انا المرة دي مش هسألكم.. لأني ببساطة بقيت شايف جرايم القتل كترت جداً وبقت زي صباح الخير
بس برضو.. لما تسمع عن واحد قتل عياله وبعدين انتحر
ممكن متستغربش خصوصا الايام دي.. بس هيكون عندك فضول تعرف اي الي حصل عشان الراجل ده يعمل كده
انا النهاردة جاي اخدكم كده في جولة عن فندق شهير حصلت في حوادث مرعبة وبشهادة الشهود
بس السؤال هنا.. هل الي سمعته ده صح؟ ولا الناس دي اتفرجت علي مسلسل الغرفة 207 وبتألف احداث عشان تثير الجدل حوالين الموضوع؟
….
طول عمري عايش حياة هادية.. شغلتي بسيطة وبحبها وعايش مرتاح البال.. لكن دوام الحال من المحال
من يوم ما اشتغلت في الفندق ده وانا مش مرتاح.. وبسمع وبشوف احداث غريبة بتحصل وبكدب عينيا وبقول بتهيألي
لكن حياتي اتقلبت جحيم فعلا يوم ما شوفت جثتها.. ومكنتش مصدق انها ماتت بالبشاعة دي.. عشان دي تبقي جثة.. جثة
…
فندق محطة الرمل
انا هحكي الي اغرب من الخيال ويمكن في ناس هتقولي انت بتتفرج على افلام خيال علمي كتير.. لكن الي هحكيه حصل بجد
..
اسمي حسن.. سني 27 سنة من اسكندرية.. خريج كلية تجارة وطبعا ملقتش شغل في مجالي.. المهم من غير كلام كتير ودخول في تفاصيل متهمش حد غيري
انا عايش مع والدتي وهي ست كبيرة وتعبانة وللاسف ظروفي المادية صعبة جداً
والدي متوفي من زمان ومليش اخوات
وطبعا كنت عايز اشتغل عشان اقدر اصرف عليها.. عشان بعد ما دورت كتير الاقي فندق طالب house keeping عشان في عجز في الاصطف
كان فندق في محطة الرمل.. وبصراحة كان عارض مبلغ كويس جداً.. المهم روحت عشان اقدم ورقي وانا بدعي ربنا انهم يقبلوني
كان فندق فخم بصراحة.. دخلت وسألت احد الموظفين اني بدور على شغل وسمعت انهم محتاجين house keeping وعشان كده جيت وقدمت.. وانا مستعد اشتغل الشغلانة دي
..
الموظف قلي والي كان بالمناسبة اسمه سامي
_تمام يا استاذ اتفضل ممكن تقابل مدير الشئون المسؤول عن التوظيف وان شاء الله خير
_تمام ألف شكر
..
دخلت مكتب جانبي كان مكتب الشئون وكان في واحد قاعد جوه والي عرفت ان اسمه الاستاذ مراد.. دخلت وده كان الحوار ما بينا
_ صباح الخير.. انا اسمي حسن وكنت سمعت انكم عاوزين ناس تشتغل وانا جاي عاوز اشتغل
_ تمام.. احنا فعلاً محتاجين ناس تشتغل.. ورقك جاهز ولا لسه هتجهز
_ لا انا ورقي جاهز ومستعد استلم الشغل من دلوقتي لو امكن
_ لا مش لدرجة دلوقتي.. ممكن تستلم بكرة الصبح
_ تمام بشكرك جداً واتمني اكون عند حسن ظنكم
…
خرجت من الفندق وانا مبسوط جداً وجريت بلغت ووالدتي اني اخيرا لقيت شغل.. كنت مش مصدق نفسي اني أخيرا هشتغل وهنعرف نعيش زي الناس
..
نمت في اليوم ده وانا مرتاح البال وصحيت تاني يوم من 7 الصبح عشان اكون جاهز للشغل
جهزت نفسي ولبست وفطرت وقولت لامي ادعيلي يا ست الكل
ونزلت من البيت ركبت مواصلة عشان اوصل الفندق بعد نص ساعة
..
