قصه شارع الصنادقية

دخلت امها وام يوسف ولبسوها زي ما الشيخ قال، وبعد ما خلصوا ودخل ابو عبد الله ومعاه يوسف وسليمان، ابتدا يرقيها، وقف جنب سريرها وحط ايده على طرف السرير وهو بيقول بصوت عالي…

(اعوذبالله من الشيطان الرچيم.. بسم الله الرحمن الرحيم.. اعوذبالله من الشيطان الرچيم.. بسم الله الرحمن الرحيم، قل اعوذ برب الناس.. ملك الناس، إله الناس، من شر الوسواس الخناس، الذي يوسوس في صدور الناس، من الچِنة والناس)

وفضل يقرا يا ابني في أيات من القرأن الكريم لحد ما البت ابتدت تعمل حاجة غريبة اوي؛ البت ابتدت تزوم زي القطط، وياريتها جت على كده وبس، دي فضلت تطلع اصوات غريبة وكأن جواها اكتر من واحد بيتألموا، لكن وسط كل الأصوات اللي ترعب دي، برق الشيخ لفاطمة اكتر واكتر واتكلم بصوت أعلى..

(انطق بحق من خلقك من نار وخلق أدم ونسله من طين، انطق وألا هعذبك بأيات الله وبذكره لحد ما تتحرق.. انطق يا رَچيم يا ساكن الخراب ومفرق الأحباب، انطق يا..)

لكن فجأة.. سكت الشيخ ابو عبد الله لما البت فاطمة سكتت وقامت قعدت.. عينيها كانت بيضا ووشها ملامحه كانت متغيرة، ضحكتله ضحكة أبالسة وقالتله بصوت غريب وكأنه صوت ٢٠ راجل بيتكلموا مع بعض..

-مين ده اللي ينطق!.. احنا كتير.. كتير اوي يا ابن أدم، ومهما عملت، اللي هي فيه ده مش هيخلص، انت لو حرقتنا هيجوا غيرنا وهيكملوا اللي احنا بنعمله.

لما البت قالت كده بصوتها الغريب ده، كل اللي واقفين بعدوا عنها من الخضة، إلا الشيخ ابو عبد الله.. الراجل لا اتهز ولا خاف ولا اتحرك من مكانه، بل بالعكس يا ابني، ده فضل ثابت ومسك في طرف السرير بقوة وهو بيبص في عين البت وقالها بصوت عالي وبثبات…

-انتوا مين ومين اللي باعتكوا، وباعتكوا ليه من اساسه؟!

ضحكت البت بنفس صوتها الغريب، بس المرة مابصتش لابو عبد الله، دي بصت لجوزها يوسف اللي كان واقف ميت في جلده…

-مش هتطولها.. طول ما احنا هنا، مش هتطولها.

ورغم كلامها ده، إلا إن ابو عبد الله ماهمهوش وابتدا يقرا قرأن بصوت عالي، ومع قرايته، ابتدت البت تصرخ وتشد في شعرها زي المجانين، ولما استمر صراخها وقرايته اكتر واكتر، واستمر خوف ورعب كل اللي واقفين، فجأة الدولاب اللي قصاد سريرها اتفتح بقوة والهدوم اللي جواه اترمت لبرة، بس الهدوم اللي اترمت من الدولاب دي ماكانتش اي هدوم.. دي كانت هدوم البت اللي المفروض هتلبس منها لجوزها ليلة دخلتهم، ومع خروج الهدوم دي بالتحديد من الدولاب، بص الشيخ ابو عبد الله للمكان اللي هدوم خرجت منه، وكان هو هو نفس اللي انت ممكن تكون بتفكر فيه.. الهدوم خرجت من الصندوق اللي كان جوة الدولاب، وده كان معناه بالنسبة للشيخ، أن الصندوق ده فيه حاجة، ماهو اللي فتح الدولاب وخلى الهدوم اترمت بالشكل ده من الصندوق، اكيد حاجة ليها علاقة باللي بيحصل لفاطمة، وعشان كده وقف الشيخ عن القراية وسكت خالص، ومع سكوته… سكتت البت هي كمان واترمت على السرير وكأنها غابت عن الوعي، بعدها راح الشيخ ناحية الدولاب وخد الصندوق وخرج برة الأوضة، ووراه خرجوا الرجالة اللي كانوا واقفين، يوسف جوز فاطمة، وسليمان الغلباوي حماه وابوه الحاج نور، اما بقى ام البت وام يوسف ونفيسة اختها اللي كانت معاهم بالمناسبة بس ماكانش ليها أي تعليق على اللي بيحصل، فدول قربوا من البت وحاولوا يفوقوها، وفي نفس الوقت اللي كانوا بيحاولوا يفوقوها فيه، كان الشيخ ابو عبد الله خرج هو والرجالة وحط الصندوق على الأرض بره الأوضة وقعد قصاده، وبعد ما قعد ومسك الصندوق، بص للتلات رجالة اللي كانوا واقفين حواليه وقال لهم..

