قصه القناع الابيض

قصه القناع الابيض كل حاجة في الحياة مسئلة وقت.. ده حتى الحياة نفسها مسئلة وقت.. الظلم والعدل.. النور والضلمة.. وهنا عشان كنت أوصل للحقيقة، فأنا احتاجت وقت.. ووقت كبير كمان.. بس قبل ما أوصل للحقيقة.. كنت محتاج في البداية أشك إنها حقيقة وبعد كده استنى إثبات أكبر يحركني.. وبعده، يبقى عندي يقين بيها، وفي النهاية أكشفها، بس أغرب الحقايق بتيجي دايمًا من أكتر نقطة عتمة.. والعتمة تَملي معروف إن لونها إسود.. بس عتمتي هنا كانت على العكس تمامًا، عتمة ناصعة البياض.. مستخبية ورا قناع خفي ظهر لنا فجأة من العدم، وبقى طليق وسط الناس، ممكن يكون صاحبه صديق مقرب ليك، أو جارك، أخوك يمكن.. عامل السوبر ماركت اللي على أول الشارع عندك، اما الحكاية، فالحكاية كلها بدءت ببلاغ بسيطوانتهى نهاية غريبة.

يومها استقبلنا بلاغ عن واقعة تعدي حصلت الساعة 3 صباحًا مع شاب عنده 29 سنة هو ومراته اللي عندها 25 سنة، وده وقت ما كانوا مروحين بعد خروجة لطيفة، الإصابات كانت عادية زي ما اتذكر في التقرير الطبي للمستشفى.. وعادية هنا يعني كانت عبارة عن كدمات وجروح قطعية في الوش ما بين متوسطة وبسيطة، واقعة بتحصل كتير.. راجل ومراته في عربيتهم بيطلع عليهم حد بيثبتهم ويسرقهم بالإكراه.. إنما اللي ما كانش عادي بقى، تفاصيل الحادثة اللي ذكرها الضحيتين في أقوالهم في المحضر، وده وقت ما سمعنا منهم في المستشفي..

– حمد لله على سلامتكم..

– الله يسلمك..

– ممكن تقول لي إيه اللي حصل معاكم بالظبط؟

– انا كنت راجع أنا ومراتي في طريقنا للبيت بعد ما دخلنا مسرحية واتعشينا في مطعم، ولما دخلنا من شارع الساحل.. ومنه على شارع جانبي.. كان الشارع ده هادي وضيق شوية بس مش مكسر.. المهم بعد ما دخلته لمحت صندوق واقع في نص الطريق.. ف نزلت شيلته وبعدها حصل اللي حصل..

– وإيه اللي حصل بالظبط؟

وحكى لي (أيمن) إنه مجرد ما نزل يحرك الصندوق، لقى حد من وراه مثبت حاجة على دماغه من ورا.. وبعد كده عرف إن الحاجة دي مسدس مزود بكاتم للصوت.. ووقت ما الشخص ده زقه ناحية كبوت العربية، كان بيقول لمراته بصوت واطي:

– انزلي من غير ما تفتحي بؤك.. انزلي بدل ما اخلص عليكم انتوا الاتنين.

وفعلًا مراته نزلت والخوف مالي عينيها لدرجة إن رجليها ما كانتش شيلاها.. ووقت ما وصلت عندهم.. الجاني خلى (أيمن) يلف هو كمان وبقوا هم الاتنين وشهم في وشه.

– طب.. ممكن توصف لي شكله؟

– ما شوفناش وشه.

– أكيد المكان ما كانش ضلمة للدرجة دي.. إنت قولت لي إنك شوفت الصندوق في نص الطريق، أول ما دخلت الشارع.

– ما شوفتوش علشان كان لابس قناع.. ماسك أبيض جلد.. مش باين منه غير عينيه وبشكل بسيط جدًا..

كلمة قناع دي خلتني اقف لثواني وافكر.. بس رجعت له على طول وقولت له:

– ماشي.. كمل..

