الظلم اللي بيتعرض ليه الانسان في حياته كفيل أنه يحوله لوحش مش بيفكر في تصرفاته.. حتي لو هيوصل بيه الامر للقتل.. الغريب ان الشخص ده بيعترف انه قتل الاشخاص اللي عرضوه للظلم!
وبيكون جواه غل وانتقام ميتوصفش
…
وصلنا بلاغ عن جريمة قتل لواحد اسمه الشيخ مروان.. البلاغ من اسوان في مكان مش هنقول اسمه طبعاً ولكن هتعرفوه
لما وصلنا هناك الناس كلها كانت بتقول ان النوبي قتل الشيخ مروان.. اتوجهنا لبيت النوبي وقبضنا علي واحد في التلاتين من عمره اسمه النوبي حسن عبدالله والغريب انه مقاومش سلم نفسه بهدوء
وعلى الحيطة مكتوب جملة غريبة.. مكتوب
( يظنون انها لهجتي النوبية.. ولكن في الحقيقة هي طلاسم قاتلة لكل من آذاني واخترق عالمي)
…
قبل ما أبدء بوجه تحية لاهل اسوان الطيبين
جحيم النوبي
الجزء الاول
_ها يا نوبي انت في قسم الشرطة رفضت تتكلم.. بس دلوقتي انت في النيابة يعني لازم تتكلم.. أكيد عندك مبرر لقتل الشيخ مروان في سبب يعني؟
_ ههههههه.. هو الحقيقة مش الشيخ مروان بس اللي دفع تمن اللي عمله زمان يا بيه.. في ناس تانية كتير دفعت التمن ده بس بشكل تاني
_ يعني انت عايز تفهمني انك قتلت ناس تاني يا نوبي مش كده؟
_ بتعرف تعد لحد كام يا بيه.. اه انا قتلت كتير بس بمساعدة مش بايدي.. الشيخ مروان بس اللي قتلته بايدي
_ لا معلش افهم يا نوبي.. يعني اي بمساعدة كنت بتأجر حد يعني؟
_ لا يا بيه.. الموضوع كبير وجايز انت متصدقنيش
_ لا هصدقك بس أحكي وصدقني اعترافك ده هيهون عليك كتير ويمكن يخفف عنك الحكم
_ لا أطمن مظنش بعد ما أحكي اني هستني الحكم
هو دلوقتي بيصرخ في ودني وبيقولي اسكت متتكلمش
_ هو مين ده يا نوبي مفيش حد معانا فى المكتب؟
_ تسمحلي يا بيه احكيلك من البداية من زمان قوي قبل ما أنا اتولد من الأساس
_ أحكي يا نوبي أنا عايز اسمعك
…
الحكاية يا بيه بدأت من زمان لما ابويا الحج حسن عبدالله كان عايش في أسوان في نفس البيت اللي أنا كنت موجود فيه لما أتقبض عليا.. الكلام ده ليه أكتر من 30 سنة.. كان متجوز بنت عمه سماح اللي هي أمي يا بيه.. ربنا يرحمهم
أبويا حسن كان زيه زي اي حد راجل عاوز يعيش عيشة كويسة ويأكل مراته بالحلال
وعشان كده بدأ من تحت من نقطة الصفر.. بقفصين فراخ في السواق عندنا في أسوان.. وسط تجار كبار ليهم أسمهم هناك
طبعاً ابويا مكنش ياجي حاجة جمبهم يا بيه.. الناس دي كان معاها محلات كبيرة وعايشة عيشة الملوك
لكن يا بيه الناس دي كانت بتبيع بأسعار عالية وبتخلي الناس زعلانة.. والناس مكنش عندها حل كل أب عاوز يأكل عياله احسن أكل ولكن الناس دي كان عندها جبروت ميتوصفش
…
لكن كل ده بدأ يختلف لما أبويا نزل السوق وسأل على الاسعار.. وبدأ يبيع الفراخ بأسعارها العادية بما يرضي الله.. بدأت الناس تروح لابويا وتشتري منه وتهمل باقي التجار
الموضوع كبر والقفص بقي اتنين وتلاتة لحد ما أبويا بقي معاه محل.. التجار بدأوا يزعلوا من أبويا وقعدوا مع بعض وقالوا اننا نحاول نحل الموضوع بالحسنة ونقعد معاه ونتفق
…
وفعلا 3 من التجار دول وكان اسمهم الحج علي والحج سامح والحج عوض.. زاروا أبويا في البيت وطلبوا منه انه يبيع بنفس اسعارهم عشان كده هو هيضرهم.. لكن أبويا رفض وقالهم أنا هيبيع بما يرضي الله وانه مستحيل يعمل كده ويغضب ربنا
عرض التجار عليه انه يتحد معاهم وانه يبطل الشعارات دي.. لكنه رفض وشبه طردهم من البيت بطريقة ذوق
..
