قصه الساكت كاملة

خرج الظابط ولقى في وشه عسكري قال له وهو بينهج..

-عند بيت سعدون ياحضرت، قفشنا واحد منهم.. كان ناوي ينط من الشباك الوراني ويدخل البيت.

راح الظابط جري ناحية بيت سعدون، وهناك، كانوا العساكر والغفر وكتير من أهل البلد واقفين حوالين المتلم، دخل الظابط وسطهم وقرب منه ووراه الخمس شباب اللي كانوا محبوسين بالكدب، وفي ثانية شال الطاقية الصوف اللي كان لابسها المتلتم على وشه، وبمجرد ما عمل كده بص له محمود وقال له وهو مبرق..

-ازاي؟!.. انت!.. انت ياساكت اللي بتقتل في الناس!!.. طب ازاي؟

بص الشيخ عبد الله اللي كان واقف وسط الناس ناحية الواد وهو مستغرب!

-لا.. يستحيل ياحضرت، الوالا الساكت نايم عندي في البيت حالًا، انا متأكد.

وراح جري ناحية البيت جاب الساكت ووقفه وسط الناس، ساعتها كل اللي واقفين بصوا له وبصوا للواد بذهول، ومع نظراتهم واستغرابهم بص المتلتم، او اللي كان متلتم بقى لسعدون وقال له وهو مغلول منه..

-اوعى تكون فاكر انك بكده فلتت مني ولا فلتت بعملتك اللي عملتها زمان، ورحمة أبويا وأمي هتموت برضه.

قرب خالد منه وكان هياكله بسنانه ووراه رمضان ورجب، بس الظابط منعهم عنه ومسك الواد من قفاه وسأله..

-انت مين ياض انت وازاي شبه الساكت ابن الشيخ عُمر؟!

بص الواد للي واقفين وابتسم ابتسامة مليانة غرور..

-ايه!.. بتبصوا لي كده ليه؟.. لا.. انا مش الساكت، وقبل ما تحتاروا وتسألوا نفسكوا انا هجاوبكوا.

انتبهوا كل اللي واقفين للواد اللي ابتدا يحكي حكاية اغرب من الخيال.

-من سنين ياما جالكوا واحد غريب عن البلد هو ومراته، الراجل ده كان إسمه عبد الباري، اشترى حتة أرض من الأرض الفاضية اللي ورا البلد من ناحية الشرق، واشترى بعدها حتة أرض تانية بنى عليها بيت عاش فيه هو ومراته والاتنين ولاده، والاتنين دول كانوا عبد الرحمن وعبد الرحيم، عبد الرحمن لما كبر شوية راح عاش مع خاله اللي في القاهرة بعد ما امه ماتت، وهناك اتعلم واشتغل في مكتب من مكاتب الصحة، وعبد الرحيم قعد في البلد جنب ابوه لحد ما مات، بس عبد الباري قبل ما يموت كتب لعبد الرحيم كل حاجة بيملكها، الأرض اللي عليها البيت بالبيت، والأرض التانية اللي كان ناوي يزرعها او يبني عليها، والحقيقة إن عبد الرحمن اعترض بس ماتحمقش اوي لأنه كان خلاص اشتغل واتجوز وبقى له حياة في القاهرة، ولحد هنا الأمور كانت تمام وعبد الرحيم اتجوز ومراته بقت حامل، إنما وقت حمل مراته، كان ظهر في البلد موضوع الحفر عن الأثارات والكشافين والدلالين، ومن ضمن الدلالين دول كان الشيخ عُمر.. الشيخ عُمر اللي قعد مع كبارات البلد في مرة وقال لهم إن الأرض الفاضية اللي عبد الرحيم ورثها عن ابوه، تحتها أثار.. ولما الكبارات راحوا لعبد الرحيم وعرضوا عليه إنهم يشتروا الأرض وياخدوا حُجتها منه، رفض وقال لهم إنه مش هيبيعها لأنها مستقبل لعياله الجايين، وطبعًا الكلام ده زعل الكبارات وخلاهم يفضلوا يزنوا عليه، وبرضه زنهم ماكنش بيجي بفايدة، وفضلت الأمور ما بينهم على الحال ده لحد يوم ولادة مرات عبد الرحيم، جه عبد الرحمن، جه بعد ما اخوه كان بعتله تليغراف وطلب فيه إنه يجيله هو وجماعته عشان تولد مراته، وحصل..

