الظروف كلمة بنسمعها كتير ومن ناس كتير.. تسمع ناس تقولك انا ظروفي صعبة ومش عارف اعيش كده.. وللاسف الناس دي لو اتعرض عليها اي حاجة حتي لو حرام بتقبلها
ومش بتفكر.. اهم حاجة عندها الفلوس واعرف اعيش وخلاص ناس قلوبها ماتت ومبقتش بتفكر في الاخرة
….
حلاق الميتين
الجزء الاول
انا عارف اني غلطت كتير بس انا مستحيل اقتل.. لكن خلاص انا في الحجز وهيتحكم عليا بالاعدام.. قولت كتير اني مقتلتهوش لكن محدش صدقني.. قطع تفكيري صوت بيقولي
اخدت مني شعر ليه.. عملت بيه اي؟
اتلفت لمصدر الصوت وجسمي تلج.. شوفت واحد قاعد جمبي واحد انا عارفه كويس بس الراجل ده المفروض ميت دلوقتي… لكن فجأة وشوش المساجين بقت وشوش الميتيين الي اخدت منهم شعر واديته لنصار الدجال..وكلهم جايين ناحيتي.. صرخت وفضلت اضرب فيهم.. دخل الظابط واتنين امناء شرطة وقلهم خدوا حبس انفرادي.. خدوني ورموني في الحبس الانفرادي او في اوضة يعني عشان انا كنت في قسم شرطة.. بدأت الكوابيس تطاردني في الليلة دي وكنت بشوفهم ايوه الاموات وهما بيهاجموا عليا.. تاني يوم اترحلت للنيابة وحكيت هناك حكايتي محدش صدقني واتقال عليا مجنون.. والنيابة امرت بنقلي لمستشفي الامراض النفسية والعقلية للكشف علي قوايا العقلية
وفعلا دخلت المستشفى وسط المجانيين ودخلي واحد وقلي
_انا الدكتور سامي المسؤول عن حالتك وعاوزك تعرف اني مش ضدك انا هنا عشانك عشان اساعدك
_لا هتقول عليا مجنون زيهم
_ لا متخفش هصدقك بس انت خليك واثق فيا واحكيلي كل حاجة حصلت بصدق
وفعلا بدأت احكي… احكي اغرب حكاية ممكن تسمعوها في حياتكم
…..
انا اسمي مدحت سلام عندي 27 سنة متجوز امل وعندي منها ولد اسمه سمير.. وزي كتير من الشباب مكملتش تعليمي وصلت لمرحلة الثانوي وبعدها قررت اني هسيب التعليم واشتغل… وكان الشغل متوفر بصراحة اشتغلت مع ابويا.. ابويا كان عامل مشرحة وقررت اني هساعده واتعلم الشغل رغم صعوبته… ابويا علمني احترام الاموات وقلي ان الشغلانة دي ليها اصول واني لازم قبل ما ادخل المشرحة اخبط حتي لو عارف ان مفيش حد جوه ونفس الامر لما اجي افتح التلاجات عشان اخرج جثة لازم اخبط واخد الاذن وقلي اني لازم اتعامل معاهم زي ما بتعامل مع الناس العايشة مش معني انهم اموات اننا نتعامل معاهم باستهتار لا دول ليهم حرمة واحنا مش قدهم
المهم اني اتعلمت بسرعة وبعد 3 سنين كنت متجوز ومخلف سمير.. وابويا كان اتوفي وقتها وانا بقيت مكانه ورغم من ان الناس كانت شايفة شغلي صعب انا كنت بحب شغلي جدا لكن اكتر حاجة كانت مديقاني المرتب.. المرتب كان ضعيف جدا مقابل المجهود الي بقوم بيه وكنت بوفر طلبات البيت بالعافية.. وعشان اعرف اعيش محتاج قده 3 مرات
بس خليني اقولك في الاول طبيعة شغلي انا المسؤول عن اخراج الجثث للتشريح او حد جاي يتعرف على جثة مجهولة واستلام اي جثة وتخليص الاجراءات
وطبعا بيكون في زي تيكت علي رجل الجثة عشان تتعرف جثة مين
لحد كده مفيش حاجة والدنيا كانت ماشية طبيعي
لكن القصة الحقيقية بتبدأ في يوم زي اي يوم نزلت الشغل وكان في جثة لشاب وصلت المستشفى.. الدكتور طلب مني مدخلش الجثة التلاجة عشان هتتشرح دلوقتي وفعلا دخلتها المشرحة وسبتها
ورجعت لمكتبي عملت كوباية الشاى وقعدت وانا بشتغل سمعت صوت بيقولى السلام عليكم
اتلفت لمصدر الصوت.. كان راجل في الاربعين من عمره لابس جلبية وعمة فوق راسه عنده دقن سودة كثيفة وليه هيبة كده… قولتله
_افندم اقدر اساعدك بحاجة
_ انا اعرفك كويس بس انت متعرفنيش يا مدحت.. انا واحد ربنا اداله هبة انه يساعد الناس ويجيب حقوقهم
_تمام بس انا مالي بده كلوا
_عشان انت وقع عليك الاختيار انك تساعدني في الخير ده يا مدحت وترضي ربنا
_ اختيار اي واساعدك في اي هو انا اعرفك!
