شقه سيدي بشر

كنت متجمّع مع عيلتي في البلكونة وقعدين قعدة لطيفة، بنضحك ونهزر بعد يوم سفر صعب وبعديه تنضيف للشقة اللي خدناها في سيدي بشر، ففي نص القعدة، كبس عليا النوم، وقتها كنت صغير عندي عشر سنين، فعشان والدتي ماتقلقش لو بصت عليا ومالقتنيش، روحت وقولتلها اني هخش انام، ساعتها ماركزتش معايا وشاورتلي بايديها واللي فيما معناة اني اخش، وسبب انها مش مركزة معايا، هو انها كانت مُندمِجَة مع مراة عمي لانهم بيتكلموا في كلام مهم بالنسبالهم، كل ده عادي لحد اللحظة دي، بس اللي مش عادي، واللي خلاني أجي النهاردة بعد 18 سنة أحكيلكوا القصة، هو الباب القديم اللي كان موجود في مطبخ الشقة، واللي من عنده ابتدت حكايتي اللي ماقدرتش أنساها لحد اللحظة دي.

**

بعد ما طلعت من البلكونة ودخلت الطُرقة، عيني بشكل لا ارادي لمحت الباب القديم اللي جوة المطبخ، بس مش عشان وجوده الغريب في المكان، ولا حتى حجمُّه الصغير وشكله الغريب بالزخارف اللي عليه، ده لأن الباب كان طالع من وراه دخانة شديدة لونها أحمر، بمجرد ما شميت ريحتها، حسيت بدوخة خفيفة خليتني أسند على الحيطة، بعدها شوفت ضل لراجل كبير لابس نضارة مدوّرة، ضل الراجل ده كان باصصلي ومركز معايا، مبتسم، وكأني واقف قصاد كيان مظلم، مش مجرد ضِل لشخص أنا ماعرفش دخل الشقة ازاي؟

بعد ثواني جريت، بس وأنا بجري، لمحت بطرف عيني المطبخ.. المطبخ اللي كان فاضي، ومافيهوش حاجة، لكني ماركزتش، ومافرقش معايا، أنا دخلت البلكونة وقعدت جنب عمي، سألني أنا بنهج ليه ماردتش عليه وخوفت.. خوفت لحسان يتّريق عليا هو والباقين، عشان كده ماتكلمتش، وكل اللي عملته ان اتكورت في زاوية من زوايا البلكونة الواسعة ونمت نوم عميق، صحيت منه على صوت طفل بيقولي:

-تلعب معايا؟

فتحت عيني وبصيت حواليا لقيتني نايم على السرير، فوّقت شوية وركزت لقيت ابن خالتي هو اللي كان بيكلمني، كان بيقولي اصحى والعب معايا، وقتها كنت مخضوض، فخدت نفَسي وقولتله بصوت نعسان:

-ايه يا زين، خضتني يا أخي، وأنا.. أنا ايه اللي جابني هنا، وازاي؟

-عمك شالك وجابك، وأنت كنت في سابع نومه.

ودي كان آخر مرة في السفرية اللي أنام فيها بالراحة دي.

