قصه العفريتة كامله

النهاردة اليوم كان هادي، فاشترينا أكل من برة وقعدنا عشان ناكل، لكن.. لكن انا طول ما انا قاعد كنت مش مرتاح!.. كنت حاسس إن في حاجة عند ضهري من تحت، حاجة جوة الهدوم او العفريتة اللي انا لابسها!

استأذنت من العمال اللي كانوا قاعدين بياكلوا معايا وقومت.. دخلت الحمام وقفلت الباب ورايا، وبسرعة قلعت العفريتة عشان اشوف بقى ايه الحاجة اللي في ضهري دي، وساعتها اتفاجأت.. العفريتة فيها جيب داخلي.. او هو مش جيب بالمعنى الحرفي، هي فتحة صغيرة، من خلالها مديت إيدي بين البطانة الداخلية والقماشة الخارجية، وساعتها كانت المفاجأة الأكبر.. العفريتة كان جواها كيس بلاستيك صغير جواه حاجة مش عارف هي ايه.. بس ازاي ده، انا ازاي ماخدتش بالي من الكيس ده امبارح، ولا هو ماكنش موجود من اصله واتحط لي، ولا كان موجود من امبارح وانا عشان ماقعدتش فماحستش بيه!… وارد برضه، لا وارد ايه، ده أكيد.. أكيد انا ماحستش بالكيس ده إلا النهاردة لما قعدت، بس مش مهم حسيت بيه امتى وازاي، المهم دلوقتي إن انا اشوف الكيس ده جواه ايه!

طلعت الكيس من خلال الفتحة، كان كيس أسود صغير ومربوط، لما فتحته وفكيت الربطة بتاعته، لقيت جواه مُفكرة جلد شكلها غريب، عارف انت المُفكرات الصغيرة اوي دي اللي بيبقى الورق جواها وغلافها الجلد مغطي الورق كله، اهي هي دي بقى نفس المُفكرة اللي لقيتها!

فتحت الغلاف الجلد الاسود بتاعها وابتديت اقرا اول صفحة، الكلام كان صغير لأن ورق المُفكرة اصلًا صغير، وبالرغم من كل ده، إلا إني جَمعت اول كام جملة من أول صفحة..

(يوميات سعد راتب)

استغربت لما قريت الأسم وقولت بصوت مسموع..

-سعد راتب!.. مين سعد راتب ده؟!

وقبل ما اقلب الصفحة واقرا اللي في الصفحة التانية، سمعت باب الحمام بيخبط ومعاه صوت واحد من العمال بيقول بصوت عالي..

-ايه يا محمود.. انت نمت جوة ولا ايه يا عم، عاوزين ندخل الحمام بعد الأكل عشان نشوف اشغالنا، ما تنجز ياعم.

طبقت المفكرة وحطيتها جوة الكيس، بعد كده حطتها في جيبي وانا برد عليه بصوت عالي..

-حاضر.. انا خلصت وخارج اهو.

خرجت بعد ما داريت المُفكرة واتعاملت عادي، وطبعًا طول اليوم كنت مش مركز بسبب اللي لقيته، وفضلت متشتت لحد ما الوردية خلصت ودخلت غيرت هدومي وروحت، وطبعًا قبل ما اقلع العفريتة والبس هدومي اللي هَروح بيها، خدت منها الكيس اللي جواه المُفكرة وحطيته في جيب بنطلوني، وفضلت المُفكرة في جيب بنطلوني لحد ما روحت، وبعد ما وصلت المنطقة واطمنت على جاد اللي والدته قالتلي إن الدكاترة قالوا إنه فعلًا مصاب بالفيرس اياه، وهيتعزل اسبوعين في البيت، وكمان بعد ما كلمته على الموبايل واطمنت عليه، طلعت شقتي.. غيرت هدومي وفضيت جيوبي وطلعت الكيس اللي جواه المُفكرة، فتحتها بسرعة وقعدت في الصالة وابتديت اقرا من تاني صفحة…

(الأسم/ سعد راتب ابو الرووس.

السن/ ٣٠ سنة.

الإقامة/ محافظة الجيزة.. قرية “كذا”.. شارع “كذا”.. العمارة رقم ٣ الدور التاني.

