اترددت اكتر من مره انى اكتب .. لان الكلام الى هقوله حقيقى جدا وكل ما كان كلامك عن الجن حقيقى , وجب عليك انك تسكت .. لأن كل كلمه هتقولها محسوبه عليك.
الاول اعرفكم على نفسى انا على مواليد ٩٣ يعنى عندى ٢٩ سنه.
هنرجع بالزمن لحد ٢٠١٠
لما كنت فى ٢ ثانوى عام كان عندى ١٧ سنه ….
” طالب متفوق جدا جدا … كل سنه بطلع الاول ..حافظ قرآن واحاديث ودارس نحويات كويس جدا كنت بدرس نحويات ثانوى وانا ف ٢اعدادى” مع استاذى الله يسمحله .
كانوا مستنيين منى اول جمهوريه لكن لم يشاء الله فلله فى أمره شؤون.
فى ليلة عيد ميلادى ال١٧ كنت فى اوضتى لوحدى و قافل عليا بابى وخلاص هروح فى النوم … سمعت صوت جميل جدا بيقول باللغه العربيه الفصحى “السلام عليكم”
فتحت عيونى وانا مذهول وببص يمينى وشمالى لكن مفيش حد !!….طلعت للصاله لقيت البيت كله نايم.
بصراحه خفت ف رجعت لاوضتى وقرأت اية الكرسى واول ما غمضت عينى شفت حد !!
فى الظلمه الى انا شايفها وانا مغمض بدأ يظهر محارب راكب على فرس وحامل رايه وجاى عليا !!
والله كل ده شفته وانا مغمض وبقيت اقفل وافتح عينى من الصدمه …خفت اوى بس قرأت قران وفضلت استعيذ بالله من الشيطان لحد ما هديت ونمت .
حلمت يومها حلم مش هقدر انساه طول عمرى
حلمت * انى فى اوضتى نايم زى ما انا وباب اوضتى اتفتح ودخل عليا كائن جميييل جدا عباره عن “انثى قزم” شبيهه للإنسان …لكنها قصيره بشكل ملحوظ وجميله .. جمالها غريب كأنها ملاك ..كانت لابسه فستان جميل وتاج فيه جوهره خضرا كبيره وسلاسل وحلى كتير …وفضلت واقفه ادام سريرى بتبتسم لى*
….
الحلم ده خلص حلمت بعده على طول انى ماشى وسط شجر كتير ولقيت حجر كبير شكله مميز …مش عارف اخدت الحجر ليه !!
ظهرلى رجل وست عاديين مش قصيرين زى الى قبلهم ..استغربت من طريقة لبسهم وشكلهم !!
الذكر كان ابيض البشره ومسلح بسيف وشعره طويل ومدفره ولابس لبس الملوك المنقوش بتاع زمان والانثى لابسه فستان وتسريحه قديمه بردو لكن كان شكلهم جميل كأنهم من سلاله ملكيه
المهم لقيتهم بيقولولى هات الحجر ….قلتلهم لا ده بتاعى وحقى انا … اعترضوا وبدأنا نطير من مكاننا وانتقلنا لمكان تانى “طيران اقسم بالله” المكان كان عباره عن صحرا فيها مبنى واحد بس كأنه محكمه وحواليه ناس وحراس كتير هبطنا ودخلنا وانا مش عارف انا رايح فين لحد ما وصلنا لأوضه لقيت فيها شيخ كبير شكله وقور ومحترم جدا ومعاه القزمه الى ظهرت الاول… ف وقفنا صف انا والرجل والست والقزم والرجل الى كان قاضى تقريبا لانهم حكوله الى حصل وقالوله انى لاقيت الحجر فى ارضهم واستنيناه يحكم ف ظهر ادامنا ٤سيوف وقال لى خد سيف من الاربعه وسيبلهم الحجر.. رحت ناحية السيوف واخترت الاخير واول ما اخترته القزمه تقدمت خطوه وابتسمت لى كأنى احسنت الاختيار او اخترت حاجه تخصها .. وصحيت مش عارف ايه الى انا شفته ده عقلى الباطن بيقول ان دول جن لكن مش عارف… دماغى كانت هتنفجر من التفكير وحاسس انى فى حد معايا انا مش شايفه …. قررت انى احكى لابويا وامى .. قعدوا يضحكوا ويهزروا ويطمنونى انه حلم عادى وقالولى ان الملبوس مبيكونش عارف انه ملبوس او مبيحسش بكده وعدى الموضوع بس فى حاجه جوايا بتقولى ان كل الى شفته حقيقى ..كان عندى كمبيوتر ف بحثت عن الجن واشكالهم وهنا كانت الصدمه…لما لاقيت ان وصف العفريت من الجن ينطبق تماما على انثى القزم الى حلمت بيها
ده كان اول موقف ماورائي يحصل لى …من ١٣ سنه بالظبط لحد دلوقتى بشوف العجب بس مبقيتش احكى كتير خصوصا اهلى مبيصدقونيش لما بحكيلهم وبيستغربوا انا مصدق نفسي كده ازاى !!
