قصه الكارافان

قام استكانة وقف قدام القهوة، اما انا، فخرجت وقفت برة لحد ما نشأت جه، طب مين نشأت ده؟.. نشأت ده اكبر مني في السن، مش اوي يعني، هو اكبر بحوالي عشر سنين كده، وهو الراجل المسؤول عن نقل معدات اللوكيشن، يعني ببساطة كده، هو اللي جاب المعدات والكرافانات دي للمكان، وفي نفس الوقت، هو اللي بيجي هنا كل كام يوم بعربية نقل، عشان يجيبلنا ماية نضيفة نشرب منها، وفي الوقت ده كان جاي عشان يجيبلنا خزان ماية مليان، وبعد كده ياخد الفاضي ويرجع بيه.. بس نشأت بعد ما جه ونزلت معاه الخزان انا وشوية من اللي في اللوكيشن، وبعد كده حطينا القديم في العربية اللي جاي بيها، وقف معايا شوية وولعنا سيجارتين، ووقت ما كنا واقفين، بصيت ناحية الكارافان اللي فيه البوفيه وقولتله بصوت عالي..

-ألا قولي يانشأت، هو الكارافان ده وراه ايه؟!

بص للكارافان وبعد كده بص لي..

-مش فاهم؟!.. يعني ايه وراه ايه؟!

-يعني.. اقصد حكايته ايه، جه منين، اصل انت قديم في الشغلانة وانا عارف ان الكرافانات دي كلها بتيجي عن طريقك وعلى يدك.

-ماشي، ماختلفناش، بس بتسأل ليه برضه؟!

-بسأل عشان وانا والواد استكانة ماعرفناش ننام فيه ليلتين على بعض.. وبقولك ايه من الاخر كده، الكارافان ده مسكون يانشأت، صح؟!

اتنحنح وبعد كده نفس من سيجارته وسكت!

ف بصيتله باستغراب وزقيته في كتفه..

-ما تنطق ياجدع.

-ما انا بصراحة كده خايف احكيلك، لا تبطل تنام فيه.

-لا ماتقلقش، من الناحية دي اطمن، انا واستكانة بقينا ننام في كارافان معاذ المصور.. فماتقلقش علينا، كده كده اللي هتحكيه مش هيغير حاجة، انا بس عاوز اعرف حكايته ايه من باب العلم بالشئ، مش اكتر يعني.

-فل.. انا هحكيلك.. الكارافان ده اصلًا ماكنش كارافان، هو كان عربية خردة اشتراها واحد حبيبي بتاع خردة، ولما في يوم كنت عنده وشوفتها، اشتريتها منه بسعر رخيص وقولت ادورها في الشغلانة بتاعتنا، بس قبل ما اشتريها، سألته على اصلها وفصلها، والشهادة لله، الراجل حكالي كل حاجة عنها وعن تاريخها.. العربية دي اصلًا كانت عربية ساندوتشات، وصاحبها بقى الله يرحمه، كان من منطقة شعبية اه، بس كان بيقف بيها في مناطق راقية وكان بيبيع ساندوتشاته للناس العليوي، وفي يوم من الايام، الناس لقوا العربية راكنة مكان ما بيقف يبيع الاكل اللي بيعمله، ودي مش من عادته، ده الراجل كان بعد ما بيخلص، كان بيسوق العربية وبيركنها في جراج، لا والغريب كمان ان الناس لقوا العربية مقفولة ونازل منها دم!.. وقتها الناس اتلموا واتصلوا بالحكومة، ولما الحكومة جت وفتحت العربية، لقوا الراجل مقتول جواها، كان متشرح والدنيا حواليه متكركبة، بس لما شالوا الجثة وابتدوا يحققوا، عرفوا ان اللي عمل فيه كده واحد صاحبه، وصاحبه ده كان بيخونه مع مراته، وتقريبًا كده اتفق هو وهي انه يقتله ويتجوزها، بس طبعًا مالحقش.. مالحقش لإن الحكومة قبضت عليه وكمان قبضت عالولية، وبعد ما اتقبض عليهم واتحاكموا، هي اتحبست، وهو اتعدم، والعربية خدوها الورثة وباعوها خردة، وانا في الاخر اشترتها من الراجل بتاع الخردة وجددتها وقلبتها كارافان بوفيه ودخلتها مفرمة الشغلانة.. ادي ياسيدي كل الحكاية.

