شوفت الناس جايه تجري عليا.. لكني مكنتش قادر اقف على رجليا الناس دي كانوا اتنين من التمريض شافوني لما وقعت على الارض وجريوا ناحيتى عشان يلحقوني.. سندوني ووقفوني على رجليا وساعتها بصيت على الشباك لقيت قابيل واقف وراه مبتسم نفس الابتسامه المستفزه
شكرت الممرضين ونزلت على مكتب دكتور رشوان.. اللي اول ما شافني اتكلم وقال
_ مالك يا دكتور سليم؟… ايه اللي حصلك ووشك اصفر كده ليه؟
= الممرضه مكدبتش، انا شوفت قابيل بنفس الاوصاف اللي شافته بيها الممرضه، عينيه كانت سودا تماماً وشكله كان مخيف ومسكني من رقبتي وكان هيموتني
الدكتور رشوان عدل نضارته كده وهو بيقول
_ واضح يا دكتور سليم ان اعصابك تعبانه شويه، ممكن ترتاح وانا هشوف حد تاني يتابع ملف المريض ده
رديت عليه بعصبيه وقلتله
= انا اعصابي مش تعبانه انا كويس جداً يا دكتور واللي شوفته ده مش تخريف ده حقيقه في حاجه غلط ورا المريض ده وانا لازم اعرفهاومش هسمح ان ملف المريض يروح لدكتور تاني
_ طيب انا عايزك تهدى يا دكتور سليم، الكلام اللي انت بتقوله ده خارج نطاق الطب النفسي.. ويصنف تبع العلاج الروحاني يعني من الاخر الشخص ده ممكن يكون ملبوس مثلا زي ما قالت الممرضه وده اللي بيرفضوا الطب النفسي والعلم عموما.. احنا اي مريض بيوصل عندنا المصحه يبقى مريض نفسي او مجنون او مدعي واحنا بنثبت انه كداب
لكن اللي انت بتحكيه لا يصنف انه تابع للطب النفسي
وغير كده مش حضرتك اللي تسمح مين اللي يمسك ملف المريض ويتابع حالته انا بس هنا اللي اسمح بده بس انا هقدر الحاله النفسيه اللي انت فيها ومش هحولك للتحقيق على كلامك ده واتفضل يا دكتور دلوقتي معاك اجازه لمده 3 ايام تريح فيهم اعصابك
_ بس يا دكتور انا مش عاوز اجازه انا عايز اكمل انا مصمم اني اعرف حقيقه قابيل ده
= الكلام انتهى يا دكتور سليم اتفضل مع السلامه
…
خرجت من مكتب دكتور رشوان وانا متضايق جداً، انا مستحيل اسيب الموضوع ده.. الموضوع اكتر من هو فضول لكن دلوقتي قلب معايا بتحدي انا لازم اعرف ايه حكايه قابيل ده
خرجت من المستشفى ركبت عربيتي واتحركت على البيت.. وانا في الطريق وقفت في اشاره مرور وسندت راسي على كرسي العربيه لكن فجأة لقيت حد بيخبط على شباك العربيه.. فتحت الشباك لقيت اللي واقف قدامي قابيل.. كان شعره منكوش لابس جلابيه متقطعه وبيقولى
حاجه لله يا بيه… حاجه لله انا عيالي جعانين ومش معايا اكلهم
فضلت باصص للراجل وانا مسهم مش عارف اتكلم لحد ما قرب وشه مني ولتاني مرة عينيه اسودت تماماً وقال
متدورش ورا الموضوع محدش هيعرف ياخد قابيل مني.. فاهم يا سليم
محدش هيعرف
…
لقيت خبط كتير على شباك العربيه وعسكري المرور بيقولي اتحرك يا استاذ انت موقف الطريق بطلوا بقى اللي بتتعطوه ده
مشيت بالعربيه على طول من غير ما ارد عليه.. كل حاجه بتقولي دور ورا الموضوع اعرف ايه اللي حصل
رجعت على البيت لقيت ناهد مراتي محضره الغدا… قعدت على السفره وانا سرحان فسألتني
_ مالك في ايه؟… في حاجه في الشغل ضايقتك؟
= ها لا أبداً.. بس اليوم كان مرهق شويه.. انا كويس يا حبيبتي اطمني
هما الاولاد فين؟
_بيلعبوا في الجنينه بره اكلوا قبل ما انت تيجي وطلعوا يلعبوا شويه
= طيب انا هدخل انام عشان مرهق اوى وتعبان
_الف سلامه عليك خلاص ادخل ارتاح
…
دخلت اوضتي وانا حاسس بصداع الدنيا كلها في دماغي، فضلت اتقلب على السرير يمين وشمال بحاول انام لكني مش عارف
قومت واتعدلت على السرير وطلعت اللاب من الشنطه وبدأت ابحث عن جريمه القتل اللي حصلت لعيلةقابيل اكيد السوشيال ميديا جابت سيره الموضوع واكيد في مواقع كتبت عنها كمان