-السر هنا.. الأذية جاية من هنا.

قال الكلمتين دول ومد إيده جوة الصندوق وابتدا يشيل البطانة الحمرا اللي جواه، واللي حسبه وقال عليه لقاه يا ابني.. الراجل اول ما شال البطانة وكشف الخشب الداخلي بتاع الصندوق، لقى عليه طلاسم وكلام غريب مكتوب بلون أحمر، وفي وسط الكلام الغريب والطلاسم والرسومات اللي لقاهم، قرا أسم فاطمة وأسم امها!

كل ده كان بيحصل ويوسف وابوه وحماه واقفين وهم مش فاهمين اي حاجة، وقبل ما يسألوا ايه ده او حتى يتكلموا، اتكلم ابو عبد الله وقال لهم..

-العروسة معمولها عمل جوة صندوق الشوار بتاعها، والعمل ده واضح اوي إنه معمول بالأذية وبعدم تكملة الجوازة، وطبعًا اللي عمل البلوة دي، اكيد رابطها بحرز وعمل تاني مدفون في مكان ما ولازم نطلعه عشان الهم ده كله ينزاح.. بس في سؤال مهم عشان نقدر نوصل للحرز او للعمل اللي مربوط بالطلاسم دي، هو مين اللي عمل الصندوق ده ولا انتوا جايبينه منين من أصله؟!

سرح يوسف لثواني وبعد كده قال للشيخ..

-منصور.. منصور بتاع الصناديق اللي على أول شارع الصنادقية، منصور هو اللي عملي علبة الدهب الخشب اللي اديتها لفاطمة وقت الشبكة، وكمان هو اللي عملها الصندوق ده عشان تحط فيه هدومها اللي مش عاوزاها تبان وقت نقل الشوار، ايوه انا فاكر كويس إني لما عديت عليه من فترة قبل جوازي، قالي إن صندوق الشوار خلصان وحاطه عنده في البيت لحد معاد فرحي يجي.

قام الشيخ وقف وقفل الصندوق وقال ليوسف بسرعة..

-طب يلا.. احنا لازم نروح لمنصور ده دلوقتي، اكيد هو عارف حاجة، ماهو مش معقول يعني يكون صندوق معمول عمولة ومكتوب تحت بطانته طلاسم، واللي عمله بإيده مايعرفش اللي اتعمل، أكيد منصور ده يعرف حاجة، إذا ماكانش مشارك في اللي اتعمل ده من أصله.

وبمجرد ما خلص الشيخ كلامه، نزلوا كلهم بسرعة من البيت وراحوا على دُكان منصور بتاع الصناديق، وطبعًا ام فاطمة وام يوسف، طلعوا يجروا ورا الرجالة بعد ما نزلوا من البيت، اما الرجالة بقى، ف بعد دقايق كانوا واقفين قصاد دكانة منصور وبيسألوا عليه، لكن الواد اللي شغال معاه بص لهم بخوف وقال لهم..