بعد ما خلص نشأت كلامه، بصيتله بغيظ ورميت السيجارة ومسكت فيه..

-ولما هو الكارافان اصله كده، ماحذرتنيش ليه من الأول ياعديم الدم والاحساس.

زق ايدي وبعدني عنه..

-وانا كنت اتنيل اعرف منين انك هتشوف اللي شوفته ده، وبعدين انا ايش دراني ان هيطلع جواه عفريت الراجل اللي اتقتل، دي اول مرة اصلًا انزله في شغل… ثم انت زعلان اوي كده ليه، ما سهلة ياعم، لو بالليل بيطلع فيه عفريت، ماتباتش فيه، اشتغل فيه بالنهار، وبالليل اعمل زي ما عملت كده انت والواد اللي معاك، بات في اي كارافان تاني.

وقبل ما ارد عليه واشتمه واكمل خناقتي معاه، نده عليا المخرج وقالي انه عاوز قهوة، ومع نظاراتي ناحية المخرج، نشأت جري من جنبي وراح ركب عربيته ومشي.. مشي وسابني في حيرة وقلق من بعد اللي سمعته، لكن لا.. انا مش هدخل الكارافان ده تاني بالليل مهما حصل، وحتى لو دخلته بالنهار، فانا مش هدخله لوحدي، انا هدخله مع استكانة اللي برضه مش هحكيله على اللي عرفته من نشأت، ده اللي عرفته ده هيفضل سر جوايا لحد ما نخلص ايام التصوير ونرجع على بيوتنا، وساعتها بقى يبقى يحلها الحَلال… اه، ما انا مش هخوف استكانة اكتر ما هو خايف ولا هعمل فوضى في المكان.. انا هفضل ساكت لحد ما الفترة دي تعدي على خير.. واللي قولته بيني وبين نفسي حصل.. اشتغلت يومها طول النهار وانا مخلي استكانة واقف معايا، وبعد ما اليوم خلص، وقبل ما نروح ننام، وقفت برة، جنب باب الكارافان وقولت لاستكانة بصوت عالي وهو جوة..

-انجز يلا ياابني عشان نروح نتخمد، وماتنساش بعد ما تخلص الكوبايات، تأمن عالبوتجاز كويس.

رد عليا من جوة وهو بيتكلم بصوت عالي..

-ماتقلقش ياعم تلقيمة، كله تحت الكنترول على رأي بابلو.. روح انت نام وانا هروق الدنيا واحصلك.

-لا.. انا مستنيك اهو لحد ما تخلص وتأمن عالدنيا وتطفي النور، وبعد كده هنمشي سوا.

-ماشي.. اللي تشوفه ياعم الناس.

وبعد ما استكانة خلص، طفى النور ونزل من الكارافان وقفل بابه وروحت انا وهو لكارافان معاذ، وهناك، قعدنا نرغي شوية احنا التلاتة لحد ما غلبنا النوم ونمنا، لكن انا اول ما نمت، صحيت على صوت تزيقة باب.. ايه ده!.. ده باب الكارافان!

فتحت عيني وبصيت ناحية الباب، وساعتها اتفاجأت وفي نفس الوقت اتفزعت، اللي انا فيه ده ماكنش كارافان معاذ، ده كان نفس الكارافان بتاعي بس شكله متغير، فيه بتوجاز كبير وانبوبة حجمها اكبر، لكن مش دي المصيبة، انا المصيبة الكبيرة اللي فزعتني اكتر، كان المنظر اللي انا شايفه قدامي.. انا كان قدامي نفس الراجل اللي كنت بشوفه في كوابيسي وهو متشرح، بس المرة دي كان كويس وكان بيقفل باب الكارافان، وعلى يمينه، او بالقرب مني انا، كنت شايف شخص تاني قاعد وباصص له، والشخص التاني ده، بص له باستغراب وهو بيقفل الباب وقاله..

