قصه راعية الغجر .. مين هما الغجر؟ الغجر مجموعة من القبائل كانت بتعيش زمان في كل انحاء العالم
الغجر هما أشخاص ليهم حياة خاصة بيهم وليهم عادات وتقاليد ومعتقدات.. من اكتر الحاجات الي اشتهر بيها الغجر.. السحر وعلي الاخص السحر الاسود.. الغجر لهم اصول عبر التاريخ وعلي حسب التاريخ هم لهم تاريخ ملوث في الاذي والهلاك
…..
الكوابيس المزعجة لسه بتطاردني.. قومت من النوم مفزوع كالعادة وباخد نفسي بالعافية.. بصيت جنبي مراتي مكنتش موجودة.. قومت وخرجت للصالة الي كانت مضلمة مش شايف حاجة، شوفت ست قاعدة على الارض ومدياني ضهرها وبتعمل حاجة زي ما تكون بتوشوش.. قربت منها كانت مراتي لكنها لابسة لبس غريب وبصتلي وقالت (عندما يكتمل العهد يكون اللقاء) روحت شغلت نور الصالة ملقتش حد.. استعذت بالله ورجعت اوضتي تانى وانا معدي من قدام المرايا سمعت صوت همس باسمي ادهم.. ادهم بصيت الصوت كان جاي من المرايا قربت.. ظهرت ست قدامي في المرايا وقلتلي نفس الجملة تانى (عندما يكتمل العهد يكون اللقاء) وبدأت ملامحها تتشوه وصرخت ولقيت ايد بتتحط علي كتفي اتلفت وكانت الصدمة
…..
راعية الغجر
الجزء الاول
انا مش عارف لما تقروا الكلام ده هكون عايش ولا ميت.. انا حكايتي غريبة شوية ويمكن تكدبوني وده معلش يعني مش فارق معايا كفاية انا مقتنع اني عشت الأحداث دي
انا اسمي ادهم الابصيري، سني 26 سنة.. بشتغل مهندس في إحدى الشركات الكبري لكن انا مش بحب الشغل ده.. عايش لوحدي بعد وفاة ابويا وامي في حادث أليم بدون مقدمات ماتوا وسابوني لوحدي وسابوا ليا ورث كبير ملايين مكنتش عارف اعمل بيها اي!!.. اعتمدت علي نفسي واجتهدت خصوصا اني مليش اخوات وقدرت ادخل كلية الهندسة.. زي ما الوالد كان بيحلم انه يشوفني مهندس.. حققت حلمه بعد ما مات
وجيت علي نفسي وعملت حاجة انا مش عاوزها
المهم اني بعد ما خلصت تعليم اتعينت في الشركة.. لكن كان طلب من طلباتهم تحاليل شاملة عني وعن اي موظف.. روحت فعلاً وعملت التحاليل والكارثة اني طلعت عقيم وعندي مشكلة في موضوع الخلفة يعني لو اتجوزت مش هبقي أب.. طبعاً كنت مخنوق جداً والموضوع ده سببلي اكتئاب حاد.. واخدت قرار اني مستحيل اتجوز نهائي حرام اظلم واحدة معايا ملهاش ذنب
لكن انا كان ليا اهتمام تاني.. حاجة بتخليني سعيد ومبسوط انا كنت مهتم بعلم اسمه علم الانتيكات كنت بروح ازور متاحف كتير ومعارض للحاجات دي وكنت بشتري انتيكات وعامل ليها غرفة مخصصة في بيتي.. اه للدرجة دي انا كنت مهووس بالانتيكات، لدرجة ان صحابي كانوا بيقولولي يا انتيكة… لحد ما في يوم كنت فاتح نت عادي وبتصفح.. عيني وقعت علي خبر ان في محل مشهور جداً في مصر هيعرض مجموعة من الا نتيكات الغالية والقيمة جداً وانها هتعلن عن مزاد علني لبيع القطع دي وكانت الصفحة عارضة صور للانتيكات دي
لفت نظري انتيكة جميلة جداً ومنقوش عليها حرف ال أ.. عجبتني وقولت انا هروح المزاد وهحاول اشتريها في المزاد.. عرفت ان ميعاد المعرض النهاردة الساعة 8 بليل.. جهزت نفسي كويس ونزلت من البيت، ركبت عربيتي واتحركت علي مكان المعرض، معرفش المرة دي عندي احساس مختلف من الشغف الغير مفهوم والغير مبرر.. ولقيت نفسي بسأل نفسي وبقول هو في اي هو انا اول مرة هشتري انتيكة؟
وصلت المعرض ده ولقيت عدد كبير من الناس ومن جنسيات مختلفة حاضرة المعرض كنت مبسوط جداً.. لحد ما وقعت عيني عليها مش الانتيكة لا.. كانت بنت اجمل بنت شافتها عيني بصراحة آيه في الجمال.. لقيت نفسى مشدود ليها بشكل مش طبيعي وكأني اعرفها من زمان
لقيت الانتيكات معروضة قدامي.. لقيت نفسي رايح ناحيتها وبقولها
_مساء الخير هو حضرتك مصرية انا اول مرة اشوفك؟
_ اه انا سولا المسؤولة عن شرح المعلومات الي تخص الانتيكات والي هقوم بفتح المزاد
_ اهلا بيكي تشرفنا انا ادهم مهندس ومهتم جداً بعلم الانتيكات وبصراحة انا جاي هنا عشان انتيكة معينة، الانتيكة الي هناك دي
_ بكام يعني؟
_ 5مليون دولار
_ كام ينهار اسود للدرجة دي.. انا اول مرة اشوف انتيكة بالسعر ده