٢٠١٣ مقدمتش فى الكليه لانى مدخلتش امتحانات ٣ثانوى عام اصلا…متسألونيش ازاى بس انا بدأت اتعب وطباعى اتغيرت العكس تماما وفى البيت مش مستوعبين ايه بيحصل لى وحاولوا يقنعونى كتير هما والمدرسين بتوعى ومنفعش معايا اى حل ومحدش عارف مالى ..انا نفسى مكنتش عارف مالى
خلال ال٣ سنين دول بدأت تحصل لى حاجات عجييبه زى مثلا انى اعرف لو حد اتكلم …بسمع فى عقلى الى بيقوله كأنه ريكورد…. بعرف الساعه من غير ما ابص فيها .. بعرف لو حد داخل عليا ..احلامى بتتحقق ومهما احكى لابويا وامى مش مقتنعين لحد ما جه اليوم الى اقتنعوا فيه..
كنت لسه راجع من الشغل ولقيت عندنا ٢من اقاربنا رجل وبنته ف البنت بعد ما دخلت وسلمت عليهم لقيتها بدأت ترتبك وبتبعد وشها عنى وبعد شويه بصتلى وقالتلى هى عينيك مالها ؟
طبعا كلنا استغربنا السؤال ف..بضحك وبقولها مالها
لقيتها حطت ايديها على عينيها وبدأت تصوت وتقول “طلعوه برااااااااه” وفضلت تصرخ وتصوت بصوت خشن ذكور. وفضلت وترفص كأنها بتتعذب …البيت كله جرى حرفيا لانهم اترعبوا واتصدموا من الى شافوه …الغريب انى كنت ثابت ومش خايف ابدا لحد ما بدأ يكلمنى جن على لسانها ادام اهلى كلهم وكلهم يشهدوا عالكلام ده
الجن اعترف لى بكل حاجه واستأذن انه يمشى وقلتله يمشى …هى اغمى عليها وواهلى نصهم ييعيطوا من الخوف حرفيا والرجاله شالوا البنت نيموها وانا اعصابى كلها سابت قعدت شغلت قرآن وبحاول استوعب انا عملت كده ازاى ..انا كنت واقف بكلم جنى وكان محترمنى جدا ..طب ليه ظهر لما انا جيت ومين الى كانوا بيعذبوه وبيتوسلهم يسيبوه!!
هنا اهلى عملوا وقفه وخدوا منى جنب لانهم بقوا يخافوا حتى يدخلوا اوضتى غير للضروره القصوى
لحد ما جابولى شيخ قالهم انى سليم
بس بينه وبينى قالى بلاش تحكى لحد خالص على اى حاجه تشوفها وانت لان دى مش احلام دى ناس معاك من صغرك ولما بلغت ووصلت لل١٧ كان لازم ينبهوك انهم موجودين وانت عارف كده ؟
وفعلا كان كلامه صح لانى خلال ٣ سنين شفت علامات وتلميحات واشارات كتير فى الحقيقه والنوم
وقال لى انى اعيش حياتى عادى ومشغلش بالى وهما واحده واحده هيفهموك .