_ انا الشيخ نصار وجاي النهاردة اعرض عليك عرض لو قبلته هتكون من الي ربنا اختارهم عشان يعملوا الخير.. انا طالب حاجة بسيطة جداً طالب منك شعر من اي جثة عندك في المشرحة خصلة واحدة بس
_اه قول كده بقا يبقي متقولش شيخ انت دجال نصاب جاي عاوز تخليني اغضب ربنا واساعدك في اعمال النصب والدجل.. امشي من هنا يا راجل انت بدل ما اطلب الشرطة
_ اوعي تقول كده تاني انا مش دجال انا الشيخ نصار انا الي بجيب للناس حقوقها
…
انا شوفت الفلوس مبقتش عارف ارد ولا اتكلم.. فلوس كتير ولقيت نفسي بقوله
_كام دول؟
_ 5 الاف جنية اظن مبلغ مش قليل على خصلتين شعر
_طيب عدي عليا بليل الساعة 1 كده عشان الجو يكون هدي شوية وهجبلك الأمانة
…
مشي نصار ده وانا في حيرة من امري مش عارف اتصرف ازاي ولا هعمل اي.. بس ده مبلغ مش قليل انا بوفر اللقمة لعيالي بالعافية ومستحيل ارفض عرض زي ده سمحني يا ابويا تتحرق المبادئ قد الفقر وناس مش بترحم… استنيت الدنيا هديت
ودخلت المشرحة مفيش حد وكلهم مشيوا.. أنا مش اول ادخل المشرحة بس انا المرة دي خايف.. خايف بجد وجسمي بيتنفض.. فتحت درج تلاجة عشوائي وطلعت منه جثة وكنت واخد معايا مقص
وقصيت خصلتين ورجعت الجثة مكانها مكنتش مصدق اني عملت كده
خرجت قعدت علي مكتبي وانا ندمان اني عملت كده لكن مع ندمي كنت بفتكر قد اي احتياجي للفلوس مهم.. على الساعة 1 لقيت نصار او الشيخ نصار ده جيلي وبيقولي ها جبت الشعر
_ اه اهو.. فين الفلوس
_ اتفضل الفلوس اهي
..