– طلب مننا نطّلع كل حاجة معانا.. فلوس.. موبايلات، خلى مراتي تقلع دهبها.. وبعد كده حطيناهم على كبوت العربية.. وبعدها.. بعدها…

– بعدها إيه؟!

– شد أجزاء المسدس وهو بيبص لنا وطلع من جيبه كيس وطلب مننا إننا نجمع الحاجات بتاعنا ونحطها في الكيس.. ولما عملنا كده.. مسك الكيس وهو بيبص لنا وطوّح الكيس بإيده بعيد، وفجأة ضربني بكعب المسدس كام خبطة وأغم عليا..

تفاصيل عجيبة.. واحد عاوز يسرق بالإكراه.. الضحايا معاه في حتة مقطوعة.. معاه وقته.. ما استنجدوش بحد.. جمّع المسروقات بتاعته والضحايا مش هيقاوموه.. ليه يرمي كل الحاجة فجأة كده؟؟!!.. ما لو كان عاوز يقتلهم كان قتلهم.. شكيت في جزء كبير من كلام الزوج، بس لما سمعت من مراته، لقيتها ذكرت نفس الكلام بالمللي، لا دي كمان ضافت عليه بحُكم إن جوزها هو اللي اغم عليه الأول لما اتضرب، وبعد كده الجاني ضربها بنفس الطريقة، بس هي كان عندها جديد.. الزوجة لمحت الجاني وهو بيمشي وكان بيكلم نفسه بصوت مسموع شوية، لكنها وقتها كانت بدأت تغيب عن الوعي وما قدرتش تلقط منه أي كلام.. واختفى..

لما طلبت منهم ع الأقل يوصفوا هيئته إيه.. طوله.. عرضه.. أي حاجة مميزة، قالوا إن طوله تقريبًا 180 سنتي، رفيع شوية وكان لابس تيشيرت بكم اسود وبنطلون اسود.. ما قدروش يوصفوا اكتر من كده.. وكان اللي هيحسم شكوكي هي حاجة واحدة بس.. معاينة مسرح الحادثة، ودي يا إما هتأكد كلام (أيمن).. يا إما هتزود شكوكي فيه وتنقله لخانة المتهم والمخطط الأول للحادثة.. وده بقصد سرقة دهب مراته.. وخصوصًا لما سمعت منه إنه عنده بيزنس خاص، والفترة الأخيرة كان محتاج فيها سيولة وكان لسه بيفكر هيتصرف ازاي، يعني.. لازم احط كل السيناريوهات في دماغي في الشغلانة بتاعتنا دي.. المهم، حصلت المعاينة وكل حاجة حطوها جواه الكيس كانت موجود فيه وفي المنطقة اللي حصل فيها الواقعة.. وبمراجعة كاميرات المراقبة في المنطقة حوالين المكان، ما كانش فيه غير كاميرا وحيدة موجودة في شارع صغير متفرع من الشارع اللي فيه الحادثة.. وللأسف ما قدرناش نتحقق من أي حاجة من اللي اتذكرت، لعدم وضوح زاوية الرؤية، غير اننا شوفنا من بعيد لحظة هروب الجاني من المكان للحظات واختفى بعدها.. الكاميرا كانت في زاوية المكان اللي اتحدف فيه الكيس، وما حدش دخل الشارع الصغير ده غيرنا واحنا بنبحث حسب وصف الضحايا لينا.. وبكده يبقى الزوج ضحية فعلًا.. وبدأنا نحقق في الواقعة.. بس ده مستحيل يكون سلوك سارق بالإكراه، انا ما شوفتش حالة زي دي قبل كده.. وبعد ما فات شهر من البحث والتحريات.. للأسف ما وصلناش لجديد، والمحضر اتحفظ.. بس فضلت الحادثة شاغلة بالي، لحد ما حصلت واقعة تانية كبيرة شغلت كل وقتنا وأخدت مننا تحريات ومجهود كبير.. بس المرة دي كانت جريمة قتل.

