هو في حد لسه مسمعش عنهم وعن قواعدهم وقوانينهم.. لا أكيد الكل عارف هما مين
محاولات كتيرة منهم للسيطرة علي العالم وجعل عدد السكان مليار واحد فقط.. عشان يقدروا يحكموا قبضتهم علي العالم
أكيد عرفتوا انا بتكلم عن مين
طيب سمعتوا عن الشريحة الي هتتزرع في دماغ البشر.. والي هتكون بدايتها الحان فيها ذبذبات تخلي خلايا المخ تتلف.. ويضطر المتضرر يخضع للعملية الي هتنقذ حياته ولكن في الحقيقة هتخليه ينضم لهذا الكيان الاسود
….
منطقة معزولة
الجزء الاول
القاهرة 2020
_ الو.. مين معايا؟
_انا كنت عايز ابلغ عن حاجة مفزعة بتحصل دلوقتي في صوت صراخ وخبط ورزع طالع من شقة الجيران الي قابلنا.. بس محدش فينا عنده الجرأة يعرف في أي ولا يتدخل
_ العنوان بسرعة عشان نتحرك
…
أنا هيثم ظابط شرطة..لسه منقول لقسم في منطقة متوسطة.. البداية كانت بلاغ من شخص بيقول ان الشقة الي قدامهم طالع منها صرخات
اتحركنا فورا علي العنوان.. اقتحمنا الشقة لكن الغريب الشقة مهجورة.. وبشهادة حارس العمارة والجيران ان الشقة دي مقفولة من فترة كبيرة
وطبعا روحنا علي الشقة الي منها الشخص الي مقدم البلاغ
والمفاجأة الشقة مهجورة من سنة!!!
..
يعني اي الكلام ده اومال مين الي بلغ؟ ممكن يكون بلاغ كاذب وحد بيشتغلنا
رجعت القسم وانا بضرب كف بكف.. ومش فاهم حاجه
لكن علاء زميلي اتكلم وقال
_ أنت مش أول واحد يتكلم في الموضوع ده
_ يعني ده حصل قبل كده؟
_ كذا مرة.. وكل مرة نفس الناتج
_ ازاي محدش دور ورا الموضوع؟
_ مين قالك؟ دور ظابط هنا اسمه مصطفى
لكن دلوقتي هو في مستشفى المجانين
_ ليه دخل المستشفى ليه؟
_ الي حكاه ميتصدقش.. واتقال عليه مجنون ومخه ضرب
…
بس انا عايز افهم.. يعني اي بلاغ ياجي من شقة مهجورة.. مين الي اتصل بينا؟
_ هيثم متفكرش في الموضوع ده وكبر دماغك
_ انت حرة بس النهاية هتكون زي نهاية مصطفى
…
فكرت كتير في كلام علاء.. لكن في النهاية الفضول قاتل يا جماعة.. خلصت شغل في اليوم ده الوقت متأخر بس انا هدخل المستشفى دي ودلوقتي
اتحركت علي المستشفي.. وصلت ودخلت بسلطتي اني ظابط شرطة.. وسألت عن مصطفى وعرفت الاوضة الي قاعد فيها.. ووصلت الاوضه ودخلت
…
مصطفى كان قاعد في السرير وبيقري في كتاب ومستمتع
سحبت كرسي وقعدت جمبه وعرفته بنفسي.. وقولتله
_ أنا مقتنع مليون في المية انك مش مجنون.. انا عايز افهم اي الي حصل؟ انت هنا ليه؟
_ انا هحكيلك بس انت هتصدق؟
_ انا حصلي حاجة ليها علاقة بالموضوع وعشان كده عايز افهم
_ ههههه.. اي الشقة المهجورة اتصلت بيك؟
_ انت عرفت ازاي؟
_ اسمع الي حصل
…
قبل ما احكيلك.. الدليل علي كلامي المذكرات في مكتبي.. اقراها وهتعرف كل حاجة
البداية مع حسام شاب طموح ومتفوق في دراسته جتله منحة في دولة من دول اوروبا.. طبعاً فرصة العمر لأي شاب.. وكان وقتها حسام بيحب شهد الي ساكنة قدامهم وقرر يروح يخطبها قبل ما يسافر وفعلا.. تمت الخطوبة
وسافر حسام.. وبدأ يدرس هناك
لكن يوم قرر يرجع.. الطيارة وقعت.. ومات.. ايوة حسام مات.. لكن الجثة كانت متشوهه بفعل انها وقعت في الميه والسمك شوه الملامح
كانت صدمة كبيرة للكل.. ولشهد اولهم الي دخلت في مود اكتئاب وانعزلت عن الناس كلها
…
في الفترة دى بدأت تاجي كوابيس لشهد.. كانت بتشوف حسام وجسمه غرقان دم وبيطلب منها تنقذه.. مكنتش فاهمة تنقذه ازاي؟ هو في حد بينقذ ميت!!