_ لانها جزء من انتيكة الكنوز وهي سبع قطع والي يقدر يجمعهم يملك كنوز الارض
_بس انا جاي عشانها اي العمل دلوقتي
_اسمع انا من مصلحتي ان الانتيكة دي تفضل في مصر عشان عندي امل اني هجمع السبع انتيكات انا هوصلك للانتيكة في مقابل انك تساعدني في البحث عنهم
_ انا موافق علي العرض ده
خلصت الحوار معاها وجات لحظة فتح المزاد وبدأت سولا تروح عند اول انتيكة وتقول انها اتصنعت في المكان الفولاني وتنسب لمين وسنة كام وبعدها هنبدأ المزاد عليها بكام
وانتيكة ورا انتيكة لحد ما جيه الدور علي الانتيكة الي عيني عليها.. اتكلمت سولا وقالت الانتيكة دي مجهولة ومحدش يعرف اي معلومات عنها وانا برجح انها جات هنا بالغلط حتي سعرها رخيص جداً لكن الي عاوز يشتريها ممكن يحط مبلغ من 50 الف دولار فيما فوق
محدش رفع ايده ولا زايد وفي اللحظة دي رفعت ايدي وقولتلها انا هشتريها.. وفعلا قدرت اخدها بمساعدة سولا.. وانتهي المعرض ولقيت نفسي رايح ليها تاني وبقولها
_اي هتروحي ولا هتروحي فين؟
_اه هروح_طيب ممكن اعزمك علي العشا عشان اشكرك علي الي عملتيه معايا
_ملهوش لزوم وبعدين احنا اكيد هنتقابل تاني عشان تساعدني نجمع باقي القطع
_اكيد بس انا مصمم اني اعزمك علي العشا ارجوكي مترفضيش
وافقت ورحنا مطعم مشهور في القاهرة وقعدنا نتعشي مع بعض، وبدأت احكيلها عن نفسي وعن اهتمامي بعلم الانتيكات واني مخصص اوضة في بيتي للانتيكات.. وهي كمان قلتلي انها مهتمة بعلم الانتيكات وبجمعها وانها بتمتلك اكتر من ألف قطعة ولكن هي عاوزة تجمع القطع الناقصة عشان تقدر توصل لكنوز الارض
كنا متفقين علي كل حاجة لكن الحوار بدأ ياخد شكل تاني لما قلتلي
_ ادهم الانتيكات الناقصة موجودة في كذا بلد واحنا لازم نسافر عشان نجيبهم
هما ناقصين 6 قطع عشان نكمل الانتيكات دي منهم 3 في مصر و3 في بلاد بره في اوروبا
_ ماشي انا معاكي في كل الي بتقوليه بس افرضي الناس دي رفضت هيكون اي الحل هنبقي سافرنا علي الفاضي
_ مفيش حاجة في الدنيا دي ملهاش حل ولو مقدرناش ناخد الانتيكات بطرق شرعية وسليمة
هناخدها بطريقة غير شرعية
_ ازاي مش فاهم حاجة هنعمل اي؟
_ كل واحد من الناس دي وراه مصيبة الي بيتجار في المخدرات والي بيتجار في الاعضاء وكل المصايب دي انا عارفها عنهم وهنقدر ناخد منهم الانتيكات بالذوق او بالعافية
_ مش عارف اقولك اي لكن انا قلقان؟
كنت حاسس اني قاعد مع شيطانة تفكير وهدوء وبتحسبها بالورقة والقلم وعارفة كل واحد منهم اي المصيبة الي عملها وهتدخله منها لو رفض يبيع الانتيكة الي عنده.. قطعت تفكيري بصوتها وهي بتقول
_حلم يا ادهم لو اتحقق هنعيش ملوك
_ممكن سؤال انتي عرفتي من فين مصايب الناس دي
_ ادهم انا لفيت العالم كله وانا بدور على الانتيكات دي والناس دي كانوا تحت عينيا لفترة كبيرة وعرفت عنهم حاجات كتير جداً
_ هنبدأ امتي وهنسافر فين؟
_ من بكرة هنبدأ نجهز نفسنا للسفر.. هنسافر تركيا.. تانى انتيكة هناك احنا بنملك الاولي
وصلتها بعربيتي ورجعت البيت بفكر في مسلسل ألف ليلة وليلة ده.. انا كنت بقرأ الكلام ده في الروايات وكنت بضحك والنهاردة معروض عليا انى اعيش رواية من الروايات دي.. دخلت الانتيكة الاوضة ورجعت اوضتي غيرت هدومي ونمت.. كلامها كان بيرن في وداني وانا نايم
تانى يوم اتصلت بيا واتقبلنا عشان نجهز إجراءات السفر.. دون الدخول في تفاصيل ملهاش لازمة من اجراءات السفر.. بعد اسبوع كنا جاهزين وسافرنا تركيا.. بلد جميلة كان نفسى ازورها من زمان.. واول ما وصلنا قلتلي
_ الراجل الي معاه الانتيكة اسمه سلمان هو مسلم مصري عايش هنا واتولد هنا.. عامل معرض في بيته لعرض الانتيكات
الراجل ده بيتنمي لعصابة بتاجر في الاعضاء وبالذات الاطفال
بعد نص ساعة وصلنا لبيت جميل جداً في اسنطبول.. خبطنا علي الباب مرة واتنين واتفتح الباب.. وخرج راجل في الاربعين من عمره وقال بلهجته طبعا بس انا هوضح بالعربي قال
_نعم انتوا مين؟
_ انا المهندس ادهم مهندس مصري ودي سولا خبيرة في علم الاثار
_ايوه نعم عاوزين اي؟
_ كنا عاوزين نتكلم مع حضرتك شوية لو ممكن
_ اتفضلوا!