**

تجربتي ابتدت من حوالي 18 سنة، وقتها كان عندي عشر سنين، يعني عيّل صغير في رابعة ابتدائي، وزي أي طفل من سنيّ، كنت بخاف من الضلمة، من صوت الهوا، وزيادة عليهم، من الكلاب، وكلها حاجات طبيعية من القصص والحواديت اللي كنت بسمعها من عمي، وابويا، وآخرهم أمي، ومن القصص المميزة اللي كانت بتتحكيلي وكتير منكوا يعرف عنها، هي قصة أبو رجل مسلوخة، طبعًا مش قادر أوصفلكوا حالة الرعب اللي كنت بحس بيها لما بس أفتكره او أحس إنه معايا وموجود حواليا، بس بعد اللي حصل، اكتشفت ان فيه حاجات اكبر من ابو رجل مسلوخة، والسبب في ده، هي شركة أبويا اللي شغال فيها سواق، الشركة دي بتطلع مصيف سنوي في اسكندرية ولمدة عشر أيام، هم بيحجزولك الشقة، وأنت تتعامل بعدها، يعني أكلك، شربك، تظبيط خروجاتك، كل حاجة، بس كل دي شكليات، لإن الأهم هي الشقة ومكانها وحظنا السنادي وقع مع شقة كبيرة في سيدي بشر، الشقة كانت 3 أوض وصالة ببلكونة قد شقة، ومش ببالغ لما بقول كدة لأن الشقة كانت فعلًا كبيرة بشكل أبويا ماتخيلهوش، فبدل ما كنت هقعد أنا وابن خالتي وأخويا الكبير وأختي وأمي في الشقة، أبويا كلّم عمي وقاله تعالى بمراتك وعيالك الاتنين، واللي كانوا ولد وبنت، سيف وياسمين.. طبعًا هتسألوا فين ابويا من ده كله، هقولكوا إن أبويا من كتر ما كان بيحب الشغل، ماكنش بيشوف غيره في حياتي، يعني انا فاكر ان فيه شهور كانت بتعدي وهو مابياخدش راحة، وراحته وقت ما ياخدها كان بيبقى عيان عيا وحش، مابيقدرش عليه، فكل اللي كان ابويا بيعمله في السفر، هو انه بيوصلنا ويرجع القاهرة، لحد آخر يومين، اليومين دول كان بيجيلنا فيهم عشان يقضيهم معانا بعدها يرجّعنا بالعربية، وبس كده، ده الملخص الممل في الحدوتة، لكنه مهم بعدين، امّا دلوقتي، خلينا نروح للحظة اللي وصلنا فيه قدام البيت، من أول نظرة، ومن حجم البيت، حسينا اننا قدام فيلا كبيرة، كمان عشان البيت كان من 3 أدوار، واحنا كنا سعيدين الحظ اللي خدنا الدور الأول واللي كان فيه شقة واحدة زي الدورين التانين، فمن المنظر، اتفتحت نفسنا وطلعنا واحنا مبسوطين، دخلنا الشقة ولقيناها متربه من كل حتة، وعلى الحيطان كانت محطوطة صور كلها متغطية بورق جرايد أصفر قديم.. قديم لدرجة إن أبويا لما بص على التاريخ اللي على الورق، لقى إن الجريدة مطبوعة من حوالي اربعين سنة، مدة كبيرة، لكنها مش غريبة على ديكور الشقة اللي كان غريب شويتين، والأغرب، إنه اصلًا مش مصري، وفهمنا ليه هو مش مصري، بس بعدين.

لما ابويا لقى الشقة واسعة اتصل بعمي، مافيش خمس ساعات وجم، وقتها كنا بنّضف في الشقة ومابقاش فاضل كتير، ومع ذلك، كملوا تنضيف معانا وبهدومهم، وبعد ما خلصنا من الليلة دي، عمي نده أبويا عشان يسأله على الباب اللي في المطبخ، الباب اللي لغاية اللحظة اللي هو اتكلم فيها عمي ماكناش فاهمين لازمته، خاصة انه لا بيتفتح، ولا له لازمة، الباب قصير ومايدخلش حد، كمان مرسوم عليه زغارف غريبة تحسها مش مصرية زي ديكور الشقة بالظبط، والاغرب، انه الوحيد في الشقة كلها اللي كان نضيف، ودي نقطة غريبة برضه، ازاي شقة في موسم الناس بتأجر فيه شقق، تبقى متربة بالشكل ده؟!.. سؤال ماعرفناش اجابته، لكننا فهمناها هي كمان بعدين.

