قصه العرافه ميمونة

خرجت العرافة ٤ أوراق من مجموعه الورق الكتير اللي في أيدها، فجأة قطع الصمت صوتها.. وهي لسه عيونها علي الورق، وقالت :

-سندس.. وجودك معانا، حكم عليكي هتكملي للأخر، مفيش هروب.. بس انتي اللي جواكي على قد ما هو تقيل، بس بيهزمه قوتك..

اما الحين.. أوراق السحر الاسود هتقول كلمتها، او هتسمع كلامكم الاول، واللي اتحكى جوه فنجانكم.. وشوفته بعيوني، وبعد كده اللي بدكم بيكون.. قصادكم ورقات (السر الاعظم).. السر موصول بيني وبينها وبينكم.. كل واحده قررت مصيرها من زمان.. وآن الاوان كل حاجه تبان.

رفعت وشها وبصت بنظرات مخيفة.. اتفحصت بتركيز وش كل واحده فينا.. وشوشنا اللي من القلق اتسحب منها الدم، اتكلمت بصوت حاد:

-مدي يدك يا ياسمين.. ولا أقولك يا عروسة الموت!

بصيت انا وانجي.. ناحية ياسمين، اللي كانت بتاخدها نفسها بالعافيه.. بمجرد ما قالت اللي قالته ميمونه، بلعت ياسمين ريقها بالعافيه.. اترددت في انها تسحب ورقه من ايد ميمونه، كانت ايدها بتترعش، خايفه وقلقانه.. صرخت فيها ميمونه :

-مدي يدك.

خدت ياسمين ورقه من الاوراق المقلوبه في ايد ميمونه، وقبل ما ياسمين تعدلها تشوف فيها ايه، سحبت منها ميمونه الورقة بقوة.. سابت باقي الأوراق من ايدها. وعدلت ورقة ياسمين.. بصت لها بتركيز، ورجعت بصت في عيون ياسمين اللى حرفيا كانت بتموت :

-الشيطان غواكي.. سحبك معاه لبحر الدم، بحر غويط ملوش شط.. غرفتي من البحر وغرقتي فستانك الابيض ولطختيه، غرقتي ومالقتيش حد ينجدك، حتى اللي عشقه قلبك.. خطيئتك متعلقه في رقبتك، والذنب شايله ناس كتير معاكي..

قلبك جواه وسواس بسبب الشيطان اللي ملكتيه حالك، ازاي لسه بتسألي نفسك هو شيطان ولا ملاك ؟.. ها كلامي مفسر حاله.. ولا أفسر كمان؟!..اقولك افسر كمان.

لحظة ما قالت ميمونه الكلام ده.. بصتلنا ياسمين بعيون زايغة.. عيون مكسورة مليون دموع، فيها انكسار غريب ماحدش فينا فاهمه.. رجعت بصت ناحية العرافه، اللي كانت ماسكة الورقة وبتتفحصها بتركيز شديد، كأن في ايدها جواب وبتقراه.. برقت عينها بطريقه نشفت الدم في عروقنا.. وكملت كلامها وقالت :

-بختك اختارتيه بيدك، شوفته في فنجانك، ناس كتير ماشيين، ساكتين والحزن كاسي وشوشهم.

وسط القوم.. نعش محمول علي الكتاف، خطوات تقيله في ضلمة الليل، بيداروا بيها فضيحه كبيرة.. شايفه عيون بتبكي وصرخات عاليه، ستات لابسين اسود في اسود، والتراب مغطيهم.. بينزل النعش من على الكتاف قدام القبر المفتوح، يتشال غطا النعش، ويظهر كفن العروس غرقان بالدم، والدم يجري بحور علي الكفوف، والحساب تقيل..

الحوار بين ميمونه وياسمين اتقلب شبه مصارعة كلامية.. كانت شبه الساحر اللي دخلت وغوطت في مشاعر ياسمين، لدرجة انها بكت بحرقة، صرخت وقالت :

-هو شيطان… ماتفسريش حاجة، بذرة خطيئة واتذرعت مش عارفه اخلص منها..

لحد امبارح.. كنت بتحايل علي النوم، اللي جفا عيوني من يوم اللي حصل، يادوب غمصت عيني.. شفت اللي بتحكيه يا ميمونه.

