مراتي ماتت بعد سنة من جوازنا! كانت صدمة عمري اللي لحد النهاردة مش قادر اتخطاها ولا اعديها، كأن الحياة وقفت بموتها وخصوصا اني فضلت طول عمري احبها، وبعد ما اتجوزتها وقولت كل حاجة بقت تمام وحققت حلم عمري، ماتت وفارقتني وسابتني لوحدي بتعذ.ب في بعدها عني، لكن كل ما افتكر العذاب اللي عاشته في السنة دي بقول انها ارتاحت اخيرا، كان تعبها كبير وغريب ومخيف، لا دكاترة قدروا يشخصوا مرضها، ولا شيوخ عرفوا تفسير للي كان بيحصلها!!, وفي النهاية راحت مني ..
من بعد شهر جواز بدأت ألاحظ انها بتتعب كتير اوي، بتدوخ دايما وتصدع وعنيها تزغلل، وكل ما تبقى قاعدة وتقوم تقف او توطي وتترفع بتشوف الدنيا سودا لثواني وبعدين الرؤية تبقى طبيعية، قولت يمكن تعب حمل او انيميا، لكن لما روحنا لدكتور اكد ان لا في حمل ولا انيميا، ومكنش عنده تفسير للي بيحصلها، بس نصحها انها تمارس تمترين رياضية في البيت وكتب لها مقويات ومكملات غذائية ..
مع مرور الوقت التعب بدأ يزيد، واتقلب لإعياء مستمر، خمول في الجسم وكسل، قئ دايما حتى لو مكنتش كلت او شربت، تكسير في الجسم ووجع وألم …
بدأت تخس بطريقة ملحوظة، وتحت عنيها يبقى اسود من قلة النوم، كنت اقلق من نومي الاقيها صاحية، قاعدة في الأرض وباصة ف اتجاه السقف ومبرقة وعنيها طالعة لبرة!!, ولو اتكلمت وسألتها قاعدة كده ليه متردش عليا؟!!, وتقوم تنام عادي وتاني يوم الصبح متبقاش فاكرة اي حاجة خالص !!!.
وكنا كل ما نروح لدكتور يشخص حالتها تشخيص مختلف، مرة انيميا حادة، مرة اعياء من مجهود معين برغم انها اصلا مبتعملش مجهود ومبقتش بتتحرك من سريرها من الأساس الا لو قامت للحمام او جالها نوبة القئ !!..
لحد ما في مرة صحيت من النوم قرب الفجر اشرب، ولقيتها واقفة في الصالة وباصة ناحية الحمام والمطبخ، وبتتكلم مع حد، واول ما قولتلها بتكلمي مين؟!, لفت رقبتها بطريقة غريبة!!, وبصت لي بغضب وقالت لي بصوت غليظ ومرعب :
اسكت، ملكش دعوة..
وفجأة وقعت على الارض مغمى عليها !!.
جريت شيلتها ونيمتها على السرير وبدأت افوقها، وبعد حوالي ربع ساعة فتحت عنيها وهي بتقول باستغراب:
هو انا فين؟!!..
سألتها كانت بتكلم مين ناحية الحمام؟!..
جاوبتني باجابة غريبة جدا قبضت قلبي وقالت :
انا مش فاكرة غير اني كنت في قبر ضلمة فيه نور خافت، والنور ده عاكس خيال شئ مخيف، كان بيقرب عليا، وشايفاك بس بعيد جدا، واول ما انت ندهت عليا هو اختفى وانا فقدت الوعي ….
فضلت تعيط وانهارت من العياط، حاولت اهديها وعرضت عليها نروح لدكتور نفسي لكنها رفضت وغضبت جدا، وعشان مزعلهاش غيرت الموضوع ولغيت الفكرة، وقومت عملت لها كوباية ينسون عشان تهدى وتنام، واول ما شربتهلها نامت فعلا….
تاني يوم الأمور اتطورت اكتر، وبقت وهي صاحية وقاعدين كده الاقيها بتتكلم مع حد بكلام مش مفهوم، وأسألها متردش وترجع تغير الموضوع، فضلت على كده كام يوم لكن اللي خلاني اعديها ان صحتها ابتدت تتحسن شوية، والقئ المستمر اتوقف، ورجعت تاكل افضل من الأول، وبدأت تنزل السوق، بس كانت بتغيب اوي بره، عمري ما شكيت فيها، بس كنت خايف عليها لتأذي نفسها، وخصوصا بعد كل اللي هي مرت بيه ده وانا شاهد عليه بعيني …
اضطريت مرة اني اراقبها، فلقيتها راحت بمقابر في منطقة من ضواحي الجيزة!!, ومعرفش ازاي وصلت لها او جالها قلب تدخلها!!, انا وانا ماشي وراها ولقيتها قربت من المكان ده خفت اصلا اكمل، ولولا ان هي اهم حد في حياتي كنت رجعت وسبتها لمصيرها !!..
لما كملت وراها لقيتها وقفت قدامةاحد الأحواش، بصت حواليها ودخلت، وانا قربت واستخبيت خلف شاهد احد القبور وكانت الرؤية واضحة، شالت غطا القبر نفسه، ونزلت جواه!!, كانت صدمة بالنسبالي!!, ومبقتش عارف اعمل ايه واتصرف ازاي؟!, اكمل وراها ولا ارجع لأن اللي هي بتعمله ده خارق وخارج حدود اي عقل؟!!.
