قصة موت اجباري كاملة

موت إجباري

(ابناء حورس٤)

(مرحبًا بك ابن حورس في قطار الموت، أنت شجاع، فقد وصلت بمفردك لتلك المرحلة، وحورس الأن يثق في قدراتك، انت الأن في العربة الأخيرة من قطار الموت، حولك لصوص يريدون سرقتك، وأيضًا ركاب أبرياء.. مهمتك هي السير من العربة الأخيرة للعربة الأولى في عشرة دقائق، وعندما تصل إلى العربة الأولى ستجد في نهايتها وصلة.. وتلك الوصلة تصل بين كابينة القائد النائم بعد أن شرب مخدرات، وبين عربات القطار، افصل الكابينة عن القطار وانقذ الأبرياء.. وبذلك تتم المهمة، ولكن أحذر اللصوص، فمعهم أسلحة بيضاء)

بعد ما خلص الصوت التعليمات، ابتدا جعفر يتحرك بين الركاب، كان منهم اللي معاه اسلحة وبيحاول يسرقه، وركاب عادين، لكن جعفر كان مركز اوي وقدر يفرق بين الركاب العادين والحرامية، وقدر كمان يضرب الحرامية وعدى بين العربيات بسرعة، وعند الدقيقة ٩ كان وصل للوصلة وقدر يفصل بين كابينة السواق وبين عربيات القَطر، وبعد ما فك الوصلة واتكتبله (تمت المهمة بنجاح) قام صرخ وهلل من الفرحة.

-ماموتش.. ماموتش.. انا ماموتش، اللعبة مالهاش دعوة، اللعبة مالهاش دعوة، انا لسه عايش.. انا لسه عايش واللعبة مالهاش..

سكت جعفر فجأة لما سمع من وراه صوت خطوات، لف بالراحة وبص ناحية الخطوات، كان حد واقف عند الكاميرا، طفاها وقرب بهدوء من جعفر وهو ماسك في إيده مسدس، بص له جعفر بذهول..

-انت!.. انت يامروان؟

ضحك الشخص اللي واقف قصاده ورد عليه بثقة وسعادة لا يتناسبوا أبدًا مع الموقف اللي هم فيه..

-ايوه يااحمد ياجعفر.. انا مروان اللي جاي ياخد حقه، ولو اتحركت خطوة واحدة بس هتحصل اصحابك.