انا وانجي بصينا لياسمين في ذهول.. لحظة صمتها لمدة ثواني، عدا علينا ساعه.. مستنيين تكمل عشان نفهم، كملت ياسمين كلامها، ودموعها بتحكي قبل ما تنطق عن كارثة خبتها عننا :

طريق طويل مش واضح نهايته.. ضلمة ماشية في لوحدي، كل همي اني الاقي حد يدلني علي اول الطريق، ضوء خافت ظهر.. وظهر معاه خيال حد بيتحرك ناحيتي ببطء، قربت من الضوء اكتر، وفي نفس الوقت بيقرب مني الخيال اللي ناحيتي، حسست على الفستان اللي كنت لبساه، كان فستان فرح!.. بس كان غرقان دم.. خيال الشخص اللي جاي ناحيتي، بقي وشي في وشه، شيطان..صورة شيطان، شدني من ايدي وسحبني بكل قوته، لحد ما وصلنا عند اول الطريق، كان قصادنا ترعة اوبركة… بس مش ميه!.. كانت بركة دم، زقني جواها وسبني بغرق ومشي، فضلت اصرخ.. بس مفيش حد بينجدني.

ياسمين وهي بتتكلم، كانت زي المحمومة.. اللي بتهذي مش عارفه بتقول ايه، او لعنة رمتها عليها العرافة.. طلعت كل اللي جواها وماحدش فينا يعرفوا.. كملت كلامها وسط حالة من الذهول:

-هم السبب.. ياريتهم سمعوا كلام جدتي، انا قلبي اتحكم فيا، مادتش لعقلي مساحة يوريني طريق الصواب قبل ما اقع فى طريق بحر الخطيئة .. حبيت ابن خالي حب الجنون، اللي يخلي الحياة كلها تقف على كلمة منه.. من وقت ما اعلن حبنا للجميع، وجه خطبني من اهلي.. كنت دايما اسمع جدتي تقول لأمي وابويا :

-سراج مننا وعلينا ماقلناش حاجه، بس انكم ماتحطوش حدود لعلاقته مع ياسمين، خصوصا بعد الخطوبة.. ده غلط وغلط كبير

كان بيبقي رد امي عليها :

-سراج ابن اخويا زينة الشباب.. وبيخاف على ياسمين اكتر من نفسه.

-يا مرات ابني انا مقولتش حاجه في الكلام ده.. ولا اقدر اي حاجه علي اخلاقه، بس لا دين ولا اخلاق يقولوا انكم تروحوا اشغالكم، وهو ييجي يقعد معاها بالساعات لوحدهم.

-متقلقيش يا امي.. ما بيكون موجود في البيت اخوها (زين)

كانت جدتي تضحك وتقول :

-هو اللي مش زين كلامك يا مرات ابني.. اما زين ابنك اللي معداش ال ١٠ سنين، مايعدلش الحال المايل.

كان كلام جدتي مش بيعجبهم.. لانه شايفين كلام في خيالها لوحدها.. بس الحقيقة ان هي اللي كانت صح، وحصل اللي كانت خايفه منه.. ابن خالي جالنا زيارة كالعادة، سلم على امي اللي كانت بتستعد انها تخرج، وسابتني انا واخويا مع سراج.. قعدنا نتكلم اكتر من ساعه، لحد ما لقينا (زين) راح في النوم.. من بعد نومه بقي تالتنا الشيطان.. شيطان قلوبنا اللي قدر يتغلب على كلمة العقل.. وحصل ما بيني وبينه خطيئة وذنب العمر كله، اللي خجلت حتي احكيها ما بيني وبين نفسي.. والنتيجة خطيئة اكبر مش عارفه اتخلص منها ازاي.. أما هو اتحجج انه مش عارف يبص في عين امي وابويا، وقرر انه يسيبني، حاولت اني افهمه انه باللي بيعمله، هيصلح خطأ بخطأ اكبر، بس مكنش بيسمع مني كلمة.. مش ده البني أدم اللي اخترته، ده واحد تاني زي ما قولتي (شيطان).. اتحكمت فيه أنانيته خاف على شكله قصاد اهلي، وياريت على كده وبس، هددني لو اتكلمت هتفضح،من وقتها عايشه في رعب، مش عارفه اعمل ايه؟.. ولو اهلي عرفوا، قليل ما قتلوني

سكتت ياسمين.. ماكنتش مصدقة اللي بسمعه، حاولنا معاها كتير، من وقت ما اتغير حالها، نفهم ايه سبب التغير المفاجئ، وماكناش بنلاقي اي جواب.. وجت العرافة في لحظات فتحت بير الاسرار، ويا ترى ايه مستخبي تاني؟!.. قطع تفكيري صوت ميمونه، لما اتكلمت وقالت لياسمين :

-انتي اللي كانت احلامك تشق السما، لمستي نجومها بأيد ديب لئيم خبيث.. ماهر في التمثيل، والديب عمره ما يكون ضهر ولا سند.. ده حيطة من القش، مع شوية هوا تطير.. يروح معاها السند، والضهر يتعرى ويتكشف.. وده اخر الكلام!