فترة صعبة عدت علي شهد لحد ما قرر أهلها عرضها علي طبيب نفسي
..
ومرت سنة كاملة.. سنة علي فراق حسام ولسه شهد بتفكر فيه.. وفي يوم كانت شهد واقفة في البلكونة
شافت اكتر مشهد مرعب في حياتها.. الشقة بتاعت اهل حسام قدام بلكونة شهد بالظبط يعني تقدر تشوف بوضوح الي بيحصل جوه
شافت حسام خطيبها الي المفروض ميت دلوقتي
وهو بيخلص علي عيلته واحد واحد.. وبطريقة بشعة
حسام كان بيخلع راسهم من علي جسمهم بايده وكأنهم عرايس لعبة
..
انهارت شهد وفقدت النطق من بشاعة المنظر.. ولما روحت على موقع الجريمة كانت مدبحة حرفيا دم في كل مكان في كل شبر.. محدش كان فاهم اي القوة الجبارة الي تخلي حد يقتل بالشكل ده
دورنا كتير ورا الموضوع ولكن النهاية ان حسام مات وشبع موت.. وشهادة وفاته الدليل القاطع علي ده
..
شهد فضلت في المستشفى فترة.. وبعدها خرجت لكن الكوابيس بقيت اسوء من الاول
حسام كان بيتعذب قدامها حرفيا.. كانت بتصحي من النوم تصرخ وتبكي ولكن بصوت مش طالع
لكن حصلت حاجة مفزعة جداً
في يوم شهد كانت في اوضتها واقفة قدام المرايا بتسرح شعرها
لكن النور قطع.. لسه هتتحرك عشان تجيب تليفونها سمعت صوت بيقولها
لسه بتحبيتي يا شهد.. النور رجع في اللحظة دي وحسام كان واقف وراها
حاولت تصرخ لكن صوتها مش طالع… قالها
ساعديني انا بتعذب انقذيني يا شهد انا بموت
..
_ هفهمك كل حاجة.. بس انتي ساعديني
_ اساعدك ازاي؟
..
هتروحي المكان الي هقولك عليه وهتعملي الي هطلبه منك بالحرف.. وبكده هتعرفي توصليلي
المكان كان الاهرامات
شهد مكنتش فاهمه حاجه.. لكن قررت تروح
خرجت من ورا اهلها.. وراحت هناك
..
لكن شهد مرجعتش تاني.. ووقفت حكايتها لحد كده اهل شهد اعتبروا بنتهم ماتت بعد 3 شهور من اختفائها.. لكن في يوم ام شهد طلعت تزغرط في البلكونة وتقول شهد رجعت.. بنتي رجعت
لكنها مكنتش عارفه ان الرجوع ده في نهايتهم
…
علي بليل الكل صحي علي صوت صراخ.. صراخ مفزع.. محدش قرب من الشقة وبلغونا
ولما اقتحمنا الشقة.. كانت الصدمة.. يتبع الجزء الثاني
…
منطقة معزولة
الجزء الثاني
لقينا عيلة شهد كلها مقتولة بنفس الطريقة الي اتقتلت بيها عيلة حسام.. بس المرة دي محدش شاف حاجة
شهد اختفت.. بعد ما رجعت.. محدش كان فاهم حاجة بس انا كنت بحاول افهم
طبعنا صورة شهد واتوزعت علي كل الكماين ومداخل المحافظات
شهد كانت المشتبه الاول في قتل عيلتها
…
بدأنا التحقيقات الي كانت كلها بتودي لطريق مسدود.. وكان في مليون سؤال في دماغي؟
يا تري حسام عايش فعلاً؟ طيب هو الي قتل عيلته؟
طيب هو اي الي بيوصلهم للحالة دي؟ واي دخل الاهرامات في الموضوع
..