المهنة/ ميكانيكي

الحالة الاجتماعية/ متجوز وعندي ولد وبنت)

ولحد هنا خلصت الورقة دي!

بصيت في الورقة اللي قصادها وانا بقول لنفسي بصوت عالي..

-ايه ده ياعم ده.. دفتر يوميات ده ولا بطاقة رقم قومي!

ركزت في الورقة التالتة اللي قريت فيها الأتي…

(بكتب يومياتي او حكايتي لأنها من اكتر الحكايات اللي لازم تتكتب، انا لما اموت، سيرتي ماينفعش تموت من بعدي.. انا اتعاملت معاهم وشوفتهم وكمان سخرتهم، لا وكمان عملت معاهم عهود وخلوني بقدر اعمل اللي مافيش بشر يقدر يعمله، وبصراحة.. كل ده كان بفضله، عم راغب)

ولحد هنا بتخلص الورقة دي، الورقة اللي مع نهايتها قلبت بسرعة عشان اكمل قراية…

(البداية كانت من اليوم اللي جه فيه المركز عشان يصلح عربيته، راجل كبير في السن، عنده عربية قديمة، انا اللي اشتغلت فيها، وفي وقت ما كنت شغال وهو قاعد قصادي، أخدنا وادينا في الكلام، اتصاحبت عليه، خدت رقمه وخد رقمي.. ومن اليوم ده واحنا بقينا قريبين من بعض اوي، زورته، روحتله بيته، ماكنش عنده لا عِيلة ولا زوجة ولا عيال.. راجل عجوز مقطوع من شجرة، بس الحاجة اللي ماكنتش فاهمها لما كنت بروحله بيته، إن الناس كانوا بيقولوا له يا شيخ راغب!.. وطبيعي يعني سألته عن لقب المشيخة اللي هو واخده ده، وجاوبني.. الشيخ راغب ورث عن ابوه اللي ماخلفش غيره مهنة السحر، ولما بقول السحر، فانا مابقصدش الدجل والنصب، انا اقصد السحر اللي بجد، وكمان ورث كتاب تحضير قدر يسخر عن طريقه جن.. اتخضيت من كلامه وخوفت منه، لكنه حاول يطمنني لما قال لي إنه ماعندوش عيال، وده لأن اللي عامل معاهم المعاهدة، شرطهم إنه لا يتجوز ولا يخلف، وألا هيقلبوا عليه وهيموتوه، يعني بيعتبرني زي ابنه وعمره ما هيأذيني… والحقيقة انا مافهمتش هم قالوا له كده، بس هو فهمني لما قال لي إن الجن اللي حضره ده، هو والخدام اللي معاه، كان ده شرطهم عشان يبقوا تحت طوعه، وكمان عشان لو مات يقدروا يتحرروا وماحدش يورث العهد بتاعهم منه!.. برقت له وانا مذهول، ووسط ذهولي واستغرابي سألته عن انواع الجن، وسألته كمان عن أن كلهم لو اتعمل معاهم معاهدة، هل كلهم ممكن يمنعوا الجواز والخلفة!.. هز لي راسه بالنفي وقال لي إن دول الخدام اللي ورث تحضيرهم من ابوه اللي مات وسابه للدنيا من وهو لسه شاب صغير، ماكملش ال ١٥ سنة، يعني ماكانلوش اختيار في نوعية الجن اللي بيتعامل معاهم.. هم حضروا اول ما فتح الكتاب لأنهم اصلًا كانوا بيخدموا ابوه، ولما حضروا قالوا له إنهم هيكملوا العهد معاه، على شرط واحد.. وهو إنه يحررهم، وتحريرهم ده مش هيحصل إلا لما نسله يتقطع خالص، وألا.. وألا بقى هيموتوه وهيمثلوا بجثته زي الناس اللي بتموتهم النداهة ولا عفريتة الغيطان!.. مافهمتش كلامه اوي، بس انا كان كل اللي شاغلني وسألته عنه.. هو إن انا لو حضرت جن وبقى تحت طوعي، ممكن ياخد عليا عهد بحاجات انا مش حاببها ولا عايزها؟.. كان بيسمعني وهو بيبتسم، وبعد ما خلصت اسئلتي جاوبني بكل صراحة وقال لي اه.. الجن بيكون له شروط وطلبات عشان يفضل تحت طوع اللي بيحضره، بس مش كل الطلبات زي بعضها، يعني مثلًا هم لما حضروا على ابوه بعد ما ورث العهد من جده، قالوا له مايخلفش إلا ولد واحد، اللي هو عم راغب يعني.. وفعلًا الراجل نفذ كلامهم، ولما حضروا لعم راغب، طلبوا منه إنه لا يتجوز ولا يخلف، وبرضه نفذ كلامهم، وده معناه إن الجن ده وخدامه وعشيرته، عهدهم هيتفك مع موت راغب.. بس لو اتحضر جن جديد بخدام وعشيرة جديدة عشان يخدموا بني أدم، أكيد العهد هيبقى مختلف.. لما وصل راغب للحتة دي عينيا لَمعت، ومن غير أي تردد طلبت منه يعلمني طرق تحضير الجن ويعرفني اساميهم وطباعهم، والراجل بصراحة ماتأخرش.. علمني كل حاجة، وبعد ما علمني، قال لي ما اتصرفش باللي اتعلمته غير بعد ما هو يموت واورث منه الكتاب وبيته ومهنته، وكمان حذرني من جن معين مذكور طريقة تحضيره وطريقة عمل المعاهدة معاه في الكتاب، ولما سألته عن سبب التحذير، قال لي إن الجن ده واحد من مساعدين الملوك السبعة السفليين، يعني مشزي الجن اللي معاه، مابيبقاش تابع لبني أدم.. ده بيخلي البني أدم تابع لِه، ولما بيحضر على أنسي، بيسري في دمه وبيفضل مُتحكم فيه لحد ما يموت، بس في المقابل بيديله قدرات مايقدرش يديهاله أي جن تاني.. لما سمعت الجملة الأخيرة دي منه، سألته عن معنى كلمة بيسري في دمه، لكنه ماجاوبنيش، ده اتعصب وقال لي إنها مذكورة في الكتاب كده، وإن ممنوع تحضير الجن ده لأنه فعلًا خطر.. ومن اليوم ده لحد ما مات عم راغب وانا فضلت اسمع كلامه، فضلت اسمعه بس لحد ما مات، اما من بعد موته بقى، فانا مافتكرتش أي حاجة من اللي قالها غير البيت اللي نقل ملكيته بأسمي قبل ما يموت، والكتاب اللي جواه.. الكتاب اللي بسببه بعد ما دفنت راغب وخدت عزاه، طلعت جري على البيت وفتحته، ايوه.. اللي بتفكر فيه صح.. اول صفحة فتحتها هي بتاعت الجن إياه، فتحتها وحفظت صم طريقة تحضيره وطريقة عمل المعاهدة معاه، وكمان بدأت انفذها..)