خرج التجار من عند ابويا والشر في عينيهم وقرروا انهم لازم يخلصوا من أبويا.. وفعلا يا بيه دبروا لابويا مكيدة وقدروا بمساعدة مجرمين انهم يحرقوا بضاعة أبويا والمحل كله
وطبعا كده خسر أبويا كل حاجة.. كانت صدمة كبيرة مقدرش يتحملها وكان عاوز يروح ينتقم منهم لكن أمي كانت واقفة جمبه وبتدعمه وطلبت منه أنه ميفكرش وهو متعصب
وبعد يومين بالظبط كان أبويا واخد قرار انه هيسيب البلد وهيروح يعيش في القاهرة.. أخد أمي وسافروا علي القاهرة
عشان تبدأ معاناة جديدة بطلها أنا
…
بعد ما نقل أبويا وأمي القاهرة بأسبوع.. أمي حملت فيا.. بس الفترة دي كانت الاصعب علي أبويا وأمي
عشان أبويا نزل يشتغل نفس الشغلانة بس عند تاجر هناك لحد ما يقدر يظبط أموره ويفتح شغل خاص بيه
لكن المشكلة كانت في لون البشرة السمرة اللي كانت عند أبويا وأمي.. واللي كانت بتخلي الناس تقول لابويا.. تعالي يا أسود كانوا بيتنمروا عليه هو وأمي.. التنمر أكتر حاجة كانت مدايقة أبويا.. بس كان دايما بيتجنب الرد علي المرضي دول وانه يرد عليهم ويعمل معاهم مشاكل
لكن الموضوع حقيقي كان مأثر علي نفسيته.. وزاد الامر سوء لما جيت أنا للدنيا.. عشان لون بشرتي كان ابيض.. أبويا قرر يسميني النوبي عشان حبه لناس النوبة
تنمر الناس على أبويا اتحول لقلة أدب.. ومتأخذنيش يا بيه كانت الناس تسأله ببجاحة هو الواد طالع ابيض لمين؟
أبويا كان بيسمع الكلام ويسكت.. ولكن مكنش قادر يتحمل ده.. وبدأت مشاكل تظهر بينه وبين أمي كتير
كنت كل يوم بكبر وبشوف الناس بتقول اي لابويا لكن انا كنت صغير مش فاهم!
ابويا كان يقعد معايا كل يوم ويحكيلي عن الظلم اللي اتعرضله واللى لسه بيتعرضله
…
خلاني كرهت الناس دي.. لحد ما وصل سني عشر سنين.. وفي الوقت ده كنت بلاحظ ان ابويا بيقري من كتاب.. لما سألته اي الكتاب ده يا أبويا؟
قلي
ده كتاب بيعلمنا لهجتنا النوبية الجميلة يا نوبي لما تكبر شوية.. هعلمك
…
اليوم ده يا بيه مقدرش انساه.. ويمكن اليوم ده هو السبب اني واقف قدامك دلوقتي
في اليوم ده خرجت العب مع العيال في الشارع.. وانا بلعب اتخنقت مع صاحب محل في الشارع اسمه مصطفى
خرج من محله وقلي كلام مهين ليا ولابويا وأمي وقلي أني ابن حرام.. رجعت البيت ببكي بحرقة وقولت لابويا اللي خرج وراح للراجل ده عند المحل
وفضل يتكلم معاه.. وبعدين رجع البيت
وفجأة
سمعت صوت صراخ في الشارع.. خرجت من البيت
لقيت الراجل صاحب المحل واقع فى الارض.. ميت ومبرق وعينيه جاحزة بشكل مخيف ومحدش كان فاهم حصل اي
دخلت البيت لقيت أبويا وأمي بيتخانقوا وأبويا لاول مرة أبويا ضرب أمي بالقلم
أمي من الصدمة مكنتش عارفه تتكلم لكن بعد دقيقة أمي جابت جركن بنزين ودلقت علي نفسها أبويا جري عليها وهو بيقولها بتعملي اي يا مجنونة بتعملي اي؟
وللاسف في بنزين جيه عليه وولعت أمي في نفسها وشوفتهم هما الاتنين والنار بتلتهم جسمهم وسط صراختهم.. المنظر عمره ما غاب عن بالي
..
لقيت قدامي الكتاب بتاع أبويا اخدته وخرجت من باب البيت الخلفي.. ودي كانت البداية.. يتبع الجزء الثاني
…
انتظروني في جزء تاني ناري من قصة جحيم النوبي دي مجرد بداية
…
محمود الأمين
جحيم النوبي
الجزء الثاني
طلعت أجري في الشارع يا بيه مكنتش عارف انا رايح فين؟
كنت ببكي علي منظر أبويا وأمي وهما بيتحرقوا قدام عينيا.. وفي نفس الوقت مكنتش عارف اروح فين… أنا مطلعتش من الحي اللي كنت فيه من ساعة ما اتولدت.. مكنتش اعرف يعني اي فسح ولا خروجات.. أحنا كنا ناس غلابة يا بيه منعرفش غير الشغل وبس.. ناس غلابة كانت دي نهايتهم بسبب التنمر
..
