الحلقه ال 24 والاخيره
ادهم ضامم ليلي وحس بقلبها بيقف بين ايديه واستكانت خالص..متخيلش
ابدا ابدا انها هتموت بين ايديه….
وفجأه سمع صوت سيف بينادي عليه وانتعش امل جديد
ادهم: ايوه يا سيف انا هنا
سيف كان بيكسر في الحيطه من بره راكب جرار وبيكسر في الحيطه
سيف: ادهم ابعد عن الحيطه هوقعها
ادهم شال ليلي وبعد علي قد ما يقدر وفعلا سيف هد الحيطه ودخله
اخد ليلي وجري بيها بسرعه علي بره وهو مش عارف يعمل ايه
الكل اتلم عليهم وابوها وامها وكل عيلتها وهيا راقده مش بتتحرك
ادهم: سيف فين الاسعاف؟؟
سيف: قدامهم خمس دقايق او اقل
ادهم: قلبها وقف تقريبا من ثلاث دقايق كمان خمسه هيبقي صعب
ادهم بدأ ينهار وهيعيط
سيف: اياك تنهار دلوقتي …خمس دقايق فعلا كتير ..انت اتصرف انت
اكتر واحد فينا بتتصرف في الظروف دي..انسي ان دي ليلي..دي زميل
متصاب واحنا في مهمه وانعشها…ادهم فوق انعشها بسرعه والا
هتخسرها والمره دي نهائي مفيهاش رجعه
ادهم بصله للحظه وفهلا بدأ ينعش فيها ويحاول يعملها تنفس صناعي بس
مش بتستجيب
سيف: مالها مش بتستجيب ليه؟؟ادهم فكر
ادهم:مش عارف؟؟؟الدخان..انا غبي ..الدخان قفل مجري الهوا ..لازم
الهوا يوصلها الاول
سيف: عايز ايه قول
ادهم بيفكر ومرتبك جدا
عايز سكينه وقلم
سيف طلع مطواه من جيبه وبص للي حواليه وقال عايز قلم..جدها جابله
قلم ….ادهم مسك المطواه وحطها علي رقبه ليلي..جدها مسك ايده
الجد: انا معرفكش ..بس حاسس انها تهمك …ارجوك دي حفيدتي وانا مش
مستعد اخسرها
ادهم: ولا انا كمان مستعد اخسرها
ساب ايده ووقف
ادهم عمل فتحه صغيره في رقبه ليلي وحط فيها انبوبه القلم واول ما حطه
ليلي اخدت نفس طويل ..وقامت كأنها بتغرق..ادهم ثبتها
ادهم: اهدي اهدي…انا جنبك اهوه اهدي حبيبتي اهدي
ضمها لصدره وهيا هديت واخيرا الاسعاف وصلت وشالوها كان عماد
موجود مع بتوع الاسعاف ولسه هيركب معاها فأدهم مسك ايده
عماد: ما تقولش حاجه …عارف انها مهمه ليك ..عارف انها روحك
وحياتك ما تخافش عليها
ادهم:انا كنت عايز اقولك اسف بس
عماد: لا ما تتأسفش يا سياده المقدم ..دي حبيبتك من زمان لو حد
المفروض يتأسف يبقي انا…علي العموم مش وقته ..حصلني علي
المستشفي
اخدتها الاسعاف ومشيت وهنا ادهم قعد علي الارض
سيف: انت هتقعد قوم نروحلها المستشفي انت عايزها تفوق متلاقكش
جنبها
ادهم: لحظه ….اديني لحظه….ليلي من شويه نفسها وقف وقلبها كمان
وقف بين ايديا وانا استسلمت جوه..استسلمت للموت..اعتقد من حقي
لحظه ارتاح فيها..بس لحظه…عشر سنين بعيد عنها ويوم ما اجيلها وتكون
كل حاجه متاحه قدامنا قلبها يقف بين ايديا عارف يعني ايه قلبها يقف بين
ايديا وانا استسلم كده..مش يمكن مش نصيبنا نكون مع بعض اصلا وربنا
بيعمل كده علشان نفهم ان اننا مش لبعض
سيف: ليلي عايشه واللي انت بتفكر فيه ده مش وقته….ليلي في المستشفي
وهتبقي كويسه وده الوقت اللي ترتبطوا فيه ببعض كفايه بقي يا ادهم