_ استاذ سلمان احنا بندور على انتيكة نادرة جداً وعرفنا انها عندك وكنا عاوزين نشتريها
_ انا مش ببيع انتيكات يا استاذ ولا فكرت ابيع
_ طيب حضرتك ممكن تعرف اي الانتيكة الي احنا عاوزينها وهندفع كام!
_ مش عاوز اعرف حاجة وبعد اذنكم اتفضلوا لاني مش فاضي
قومنا مشينا واحنا مكسوفين من احراج الراجل لينا وقولتلها وبعدين يا سولا هنعمل اي
قلتلي انا هتصرف ملكش دعوة
قعدنا يومين في تركيا ومفيش حاجة جديدة بتحصل.. لكن مع اليوم التالت عرفت ان سلمان اتقبض عليه في عملية تجارة اعضاء جريت علي سولا وقولتلها
_ سولا سلمان اتقبض عليه عرفتي
_ منا عارفة مش قولتلك الي مش هياجي بالذوق هياجي بالعافية
كنت حاسس بجد اني قدام ابليس بالرغم من الجمال الفائق الي كانت بتتمتع بيه وطلبت مني اني ادخل البيت واسرق الانتيكة.. في البداية رفضت وقولتلها
_انا اسرق مستحيل اعمل كده
_ لا لازم تعمل كده عشان احنا مش هنضيع كل التعب ده علي الفاضي
معرفش انا كنت بسمع كلامها وكأني مسحور كنت بجادل بس بنفذ في الاخر ومش عارف انا كنت بعمل كده ازاي… قدرت فعلاً اسرق الانتيكة بعد ما قدرت ادخل البيت زي الحرامية
الانتيكة كان عليها حرف الواو.. ورجعنا مصر بفكر في الي عملته والي جاي هيكون اي
رجعت البيت عشان ارتاح شويه.. حاسس اني مش عاوز اكمل الطريق ده لكن بعد يومين بالظبط لقيت سولا بترن عليا وبتقولي
_ ادهم جهز نفسك بكرة هنسافر دبي عشان نجيب الانتيكة التالتة
_ حاضر يا سولا بكره هكون جاهز
تاني يوم كنت جاهز عشان نسافر دبي وفعلا سافرنا وصلنا دبي ولقيت سولا بتقولي
_ عمار هو الي معاه الانتيكة بس متخفش هيوافق يبيع عشان ظروفه صعبة ومعتقدش انه هيضحي بالفلوس عشان حتة انتيكة هو مش عارف قيمتها.
طلعنا علي بيت عمار كان شاب عايش مع مراته وابنه في شقة.. خبطنا مرة واتنين فتحت لينا مراته وقالت
_ انتوا مين.. اقدر اساعدكوا بحاجة
_انا المهندس ادهم وكنت عايز اقابل الاستاذ عمار لو موجود
_ عمار تعبان جداً ومش قادر يتحرك وللاسف علاجه مكلف واحنا مش قادرين عليه
_ طيب ممكن نشوفه
دخلنا الشقة وشوفنا عمار الي كان فعلاً راقد في السرير وعرفنا انه عنده مشكلة في العمود الفقري مأثرة عليه ومش عارف يمشي وانه هيحتاج عملية هتكلف 20 الف دولار
في الوقت ده سولا اتكلمت وقالت
_ طيب والي يلاقي حل للمشكلة تعملي معاه اي
_ الي هو عاوزه بس ازاي
_ احنا جايين نشتري انتيكة معينة وعرفنا انها موجودة عند استاذ عمار وهندفع 30 الف دولار
الست فرحت وقالت بجد.. بجد انا مش عارفه اشكركم ازاي.. وسألت جوزها عن مكان الانتيكة ورغم انه كان رافض يبيعها لكن لما عرف هندفع كام وافق.. اخدنا الانتيكة وكان عليها حرف الراء
ودفعنا الفلوس ومشينا واحنا سامعين دعاوي حلوة من الست زوجة عمار
رجعنا مصر وانا بقول الحمدلله عدت علي خير المرة دي..وسألت سولا
_ها السفرية الجاية فين؟
_ هنسافر فرنسا
_ ومين ده مصري برضو
_ شاب عربي هجر اهله من زمان وسافر كان متجوز واحدة بتملك الانتيكة دي لكنها ماتت من شهرين وهو حاليا عايش عيشة صعبة وما هيصدق ياخد الفلوس
_ انتي متأكدة يا سولا؟
_ طبعاً انا متأكدة
بعد سفر طويل وصلنا باريس من زمان كان نفسي ازورها.. ريحنا في فندق شوية من السفر وبعدها خرجنا علي بيت الشاب ده وعرفنا ان اسمه مينا.. كان عايش في بيت متواضع وواضح عليه الفقر وانه مش معاه ولا مليم..بدأت انا الكلام معاه
_استاذ مينا انا مصري زيك واسمي ادهم وبحب اجمع الانتيكات وجايلك النهاردة عشان عاوز اشتري منك الانتيكة الي عندك
_ انتيكة اي دي هو في حد بيشتري الحاجات دي بفلوس
_ اه طبعاً احنا هندفعلك 10الاف يورو قولت اي
الراجل سمع المبلغ ومكنش مصدق نفسه وقال
_موافق موافق طبعاً.