دخلت الفندق عشان ابدأ اباشر شغلي الجديد.. وبدأت اتعرف على الناس الي معايا
كان معايا واحد اسمه سامي وواحد اسمه ابراهيم
وبنت اسمها ياسمين وبنت اسمها ولاء وانا الخامس
ورئيس قسم الhouse keeping كان اسمه الاستاذ جورج
..
لاحظت ان الناس دي مش مبسوطة في حاجة مخلياهم ساكتين وعابسين معرفش ليه؟
سألت سامي.. هو الناس ليه مدايقة كده؟
_ لا مش مدايقين ولا حاجة.. ده الطبيعي بسبب ضغط الشغل
..
سكت ومردتش اتكلم كتير في الموضوع ده.. بعد شوية اطلب مني اروح انضف غرفة 509 عشان في ناس جاية بليل وهتسكن فيها
روحت علي الاوضه عشان انضفها لكن قبل ما اوصل الاوضة لقيت ولاء جاية بتقولي وكان باين عليها التوتر جداً
_ هيعوز مني اي.. انا لسه كنت عنده
_ ها.. اه منا عارفة بس انت لسه جاي سبلي انا نضافة الاوضة دي
_ انسة ولاء حضرتك متوترة كده ليه.. هو في اي في الاوضه عشان مش عاوزاني اروح هناك؟!!
_ لا الاوضة مفهاش حاجة.. بس انا شيفاك لسه مستلم شغل وعاوزة اريحك
_ متشكر جداً لذوقك.. بس انا هنضف الأوضة زي ما أطلب مني
…
سبتها ومشيت ناحية الأوضة ووصلت فعلاً.. بس قبل ما أدخل انا لاحظت حاجة غريبة.. اوضة 508 واضح انها متفتحتش من فترة وده واضح من باب الغرفة الي شكله قديم جداً عن الباقيين
محطتش الموضوع في بالي وقررت ادخل الاوضة الي انا جاي انضفها
دخلت وطبعاً الناس الي بتشتغل الشغلانة دي عارفة انه بيكون معايا عربية بأربع عجلات فيها كل حاجة تخص نضافة الغرفة
المهم بدأت في نضافة الاوضة وخلصت نضافة الارض وتغيير الملايات بتاعة السرير.. كانت ريحة الاوضة مكتومة وعشان كده قررت اني افتح البلكونة عشان الريحة دي
وفتحت البلكونة وببص يميني اتصدمت عشان كان في واحد واقف في بلكونة اوضة 508.. الاوضة الي المفروض مقفولة
كان شاب واقف ابيض البشرة وبيشرب سجارة ومرسوم علي ايده وشم لتعبان.. واتلفتلي وابتسم
مش عارف اقولكم اي بالظبط.. مكان عينية كان تجويف اسود.. وسنانة مش عادية لا دي متفرقة عن بعضها
..
رجعت خطوتين لورا وانا بقفل باب البلكونة وبستعيذ بالله من الشيطان الرجيم .. قولت انا هدخل الحمام اكمل نضافة عشان اخلص وامشي انا مش هتحمل الكلام ده
دخلت الحمام ونضفت لكن الصدمة اني بصيت في المرايا وجيت اتحرك انعاكسي ثابت متحركش بقيت اتحرك يمين وشمال يمكن يكون بيتهيألي
لكن اكتشفت انها مش تهيؤات.. والانعكاس بتاعي ابتسم ابتسامة في منتهي الخبث
خرجت اجري من الحمام.. ومن الاوضة كلها وانا بقول هو في اي بالظبط.. في اي؟
..
رجعت علي الاوضة بتاعت الhouse keeping وانا باين عليا الخوف والقلق.. لكن لقيت في حوار داير بين المدير وباقي الموظفين وكان الحوار الي داير ما بنهم.. تعالوا نسمع
..