-انت بتقفل الباب ليه ياعوض؟!

-عشان السقعة وعشان نشرب السيجارتين على رواقة.

-واحنا هنشرب السيجارتين هنا؟!

جاوبه عوض وهو بيروح ناحية مكان ما في الكارافان وجاب منه سكينة كبيرة..

-اه.. هنشربهم هنا، ولا تحب نروح نشربهم في البيت عندي عشان تشوف حبيبة القلب؟!

اتخض الراجل من كلام عوض ورد عليه بصوت مهزوز..

-ان ان ان.. انت بتخرف بتقول ايه؟!

-بخرف برضه، ولا بصارحك بوساختك ووساختها ياانجاس؟!

ارتجف الشخص التاني وقام وقف وهو بيرد على عوض…

-انت هتعمل ايه ياعوض؟!

-هقتلك.. هقتلك يامرعي وهوسخ الارض بدمك زي ما وسخت سمعتي.. وبعد ما اقتلك، هروحلها وهقتلها هي كمان.

-لا لا لا.. بقولك ايه، اعقل يامجنون.. سيب السكينة اللي في ايدك دي وخلينا نتفاهم بالعقل… انا… انا مراتك دي تبقى اختي.

-اختك!.. وهو في اخت برضه بتبعت لاخوها صورها بقميص النوم على الواتس!.. مالك اتفاجأت كده ليه، ايوه انا فتحت تليفونها وشوفت المحادثات اللي بينكوا يااوسخ خلق الله، وايوه يامرعي انا خليتك تيجي هنا عشان اعملك كمين واقتلك واتاويك في حتة مقطوعة.. او.. او ممكن ارميك لكلاب السكك ينهشوا في لحمك بعد ما تموت.

لما عوض قال لمرعي كده، مرعي اتغير، ملامحه اتبدلت من الخضة للتحدي، وبحركة اندفاعية قرب من عوض وهو فارد صدره..

-ومين قال إن انا اللي هموت الليلة دي.. مش جايز انت اللي تموت؟

وبدأت الخناقة ما بينهم، خناقة من غير صوت، زق وشد وجذب للسكينة من الاتنين، وفي النهاية، قدر مرعي ياخد السكينة لانه اقوى من عوض، ومع مسكته للسكينة، اتحول، بقى زي التور الهايج، فضل يلوش شمال ويمين لحد ما حرفيًا شرح عوض، وبعد ما شرحه ووقعه عالأرض، قرب منه وفضل يطعن فيه ب غل وكره لحد ما قطع النفس خالص، وبعد ما مات، رمى مرعي السكينة وجري ناحية باب الكارافان وفتحه وخرج منه، وبعد خروجه، قفله تاني زي ماكان عشان يسيبني معاه.. اللهم صلي على النبي، انا وعوض المقتول بقينا لوحدينا.

لحظات من الصمت، القلق، الترقب للي هيحصل، وقبل ما افكر في اي حل اخرج بيه من الكابوس او المصيبة السودة اللي انا فيها دي، رفع عوض ايده وبص لي.. وشه كان متشرح زي ما اتعودت اشوفه، بس لاني اتعودت عليه، فانا المرة دي ماخوفتش منه، انا بصيتله وبكل شجاعة قولتله..

-انت عاوز مني ايه.. ما اللي قتلك اتعدم خلاص ومراتك اتسجنت، ولو عالكرافان، فانا سيبتهولك، سيبتهولك يااخي وبقيت انام بعيد عنه… عاوز مني ايه تاني؟!

زحف ببطء وقرب مني، وبصوته المتحشرج بص لي وقالي..

-اللي.. ماقدرتش اعمله زمان.. هعمله دلوقتي.. هيموتوا.. هيموتوا…

وبسرعة لا تتناسب خالص مع الحالة اللي هو فيها، قام من مكانه وقرب مني، واول ما قرب، زقني في صدري بكل قوة، عشان مع زقته دي، اصحى من نومي مفزوع.

