتوا عملتوه دا غلط ماكنش ينفع تتكلموا معاهم بالطريقة دي او تقولولهم كلام زي ده
رودي بمرح / بقولك ايه فكك ماتشغليش بالك بالموضوع دا احنا اا
قاطعتها شمس بعصبية وصرامة / بت انتي وهي كل واحدة تمسك تليفونها وتبعت رسالة لحبيبها تطلب منه يقابلها النهاردة
داليا / انتي بتقولي إيه يا شمس
شمس بنفاذ صبر / داليا صدقيني انا مافييش طاقة اعيد كلامي مرتين. إذا ما اتصلحتوش معاهم النهاردة صدقوني أنا هزعل منكوا جامد وهاخد موقف
رودي / لا يا شمس اوعي تزعلي مننا احنا مانقدرش على زعلك
شمس / خلاص يبقى اوعدوني تصلحوا كل حاجة النهاردة
داليا بتوتر / طب ما تأجليها يوم تاني يا شمس مش لازم النهاردة
شمس بأبتسامة حزينة / يا حبيبتي ماتضيعوش وقت من عمركوا في الخصام. والزعل استغلوا كل ايامكوا في الفرح والسعادة وحاولوا تتجنبوا الحزن دا خالص
رودي بأبتسامة / خلاص يا حبيبتي هنعمل اللي انتي عايزاه
داليا / بس صحيح قوليلي أنتي جيتي ازاي هو مهاب بعتلك السواق
شمس / لاء هو اساسا مايعرفش اني قررت اجي هيبعتهولي أزاي بقى.
رودي بضيق / طب وما اتصلتيش بينا ليه كنا جينا اخدناكي كدة تيجي مواصلات
شمس / انا ماجيتش مواصلات. أنا جيت بالمتوسيكل
رودي / الواد محمد ابن عمك وصلك
شمس / لاء أنا اخدت منه الموتوسيكل بتاع مارو وكدة كدة هو عنده واحد تاني
داليا بذهول / يعني انتي جيتي لوحدك على الموتوسيكل من البيت لحد هنا
شمس / اه وإيه المشكلة يعني ما أنا بعرف اسوقه كويس
رودي / يا قلبك يا شيخة وماخوفتيش لحسن بعد الشر تقعي بيه وأنتي ماشية ولا يحصلك حاجة
شمس / لا ماخوفتش. ومابقتش بخاف من اي حاجة. صحيح قلبي بيوجعني لكن بعد كل الوجع اللي عاشه بقى قوي لدرجة انه مابقاش يخاف من حاجة
رودي / انا اسفة يا شمس والله ما اقصد حا
قاطعتها شمس / خلاص انتوا هتفضلوا ترغوا كدة وخلاص المحاضرة ميعادها جه وشكلنا هنطرد
داليا / لا يا اختي ماتخفيش الدكتور اللي هيدخلنا دلوقتي. دكتور اسباني إنما ايه عسل
رودي بصت ورا داليا / اهلا دكتور عمر اتفضل
داليا اتفزعت وبصت وراها لكن مالقيتش حد و رودي عملت فيها مقلب
@@@@@@@@@@@@@@@@@
خلصوا المحاضرات وشمس اتأكدت بنفسها من أن داليا و رودي بعتوا رسايل لعمر وأحمد. عشان يقابلوهم
وبالفعل أحمد رد بسرعة وبعت لرودي أنهم يتقابلوا بعد الجامعة ويتغدوا سوا. أما عمر فدا كان مقموص. رد قالها عايزة ايه. طبعا داليا اتضايقت وماكنتش هترد بس شمس اصرت. راحت بعتاله عايزة اتكلم معاك شوية ممكن. وشمس شدت التليفون من ايديها وراحت كاتبة هي رسالة وبعتتهاله. كان مضمون الرسالة
( جعانة موت ممكن تيجي تعزمني على الغدا يا حبيبي )
داليا اتصدمت لما شافت الرسالة اللي شمس بعتتها و رودي ماتت من الضحك عليها
شمس سابتهم في الجامعة مستنين أحمد وعمر
وركبت هي الموتوسيكل عشان تروح لكن السواق اللي بيوصل داليا شافها واتصل بمهاب بلغه باللي شافه
مهاب ساب اللي في ايده فورا وطار على شمس. ساق هو العربية وعربية الحراسة كانت وراه
شمس يدوبك هتدخل المنطقة اللي هما ساكنين فيها شافت عربية مهاب جاية عليها و وراه عربية الحراسة الخاصة بيه وفي اقل من دقيقة كان مهاب واقف ادامها بالعربية ونزل بملامح الغضب من تصرف شمس لكن بمجرد ما شافها وشاف عيونها اللي وحشته داب فيهم وحضنها وهي راكبة الموتوسيكل
شمس بحرج / مهاب احنا في الشارع ما ينفعش كدة
مهاب سابها / ايه اللي انتي ركباه دا يا شمس ينفع كدة خضتيني عليكي طول الطريق وأنا خايف ليكون جرالك حاجة.