-عم منصور مش هنا، عم منصور قال إنه راح البيت عشان يتغدا ويجيب كام صندوق لزباين من هناك، ماهو بيته هو المخزن اللي بيخزن فيه الصناديق.

وطبعًا بعد ما يوسف والشيخ وسليمان ونور سمعوا الكلام ده، خدوا بعضهم وراحوا جري على بيت منصور اللي كان في شارع بعد الشارع الصنادقية بشارعين، واول ما وصلوا قصاد البيت وخبطوا، فتحلهم منصور وبص لهم باستغراب..

-خير يا جماعة، في ايه.. الحاج نور وعم سليمان الغلباوي واستاذ يوسف!.. ايه اللمة والهوليلة دي كلها!

وقبل ما أي حد من اللي واقفين يتكلم، كان فتح الشيخ ابو عبد الله الصندوق ووراه لمنصور وهو بيقوله..

-احنا جاينلك بخصوص السحر اللي جوة الصندوق ده، هو الصندوق مش من عندك برضه!

مسك منصور الصندوق بإيديه اللي كانت بتترعش وهو بيقولهم بصوت مهزوز..

-يا وقعة مطينة!.. سحر ايه ونيلة ايه، هو اه الصندوق من عندي وانا اللي عامله بإيدي، بس عليا الطلاق انا ما اعرف مين اللي عمل كده!

وقتها يوسف اول ما سمع الكلام ده من منصور، زقه لجوة البيت ومسك فيه..

-انت هتستعبط ياض يا ابن الحرام، الصندوق ده من عندك انت، وانت الوحيد اللي شوفت الخشب اللي جواه قبل ما البطانة تتركب فيه، يعني أكيد انت عارف مين اللي عامل البلوة دي، انطق ياض.. انطق بدل ما ورب الكون اجيب أجلك.

حاول منصور يدافع عن نفسه بأي كلام، لكن وسط اللي كان بيحصل ده كله كانت ام فاطمة ومعاها ام يوسف وصلوا لبيت منصور لأنهم خرجوا ورا الرجالة زي ما قولتلك، وفي نفس الوقت برضه، كانت خرجت ام منصور الست العجوزة اللي خدت ابنها من إيد يوسف وهي بتقوله..

-جرى ايه، سيب الواد، اوعى إيدك دي، ابني مالوش ذنب، اسأل اللي من دمك ومن قبلهم حماتك، هم السبب.

لما الست قالت كده، كل اللي واقفين بصوا لام فاطمة ماعدا الشيخ ابو عبد الله، هو الوحيد اللي كان باصص لام منصور بغضب وهو بيقولها..

-ياه.. ياه يا روحية، ده انا كنت نسيت شكلك، قال وانا اللي كنت فاكر إنك بعد ما سيبتي بيت ابوكي في المغربلين واتجوزتي وسكنتي في الازهر، إنك خلاص توبتي وبطلتي شغلانتك وشغلانة أهلك.. بس صحيح، بيت الأهل أساس المصايب، واللي فيه طبع نجس مابيبطلوش.

سندت ام منصور ابنها ووقفت قصاد ابو عبد الله وقالتله..

-لم لسانك يا محمد يا عبد التواب بدل ما اطردك انت واللي معاك من بيتي، وبعدين انا مالي، الناس يا اخويا هم اللي بيطلبوا وبيدفعوا وانا بس اللي بنفذ اللي هم عايزينه، لعبة وانت فاهمها من زمان.

قرب منها يوسف وقال لها بزعيق..

-يعني انتي اللي عملتيلي العمل لما ابنك خزن الصندوق هنا في البيت بعد ما عمله؟!

-ايوه.. انا اللي عملت العمل، بس ماعملتوش من دماغي، دي هي السبب.

بص يوسف ناحية حماته اللي اتكلمت والدموع في عينيها..

