الماضي كابوس ممكن يعيش في الانسان اصعب ايام حياته الاوجاع اللي الانسان بيعيشها ممكن تحوله لمريض نفسي او مجنون وممكن كمان تحوله لقاتل
…
ايوه انا قتلت مراتي وعيالي، الهانم كانت بتخوني ومش مع اي حد لا مع اخويا.. اه انا اللي قتلته هو كمان وانا مش ندمان هما يستاهلوا اللي عملته فيهم وانا ماستاهلش اكون موجود هنا
انا مش عارف انتوا بتحاسبوني على ايه؟
على اني دافعت عن شرفي وبتتهموني بالجنون والله ما في حد مجنون غيركم
بعد ما قابيل خلص كلامه بصتله وقلتله
قابيل انا عارف انك عشت صدمه كبيره، ويمكن وجودك هنا من زمان هو اصعب حاجه حصلتلك بس انا عايز اقولك حاجه
انت مقتلتش حد لانك باختصار لا انت متجوز ولا عندك عيال ولا حتى عندك اخوات
…
#قابيل
#الجزءالأول
كنت قاعد قدام شاشه في اوضه اجتماعات بتجمع اكبر دكاتره في مصر، والنهارده اول يوم ليا في المصحه، اه انا الدكتور سليم ابو الوفا عندي 37 سنه وكنت مسافر امريكا وعشت فيها سبع سنين وانا بدرس الطب النفسي وبعدها رجعت عشان اكون دكتور نفسي في اكبر مصحه نفسيه في مصر
دكتور رشوان مسك القلم وهو بيشاور على الشاشه وقال
دي اغرب حاله عندي في المصحه.. حاله قابيل او عمار
طبعاً مستغربين بس انا هقولكم باختصار، ان الشخص ده بيتوهم وبيعيش شخصيات خارج شخصيته الحقيقيه الغير موجوده، شخص مش فاكر ماضيه بيحاول يخلق لنفسه حياه وقصه هوسمعها معاشهاش
يمكن كلامي يبان ان هو الغاز، لكن الدكتور اللي هيمسك الحاله دي هو الدكتور سليم.. وانا واثق يا دكتور انك هتقدر تعالج الحاله دي
رديت عليه وانا مبسوط
بشكرك جداً يا دكتور رشوان وان شاء الله هكون عند حسن ظنك
…
خرجت من اوضه الاجتماعات الخاصه بدكتور رشوان مدير المصحه، واتوجهت لمكتبي وبعد ما قعدت على المكتب وولعت سيجارة، دخل عليا عم عوض عامل البوفيه وفي ايده فنجان القهوه المظبوط اخدته منه وشكرته، وبعدها بصيت على الملف اللي قدامي على المكتب واللي كان مكتوب عليه قابيل
فتحت الملف وابتديت اقرأ فيه.. واضح ان قابيل عاش هنا عمر كامل ده الواضح من الملف.. لكني مش فاهم او متلخبط شويه او اللي عمل الملف ده مش موضح قابيل بيعاني من ايه بالظبط ولا ايه حكايته
وعشان كده سبت الملف على المكتب وخرجت ورحت على مكتب دكتور رشوان خبطت وسامحلي بالدخول
_ مساء الخير يا دكتور، معلش انا اسف اني جيت لحضرتك دلوقتي بس انا مش فاهم اي حاجه من الملف اللي على مكتبي
بصلي دكتور رشوان وهو مبتسم وقال
= انا كنت عارف انك هتقولى كده.. بص يا سليم واسمحلي كده اقولك سليم من غير دكتور
_ لا تمام يا دكتور خد راحتك
= انا هقولك على الموضوع عشان انا كنت حاضر اول يوم دخل فيه قابيل المصحة وعرفت حكايته كلها لكن بعد دراسه الحاله اقدر اقولك انه مستحيل نواجه قابيل بحالته عشان ده ممكن يرجعله الصدمه العصبيه وممكن كمان نفقده
الموضوع بدأ من من 15 سنة لما جالنا شاب في عمر العشرين واسمه قابيل اتقال ان الشاب ده جاي من دار رعايه عاش فيها 10 سنين وان دلوقتي لازم كان يتنقل للمصحه عشان يعيش فيها
اللي عرفته عن قابيل انه كان ابن راجل اعمال كبير، وهو من عيله كبيره جداً بس بسبب خلافات وده الكلام اللي كان طالع وقتها حد من المنافسين خلص على العيله كلها ومن حظ قابيل ان اللى قتل عيلته مشافش قابيل لكن قابيل شاف كل حاجه حصلت وكان عمره وقتها 10 سنين وده تسبب لقابيل في صدمه عصبيه حاده وفقد النطق بسببها
لكن تقرير دار الرعايه اللي كان بيعيش فيه قابيل، قال ان هو كان بيكلم ناس مش موجوده وكان ساعات بيصرخ وبيطلب منهم يبعدوا عنه
..