_ انا هنا مدير القسم ودلوقتي في تعليمات جاية ان اوضة 508 تتفتح وتتنضف.. في جيست اجنبي جاي ومعاه مراته وابنه وعاوزين غرفة.. وللاسف مفيش غرفة فاضية
غير الغرفة دي.. حسن وسامي هتروحوا تنضفوا الغرفة دي.. ومش عايز نقاش ولا كلام كتير الي قولته يتسمع
…
خرجنا انا وسامي من الاجتماع ده وسألته وقولتله
_سامي هو انتوا ليه معترضين علي فتح الاوضة دي يعني؟
_انا مش عايز اتكلم في الموضوع ده يا حسن بعد اذنك.. خلينا ننفذ الي اطلب مننا وربنا يسترها علينا
_ اصلي انا شوفت..
_ متحكيش حاجة مش عاوز اعرف حاجة يا حسن.. تعالي خلينا ننضف الاوضة الفقر دي ونمشي
…
سامي كان عصبي جداً بس انا كده اتأكدت ان في سر ورا الغرفة 508.. ولازم اعرفها
ووصلنا الاوضة لاحظت ان سامي بيترعش وهو ماسك المفتاح
وفتح الباب… مش قادر اوصفلكم الريحة البشعة الي في الاوضة.. ريحة عفن في المكان بطريقة صعبة
فضلت اكح مكنتش مستحمل الريحة البشعة دي
..
سامي قلي
_يلا يا حسن خلينا نخلص
_مش قادر يا سامي الريحة صعبة جداً.. انت مش شامم
_شامم بس هنعمل اي يعني.. يلا يا حسن خلينا نخلص
..
دخلنا فعلاً وبدأنا ننصف الاوضة.. اخدت مننا نضافة 5 ساعات انتوا متخيلين.. وعشان اكون صريح محصلش حاجة.. خرجنا من الاوضة وانا جريت علي الحمام الي في الممر.. وحالة من القيئ رهيبة مسكتني
من الريحة البشعة الي كانت في الاوضة دي
اقرب وصف ليها.. انها ريحة جثة متعفنة
…
المهم رجعنا عند الاستقبال كده.. لقينا واحد شكله خواجة ومعاه مراته وابنه وبنته.. عرفت ان الخواجة ده اسمه فيكتور
وطبعا ده هو الراجل الي جاي يحجز الاوضة 508
المهم ان الراجل اخد مفاتيح الاوضة
واخد مراته وعياله وطلعوا علي الاوضة
وكل واحد رجع عشان يشوف شغله.. فضل الي حصل والي شوفته معلم في ذاكرتي
..
خلص اليوم ورحنا عشان ننام.. دخلت اوضتي.. اه اصل احنا لينا سكن في الفندق اسمه سكن الاصطف
المهم دخلت اوضتي عشان انام.. ونمت لكن
حلمت حلم غريب كان عبارة عن صور متداخلة ما بين نفس الشخص الي مرسوم علي ايده تعبان.. وواحدة لابسة لبس غريب وشعرها اصفر.. وبعدها صوت طلقة رصاص مشاهد متدخلة مش فاهم منها حاجة
..
صحيت من النوم حاسس ان جسمي مكسر علي الاخر ولسه هقوم.. سمعت صرخة.. فتحت الباب وخرجت اجري
هو في اي.. في اي حد يجاوبني.. وهنا كانت الصدمة
يتبع الجزء الثاني
فندق محطة الرمل
الجزء الثاني
الي كانت بتصرخ كانت زوجة الراجل الخواجة.. بتصرخ بهيستريا.. وبتقول ان جوزها قتل عيالها
جرينا علي اوضة الراجل الخواجة عشان نكتشف المصيبة
ولاد الراجل الخواجة غرقانينن في البانيو في الحمام
والراجل نفسه شانق نفسه في السقف
رجعت لورا وانا مش مصدق… هو اي الي حصل بالظبط؟
قتلهم ليه.. اي الحاجة الي تخلي واحد يقتل عياله وبعدين ينتحر.. في سر ورا الموضوع ده بس انا مش هسكت غير لما اعرفوا
…
جات الشرطة والاسعاف والدنيا اتقلبت عندنا في الفندق
وطبعا دي جريمة كبيرة وممكن تبقي حديث الشارع
تحقيقات كتير اتعملت
واتعرف ان الخواجة ده كان مقيم في فندق من فترة وحسب كلام الشهود هناك
ان الخواجة كان بيشك في مراته وسلوكها وكذا مرة كانت بتحصل خناقات بين الخواجة ومراته
بس ليه برضو يقتل عياله؟
التحليل المنطقي بالنسبالي انه شك ان دول مش عياله وان مراته كانت بتخونه.. رغم ان ده مش مبرر ولو ده حصل فعلاً.. مقتلهاش هي ليه؟
اسئلة كتير وفي لغز في الموضوع ده
لغز ليه علاقة بالاوضة دي.. مهما كانت الاسباب مظنش ان الخواجة قتل عياله عشان بيشك في سلوك مراته
…
القضية كبرت وبقيت ترند في كل حتة في مصر واتشهرت باسم جريمة كبيرة في فندق محطة الرمل
وطبعا ده عمل شوشرة علي الفندق وكل يومين تقريباً الشرطة بتبقي عندنا في الفندق
..