شمس بهدوء / ماتخافش أنا بعرف أسوقه كويس لأن مارو علمني أتعامل معاه ازاي. وبحرافيه كمان
مهاب بحزم / ولو يا شمس. البتاع دا ما تركبهوش تاني وبعد كدة لما تحبي تخرجي تتصلي بيا ابعتلك السواق هو يوصلك
شمس بأقتضاب / ممكن توسع عشان امشي ونبقى نتكلم بعدين
مهاب بهدوء / بس انا محتاج اتكلم معاكي دلوقتي يا شمس. وحشتيني أوي مش عارف اعيش في مكان انتي مش فيه
شمس اتنهدت / وانا كمان محتاجة اتكلم معاك. بص تعالى ونتكلم في البيت
مهاب / طب يلا انزلي اركبي معايا في العربية وأنا هخلي واحد من الحرس يسبقنا بالبتاع ده
شمس بضيق / مهاب انا همشي بيه وأنت امشي ورايا بالعربية. أنا مش هنزل من عليه. ويلا بقى عشان انت سادد الشارع بالعربية بتاعتك والحرس كمان
@@@@@@@@@@@@@@@@
في بيت المصري في شقة عبدالحميد وخاصة في غرفة مارو التي تعيش فيها شمس
يجلس الاثنان معا
مهاب بأبتسامة / هي دي اللي كانت اوضتك
شمس / لاء هي كانت اوضة مارو لكن بعد ما مات أنا نقلت حاجتي فيها واصريت اني اعيش فيها وتبقى اوضتي
مهاب / كنتي قريبة منه اوي صح
شمس بأبتسامة حزينة / ماكنش في أقرب منه ليا ولا أقرب مني له
مهاب / الله يرحمه
شمس / اللهم امين. تعرف عمره ماغصبني على حاجة. عمره ما اذاني حتى ولو بالغلط دايما جنبي في قراري واختياري مهما كان اختياري صعب أو حتى غلط مافيش حاجة اتمنيتها إلا وحققهالي
مهاب / شمس صدقيني أنا عملت كدة عشان بحبك وماقدرش أعيش من غيرك. وأنتي غلطتي لما خبيتي عليا من الأول يمكن لو كنت عرفت اول ماروحتي للدكتور ماكناش وصلنا للحالة دي. أنا والله كان صعب عليا اعمل كدة لكن ماكنش في اختيار تاني. أنتي عندي اهم من كل شئ واي شئ
شمس / مهاب انا مش زعلانة منك. أنا زعلانة على نفسي
مهاب / اوعي تزعلي يا شمس. أن شاء الله ربنا هيعوضنا خير شمس أنا بحبك وبموت فيكي وما اقدرش اشوفك كدة
شمس / وانا بعشقك يا مهاب. بموووووت فيك بحبك بجنوووون. بحبك اكتر مابتحبني مليون مرة
___________________________
نكمل في الفصل الجاي
