قصه دهب فضه كامله

٢

واللي حصل بعد كده إننا وافقنا على الكلام اللي اتقال، وفي خلال ساعة كان سافر عمرو عشان يجيب الراجل اللي اسمه مصطفى ده، وفعلا.. تاني يوم على طول جابه، لكن من الساعة اللي دخل علينا فيها، واحنا حياتنا ابتدت تتقلب، وكانت بداية القلبان اللي حصلنا، لما دخل الراجل من باب البيت.. كان شكله راجل عجوز، ملامحه بتقول إنه معدي الستين ويمكن السبعين كمان، دقنه محلوقة كويس، لابس لبس لا يتناسب أبدًا مع سنه او شغلانته؛ كان لابس قميص وبنطلون شكلهم تقريبًا شبابي وملونين!

دخل البيت وهو بيلف رقبته شمال ويمين وكأنه بيتفحص المكان، وبعد ما دخل ورحبنا بيه، قعدناه قصادنا وحكيناله على كل اللي احنا فيه بالتفصيل، وبعد ما خلصنا وفهمناه احنا عاوزين ايه، بص لنا كلنا ورجع بص للبيت من تاني…

-المندل مابيتفتحش على دهب، وخصوصًا لو بتاع حرمة، وماتسألونيش ليه، ولاد أبليس مابيفتحوش الرؤية على دهب لأن مابيبقاش في منه قَطَر، يعني فكرة المندل دي مش هتنفع، احنا لازم نشوف فكرة تانية.. بس انتوا متأكدين إن الدهب ده ماتسرقش والحجة فضة هي اللي شايلاه؟!

بصينا لبعض وسكتنا، ماكناش عارفين نقوله ايه، احنا مش متأكدين من حاجة، ولا منه هو اصلًا، وقبل ما نتكلم او نرد عليه، كان اتكلم هو بسرعة وقال لنا…

-ليلة.. انا هبيت هنا في البيت ليلة، وتاني يوم لما النهار يطلع، هقدر اعرفلكوا اذا كان الدهب اتسرق ولا الحاجة شالته، وماتسألونيش ازاي، انا كل اللي عاوزه منكوا إن انا ابات ليلة في أوضة المرحومة.

رد عليه جوزي باستفسار مهم اوي..

-حلو.. هنخليك تبات في الأوضة، بس لو طلع الدهب مسروق، هنعمل ايه؟!

وكمل معتصم الكلام لما قال..

-اتفائل يا حاج عبد المنعم وخلينا نسأل السؤال من الناحية التانية.

ولف وشه وبص للراجل اللي اسمه مصطفى..

-يعني اللي اقصده، إنك لو عرفت العكس، لو عرفت يعني إن الحاجة فضة شايلاه وماتسرقش، هنعمل ايه؟!

رد الراجل وهو بيبتسم..

-ولا حاجة، لو اتسرق يبقى خليكوا في خط الحكومة وحاولوا تلاقوه، وساعتها مش هاخد منكوا جنيه وهمشي، ولو طلعت المرحومة اللي شايلاه وماتسرقش، فانا هتصرف.. وقبل ما تقولوا لي هتتصرف ازاي، فانا هقولكوا إن انا هستنطق قرينها او عُمار المكان، وبعدها بأيام واحدة من بناتها هتحلم بحلم وهتيجي تبلغني بيه، والحلم ده هيبقى فيه أمارة انا هعرفها وهبلغها لقرين المرحومة وهو هيدلني على المكان بالظبط في حلم، ولو حصل وقدرت الاقيه، هاخد منه لما يرجع ٢٠%.. ولو بكرة الصبح عرفت بعد اللي هعمله إنه ماتسرقش، هاخد تلات تلاف جنيه عشان قعدتي معاكوا لحد ما نلاقيه، وكمان عشان لو حابين توقفوا وماتكملوش ابقى خدت على الأقل حق الكشف، ها.. موافقين؟!

بص لي جوزي وبلع ريقه في حركة معناها إنه مش مطمن، ف هزيتله راسي بالموافقة، وده كان عكس ماهو بيتمنى، وبسبب بصتي دي رد على الراجل وقاله..

-انا والحاجة سماح موافقين، شوف الباقيين.

بص لهم مصطفى، فكلهم هزوا راسهم بالموافقة وابتدينا من اللحظة دي في الدخول جوة دوامة التدوير على الدهب!