-طب ليه؟.. ليه كل ده؟

-ليه!.. تصدق انا كلمة ليه دي كانت هتجنني، انا طول عمري بسأل نفسي ليه ومالقتش أجابة، ليه طلعت لقيت أهلي ناس غلابة، وليه درست وطلع عيني لغاية ما اشتغلت في شركة البرمجيات بتاعت ابوك، وليه لما روحتله بالتصميم المبدئي للعبة بتاعتي، لعبة (أبناء حورس).. خده مني وقالي هيبص عليه وهيساعدني في تسويقه، ولما بص عليه وعجبه، اداه لابنه الفاشل عشان يكمله ويعمل منه لعبة ويبيعها لشركة ألعاب اجنبية كبيرة وياخد فلوس وشهرة على قفايا، بس ماتقلقش، ربك كبير.. سكرتيرة ابوك عرفت باللي حصل لما سمعته بيكلمك عن الملفات اللي ادهالك، وانت زي الغبي وقعت بلسانك وقولت اسم اللعبة قدامها، وهي لما سمعت الأسم ولأنها بتحبني من غير ما حد يعرف، جت وحكت لي عن اللي سمعته، وقالتلي إنها سمعت إسم اللعبة بتاعتي اللي حكيت لها عنها على لسانك، وقالتلي كمان إن ابوك قالك شد حيلك وخلصها وخلص فيديوهات تجربة اللعبة عشان تقدمها وتنزل بأسمك، أغبيا.. بس ربك بيسلط عقل الغبي عليه، وكمان بيسلط عليه صاحب الحق.. اه.. ما انا بعد ما فاطمة قالتلي اللي سمعته قررت اراقبك، ومن مراقبتي ليك عرفت الشقة دي وعرفت اطلع نسخة من مفتاحها ودخلتها وركبتلك فيها مايكات، وبقيت اسمعك عن طريقها انت واصحابك، انتوا ماعملتوش جديد.. لا انت ولا حاتم ولا فاروق ولا عزام عملتوا أي جديد، انتوا بس خدتوا التصور اللي انا حطيته للعبة واشتغلتوا عليه، وعشان كده كان سهل عليا اخترق اللعبة والشقة فاضية وارتب موتة لكل واحد جواها، اول واحد.. الحبل مش هيتفك بسهولة وهيموت وقت وقت الفيضان.. وده في الحقيقة دخلت شقته وخدرته وغرقته في البانيو، وطبعًا ماسيبتش ورايا أي دليل، وتاني واحد.. خليت الجعانين في اللعبة يتاكتروا عليه وياكلوه، وفي الحقيقة قابلته في الشارع بعد ما نزل من عندك وفضلت مراقبه، ولما دخل شارع مهجور، خليت الكلاب الجعان اللي كانت معايا تقطعه، وتالت واحد.. خليت الحصان اللي راكب عليه ياخد رصاصة طايشة ويقع من عليه، وفي الحقيقة قابلته بعد ما نزل من عندك برضه وضربته على نفوخه بعصاية تخينة وجيبت أجله، ورابع واحد.. خليته يقع عليه عرق خشب مولع، وفي الحقيقة دخلت بيته عن طريق الباب بسبب نسخة كنت عاملها من مفاتيحه زي ما كنت عامل معاكوا كلكوا، وولعت فيه من غير ما اسيب ورايا برضه أي أثر، بس الأخير.. لا، ده كان لازم يكمل عشان فيديوهات التجربة تتم، وحصل اللي رتبتله، بس انا جامد ياأخي.. كنت بصطادهم واحد ورا التاني زي الدبان، وبدل ما اتعب نفسي وافكرلهم في موتات تليق بيهم، بقيت بموتهم في الحقيقة زي ما بيموتوا في اللعبة، لكن تعرف.. انا كنت بعمل كده وانا حاسس إنكوا هتحسوا في وقت ما إن اللعبة ملعونة ومش هتكملوا، بس برضه كملتوا.. وانا كملت في خطتي، ودلوقتي هاخد اللعبة والفيديوهات وهقدمهم انا للشركة.. انا.. اللاعب رقم زيرو ومصمم اللعبة، انا صاحب الحق، والحق رجعلي تاني.

-طب ومكرم.. مكرم ذنبه ايه؟

-ذنبه إنه صاحبكوا.. وذنبه إنه اغنى مني، وانت كمان، ذنبك إنك سرقتني وذنبك إنك اغنى مني، سلام ياحرامي ياابن الحرامي.

وضرب مروان طلقة من المسدس اللي فيه كاتم للصوت استقرت في راس أحمد، وبعد ما قتل مروان، احمد جعفر، خد اللعبة والفيديوهات وخرج من الشقة، وبعد المعاد المحدد من الشركة، راح مروان وقدم اللعبة بأسمه واتقاله إنها متوافق عليها مبدئيًا، وده حصل بعد ما اتشل جعفر ابو احمد ومدير الشركة اللي مروان بيشتغل فيها، وفي النهاية اتقبلت اللعبة واتحدد لمروان معاد يسافر فيه فرع الشركة في اوروبا عشان يمضي عقد بيع اللعبة، بس بعد ما مروان اتبلغ بالخبر ده، ووقت ما خرج من مقر الشركة وهو فرحان باللي وصل له، كان مُنتشي وبيعدي الشارع وهو فرحان اوي وفاطمة حبيبته كانت مستنياه على الرصيف التاني، واول ما بص لها وابتسم، جت عربية نقل كبيرة وخبطته، ومات مروان.

اما اللعبة، ف اتعطل نزولها للأسواق بعد موت مروان، بس لو الشركة نزلتها للأسواق والمشاكل اللي حواليها اتحلت، اوعى تلعبها، ولا اقولك.. العبها العبها.. العبها لو حابب تجرب تجربة غريبة، تجربة جايز بسببها يتفرض عليك الموت، بالظبط زي ما اتفرض على الخمسة اللي لعبوها قبلك حتى لو اللي قتلهم كان مجرم، بس صدقني، اللعبة اتلعنت بسبب إنها مسروقة وبسبب الدم اللي حواليها، فلو وقع قصادك لعبة بأسم أبناء حورس حاول ماتلعبهاش، ولو هتلعبها خد بالك، لأنها ممكن تتسبب في موتك .. سلام.

تمت