لحد ما خرج عالم مصري جاي من دولة عظمة واتكلم كلام خطير جداً.. والعالم ده اتقتل بالمناسبة
العالم ده قال ان في الدولة العظمي عندها منطقة معزولة عن البشر كلها.. قال ان المنطقة دي عبارة عن مجموعة معامل بيعملوا تجارب علي البشر
وبيجربوا عليهم عقارات بتحولهم وحوش علي الارض
وقال ان وباء كورونا هما السبب فيه!!
لكن اخر جزئية اتكلم فيها العالم عن حاجة مهمة جداً
قال ان المنطقة بعتت ناس لموقع سقوط الطائرة الي وقعت.. وانهم خرجوا منها شباب عايشين وخدوهم عشان يعملوا عنهم التجارب دي
واتكلم عن تجربة لو ثبت صحتها… يبقي العالم كله داخل علي كرثة
العالم قال
انهم زرعوا جوه دماغ البشر دول شريحة فيها افكارهم ومن وسط الافكار دي افكار عدوانية تخلي الناس تقتل بعضها
عشان هدفهم انهم يخلوا العالم مليار واحد.. واطلقوا عليه المليار الذهبي
عشان بعدها هيحكموا العالم وهيتم وضع قوانين صارمة محدش هيقدر يخالفها
…
_ لو كلامك ده صح يا مصطفى.. يبقي حسام كان هناك وشهد راحت هناك.. بس اي الي دخل الاهرامات في الموضوع ده
_ الجماعة دول قالوا ان بدايتهم الحقيقية هتكون من الاهرامات.. يمكن هو ده السبب
_ كمل يا مصطفى
..
في الفترة دى انا كنت مشغول عن مراتي وكان بينا خلافات كتير… لكني لاحظت ان خروجتها بدأت تزيد.. سألتها قلتلي انها تعرفت علي واحدة من الجيران وبقيوا صحاب
مهتمتش بالموضوع.. وياريتني اهتميت
عشان الي اكتشفته ان الي اتعرفت عليها مراتي دي هي شهد ايوة.. وعرفت ده متأخر
..
في يوم مراتي اتصلت بيا.. وقلتلي انها عزمت صاحبتها علي الغدا
قولتلها تمام.. انا كده كده هتأخر في الشغل
خلصت شغل في اليوم ده.. ورجعت البيت فتحت الباب واتصدمت من المنظر
مراتي دماغها مفصولة عن جسمها.. صرخت ووقعت علي الارض من المنظر.. رجليا مكنتش شيلاني حرفيا
في الوقت ده الجيران اتلمت.. ولقيت نفسي متهم بقتل مراتي.. وجيت هنا عشان اتقال عليا مجنون
انا مش مجنون يا هيثم.. مش مجنون صدقني
_ مصدقك يا مصطفى.. مصدقك
_ دي مفتاح مكتبي.. هتلاقي مذكرات شهد هناك اقراها كويس
_ بس أنا عندي سؤال قبل ممشي.. ليه الاتصال ده جالنا من الشقة المهجورة؟
_ انا معنديش تفسير.. بس الاكيد ان الارواح مش مرتاحة.. ارواح الناس الي ماتت لسه بتتعذب
..
سبت مصطفى وخرجت من المستشفى.. معايا مفتاح مكتبه.. روحت علي مكتبه وفتحته
فضلت ادور في كل حتة.. لحد ما فتحت درج لقيت فيه مذاكرات مكتوب عليها شهد
فتحتها وبدأت اقرأ
…
كان عندي يقين ان حسام لسه عايش.. بس الشخص الي جالي دلوقتي.. مش هو الشخص الي انا حبيته
ده كان اشبه بالانسان الآلي
مبرمج.. وقلي انه كان عايش بعد ما الطيارة اتقلبت
وانه فجأة لقي ناس بتشيلوه.. وافتكر انه كده نجي
لكن لما فاق لقي نفسه في حوض زجاج كبير.. ومتوصل فيه خراطيم واسلاك.. وفيه سائل اخضر بيحاوط بيه
بعدها عملوله جراحة في المخ.. وعرف انهم زرعوا شريحة في دماغه
..