لقيت نفسي تايه في شوارع معرفهاش.. فضلت ماشي في الشارع وأنا بعيط وبقول
هروح فين؟ سبتوني لمين؟
احساس صعب قوي يا بيه لما طفل عمره ما خرج من بيته ولا شاف الدنيا يتحط في أختبار صعب زي ده.
لقيت نفسي تحت كوبري وفي عيال نايمة تحتيه.. قولت أنام جمبهم منا معنديش مكان.. واتعرفت عليهم.. وعرفت يعني اي ولاد الشوارع
العيال اللي اهلهم رموهم في الشارع عشان مش عارفين يصرفوا عليهم
كنت محافظ علي الكتاب بتاع أبويا ومش مخلي حد يلمسه.. وهما مكنوش مهتمين أصلا بالكتاب
..
عرفت أنهم بيسرحوا بفل ومناديل في الأشارات ومنها بيكسبوا فلوس عشان يقدروا يجيبوا أكل.. وشغلوني معاهم.. كان اقرب واحد ليا فيهم كان أسمه صلاح.. كان من سني تقريباً
كنا بنبات تحت الكوبري.. والصبح ننزل نبيع في الاشارات الفل والمناديل لحد بليل
حياة شاقة وصعبة لاطفال سنهم ميعديش عشر سنين
بس انا كنت عارف أن الحياة مش هتستمر كده.. في يوم واحنا بنبيع الشغل في الاشارات.. كبست علينا الحكومة يا بيه.. جرينا او خليني أقولك أنا كل واحد فينا جري في حتة
كنت بجري وأنا مش عارف أنا رايح فين؟
لقيت نفسي راجع عند الكوبري عشان اخد الكتاب.. ولما روحت هناك عرفت أن معظم صحابنا أتقبض عليهم وصلاح معاهم.. كنت زعلان عليهم قوي وأخدت الكتاب بتاع أبويا ومشيت من المكان ده ورجعت الدنيا تلطش فيا من تاني.. كنت تعبان وفاقد الامل أنا هقدر أعيش فضلت أطلع من شارع وادخل في شارع.. لحد ما وقعت في الشارع وأغمي عليا
..
فوقت لقيت نفسي نايم علي سرير.. وقاعد جمبي راجل باين علي ملامحه الطيبة وقلي
_ حمد الله على السلامة يا بطل.. مالك فيك اي؟
_أنت مين؟
_ أنا عمك راضي.. كنت بصلي الفجر وانا راجع لقيتك واقع في الشارع وجمبك الكتاب ده.. هو اي اللي حصل
_ والله ما عارف احكيلك اقولك اي.. أنا حكايتي غريبة قوي يا عم راضي
_ من لهجتك شكلك صعيدي.. من فين؟
_ أنا أصلا من أسوان واسمي النوبي.. بس كنت عايش هنا مع أبويا وأمي بس..
_ بس أي يا ابني اتكلم!
…
بدأت احكي كل حاجة لعم راضي.. ومع كل حرف كانت دموعي بتنزل.. الراجل اتعاطف معايا جداً وقلي
_ خلتني أعيط زي العيال الصغيرة يا نوبي.. شوف يبني مفيش حاجة في الدنيا دي صدفة ويمكن ربنا وقعني في طريقك عشان انت أبن حلال.. أنا راجل عايش مع عمر أبني وهو تقريباً في نفس سنك ومراتي متوفية من زمان.. أنت هتعيش معايا هنا وزيك زي عمر تمام من النهاردة
_ بس يا عم راضي أنا
_ مبسش ولا حاجة.. أنا قولتلك ده القدر وهو رايد انك تبقي معايا دلوقتي
…
عم راضي يا بيه كان راجل طيب حبيته من كل قلبي وحسيته تعويض عن أبويا اللي مشوفتش منه الحنية دي
…
أي يا بيه صعبت عليك.. ميصعبش عليك غالي أسمع اللي جاي كويس عشان ممكن متصدقش اللي هحكيه دلوقت.. أو مفيش عاقل يصدقه أصلا
عشت مع الراجل ده أحلي أيام حياتي.. مكنش بيفرق في المعاملة بيني وبين أبنه بالعكس ده كان بيعملني احسن من ابنه
معرفش ليه يا بيه أفتكرت الكتاب.. يمكن من الزهق والروتين اليومي وقولت آن الأوان اني اتعلم لهجتي النوبية
دخلت الاوضة وقفلت علي نفسي الباب وطلعت الكتاب لاول مرة وفتحته
كان في كلام غريب مش مفهوم.. مش قادر أقري حاجة.. لكن انا حسيت أن مخي بيترجم الكلام ولقيت نفسي بقول
( أقسمت عليكم بالعزيمة الروحانية أقسمت عليكم يا ملوك الجن السفلية.. اقسمت عليك يا ملك معشر الشر.. مطال ياشن عزازيل.. أحضر الان ونفذ ما طلب منك في التو واللحظة)
حسيت لساني بيتقل.. حسيت نفسي مش قادر اتكلم .. وسمعت صوت بيهمس في ودني وبيقولي
نوووبي… نوووبي
مين.. مين اللي بيتكلم.. مين بينده عليا
محدش بيرد مفيش جواب
حسيت دماغي بتتقل واني عايز أنام.. لقيت نفسي بحط راسي علي المخدة وبروح في النوم
أول مرة أنام بالعمق ده.. لقيت عمر بيصحيني وبيقولي
_ كل ده نوم يا عم أصحي بيقولك بابا اصحي عشان تاكل
..