لكن الغريب كان قرار مدير الفندق الي قال
_ غرفة اي الي تتقفل.. وتتقفل ليه؟.. عشان جريمة قتل حصلت فيها
عاوز الغرفة دي تتفتح وتتنضف كويس عشان تكون جاهزة لاستقبال اي جيست يجي
الغرفة تتنضف النهاردة ومش عايز نقاش في الموضوع ده
مفهوم
..
كلام غريب جداً.. ازاي الراجل ده مش خايف علي سمعة فندق هو مديره
في النهاية نفذنا قرار صاحب الفندق.. ودخلنا عشان ننضف الاوضة
نضفناها وخليناها جاهزة لاستقبال الجيست وكانت كل حاجة تمام
…
عدي يومين وكنت رايح انضف الاوضة 507.. وانا معدي من قدام الاوضة سمعت صوت ضحك اطفال.. واصوات همس غريبة طالعة من الاوضة المشؤومة.. فكرت افتح الباب.. لكن كنت متردد مش عارف افتحها واشوف في اي ولا اكبر دماغي
لكن زي ما انتوا عارفين الفضول مرض عندنا كلنا مش عندي انا بس
دخلت الاوضة الي كانت غرقانة في الضلمة.. مش شايف اي حاجة جوه
وبمجرد ما دخلت باب الاوضة اتقفل واترزع بقوة.. بصيت علي الباب بخضة ورجعت بصيت قدامي
كانت الاوضة منورة.. لكن ديكور الاوضة متغير شوية
ايوة مش دي الاوضة الي دخلتها قبل كده
فيها حاجات متغيرة
وفي نص الاوضة ولد وبنت في العشرينات وواضح انها مراته عشان كان واضح من الي قدامي وطبعا مش هقدر اوضح اكتر من كده
اكيد انتوا فهمتوا… مفيش دقيقة ولقيت باب الاوضة بيتفتح ودخل منه شاب.. نفس الشاب الي شوفته قبل كده في البلكونة
ايوة هو.. ووشم التعبان الي علي ايده بيوضح ده وخرج مسدس وقال
_ انتي بتخونيني انا.. انا الي عملت كل حاجه عشانك وحبيتك
وانا قولتلك قبل كده بدل المرة مليون.. انا مش بحبك
انا مش عاوزاك فهمت ولا لسه
_ بس انا مش هعرف اعيش من غيرك.. والله ما هعرف واذا انتي شايفة كده.. فأنا مضطر للي هعمله دلوقتي
…
الشاب ده وجه المسدس ناحيتهم وداس علي الزينات
وفي لحظة بقا في جثتين قدامي علي الارض
مكنتش مصدق
لكن الشاب ده جاب جركن صغير وملي الاوضة كلها بنزين
وولع في الاوضة.. بس عمل حاجة غريبة جداً
مخرجش من الاوضة ايوة.. مخرجش
الشاب ده فضل واقف والنار مسكت في جسمه كان بيصرخ
وصرخات مجهولة المصدر من كل مكان في الاوضة
صرخات مش قادر اتحملها
والاوضة بقت حتة من جهنم
…
غمضت عينيا وفتحتها لقيت نفسي واقف في مكان واسع في شموع كتير
وناس حواليا اشكالهم غريبة وكلهم علي دراعهم نفس وشم التعبان
وبدأوا يقولوا كلام مش مفهوم.. حرارة المكان بتزيد بشكل لا يحتمل
وفي النهاية سكتوا.. والمشهد رجع اتبدل من تاني
ورجعت الاوضة بس المرة دي كان فيها اتنين شباب والاوضة كانت مش محروقة ولا حاجة
وكل واحد من الشباب ماسك ورقة وبيكتب فيها كلام وبيعيط
وقاموا وكل واحد فيهم جاب حبل وربط الحبل في السقف وكل واحد فيهم علق الحبل في رقبته وهو بيقول
مش عايز اعمل كده.. والله ما عايز اعمل كده
وكان بيعيطوا بحرقة
وفي لمح البصر شنقوا نفسهم….قربت من الورق والي كان مكتوب فيه انهم يأسوا من حياتهم وقرروا الانتحار واخيرا المشهد اتبدل للمرة الاخيرة ولقيت نفسي واقف في الاوضة ومفيش حد معايا