حسام طلب مني اساعده.. واني لازم اروح هناك
ولما سألته هناك فين؟
طلب مني اروح الاهرامات الساعة 12 بليل واني هعمل طقوس معينة قدام الهرم الاكبر خوفو وبعدها هعرف اوصلوا واساعده
…
خلصت مذكرات شهد.. وانا لسه برضو مش مصدق اني عايش الاحداث دي
انا حاسس اني في فيلم خيال علمي.. في الوقت ده تليفوني رن
كان رئيسي في الشغل.. العقيد سامي وطلب يشوفني
روحتله رغم اني كنت ناوي ارجع البيت عشان بجد تعبان جداً
…
اتكلم وقال
_ علاء قلي انك مهتم بموضوع الاتصال الي بيجيلك عن الشقة المهجورة.. وانا بقولك تنسي الموضوع ده وتركز في شغلك افضل مفهوم
_ مفهوم يا فندم تحت أمرك
..
علي رنة تليفون الشغل.. جالنا بلاغ عن جريمة في حي راقي من احياء القاهرة
اتحركنا من القسم بسرعة علي موقع الحادث
وصلنا والمشهد جوه صعب جداً.. جثة لاتنين لسه متجوزين وراسهم مفصولة عن جسمهم
نفس المشهد بيتعاد من تاني
رجعت للعقيد عشان اقنعه يسبني افتح القضايا القديمة عشان نجمع أدلة لكنه رفض
…
لأول مرة احس ان الشغل مقيدني ومش عارف اخد راحتي ولا اتحرك
واخيرا رجعت البيت في اليوم ده.. كنت مرهق وتعبان جداً ودخلت نمت علي طول
لكن زحمة اليوم كلها كانت في الكابوس وكأنها صور متقطعة ومشاهد متدخلة
قومت ملقتش مراتي جمبي.. دورت عليها لكنها مش موجودة
اتصلت بيها.. قلتلي انها مع واحدة صحبتها وجاية دلوقتي
…
قومت روحت الحمام وجهزت نفسي عشان انزل الشغل.. وانا في الطريق عديت علي واحد كنت اعرفه من زمان ليه في الكلام بتاع الحوادث الغامضة.. وسألته عن الي بيحصل
قلي
_ دي منطقة معزولة.. بيحكمها ابليس بنفسه علي حسب الكلام والمعلومات الموجودة علي جوجل
بتقول انهم مخصصين كرسي لابليس وهو الي بيديهم الاوامر.. كل الي انت سمعته صح وما خفي كان اعظم
روحت الشغل لقيت ملف قضية امبارح اتقيد ضد مجهول.. يااه للدرجة دي مش عاوزين نتعب نفسنا
…
دخلت للعقيد وقولتله وانا في كامل قوايا العقلية انا مستقيل.. معرفش عملت كده ازاي؟ ازاي موضوع زي ده سيطر على تفكيري كده وخلاني ضيعت مستقبلي
..
رجعت البيت لقيت مراتي لسه راجعه من بره وبتقولي كانت مع صحبتها.. وانها لسه متعرفة عليها قريب وانها عزماها علي الغدا النهارده
..