-ورحمة الميتين يا ابني انا كان قصدي خير، انت من بعد ما خطبت فاطمة، وانا قلبي كان متوغوغوش وحاسس إن الجوازة دي مش هتكمل او هتتنظر بسبب كلام قرايب امك عن إنهم كانوا عاوزين ياخدوك لبناتهم، وبسبب خوفي وقلقي عليكوا، جيت لام منصور المبروكة وطلبت منها إنها تعملكوا حجاب يبعد عنكوا العين في صندوق الشوار، وده عشان ماحدش يلاقيه ولا يضيع ويبقى في مكان أمان، وبس كده.. انا ماعملتش حاجة ولا طلبت منها تعمل اسحار ولا نيلة.

لف ابو عبد الله وشه وبص لام منصور..

-بقى دي مبروكة وممكن تعمل حجاب ضد الحسد!.. دي هي واهلها من زمن الزمن وهم شغالين بالسحر والأعمال، دي شيطان متصور في صورة بني أدم.

لكن وسط كل الكلام ده، اتدخل سليمان ابو فاطمة وضرب مراته بالقلم وهو بيقولها..

-ملعون ابو دماغك اللي ودت بنتك في داهية وفضحتنا وسط نسايبنا، اقسم بالله لما نخلص من اللي احنا فيه ده لاهكون معلمك الأدب شكله ايه.

اتدخل ابو عبد الله وبَعد سليمان عن مراته، وفي نفس الوقت برضه بص لام منصور او روحية الدجالة اللي قالتلهم..

-هي ماكدبتش، هي فعلًا كانت نيتها خير وانا كنت هعملها اللي هي قالتلي عليه بعد ما ادتني اللي فيه النصيب، بس في اليوم اللي هي كانت عندي فيه وبعد ما خرجت على طول، جت لي واحدة معرفة بتبيعلي جبنة قريش وبيض، والواحدة دي بالصدفة شافت ام نفيسة وفاطمة وهي خارجة من عندي، ولما سألتني عنها، قولتلها إنها كانت جاية لي عشان اعملها حجاب لبنتها اللي هتتجوز يوسف ابن نور تاجر القطن، وطبعًا الست المعرفة دي اول ما سمعت اسم نور بتاع القطن، ركبها مليون عفريت، اصلها.. اصلها تبقى عارفاه كويس وهو كمان عارفها، اه يا ابن نور.. الست دي تبقى زهرة مرات عمك الصغير، عمك وجدي اللي ابوك اشترى منه هو واخواته المحلات اللي ورثوهم عن ابوهم برخص التراب، بحجة إنهم مش هيعرفوا يديروها، اه ماتستغربش اوي كده يا حاج نور.. ماهي زهرة حكتلي كل حاجة عن مصايبك معاهم، وطالما بقى المستور اتكشف وكل واحد بقى بيلعب على المكشوف، فانا هقول.. هقول إنها حكت لي عن الظلم اللي شافته هي وجوزها بعد ما اتضحك عليه منك، وبسبب اللي عملته فيه يا ولداه، الولية اتمرمطت هي وهو وبقوا بيشتغلوا في نقل الجبنة القريش والبيض للبيوت عشان يدوب يلاقوا مصاريفهم ومصاريف عيالهم، وطبعًا بعد ما حكت لي، قالتلي إنها مستعدة تديني الجبنة والبيض اللي معاها ببلاش لو عملت العكس.. يعني لو أذيت ابنك وعروسته بدل ما اعملهم حجاب يحميهم، وبصراحة كده الولية صعبت عليا وماخدتش منها الجبنة والبيض ببلاش، انا عملتلها اللي هي عايزاه من غير ما تديني اي حاجة لأنها مظلومة هي وجوزها، ونور وابنه عايشين في نعيم بسبب ظلمهم ليهم، وفعلًا.. بعد ما منصور خلص الصندوق وجابه البيت هنا، شيلت البطانة بتاعته وعملت اللي المفروض يتعمل، نفذت العمل وجيبت دم القطط اللي بيتكتب بيه الطلاسم وكتبتهم جوة الصندوق.

