همسات من عوالم مجهولة

كنت بمجرد ما اصحى احرك صوابعي عشان احس بجسمي وزي ما تقول بتأكد اني صحيت واستعدت وعيي، يوميها ماعرفتش احرك لا ايدي ولا صوابعي ولا حتى أرمش!.

واكتشفت ان لثواني جسمي منفصل عن روحي،

مش عارفة ازاي اشرحها بس ده اللي حصل، انا قريت عن الاسقاط النجمي وان الانسان يقدر ينفصل عن جسمه

ومتأكدة اني لو حاولت اعملها هاعرف لكن مافكرتش ولا اتجرأت

اظن قولتلك قبل كده اني بعمل تخاطر دون قصد..

يعني بمجرد ما افكر في شخص الاقيه باعتلي مسدج مثلا او اشوفه بعدها بمافيش..

ومش صدفة لان الصدفة بتحصل مرة مرتين مش عشرين ولا تلاتين!.

او اني احلم بشخص ماشفتوش لسنين الاقيه تاني يوم قدامي، هحكي بدون ترتيب عن اللي بيبين صدق كلامي..

والأهم تصدقوني، لأني وبرغم الغرابة اللي هتقرأوها إلا اني والله صادقة في كل كلمة هقولها..

انا في مرة كنت في فرح عائلي ولفت نظري واحدة اول مرة اشوفها في حياتي، بس قعدت مركزة معاها وحسيت اني اعرفها مش عارفة ليه؟!.

مافيش يومين جالي طلب على الفيس بوك من واحدة اتعرفت عليها في جروب

كلمة هنا كلمة هناك اكتشفت انها هي اللي شوفتها وقعدت مركزة معاها!.

الكلام ده من ١٠ سنين او اكتر يعني قبل ما الفيس بوك يخترع موضوع اقتراحات الاصدقاء ده.

ده موقف، موقف تاني حصل لجارتي..

من حوالي ٩ سنين سكنت في بيت جديد

بعد ايام جاتلي جارتي اللي قصادي ومعاها بنتها متجوزة، بنتها صغيرة وحلوة ويبان عليها انها عايشة مبسوطة ماديا

اول ماشفت البنت اللي كان اسمها بسمة،

فجأة سرحت، وكأني غوصت في ذكرى او مشهد كده زي ما يكون بتفرج على فيلم،

شفت بسمة انها مطلقة عشان قصة خيانة!!.

تفاصيل تانية ملهاش لزمة، المهم اني شوفتها مطلقة بسبب خيانة زوجية..

بعدين عرفت ان بسمة عندها بنتين

ومتجوزة عن حب وجوزها طاير بيها، وان مافيش اي حاجة تدل ان فيه مشاكل في حياتها بحكم اني خالطت جارتي، المهم بقى ان بسمة بعد حوالي تلات سنين اتطلقت!!..

أيوة والسبب اقسم بالله كان علشان خيانة زوجية!

جوزها رجع من الشغل لقى معاها واحد، ومن صدمته منطقش، وطلقها واداها كل حقوقها في المحكمة حفاظا على سمعة بناته، عرفت ازاي كل ده؟.

ببساطة لأنه بعدها بسنة وشهور اتجوز بنت عمي!.. رغم انه مافيش ولا اي صلة ولا سابق معرفة أصلا..

وهي الي حكت لي على اللي هو عمله مع بسمة مراته الاولى وعرفتني قصة الخيانة!.

وقتها وهي بتحكي انا افتكرت احساسي اول مرة شوفت بسمة..

موضوع مرعب مش كده؟.

عارفه ده كويس ومتأكدة، وصدقوني أنا اوقات كتير بخاف من نفسي وعلى نفسي برضه..

نرجع تاني للحكايات اللي ملهاش تفسير..

السبت اللي فات كنت في المستشفى بقيس الضغط

دخلت واحدة المستشفى وجت سلمت عليا، ماشوفتهاش من اكتر من ١٤ سنة، هي جارتنا وساكنة جنب بيت اهلي، مش دي المشكلة.. عادي الحمدلله معارفي كتير.. المرعب هنا اني قبلها بيوم كنت بتكلم عنها وافتكرت ان هي اللي حطتلي الحنة وانا عروسة.. وحلمت بيها كمان!

مكنتش اعرف اصلا ايه اللي خلاني افتكرها، او عرفت تاني يوم بعد ما شوفتها جاية تسلم عليا!!.

هي اصلا مش ساكنة في المنطقة دي هي جت زيارة لبيت اخوها وللصدفة حست بمغص وجت المستشفى وهناك تقابلنا!.

مرة في سنة ٢٠١٤

صحيت مفزوعة كأن عندي ضيق تنفس، بنهج ومش عارفه اخد نفسي

وده بسبب اني شوفت كابوس

شوفت اني مريضة ودخلوني العمليات وقالولي ان عندي مشكلة ف قلبي ولازم عملية فورا

الدكتور اللي هيعملي العملية _صديق مصري معرفة اسمه احمد_

شوفته ماسك مشرط بقوة وفتح صدري، لقيتني صحيت مرعوبة ومفزوعة مش قادرة اوصف الشعور كأني حسيت بالمشرط بيشق صدري بجد..

مافيش اسبوع اكتشفت ان ابني واللي اسمه أحمد بالمناسبة، وعنده سنتين.. عنده مشكلة ف القلب ولازم ليه عملية فورا في القلب!.

وفعلا جرينا ف الورق وربنا سهل وعملنا عملية قلب مفتوح في العاصمة..

موقف تاني سنة ٢٠١٦ صحيت برضه مفزوعة بعد ما شوفت اني باولد وبيعملولي حاجة اسمها كشط ( الكشط ده بيعملوه لما يحصل اجهاض ويخافوا من تعفن مخلفاته وكده)..

الكشط حاجة مرعبة بتحصل من غير بينج

المهم حلمت انهم بيعملولي كده وصحيت لقيت نفسي بعرق وبنهج من الرعب

مافيش يومين وحصلي حادثة في البيت واتحرقت وروحت المستشفى ولقيت نفسي نايمة بنفس الوضع على نفس السرير اقسم بالله وبيعملولي كشط للحروق، بيزيلوا الجلد المحروق من بطني ورجلي!.

مواقف كتير بنفس التفاصيل المرعبة، انا اخترت كام موقف حصل معايا، ومش هيبقوا اخر حاجة هشاركه معاكم، بكرة هحكي عن موضوع بيحصل عندنا في الجزائر وفي اغلب مناطق شمال إفريقيا وهو موضوع (التصفيح)

اعتقد ممكن كتير مايكونوش سمعوا عنه، هحكيه بإستفاضة ان شاء الله بكرة في نفس الموعد.

تمت.