جدها: قوم يا ابني وعلي رأي صاحبك كفايه بقي ..عايزين نفرح ولو انت
فضلت بعيد مش هنفرح..فكفايه كده
مسك ايده وقومه وراحوا للمستشفي كانت حالتها كويسه ..هيا اتخنقت بس
من الدخان غير كده كويسه…عيله ادهم اتعرفوا كلهم عليه وحبوه جدا
حبوه اكتر لما رمي نفسه في النار علشانها
ادهم: روح قلبي فاقت
ليلي: اه…قرب مني
ادهم قرب منها ومسك ايدها
ادهم: ابوكي بره
ليلي: ماليش دعوه بابويا…بحبك
ادهم: وانا كمان ..مش هنخرج بقي من هنا انا زهقت
ليلي: زهقت مني؟؟؟؟
ادهم: عايز اتجوز يا ناس حرام بقي
ليلي ضحكت
ليلي: انت السبب في حد عاقل يخرم رقبه حبيبته ؟؟عمرك شفت عروسه
برقبه مخرومه؟؟
ادهم: لازم تكوني مميزه يا حبيبتي….وبعدين كنتي عايزاني اعمل
ايه؟؟اسيبك تروحي مني؟؟
ليلي: يعني مكنش قدامك طريقه تانيه؟؟
ادهم: قوليلي انتي يا دكتوره كان المفروض اعمل ايه؟؟
ليلي: مش عارفه لو احنا بيكون معانا انبوبه بندخلها لحد الرئه بس ساعات
فعلا بنحتاج نعمل مجري للهوا كده….انت اتعلمت ده فين؟
ادهم: الجيش بيقولك اتصرف..سيبك المهم هنتجوز امتي؟؟
ليلي: انت عايز امتي؟؟
ادهم: انا عايز امبارح
اخيرا اتحدد معاد الفرح واتعمل احلي فرح لاحلي عروسين
ليلي كانت ملكه جمال وادهم كان بدر منور جنبها كانوا لايقين علي بعض
جدا وشكلهم حلو جدا…وفوفا اخيرا فرحت بابنها وعملته فعلا فرح يحكي
عنه ..ادهم غني من قلبه وليلي كمان غنتله وكانت فعلا ليله العمر
كل اصحاب ادهم حضروا الفرح وسيف رقص كتير في الفرح ده كان
فرحان جدا بأدهم وبارتباطه بليلي
ادهم اخد عروسته وراحوا بيتهم واول ما دخل اوضه نومه وقف وسرح
ليلي: لا ممنوع السرحان نهائي ..سرحان في ايه؟؟انا وجنبك اهوه
ادهم: لا افتكرت حاجه بس
ليلي: افتكرت ايه؟
ادهم: افتكرت احمد يوم فرحه طلب مني احطله ورد علي السرير وفي
اليوم ده كنت سيبتك لما قلتيلي علي عمر..لما دخلت اوضته كانت حلوه
قوي وقلت ساعتها ان عمر ما هيكون عندي اوضه زيها ادخلها مع
عروستي
ليلي: واديني اهوه جنبك…اوضتهم احلي ولا احنا؟؟
ادهم: احنا طبعا وبعدين انا فارشلك الارض كلها ورد هما رسمتلهم قلب
بس علي السرير
ليلي: وعروسته احلي ولا انا
ادهم: انتي احلي واجمل وارق عروسه في الدنيا وانا بموت فيكي وكفايه
تضيع وقت
شالها وقفلوا الباب وفعلا كانت ليله العمر ..ليله اتجمع فيها روحين مع
بعض اندمجوا بروح واحده وعاشوا الحب الحقيقي الليله دي..وادهم حقق
وعده بانه هينام معاها بس قدام الكل وفي النور لان بيكون طعمها احلي
بكتير…طلعت شمس الحب عليهم والباب خبط
ليلي نايمه في حضن ادهم ومش عايزه شيئ يبعدها ابدا عن
حضنه…وادهم لاول مره من عشر سنين ينام كده..صحيوا علي صوت
الباب بيخبط جامد
ليلي: ده مين الرخم ده
ادهم: اعتبري نفسك مش سامعه حاجه اصلا وهو هيمشي
ليلي: تفتكر
ادهم : افتكر
ليلي: بجد مش عارفه اتجاهله..ده مصر
ادهم: ما انا مش هقوم من مكاني ابدا..وانتي مش هتقومي من حضني ..