اخدت الفلوس وانا مش مصدق اني ماسك المبلغ ده حتة واحدة.. نصار شاف فرحتي وفرح وقال مش اول ولا اخر تعامل ما بينا يا مدحت… مردتش عليه الفلوس كانت مش مخلياني سامعه اصلا ومشى نصار
رجعت البيت شوفت اي الحاجات الي ناقصة مراتي وابني حاجات بسيطة جداً لناس عايشة يوم بيوم مبلغ زي ده قدر يفرحهم
لكن مكنتش مرتاح احساس انك عملت حاجة غلط احساس وحش جداً
رجعت المستشفى تاني يوم وبدأت ارجع اشتغل واحاول انسي الغلطة دي وقولت انها مرة وخلاص… ونصار مجاش يوم والتاني والتالت ومجاش.. الحمدلله
لكن بدأت الفلوس تخلص ورجعت مراتي تطلب ورجعت الدنيا صعبة من تانى
وفي اليوم الرابع لقيت نصار جاي وبيقولي
_ ازيك يا مدحت اظن الفلوس ظبطت الدنيا معاك
_ اه الحمدلله بس انا مش هعمل كده تاني
_ليه بس كده يا مدحت هتزعلني منك ليه
خلي بالك انا زعلي وحش
_يعني اي انت بتهددني يعني ولا اي مش فاهم
_ هما مين دول؟
_ الاسياد الي بتساعد الناس ترجع حقوقها يا مدحت لو حد فكر يمنعهم من الخير الي بيعملوه بيعتبروه ضدهم.. ودول انتقامهم صعب يا مدحت
_هترجع تاني تقولي الخير ومساعدة الناس.. بقولك اي انت ليك الشعر وانا ليا الفلوس.. تمام
_ يعني موافق.. طيب هعدي عليك بليل عشان اخد الشعر
…
ايوة وافقت مضطر اعمل كده ما اهو مفيش حل تانى.. الي عمل الحرام مرة هيعملوا مليون مرة وانا خلاص رجلي جات في الحرام.. دخلت المشرحة من تاني وجبتله الشعر المطلوب.. واستنيته لحد لما جيه
واخد مني الشعر واداني الفلوس وقلي
_ المرة دي مش هغيب وهرجعلك قريب جداً بس انا عاوزك تفكر دايما في مصلحتك وتسيبك من موضوع حلال وحرام ده.. فاهم
_ فاهم.. شوف انت هترجع امتي وانا جاهز
…
خلاص مبقاش فارق معايا حاجة كل حاجة اتعلمتها من ابويا كانت بالنسبالي مجرد كلام ملهوش قيمة.. القيمة الحقيقية في الفلوس الي هقدر بيها اعيش واصرف علي بيتي واكبر ابني واعلمه كويس.. خلاص ايام الفقر راحت.. وفعلا نصار متأخرش المرة دي.. غاب يوم واحد ورجع تاني وقلي
..
_اظن ملحقتش تصرف الفلوس.. مش كده
_ لا ملحقتش
_ انا كنت عارف بس الشغل كتير والناس الغلابة عاوزة حقوقها
_ حاضر.. بس انا عندي سؤال؟
_ انا عارف سؤالك كويس.. كنت هتقولي ليه جاي تاخد الحاجة دي من المشرحة ما الترب موجودة صح
_ انت عرفت منين اني هقولك كدة
_ افكارك كلها عندى.. حتي تأنيب ضميرك واحساسك بالذنب وكلام والدك الي بيرن في ودانك.. بس انا عارف انك ذكي وانك مش هتضيع الفرصة عشان شوية كلام اهبل ولا اي
_مش عارف اقولك اي.. انا هبتدي اخاف منك
_ مدحت متخفش انا جتلك عشان اساعدك عشان تعرف تعيش انت ومراتك وابنك حياة كريمة
_ الساعة 1.. استني هدخل اجبلك الامانة
….
دخلت وهو واقف بره كنت بجد بفكر في كلامه وان افكاري عنده هو بيقراها وعنده القدرة دي.. فتحت درج التلاجة وقصيت خصلتين الشعر بالمقص.. وقفلت الدرج والمشرحة واديته الشعر واخدت منه الفلوس…. وخلاص بقيت شغال قدام الناس عامل مشرحة ومن ورا الناس حلاق ومش اي حلاق لا.. ده حلاق ميتين
نصار كان بيجيلي كل يومين تقريباً يطلب مني الشعر واجبهوله واخد الفلوس واستمر الوضع علي كده 6شهور.. الفلوس معايا كترت اوي وبقيت قادر اعيش واصرف علي البيت.. لحد ما حصلت حاجة
في يوم كنت قاعد علي المكتب وكانت الساعة 2 بليل ولقيت نصار داخل وبيقولي ازيك يامدحت
_ اهلا يا مولانا اهلا نورت.. اقعد علي ما اجبلك الامانة
_لا يا مدحت انا جيلك النهاردة عشان سبب تاني
_ سبب تاني ازاي؟
_ شغلانة هتاكل منها عيش احسن من موضوع الشعر وفيها فلوس اكتر
_ايدي علي كتفك يا مولانا شغلانة اي دي
….
حط نصار ايده في جيبه وطلع حاجة قماش متخيطة علي شكل مثلث عاملة زي الحجاب كده وقال
_ انا عاوزك تحط الحجاب ده في بوق جثة مكملتش 3 ايام عندك في التلاجة.. بس هي دي الشغلانة
_يسلام ولما اخدت منهم الشعر مكنتش حرمة اموات.. بقولك اي بلاش تعيش دور البرئ دلوقتي انت هتاخد ضعف المبلغ الي كنت بتاخده.. انا بساعدك وانت مش عايز تساعد نفسك
_ ضعف المبلغ انت بتتكلم بجد؟!