وده كمان اتلاحظ لما قابيل جيه عندنا هنا.. الموضوع بدأ انه كان بيكلم ناس مش موجوده.. وبعدها الموضوع اتطور خالص خصوصا لما اتعرف على عمار
وعمار ده الله يرحمه اتعدم من فتره بسبب انه قتل مراته وعياله واخوه وقال انه في علاقه بين اخوه ومراته وانه اكتشف انه العيال مش عياله
وعشان كده قتلهم.. بس المصحه عندنا اثبتت انه سليم ومفيهوش اي حاجه والتحقيقات اثبتت انه كداب وانه قتلهم عن عمد وعشان كده اتوجهتله تهمه القتل العمد مع سبق الاصرار والترصد واتحكم عليه بالاعدام
بس المشكله هنا مش في عمار… المشكله انه من يوم ما مشى عمار وقابيل عايش دوره وبيقول ان مراته واخوه كانوا بيخونوه وعشان كده قتل مراته وعياله واخوه وان العيال مش عياله، عشان كده انت مهمتك انك توصل لقاييل ان دي مش قصته وان هو قابيل مش عمار بس ده من غير ما تواجهه بحقيقه موت عيلته على ايد مجرم مجهول فاهمني
…
خلص الدكتور رشوان كلامه وانا في حاله ذهول.. معقول اللي بسمعه ده بصيت للدكتور رشوان وقلتله انا عايز اشوف قابيل
رد عليا وقال
هو موجود في غرفه رقم 201.. الغرفه دي غرفه عزل يعني هتلاقيه فيها لوحده
..
شكرت الدكتور رشوان.. وخرجت من مكتبه على الغرفه 201.. وصلت عند الغرفه وفتحتها بالمفتاح.. لما دخلت شفت شخص قاعد شكله كبير في السن يعني ممكن تقولوا من سني حالق شعره خالص وعمال يطقطق في صوابعه ويجز على اسنانه ويبرق
ورفع راسه وبصلى وابتسم
_ ايه دكتور جديد هنا.. وجاي طبعا تعرف حكايتي قبل ما اتعدم
= تتعدم؟… ليه انت عملت ايه؟
_ انا قتلت مراتي وعيالي واخويا.. انت ازاي جاي هنا ومش عارف حالتي؟
= انت اسمك ايه؟
_ عمار اسمي عمار، وانت اسمك ايه؟
= انا دكتور سليم.. بس اللي اعرفه انك ما اسمكش عمار.. اللي اعرفه ان اسمك قابيل
_ انت هتعمل زيهم بقى وهتقولي قابيل، قابيل مات هنا في المستشفى انا عمار
= يعني انت مش فاكر ايه اللي حصل وانت صغير يا قابيل؟
_ تاني هتقولي قابيل؟
…
في اللحظه دي تليفوني رن.. وكان المتصل هو دكتور رشوان وكان بيقولى انا نسيت اقولك حاجه مهمه في ناس بتقول على قابيل انه ممسوس من الجن وده بسبب انه كان هيموت ممرضه معانا هنا في المصحه عشان بس استعاذت بالله قدامه وحلفت انها شافت عينيه كلها سودا
بس انا مصدقتش الكلام ده
..
انا كنت بتكلم ومدي ضهري لقابيل وبمجرد ما قفلت المكالمه ورجعت بصيت ورايا لقيته واقف في وشي عينيه كلها سودا
اترجفت فضلت باصص ليه وساكت… لكنه اتكلم وقال
دي اخر مره اسمعك بتقولي فيها يا قابيل.. فاهم انا عمار انا عمااار
وطبق على رقبتي بايده الاتنين حسيت ان خلاص بموت كنت بحاول افلت منه بس مكنتش عارف كان عنده قوه جباره
وفي لحظه لقيته واقف بعيد عني وهو مبتسم باستفزاز وبيقول
شكلك تعبان يا دكتور سليم روح ارتاح.. ارتاح يا دكتور
…
خرجت من الاوضه دي وانا بتطوح حرفيا مش قادر اقف على رجليها ووقعت على الارض لكني شوفت.. يتبع الجزء الثاني
….