خرج عمر من الباب واترزع وراه بعنف.. ولقيت شخص طويل واقف قدامي ملامحه نفس ملامح أبويا.. بس شكله مخيف مفزع
وقلي
لقد حضرت لك مني السمع والطاعة.. عاوز اصرخ لكن الصرخة مش بتخرج مني
وقرب مني وقال
_ أنت اللي هتكمل عهد أبوك يا نوبي.. أنت اللي هتكمل انتقامه
_ ها هكمل أي أنا مش فاهم حاجة؟!
_ أنا عارف أنك هتستوعب الكلام رغم صغر سنك.. أبوك متحملش أهانة الناس اللي كانت حواليه كان مستحمل عشانك في البداية لكن مع الوقت الأمر اطور وبقا لا يطاق.. وعشان كده لجأ لينا أحنا قبيلة الشر في عالم الجن السفلي وطلب مننا الانتقام من اي حد يتعرضله تاني.. ولكن كان أول واحد من الضحايا.. صاحب المحل فاكره يا نوبي
..
حط أيده علي دماغي.. المشهد اتبدل من حواليا لمشهد قديم شوفته قبل كده.. أبويا واقف مع صاحب المحل وبيكلمه
لكن المرة دي كنت سامع أبويا بيقوله أي
( مطال ياشن تخليشن… نفذوا الان)
..
الراجل دخل محله عشان يظهر وراه كائن بشع كله شعر في جسمه أشبه بالقرد.. حط ايده على قلب الراجل.. صرخ الراجل ووقع علي الارض جثة هامدة
والمشهد رجع تاني.. ولقيته بيقولي
_ والدك قالك ان ده كتاب لهجة نوبية.. في الحقيقة ابوك كان راجل ذكي.. فتح ليك طريق أنتقام بطريقة ذكية.. ولكن لازم سنك يوصل العشرين عشان تكون مهيأ للانتقام يا نوبي لازم تكمل العشرين
…
وأختفي ومع اختفاؤه مكنتش مصدق اللي شوفته ولكن انا كنت في انتظار سن العشرين عشان انتقم.. صحيح قدامي عشر سنين ولكن الانتقام جاي أكيد.. يتبع الجزء الثالث
….
انتظروني في الجزء الثالث من قصة جحيم النوبي واحداث نارية ومرعبة جداً وغير متوقعة
…
جحيم النوبي
الجزء الثالث
_ أستني بس يا نوبي قبل ما تكمل كده.. أنت قدام النيابة يعني هتقولي جن وشغل جنان عشان تتحول لمستشفي الأمراض العقلية.. أقدر أقولك أنت بتحلم
بلاش جنان وهطل وقولي قتلت الناس دي ليه يا نوبي؟
..
في اللحظة دي صوت النوبي بدأ يتغير ويبقي صوت أجش وهو باصص في الأرض واتكلم وقال
_ كلام النوبي مش جنان.. كلام النوبي هو الحقيقة
_ أه هتبدأ تتخن في صوتك عشان نخاف منك ونقلق.. أنا مش باكل من الكلام ده.. هتتكلم يا نوبي ولا لا.. قول الحقيقة وسيبك من الجنان ده
رفع النوبي راسه وبصلي.. عينيه مكنتش زينا عينيه كانت مشقوقة بالطول زي عيون القطط
شكله كان مخيف جداً.. وأبتسم كان عنده أنياب
حاولت أتماسك رغم خوفي عشان ده لا يمكن يكون حقيقي وقولتله
_ اللي أنت بتعمله ده مش هيخوفنا فوق.. أنت قدام النيابة
رد عليا وقال ولسه صوته أجش
_ أذا كنت لسه مش مصدق كلام النوبي بعد اللي أنت شايفه قدامك دلوقتي.. تحب أقولك عن حاجة محدش يعرفها عنك يا حاتم بيه
تحب أقولك أنت ليه متجوزتش لحد دلوقتي وأنت كاسر سن الأربعين.. أقولك أي اللي حصلك زمان خلاك مش قادر تتجوز وتكون راجل.. وبتظهر رجولتك هنا في مكتبك بالصوت العالي
…
أنا مكنتش عارف أرد جالي حالة خرس.. بصيت لكاتب الأقوال اللي قاعد جمبي اللي كان بصصلي ومسهم وقولتله
_ أوعي تكون كتبت حاجة من الكلام ده
رد النوبي عليا بضحكة ساخرة من كلامي وقال
_ لا مكتبش حاجة متخفش أوي كده.. هو بس مصدوم.. تحب أكمل وأقولك اللي حصل زمان
_ أخرس.. أخرس خالص مش عايز أسمع صوتك
_ أنت متقدرش تخرسني.. سامع متقدرش تخرسني
ها أكمل حكايتي ولا أكمل حكايتك؟
…
_كمل حكايتك.. كمل يا نوبي
ولتاني مرة يبصلي بنظرة ساخرة ويقولي
_ وقفنا لحد فين يا بيه؟
وبعدها بص في الأرض ورجع بصلي عشان ترجع ملامح النوبي العادية
رديت عليه وقولتله
_ لحد ما قالك لما تتم سن العشرين
…
