رواية غمرتني عشق الحلقة الثانية

..

اللهم صل علي محمد ..

صلاه ينفرج بها الگرب ..

وتنحل بها العقد ..

بسم الله نبدأ

عشق خلصت شغلها على بعد الضهر

عشق : ااااه، مش قادره بجد؛ ضهري اتقطم من شغل انهارده

سحر: ااااه، ومين سمعك ياختي، والله منا عارفه امتى ربنا هيتوب علينا من الشقا ده، والله احنا اتخلقنا نبقى هوانم، مش خدامين في الأراضي، ونشتغل باليوميه

عشق: احمدي ربنا يابت، عشان النعمه متزولش من وشك، احنا احسن من غيرنا .ربنا يديمها نعمه ويحفظها من الزوال،

سحر: امممم،،، ماشي يا ختي يارب، يلا بقه نروح نقبض خلينا نرجع نرتاح شويه

عشق: يلا يا ختي، ربنا يستر،

سحر وعشق راحو لخالد

خالد: تعالي يا سحر خدي ياستي يوميتك اهي،

سحر: شكرا ياخالد بيه، ربنا يكرمك يارب

خالد بص لعشق بخبث :وانتي ياعشق ابقى تعالى خدي يوميتك من الفيلا عندي اظن انك عارفاها اللي على أول البلد دي،

عشق وسحر اتصدموا

عشق بضيق: وليه ان شاء الله، اشمعني انا اللي هروح اخدها من الفيلا، حضرتك ممكن تديهاني دلوقتي ويبقى كتر خيرك

خالد: بصراحه مفيش معايا سيوله حاليا، وفي ناس كتير هتيجي الفيلا تاخد فلوسها، والله لو عايزه فلوسك تعالي، مش عايزه انتي حره

عشق بغيظ: يا خالد بيه بلاش الأسلوب ده معايا، انا متعودتش ان حد يلوي دراعي، ولو على الفلوس، انا مبهتمش بيها، كل اللي يهمني اني عايزه اجيب علاج امي، غير كده والله مكان هيهمني فلوس ولا غيره، فمن فضلك هات يوميتي عشان امشي والحق امي بالعلاج

خالد بتحدي: وانا قولتلك مفيش معايا حاليا، ياتيجي معايا اجيبلك الفلوس، ياتعدي عليا وقت متحبي، يا اما اعتبر انك اخدتيهم وملكيش عندي حاجه

عشق بتحدي اكبر : ماشي يا خالد بيه، وانا هروح اطمن على امي، وبعدين هعدي على حضرتك عشان اخد فلوسي

خالد بفرحه : وانا مستنيكي يا جميل،

عشق وسحر مشيو من قدامه

سحر: بت ياعشق، انتي فعلا هتروحي، انتي مش خايفه يعمل فيكي حاجه

عشق ساكته خالص، وماشيه بغيظ وتفكير

سحر: بت يا عشق، انا مش بكلمك، متردي عليا، انا خايفه عليكي وبفكر اجي معاكي

عشق: لا ياسحر، انتي لو جيتي هيعند، انا هروح لوحدي، وهشوف هيعمل ايه، يمكن فعلا مش معاه فلوس

سحر: انتي عبيطه يابنتي،ده حط روزمة فلوس قد كده في جيبه قدامي، ممعهوش ازاي يعني

عشق بخنقه : خلاص يا سحر، ربنا يستر، وانا ربنا معايا احسن من اي حاجه،

سحر: عموما انا قربت من البيت، هسيبك دلوقتي وابقى طمنيني عليكي، وعدي عليا وانتي راجعه من عنده

عشق: حاضر يا سحر، ربنا يصلح الحال يارب

وسابتها ومشيت وهي بتفكر هتعمل ايه مع خالد وهتخلص منه ازاي

عشق وصلت بيتها ودخلت

عشق: ماما، يا فاديه، انتي فين يا حبيبتي.