فلي علي الباب لازم يمشي
ادهم: يوه يا ليلي بتبعدي ليه؟
ليلي: مش عارفه والباب بيخبط كده..افتح ومشي اللي علي الباب وتعالي
بسرعه
ادهم: انتي شايفه كده
ليلي: علشان خاطري
قام ادهم وطلع بره يفتح الباب واتصدم لما شاف
احمد
ادهم: افندم في حاجه؟
احمد بيعيط: ارجوك يا ادهم انا محتاج مساعدتك
ادهم: جايلي يوم صباحيتي تقولي محتاج مساعدتي…انت ايه يا اخي؟؟
ولسه هيقفل الباب فاحمد منعه
احمد: ارجوك الموضوع مايخصنيش الموضوع يخص كريم ابني ارجوك
يا ادهم
ادهم: ماله كريم؟؟
احمد: اتخطف..في عصابه كنت بطاردهم وخطفوه وحاليا طالبينك انت
تروحلهم وتتكلم معاهم..هما عايزينك انت وهيرجعولي كريم
ادهم واقف بيسمعه وهو في قمه استغرابه
ادهم: انت عايزني يوم صباحيتي علي عروستي اللي اتحرمت منها عشر
سنين بسببك اسيبها واروح اسلم نفسي لعصابه علشان خاطر يرجعولك
ابنك؟؟؟؟انت ايه؟؟؟انت ازاي واقف قدامي كده وليك عين تتطلب؟؟
ليلي كانت واقفه بتسمع فطلعت
ليلي: انت بجد انسان لا يطاق ..انت عايزه يسيني ويروح يجيبلك
ابنك؟؟لا ده انت بتحلم…ده احلي عقاب من ربنا ليك انك تخسر ابنك
ومراتك وحياتك كلها..عارف ومش كفايه..ياريت يحصلك اكتر من كده
كمان..جرب انك تتحرم من حد بتحبه قوي …جرب يعني ايه تخسر حد
روحك فيه…جرب واشرب من نفس الكاس اللي سقيتهالنا اطلع بره
ادهم قفل الباب في وشه وهو هينفجر من الغيظ
فضل هو ليلي ساكتين مش عارفين يعملوا ايه
ليلي: ده بني ادم غريب..ازاي يجي هنا اصلا
ادهم:………………
ليلي: ادهم هتعمل ايه؟؟
ادهم: انتي عايزاني اعمل ايه؟؟
ليلي: مش هنعمل حاجه تعال وهعملك احلي فطار لاحلي عريس في الدنيا
شدته ودخلوا يفطروا بس طول الوقت وهما الاتنين مسهمين
احمد روح بيته وهناك كانت عبير
عبير: طبعا مش هسألك عملت ايه لاني عارفه..عارفه انه لازم تدفع ثمن
الخيانه
احمد: انتي كلميه هيسمعلك ومش هيرفضك ابدا
عبير: لا يا احمد مش هكلمه…ده ثمن خيانتك ادفعه..وانا ربنا هيعوضني
..اكيد هيعوضني
فضلت تعيط وتعيط احمد قرب منها صرخت
عبير: اوعي تلمسني او تيجي جنبي..اوعي…انا لازم اقوم..انا معنديش
هدوم سودا لازم اشتري هدوم سودا..ابني هيموت وانا لازم البس
اسود..لازم اشتري هدوم سودا
احمد بيعيط ومش عارف يعمل ايه…لو ده الثمن فده ثمن صعب قوي
ليلي واحمد قاعدين وساكتين
ليلي: ادهم سرحان تاني
ادهم: لا يا حبيبتي ما تشغليش بالك
ليلي: انت بتفكر فيه