فتحت عيني لقيت نفسي نايم في الكارافان بتاع معاذ، وجنب مني، كان استكانة وطنبه معاذ، رايحين في سابع نومة، قومت من مكاني وخرجت من الكارافان ووقفت برة، طلعت سيجارة من علبة سجايري وولعتها، بس وانا بولعها وبحركة تلقائية كده، عيني جت على الكارافان بتاعي، او كارافان البوفيه يعني.. لكن مع بصتي برقت، الكارافان كان واقف جنبه شبح عوض المتشرح، والغريب في وقفته، انه كان مبتسم وبيشاورلي على باب الكارافان من تحت!

استغربت وبصيت ناحية ما بيشاور، وهنا زاد استغرابي اكتر، انا من الفتحة الصغيرة اللي في الباب، او زي ما بيتقال يعني، عُقب الباب، شوفت نور!.. ازاي ده، ازاي الكارافان منور وانا بنفسي شايف استكانة وهو بيطفي نوره قدام عيني!

رَفعت عيني وبصيت ناحية عوض، مالقتوش، اتبخر، وكأنه ماكنش موجود من الأساس، لكن المشكلة دلوقتي مش في عفريت او شبح عوض، المشكلة في الكارافان اللي منور ده!

قربت منه وحطيت وداني عالباب، وفي اللحظة دي عنيا برقت، انا سمعت من جوة صوت ضحكة واحدة ست!

اتسحبت بالراحة وروحت ناحية الكارافان من ورا، بالتحديد عند الشباك الملحوم واللي فيه فتحة صغيرة اوي بصيت منها، واول ما بصيت، شوفت منظر خلاني بدأت اربط كل حاجة ببعضها.. المخرج كان قاعد على كنبة من كنبتين الكارافان، وقصاده كانت بطلة الفيلم، نيفين، كانت واقفة بقميص نوم!.. بلعت ريقي وحاولت اتماسك واجمع الخيوط، المخرج، نيفين، جوزها عبد البصير اللي على طول نايم على نفسه وشخصيته ضعيفة، كلام استكانة عن نيفين وهي خارجة من كارافان معاذ بالليل، وكلام معاذ مع المخرج لما استأذنه عشان ننام عنده.. بس، كده بانت اوي، نيفين اصلًا على علاقة بالمخرج من البداية، ووارد اوي تكون بتحط لجوزها منوم وبتروح بالليل تقابل المخرج، وطبعًا عشان مايتشكش فيه، ولا حد يقول عنه حاجة، كان بيخلي معاذ يبات في كارافانه، ويروح هو يقابلها في كارافان معاذ، وانا بغبائي لما نمت عند معاذ انا واستكانة، فضيناله الجو في الكارافان بتاعنا.. بس ايه ده.. ايه الريحة دي؟!.. دي ريحة غاز!

-بقولك ايه.. انا قبل ما اروح للمغفل، هعملك فنجان قهوة ماشربتوش من سنين.

لما نيفين قالت كلامها ده، راحت ناحية البوتجاز، وفي نفس الوقت كان المخرج ماسك ولعاته وبيولع سيجارة، وفي لحظة، واول ما داس بصباعه على الولاعة، سمعت صوت انفجار قوي.. انفجار طيرني من مكاني وبعدني بعيد عن الكارافان، ومع قعتي على الارض، الدنيا من حواليا اسودت وكل حاجة سكتت!

