قصه توكتوك ربيع -سلامو عليكوا.. ميدان ام الشخاليل ياحج؟
-ارقب.. بس استنى.. عدم اللامؤاخذة يعني، بتدفع كام؟
-اللي تشوفه ياحاج، مش هتفرق.
-فُل.. شكلك فييس وابن ناس، ارقب… نورت توكتوك عمك ربيع…. في الأول جرجرتك.. من خيبتك خدرتك.. وبقيت تعرف تكدب وبتلعب على جارتك.. وبتلعععععب.
-معلش ياحاج.. وطي صوت الكاسيت شوية عشان انا مصدع ومش شايف.
-اوطي؟!.. انت عاوزني اوطي الملحمة الشعبية “العبد والشيطان”؟!.. استغفر الله العظيم من كل ذنب عظيم.
-في ايه ياحاج.. هو انا قولت حاجة حرام!.. ده الراجل عمال يزعق ويقولك وبتلعععب.. هو مين ده اللي بيلعب وبيلعب فين؟
-على اول منطقة الحسين..
-ايه؟
-بيلعب باليه.
-جرى ايه ياحاج.. ايه اللي انت بتقوله ده، انا ورب العباد ما عاوز اكلمك عشان انت راجل شقيان وقد ابويا.
-وانا عشان شقيان وقد ابوك مش هتكلمني!.. هتخاصمني يعني؟.. هتتقمص وتغنيلي مخاصماك.
-مخاصماك!.. انت بتقول ايه ياعم انت، ثم احنا ايه اللي وصلنا للنقطة دي من اساسه، ركز ياعمنا في الطريق وخلينا نوصل على خير الله لا يسيئك.
-ولا مانوصلش.. مش هتفرق… كده كده العالم هينتهي قريب.
-عالم ايه اللي هينتهي ياعم ثانوس، مالي انا ومال نهاية العالم!.. ياحاج فوق، انت سواق توكتوك في منطقة شعبية.
-وانا يعني عشان سواق توكتوك في منطقة شعبية، يبقى مش من حقي اتسئف!
-لا ياحاج.. من حقك تتسئف وتطلع بالتالت بعد السئف لو حبيت.. ولو حبيت كمان تسئف على وشي، سئف.. المهم نتنيل نوصل.
-انت مالك مستعجل كده ليه؟.. هي الدنيا هتطير؟
-ياعم الساعة اتنين بعد نص الليل وانا عاوز اروح، ورغم اني تعبان وعايز انام عمال تقولي مستعجل كده ليه؟!
-وفيها ايه يعني.. التأخير في المخ مش في الساعة، اه، حاكم انت لو مخك اتأخر، دنيتك هتبوظ.. اسمعها ياابني من واحد شاف البني أدمين ألوان.. الاستعجال اخرته وحشة، ماهو لو نيوتن كان استعجل وقام من تحت الشجرة، ماكانتش التفاحة هتقع على نفوخه ولا كان هيعرف قانون الجاذبية.. ولو اديسون ماكنش صِبر على اختراعه وجربه اكتر من مرة، ماكنش اكتشف اللنضة.
-لنضة ايه بس الله يرضى عليك، بص قدامك وفكك من جو حصة التاريخ والفيزيا اللي فتحتهالي دي، كده هنلبس في عامود نور.
-نور الشريف.. هخيوخيو..
-بقولك ايه ياحاج، قسمًا بالله لو مابطلتش ألش، هرمي نفسي من التوكتوك عشان اتخرشم واروح اعملك محضر.
-لا وعلى ايه المحاضر.. ما انت ممكن لو نطيت ماتتخرمش، تخلص على طول وتنورني في المشرحة.
-ياليلة سوخة!.. انت بتشتغل في المشرحة جنب شغلتك عالتوكتوك!؟
-لا ياخفيف.. انا مقيم فيها.. يلااا.. غوور يالا، ده انت عيل رغاي..
-ااااااااه…. ياابن المجنونة!.. بتزقني من التوكتوك وهو ماشي؟.. ياابن المجنووونة.. حاااسب.. التوكتوك هيقع في الترععة..
=لا اله الا الله.. توكتوك ايه اللي هيقع في الترعة يااستاذ؟.. انت مجنون وبتكلم نفسك!
-التوكتوك ياعم اللي قصادك ده.. انت ماشوفتوش!.. ده لسه عم ربيع واقع بالتوكتوك بتاعه في قلب المايه!
=انا لا شوفت توكتوك بيقع في مايه ولا شوفت أي حاجة.. انت بقالك حبة واقف لوحدك وبتكلم نفسك!
-بكلم نفسي مين ياعم.. انا كنت راكب التوكتوك مع عم ربيع وكان بيقولي كلام عجيب و…
=اااه.. انت ركبت مع المرحوم ربيع الرغاي.
-مرحوم ازاي يعني؟.. ده كان بيسمع العبد قال للشيطان!
=طب اهدا.. اهدا بس وقولي.. انت ركبت معاه منين؟
-من عند اول الشارع وكان هيوصلني لحد ميدان ام الشخاليل.
=ايوه ايوه.. ما دي اخر توصيلة كان بيوصلها.. الله يرحمه بقى، النهاردة الصبح كان بيوصل شاب من على اول الشارع وكان رايح بيه ميدان ام الشخاليل، بس للأسف، الفرامل سابت منه ووقع في الترعة ومات هو والشاب.
-لا حول ولا قوة الا بالله.. بس استنى، لما هو مات، اللي كنت راكب معاه ده ووصلني من على اول الشارع، يبقى مين؟!!
=اضرب فيتامين..
-مين؟!
=شاي بالياسمين..
-انت.. انت تعرف عم ربيع؟!
=إلا اعرفه.. ده انا اللي كنت راكب معاه واتقلب بيا انا والتوكتوك في قلب الترعة.. ايه ده.. ايه الكلب اللي جاي هناك ده!
=زي السكر في الشاي.. بالأذن.. هنزل لعفريت عم ربيع عشان ماياخدش برد في المايه.
-استنى.. ياابن المجنووونة.. ماتنطش في الترعة.. هتتبل ياابن ال…
**************
-هو مين ده اللي هيتبل!.. يااستاذ.. ياحضرت.. اصحى يااستاذ.. وصلنا ميدان ام الشخاليل.
-اعوذبالله من الشيطان الرچيم.. انا فين؟
-انت في التوكتوك يااستاذ.. بس كان شكلك تعبان اوي ونمت بعد ما ركبت طوالي وشكلك حلمت حلم مش ولابد.
-معلش ياحاج.. حقك عليا.. حسابك كام؟
-عشة جنيه.. ولو مافيش.. خلي من غير كلام.
-هو انت غتت وبترمي أفيهات في الحلم وفي الحقيقة كمان؟
-انت بتقول ايه ياجدع انت.
-مابقولش ياعم.. خد العشة جنيه اهي، واه، ابقى خد بالك من الترعة وخف أفيهات شوية لا التوكتوك يتقلب بيك وتبقى عفريت الخليل كوميدي.
-استغفر الله العظيم.. جيل منيل.. قال عفريت مبلول قال.. اهو كله من قصص الرعب بتاعت جويلي وخيري اللي لحست مخكوا.
-الله يسامحك ياعم ربيع.. انا مش هرد عليك لا تتقلب في الترعة ويطلع عفريتك الغتت بأفيهاته الغتتة ويعكر عليا عيشتي.
-تاني هيقولي عفريت وتتقلب في الترعة.. يلا ياض من هنا.. غوور يالا..
تمت
محمد_شعبان
توكتوك_ربيع