أه أفتكرت يا بيه.. أنا ساعتها يا باشا كان عندي عشر سنين.. ورغم أني كنت طفل إلا أني كنت فعلاً عاوز أخد حق أبويا من اللي اتسبب في موته
بس لسه فاضل عشر سنين.. مدة كبيرة مش صغيرة عشان أخد حق أبويا وأمي
خرجت من أوضتي وأنا تايه.. مش سهل عليا اللي بشوفه، لقيت عم راضي مجهز أكل.. وقلي
_ أي صحي النوم يا بطل.. أول مرة تنام كده
_ معلش يا عم راضي كنت تعبان شوية.. وقولت أنام ومحستش بنفسي
_ ألف سلامة عليك يبني.. نام عاوزك تنام براحتك ده بيتك يا نوبي
_تسلم يا عم راضي
…
عم راضي هو الشخص اللي اتمنيت بجد يا بيه أنه يكون أبويا.. عنده طيبة وحنية تكفي الكون بحاله
عشت مع الراجل ده أجمل أيام حياتي.. خلاني كملت تعليمي وصرف عليا دم قلبه.. مقدرش أوصف الراجل ده غير أنه كان أبويا فعلاً
لكن حصلت حاجة غيرت حياتي كلها.. وللاسف كانت بداية الطريق للانتقام
في يوم كنت سهران بذاكر.. عم راضي وأبنه نايمين والجو هادي تماماً.. لكن وأنا بذاكر النور قطع
قومت من مكاني عشان أجيب شمعة وأنور وقولت أكيد عم راضي هيصحي دلوقتي بسبب الحر
..
خرجت جبت شمعة وولعتها ودخلت أوضتي.. نورت قدامي
الشمعة وقعت من أيدي من الصدمة.. عشان هو كان في وشي من تاني.. وقلي
_ متخفش يا نوبي.. أنا مش جاي آذيك أنا جاي عشان أعلمك.. أومال أنت فاكر نفسك هتنتقم منهم أزاي؟
_ أيوة بس انت قولت لما أتم سن العشرين!
_ لما تتم سن العشرين هتكون جاهز للانتقام لكن دلوقتي لازم تتعلم كل حاجة خاصة بينا لازم تعرف أزاي هتنتقم منهم.. لازم تبقي واحد مننا يا نوبي
_ يعني أعمل اي؟
_ هتاجي معايا عشان تتعلم وتفهم والعشيرة تكون راضية عنك
_ بس انا مقدرش أسيب عم راضي!
غمض عينيك
…
غمضت عينيا وحط أيده علي دماغي وبدأ يقول كلام غريب جداً مش فاهم منه حاجة.. لحد ما قلي فتح يا نوبي
لقيت نفسي قدام قبر كبير.. ولقيت بيقولي
_ ده قبر شيخ الجن اللي لازم يرضي عنك يا نوبي
_ أنا خايف أنا عاوز أمشي
_ تمشي تروح فين؟ ده مكانك أنت هتكون من أبناء العشيرة المخلصين في مقابل حاجات كتير
أولها أنك هتاخد حقك
وقعد قدام القبر وبدأ تاني يقولي كلام مش مفهوم وبعدها اخدني وقال
_ دلوقتي لازم تنفذ الخطوات المطلوبة منك
_ خطوات اي؟
_ هتعرف يا نوبي.. مش عاوزك تخاف أنت هيكون ليك شأن كبير وأنت معانا
…
تعرف يا بيه قعدت هناك قد أي.. 40 يوم عملت فيهم كل حاجة حرام ممكن تتخيلها.. الجن اللي كان أسمه زائر.. الاسم اللي بيهز مملكة الجن السفلي
زائر خلاني استحمي بلبن.. وأبات في الحمام طول ال40 يوم ممنوع من الكلام ممنوع من الاستحمام
بصوم صوم غريب من الصبح للعصر
وبفطر لحمة نية
حاجات كتير مش ممكن تتخيلها.. وفي اليوم ال40 قلي
_ خلاص أنت بقيت معانا بقيت تابع للعشيرة.. هتدرس الطلاسم اللي في الكتاب وأنا هساعدك في ده عشان تقدر تنتقم يا نوبي
_ أنا عايز أعرف هنتقم أمتي لسه هستني سن العشرين.. أشمعني السن ده؟
_ هتعرف في وقتها يا نوبي.. تقدر دلوقتي ترجع لعمك راضي.. ولكن أحذر من الوضوء والصلاة.. ممنوع نهائي
…
سبت زائر وأنا وحشنى جداً عم راضي وقررت أني هرجع وأعيش معاه زي زمان.. لكن أكتشفت أني رجعت متأخر.. عشان عم راضي مات.. أيوة مات
بس عشان هو راجل أصيل قال لأبنه لما النوبي يرجع خليه يعيش معاك.. دي وصيتي ليك
حتي وهو بيموت كان بيفكر فيا
ربنا يرحمك يا عم راضي.. كنت راجل طيب ومفيش منك
…
وعشت في الشقة زي ما وصي عم راضي.. وبدأت ادرس طلاسم الكتاب بمساعدة زائر.. وفعلا كنت بتعلم منه حاجات مكنتش متصور اني هعرفها في يوم من الايام