.
بدأت سلسلة اللقاءات مع الجن تكون مناميه لانى مليش تعامل سابق مع الجن ولسه بتعرف عليهم .
هما شايفينى وعارفيننى لانهم ملازميننى من زمان
حالى حال الممسوس بالظبط
فى مره جالى دور سخونيه شديد جدا ..فى حياتى متعبتش زى المره دى… احتقان ادى لسخونيه شديده لدرجة انه كان بيحصل لى تشنجات..اخدت الدوا بتاعى وجه وقت النوم ..
نمت وشفت نفسى نايم فى السرير وجت “إيشميرا”
ايشميرا هى العفريته القزمه الى ظهرت بتاج على راسها .
جت وهى بتضحك ضحكتها الملائكيه الجميله ومعاها رجل رجل عجوز اوى .. الرجل قرب منى وحط أيده على رقبتى وبعد كده جاب ورق فل ابيض كتير ورماه عليا ..وخلص الحلم على كده
صحيت الصبح بقدرة قادر سليم تماما .
وقتها كان الحلم ده بالنسبالى مجرد رؤيا ومعلقه فى دماغى ..لكن بعدها عرفت انى اتعالجت على ايادى الجن.
لما قلت لأهلى استغربوا ومصدقوش غير لما اكتشفنا بالصدفه ان اللوزتين الى كانوا مسببين الاحتقان اتشالوا من غير عمليات .
انا مصدوم زيكم بالظبط .. بس مبسوط لانى خفيت وبدأت احس ان قدراتى بدأت تروح فى حته تانيه ..
لان زى ما قلتلكم فى البوست الى فات انى كنت بعرف لو حد اتكلم عليا وبعرف الساعه غيبيا وحاجات كتير منها مثلا انى كنت فى مره واقف بشترى سندوتشات وجنبى ابن اخويا ..ومره واحده رحت شاخط فيه وقلت له “ارجع بسرعه” الولد اتخض والناس الى حوالينا اتخضت من صوتى بس بعد ما رجع بلحظه واحده سقطت مكانه كبايه واتكسرت ولولا ستر ربنا كان زمانه فى المستشفى.
فى الفتره دى كنت بدأت احس نفسى ضخم وليا هيبه غريبه وكنت بشوف جنبى أسد بيمشى معايا بيظهر كل وقت والتانى وبيظهر فى الليل بس .
انا بس الى بشوفه انا واى حد له صله الجن .
دايما فى ريحه حلوه مسك وزعفران رغم انى مكنتش بستخدم عطور .
وفى مره مش هقدر انساها
شفت نور اليض ساطع وطاير فى الهوا ولما شفته جرى بسرعه رهيبه واختفى وده انا مش عارف هو ايه لحد دلوقتى بس كنت حاسس انه حاجه طيبه
وفى مره كنت شغال محاسب فى مخبز
وكان فى واحد من العمال عنده ٨سنه هو الطفل الوحيد فى العمال وده لانه يتيم وبيصرف على نفسه هو وامه ..الطفل ده كان اسمه اسلام .
قاطع افكارى ورد عليا وقال انا الحاج ابراهيم انا والحاجه فاطمه بنقول الاذكار معك انت واسلام !!
وهوب اسلام رجع طبيعى تانى .
قال لى اسلام ربنا بيحبه وفى شيوخ شافته وقالوا انه سليم تماما ومعاه جن طيبين بيحبوه ويحموه وهيبطلوا يحضروا لما يكبر شويه
علما انهم بيحضروا وقت ما حد يزعله .
ايه الى بينك وبين ربنا يا اسلام علشان يحبب فيك خلقه من الانس والجن .