_اه طبعاً بجد.. ها قولت اي موافق.. موافق يا شيخ نصار
_الله ينور عليك.. ايوة كده يلا خد الحجاب ومتنساش جثة معداش عليها 3ايام
_ وليه المدة دي بالذات؟
_ يا جدع عيب عليك ده انت خبرة في الشغلانة.. بس انا هقولك باختصار بوق الجثة بيكون سهل فتحه في اول 3ايام.. لكن بعد كده بيكلبش وبيكون رافض يتفتح وطبعا كده هتضمن ان محدش هيفتح بوقها ويكتشف السر
وفي سبب تاني بس ده يخص شغلي انا افضل انك متعرفهوش
_ فهمت يا شيخ نصار
_انا همشي دلوقتي وهستني النتيجة والفلوس اهي خدها بس خلي بالك لو منفذتش هعرف
…
ومشي نصار وانا في حيرة.. المبلغ الي أنا ماسكوا في ايدي دلوقتي مبلغ كبير وفي نفس الوقت بقي عندي فضول اي الي هيحصل يعني لما احط الحجاب في بوق الجثة هو هيستفيد اي يعني.. دخلت المشرحة عشان في جثة كانت لسه واصلة المستشفى وهتتشرح بعد اربع أيام.. فتحت التلاجة وفتحت بوق الجثة وانا بترعش ومرعوب من الي بعمله وحطيت الحجاب في بوقها وقفلته وقفلت باب التلاجة.. بمجرد ما قفلته
سمعت صوت خلع قلبي من مكانه
.. كان صوت.. صوت… يتبع الجزء الثاني
….
ان شاء الله استنوني في جزء تاني واحداث مرعبة ومفزعة من حلاق الميتين
حلاق الميتين
الجزء الثاني
بمجرد ما قفلته سمعت صوت خبط جاي
من جوه التلاجة ونور المشرحة بدأ يترعش.. خرجت اجري وانا مرعوب هو الي بيحصل بالظبط الي بيحصل
في اليوم ده وانا خارج سألت حارس الأمن الي قاعد بره عن نصار وقولت يمكن يكون عارفوا.. الحارس قلي
_هو حد ميعرفش مولانا الشيخ نصار.. ده البركة بتاعتنا
_ طيب انت تعرف هو ساكن فين؟
_طبعاً عارف عاوز تروحلوا.. خلي بالك لو عندك مشكلة اطمن هتتحل
_ تمام فين عنوانه؟
…
طلع الشيخ نصار عايش فى قرية صغيرة قريبة مني.. وقررت اروحله عشان عندي فضول عاوز اعرف اي الشغل الي بيكسب الفلوس دي واي الي حصل معايا في المشرحة ده كان لازم افهم
اتحركت علي هناك ووصلت القرية.. قرية كبيرة الناس فيها واضح عليهم انهم غلابة
سألت واحد منهم ودلني على بيت الشيخ نصار.. بيت مكون من دورين بيت في منتهي الجمال.. البيت كان مفتوح وفي كراسي كتير علي اليمين والشمال وناس كتير قاعدة وواحد بينظم الدخول وكأني عند دكتور.. قربت من الراجل الي علي المكتب وقولتله
_عاوز اقابل الشيخ نصار ضروري
_ استني دورك
_ حاضر بس اتفضل اقعد
….