دخلت الحمام لكن فجأة افتكرت كلام مصطفى (سألتها قلتلي انها تعرفت علي واحدة من الجيران وبقيوا صحاب
مهتمتش بالموضوع.. وياريتني اهتميت
عشان الي اكتشفته ان الي اتعرفت عليها مراتي دي هي شهد ايوة.. وعرفت ده متأخر.. في يوم مراتي اتصلت بيا.. وقلتلي انها عزمت صاحبتها علي الغدا
قولتلها تمام.. انا كده كده هتأخر في الشغل
خلصت شغل في اليوم ده.. ورجعت البيت فتحت الباب واتصدمت من المنظر
مراتي دماغها مفصولة عن جسمها) .. فتحت باب الحمام عشان اشوف مين الست دي.. ولكن مكنتش متوقع ان ده هيحصل.. يتبع الجزء الثالث والاخير
…
منطقة معزولة
الجزء الثالث والاخير
لقيت مراتي بتفتح الباب.. وزي ما توقعت هي شهد
خلاص انا قررت انا هقتلها.. هقتلها واخلص الناس كلها من أذية حتي مش قادر اقول البني آدمة دي
عشان هي فعلاً مش بني آدمة هي ربوت صنعوه عشان يقضوا علي العالم.. زي ما أكيد صنعوا منه ملايين
…
خبيت السلاح في هدومي وخرجت الصالة.. كانت مراتي بتجهز السفرة.. وشهد قاعدة في سكون تام
مش بتتكلم ساكتة وبصالي ومبتسمة ابتسامة مستفزة
فيما معناها.. مش هتقدر تعمل حاجة
مراتي كانت مشغولة في تجهيز الاكل وانا هنا استغليت الفرصة وسألتها
..
_ اي الي جابك هنا يا شهد.. انا عارفك وعارف مين اللي وراكي كويس
_ هههه.. كويس أنك عارفني، انا جاية هنا عشان اخلص عليكم.. عشان انت بتدور ورانا، بس أطمن مفيش حد هيقدر علينا.. ولا حد هيقدر يوقفنا
_ هنقدر يا شهد.. هنقدر
..
في اللحظة دي كنت هخرج سلاحي وهضربها.. لكن اتفجأت بشهد بتقولي..
_ خلي بالك ابنك خارج من الاوضة.. خبي السلاح
_ سلاح.. سلاح اي؟
_ ههههه.. السلاح اللي انت مخبيه في هدومك
..
أنا معرفش هيا عرفت ازاي؟ لكنها قامت وقالت لمراتي.. انا اسفة هضطر أمشي عشان عندي مشكلة في البيت
ومشيت.. مشيت وسبتلي تحذير اني ابطل تدوير وراهم وبلاش فضولي ياخدني واعرف حاجة
…
طبعاً كنت خايف علي مراتي وابني اللي مليش غيرهم في الدنيا
وعشان كده اخدتهم لمكان بعيد لحد ما أعرف هتصرف ازاي
وقررت أرجع تاني المستشفى لمصطفي.. عاوز افهم هل وجودي منعها تقتل مراتي.. ولا هيا مكنتش جاية تقتلها؟
..
اخدت عربيتي وروحت علي المستشفى.. وصلت ودخلت المستشفى وروحت لمصطفي
اللي اول ما شافني قال
_ كنت عارف انك هترجع.. احكيلي حصل اي معاك؟
_ هحكيلك بس عندي سؤال.. شهد كانت عندي في البيت بس مقتلتش مراتي زي ما حصل معاك
هي خافت من وجودي ولا هيا كانت جاية تحذرني؟
..
_ لا ده ولا ده ويمكن الاجابة اللي عندي تقلقك
_اجابة أي يا مصطفى؟
_ واضح انهم عاوزين يضموك ليهم.. أصلا مفيش حد يقدر يمنعهم لو كانت عاوزة تموتهم كانت عملت كده
_ انا عاوز اقتلها.. مفيش حل تاني
_ حاولت قبلك لكن معرفتش.. بس الحاجة الوحيدة الي هتقضي عليها بيها انك تضربها في دماغها بالرصاص.. هما من غيرها ولا حاجة
…
خرجت من عند مصطفي.. وطلبت من مراتي تبعت رسالة لشهد تقولها انها في البيت لوحدها وعاوزها تقعد معاها شويه.. طبعاً انا كنت مفهم مراتي علي كل حاجة… ورغم صدمتها من كلامي لكن اخدت القرار الصح انهم يبعدوا
المهم ان مراتي نفذت المطلوب بالظبط.. وبعتت الرسالة لشهد.. رجعت البيت ركبت كاتم الصوت لمسدسي.. بعد ساعة الباب خبط.. فتحت لقيتها شهد
قولتلها اتفضلي هي مستنياكي جوه.. دخلت شهد وبدون مقدمات وقبل ما تحس بحاجة
طلعت المسدس وضربتها بالرصاص في دماغها
..