سولا قلتلي خد منه الانتيكة يا ادهم.. وفعلا اخدتها كان عليها حرف ال س ومشينا رجعنا مصر من تانى وخلاص باقي 3 انتيكات علي الحلم ويتحقق
ارتاحنا يومين وكنت مستني اتصال سولا.. وفعلا كلمتني وقالت ان المهمة المرة دي صعبة.. الراجل عايش في السودان واسمه سعدون وتاجر سلاح.. لكن الي عرفته انه اتقتل في اخر عملية وان ابنه الوحيد قرر بيع جميع ممتلكاته والسفر للخارج
_ يبقي احنا لازم نسافر السودان بسرعة
فعلاً سافرنا تانى يوم للسودان وكان ابن سعدون بيجهز نفسه للسفر.. وصلنالوا وكان عارض الانتيكة من ضمن الممتلكات.. بدون الدخول في تفاصيل الحوار الكبير جداً وافق ابن سعدون انه يبيع الانتيكة مقابل 10 الاف دولار
سولا قلتلي خد منه الانتيكة يا ادهم وفعلا اخدنا الانتيكة وكان عليها حرف الواو وكان ورجعنا مصر
بمجرد ما رجعت المرة دي لقيت واحد صحبي معايا في الشغل اسمه اسماعيل وده من اعز اصحابي بيكلمني وبيقولي
_ انا كويس يا اسماعيل بس انا واخد اجازة طويلة شوية ومحتاج اريح واعذرني مش عاوز اكلم حد
_ براحتك يا صحبي انا قولت بس اطمن عليك
_ انا كويس بشكرك جداً يا اسماعيل
خلصت المكالمة مع اسماعيل ورجعت البيت هلكان وعاوز انام.. ونمت معرفش نمت قد اي لكني صحيت علي صوت رنة تليفوني.. كانت سولا.. رديت عليها وقولتلها
_ ايوة يا سولا معاكي في اي
_ خلاص يا ادهم باقي اتنين والاتنين دول في مصر يعني مش هنسافر تاني
_ طيب الحمدلله.. امتي هنروح للراجل الي معاه الانتيكة
_ بكرة هنتقابل ونروح
تاني يوم قابلت سولا وقولتلها
_ اي حكاية الراجل الي رايحين عنده ده؟
_الراجل ده معالج روحاني اسمه الورداني بيعالج من المس والسحر
_ وده هيرضي ياخد فلوس؟
_ مفيش حد ملهوش تمن يا ادهم.. هيوافق متقلقش
واتحركنا على بيت الورداني.. وانا كنت راسم صورة فى عقلي عن الورداني ده انه دجال واني هشوف عنده جو الافلام والمبخرة والدخان والحاجات دي.. لكن الحقيقة انها كانت شقة في عمارة فخمة… دخلنا الشقة ولقينا واحد قاعد علي مكتب زي سكرتير وقال اهلا جيتوا في معادكوا
معادنا!!!
_ احنا مش محددين ميعاد مع الشيخ الورداني
_ اولا اسمه الدكتور الورداني استاذ علم الروحانيات وثانيا الدكتور عارف انكم جايين وجايين ليه
_ طيب تمام يعني نقدر ندخله..