بعد ما كلنا واقفنا على كلام الراجل الغريب اللي اسمه مصطفى ده، ابتدا يمارس حياته عادي في البيت وكأنه واحد من الرجالة اللي قاعدين فيه، ياكل ويشرب شاي ويقعد براحته في أوضة امي الله يرحمها، لحد ما الليل جه، وبعد ما اتعشينا وقعد هو مع جوزي في أوضة امي، قال له..

-انا مش مرتاح.. حرص، حرص منهم يا حاج عبد المنعم، كلهم عاوزين ينهشوا لحمك ومالك، ف لما الليلة تتفض، خد مراتك وامشي.

بص له جوزي باستغراب..

-مين دول؟!

-معتصم وعمرو.. واحد برشمجي همه الفلوس والدهب، والتاني بتاع حريم همه شهوته، اما انت.. فانت راجل فلاح ومؤمن، قلبك ابيض وبتحب مراتك.. مراتك اللي انت قاعد هنا عشان ورثها، حَرص عليها وخد بالك منها.

لما الراجل قال كده، كان جوزي باصص له وساكت وهو مذهول من كلامه، عبد المنعم فعلا مابيحبش معتصم ولا عمرو.. والكلام اللي قاله الراجل ده عنهم كله صح، وعشان كده جوزي كان مستغرب، وقبل ما يسأل الراجل انت عرفت عنهم المعلومات دي منين، بص لباب الأوضة وقال له..

-اتفضل يا حاج وسيبني لوحدي، انا هبتدي شغل دلوقتي، وماتسألش على اي حاجة، اللي قولتهولك لو مقتنع بيه اعمله، ولو مش مقتنع.. ف اللي بيشيل شيلة بتخدل كتافه.

قام جوزي زي المسحور وساب الأوضة للراجل وخرج، والموقف ده طبعًا عرفته من جوزي لما سابله الأوضة وجه على الأوضة اللي انا وهو قاعدين فيها وهو مسهم، ولما سألته انت مسهم كده ليه وحكالي الموقف ده، سكتت.. ماكنتش عارفة اقوله ايه، لكن هو بقى اللي اتكلم لما قال لي..

-الراجل ده مش دجال ولا نصاب زي ما كنت فاكر يا سماح، ده مخاوي، عينيه بتلمع كده وشكله يخض!

قلقت بصراحة من كلامه وقولتله..

-طب يلا.. اقفل على السيرة بقى ويلا ننام عشان عاوز افوت على البيت بكرة، انا طول اليوم سايبة العيال مع امك لوحدهم.

قفل جوزي النور بعد ما قولتله كده ونمنا، بس انا اول ما غمضت عيني.. سمعت صوت غريب!

كان عياط واحدة ست، ومش أي ست.. الصوت ده انا عارفاه كويس، ده صوت الحاجة فضة جمال.. امي الله يرحمها!

فتحت عنيا على أخرها وانا مذهولة من المنظر، كنت في الترب، بالتحديد قصاد قبر امي، بس اللي خلاني برقت مش الترب ولا وجودي فيها، انا اللي فزعني كانت امي.. امي اللي لقتها واقفة قصاد قبرها وهي بتعيط، شكلها كان مرعب، الكفن اللي كانت لبساه كان متوسخ، والحاجة اللي ترعب اكتر بقى، كانت الرؤوس اللي ماسكها، تلات رؤوس.. اتنين في إيد، وواحدة في الإيد التانية، ملامحهم مطموسة ومش باين منهم أي حاجة، برقتلي بعنيها اللي مليانة دموع، وقبل ما اصرخ او حتى اتحرك من مكاني، رَفعت إيديها الاتنين وحدفتني بالرووس في وشي!

شهقت وقومت من النوم مفزوعة، اه كان حلم.. ابشع حلم شوفته في حياتي، لكن الاغرب من الحلم بقى كان باب الأوضة المتوارب لما بصيت ناحيته، وقبل ما اصحى جوزي كان هو صحي على صوت شهقتي العالية وسألني..

-مالك يا سماح؟!

شاورت ناحية الباب وانا بقوله…

-في حد بيبص علينا من ورا الباب يا حاج!