وقعت قدامي علي الأرض.. كنت حاسس اني انتصرت بموتها علي ايدي
لكن الموضوع منتهاش لحد كده
بعد ما قتلتها.. رجعت المستشفى لمصطفي.. سألت عليه وروحتله أوضته كالعادة
لكنه كان في الحمام
فضلت مستنيه شويه.. دقيقة اتنين خمس دقايق ربع ساعة
لا كده كتير.. في اللحظة دي دخلت الممرضة عشان تدي الدوا لمصطفي
قولتلها
_ أنا كنت لسه هنادي علي حد منكم.. مصطفي طول جدا في الحمام وانا قلقان عليه
_ حاضر هشوفه دلوقتي
..
خبطت عليه مرة واتنين.. مفيش رد صمت
حسيت ان الممرضة قلقت
وفتحت الباب.. صرخت الممرضة من الصدمة جريت عليها.. لكني لما شوفت المنظر فهمت
مصطفي مكنتش راسه مفصولة عن جسمه زي ما جيه في بالكم دلوقتي.. لا خالص
..
مصطفي كان ميت بطريقة اكثر بشاعة.. مصطفي كان جسمه مسلوخ حرفيا ومكان عينيه فاضي
المنظر نفسه مقرف ويخليك مش قادر تتحمل ده
طبعاً الدنيا اتقلبت.. تحقيقات ونيابة واتحقق معايا انا كمان.. عشان انا اخر واحد كنت عنده قبل ما يموت
اترفعت البصمات من علي المكان.. وطبعا مفيش حاجة يمشوا وراها.. محدش عايز يصدقني في اللي بحكيه وقالوا اني اتجننت
..
واستدعاني العقيد رئيسي السابق وقلي
_ وبعدين ناوي علي ايه تاني؟
_ يعني اي ناوي علي أي.. انتوا ليه مش عاوزين تصدقوني؟
_ لا انا صدقت بعد ما سمعت كلام الدكتور عز.. ده عالم في الماورائيات وقلي كل حاجه
بس للاسف قال احنا عاوزين نعرف اي الي بيحصل هناك بالظبط
_ يعني اي؟
_ يعني عاوزين حد يروح هناك بس يقدر يسجل كل حاجة صوت وصورة.. والحد ده هو انت.. لازم نلحق الدنيا قبل ما ندمر نهائي
..
بين وبينكم وافقت حتي لو عارف اني ممكن مرجعش.. قعدت مع الدكتور عز الي اداني كاميرا تسجيل صغيرة اتحطت في هدومي عشان اسجل كل حاجة هتحصل هناك
وقلي
هتروح عند الاهرامات الساعة 12 بليل.. هترسم طلسم معين علي الحجر العاشر في الهرم.. هيتفتح قدامك ممر هتمشي فيه.. وهتوصل يا هيثم
هما هيوصلوك
..
ودعت اهلي واخدت كل المطلوب وروحت الاهرامات.. واسيبكم مع الدكتور عز الي هينقل اي الي بيحصل بالظبط
…
مساء الخير
انا دكتور عز.. هيثم دخل الممر وهجم عليه حد وحقنه بمخدر
ومن الواضح انهم واخدين هيثم لطيارة
…
بعد 24 ساعة وصل هيثم لمكان معزول عن العالم
خليني اوصف المكان
مكان واسع.. ممر واسع فيه جنود مقنعين ومعاهم سلاح مطور علي يمين وشمال الممر.. صناديق زجاج جواها ناس كتير.. متوصل بجسمها خراطيم وفيه مادة لزجة جوة الصناديق
بس اي ده.. في كرسي كبير قاعد عليه حد الكاميرا هتجيبه.. هتجيبه
لكن فجأة.. سمعنا صوت صرخة.. كانت صرخة هيثم والاتصال اتقطع
مش محتاج اقول.. ان هيثم مش راجع تاني.. او هيرجع زيهم
..
اللي شوفته يخليني اقولكم قربوا من ربنا.. الايام الجاية صعبة والمستقبل مظلم جداً والخطر قريب مننا
الحرب دلوقتي مش حرب سلاح.. الحرب دلوقتي حرب العقول.
…
تمت
…
محمود الأمين