قام من مكانه وفتح باب الاوضه واحنا دخلنا وراه لكن اتصدمنا لما شوفت الدكتور الورداني ميت وجثته علي الارض… صرخ السكرتير بتاعه وفضل يقول قوم يا دكتور متسبنيش
في اللحظة دي لمحت الانتيكة علي الترابيزة وكانت وسط كتب كتير اظن انها كتب سحر بس اي دخل الانتيكةبالكلام ده..الراجل ده كان بيعمل اي؟ .. ولقيت سولا بتقولي خد الانتيكة بسرعة عشان نمشي… خد الانتيكة يا ادهم بسرعة
جريت اخدت الانتيكة والسكرتير كان مشغول بالعياط علي الشيخ او الدكتور زي ما هو بيقول
وخرجنا من المكان بسرعة…. الانتيكة المرة دي كانت عليها حرف ال ل
مشينا وروحنا قعدنا في كافيه عشان نريح اعصابنا.. اتكلمت سولا وقالت
_ خلاص يا ادهم فاضل اخر انتيكة وحلمنا يتحقق
_اه خلاص ربنا يسترها ان شاءلله
_ مالك يا ادهم في اي؟
_ انا حاسس اني سبت شغلي وحياتي ومشيت ورا اوهام
_لا يا ادهم مش اوهام.. احنا عندنا حلم وخلاص فاضل خطوة وهنحققه
كنت مش مطمن لحد ما سولا عرضت عليا معلومات عن اخر شخص معاه اخر انتيكة وقالت
_ سيبك من الكلام ده يا ادهم وخلينا في الشغل
الراجل اسمه عمران ساكن في منطقة معزولة شوية.. والناس بتقول عليه مريض نفسي يعنى نتكلم معاه بشويش كده عشان نعرف ناخد منه الانتيكة
_ انا هموت واعرف انتي بتعرفي ده كله منين وازاي؟
_ ادهم انا قعدت الف وادور سنين علي الانتيكات دي ولما عرفت مكانهم كانت أسهل حاجة جمع معلومات عنهم بس كنت محتاجه حد زيك حد يساعدني يا ادهم
خرجنا من الكافية علي عنوان في منطقة معزولة شوية عن الناس… وصلنا لبيت الاستاذ عمران.. كان باب البيت موارب.. دخلنا مش شايف حد
لكن كان فيه زي دولاب من الزجاج وهو حاطط الانتيكة جواه لسه بنقرب سمعنا صوت بيقولنا _انتوا مين ودخلتوا هنا ازاي.. رديت انا عليه وقولتله الباب كان موارب واحنا خبطنا ومحدش رد…… لكن الراجل كان مبرق وباصص لسولا وقال
_انتي لسه عايشة.. طب ازاي ده انا مخلص عليكي بايدي ومتأكد انك ميتة دلوقتي
_ حضرتك مين الي ميتة وانت تعرف سولا من فين؟… يتبع الجزء الثاني
……
يا تري عمران يعرف سولا منين.. وازاي بيقول عنها ميتة؟!!
انتظروني في الجزء الثاني من قصة راعية الغجر واحداث مرعبة جداً
محمود الامين
راعية الغجر
الجزء الثاني
_ اعرفها عز المعرفة.. دي الشيطان في ثوب بني آدم دي اللعنة الي دمرت حياتي.. بس انا قد وعدي وقولت انك لو رجعتي للدنيا دي هقتلك مليون مرة بس المرة دي هقتلك وهحرق جثتك عشان مترجعيش للدنيا تاني.. رغم اني دفنتك بايدي.. انتي رجعتي للدنيا ازاي؟
ولقينا الراجل ده طلع مسدس وقال دي نهايتك يا سولا.. صرخت سولا فيا اتصرف اعمل حاجة هيموتني… في اللحظة دي تليفونه رن وده خلاه يبص وراه عشان يشوف التليفون فين.. جريت عليه عشان امسك وبقا هو يشد وانا اشد وفضلت ازعق واقول لسولا خدي الانتيكة واهربي بسرعة من هنا لكن الغريب ان سولا كانت واقفة زي التمثال مش بتتحرك وللاسف طلعت طلقة بالغلط وجات فيه ووقع علي الارض جثة هامدة
ينهار اسود انا اي الي هببته ده انا قتلت.. قتلت بجد.. لقيت سولا بتقولي بمنتهي اللامبالاة الي في الدنيا
_ يلا يا ادهم خد الانتيكة بسرعة عشان نهرب بسرعة
_ انتيكة اي وقرف اي بقولك انا قتلت.. انا بقيت مجرم
_ بقولك يلا خد الانتيكة بسرعة عشان نهرب قبل ما يتقبض علينا يلا يا ادهم يلا
كنت بقرب من الدولاب وانا بترعش واخدت الانتيكة وهربنا من المكان.. خايف لا ده انا مرعوب من الي جاي واكيد هيعرفوني من البصمات انا خلاص اتدمرت.. عدي يوم والتاني لحد ما قريت في الجرايد عن مقتل راجل في منطقة معزولة في شقته والمفاجأة ان البيت اتحرق بالراجل.. ازاي؟ .. مين الي حرق البيت؟
بس كده خلاص مفيش بصمات خلاص انا مش هيتقبض عليا.. وبدأت الامور تهدي تدريجي
عدي كام يوم وجمعنا الانتيكات وبالمناسبة اخر انتيكة كان عليها حرف الالف
عشان بعد ما جمعت 7 انتيكات يكون الاسم الي اتجمع (اورسولا) مكنتش فاهم يعني اي
سولا اصرت تعزمني علي العشا احتفالا اننا كملنا الانتيكات.. وافقت.. واحتفظت بالانتيكات عندي بالاوضة الخاصة.. كنت مرهق جداً وعاوز انام ونمت وشوفت حلم غريب.. شوفت نفسي في فرح وكنت انا قاعد علي الكوشة لما بصيت جمبي كانت سولا… وجيه شخص وحط ايده علي راسي وقال كلام غريب مفهمتهوش.. بمجرد ما خلص كل المعازيم بدأو يصرخوا صراخ رهيب.. صحيت من النوم وانا بستعيذ بالله من الشيطان الرجيم
بصيت في الساعة كانت 6 بليل.. قومت ولبست عشان اقابل سولا علي العشا وعلى الساعة 8 اتقابلنا في مطعم كبير في القاهرة وقعدنا نتعشي لقيت نفسي وبدون مقدمات بقولها
_ سولا تقبلي تتجوزيني؟
_ اي قولت اي.. انا مش عارفه ارد اقول اي
اترسمت ملامح الخجل علي وش سولا في حين انا كنت حاسس اني اتسحرت بيها واني مش قادر ابعد عنها تاني وقولتلها
_ ها قولتي اي
_ ادهم سبني افكر عشان اعرف اخد قراري
_ماشي بس خدي القرار ده بسرعة
رجعت البيت مستني القرار الي هيغير حياتي.. جوايا صوت بيقولي انت بتعمل اي وجواز اي لكن انا عاوز اتجوزها خلاص ده قراري.