وواقف لوحدي
…
انا الي شوفته ده فهمت منه حاجات.. ان في جرايم حصلت في الاوضة دي وعشان كده الاوضة دي اتسكنت
لكن اي موضوع الشموع والكلام الغريب وليه الشباب دي انتحرت.. وكانوا بيقولوا مش عاوزين نعمل كده
..
في لغز في الموضوع ده… بس انا لازم اعرفه
خرجت من الاوضة وروحت للاستاذ جورج عندي اسئلة كتير
ومحتاج عليها اجابات.. ومش هسكت غير لما اعرف اي حكاية الاوضة دي بالظبط
دخلت مكتب الاستاذ جورج وسألته
_هو الي بيحصل بالظبط يا استاذ جورج.. الاوضة دي مش طبيعية انا شوفت حاجات صعبة وتقلق.. ومدير الفندق مصمم ان مفيش حاجة
_ لا انا شوفتهم واستنجدوا بيا
_ هما مين دول يبني.. مين الي استنجد بيك
_ الي ماتوا في الاوضة دي.. قبل موضوع الخواجة
_ مفيش حاجة من الكلام ده.. مفيش حد مات في الاوضة قبل الجريمة دي
انت باين عليك اعصابك تعبانه شويه
_ لا انا بقولك شوفتهم.. والله شوفتهم
شوفت واحد علي دراعه وشم و…
_خلاص يبني انا مش عايز اسمع .. كفاية لحد كده واتفضل يلا شوف شغلك
…
خرجت من مكتبه وانا محتار.. الناس دي مخبية اي
واي السر الي في الاوضة دي بالظبط
ركبت الاسانسير عشان انزل الدور الارضي.. كان راكب فيه شاب
ركبت والاسانسير بدأ ينزل بينا.. بس في لحظة افتكرت حاجه وبصيت للشاب الي جنبي.. وهنا كانت الصدمة\
فندق محطة الرمل
الجزء الثالث والاخير
ده واحد من الشباب الي شنقوا نفسهم في الاوضة
بلعت ريقي بالعافية ورجعت بصتله.. اختفي ملهوش اثر
مش فاهم حاجه.. طيب هما عاوزين مني اي.. عاوزين اي انا مش فاهم حاجه
…
نزلت الريسبشن تحت.. لقيت واحدة جيست واقفة وعاوزة تحجز غرفة
الموظفة فضلت تدور علي غرفة فاضية ملقيتش غير الغرفة 508
كنت عايز اتكلم مع الجيست واقولها بلاش وان حياتك هتبقي في خطر.. لكن ده طبعاً غير مسموح
كانت ست كبيره في السن.. شيال الشنط اخد شنطتها وطالعها الاوضة وهي طلعت بعده
وانا بقول يا تري هيحصل اي تانى.. ربنا يسترها في الي جاي
…
في اليوم ده طلعت عشان انضف غرفة في نفس الدور
وانا معدي قدام اوضة 508 سمعت صوت مكتوم زي صراخ مكتوم
خبطت علي الباب مرة واتنين مفيش حد بيفتح
طلعت المفتاح الاحتياطي الي بيكون معايا دايما
وفتحت الاوضة… اتصدمت عشان الست كان لافف حوالين رقبتها تعبان وبيخنقها وهي بتحاول تخلص نفسها
لما شافتني بدأت تلوح بأيديها عشان الحقها.. جريت عليها وبمجرد ما لمست التعبان اتبخر زي ما يكون هوا
الست دخلت في موجة من الكحة
وفضلت تشكرني والغريب انها مش مستغربة الي حصل
…
خرجت من الاوضة ورجعت الريسبشن تانى بفكر اعمل اي طيب اسيب المكان كله وامشي
لا انا مستحيل امشي قبل ما اعرف الحقيقة.. لقيت الست نازلة وطلبت تمشي من الفندق
طبعاً قالت شوفت تعبان والمدير قال نضفوا الاوضه كويس
طلبت من المدير اني اروح انا انضف الاوضة.. بصلي شوية وقال
_ ماشي يا حسن روح نضف الاوضة.. بس خلي بالك من نفسك
..