قام جوزي من جنبي جري وفتح النور، بس قبل ما يقوم على طول، كان الحد اللي واقف ورا الباب المتوارب ده، طلع يجري عشان مانعرفش هو مين، لكن جريه من ورا الباب، مامنعش جوزي انه يخرج ويلف في الطرقة عشان يعرف مين اللي كان بيبص علينا، او كان واقف بيبص علينا ليه من الأساس.. وبعد فاتت دقايق وانا قاعدة قلقانة وخايفة، رجع عبد المنعم وقعد جنبي على السرير..

-الطرقة فاضية وبيبان الأوض مقفولة، وحتى الراجل اللي اسمه مصطفى ده، نايم تحت وقافل باب أوضة امك عليه.

بلعت ريقي وانا برد عليه بقلق…

-يعني ايه.. اومال مين اللي كان واقف ورا الباب؟!

-مش عارف.. بس الظاهر ان مصطفى كان معاه حق، انا مش مرتاح لا للي اسمه معتصم ده ولا للي اسمه عمرو، وحاسس كده ان واحد منهم بيراقبنا او بيبص عليكي.

حسيت في كلام عبد المنعم إنه شاكك في واحد منهم، ومعنى شكه ده، إنه ممكن الصبح يعمل مشكلة توصل للخناق، وعشان ابعد الأفكار دي عن راسه، قربت منه وقولتله بخوف..

-لا يا حاج.. لا معتصم ولا عمرو.. الظاهر إن انا كان بيتهيألي، اصل انا كنت نايمة وحلمت بكابوس، والظاهر كده إن صحياني مفزوعة خلاني اتخيلت حد ورا الباب.

بص لي عبد المنعم وماردش، حسيت إنه مش مصدقني او فاهم إن انا عاوزة امنع مشكلة ممكن تحصل ما بينه ومابينهم، وعشان كده بعد ما بص لي، نام واداني ضهره وماردش عليا، اما انا بقى.. فانا فضلت صاحية لحد تاني يوم الصبح، ومع طلوع النهار، اتجمعنا كلنا في صالة البيت ومعانا الراجل اللي اسمه مصطفى، قعدنا كلنا قصاده وقبل ما نسأله عملت ايه، اتكلم هو وقال لنا…

-امبارح بالليل انا عملت جلسه وشوفته.. قرين الحاجة فضة.. قال إن الدهب موجود وسطكوا وماتسرقش، بس موجود فين او أيه الأمارة اللي ممكن نعرف بيها مكانه.. ماقالش، وعشان اقدر استنطقه، فانا هضطر ارجع القاهرة عشان اجيب من البيت عندي شوية بخور وارجع هنا تاني.

لما قال كده، بص له جوزي بشك..

-وطبعًا هتاخد التلات تلاف جنيه اللي قولت عليهم وتقول يا فكيك.

ضحك مصطفى وقام وقف..

-لا.. مش هاخد حاجة الا لما ارجع بكرة، بس انا عاوز اقولك على حاجة قبل ما امشي، الدهب ده حكايته ماخرجتش من وسط الموجودين، وماتسألنيش عرفت منين.. القرين ماقاليش حاجة، بس انا شاكك إن حد.منكوا مخبيه في مكان قريب.. وشكي ده هتأكد منه لما ارجع.

قام جوزي وقف وبص للي قاعدين..

-طب ياريت، ده انا لو اكتشفت إن الدهب مع حد فيهم، اقسم باللي رفع السما من غير عمدان لا هكون معلقه على باب البيت بالمقلوب.

قام معتصم وقف وبعده عمرو.. عمرو اللي بص لجوزي من فوق لتحت وقال له بتريقة..

-معاك حق.. اللي يطلع معاه الدهب، لازم يتعلق، حتى لو… حتى لو معتصم.