فاديه :تعالي يا عشق انا في الاوضه ياحبيبتي

عشق: دخلت وباستها، عامله ايه ياقلب عشق دلوقتي،

فاديه :نحمد ربنا يابنتي، الحمد لله على كل اللي يجيبه

عشق: خلاص يا حبيبتي، ثواني بس هحضر الغدا ونيجي ناكل مع بعض، زمانك جعانه

فاديه: لا يا حبيبتي تعالي بس، احكيلي عملتي ايه انهارده، انا بحب اسمعك وانتي بتحكي

عشق قعدت على السرير : حاضر يا ست الكل وادي قعده، ها ياستي عايزه تسمعي ايه

فاديه: هههه، انتي مش مركزه ولا ايه يابت ياعشق، بقولك احكيلي عملتي ايه انهارده

عشق: هههه، مركزه طبعا يا ست الكل، انا بس بحب اهزر معاكي ياقمر؛،

بصي ياستي كالعاده رحت اشتغل زي شغل كل يوم والبت سحر صدعتني بكلامها الكتير، وأن شاء الله هروح بالليل اخد يوميتي من خالد بيه واجبلك العلاج اللي ناقص،

فاديه :طب وانتي مأخدتيش منه اليوميه ليه في الأرض

عشق: كانت الفلوس اللي معاه خلصت، وبعدين مش انا لوحدي اللي هروح، لا، ده انا وكام واحده وواحد معايا، متقلقيش ياست الكل

فاديه: انا طول عمري مبرتحش للي اسمه خالد ده ابدا، راجل زي التعبان، بيقعد يلف لحد ميخنق اللي قدامه

عشق: متقلقيش ياماما، انا واثقه ان ربنا مش هيضرني ابدا، سيبيها لله ياست الكل وان شاء الله هتعدي، المهم انا هقوم الحق اصلي الضهر، واجهز الغدا لاني جعانه جدا

فاديه :انا ياحبيبتي حضرت الغدا واقف على التسخين ياقلب امك، وقومي انتي صلي وانا اللي هجز الاكل

عشق باست اديها:طب ليه يا أمي تتعبي نفسك، انا كنت هجهز كل حاجه

فاديه بدموع: انا كده بتعب نفسي؟ انا لو أطول يا بنتي اجيبلك حته من السما، روحي ياعشق يابنت بطني، قلبي وربي راضيين عليكي يابنتي، ربنا يستر طريقك يا يارب

عشق: باست راسها،،، ربنا يخليكي ليا يا حبيبتي وميحرمنيش منك ابدا

————–بقلم شيمو الخطيب رواية غمرتني عشق الحلقة الثانية

في شركة القاسم

حازم اتصل بقاسم

حازم : ايوه يا قاسم، تعالالي المكتب حالا

قاسم: خير يا بابا في حاجه ولا ايه

حازم بزعيق : في الشركه اسمي حازم بيه، بابا دي هناك في البيت، وبعدين لما تيجي هتفهم انا عايزك ليه، يلا بسرعه َمتتاخرش،،، وقفل السكه

قاسم : هو ايه ده؟!!!! عموما ماشي، اكيد ست جيجي قلبت الدنيا عليا

وقام وراح لمكتب حازم بيه

قاسم: ازيك يا بوسي، (سكرتيرة حازم)

بوسي وقفت: اهلا قاسم بيه، اتفضل حضرتك، وفتحتله الباب

قاسم دخل: خير يا حازم بيه، حصل حاجه ولا ايه

حازم : انت لحد امتى هتفضل قليل الذوق كده، بقه البنت تجيلك وتقولك عايزه تتغدى معاك، وانت ترفض، انت عبيط ياواد انت ولا ايه، انت عارف جيجي دي تبقي مين، وبنت مين

قاسم بغيظ مكبت : بابا،، انا اسف قصدي حازم بيه،،، ، انا مبحبش الأسلوب ده، احنا مش عيال صغيره، كل مايحصل حاجه، تجري وتبلغ أهلها، انا بتخنق بجد، وبعدين ايه اللي حصل لكل ده، عندي شغل كتير وكان عندي مقابله مع أمجد بيه، ورفضت انهارده، ايه،،، الدنيا اتهدت يعني،

حازم بنفاذ صبر : لا يا قاسم بيه الدنيا متهدتش ولا حاجه، اللي يزعل هو اسلوبك، ده مش تعامل مع بنت رقيقه زي جيجي، انت لحد امتى هتبقى همجي كده