-لا حول ولا قوة إلا بالله.. بقى انتي يا سحارة عاوزة تفهميني إنك قال ايه يعني، باللي عملتيه ده، تبقي بحققي عدل ربنا، لا والله.. العدل مابيتحققش بالسحر والدجل، بس ده مش موضوعنا، انا اللي يهمني العمل، العمل نفسه فين يا سفيرة ابليس.

لما ابو عبد الله قال لها كده، بصت لنور وليوسف ابنه وقالتلهم..

-الحاج يشخشخ جيوبه هو وابنه وانا ادلكوا على مكان العمل.

وقتها زاح الحاج نور كل اللي واقفين وقرب من ام منصور ومسكها من رقبتها..

-وحياة أبني اللي مابترجاش غير سعادته في الدنيا، لو ما قولتيلي العمل فين يا انجس الخلق، لا هكون جايب أجلك انتي والمحروس ابنك قدام مراته عياله.

قرب ابو عبد الله من نور وبَعده عن ام منصور، لكنه بعد ما حاشه عنها قالها بغضب مافارقوش من اول دخل بيتها..

-الواد والبت مالهمش ذنب، اعملي حاجة واحدة عدلة لوجه الله قبل ما تقفي بين إيديه، البت انا سايبها وحواليها عشيرة بحالها، طب لو مش خايفة على العرسان دول، ايه.. مش خايفة على روحك ولا على روح المحروس ابنك؟!

قامت ام منصور وقفت ومشيت لحد سلم بيطلع لسطوح البيت، غابت في السطوح دقايق وبعد كده نزلت وهي في إيدها لفة ورق لونها اصفر جواها قماش أكفان وجلد قطط ميتة، رمت اللفة على الأرض وهي بتبص لهم بقرف..

-العمل اهو.. غوروا من هنا وعلى الله رجليكوا تعتب عتبة بيتي تاني، وقسمًا عظمًا يا ابو عبد الله ويا نور انت وابنك، لو انا او ابني بس اتلمسنا او حد فكر يأذينا، لا هيكون اخر يوم في عمركوا.. انا من ورايا عيلة وأهل يولعوا فيكوا واحد ورا التاني، وخلوا في بالكوا، انا بس جيبتلكوا العمل عشان البت فعلًا مالهاش ذنب، اللي يستاهل الأذية هو نور اللي خد حق اخواته في دكاكين ابوهم بملاليم، وابنه اللي متنعم في خيره.

ووسط كلام روحية، كان قام منصور ابنها وخد مراته وابنه وبنته وقربهم منه، وبعد ما خلصت وسكتت، بص لها بقرف وقالها بحزن وفي نفس الوقت ب كُره..

-ما كفاية بقى، كفاية بقى سحر ونجاسة وقرف، ايه، لحد امتى هتفضلي كده، مش مكفيكي ابويا اللي رماني من وانا عيل صغير وسابك وطفش بسبب عمايلك.. انتي ايه، انتي مش ممكن تكوني بني أدمة، ده انا بس اللي كان مسكتني عليكي هو إنك امي وكمان كلامك بأنك توبتي وبطلتي، بس الظاهر ان ابويا كان عنده حق، انا هسيبلك البيت انا ومراتي وعيالي عشان تاخدي راحتك في القرف اللي انتي بتعمليه.

بعد ما خلص منصور كلامه، خد مراته وعياله وخرج من البيت وسط صويت وعياط روحية، اما الشيخ بقى، فخد العمل وحرقه وحرق معاه الصندوق وعالج فاطمة بجلسات رقية وقراية قرأن بعد كده، وبالنسبة لام فاطمة، فجوزها فضل غضبان عليها فترة كبيرة اوي لحد ما أثبتتلوا إنها اتعدلت وبعدت سكة السحرة والدجالين، اما بقى الحاج نور نفسه وابنه يوسف، فبعد اللي حصل ده وقبل ما نور يروح يولع في اخوه وجدي وفي مراته زهرة اللي اتسببت في الأذى ده كله، فيوسف ابنه قعد معاه وقال له..