وفعلا مع البحث قريت ان في عصابه دخلت البيت وقتلت اب وام وبنت صغيره بالرصاص.. ولكن ابنهم كان مستخبي وشاف كل حاجه بعينه وده اصابه بصدمه عصبيه حاده… واتقال انه دخل دار رعايه ومكتوب اسم دار الرعايه.. كان اسمها دار الامل
قلبت شويه تاني في الاخبار لكن ملقيتش حاجه جديده.. فبحثت عن قضيه عمار الشاب اللي قتل مراته واخوه وعياله بسبب الخيانه
مكنش في حاجه ملفته في قضيه عمار وكل الكلام اللي مكتوب انا سمعته من دكتور رشوان
قفلت اللاب ولبست وخرجت من تاني ركبت عربيتي والمره دي اتحركت على دار رعايه الامل.. لما وصلت هناك لقيت نفسي قدام مبنى قديم ولكن في موظفين دخلت وسالت عن مدير الدار واللي عرفت ان اسمه الاستاذ توفيق
دخلت المكتب وسلمت عليه وشرحت ليه الموضوع باختصار وقولتله عاوز اعرف كل حاجه عن حاله قابيل لما كان في دار الرعايه
الراجل بصلي وهو قلقان وقال
_ رغم ان الموضوع قديم جداً.. بس انا هقول لحضرتك اللي لاحظ سلوك قابيل الغريب وحاول يتقرب منه كان واحد هنا معانا اسمه سعيد وللاسف سعيد دلوقتي في مستشفى الامراض العقليه بسبب حاجات غريبه كان يحكيها عن قابيل
بس كل اللى قالوا وقتها وكان ملفت ان قابيل بيجيب سيره شخص من الواضح انه كان متربي معاه ودايما كان بيفضل يتكلم معاه ولكن الشخص ده مكنش موجود فكان الاستنتاج وقتها ان الشخص ده كان يعرفه قابيل قبل وقوع الحادث.. ويمكن يكون الشخص ده واحد من عيلته بس سامحني انا مش فاكر اسم الشخص كان ايه؟!
عارف ان كده مساعدتكش بحاجه لكن والله الموضوع قديم جداً ومر عليه سنين كتير والسن ليه احكامه برده بس اوعدك لو افتكرت حاجه هبلغ حضرتك على طول
…
خرجت من الدار وانا مش مستفيد اي حاجه؟… كل اللي عرفته ان في سر فعلا ورا قابيل وان اللي حاول يتقرب منه عشان يعرف الحقيقه اتجنن
رجعت تاني ابحث عن قضيه قابيل.. وبعد تدوير كتير عرفت عنوان البيت اللي كان عايش فيه قابيل واللي حصلت في الحادثه
وعشان كده اخدت القرار اني هروح هناك يمكن يكون في حاجه تفهمني الحقيقه.. ركبت عربيتي وفضلت ماشي بيها مسافه كبيره لدرجه اني نمت بره البيت.. نمت في العربيه والصبح رجعت كملت طريقي لبيت قابيل… وصلت قدام البيت.. كان بيت كبير مهجور وده واضح من البوابه المتربة والزرع الدبلان.. دخلت لجوه كان البيت مقفول طبعاً وعشان كده استغليت شباك مكسور ونطيت منه جوه البيت
التراب جوه مغطي كل حاجه.. خيوط العنكبوت ماليه الدنيا شغلت كشاف موبايلي واتحركت بيه في الضلمه وفضلت ماشي البيت كان من دورين سبت الدور الاول اللي كان عباره عن صالون واوضه سفره وطلعت الدور التاني اللي كان كله اوض.. فضلت ادور لحد ما دخلت اوضه من الواضح ان هي دي اوضه قابيل.. فيها صوره ليه وهو صغير وفيها العاب اطفال.. فضلت ادور يمكن الاقي حاجه
وفي الوقت ده تليفوني رن وخضني.. كان اللي بيتصل دكتور رشوان
رديت عليه وقلتله ايوه يا دكتور
رد عليا وهو بياخد نفسه بالعافيه
_ سليم تعال المصحة دلوقتي حالا.. في مصيبه حصلت
= فى اي يا دكتور مصيبه ايه؟
_ الدكتور اللي دخل لقابيل عشان يعالجوا لاقيناه النهارده منتحر في الحمام
= منتحر!.. حصل ازاي ده؟
_ مش عارف بس حاول تيجي بسرعه ارجوك
…
قفلت مع الدكتور رشوان المكالمه وعيني وقعت على صوره قدامي التراب كان مغطيها مسكت الصوره ونضفتها كده من التراب بايدي كان فيها صوره لطفلين شكلهم جميل جداً.. قلبت الصوره عشان اقرا المكتوب عليها وهنا كانت الصدمه… يتبع الجزء الثالث والاخير
…