خدت القرار، ورجعت البيت، حسيت ان في حاجة غلط، واتاكدت لما رجعت البيت لقيتها موجودة !!, وقالتلي بأسلوب تحذير وتهديد:
جيت اقري منها يادوب بس صدرت ايدها في صدري، وقعت من قوة دفعتها وزحفت متر على الأرض ووشي خبط في الأرض وحاجبي اتفتح!؛, لقيتها بتجري عليا مخضوضة وبتقولي وقعت ازاي وايه حصلك؟!..
الغريب انها اتبدلت، والاغرب انها جت من بره، من الشارع !!!!!…
بعد ما روحنا للدكتور كانت تشخيصة ان حدها اكتئاب حاد وصدمة نفسية وعصبية، كتبلها على شوية مهدآت، وحدد لها ميعاد زيارة اسبوعية، وفات بعدها 3 شهور حالتها بقت مستحيل حد يتحملها ويتخيلها، بقت تكسر كل حاجة في الشقة، مبقتش اقدر عليها في وقت غضبها، اللي بتتكلم فيه بصوت بشع وكأنها راجل، وعنيها تقلب ابيض، لدرجة ان انا واخواتها الاتنين الرجالة كنا بنستعمل كل قوتنا في اننا نقدر نسيطر عليها، وبالعافية كما بنقدر، بعد ما نتخبط ونضرب وكانت الامور بتوصل لأصابات، وفي مرة دراع اخوها اتكسر !!..
كانت بتفضل تقول ان في واحد معانا في الشقة، وكل ما نروح مكان او لشيخ تفضل تقول ان كل الناس بتبصلها، وتتخانق مع اي حد، وكمنا للأسف بنضطر نقول للناس انها مريضة نفسيا وبتتعالج ونقدم اعذار ملهاش آخر..
كل شيخ كان بيأكد ان معمولها سحر قوي جدا من واحد دجال كافر، ومحضر عليها جن كافر معذبها ومسيطر عليها، وعشان الموضوع ده يتحل محتاج صبر ووقت كبير جدا وجلسات كتير، الموضوع مش سهل نهائي..
وفي مرة غضبت من شيخ غضب عنيف جدا، وضربته في صدره راح في غيبوبة، لولا ستر ربنا فاق ومماتش والا كنا روحنا كلنا في داهية، حالتها خرجت عن السيطرة نهائي، لدرجة اني في يوم لقيتها فاتحة التلاجة وبتاكل الفرخة ناية!!!, ومرة تانية اكدتلي ان مبقاش فيه امل خلاص لما لقيتها واقفة في الحمام وماسكة فار صاحي كبير وفصلت راسه عن جسمه ببوقها وكلتها وهي بتضحك ضحكة مرعبة !!!..
بعدها بمدة قصيرة مراتي ماتت، وسابتني لوحدي
وساعتها بس عرفت اني انا كنت سبب ضياعها، واللي عملته معاها زمان اتقلب عليا وعليها وخلاني افقدها، انا السبب زي ما قالت، والعمل اللي عملتهلها عشان تفضل جمبي ومتسبنيش وتتقطع عن العالم كله وتبقى معايا اتقلب بدمار، وشقلب حياتي وبوظها….
هو كان مأكدلي ان السحر ده هيضمن وجودها جمبي ومش هيخليها تبعد او تتأذي، انا كنت عارف انه دجال ومش شيخ، بس كانت نيتي خير، كنت عايزها جمبي دايما، كنت عايزها متفارقنيش ابدا، حبتها لدرجة جنونية خلتني عايز ومستعد اعمل اي حاجة عشان تفضل جمبي ومعايا ومتشفش غيري مهما حصل، يمكن ده مرض، او علة سيطرت عليا، بس كانت نيتي سليمة، كانت بدافع اني بحبها وعايزها جمبي وبس، وحياتي اتدمرت وانتهت، وتقريبا ده جزائي، بس انا عايش بتعذب بعد ما هي ماتت، حسيت ان ده ذنبي انا..
، ولازم انتقم من الدجال ده ، دورت عليه في كل مكان، حاولت اوصله بكل الطرق لكني ملقتهوش، ولقيت نفسي انا الطرف الوحيد اللي خسر كل حاجة ، خسر نفسه في الأول، وخسر ربنا لما مشي في سكة هو متأكد وعارف ان اللي بيمشيها بيبقى كافر وخرج عن الملة، خسر حياتي وشفت المُر، واخرها خسرت حب عمري وحياتي كلها، والنهارده انا قررت اعاقب نفسي، واكتب الجواب ده واسيبه هنا عشان لما يفتحوا عليا الشقة بعد ما انتحر يعرفوا اني كنت اسوء واحد في الدنيا، الشخص اللي اعماه الشيطان ومرضه ودمر كل حياته بأيده، النهارده هتكون نهايتي الحقيقية اللي بدأت لما قررت امشي في سكة الشيطان، او سكة هوى نفسي قبل الشيطان ….
تمت..
ذنب نفس