لما وصلت لحد الحتة في اليوميات، ووسط تقليبي في الورق.. حسيت بحاجة غريبة اوي.. هوا سخن ماعرفش جه منين وخبط في وشي عشان في ثانية، في ثانية واحدة الدنيا اسودت من حواليا، وفي ثانية كمان، المشهد من حواليا اتبدل.. انا ماكنتش قاعد في شقتي، انا لقيت نفسي في أوضة غريبة، وقصادي بالظبط، كان قاعد شخص على كرسي، قصاده مبخرة صغيرة جواها فحم مولع، طلع من كيس جنبه حاجة ورماها فيها، دخان المبخرة ابتدى يعلى، وساعتها الراجل طلع من جنبه على الأرض، حيوان ميت.. لا لا، ده مش أي حيوان، دي كانت قطة سودة ميتة، كانت بالتحديد مدبوحة والدم بيسيل من رقبتها، قربها من المبخرة الصغيرة اللي كانت مفتوحة، نقط من دمها نُقط جوة المبخرة، واول ما عمل كده.. الدخان ابتدا يعلى، ومعاه، مسك الشخص ده كتاب وقرا منه بصوت عالي…

(أيها الحارس ظام.. يا من تمردت على عهد سليمان، يا خادم الملك الأبيض ميمون، أدعوك للحضور إلى جلستي.. حُطير حُطير، عطياءيل عطياءيل، بالموش بالموش، دملاخ دملاخ، مغياب مغياب، تغياب تغياب.. أحضر بقوة تلك الأسماء وتجسد أمامي في الحال والساعة)