ومرت السنين.. مقدرش أقولك ان كان في حاجة احكيها تاني.. كل السنين دي اللي مرت كنت بدرس طلاسم الكتاب.. لحد ما أخيرا سني بقي 20 سنة وخلاص حان وقت الانتقام
كنت ناوي احضر زائر في الليلة دي عشان ابدأ انتقامي منهم.. خرجت جبت كل حاجة هحتاجها في جلسة التحضير.. ورجعت البيت متأخر
والمفروض عمر نايم.. فتحت باب اوضتي ودخلت وهنا كانت الصدمة… يتبع الجزء الرابع والاخير
…
انتظروني في الجزء الرابع والاخير من قصة جحيم النوبي
…
جحيم النوبي
الجزء الرابع والاخير
أول ما دخلت الأوضة لقيت عمر جوه ومعاه الكتاب وكان بيقري فيه.. قام من مكانه وهو بصصلي باستحقار وقلي
_ الكتاب ده بيعمل معاك أي يا آدم وجبته منين؟
_ أنت أي اللي دخلك هنا وازاي تفتح حاجة بتاعتي من غير ما ترجعلي؟
_ أي اللي دخلني هنا!!.. أنت نسيت ولا أي يا آدم ده بيتي.. وأنت موجود هنا عشان وصية أبويا.. أنت نسيت بجد؟
وفتحت الكتاب عشان أشوف المصايب اللي أنت بتعملها في بيتي.. مكنتش أتصور بعد الثقة اللي أبويا حطها فيك تطلع كده.. أنا بجد مصدوم فيك
_ أنت بتعايرني يا عمر.. وبعدين حتي لو من حق تدخل الأوضة يبقي علي الاقل ملكش دعوة بحاجتي
_ أنا مش بعايرك.. أنا برد علي كلامك ولو أنت عاوزني أحترم وصية أبويا.. ترمي الكتاب ده بره البيت أو تحرقه.. ده لو عاوز يعني تعيش معايا هنا
_ أنا مقدرش أحرق الكتاب ده أو أرميه هتأذي!
_ كده طيب خلاص انا هرميه متزعلش نفسك
..
وأتحرك عمر وشال الكتاب من مكانه ولسه هياخد أول رد فعل.. جسمه اتخشب عينيه برقت.. بقي شبه التمثال
ولقيت أيده بتتلوي وبوقه بيتعوج بطريقة مخيفة
عاوز اتصرف او أعمل اي حاجة
جريت عليه وانا مش عارف هعمل اي؟
صرخت وقولت
خلاص يا زائر هو غلط ميعرفش.. خلاص يا زائر
وقع علي الارض فاقد الوعي.. فوقته واخدته يريح وينام لكنه قلي
_ حاضر.. حاضر يا عمر
…
فعلاً جهزت نفسي وهدومي.. ونزلت مش عارف أنا رايح فين؟
نزولي في الوقت ده رجعلي كل ذكريات الماضي وأنا مش عارف أنا رايح فين؟
لكن في الوقت زائر كان بيوجهني للمكان اللي مات فيه أبويا وأمي.. المكان اللي انا بكرهوا.. المكان اللي بيفكرني بأسوء حاجة حصلتلي في حياتي
…
رجعت للمكان اللي أتغير كتير عن زمان..الغريبة أني لقيت بيت متجهزلي معرفش ده حصل أزاي؟
ولقيت واحد بيقولي
_ أنا عوض كنت صاحب البيت وامبارح جالي واحد واشتري مني البيت وقلي أن في واحد أسمه النوبي هياجي يسكن في البيت
هو مش حضرتك النوبي برضه
_ أه أنا وبشكرك جداً
…
دخلت البيت والراجل مشي.. بمجرد ما مشي لقيته قاعد علي الكرسي.. مش الراجل لا.. زائر الجن زائر
وقلي
_ اي يا نوبي أخيرا جيه الوقت اللي هتاخد حقك فيه
_ أنا عايز اعرف هعمل اي.. هاخد حقي منهم أزاي؟
_ هو والدك قالك ان الكتاب ده لهجة نوبية مش كده.. وهو ده اللي انت هتقوله
من بكرة هتقابل الناس اللي اتسببت في آذية أبوك وكانت سبب موت أبوك وأمك.. هتكلمهم بلهجتك النوبية.. لكن هي مش لهجة نوبية هي الطلاسم اللي هتحرقهم للابد
_ اللي آذوا أبويا وأمي 3 يا زائر.. 3 رجالة
_ منا عارف وال3 دول عايشين يا نوبي.. من بكرة هتبدأ انتقامك
…
عدي اليوم.. وتاني يوم خرجت للشارع.. الناس اتغيرت عن زمان.. بس أنا لقيت دكان مبني مكان بيتنا القديم.. كان دكان الحج عبد الباسط واحد من الناس اللي اتسببت في آذية لابويا
لقيت نفسي رايح عنده.. ياااه كل السنين دي خلت وشه مليان بالتجاعيد عجز وبقا شكله مقرف
دخلت وسلمت عليه وفكرته بيا
_ أزيك يا عم عبد الباسط.. أنت طبعاً مش عارفني أنا النوبي أبن حسن عبدالله اللي مات زمان في نفس مكان دكانك ده
_ النوبي! النوبي أزاي.. ده مات مع أهله!!