روحت الأوضة من تاني.. دخلت وفضلت ادور على حاجة مش عارف هي اي.. سمعت صوت جاي من الحمام
فتحت الحمام بحرص وانا بقول اعوذ بالله من الخبث والخبائث.. دخلت مفيش حاجه الحمام طبيعي جداً
لا مش طبيعي.. ستارة البانيو بتتحرك.. قربت وانا خايف وجسمي بيتنفض.. وفتحت الستارة.. صرخت من المنظر الي شوفته.. جثة محروقة في البانيو.. لا مش جثة دي مفتحة عينيها وبصالي وبيطلع منها صوت اشبه بزمجرة كلب
…
بتلفت عشان اخرج لقيتها في وشي ومسكتني من رقبتي وضغطت ضغطت.. كنت خلاص هموت لكني ضربتها وجريت بره الحمام وبره الأوضة كلها.. وروحت على اوضة الاصطف الي فيها سامي
مسكته من هدومه وقولتله
_ انت عارف كل حاجة.. انت عارف سر الاوضة دي وانت لو متكلمتش انا هقتلك انا الي بشوفه جنان خلاص مش قادر استحمل ومش فاهم اشمعنا انا
_ عشان هما اختاروك بسبب الشفافية
_ هما مين… وشفافية مين.. مش فاهم حاجة
_ انا هحكيلك كل حاجة.. هحكيلك كل حاجة.. بس توعدني انك مش هتروح هناك
_ هناك فين؟
_ تسمع عن عبدة الشيطان
_ انت بتقول مين؟ عبدة اي؟
_عبدة الشيطان.. الحكاية غريبة يا حسن.. حكاية لو انا مشوفتهاش مكنتش هصدق حرف فيها
الي حصل كان غريب… من 3 سنين كان المكان ده هادي جداً زيه زي اي مكان في الدنيا.. لحد ما في يوم جيه واشتغل في المكان هنا واحد اسمه نعيم
كان شاب زيك كده بس نعيم كان مخبي حاجة.. من تصرفاته وتوتره في بعض الأحيان
مكنش مختلط بحد ولو حد حاول يتكلم معاه.. كان بيبقي قليل الكلام جداً
بعد فترة جيه 2 شباب وبنت كان شكلهم ولبسهم غريب كده والوشم الي علي ايديهم وشم لتعبان
كانوا مصريين.. نعيم اول ما شافهم اتوتر جداً وراح للمدير وقدم استقالة ورفض يقول اي اسباب
وتاني يوم اختفي من الفندق
محدش كان فاهم في اي
لكن بعد يومين صحينا علي ابشع حاجة حصلت.. حريقة في أوضة الشباب.. دخلنا الاوضة وطفينا الحريق ولقينا 3 جثث.. وحسب شهادة الشهود الي كانوا في الاوضة الي جمبهم.. انهم سمعوا الشباب بيتخانقوا والسبب خيانة وبعدين سمعوا صوت ضرب نار.. بلغوا الريسبشن لكن علي موصلنا لقينا حريقة.. لكن كان في ورق متحرقش النار ملحقتش توصله.. والي عرفنا منه ان دول عبدة الشيطان.. وانهم بيعبدوا آله وثني
طيب اي علاقة ده بنعيم؟
اكيد ده السؤال الي جيه علي بالك.. الناس دي بتدور علي حد عنده شفافية يعني بيقدر يشوف الحاجات المستخبية المحجوبة عن العين
زيك كده.. وزي نعيم
نعيم اختار يهرب منهم ومكنش عامل حسابه انهم هياجوا وراه.. والله اعلم هو فين دلوقتي
اما عن الي انت شفتوا في الاوضة.. فالي فهمته من كلامك ان الناس دي عملت طقوس خلت الارواح تظهر للكل عشان يكشفوا من عنده الشفافية
وللاسف انت من وقع عليك الاختيار
..