قاسم بنرفزه : انا همجي؟ ليه؟ كل ده عشان زعلت ست الحسن والجمال، بقولك ايه يابابا، لو انا هبقي عقبه بالنسبالك تقدر تخرجني من الشركه كلها، لكن اضغط على نفسي وعلى اعصابي عشان اتقبل واحده انا مش طايق تصرفاتها، اهو ده اللي مش هيحصل ابدا، عن اذنك يا حازم بيه

حازم : استنى عندك،، انت ازاي تتكلم معايا بالاسلوب ده، انت مش شايف نفسك بتتكلم ازاي

قاسم لف وشه لحازم ومسح وشه باديه : انا اسف، بس حضرتك اللي اتهمتني بالهمجيه لمجرد اني رفضت اعزم واحده لاني مشغول، وده بصراحه انا مقبلوش، ولا أقبل اني اعمل حاجه مع حد وانا مضطر او مجبر، انا مبعملش حاجه غير بمزاجي انا وبس

حازم بهدوء : ماشي ياقاسم، ممكن تهدي وتحاول تكلم البنت وتصالحها

قاسم : حاضر،،، بس بمزاجي برده، عن اذنك لان عندي معاد مهم

وسابه وخرج بسرعه

حازم : مفيش فايده، هو ده قاسم ابني، ربنا يهديه

؛—————– بقلم شيمو الخطيب رواية غمرتني عشق الحلقة الثانية

عند حسام في القسم

قاسم اتصل عليه

حسام : الو ايوه يا كبير

قاسم: ايه يابني خلصت ولا لسه، انا بجهز حاجتي ونازل من الشركه اهو، اجيلك فين

حسام: ههههه، لا بص انا حاليا في القسم، قدامي كذا قضيه، تعالالي ولما نخلص نمشي مع بعض

قاسم: انت هتهزر يا حسام، هنقضي اليوم وسط المجرمين، بس فعلا انا اللي غلطان اني صاحبت ظابط، وياريته شاطر، ده ظابط فاشل، هههههه

حسام: الله يسامحك يا ابو قاسم، لكن يلا حظك كده بقه، المهم متتأخرش، انا هستناك

قاسم : ماشي يا خويا، جايلك اهو، سلام

حسام : سلام يا كبير، وقفلوا مع بعض

——————- بقلم شيمو الخطيب رواية غمرتني عشق الحلقة الثانية

في بيت عشق

فاديه :ياعشق،، ياعشق، تعالي ياحبيبتي شوفي مين على الباب

عشق من المطبخ : حاضر ياماما انا سامعه ياحبيبتي بس بلبس الاسدال وهفتح اهو

عشق فتحت وكان طارق جارهم

عشق: خير يا طارق، فيه حاجه ولا ايه

طارق: لا ياعشق، انا بس كنت بطمن عليكي،

عشق: انا كويسه الحمد لله، بس اشمعني يعني يا طارق

طارق: بصراحه انا قابلت سحر وحكتلي اللي حصل من خالد الزفت ده،و انا بصراحه جاي عشان اجي معاكي ونجيب فلوسك منه

عشق: ههههه، والله البت سحر دي ملهاش حل، طب هي ليه تحكي حاجه متخصهاش، عموما حسابي معاها بعدين

طارق: جرا ايه يا عشق، هو انتي اتدايقتي اني عرفت ولا ايه

عشق : لا طبعا، بس انا مبحبش حد يتكلم او يحكي حاجه متخصهوش، افرض اني مش عايزه اتكلم فيها، ليه هي تقولها، عموما، انا بشكرك ياطارق على وقفتك دي، ولو احتاجتك اكيد مش هتردد،، انت اخويا وانت عارف كده كويس

طارق: اخوكي برده ياعشق، مفيش فايده، بس انتي مش اختي يا عشق، انتي عارفه انتي ايه بالنسبالي

عشق: وانا سبق وقولتلك انك اخويا وبس يا طارق، وياريت تحترم رأيي ده وتتعامل معايا على أساسه