يومين وبحاول اتصل بيها مش بترد عليا كنت خايف وقلقان.. لحد ما لقيتها بتتصل بيا في اليوم التالت
_ الو ايوة يا سولا مش بتردي عليا ليه
_ قابلني دلوقتي في الكافية الي بنتقابل فيه
_حاضر
نزلت قابلتها وبدأت كلامها وقالت
ابتسمت سولا وقالت انا موافقة..مكنتش مصدق انها وافقت عليا كنت فرحان جداً واتفقنا اننا نتجوز اخر الاسبوع.. هي عايشة لوحدها وانا عايش لوحدي يعني مفيش حد من اهلنا عايش
ومن اللحظة دي اتقلبت حياتي 180 درجة
اتجوزنا اخر الاسبوع فعلاً مش قادر اوصف كم السعادة الي كنت حاسس بيها.. نسيت كنوز الارض الي قلتلي عليها هدور عليها ليه وانا بمتلك اغلي كنز في الدنيا
مقدرش اوصف اي هو مفهوم السعادة لانه بجد يتحس.. اشتريت ليها فيلا وخصصت فيها معرض انتيكات في اوضة خاصة ونقلت فيها كل الانتيكات… الحياة معاها كانت بتحلي يوم بعد يوم
لحد لما عدي علي جوازنا 9 شهور وكانوا كلهم سعادة وحب
كل الي فات ده عادي لكن قصتي الي عاوز احكيها وعاوزكم تركزوا في الي جااي… كان بيطارني كابوس غريب مش فاهم اي حاجة منه
كنت بشوف نفسي واقف قدام واحدة لابسة لبس غجري جميلة جداً وبتقولي
عرضت عليك الزواج مقابل كشف كنوز الارض فلماذا قتلت ابني.. ووشها الي كان جميل بيتشوه ولماذا قتلتني سيكون منك انتقامي شديد وتخنقني واقوم من النوم مفزوع
في يوم لقيت سولا واقفة في البلكونة وبتبص للسما.. سألتها
_ في حاجة يا حببيتي؟
_ شايف يا ادهم القمر مكتمل بيكون جميل اوي
ضحكت وقولتلها اه فعلاً جميل يلا ننام عشان الوقت اتأخر عشان متأخرش علي الشغل.. ودخلت انام الكوابيس المزعجة لسه بتطاردني.. قومت من النوم مفزوع كالعادة وباخد نفسي بالعافية.. بصيت جنبي مراتي مكنتش موجودة.. قومت وخرجت للصالة الي كانت مضلمة مش شايف حاجة، شوفت ست قاعدة على الارض ومدياني ضهرها وبتعمل حاجة زي ما تكون بتوشوش.. قربت منها كانت مراتي لكنها لابسة لبس غريب وبصتلي وقالت (عندما يكتمل العهد يكون اللقاء) روحت شغلت نور الصالة ملقتش حد.. استعذت بالله ورجعت اوضتي تانى وانا معدي من قدام المرايا.. شوفت حاجة غريبة وكأن المرايا بقت شاشة بتعرض احداث نفس الغجرية كانت قاعدة وجمبها عيل عمره 7 سنين تقريباً وقدامها واحد شكله حاكم او زعيم او ملك
وقلتله
_ ستكون كنوز الارض ملكا لك وستعيش في رخاء ولن يستطيع احد هزيمتك ولكن عليك ان تتزوجني اولا
_ اتزوجك اتزوج من غجرية مثلك وماذا اقول لشعبي.. اكشفي لي عن الكنوز ولن ارميكي في المحرقة وسأتركك انتي وابنك علي قيد الحياة
_لا لن افتح لك كنوز الارض الا اذا تزوجتني
امر الحاكم الحراس انهم ياخدوها هي وابنها وكانت تصرخ وقالت لن تعيش طويلا سأقتلك
الحراس رموها هي وابنها في نار شديدة جداً
وفي لحظة ظهرت ست هي نفس الست ظهرت قدامي في المرايا وقلتلي نفس الجملة تانى (عندما يكتمل العهد يكون اللقاء) وبدأت ملامحها تتشوه وصرخت ولقيت ايد بتتحط علي كتفي اتلفت وكانت مراتي وقلتلي انت واقف كده ليه؟
مكنتش عارف ارد عليها اقولها اي.