حصل وجه عبد الرحمن، ومراته ولدت مرات عبد الرحيم اللي جابت اتنين، تؤام، عيل بيعيط والتاني ساكت، مابيعيطش، بس وهم قاعدين حوالين الست التعبانة الوالدة في الأوضة الورانية اللي ولدت فيها، فجأة الباب خبط!.. قام عبد الرحيم وقفل باب الأوضة وراح فتح باب البيت وكان في إيده العيل الساكت، وبمجرد ما فتح الباب بص للي واقفين وقالهم عايزين ايه، ردوا عليه الكبارات اللي لقاهم قدامه وقالوا له إنهم جاين له عشان يخلصوا موضوع الأرض، بس وقتها عبد الرحيم حط ابنه على دكة من الدكك الخشب اللي في البيت، وحاول يمنعهم من إنهم يدخلوا، إنما هم طبعًا كانوا اقوى منه وقربوا منه وضربوه، وقبل ما يصرخ ويلم عليهم الناس خنقوه وموتوه، كل ده كان بيحصل وعبد الرحمن بيتفرج من فتحة في باب الأوضة، ولأنه شخص جبان وشاف اللي شافه ده، فبسرعة خد مراته والعيل المولود وخرج يجري من الباب الوراني اللي في الأوضة، وبعد خروجه جري ناحية الأرض الفاضية ووصل لشريط القَطر، وفضل ماشي معاه هو ومراته والعيل لحد ما وصلوا للمحطة، ومنها ركبوا قَطر ونزلوا القاهرة، اما في بيت عبد الرحيم بقى، فالكبارات بعد ما موتوه وقلبوا البيت وسرقوا الحُجة بتاعت الأرض والختم بتاعه، وبعد ما اكتشفوا إن مراته ماتت بعد ما ولدت من تعبها، خرجوا وسابوا البيت، بس قبل ما يخرجوا، الشيخ عُمر تقريبًا شاف الواد الساكت وصعب عليه، فخده رباه لأنه كان مابيخلفش، ومع الوقت ولما الكبارات خرجوا للناس، قالوا تاني يوم إن اللي قتل عبد الرحيم ومراته وسرق بيتهم وابنهم، هم المطاريد، ومن حظهم الاسود إنهم ماكنوش يعرفوا إن عبد الرحمن موجود وإن عبد الرحيم خلف عيلين مش عيل واحد.. وبس، اتقفل الموضوع على كده والكبارات حفروا في الأرض بعد ما قالوا إن عبد الرحيم باعهالهم قبل ما يموت هي والبيت وكان ناوي يسيب البلد، وده عن طريق عقد مزور عملوه بتاريخ قديم وختموا عليه بختم عبد الرحيم، ايه، مستغربين!.. انا عارف إنها حكاية ماتدخلش مخ عيل صغير، بس انتوا صدقتوها او عملوا نفسهم مصدقينها عشان بتخافوا من الكبار ومن بطشهم، وبعد ما مروا شهور جه عبد الرحمن وحاول يطالب بورثه من اخوه او حقه، لكن يومها الكبارات ضربوه علقة موت وقدر يفلت منهم ويرجع عالقاهرة بأعجوبة، وانتهت الحكاية والكبارات افتكروا إن خلاص كده كل حاجة خلصت، بس ماكنوش يعرفوا إن عبد الرحيم له إبن اتسجل بإسم اخوه في مكتب من مكاتب الصحة في القاهرة، والواد ده يبقى تؤام الساكت، انا.. عبد الحق الخطاط اللي بيرسم عالحيطان، ايوه ماتستغربوش اوي كده، انا ابن عبد الرحيم التاني وعمي حكالي كل حاجة لما كبرت، ووصاني كمان إني لازم اجيب تار ابويا، واللي وصاني بيه نفذته وكنت هكمله لولا إني اتمسكت.. انا اللي قتلت ولاد عاطف وولاد العمدة عشان احرق قلوبهم واموتهم بحسرتهم عليهم، وانا اللي قتلت الشيخ عُمر وشيخ الغفر وكنت ناوي اقتل اخر واحد من اللي جُم ليلتها، انت ياسعدون، بس ماتقلقش، هتموت يعني هتموت، وانتوا يااهل البلد ياللي افتكرتوني الساكت، انا مش الساكت، انا تؤامه، تؤامه اللي نزل البلد وكان بيمشي وسطكوا اوقات وهو عامل نفسه الساكت، انا اللي قابلت اخويا وكنت عاوز اتعرف عليه، بس ماعرفنيش لأنه عيان في دماغه وماحدش عالجه من وهو صغير، وبقى كل ما يشوفني لما كنت بدخل له البيت من ورا الشيخ عُمر، كان يقول عليا الساكت وكأنه بينادي على نفسه، بس لا.. انا مش اخويا ولا انا الساكت، ولا حتى هو يستاهل اسم الساكت ده عشان مابيتكلمش كتير، انتوا اللي ساكتين، انتوا اللي شياطين خرسا ماشية على الأرض عشان خليتوا دول الكبار وسطكوا، إنما انا.. انا حتى لو موتت فانا برضه مش هموت، انا فكرة، انا الشخبطة اللي على جُدران بيوت الظلمة، انا عبد الحق الخطاط صاحب الحق، انا اللي في لحظة هقلبها ضلمة عليكوا وهكمل تاري اللي باقي عن طريق اصحابي اللي بيساعدوني، اصحابي اللي قاعدين في الأوضة الخوص المهجورة اللي عند الأرض الفاضية، اهل بلدي اللي بجد، ولاد حتتي اللي اتربيت فيها في القاهرة، العفاريت اللي قلبوا نهاركوا ليلكوا وقلبوا ليلكوا جهنم.