_ لا أنا عايش اهو قدامك.. أنا هربت ساعتها ورجعت علي بلدي أسوان وعيشت هناك الفتره اللي فاتت
_ حمد الله على السلامة يبني.. ابوك كان راجل محترم وكان غالي عليا
_ أه منا عارف هو ياما حكالي عنك وعن جدعنتك
_ وانت قاعد فين دلوقتي؟
_ في البيت ده اللي في أول البلد.. اشتريته من صاحبه
_ الف مبروك يبني.. وحمد الله على السلامه
_ تعرف ان اتعلمت اللهجة النوبية واني لو كلمتك بيها مش هتفهمني
_ مش هفهمك ازاي؟ طيب كلمني بيها
_ شمهروس كنسور ياشن مطال عصود.. ساجل حال موتان خرابون
_ يعني اي بقا؟
_ يعني ازيك عامل ايه
_هههه.. الله يحظك يا نوبي
_ اسيبك أنا عشان معايا شوية حاجات كده وهبقي أجيلك تاني
…
بعد يومين الحج عبد الباسط أبنه مات في حادثة عربية وبيته اتحرق بمراته وبنته.. وهو اتصاب بمرض نادر ملهوش علاج بيسحب الدم من الجسم لحد ما هيبقي جلد علي عضم
…
كنت فرحان ان الطلسم نجح.. وروحت علي الخمارة
اللي بيسهر فيها.. ذكي الخمورجي اللي ياما اتريق علي ابويا وقال كلام اقل ما يقال عنه فجور
الزمن مغيرش عم ذكي لسه بيشرب ومدهول.. صحيح كبر في السن لكن لسه زي ما هو
روحت وسلمت عليه وكان طبعاً مش فاكرني وده بصراحة خلاني اختصرت معاه السكة
_ طبعاً انت مش هتفتكرني يا عم ذكي.. مش فاكر حسن عبدالله تاجر الفراخ اللي مات محروق هو ومراته
_ يبني هو انا فاكر اسمي.. هو انا مين صحيح؟
_ طيب انا جاي اوصلك رسالة وامشي
_ رسالة.. قول وخلصني
_ شمهروس كنسور ياشن مطال عصود.. ساجل حال موتان خرابون
_ هو انا اللي سكران ولا انت؟
…
سبته ومشيت.. وده مطولش عليه العقاب بليل دلق بنزين علي نفسه وولع في نفسه وانتحر.. وبنته هي كمان رمت نفسها من البلكونة
كنت سامع زائر بيضحك وبيقولي فاضل واحد هنا.. عشان ترجع بلدك وتكمل
وفعلا هو كان باقي سعيد.. وده تاجر كبير بس مصاب بسرطان في الدم وهو اصلا بين الحياة والموت وأمله في الحياة هو أبنه الوحيد حسن اللي بيشتغل محامي
وهنا قررت انتقم منه في ابنه
وروحت للمحامي عشان اسأل علي أنه انا معايا قضية
_ أزيك يا أستاذ حسن
_ أهلا وسهلا بحضرتك.. أنت النوبي الساكن الجديد
_ أيوة أنا.. وده مش مجرد أسم.. أنا بتكلم نوبي كويس بس أنت مش هتفهم اللهجة صعبة عليك
_ أنا بحب أسوان والنوبة جداً واتمني انك تعلمهاني
_طيب عارف يعني اي
شمهروس كنسور ياشن مطال عصود.. ساجل حال موتان خرابون
_ لا يعني اي؟
_ أزيك عامل اي واخبارك؟
_ أنا عايز اتعلمها.. بس انت جاي في قضية ولا أي؟
…
كلمته عن قضية كده مش موجوده من الاساس.. وبعدها مشيت ووعدته بتكرار الزيارة
تاني يوم لقيوا حسن ميت في مكتبه.. بأزمة قلبية حادة.. أبوه مستحملش ومات وراه
اما امه فولعت في نفسها
…
كنت حاسس بانتصار واني أخدت حقي.. ولقيت صوت زائر بيقولي
_ ارجع بلدك أسوان.. لسه الانتقام مخلصش
لميت شنطتي من بليل وسافرت اسوان.. ووصلت الصبح المكان اللي ابويا وامي اتولدوا فيه.. وروحت علي العنوان اللي قلي عليه أبويا من زمان