_خلص كلامه وانا مش فاهم حاجه.. يعني اي؟
معني كلامه اني لازم ابقي من عبدة الشيطان.. لا لا
اعوذ بالله.. انا لا يمكن ابقي زيهم أبداً.. انا هسيب المكان كله وهمشي انا مش عاوز حاجه
_ للاسف مش هو ده الحل.. هما مش هيسبوك غير لما تبقي معاهم
_ طيب والحل.. الحل اي؟
_ المواجهة يا حسن.. المواجهة هي الحل
بس لازم تمتلك سلسلة القرون عشان تقدر عليهم
_ اي سلسلة القرون دي؟
_ علي حسب الكلام الي في الورق.. ان الي بيحميهم سلسلة معمول عليها تعويذة بتنتهي بنجمة خماسية يتوسطها رأس جدي
وان دي لو اتحرقت كل حاجة هتنتهي
…
خلص سامي كلامه ورجعت اوضتي رميت جسمي علي السرير وغمضت عينيا للحظة.. لما فتحت لقيت نفسي في مكان واسع جداً.. الارضية سودة والسقف والحيطان نفس اللون
وفي نص الاوضة.. الشيطان بعينه ايوة شيطان بمنظره المخيف.. وقال بصوت اجش
_ انا هعمل معاك اتفاق.. اتفاق انت الوحيد الي كسبان فيه
هتبقي معانا وهتمتلك اسرار وخبايا الارض.. هتشوف حاجات ليها العجب وهتبقي ثري معاك فلوس لا تحصي
كل ده مقابل.. انا تعترف اني الاله وتؤمن بي وسأفتح لك ابواب النعيم
_ ولو رفضت هتعمل اي؟
_ ستري الجحيم ألوان.. ستكره كل من حولك.. سأجعل حياتك اسوء من موتك
عليك عدم التفكير اذا قمت بالموافقة قام بارتداء سلسلة القرون التي تحفظ ارواحنا للابد
_ السلسلة الي قلي عليها سامي.. اقدر دلوقتي انفذ الي كنت عاوز اعمله
…
المخلوق ده لبسني السلسلة وهو بيقول.. طلسم مش فاهم منه اي حاجة
وصحيت حاسس اني مخنوق ومش طايق نفسي من الي عملته
لكن المفاجأة ان السلسلة موجودة جمبي علي السرير
فرصتي عشان احرقها بس مش هنا.. في الاوضة الملعونة هحرقها واخلص المكان من الشر ده
..
قومت من مكاني وانا باخد نفسي بالعافية وفي ايدي السلسلة.. طلعت الاوضة الملعونة فتحتها.. وجبت جركن بنزين وبدأت ادلق في الاوضة كلها.. وبعدها مسكت السلسلة عشان ارميها في النار.. خلاص دي نهايتهم
….
مساء الخير انا سامي.. انا الشخص الي قولت لحسن كل حاجة عن الاوضة.. والنهاردة دخلنا علي حريقة في الغرفة 508.. طفينا الحريقة لكن الي كان ميت جوه
كان حسن
وكان علي وشه اشد انواع الفزع وماسك في ايده سلسلة فيها نجمة خماسية يتوسطها راس جدي
..
مات حسن وانتصر الشر.. لكن دي مش الجولة الاخيرة ولسه الحرب مستمرة
…
محمود الأمين