ومع اخر كلمة قالها، انوار البلد انطفت، الكلوبات والمشاعل انطفت وابتدا الضرب، الضرب اللي في نصه قدر عبد الحق إنه يفلت ودبح سعدون، وفي نفس الوقت حاول يهرب هو واللي معاه او اصحابه اللي سموا نفسهم العفاريت، بس في وسط الضرب ووقت هروبهم، شافهم خالد وشاور عليهم، كانوا بيجروا ناحية الأرض الفاضية وخالد ورجب ورمضان ومحمد ومحمود كانوا بيجروا وراهم، وفي نفس الوقت كان معاهم الغفر والعساكر، وفي وسط ضرب النار اللي كان طالع من العساكر، جت طلقة في ضهر عبد الحق ومات، وبعده ماتوا اتنين كمان من زمايله، اما الباقين بقى فقدروا يجروا ويهربوا.. وبس، اتقفلت الحدوتة لحد هنا، الراجل الطيب اللي اسمه شعبان بقى العمدة مكان اخوه، والشيخ عبد الله بقى هو الشيخ اللي بجد وسط الناس وفضل يراعي الساكت لحد ما مات، ومحمد محمود ربنا كرمهم واشتروا حتة أرض وكبروا بيتهم واتجوزوا وبقى ليهم ذرية، اما خالد بقى فربنا كرمه وقدر يكبر تجارة ابوه واتجوز وخلف هو كمان، ومن ذريته كانت عروسة الوالا اللي كنت بحضر فرحه، حفيد من أحفاد محمود.

لما عم جاد وصل لهنا فوقت من سرحاني مع القصة وقولتله..

-ياه ياعم جاد.. وحشتني اوي حكاياتك، انا النهاردة هروح البيت وانا متسلطن، بس تفتكر ياعم جاد مين الظالم ومين المظلوم في الحكاية دي؟

-والله ياابني دنيتنا دي مافيهاش ظالم على طول الخط ولا مظلوم على طول الخط، عبد الرحيم ظلم اخوه لما استحل ورثه، والكبارات ظلموه باللي عملوه فيه، وعبد الحق ظلمهم لما قتل عيالهم بذنبهم، وهي كده الدنيا، كل ظالم في حكاية، مظلوم في حكاية تانية، والعكس.. بس الأهم إنك تعرف حاجة مهمة اوي، عيش مهما تعيش بس اوعى تيجي على حد وتاخد حق مش حقك، لأنك مهما نهبت او هبشت او ظلمت، هيجيلك يوم وتقابل حد ظالم يظلمك ويخلص منك الجديد والقديم، وده رأيي، اما رأي الناس بقى فلما تكتبلهم الحكاية ويقولوه، ابقى كلمني وقولهولي.

-حاضر ياعم جاد، اوعدك إني هقولك رأي الناس اما القصة تتكتب وتنزل، واوعدك كمان اني تملي هتصل بيك.

ولحد هنا خلص كلامي مع جاد وروحت البيت وكتبتلكوا الحكاية اللي حكهالي، الحكاية اللي سواء كانت حقيقية او لا، او جزء منها حقيقي والجزء التاني منها مجرد اسطورة، او حتى كانت كلها مجرد اسطورة، ف كل ده مايهمنيش، انا يهمني رأيكم انتم.. شايفين مين ظالم ومين مظلوم، وياترى، احنا دلوقتي في وسطنا كام ساكت وكام ظالم؟!

تمت