خمس دقايق ولقيت واحدة خارجة من عند نصار ومبتسمة وكأنها اسف في التشبيه كانت في الجنة جوه
ولقيت الراجل بيقولي اتفضل يا استاذ مدحت مولانا مستنيك جوه
دخلت وانا متوقع هشوف اي.. وفعلا الشيخ نصار ده قاعد وفي ريحة بخور نفاذ بتملي المكان وقدام الشيخ وانا اسف اني بقول عليه شيخ
ترابيزة عليها قماشة بيضة مكتوب عليها حروف بالدم حروف متفرقة واتكلم وقال
_كنت عارف ان فضولك هيقتلك وهتاجي لحد هنا
_انا حصلتلي حاجة غريبة في المشرحة بعد ما حطيت الحجاب في بوق الجثة
وعشان كده جتلك انا مش فاهم حاجة
_ متخفش يا مدحت طول ما انا معاك متخفش انت في امان الاسياد راضيين عنك
_ انا عندي طلب يا شيخ نصار
_ اتفضل يا مدحت اطلب
_انا عاوزك تعلمني اعالج الناس زيك واساعدهم واجيب حقوقهم
_انت بتقول اي بس يا مدحت تتعلم اي
الشغل ده مش اي حد يعرف يعملوا ده شغل صعب وفي آذية ولازم يكون ايمانك قوي عشان تعرف تتعامل معاهم دول جبارين
_ انت هتبخل عليا بعلمك ولا اي يا شيخ نصار مش انت بتساعد الناس وبتجيب حقوقهم وقولتلي اني اتكتب عليا اكون واحد منهم
_ايوة بس انت ليك دور زي ما انا ليا دور في مساعدة الناس
…
فضلت اتجادل معاه وهو كان رافض وشايف اني مش هقدر اعمل ده وقولتله اني مش هقصر في موضوع الشعر والحجاب واني هسمع كلامه.. فقلي
_ كل الي اقدر اخليك تعملوا انك تشوفني وانا بعالج الحالات وحاول تتعلم
..
وافقت علي كلامه وقولت اكيد هفهم هو بيعمل اي
بعد شوية دخلت ست في الاربعينات من عمرها وقعدت قدام الشيخ نصار
وقالت
السلام عليكم يا مولانا انا جاية في مشكلة وعاوزاك تحلها
_احكي يا ست جواهر احكي
_ مرات ابني يا مولانا عاملة لابني عمل.. ابني بيسمع كلامها فكل حاجة عامل زي الخاتم في صباعها.. وهي عرفت انها عندها مشكلة في الرحم وعاوزة ابني يدفعلها مبلغ كبير عشان تعمل العملية الي اسمها الحقن المجهري وهو موافق هتخرب بيته وانا مش عارفه اتصرف ازاي
_ الحل بسيط هتحاولي تقنعي ابنك انه يجيبها هنا عندي
_منا حاولت يا مولانا قالت عليا بخرف واني مجنونة وابني مدفعش عني حتي
_ اي المطلوب؟
_ عاوزة اخلص منها عاوزة ادمرها عاوزة ابني يطلقها
_طيب تمام.. هي اسمها اي واسم والدتها
_ اسمها منال بنت ولاء
_معاكي صورة ليها
_ اه يا مولانا اتفضل الصورة اهي
….
نصار مسك صورة البنت وغمض عينيه وقال
اقسمت عليكم يا ملوك الجن السفلية بحق النور ونور النور بحق ما بين الكاف والنون وبحق طارش الملك الاعظم الذ تزلزلت له البراكين احضروا ونفذوا ما أموركم به
ومسك شعر من الي كنت بجبهولوا ولف الشعر حولين الصورة وبدأ يحطها في الحجاب وقالها
_ حياتها هتتقلب جحيم وابنك هيكرهها وهيطلقها متخفيش
_ بجد يا مولانا
_ اكيد
…
خرجت الست من عند الشيخ نصار.. وانا مش فاهم حاجة حرفيا متنح.. الشيخ نصار اتكلم وقال روح دلوقتي انا هروح مشوار
_ مشوار اي
_ملكش دعوة روح وهعدي عليك بليل عشان اجبلك الحجاب
…
خرجت من عنده وانا مش فاهم حاجة بس انا مش هضحك علي نفسي انا عارف من الاول انه دجال لكن هو رايح فين وياتري هيعمل اي؟
كنت مشتت جداً محتاج اني انام وافصل شوية رجعت البيت.. اترميت علي السرير ونمت.. نمت بعمق
وصحيت كان فاضل علي الشغل ساعة.. قومت واخدت دش واكلت ونزلت الشغل
عاوز الوقت يعدي مستني نصار عشان عندي شغف اعرف هو راح فين؟
علي الساعة 2 لقيته جاي كالعادة وبيقولي _الحجاب اهو.. وفلوسك اهي بس يلا خلص
_ انا بس في عندي سؤال
_ اسأل بس خليك فاكر الفضول مش كويس
_ مش شغلك ركز في الي انت بتعملوا احسن
وبلاش تدخل واياك تفكر تمشي ورايا هعرف وساعتها هما مش هيرحموك
….