طارق: ماشي ياعشق، انا هعدي عليكي بعد شويه تكوني جهزتي ونروح لخالد بيه

عشق: لو احتاجتك هقولك يا طارق، انا شويه وهروح لوحدي، لاني واثقه انه مش هيقدر يعمل حاجه

طارق بنرفزه : انتي ليه بتعندي، ليه مش عايزه حد يساعدك، هو انتي هتخسري ايه، لو انا جيت، ولا يمكن تكوني حابه تروحي لوحدك لغرض في دماغك بقه

عشق بنرفزه: بقولك ايه يا طارق، اي تلميح منك تاني صدقني هتزعل مني، وسبق وقولتلك شكرا لوقفتك معايا، اظن كده انت جبت النهايه، وللمره التانيه، الف شكر ليك بعد اذنك

وقفلت الباب في وشه

طارق واقف مذهول، وبيأنب نفسه على كلامه، واضطر انه يمشي لأنها مش هتسمع اي كلمه منه حاليا

فاديه : في ايه يابت يا عشق صوتك كان عالي ليه، انا سمعت صوت طارق، هو حصل حاجه ولا ايه

عشق:……….

فاديه من اوضتها: يا عشق، ياعشق، متردي يابنتي، انتي كويسه؟

عشق مسحت دموعها ودخلت، : ايوه يا ماما انا كويسه، متقلقيش، ده طارق كان جاي يسأل عليا، ويقولي انه هيجي معايا عند خالد بيه

فاديه : طب كويس يا بنتي، عشان اطمن عليكي

عشق بصت لمامتها، : حاضر ياماما، انا هلبس واخد طارق ونروح

وفعلا لبست وخرجت

———–بقلم شيمو الخطيب رواية غمرتني عشق الحلقة الثانية

في فيلا العزيزي

هدى سمعت صريخ ودخلت بسرعه

هدي: يانهارك ابيض يا زهره، انتي عملتي ايه يابت انتي، انتي كسرتي الفازه، (وبزعيق)، انتي عارفه دي تمنها كام

زهره برعشه: والله، والله، يا، يا، يا ست هانم غصب عني، انا كنت راجعه على المطبخ بسرعه، خبطت فيها وملحقتش امسكها، بصي ياست هانم اخصمي تمنها من مرتبي

هدى بصوت عالي: مرتب ايه يا ام مرتب، انتي عارفه دي بكام، انتي لو قعدتي تشتغلي عمرك كله مش هتسدي حقها،

يا زينب،،، يازينب،،

زينب بتجري: تحت امرك يا ست هانم، (وشهقت لما شافت الفازه) ايه ده ومين عمل كده

هدى :بقولك ايه يا زينب، البت دي متخرجش من المطبخ خالص، لحد ما سيد يجي وياخدها، انا مش هقدر استحمل غبائها ده كتير، انتي اللي مسؤله عن نضافة البيت يا زينب، ودي المطبخ وبس، انتي سامعه

زينب: حاضر ياست هانم، مش هتخرج من المطبخ حاضر، ومسكت زهره

عدي قدامي، انتي هببتي ايه يا بت انتي

كده في أول يوم، ربنا يعدي الايام الجايه على خير

هدي: الله يخربيتك ياسيد، على البلوه اللي بلتني بيها،

وبعد فتره كبيره كلمت قاسم

هدي: الو، ايوه ياحبيبي عامل ايه

قاسم: تمام يا أمي الحمد لله،

هدي: انت فين ياقاسم، سامعه صوت العربيه

قاسم: انا رايح لحسام القسم، ليه في حاجه ولا ايه ياست الكل

هدي: لا يا حبيبي انا بطمن عليك بس، المهم كلمت جيجي ولا لسه

قاسم بخنقه : ماما، عشان خاطري انا مبحبش ازعلك انتي بالذات، فممكن تسيبيني اتعامل معاها براحتي، ومش كل مشكله بينا هتجري تعرفها للكل، انا مبحبش كده

هدي: يابني جيجي بتحبك، وانت بتعاملها معامله وحشه قوي بصراحه ياقاسم

قاسم: ماما هي دي معاملتي، وبصراحه مبعرفش يعني ايه حب، ويعني ايه اقول كلام حلو، انا كده، وفهميها ده، عجبها على كده ماشي، مش عاجبها احنا لسه على البر، لكن انا مش هتغير عشان حد ماشي يا أمي