ووصلت للمكان.. لبيت أبويا
وعرفت الناس اني الشيخ النوبي ابن حسن عبدالله وانا بعالج من المس والسحر بالقرآن الكريم
…
لما دخلت البيت.. كالعادة استقبلني زائر وقلي في تاجر من الاتنين مات قبل ما توصله.. كده باقي تاجر وشيخ الجامع اللي حكالك عنهم أبوك
بس انت دلوقتي الشيخ النوبي اللي بتعالج الناس وبتعمل خير.. هتلاقي في الاوضه دي كل حاجه متجهزالك
دخلت الأوضة عشان الاقي كتب سحر وصور للتاجر صبحي والشيخ مروان وصورة لبنت شابة وحاجات كتير متبقاش غير في بيت دجال
زائر قلي
_ صورة البنت.. بنت التاجر صبحي ودول التاجر صبحي والشيخ مروان
سبني زائر وقعدت مكاني اتمتم بالطلاسم واحضر جن قوي يقدر يساعدني في أول مهمة
عملت عمل بجن عاشق موكل علي بنت صبحي وعملت عمل للشيخ مروان بالخراب والموت بالبطئ
..
وبعد اربع ايام.. جالي صبحي ومعاه بنتي
وقلي
_ الحقني يا مولانا.. بنتي ليها كام يوم بتصحي من النوم تصرخ وتقول انها بتشوف واحد شكله وحش بيطاردها
_ متخفش يا أستاذ.. غمضي عينيكي وقولي ورايا
…
في الوقت ده سمعت صوت زائر في ودني بيقولي
نفس الطلسم ولكن بنية العلاج.. سامع
…
قولت قولي ورايا
_ شمهروس كنسور ياشن مطال عصود.. ساجل حال موتان خرابون
وفعلا كررت ورايا.. بصيت لابوها وقولتله
_ بنتك عليها جن عاشق وعلاجه مش سهل.. هتمشي دلوقتي وتجيني بعد 3 ليالي
_ حاضر يا مولانا حاضر
..
مشيوا وبعد 3 أيام الجن استولي علي جسدها وخلاها ولعت في البيت وكل اهل البيت ماتوا محروقين زي بضاعة أبويا اللي اتحرقت
لكن اللي كان هيشلني هو الشيخ مروان.. مفيش حاجه بتحصله.. والجواب كان عند زائر اللي قلي انه محصن بآيات من القرآن الكريم
وكان الحل اني طلبت منه ياجي البيت ضروري واني عاوزه في موضوع مهم
وهو في الحقيقة لبي الدعوة وجيه
..
لكنه فاجئني لما قال
_ أنا وابوك الله يرحمه مكناش علي وفاق مع بعض.. بس اخر حاجه كان ممكن اتوقعها انه يتهمني بالباطل أنا مقولتش علي أبوك زي ما قال للناس زمان كل غلطي اني سكت ومقولتش الحق
_ والساكت عن الحق شيطان اخرس
..
وعديت من وراه وبمنتهي الوحشية وفي حركة مباغتة ليه دبحته.. ايوة الدم ملي المكان
وعشان اخليك تسمعني ويبقي عندك فضول
كتبت جملة علي الحيطة فاكرها
(يظنون انها لهجتي النوبية ولكن في الحقيقه هي طلاسم قاتلة لكل من آذاني واخترق عالمي)
..
أنا خلصت يا بيه.. هي دي حكايتي
_ كل الكلام ده تمام بس المحكمة هتاخد بقتل الشيخ مروان بس ومش هتصدق كلامك
_ مش هوصل محكمة يا بيه.. العشيرة هتنتقم مني ودلوقتي عشان حكيت واتكلمت عنهم
..
وفعلا بمجرد ما النوبي خلص كلامي بوقه اتعوج وايده اتلوت ورجليه.. المنظر صعب لاقصي درجة ممكنة.. اتنقل النوبي بسرعة للمستشفي اللي كانت محتارة.. الدكاترة محتارين في حالة النوبي
ولحد دلوقتي النوبي حالته بتتدهور ومش بيقول غير ده عقاب العشيرة ليا.. عشيرة الشر.
…
تمت