كان عصبي جداً وسبني وخرج مكنتش عارف هتصرف ازاي ولا هعمل اي بس انا لازم اعرف اي السر الي ورا الراجل ده… كالعادة دخلت وحطيت الحجاب في بوق جثة معداش عليها 3ايام
وخلصت الشغل في اليوم ده عشان اروح تاني لنصار واشوف هو بيعمل اي تاني
وروحت ونفس الكلام بنت جاية تعمل عمل لضرتها الحامل عاوزها تسقط.. الشيخ نصار اتكلم وقال
_ بحق قرابين الجن السبع والعهود السبع والشياطين السبع.. بحق مارق ابن بني ظام
موت الجنين انتقام اللعين كشف اليقين
…
وفضل يعيد ويزيد في الكلام ده.. المرة دي كنت حاسس بزلزال في الاوضة.. وطبعا هي كانت جايبة صورة لضرتها لف نصار عليها الشعر وقالها
_في خلال اسبوع هتسقط متخفيش.. المهم انك في الاسبوع ده حاولي تحسني علاقتك بزوجك عشان هيبان انها هي الي سقطت العيل
_بجد يا مولانا مش عارفه اشكرك ازاي
..
وطلعت فلوس كتير ومدت ايديها فقلها اديهم لعبد الستار بره… وبصلي فقولتله
_اروح عشان وراك مشوار صح
_ برافو عليك ابتديت تفهم يا مدحت
….
خرجت من عنده وانا عايز اعرف هو بيروح فين وبيعمل اي بالظبط… بدون الدخول في تفاصيل مرهقة كل يوم كنت بروح للشيخ نصار عشان اعرف هو بيعمل ايه ولا بيروح فين بعد كل جلسة
….
لحد ما حصلت حاجة صعبة جداً.. حاجة لا تخطر على عقل بشر… يتبع الجزء الثالث والاخير
….
حلاق الميتين
الجزء الثالث والاخير
في يوم كنت في الشغل.. ووصلت جثة للمكان
الجثة كانت مجهولة الهوية والوش متشوه بطريقة بشعة.. وعرفت ان الراجل ده مطلعينه من حريق
دخلتها التلاجة ورجعت مكتبي لكني لقيت نصار مستتيني وجايبه الحجاب
_حظك كويس في جثة لسه واصلة
_طيب كويس جداً.. خد الحجاب وفلوسك
…
مشي ودخلت زي كل مرة فتحت درج التلاجة وطلعت الجثة وفتحت بوقها وحطيت في الحجاب.. لكن.. لكن.. الجثة فتحت ايوة فتحت عينيها وشهقت بقوة
اعوذ بالله من الشيطان الرجيم.. اعوذ بالله من الشيطان الرجيم هو في اي
ومسك ايدي وضغط عليها حسيت ايدي هتتكسر.. فضلت اعافر عشان ابعده عني لكن مش قادر افك نفسي منه.. وكان بيطلع منه صوت زي انين لكنه كان صوت مخيف جداً
فضلت قاعد علي المكتب بتنفض لحد لما خلص الشغل.. طلعت جري علي نصار عشان افهم منه
لكنه قال ان كل دي تخاريف وان مفيش ميت بيصحي
ورجعت البيت دخلت اوضتي لقيت مراتي نايمة دخلت السرير ونمت انا كمان.. لكن وانا نايم حسيت بأيد بتتحسس ملامحي كنت خايف جداً في نفس سخن في وشي… فتحت عينيا كان في وشي هو تاني
اعوذ بالله من الشيطان الرجيم
حط ايده جوه بوقه وطلع الحجاب.. ولقيته عاوز يحط الحجاب في بوقي انا.. صرخت وصحيت علي ايد مراتي بتقولي
_مالك يا مدحت فوق فيك اي؟
…
كنت تعبان جداً وحاسس بخنقة.. فضلت قاعد في البيت طول اليوم لحد ما نزلت الشغل ولما دخلت لقيت الراجل الي جاب الجثة دي هنا وكان بيتجادل مع الدكتور وبيقوله
_ مفيش شبهة جنائية ولا حاجة ده راجل النار مسكت في بيتهم ومات ومش لازم تشريح
_ انت يا استاذ هتفهم في شغلنا اكتر مننا انا قولت الجثة دي هتتشرح وخلص الكلام
…
روحت للراجل وقولتله