ادهم: مش فيه في كريم..ده في عمر زياد ..كنت بلعب معاه هو كمان ولد
لذيذ جدا ..دمه خفيف ومرح ومش بيخاف
ليلي: روح هاته يا ادهم
ادهم بصلها
ليلي: عمرك ما هتسامح نفسك ابدا لو الولد جراله حاجه ابدا وبعدين مش
عايزه ابدأحياتي علي موت حد او اشمت في حد..بس توعدني انك تخلي
بالك من نفسك وترجعلي مفهوم
ادهم ابتسم: مفهوم يا اجمل ليلي في الدنيا
ليلي: ده انت ما صدقت بقي
ادهم: هو النهارده وبس وبعدها هاخدك ونسافر بعيد عن الناس كلها
ونقضي احلي شهر عسل في الدنيا اتفقنا
ليلي: اتفقنا
اخدها ادهم وداها الفيلا عند اهله الاول وراح هو شغله والكل استغرب
من وجوده وخصوصا سيف
سيف: ايه ده؟؟
ادهم: اخرس…عايز اوراق القضيه اللي ماسكها احمد وبسرعه جمع
الفريق بتاعي كله اتحرك
سيف: انت سيبت عروستك علشان احمد؟؟انت اتهبلت؟؟
ادهم: شكلي كده اتهبلت والله اعلم..المهم نفذ
جاله مدير المخابرات والفريق كامله وكلهم واقفين قصاده
المدير: ادهم ده موقف نبيل منك انك تساعده في الظروف دي
ادهم: انا وعدت عبير اني هكون اخ ليها ديما وانا بعمل كده علشان ابن
اختي مش علشانه هو وبعدين الموضوع ده هيفضل سر بينا ومحدش
هيعرف ابدا ان انا اتدخلت او اي شيئ لحد ما انا اقول كفايه
المدير: يعني ايه؟؟
ادهم: يعني بأذن الله هرجع كريم بس ابوه مش هيعرف انه رجع وهخليه
يفضل يتعذب شويه…حد معترض؟؟
المدير: بس ده ابوه
ادهم: عايزه يدوق طعم الحرمان شويه وماتخافش مش هسيبه عشر سنين
زي ما هو عمل هما كام يوم يادوب
المدير: خلاص براحتك
ادهم درس الموضوع كله وبعدها كلم العصابه واتفق يقابلهم وفي نفس
الوقت ظبط مع فريق كله
كانوا بيلبسوا ويجهزوا
سيف: ايه الاخبار؟
ادهم: اخبار ايه؟
سيف: ليه امبارح
ادهم ضحك وبصله
ادهم: وانت ايه يخصك في ليله امبارح
سيف: صاحبي ولازم اتطمن عليه
ادهم: فيك الخير ما تشغلش بالك انت
سيف: يعني عملت ايه احكيلي ؟؟
ادهم: انت اتجننت ؟؟؟احكيلك ايه؟؟؟انتي عايزني احكيلك عملت ايه مع مراتي ؟؟؟انت اتهبلت ولا ايه؟؟
سيف: بطل رخامه بقي
ادهم: انا؟؟؟مش هحكيلك حاجه عن مراتي ريح دماغك
ادهم لبس ولبس واقي للرصاص فوق هدومه
سيف: ومن امتي ادهم العظيم بيلبس واقي
ادهم: من ساعه ما اتجوز وعايز يرجع لمراته يكمل اللي وقفه احمدالصبح
سيف: وهو احمد وقف ايه؟
ادهم: موت بغيظك كده
سابه ومشي وراحو يجيبوه كريم وتمت العمليه بنجاح واخيرا ادهم رجع
الولد واخدوه البيت عند ابوه وراح لعبير لقاها خارجه من بيتها نادي عليها