بلاغ من فرد أمن لواحد من الأبراج السكنية بالعثور على جثتين جنب بعض، مضروبين بطلق ناري في منتصف الجبهة.. شاب عنده 24 سنة وبنت عندها 23 سنة.. لما انتقلنا لمسرح الجريمة أول حاجة وقعت عيني عليها، كانت أكبر صدمة مرت عليا طول سنين شغلي في المباحث.. ما فيش صدفة.. رسالة صريحة.. على قد ما هي واضحة.. على قد ما هي غريبة ومحتاجة أكتر من تفسير، والرسالة كانت بتقول لي.. إني غالبًا وبنسبة 90% هواجه قاتل متسلسل.. وهفهمكم ليه غالبًا مش أكيد.. والعلامة دي كانت عبارة عن إني لقيت قناع أبيض من الجلد محطوط على صدر جثة الشاب.

طبعًا النيابة حضرت والإسعاف، وتم نقل الجثتين على المستشفى للتشريح ومعرفة سبب الوفاة اللي ما اختلفش عن اللي ظهر لنا، ومن التحريات عرفنا إن الضحيتين زمايل في شركة واحدة وعلى علاقة عاطفية ببعض، وإنهم كانوا في السينما وحضروا حفلة 9 وخرجوا الساعة 12 ونص تقريبًا منها، واللي مكانها في واحد من المولات المشهورة واللي بينها وبين مسرح الجريمة تقريبًا عشر دقايق مشي.. أما بالنسبة لموضوع الشك مش التأكيد بإني بواجه قاتل متسلسل، فكان السبب إن الحادثة الأولى تعدي مش قتل.. والقاتل المتسلسل ما بيسيبش وراه أثر لحد يشوفه من ضحاياه، حتى لو ما شافش ملامحه.. الهيئة.. الطول بالعرض.. اللبس، إلا لو هو عاوز يقول حاجة.. ودي بتحصل في حالات نادرة.. بس تفسير إن الجريمة الأولى كانت تعدي والتانية قتل، إن القاتل صاحب القناع الأبيض.. كان لسه بيبدأ أول جرايمه.. هو مش عاوز يسرق.. هو حاول في المرة الأولى بس حاجة وقفته.. حاجة جواه منعته إنه ينفذ.. بس في المرة التانية كان واخد القرار ومش هيرجع عنه.. بس جه في بالي احتمال تاني، هل وارد إن يكون الموضوع في الجريمة التانية شخصي مش اكتر، والقاتل يعني استغل قضية التعدي اللي حصلت من مدة واتنشرت في الجرايد والسوشيال ميديا، وإن الجاني كان لابس قناع أبيض.. فجاب الفكرة من هنا لتنفيذ جريمته؟؟.. القناع.. المسدس.. كاتم الصوت، كل شيء وارد.. بس للأسف أنا كنت ميال للفرضية الاولى.. وحتى الحادثتين باختلاف نهاياتهم، كانوا ضحاياهم واحد وواحدة، وده عزز فرص الفرضية دي جوايا أكتر.. واستدعيت (أيمن).. ضحية الحادثة الأولى، استدعيته عشان أعرف منه حاجة واحدة.. هل القناع اللي لقيناه في الجريمة التانية، هو هو نفس اللي شافه على الشخص اللي اتعدى عليه هو ومراته، ولا ده قناع أبيض تاني.. وجواب (أيمن) أكد فرضيتي.. أنا بواجه قاتل متسلسل.. القناع الأبيض في الجريمة التانية هو القناع الأبيض في الحادثة الأولى بالظبط.. بس في الجريمة التانية القاتل كان واقف مستني وسط جنينة صغيرة.. وأول ما ضحاياه قربوا من مكانه، من غير ما يشوفوه، خرج عليهم من غير كلام ومن مسافة قريبة ضرب طلقتين ما جلوش، وخرّج من شنطة صغيرة على كتفه قناع تاني غير اللي لابسه، وسابه فوق الجثة واتحرك بسرعة.. ده اللي ظهر في كاميرا مراقبة لواحد من المحلات في المكان.. ومن تصوري للي حصل، إن القاتل كان متواجد مع الضحايا في السينما أو بالقرب منها.. مراقب الناس بشكل عام.. مستني حد يقرب من نقطة ميتة.. شارع ضلمة مافيهوش حد.. ولقى الاتنين دول، فنفذ جريمته وهرب.