ساد صمت طويل، مش عارفه عدا قد ايه من الوقت.. بعد ما مسكت العرافة الورق من اول وجديد، او بمعنى أدق باقي الورق بعد ما ركنت ورقة ياسمين، ياسمين اللي كانت قاعده معانا بجسمها بس، اما روحها ف اترمت في دوامه ومتاهه.. ياعالم هتخرج منها ازاي!؟

مدت العرافة ايدها ناحية انجي، شاورت لها تسحب ورقة، انجي بعد اللي حصل الرعب اللي عندها بقي أضعاف، بس ميمونه مادتهاش فرصه للتردد او التفكير، كفاية بس نظراتها اللي رعبتها.. مدت انجي ايدها وهي بتترعش خدت ورقة، وكررت ميمونه نفس اللي عملته مع ياسمين، اخدت من ايدها الورقة.. عدلتها على النقوش المرسومة وبصت لها بتركيز، رجعت بصت في عيون انجي وقالت :

-يا عيني عليكي يا مسكينة.. لوم الضمير بيقتلك في الثانية ١٠٠ مرة، الضحكة تملى الوش، بس القلب شايل ومليان احساس بذنب النصيب والقدر، ضميرك هو عفريتك، هو اللي بيطاردك، اللي راح واتدفن مقيدك لحظة موته، لحظة الدم اللي سال وحملتي نفسك ذنب موته، مفيش مفر ولا مهرب من القدر، ياعيني عليكي من العذاب ومن اللي جاي، اللي جرالك قصادي شيفاه اتعكس في فنجانك، واترسم على ورقتك بعقلك اللي هيفضل شايل الهم.. هتفضلي لحد امتى تلومي حالك؟

نظراتنا كانت متوجهه لانجي، بمجرد ما قالت ميمونه اخر كلامها اللي قفلته بسؤالها .. ردت عليها انجي بصوت مليان حزن :

-لحد ما اموت.. لحد ما ادفن جنبه، خياله الشاحب مش بيفارق أحلامي، لحظة ما بحط راسي على مخدتي، بسمع باب العمارة بيتفتح بقوة، صوت خطوات تقيله طالعة على السلم، اكيد هو.. رجله بيجرها لدرجة انها بتعمل صوت مرعب، واضح مع الصمت المخيف، كل درجة سلم بموت فيها من الرعب.

قاطعت كلامها ميمونه :

-بتبقي صاحيه مش نايمه.

-مش عارفه.. والله ما عارفه ان كنت صاحية ولا نايمة، بتمر لحظات بطيئة وانا سامعه الخطوات بتقرب، لحد ما بيتفتح باب الشقه، وبتكمل لحد ما بتوصل لباب اوضتي، بيتفتح الباب وبيظهر ضوء احمر.

بيدخل من الباب.. بنفس صوت الخطوات المصحوبه بنفس حد بينازع كأنه في لحظات عمره الاخيرة.. بيقف قدامي مش واضحة ملامحه بسبب الدم اللي مغرق وشه، بينزل الدم ويغرق هدومه، حتي لو مش واضحة ملامحه، بس احساسي بيقولي انه هو،.. جاي ينتقم مني..

اتكلمت العرافه :

-ينتقم منك!.. يعني الذنب ذنبك!

ردت عليها انجي وهي بتبكي وبتصرخ بأنفعال شديد:

-ايوه الذنب ذنبي انا.. (مصطفى) كان ملاك ماشي على الارض، من يوم ما اتولد بعدي ب ٥سنين، واحنا بنعتبره ابتسامة البيت وقت التعب، عمرنا ماشفناه انه من ذوي الاحتياجات الخاصة، بالعكس.. كان بيفهمنا وقت ما نكون متضايقين، ويحاول يخفف علينا عشان يرجعلنا ضحكتنا.

وداه بابا لدكاترة كتير.. بس كلهم اتفقوا انه هيعيش بمستوي عقلي وذكاء اقل من اللي حواليه، والاعاقة الذهنية اللي اتولد بيها ، بتخليه مهما كبر في السن، بيفضل عقله عقل طفل صغير.. للسبب ده كنا كلنا بننتبه على كل خطواته، واي حاجه بيعملها، الدكتور اللي متابع حالته، اهم حاجه نبهنا عليها..اهتمامنا بحالته النفسيه، دخوله في نوبة انفعال شديد وغضب، هيعرضه لخطر شديد.