_انت ليه مش عايز الجثة دي تتشرح
_ تتشرح اي وزفت اي.. ميهمنيش اصلا انا عاوز ادفنه واخلص وكويس اني اتبرعت عشان ادفن واحد زي ده
_واحد زي ده ازاي؟
_ يا استاذ انت مش عارف حاجة.. الراجل ده ملعون ليوم الدين.. ده واحد دبح بناته وقدمهم قرابين للجن عشان يفتح مقبرة اثرية.. وفي الاخر البيت ولع بيه ومحدش عارف السبب
الناس كلها اتبرت منه وقالت لا هنحضر دفنة ولا هنمشي في جنازة ولا هنعمل عزا.. بالعكس احنا لازم نفرح عشان الملعون ده مات
…
ا
انا كنت بسمع كلام الراجل ده ومش مصدق الي بيقوله… دلوقتي عرفت ليه بيحصلي كده
سبت الراجل ودخلت للدكتور عشان امنعه من تشريح الجثة.. قلي
مالك انت كمان… هو انا مش عارف يعني ان دي جثة جاية في حادث ولازم تتشرح
_ عارف بس
_مفيش بس انا هشرح الجثة دي وهعمل شغلي
…
سبت الدكتور.. والمشرحة كلها وروحت لنصار وقولتله
_ انا مش هكمل في الشغلانة دي انا بقيت بشوف حاجات غريبة خلاص مبقتش قادر
_تاني يا مدحت منا قولتلك شيل الاوهام دي من دماغك
_ دي مش اوهام انا خلاص اخدت قراري ومش عاوز منك فلوس ولا اي حاجة.. انا بعدت عن ربنا وسلمت نفسي لشيطان زيك يتحكم فيا لا خلاص لحد كده وكفاية يا نصار
_هههه كفاية اي.. انت شبعت وجاي دلوقتي تقول عليا شيطان.. ماشي يا عم الشيخ انت عملت كل ده بارادتك انت كنت زيك زي اي حد ضعيف قدام الفلوس
_ ايوة بس انا خلاص توبت ومش عاوز حاجة ولو مبعدتش عني يا نصار انا هقتلك سامع هقتلك
….
وخرجت من بيت نصار لقيت الناس كلها ملمومة وبتسمع الخناقة.. مشيت روحت علي بيت ربنا واستغفرته وفضلت ابكي واقوله سامحني.. ورجعت شغلي وانا مصمم اني مش هعمل اي حاجة حرام تاني…. فات يوم والتاني وابتديت ارجع لشغلي وانسي كل حاجة
لحد ما عدي اسبوع.. كنت بشوف حاجات غريبة برضو زي ما في مرة دخلت المشرحة لقيت جثة الملعون علي ترابيزة التشريح… الجثة الي المفروض ادفنت
في اخر الاسبوع وصلت جثة لراجل مدبوح وكان وشه متغطي بمجرد ما كشفت وشه صرخت.. دي جثة.. جثة.. جثة نصار.. نصار مدبوح
لا اكيد بحلم اكيد ملحقتش اعمل حاجة لقيت الشرطة داخلة تقبض عليا وعرفت اني متهم بقتل نصار عشان شهادة الناس الس سمعتني وانا بهدده.. وفي الحجز شوفت كل واحد انا اذيته من الميتين وكلهم كانوا بيعذبوني وحكيت كل حاجة وجابوني هنا.. بس يا دكتور هي دي حكايتي
….
لما خلصت حسيت الدكتور مش مصدق كلامي وقال انه هيكتب تقرير.. واتفجأت ان التقرير مكتوب فيه اني غير سوي نفسيا وانه مينفعش يتحكم عليا حكم مشدد خصوصا ان سلاح الجريمة الدليل القاطع مش موجود
المحكمة حكمت اني اقعد 3 سنين اتعالج في المستشفي واذا تميت شفائي اخرج.. قضيت 3سنين من عمري مع المجانين وانا عاقل وخرجت
..
ركبت مواصلات عشان ارجع بيتي ونزلت قبل بيتي بشوية عشان ادخل الشارع لكن وانا في الطريق تليفوني رن
_ الو
_ الف مليون مبروك خروجك بالسلامة
_الله يبارك فيك كله بفضلك لولا التقرير كان حبل المشنقة اتلف حوالين رقبتي
_ هعدي عليك النهارده عشان نقعد مع بعض ونشوف هنعمل اي
_تمام مستنيك
….