ولحد هنا خليني اقولك حاجة مهمة، انا اتعلمت من زمان على إيد واحد من الظباط اللي اشتغلت معاهم في بداياتي.. إن ما فيش حاجة اسمها ما فيش طرف خيط.. مهما كانت الجريمة متكاملة، لازم يكون فيه حاجة تمشي وراها.. عمر العروسة الماريونت ما هتتحرك لوحدها.. لازم خيط.. ممكن تكون مش شايفه.. الصح أصلًا إنك ما تكونش شايفه.. بس ده ما يمنعش وجوده.. بص كويس، ولما بصيت كويس لقيت الخيط الوحيد اللي ممكن أخليه في حسباني ولو مؤقتًا.. وهو القناع الأبيض نفسه..

تصميم القناع كان معمول مخصوص.. مش شبه أي ماسك الواحد شافه أو مستوحى من حاجة معينة، الخامة كويسة.. التقفيل محكم جدًا.. شغل بروفيشنال.. يعني حاجة كده نفس جو أقنعة لاعيبة المصارعة.. دي نقطة في الوقت الحالي تبدو ضعيفة.. بس قدام هتفيدني.. ولو ما فادتنيش، فمش هتتوهني.. وكملنا شغلنا.

قدر الإمكان شددنا مراقبات على أغلب الشوارع المشابهة للشارعين اللي تمت فيهم الحادثتين.. وخصوصًا في فترات الليل اللي حصل فيهم الواقعتين، وركزنا ع الشوارع اللي الرِجل عليها خفيفة.. اتنصبت كماين بالجملة.. وبرضه ما فيش حاجة واضحة.. تحريات أكتر كلها خدتنا للعدم.. ما فيش معانا أي حاجة تخلينا نتحرك بشكل قوي ومباشر.. الفكرة إني بتعامل مع شخص من طراز فريد.. تركيبة عجيبة.. ده مش شخص مجرم بطبعه.. بس واضح إنه ذكي جدًا.. وده بان في إنه ما سابش وراه في المرتين أي علامة أو أثر.. مش بس كده، ده بعد تلات أسابيع بس ضرب ضربته الجديدة.. بس شكل مختلف وأكتر احترافية وأصعب في التنفيذ.

بلاغ جديد بالعثور على شاب اسمه (كمال) بيبلغ من العمر 32 سنة، ومراته (سمر) اللي عندها 28 سنة بعد إطلاق النار عليهم، على واحد من الطرق السريعة وقت ما كانوا راكبين موتوسيكل، وعلى طول اتحركنا على موقع الجريمة..

لما وصلنا كانت الإسعاف هناك واتبلغنا إن (كمال) توفى في الحال، أما (سحر)، فلسه فيها الروح، لكن إصابتها كانت خطيرة.. الطلقة جات في الرقبة من الجنب الشمال، وعرفنا إنهم كانوا في زيارة عائلية عند أهل الزوجة وخلصوا سهرتهم واتحركوا في الطريق، وكانوا مروحين بيتهم ووقتها حصلت الجريمة، ولاحظت حاجتين أغرب من بعض.. أول حاجة، الزوج والزوجة كان مكان سقوطهم مختلف.. وفقًا لحركة الطريق اللي جايين منه ونقطة وصولهم.. يعني الزوجة اتضرب عليها نار الأول من وضع حركة من الجنب الشمال، والطلقة استقرت في الرقبة، وفي لحظتها وقعت من ع الموتوسيكل وده يفسر الكدمات والسحجات اللي في جسمها، بعدها توازن الزوج اختل بالموتوسيكل فكمل قدام شوية لحد ما اتقلب بيه ووقع، وده برضه يفسر الإصابات اللي كانت في الجثة من أثر السقوط.. وبما إن الطلقة القاتلة للزوج، كانت في منتصف الجبهة، وما فيش أثار كاوتش زيادة في نفس المكان اللي الموتوسيكل وقع فيه، فده معناه إن القاتل نزل على رجليه ووقف قدام الضحية وهو مرمى على الأرض وضربه من وضع مواجهة.. وبعدها أخد قناعه الأبيض وعلقه على فرامل الموتوسيكل ومشى، أما الحاجة التانية، فكانت أول طرف خيط جديد..