لما فوقت بعد فترة كبيرة، لقيت نفسي في مستشفى، واللي عرفته من الممرضات ان اللوكيشن من بعد حادثة الانفجار اللي حصلت، اتفض، وطبعًا المخرج والممثلة ماتوا في الانفجار، طب والتحقيقات؟.. التحقيقات قالت ان الانفجار اللي حصل كان سببه ان الانبوبة كانت بتنفس، واللوم كله شاله مدير الانتاج، وبعد ما فوقت بفترة، وجُم حققوا معايا، حكيتلهم اللي حصل، بس مش بتفاصيله، انا قولتلهم اني كنت خارج بالليل اشرب سيجارة، ولما لقيت نور الكارافان منور، روحت عشان اشوف مين اللي جواه، وبعد كده حصل الانفجار، ولما اتسألت عن سبب نومي في كارافان معاذ، وواجوهوني بكلام استكانة عن ان الكارافان بتاع البوفيه مسكون، قولتلهم انه صح، ومن بعد اللي شوفناه مابقيناش بنبات في الكارافان، بس بعد كلامي وكلام استكانة وبعد اللي حصل ده كله، النيابة ماعترفتش بموضوع اننا كنا بنشوف عفاريت ده ولا صدقته حتى، هي حفظت القضية على انها حادثة تسريب غاز بسبب الاهمال، والموضوع اتطرمخ عليه، وقبل ما تسأل نفسك الموضوع اتطرمخ عليه ازاي وليه، ف انا هقولك.. المخرج والنجمة لما خرجوهم من الكارافان بعد ما طفوا الحريق، كانوا بلبس النوم، وعشان موضوع الاعراض وعشان السيرة تتقفل، وكمان عشان سمعة شركة الانتاج، المنتج خلى المحامي بتاعه يسعى في موضوع حفظ القضية على انها حادثة سببها الاهمال، وبالفعل اتحفظت.. اما شركة الانتاج بقى، فطبعًا وَقفت الشغل في الفيلم وبدأت تشتغل على فيلم غيره، وبالنسبة لعبد البصير، مساعد المخرج، ضعيف الشخصية وجوز الست نيفين الله يسامحها ويرحمها، فده بعد اللي حصل اتجنن، اه والله اتجنن وودوه مستشفى المجانين ولسه فيها لحد دلوقتي، طب والكارافان راح فين؟!.. حقيقي ماعرفش، او بالمعنى الدقيق يعني انا فضلت مش عارف لحد ما خفيت وخرجت من المستشفى ورجعت الشغل من تاني، بس المرة دي مع شركة انتاج تانية وفي فيلم الجديد طبعًا.. ومع مرور الايام وكتر الشغل، اتلهيت ونسيت الحادثة، وفضلت ناسيها لحد ما في يوم، ووقت ما كنت نازل لوكيشن، اتفاجأت بوجود نشأت، واتفاجأت يومها انه معاه نفس الكارافان، بس متجدد!

وقتها رنت في وداني جُملة كان ابويا قراهالي من كتاب زمان.. نفس الجُملة اللي بدأت بيها الحدوتة.. التاريخ بيعيد نفسه مرتين، مرة كمآساه، والتانية كمهزلة.. والمرة دي الله اعلم المهزلة هتبقى ازاي وامتى وفين، مش مهم، مايخصنيش ولا يهمني ولا عاوز اعرف، انا اول ما شوفت الكارافان وهو بيتحط في اللوكيشن، وشوفت جنبه شبح عوض وهو بيبصلي ويبتسم، خدت بعضي انا وعُمر استكانة واعتذرنا عن الشغلانة كلها.. بس الغريب بقى اننا بعد ما اعتذرنا، عرفنا ان الكارافان انفجر تاني.. بس المرة دي انفجر بعامل البوفيه اللي كان جواه.. الظاهر كده انه كان من عينة المخرج ومرعي.. خاين.. خاين والكارافان كرر التاريخ من تاني وخلص عليه، وياعالم، الكارافان هيخلص على مين تاني او هيروح فين!.. دي حاجات في علم الغيب، بس اللي انا متأكد منه، ان شبح عوض هيفضل موجود بوجوده، وهيفضل مكمل في تحقيق اللي مات قبل ما يحققه.. وهيفضل تملي وكل مرة يظهر فيها الكارافان زي القشاش.. القشاش اللي بيخطف ارواح الخونة، ومش هو وبس.. هو والملعون.. قصدي.. والكارافان بتاعه.. مقبرة الخاينين وجحيمهم على الأرض.

تمت