-بص يا ابا.. انا ممكن اروح دلوقتي واخد رجالة بالأجرة واتخانق مع عمي ومراته واعلمهم الأدب شكله ايه، بس انا مش هعمل كده ولا انت هتروح تمسك فيهم ولا هتولع في بيتهم زي ما بتقول.. انا مسامح، مسامح وبحمد ربنا إنه نجاني انا ومراتي من الوحلة اللي كنا هنتغرس فيها قبل فوات الأوان، ومش بس كده.. انا كمان شايف إن اللي حصل ده كان رسالة من ربنا عشان نرَجع لاعمامي وعماتي اللي انت اشتريت منهم محلات جدي برخص التراب، لأنهم مابيعرفوش يديروها، حقوقهم.. ايوه يا ابا ماتبصليش، دي حقوقهم، انا هروح لواحد واحد وهديله فرق الفلوس بتاعت المحلات اللي انت اشتريتها زمان، وصدقني يا ابا.. انا مش هرتاح ولا انت كمان هتعرف تنام بعد كده لو ماعملناش اللي انا بقول عليه ده، وبعد بقى ما نعمل الصح واللي كان المفروض يتعمل من زمان، فانا هقول لعمي اللي مراته عملته وهو يتصرف معاها، ولو كان عارف.. فحسبي الله ونعم الوكيل، ولو مش عارف، فمنه ليها بقى.

وبس يا ابني.. اللي قاله يوسف عمله، راح لعمامه وعماته وادالهم حقوقهم وطلب منهم يسامحوا ابوه، وبعد ما عمل كده، حكى لعمه وجدي اللي حصلء واتفاجئ إنه مايعرفش باللي زهرة عملته، وكانت نتيجة معرفته إنه طلقها لأنها لجأت لام منصور عشان تأذي ابن اخوه، وبالفلوس اللي خدها من يوسف، اشترى دكان بقى بيبيع فيه جبنة وبيض وعسل، وكمان اتجوز واحدة تانية تربي عياله، اما روحية بقى، فدي اتجننت بعد ما ابنها منصور سابلها البيت، وفضلت سنين تكلم نفسها بعد ما بطلت مشيها في السحر والأعمال، وفي الأخر ماتت، وابنها رجع البيت تاني بعد ما دفنها، وبالنسبة ليوسف، فربنا كرمه وخد دكانة في الغورية جنب دكاكين ابوه وشغلها في تجارة القطن برضه، وفي ضهر الدكانة الجديدة دي، اشترى بيت وعاش فيه هو ومراته ومن بعدهم عيالهم اللي خلفوهم، وبالنسبة لنفيسة اخت فاطمة، فربنا كرمها هي كمان وجالها عدلها واتجوزت، وبس.. مشيت الحياة والدنيا، واللي عاشوا الحكاية دي ماتوا وجم بعدهم ناس وعاشوا حكايات تانية، واهي ساقية وبتلف يا ابني.

-الله ينور عليكي يا ستي والله، حكاية مليانة عبر بصحيح، بس.. هو مين الشيخ ابو عبد الله ده، انتي عمرك ما ذكرتيه قبل كده زي التيجاني او نصرت مثلًا!

سكتت جدتي شوية وبعد كده قالتلي..

-صح.. انا ماحكتلكش عنه قبل كده، بس اديني اهو حكيتلك، ولسه كمان هحكيلك اكتر واكتر عن ناس زي ابو عبد الله، ناس ياما عاشوا حكايات ومصايب، ومن ضمن المصايب دي، كانت حكاية مزرعة الكلاب.

قلبت الصفحة وابتديت اكتب ورا جدتي حكاية مزرعة الكلاب اللي حكتهالي، حكاية مزرعة الكلاب اللي اوعدكوا إني قريب اوي هرجع وهحكيهالكم، بس قبل ما امشي، عاوز اطلب منكوا انكوا تدعوا لجدتي بالرحمة هي وجميع أموات المسلمين، واستنوني عشان هرجع قريب اوي وهحكيلكوا حكاية جديدة من حكايات جدتي… سلام.

تمت

محمد_شعبان

قصه شارع الصنادقية