يوم بيجيب اللي بعده.. وارتباط مصطفي بينا بيزيد اكتر، خصوصا انه كان بيخاف من التعامل مع اي حد غريب.. وللسبب ده كان نادر لما ماما تخرج بره البيت من غيره.. لحد ما في يوم جه اتصال لأمي.. طلعت من اوضتي علي صراخها، كانت بترد بقلق وفزع.. فسألتها:

-خير يا ماما حصل ايه؟

-ابوكي يا انجي.. ابوكي عمل حادثة والاسعاف خدته المستشفى..انتبهي علي اخوكي.

دي اخر جملة قالتها، وخرجت بسرعة من الشقه.. انا بقيت واقفه مكاني مش عارفه اتصرف، اروح وراها اطمن علي بابا ولا استني عشان مصطفى.. في اللحظة، دي لمحت مصطفى واقف عند الباب، على ملامحه خوف ماشفتوش قبل كده، قال :

-فين ماما يا انجي؟

كرر سؤاله اكتر من مرة، مادتوش اي رد، فكان رد فعله غريب.. فضل يصرخ ويتشنج بطريقة غريبه، فقدت السيطرة علي انفعالاته.. مكنش قدامي حل غير اني اخرج اروح لماما المستشفى، عشان تيجي تلحقه واستني انا مع بابا.. وفعلا قفلت عليه بابا الشقه ونزلت، وصلت المستشفى.. شوفت امي بتصرخ وبتعيط، اتفزعت على بابا ليكون جراله حاجه، قربت منها فبصت لي وصرخت في وشي ;

-قولتلك اوعي تسبيه، قولتلك انتبهي علي اخوكي.

وقفت امي تاكسي.. ورجعنا الشقه، شوفنا ناس كتير واقفين تحت العمارة.. قلبي دقاته زادت بسرعة رهيبه، ماما جريت وبقت تزحزح في الناس، وقفت جنبها.. حد متغطي بجرايد كتير، بس ده مامنعش الدم اللي مغرق الارض، كشفت وش اللي واقع على الارض.. كان اخويا!

اخويا مصطفي.. لما ملقاش حد في البيت، تفكيره وصله ان بلكونة البيت، مكان ممكن يخرج منه ويجيلنا.. اهملت وصية امي وسبته.. فقتلته!.. ايوه انا اللي قتلته، وهفضل طول عمري اتعذب بذنبه.

ولولا رحمة ربنا.. بابا كان هيحصله من حزن عليه، ومن يوم موته بقيت مجرد ضيفه في البيت، ماما وبابا حالهم مابقاش زي الاول.. واهي عيشة والسلام.

سكتت انجي.. بس بديل سكاتها عن الكلام، دموعها اللي موقفتش.. اتكلمت ميمونه :

-مليش حيلة.. اللي عندك عقدة ذنب هتلازمك دايما ، عقلك وقلبك في قبضة ضميرك.. ماقدرش لا احميكي ولا اريحك.

رجع الصمت يحل في قعدة البؤس.. فجأة صرخت ميمونه وهي بتبصلي، حطت قصادي اخر ورقتين في ايدها، طلبت مني اسحب ورقه، عاندت قصادهابسبب عدم اقتناعي بكل اللي بتعمله، او ممكن حالة تمرد للحالة اللي وصلت فيها اصحابي، فسحبت ورقه وانا بقولها ;

-انتي مش اكتر من واحدة دجالة، الله اعلم عملتي ايه عشان تعرفي اللي عرفتيه؟

برقت عينها وقالت :

-لمحت الورقة اللي في ايدك.. هتعيشي باقي حياتك بسرك اللي هيفقدك عقلك.

قُمت من مكاني، روحت ناحيتها ومسكتها من دراعها :

-انا هجبلك الامن يرموكي بره يا نصابه.

مسكت التليفون واتصلت على استقبال الاوتيل، طلبت منهم يبعتولي الامن اوضتي، بسبب واحدة ضايقتنا وعاوزين نطردها، هي فضلت واقفة مكانها ماتحركتش.. مفيش اي رد فعل للي بعمله.. دقايق وجم الامن، اول ما شاف ميمونه قال :

-انا آسف يا ستنا، والله ما اعرف انها تقصدك، المدير ممكن يطردني لو قربت ناحيتك.

ضحكت ميمونه وبصت ناحيتي :

-دي ناس جاهله يا ابني.. اتوكل على الله انت وشوف حالك، اما انتي يا (سندس)، انا هستناكي لما ترجعيلي عشان تعتذري وتقولي أنا اسفه يا ست ميمونه.