انتي كنتي فين؟
كنت في الحمام يا ادهم
رجعنا الاوضه ونمنا وعدي اليوم عادي جداً .. حاولت اتناسي الي شوفته واعيش عادي.. لحد ما رن عليا اسماعيل وقلي
_ تعالي نتقابل شوية انا مخنوق وعاوز اخرج
_ماشي يا اسماعيل نتقابل في الكافية
روحت عشان اقابل اسماعيل وصلت ودخلت الكافية ولقيت اسماعيل وفضل يحكيلي انه مخنوق وعاوز يغير جو ويسافر وانا بتكلم معاه شوفتها ايوة الغجرية ودخلت الحمام.. قولت لاسماعيل هدخل الحمام وارجعلك.. اتسحبت ودخلت وراها ايوة دخلت حمام السيدات لكن ملقتهاش بتلفت عشان اخرج لقيتها في وشي ومسكتني من رقبتي عاوز اخلص نفسي منها مش عارف.. ولقيت باب الحمام بيتفتح وموظف بيقولي انت اي دخلك هنا يا استاذ؟!!
مبقتش عارف ارد اقول اي خرجت وقولت لاسماعيل اني هروح انا تعبان وسبته ومشيت ركبت عربيتي وانا مش فاهم اي الي بيحصلي بالظبط.. كنت في منطقة المقطم عند الهضبة اكيد لو حد بيسمعني هيكون عارفها كويس
وشوفتها من تاني الغجرية كانت واقفة بعيد… حاجة جوايا بتقولي انزل وامشي وراها… ركنت العربية ونزلت وفضلت ماشي وراها وكل ما اقرب هي تبعد.. لحد ما لقيت حد بيشدني وبيقولي حرام عليك نفسك عاوز تنتحر ليه؟!!!
بصيت لقيت نفسي علي حافة جبل المقطم.. ينهار اسود انا اي الي جابني هنا انا كنت هموت انا مش مصدق نفسي انا كنت هنتحر… رجعت عربيتي بسرعة ورجعت البيت.. خلاص انا اتجننت… لقيت سولا نايمة
دخلت نمت انا كمان.. اول مرة انام وميكنش في كوابيس وبدأت الامور تهدي تدريجي والحياة بدأت ترجع لطبيعتها من تاني… لكن حصلت حاجة غريبة الي حصل انه… يتبع الجزء الثالث والاخير
راعية الغجر
الجزء الثالث والاخير
عدي شهر وفي اليوم ده كنت نايم
ولقيت حد بيصحيني وبيهزني وبيقولي قوم قوم.. فتحت عينيا لقيت طفل صغير في وشي.. قولتله انت مين يا حبيبي..
ماما فين.. ماما فين؟… ماما مين.. يا سولا ابن مين ده، قومت من مكاني ورحت الصالة بدور عليها مش لاقيها.. رجعت الاوضه الطفل اختفي
اعوذ بالله من الشيطان الرجيم.. جريت شغلت سورة البقرة علي التليفون.. سمعت صوت تكسير جاي من الاوضه التانيه.. جريت وفضلت اخبط سولا يا سولا افتحي الباب افتحي.. حاولت اكسر الباب وفعلا كسرته لقيتها واقعة علي الارض.. جريت شلتها وحطيتها علي السرير وفضلت افوق فيها فاقت.. ولما سألتها قلتلي مش فاكرة اي حاجة.. مردتش اسألها عن الطفل.. هقولها اي كان هنا واختفي
في اليوم ده المدير كلمني وطلب مني اني هروح الفرع الي في اسكندريه يومين عشان اخلص الشغل الي هناك.. قولت لسولا وقلتلي ماشي يا حبيبي روح ربنا معاك
تاني يوم نزلت وركبت عربيتي عشان هسافر بيها واتحركت وانا في الطريق بدأت احس ان العربية مفهاش فرامل وبدأت العربية تنحني شمال ويمين عاوز اوقفها مش بتقف وسرعتها بتزيد..حاولت مرة واتنين لحد ما العربية خبطت في شجرة كبيرة.. محستش بنفسي وغبت عن الوعي.. لما فوقت لقيت نفسي في المستشفي وسولا جمبي وبتقولي حمدالله على السلامه..
_هو اي الي حصل؟
_حادثة بسيطة يا ادهم بس الحمدلله ربنا سترها.. بما انك فوقت انا جيبالك خبر هيفرحك
_خبر اي؟
_مبروك يا حبيبي انا حامل؟
_حااامل!!!.. طيب ازاي؟
_انا روحت للدكتور وقلي اني خفيت واني حامل انا مبسوطه اوي يا ادهم
كنت عاوز اقولها طيب انتي خفيتي طيب وانا بس خوفت تفتكرني بشك فيها.. وبعدين هو في حد بيخف من الحاجة دي من غير علاج.. تفكير كتير دماغي هتنفجر بسببه.