لما روحت حلمت ان اسلام جاى لى فى مسيره بس قاعد على كرسى ضخم وشايلينه ٤ خدام وقربت عليه ..راح ملبسنى *لاسه* بيضا على راسى وقال لى “وفوق كل ذى علم عليم”
..
هنا بقا يا ساده يا كرام انا متأكد ان معايا حد من عالم الجن
لتانى مره الجن يكلمنى فى الحقيقه على لسان انسى
أحداث كتير والغاز وتفاصيل كتير
فى مره كنت فى محافظه تانيه ودخلنا بيت لقينا فيه قطط كتير ..كنت قاعد مش على بعضى .قلقان من غير سبب “دى علامة خطر بالنسبالى” خلصنا مشوارنا
ولما روحت نمت و حلمت انى كنت فى مقبره فرعونيه وظهر ادامى كيان اسود كله شعر وشخط فيا وقالى انا هنا من ايام الفراعنه .. لقيت نفسي تلقائى بسحب كرباج من جنبي وضربته ضرب شديد وانا بقرأ اية الكرسى…وفجأه ظهر حد شبهه بس اده ٣او ٤ اضعاف وقال لى انا جده , ف وقفت ضرب احتراما له ، ورفعت ايدى اليمين وقلت له نصا كده “لكم دينكم ولى دين وصحيت .
ف قلت للناس الى كانوا مسافرين معايا ان البيت الى كنا فيه مش كويس ..رد واحد منهم وقالى ان البيت تحته اثار وحاولوا يطلعوها بس مش عارفين علشان الرصد عايز دم حد من اهل البيت
حكيت حكايتى لشيوخ كتير لعل وعسى يدلونى وافهم منهم ايه بيحصل لى ..
منهم الى قال لى معك خدمه ومنهم الى قال لى يا محارب ومنهم الى قال لى زوهرى منهم الى قال لى متجيليش هنا تانى ومش طايق يشوفنى ..مفيش غير واحد بس قال لى انت ممسوس ومتلتفتش لاغراءات الجن لانهم ممكن يساعدوك بس قصاد كده هيعلموك السحر او تتجوز منهم.
سمعت فتاوى وهرى كتير اوى ..مقتنعتش بكلامهم .. وعلشان كده استخرت ربنا فى امرى ف شفت النبى فى رؤيا بيرشدنى للاجابه بس مش هحكى تفاصيل الرؤيا.
واتعاهدت بينى وبين ربنا انى متنازل عن اى حاجه وعن اى كيان خفى حتى لو كان صالح طيب .لانه بكل بساطه ممكن يفتننى..وياخدنى فسكه مش سكتى ..كمان انى اعيش بين عالمين امر مرهق جدا وحساس و لو كان الجن بيلازم الانس ويتعاونوا …يبقى الصحابه اولى واحق مننا كتير وكانوا حكولنا على الاقل عنهم وفهمونا نتعامل معهم ازاى .
ملناش نعرف عنهم اكتر من الى جه فى القرآن وعلى لسان النبى صلى الله عليه وسلم.
مينفعش نستعين بالدجالين والنصابين واصحاب الخدمات والعرافين والكهنه ..ايا كانت مسمياتهم ، فى الاخر كلهم سحره.
انا اختصرت مش هحكيلكم تانى عن تفاصيلى معهم.
بالمناسبه كل الحاجات الحلوه الى كانت بتحصل معايا بدأت تنقلب العكس لما عاهدت ربنا انى مش عاوز اى صله بالعالم التانى ، هما كانوا عايزيننى احبهم واثق فيهم واقع فى الفخ …
بدأوا يحاربونى ويخوفونى ويهددونى ..وفضلنا فى صراع لحد ما غلبتهم وقهرتهم .
ولحد هنا انا حكيت اكتر من اللزوم عن نفسي
سعيد لانى شاركتكم تجربتى ويا رب تكونوا اتعلمتوا منها حاجه
…
…………….
الحمدلله استغنيت واتعالجت قبل ما اتعلم اى حاجه من الجن
مستوحاه من احداث حقيقيه.
بقلم : أحـمـد شـيبه