ادهم: عبير عبير استني
عبير: ادهم لازم امشي
ادهم: رايحه فين؟
عبير: لازم اشتري هدوم سودا ..تخيل معنديش هدوم سودا ابدا
ادهم: فوقي كده..انت عامله كده ليه..تعالي معايا
عبير: بقلولك لازم اشتري هدوم سودا
ادهم: تعالي بس
اخدها وراح البيت ودخلها وهيا منهاره من العياط ونادي علي كريم
كريم: مامي مامي
عبير وقعت في الارض وضمت ابنها وهيا بتعيط عياط خلي كل اللي
واقفين يعيطوا
ليلي لادهم: انا بحبك قوي انك رجعته لامه
ادهم: وانا متشكر انك وافقتي اروح ارجعه
ليلي: عايزه من ده
ادهم: من ده ايه عايزه تعيطي؟
ليلي: لا اعيط ايه عايزه نونو كده
ادهم: متستعجليش بكره يجي
عبير وقفت
عبير: ادهم انا مش عارفه اقولك ايه بس جميلك ده مش هنساه ابدا
ادهم: انتي اختي ومفيش جمايل بين الاخوات بس انا ليا طلب
عبير: قول اي حاجه لو عايزني اسيب احمد هسيبه
ادهم: لا علاقتك باحمد خاصه بيكي انتي..انا بس مش عايز احمد يعرف
حاليا ان كريم رجع
عبير: يعني ايه انا مش هاخده معاياي
ادهم: انتي افضلي هنا معاه لكن احمد يعرف بيه لأ
عبير: لو قلتلك لأ ده ابوه ومن حقه يعرف
ادهم: هقولك خدي ابنك واتفضلي بس تنسي ان ليكي اخ هنا…انا عملت ده علشانك وعلشان كريم مش علشان احمد..احمد لازم يجرب الحرمان من حد بيحبه لازم يدوق طعم النار اللي بتولع في القلب من الحرمان..لكن لو انتي مصره يبقي براحتك مش همنعك
عبير: انت طول عمرك جنبي وعمرك ما اتأخرت عني..انا هسمع كلامك بس ارجوك مش تقسي عليه كتير ارجوك يا ادهم
ادهم: انتي بتحبيه يا عبير صح؟؟
عبير: ايوه بحبه وهو ندمان..طول الوقت كان ندمان مكانش بينام الليل وكنت بسأله مالك كان ديما بيهرب بس هو اخد حصته من تأنيب الضمير فارجوك سامحه
ادهم: ممكن مع الوقت بس مش دلوقتي
عبير: انا متشكره ليك يا ادهم وانتي يا ليلي انا اسفه علي فراقكم ده كله واسفه ان جوزك سابك يوم صباحيتك بسببنا
ليلي: المهم ان كريم رجع والحمد لله رجعنا انا وادهم لبعض…
ادهم الفجر اخد ليلي وطلعوا علي المطار علشان يبدؤا احلي شهر عسل
في الدنيا وسيف طبعا اللي وداهم المطار..ليلي سابتهم وراحت الحمام
سيف: بقولك يا ادهم..هيا ليلي احلوت من امبارح للنهارده ولا انا متهيألي
ادهم: هيا علي طول حلوه بس هيا احلوت لما بتفرح بتحلو
سيف: هيا عنيها لونها ايه بالظبط الاول كان بيتهيألي انها خضره دلوقتي تقريبا كده رمادي
ادهم ضحك بصوته كله