بعد ما خلص قراية، حسيت أن جسمه بيترعش وعينيه شكلها بيتغير.. لونها بقى أبيض تمامًا وابتدا يزوم زي القطط، وفي نفس الوقت، المبخرة دخانها بقى أعلى وخرج منها نار قوية، ولدقيقة.. كل حاجة وقفت.. سكون تام، لا صوت ولا حركة، زي ما يكون الزمن وقف، الراجل ثابت في مكانه، ودخان المبخرة والنار هم كمان ثابتين.. بصيت حواليا وانا كل حتة في جسمي بتترعش، ولو هتقولي سبب الرعشة دي ايه، هقولك إن انا حسيت بحركة من ورايا، أصوات خطوات ومعاها أصوات حفر.. ومش أي حفر، دي نفس الأصوات اللي سمعتها في القبر، أصوات حوافرهم اللي كانت بتشق التراب ومعاها أصوات صرخات.. لفيت بالراحة وانا بدعي إن توقعي يكون غلط، بس لا.. انا اللي حسبته لقيته، نفس المخلوقات او الشياطين الصغيرة دي كانوا موجودين ورايا، ومن وسطهم ظهر هو.. قط لونه أسود، مختلف عن القط المدبوح اللي شوفته من شوية، حجمه أكبر، مش بس اكبر من القط المدبوح، لا ده أكبر من أي قط ممكن اكون شوفته في حياتي.. كان بيتمشي وسطهم وهم بيوسعوا له لحد ما قرب مني، واول ما وقف قدامي، حجمه بقى اكبر.. وفضل يكبر ويكبر عشان فروته تتشقق وجسمه حرفيًا يتقسم نصين، وفجأة خرج منه نفس الجن او المخلوق اللي صرخ في وشي في القبر!

ماهتمش لوجودي على عكس المرة اللي فاتت، ده عدى من جنبي وراح ناحية الشخص اللي قاعد قدامي، الشخص اللي عرفت اسمه اول ما اتحرك زي ما كل حاجة اتحركت.. بص للجن ده بانبهار وعيونه لسه بيضا تمامًا وقال له بصوت بيترعش..

(أن.. أن. أنن. أنت ظام؟!)

رد عليه بلغة عربية وبصوت رفيع ممزوج بصوت قطط…

(سعد بن راتب وفوزية.. دعوتني ف لبيت.. ما طلبك؟!)

(العهد.. العهد والخدمة)

اول ما قال له كده، طلع من جنبه سكينة عَور دراعه بيها، وبمجرد ما دراعه ابتدا ينزل دم، قربه من المبخرة وهو مُبتسم عشان الدم ينزل على النار ويقلل من لهيبها..

(وده.. دمي، دمي وعهدي معاك.. طلباتك لأتمام العهد؟!)

رد عليه الجن ظام وهو مديني انا ضهره ومدي لسعد وشه..

(سَتُصبح خادمي، وسأجري بين عروقك مجري الدم، وعند وفاتك.. دمك سينقل العهد، اما عما سأقدمه، فلك كل الأسحار والأعمال، ولك ما تطلب من بنات الأنس، أما انا.. فلي خِدمتك وطاعتك، طاعة العبد لسيده.. اركع)

قام سعد وقف وانحنى قصاد ظام، ولحظة خضوعه لظام، اتبدل المشهد تمامًا لما هَبت ريح حرارتها خلتني غمضت عيني وفتحتها من تاني، وبمجرد ما فَتحت، لقيت نفسي واقف في المركز اللي انا بشتغل فيه، لكن شكله كان أقدم شوية.. قصادي كانوا العمال رايحين جاين، ومن ضمنهم كان سعد.. سعد اللي كان لابس نفس العفريتة بتاعتي، ومرة واحدة وقف مكانه ومسك بطنه، كح بقوة.. مرة والتانية لحد ما صرخ ووقع على الأرض، الدم كان بيخرج من بوقه وبيغرق العفريتة، اما زمايله، فكانوا واقفين حواليه ومش عارفين يعملوا له أي حاجة، قربت منه وانا مركز في ملامحه، بص لي وشاور بإيده وقال بصوت مبحوح..

(العفريتة.. الدفتر.. اليوميات.. ظ.. ظظ.. ظام).. يُتبع