المكان اللي (كمال) وقع فيه بالموتوسيكل كان على جنب الطريق وفيه جزء تراب.. وهنا، غلط القاتل أول غلطة.. أثر الحذاء اللي كان لابسه علم في الأرض.. أه كان فيه أكتر من أثر أكيد، وده من الناس اللي بلغت.. بس انا عرفت أميز علامته، لأنه لما ضرب النار على (كمال) رجع يبص تاني على (سمر) اللي كانت واقعة على جنبها.. فعلشان يعدلها زقها، برجله عشان يقلبها على ضهرها، ولما بص لها، افتكر إنها ماتت ورجع بعدها حط القناع الأبيض على فرامل الموتوسيكل واتحرك.. وبكده أثار الحذاء اللي على الچاكت بتاع (سمر) بترجع للقاتل، وهنا كان كل أملي إن (سمر) تفوق أو حالتها تتحسن بعد العملية اللي قدروا يخرجوا فيها الرصاصة.. اصل أي تفصيلة هسمعها منها ممكن تساعدني وتقْلب كل حاجة.. بس للأسف كانت في غيبوبة والغيبوبة طولت، وطبعًا عَيننا عليها حراسة في المستشفى.. لكن الحالة فضلت زي ما هي يوم ورا التاني.. واسبوع.. وشهر.. وبعد كده كنا وصلنا لأكتر يوم مرعب كنت خايف منه وعاملين له مليون حساب..

يوم خميس، وكان موافق يوم الفلانتين.. ما خلاص.. الكل اتأكد إن السفاح ده حد بيستهدف المرتبطين، أي كابلز في مدينة السفاح، فهما في خطر.. كلنا كنا متوقعين ان فيه حاجة هتحصل في اليوم ده.. ده أكتر يوم هيكون فيه الشخص ده هيكون دموي.. فعملنا خطة تأمين ما تخرش الماية.. زرعنا في كل الأماكن الممكنة أشخاص تبعنا مع تنبيه صريح وأمر بالتعامل المباشر بالتعجيز الفوري، لو ظهر القاتل في أي مكان وحصل منه أي رد فعل هجومي.. كنا في حالة طوارىء.. حملات تفتيش مستمرة ودوريات في الشوارع كلها.. اما هو، فمواعيد جرايمه بتكون في أول ساعات منتصف الليل تقريبًا، والبلاغات بتيجي في حدود ساعتين تلاتة بالكتير بعد أي حادثة، الساعة 3 عدت علينا.. وعدى الفجر.. والنهار طلع وما استقبلناش أي بلاغ.. وكل الأمور هادية واليوم عدى بسلام، بصراحة كنت مستغرب جدًا.. بس قولت إنه كان قريب مننا أكيد.. ومن ذكاؤه قدر يقرأ المشهد ويعرف إن الكماين منصوبة له.. بس هو كان ذكي جدًا.. أذكى مما توقعت.. وأخطر من الشيطان نفسه.

اللي حصل في اليوم ده عمري ما هنساه.. لا أنا ولا غيري.. علشان الضربة اللي حصلت فيه برجلت كل الحسابات.. آسف.. الضربات اللي حصلت فيه.. 3 جرايم قتل راح ضحيتهم 6 أشخاص، وفي التلات مواقع الخاصين بالجرايم.. كان موجود.. القناع الأبيض.

يتبع

(ده الجزء الأول من قصة القناع الأبيض.. القصة مستوحاه من جريمة حقيقية وهي من كتابة مشتركة بين صديقي واخي، الكاتب تامر عمر والعبد لله..