هدي: ماشي يا حبيبي، بس ده ميمنعش انك تكلمها تراضيها، عشان خاطري يا قاسم، لو بتحب امك حبيبتك

قاسم بنفاذ صبر: حاضر يا ماما، بس مش انهارده ممكن؟

هدى :ماشي يا قاسم، مش انهارده، طول عمرك دماغك ناشفه

قاسم: لا يا ماما انا بس مبحبش اعمل حاجه وانا مجبر عليها،

هدي: ربنا يهديك يابني يارب، المهم متتأخرش لأنهم اكيد هيجو انهارده

بالليل

قاسم: وانا مالي يا ماما ما يجيو، انا دخلي ايه

هدى بنرفزه: انت هتستهبل ياقاسم، لا كده كتير يا حبيبي، لازم على الاقل تقعد معانا، وتبقى موجود، لو مش علشان جيجي يبقى عشا…..

قاسم قاطعها: خلااااص يا ماما، حاضر هحاول، يلا سلام بقه لاني وصلت

وقفل معاها قبل متقفل..

————– بقلم شيمو الخطيب رواية غمرتني عشق الحلقة الثانية

عشق خرجت من بيتها، وكان طارق واقف في مكان بعيد وبيراقبها، وفعلا مشي وراها من غير متحس

وصلت عشق لفيلا خالد بيه ونادت عليه، والبواب فتح وهي دخلت

عشق: ياخالد بيه، يا خالد بيه

خالد نازل من فوق : اخيرا وصلتي، ده انا قلت انك صرفتي نظر عن الفلوس ولا حاجه

عشق بتحدي: وانا هصرف نظر ليه يا خالد بيه، ده حقي وانا مبتنازلش عن حقي بسهوله

خالد: ههههه، لا جامده يابت، تعجبيني،،

ياسعاد،،، هاتي عصير لست عشق

عشق: انا مش جايه اشرب يا خالد بيه، انا عايزه فلوسي وهمشي على طول

خالد: ماشي ياستي، تعالي المكتب معايا وانا هديكي الفلوس

عشق: ههه،،، والله انا بستغرب يا خالد بيه، يعني هي الفلوس مينفعش اخدها هنا،

خالد: خليكي معايا للآخر وصدقيني هتتبسطي قوي

عشق بتحدي : ماشي وانا معاك للآخر يا خالد بيه، بس صدقني هتندم على اللي بتعمله ده

خالد: ههههههه، ومين بقه اللي هيندمني؟ ، انتي ياعشق؟ ، ههههههه، لا بجد ضحكتيني جدا

عشق: يوضع سره في أضعف خلقه يا خالد بيه، وانا اللي يجي عليا باكله باسناني، عموما بلاش نضيع وقت ويلا هات الفلوس

خالد: ايوووووه، بلاش نضيع وقت، تعالي يا عشق

ودخلت عشق المكتب وخالد قفل الباب

عشق بتدعي وتقول اذكار في سرها، اه هي خايفه لكن واثقه في ربنا اكتر، وثقتها دي مقوياها

خالد قرب من عشق، وحط ايده على وشها، ها يا عشق، مقلتليش عايزه كام

عشق نزلت ايده بعنف: اظن الكلام يبقى من بعيد افضل، وبعدين انا عايزه حقي وبس، لا اكتر ولا أقل

خالد: قرب تاني، بس انا عايز ازودك، لأنك هتسمعي الكلام وتعملي اللي انا عايزه، وفجأه قطع كم فستانها واتهجم عليها

عشق بتحاول تبعده عنها، لكن هو حكم مسكته ليها وكتفها، وبعدها عشق ضربته بركبتها وهو بعد فعلا عنها، وخرجت عشق سكينه صغيره كانت جايباها معاها من البيت وضربته، وهو صرخ من كميه الدم

وعشق وقفت في جنب خايفه لانه وقع ومبيتحركش

دمتم سالمين

بقلم شيمو الخطيب

رواية غمرتني عشق الحلقة الثانية