خرجت العرافة من الاوضة.. حالتنا احنا التلاته مالهاش وصف، كل واحده مننا قعدت في مكان، اللي سرحانة، واللي بتعيط، وفضلنا علي الحال ده لحد ما النهار طلع..قُمت من على سريري، وبدون ما احكي في اي شئ قولت:

-جهزوا الشنط عشان هنسافر.

بنفس حالة الصمت اللي كنا فيها، جهزنا شنطنا وخدنا اول اتوبيس، من وقت ما رجعنا قدمنا احنا التلاته، اجازة مفتوحه من الشغل، وتقريبا علاقتنا شبه اتقطعت..

او يمكن عشان احوالنا اتغيرت، انا مثلا بقت حالتي كل يوم تسوء عن اللي قبلها، كأن العرافه سلطت عليا لعنه اسمها قلة النوم، وده بسبب الكوابيس اللي مش بتفارقني.. امي لاحظت عليا حالة التعب، فضلت اتكلم معاها في اي حاجه عشان ماتقلقش.. في وقت ما بكلمها، شُفت قطه ماشية على سور البلكونة، شدني شكلها الجميل والوانها، حسيت انها واقفه عاوزة تدخل، دخلت اجبلها اكل، بس على ما رجعت لقيتها اختفت، بصيت حواليا يمكن تكون دخلت الشقه، بس ماكنتش موجودة.

حسيت بالتعب اللي بقي ملازمني من وقت ما رجعت، دخلت اوضتي عشان انام، حاسة كأني بتخنق، حاولت اهرب من الاحساس ده بالنوم، بمجرد ما نمت.. شفت نفسي ماشيه في مكان شبه الغابات، شجر كتير اغصانه مشبكة في بعضها، خلت الضوء اللي واصلي بسيط جدا، يادوب كاشفة خطوتي بالعافية، وقع قدامي تعبان كبير.. من الخوف جريت بسرعة، بس حاسة انه بيجري ورايا، لحد ما وصلت لمكان عالي..فضل التعبان يقرب مني لحد ما وقعت من فوق.. قُمت من النوم مفزوعه.. حمدت ربنا انه مجرد حلم.. استعذت بالله وخرجت عند امي.. لقيتها بتجهز الفطار، ماكنتش قادرة اكل من تعب معدتي.. الفترة اللي فاتت مفيش اكل بيتعمل غير لما بلاقيه مليان دود..

في الوقت ده رن تليفوني.. كانت انجي بتصرخ وبتبكي :

-ياسمين ماتت يا سندس، راحوا يصحوها لقيوا سريرها غرقان دم وميته.. وانا بموت كل لحظة، بقيت بشوف اخويا في كل مكان في البيت، مش سايبني في نومي ولا وانا صاحية.. روحي للعرافة يا سندس، ارجعيلها احنا اتصابنا بلعنة… لعنة مش هتسيبنا غير واحنا في القبر.

فعلا روحتلها مكان ما هي موجوده.. لقيتها قاعدة قصاد البحر بنفس شكلها وهيئتها، وقفت قصادها ولقيت الكلام بيطلع مني بدون ما اتردد في حرف :

-انا آسفة يا ست ميمونه.. ارجوكي نفسي أكل وانام.

ردت عليا وهي بتضحك..

-الخوف اللي جواكي هو السبب، السر اللي مخبياه هو اللي معذبك مش انا، زيك زي اصحابك، اللي قاتلهم جواهم.. اسرار النفس بتعذب اكتر من كلام العرافين، ارجعي مكان ما جيتي، مالكيش معايا لا عتاب ولا قول..

افتكرت للحظات، لما شوفت امي وانا صغيرة، بتحط حاجة في طبق الاكل بتاع بابا، بعد ما خناقة كبيرة بينهم، قالها فيها انه اتجوز واحدة تانية، وبعد ما بابا خلص اكله بساعات مات، ما قدرتش اتكلم ولا اقول اللي شوفته، والا كنت هخسر امي زي ما خسرت ابويا، بس فضلت بعقدة ذنبه لدلوقتي..

ماردتش علي كلام العرافة وسبتها ورجعت، حجزت عند الدكتور النفسي، اللي لحد دلوقتي بتعالج عنده انا وصحبتي انجي، ولحد دلوقتي.. مش عارفه، ياتري اللي حصلي انا واصحابي لعنه العرافة فعلا؟.. اللي قدرت تدخل عقولنا، ولا بير الأسرار اللي مصدق حد قرب منه.. فجاب كل اللي جواه.

العرافة_ميمونة

لمياءالكاتب