ادهم: انت عارف انا فضلت قد ايه لحد ما عرفت الوان عنيها؟؟؟عنيها بتقلب علي حسب حالتها المزاجيه
سيف: وانت اكتر لون بتحبه ايه؟؟
ادهم: الرمادي الفاتح جدا لون في منتهي الصفاء بس ده مش بيظهر كتير
سيف: اكيد هيظهر وهيا في حضنك بس
ادهم ضربه وليلي جت عليهم
ليلي: مالكم ؟
ادهم: لا مفيش ..ما تمشي انت بقي ما تروح تنام
سيف: اخرت خدمه الغز علقه…دلوقتي روح طيب انتو بره في المطار ما انتوش في اوضه يعني انا مش طابق علي انفاس حد
ليلي اتكسفت وبصت للارض
ادهم: انا بس عايزك تروح ترتاح..غلطان انا؟؟
سيف: اروح ارتاح قلتلي..ماشي سلام
سلم عليهم ومشي
وبعد مامشي ادهم مع ليلي واخدين جنب وراح باسها بوسه طويله
ليلي: انت عملت كده ليه؟؟
ادهم: كنت عايز اعمل كده فعملت
ليلي: والناس
ادهم: محدش له عندنا حاجه وبعدين مراتي وابوسها وقت ما يعجبني
باسها تاني
سيف: هو بقي ده اللون تصدق حلو
الاتنين بصو لسيف اللي كان وراهم وصورهم صوره مع بعض وهما بيبصوله
ادهم: انت واقف من امتي
سيف: كنت عارف انك لازم هتبوسها واللون هيظهر فقلت استني
ادهم: قلت تستني طيب تعال هنا بقي انت اللي جيبته
لنفسك
طلعو يجروا وري بعض زي المجانين وليلي بتضحك عليهم
بعدين وقفوا وسلموا علي بعض جامد
سيف: مبروك يا صاحبي
ادهم: عقبالك …علي فكره الموضوع يستاهل اتكل علي الله وجرب
سيف ابتسم: انت شايف كده يعني يستاهل اني اضحي بحريتي
ادهم: يستاهل انك تبدأ حياتك ..يستاهل يا سيف
سيف ضمه جامد وقبل ما يمشي
ادهم: سيف استني
سيف: خير ايه؟؟
ادهم: روح رجع كريم لابوه وقول لاحمد ما هنتش عليه
ليلي ابتسمت وسيف كمان
سيف: ياريت الناس كلها تبقي زيك
ادهم: مش هستفاد حاجه ..وبعدين انا مبسوط وعايز الناس كلها مبسوطه حتي احمد كمان..وقول لعبير تسامحه وترجعله كفايه كده عليه
سيف: حاضر هعمل خاطبه تاني وارجعهم لبعض
ادهم: وانت كنت خاطبه اولاني؟؟؟
سيف: ليلي تبقي تحكيلك يالا سلام بقي
اخد صاحبه في حضنه جامد
ادهم: انا متشكر قوي يا سيف علي كل حاجه عملتها معايا
سيف: وانا متشكر لمجرد انك انت صاحبي
ابتسموا لبعض واخد عروسته ومشي
واخيرا ركبوا الطياره وبدأت رحله العمر
اتمني تكونو اتبسطوا في روايتنا البسيطه واشوفكم في روايات اخري ان شاء الله
كل واحد يقول رايه في القصه ايه حلوه
ولا وحشه؟؟؟؟؟
كل واحد يقول رايه في كل شخصيه من شخصيات القصه
مين اكتر حد حبيتوه مين اخف دم مين كرهتوه وهكذا مستنيه تعليقاتكم