ايوة الي سمعتوا صح… انا مكدبتش في الي حكيته من شوية غير في حاجة واحدة بس
الموضوع بدأ لما نصار بخل عليا بعلمه ورفض يوريني هو بيروح فين عشان يعرف يعمل الحجاب وبعد تهديده ليا.. صممت امشي وراه وعرفت انه بيروح المقابر وبينزل قبر معين وبيعمل طقوس لكن مقدرتش اعرف اي هي الطقوس دي.. واليوم الي اتخنقت مع نصار فيه انا مكنتش عاوز اتوب لا انا كنت عاوزه يعلمني الطقوس ولما عرف اني مشيت وراه زعق معايا وهددته اني هقتله وقولتله لو معلمتنيش ملكش عندي شعر ولا حجاب
في نفس الوقت كان نصار عامل عمل لراجل معاه شركة كبيرة.. الراجل ده مات وابنه دكتور جالي وقلي وهو منهار انه نزل القبر علي ابوه وشاف حاجات صعبة وان ابوه كان راجل كويس ومعملش حاجة تستاهل ده.. وقولتله اني عارف السبب وحكتله كان عاوز يروح يقتل نصار لكني منعته.. ومكنش قدامي غير اني اسرق كتب نصار الي بيستخدمها في اعمال الاذي عشان اضعفه
وروحت فعلاً اسرقه وكنت واخد معايا سكينة.. ودخلت البيت وانا بجيب الكتب صحي من النوم.. استغليت انه دخل المطبخ يشرب ودخلت وراه ودبحته.. ايوة انا الي قتلت نصار.. هربت والكتب معايا وكلمت الدكتور وقولتله قلي وقتها
_الله يخربيتك اتسرعت ليه احنا مش متفقين
…
فهمني انه هيتقبض عليا واني لازم اعمل فيها مجنون عشان اتحول للمستشفي وفعلا ده الي حصل وهو طلب يكون المسؤول عن حالتي
ايوة هو الدكتور سامي وكتب تقرير خرجني من القضية.. بس نسيت اقولكم اني اخدت شعر من نصار وعملت الطقوس الي في الكتب ولما نصار جالي المشرحة جثة دفنت الحجاب في بوقه وده كان اتفاقي مع الدكتور عشان يكون جحيم وعذاب عليه في القبر
…
رجعت البيت مراتي وابني وحشوني قعدت معاهم اليوم كلوا وعلي بليل نزلت قابلت الدكتور سامي ودار ما بينا الحوار ده
_ كفارة يا مدحت اخيرا خرجت
_الحمدلله خرجت بفضلك يا دكتور
_ طيب ناوي علي اي
_هكمل مكان نصار ده كان بيكسب كتير بس مش هنا هسيب البلد دي وهروح بعيد عشان الكل ينساني
_ طب وانا
_ خلاص يا مدحت هرجعك السجن بس المرة دي هتلبس البدلة الحمرا انا معايا كل الادلة الي تثبت انك قتلت نصار
_ اعمل الي تعملوا يا دكتور بس مش هتقدر ترجعني السجن تاني
…
مشي الدكتور سامي وانا بقول منا مش هسيبك تهد كل الي فكرت فيه.. قعدت مع نفسي في شقة اجرتها بعيد عملت خلوة وحضرت جن موكل بالموت والدمار.. وطلبت منه موت الدكتور سامي.. وبعد 5 ايام عرفت ان الدكتور سامي عمل حادثة ومات.. كنت فاكر اني كده خلصت منه لكن.. الي مكنتش عامل حسابه ان الدكتور سامي كان مسجل كل المكالمات الي بينه وبينه وحافظها في العيادة الخاصة بيه
اتفتشت العيادة عشان شكوا ان الحادثة بفعل فاعل وللاسف وقعت التسجيلات في ايديهم
اتقبض عليا.. واتحكم عليا بالاعدام لاني قتلت نصار والدكتور سامي.. انا خلاص هيتنفذ فيا الحكم بعد ساعات وانا ندمان علي كل حاجة عملتها وكتبت حكايتي عشان الناس تعرف ان دي نهاية الحرام.
…
تمت
…
محمود الأمين
..