**

دي كانت البداية، والتكملة، كانت لما صحيت من النوم على صوت مازن ابن خالتي، وزي ما انتوا عارفين وأنا قولتلكوا، هو كان عايز يلعب معايا، بس لما ركزت في وشه، لقيت عليه علامات حروق ماشوفتهاش قبل كده، فمن الخضة، سألته لو كان جراله حاجة وأنا نايم، وقتها كرر نفس الجملة تاني، بس المرادي وهو مبتسم ابتسامة مستحيل أنساه، بعدها نني عينه اختفى، ومع اختفائه، حسيت اني بتخنق، فمسكت رقبتي، حاولت انطق، اطلب المساعدة، لكني اغمى عليا، ولما فوقت المرادي، كان الكل نايم وابن خالتي هو واخويا الكبير كانوا نايمين جنبي، صحيت ابن خالتي وسألته ايه اللي جابني هنا قام رد عليا نفس الرد اللي كان في الحلم، نمت، وخدوني هنا واتا نايم، ماكدبتش خبر وقتولت بس، أنا مش هخرج من الأوضة ولا هتحرك في الشقة، غير ورجلي على رجل واحد تاني، وفعلًا، ماخرجتش من الاوضة غير لما صحيوا وطلبوا مننا نجهز نفسنا عشان نروح البحر، طبعًا الكل كان مبسوط وفرحان، بيتخانقوا على الحمام عشان يغيروا. إلا أنا، كنت بلبس بقلق، حاسس ان فيه حد مراقبني وشايفني، حاسس بصوت انفاس طفل جنبي بس أنا مش شايفه، كلها أوهام، أو أنا اللي اعتبرتها كده عشان أهدي نفسي.

بعد ما جهِزنا ونزلنا، لقينا عيلة كاملة محضرين شُنطتهم قدام البيت ومستنين عربية تيجي تاخدهم، ساعتها عمي استغرب، العيلة دي كانت ازاي موجودة واحنا ماحسناش بيها، يعني لا شوفنا حد طِلع، ولا نزل، ولا حتى سمعنا صوت رجلين على السلم، شيء غريب، لكنه مش مهم بالنسبة للي احنا رايحنله، بس مع ذلك، واحنا واقفين مستنين عربية تانية غير عربية عمي عشان تاخدنا للشط، كبير العيلة اللي كانت موجودة جه لعمي ووقف معاه، كان باين عليه انه خايف ومتوتر، عايز يقول حاجة بس مش عارف يجيبها ازاي، وبعد تفكير كتير منه ترقب من عمي له، الراجل اتكلم، ولحسن حظي أنا كنت قريب منهم، وقتها سمعت الراجل وهو بيسأل عمي وبيقوله:

-أنتوا كويسين؟.. مافيكوش أي حاجة؟.. ماسمعتوش ولا شوفتوا أي حاجة؟

عمي ضحك وقاله:

-طب قول سلام عليكم حتى يا راجل يا طيب.

-انا أسف، بس اللي جاي فيه مش محتاج مقدمات.

-والسلام مش مقدمة لحاجة، السلام بتاع ربنا.

الراجل بدأ يتعصب، لدرجة إنه ماستحملش نفسه وقاله:

-أنت هتسمعني ولا أسيبك تجرب؟

عمي حس إنه عايز يقول حاجة مهمة، عشان كده اتمالك نفسه وماتعصبش عليه، وبكل هدوء رد وقاله:

-أسمعك.

-البيت ده فيه حاجة مش مظبوطة، سعر ايجاره، ومساحته، تقول إن فيه حاجة.

عمي ضحك ضحكة مكتومة تعبير عن سخريته بعد رد عليه:

-ايوة يعني انت عايز تقول ايه برضه مش فاهم.

الراجل بص ورا عمي بعدها قال:

-بص وراك وانت تفهم.

عمي بص وراه لقى راجل مجذوب من مجاذيب الشارع، شعره طويل، ودقنه أطول، ده غير جسمه اللي كان متغطي بطبقه أو طبقتين من الوساخة:

-شحات.. انا شايف شحات.

رد عليه كبير العيلة وقاله:

-الراجل ده عارف حاجة احنا مش عارفينها، احنا تاني يوم لينا هنا، قالنا إننا مش هنطول وهنرجع بسرعة، وفي نفس اليوم بليل، سمعنا طفل صغير بيصرخ، مشيت ورا الصوت لقيته جاي من الحمام، روحت أشوف فيه ايه لقيت الصوت اختفى، بعدها بثواني حسيت بـ ايد لمست رقبتي…

تتبع