بعد يومين خرجت من المستشفى واول حاجة عملتها اني روحت وكشفت عشان اشوف انا خفيت ولا اي وكان كلام الدكتور
_ حضرتك لسه عندك عقم يا استاذ ادهم مخفتش منه ولا حاجة
_ ازاي يا دكتور ده…. هقول الدكتور مراتي حامل اي الغباء ده هفضح نفسي…. طيب يا دكتور متشكر جداً يا دكتور
نزلت من عند الدكتور وانا واخد قراري انا هقتلها خلاص مفيش رجوع.. بتخوني.. بتخوني انا طيب ليه انا عملت فيها اي عشان تخوني.. انا هقتلها هقتلها… رجعت البيت بنادي عليها زي المجنون مش بترد.. دورت عليها في البيت كله ملهاش اثر.. فضلت مستني ترجع ساعة اتنين يوم يومين.. اسبوع… ملهاش اثر
بدأت مروحش الشغل.. حالتي النفسية بتسوء يوم عن يوم مبقتش برد علي حد.. اصيبت بحالة من الاكتئاب التام
لحد ما في يوم جالي اسماعيل وقلي
_مالك يا صحبي اي الي جرالك انت كنت كويس؟
_تعبان يا اسماعيل معرفش ليه هي عملت كده انا كنت بحبها.. بحبها بجد انا عملت عشانها حاجات كتير ممكن تكون غلط بس ده عشان بحبها
_ احكيلي بس اي الي حصل
بدأت احكي لاسماعيل كل حاجة حصلت من يوم ما عرفتها لحد النهارده… فرد عليا وقال
_ممكن اشوف الانتيكات دي
_طبعا تعالي
_انت في حاجة لاحظتها يا صحبي… مش ملاحظ الاسم الي مكونه ال7 انتيكات اورسولا ومراتك اسمها اي سولا
_ برضو مش فاهم تقصد اي يا اسماعيل
خرج اسماعيل تليفونه وبحث عن اورسولا وقلي دي حكاية كبيرة اوي يا صحبي
اسمع
زمان قرر زعيم الماني انه يقتل كل اليهود والغجر في المانيا.. لكن كان في واحدة اسمها اورسولا ودي كانت راعية الغجر هناك كانت بتدعي انها تقدر تكشف كنوز الارض
الزعيم جابها هي وابنها الصغير وقالها انه هيعفو عنها مقابل انها تخرج ليه كنوز الارض
الغجرية طمعت وطلبت من الزعيم يتجوزها عشان تعمل ده
الزعيم رفض وقالها انه مستحيل يتجوز غجرية وان الناس هتنقلب ضده ولكنها اصرت.. فقرر يقتلها هي وابنها وقالها انه هيوصل للكنوز من غيرها ورماهم في المحرقة النازية الالمانية
لكن الي حصل بعدها ان كل الحراس الي ساعدوا فقتلها هي ابنها بقيوا يموتوا من غير سبب.. لحد ما وصلت للحراس الشخصي للزعيم والي قال قبل ما يموت بلحظات ان السبب في موته هي اورسولا
الزعيم مكنش مصدق فقرر اقتحام بيتها ووجد هناك 7 انتيكات شكلهم غريب.. استعان بسحرة وكان ردهم بعد ما عملوا الطقوس.. ان اورسولا عملت سحر وربطت روحها بالانتيكات دي في حالة موتها والحاجة الوحيدة الي توقف اللعنة تفريق الانتيكات دي عن بعضها بس هي هتحاول ترجع وهتستعين بجسد انسان عشان ترجعهم في يوم.. امر الزعيم بارسال كل انتيكة في طرد لبلاد متنوعة عشان يضمن عدم رجوعها ومن يومها وتوقفت اللعنة… والاسطورة بتقول انها متقدرش ترجع غير لما تجمع الانتيكات وتعمل طقوس كل ليلة يكتمل فيها القمر وقبل كدة بتكون عاجزة عن لمس الانتيكات وعشان تقدر تلمسها لازم تمارس الطقوس وترجع روحها بشكل كامل.. رجوعها عشان تنتقم واي حد هيحاول يمنع رجوعها هيموت حتي لو كنت انت
اهدي يا ادهم دي الحقيقه وحاول تتقبلها بس معني الكلام انها هتعمل الطقوس وهترجع عشان تاخد الانتيكات… مشي اسماعيل وفضلت لوحدي بفكر في الكلام وازاي ده ممكن يحصل وازاي انا كنت عايش مع واحدة ميتة. ابتديت افتكر كل مرة كنا بنروح نجيب انتيكة كانت بتقولي خدها يا ادهموهي مش بتتحرك عشان متقدرش تلمسها..وافتكرت المعلومات الي كانت تجيبها وافتكرتحاجات كتير لو كنت ركزت كنت فهمت .. اصيبت بحالة نفسية وبقيت بروح اتعالج عند دكتور نفسي وبقيت عايش زي المجنون.. رجعت شقتي القديمة واخدت معايا الانتيكات وعملتلها معرض في صالة زي النيش كده
ومرت سنة كاملة.. وفي يوم كنت في البيت والباب خبط فتحت كانوا راجل وست وقلولي ممكن نتكلم معاك شويه
وعرضوا عليا شراء ال7 انتيكات لكني قولتلهم اني مش هبيع
لقت الست قامت وقربت من الانتيكات.. قومت وراها وانا بقولها متتعبيش نفسك مش هبيع
اتلفتتلي وقالت ( عندما يكتمل العهد يكون اللقاء)
وابتسمت… قولتلها وانا مبرق سولا
قلتلي فكر في العرض يا استاذ ادهم احنا هندفع كتير وهنرجعلك تاني.. ومشيوا
كلام اسماعيل صح.. قلي هترجع بس يا تري لو انا وافقت ابيع هيسبوني اعيش.. ولا برضو هتكون نهايتي الموت .