كان هيقرب منه معتصم ويشد معاه، لولا إن مراته حاشته، وعدى الموقف على كده ومشي الراجل اللي اسمه مصطفى ده وقال إنه هيرجع تاني يوم، وطبعًا بعد ما مشي، روحت بيتي واطمنت على ولادي وعلى حماتي ورجعت تاني على بيت امي، وعلى بعد العشا كده.. كنت انا وجوزي ومعتصم وهدى ورانيا، قاعدين في الصالون ساكتين، ومع السكوت افتكرت افتكرت امي وابويا الله يرحمهم، طول عمرهم كانوا قاسيين علينا، ده غير بخلهم المستمر اللي خلانا مانحبهمش زي ما بقية العيال بيحبوا أهاليهم، ويمكن بخلهم ومعاملتهم لينا بقسوة.. خلونا كلنا نتسرسب واحدة ورا التانية من البيت من بعد ابويا ما مات، انا.. اتجوزت اول واحد اتقدملي، عبد المنعم ابن الحاج فراج صاحب الأراضي والأطيان، واختي هدى.. اتعرفت على جوزها عن طريق واحدة صاحبتها واتجوزته وسافرت معاه الصعيد، اما رانيا بقى، فسافرت تتعلم في القاهرة، وهناك.. اتعرفت على عمرو الحلاق واتقدملها، في الأول امي كانت رافضاه لأن شكله ماكنش مريحها، وبصراحة هي كان معاها حق، الجدع ده عرفنا بعد كده إنه بيشرب مخدرات واخلاقه زي الزفت، لكن هنعمل ايه بقى.. رانيا حبته وضغطت على امي عشان توافق عليه، ولأننا مالناش عمام وخيلاننا مش عايشين في البلد الأرياف اللي احنا منها، فامي مالقتش حد يقف في وش رانيا او يقولها لا.. ففي النهاية اتجوزت عمرو وراحت عاشت معاه في القاهرة، ومن بعد سفرها ومن قبله سفر هدى وقبلهم جوازي، احنا التلاتة اتفرقنا، وادينا اهو.. اتجمعنا تاني، بس اللي جمعنا ماكنش موت امنا ولا حبنا لبعض، ده كان الورث!

قطع تفكيري مع نفسي صوت معتصم اللي بص لمراته وقال لها بصوت مسموع..

-انا جعان اوي.. احنا مش هنتعشى ولا ايه؟!

بص له جوزي بقرف وقال له..

-هنتعشى يا اخويا، بس نتجمع كلنا الأول.

بصيت على اللي قاعدين لقيتهم ناقصين عمرو جوز رانيا، وعشان كده بصيت لرانيا وقولتلها..

-هو جوزك فين يا رانيا؟!

-فوق.. مريح في أوضتنا.

قومت وقفت وشاورت لهدى..

-طيب.. انا هدخل انا وهدى المطبخ عشان نحضر العشا، وانتي يا رانيا اطلعي اندهي جوزك عشان ينزل وابقي حصلينا.

قامت رانيا وطلعت الدور اللي فوق عشان تنادي جوزها، اما انا بقى، فدخلت انا وهدى المطبخ وابتدينا نحضر العشا، بس واحنا واقفين في المطبخ، فجأة سمعنا من الدور اللي فوق، صوت صريخ رانيا…

(يا عمرو.. يا عمرو.. الحقووني.. الحقوني.. جوزي مات!)

يتبع

قصه دهب فضه كامله

قصه دهب فضه كامله

قصه دهب فضه كامله

قصه دهب فضه كامله

قصه دهب فضه كامله

٣

قامت رانيا وطلعت الدور اللي فوق عشان تنادي جوزها، اما انا بقى، فدخلت انا وهدى المطبخ وابتدينا نحضر العشا، بس واحنا واقفين في المطبخ، فجأة سمعنا من الدور اللي فوق، صوت صريخ رانيا…

(يا عمرو.. يا عمرو.. الحقووني.. الحقوني.. جوزي مات!)

طلعنا كلنا جري على الأوضة، ومع وقوفنا على الباب اتصدمنا من اللي شوفناه.. عمرو كان نايم على السرير وجنبه طبق فيه بودرة، عينيه كانت مبرقة ووشه كان ازرق، وطبعًا مش محتاجة اوضح إنه مات بسبب تذكرة بودرة مستممة، ايوة.. ده كان كلام البوليس والطب الشرعي، عمرو اصلًا مدمن وعادته إنه بيشرب حشيش وبرشام وغيرها من المخدرات، بس الجديد بقى واللي ظهر عليه في الفترة الأخيرة واللي عرفناه من رانيا، إنه بدأ يشم بودرة.. والظاهر كده إنه لما نزل القاهرة عشان يجيب الراجل اللي اسمه مصطفى، اشترى تذكرة بودرة مغشوشة، والتذكرة دي كانت هي السبب في موته لما شمها.

عدا اليوم.. وتاني يوم استلمنا جثته من المشرحة ودفنناه في تربنا لأنه مالوش أهل، مقطوع من شجرة.. ابوه وامه ميتين ومالوش اخوات، حتى قرايبه كانوا بُعاد عنه بسبب الشرب اللي بيشربه، وبعد ما دفنناه ورجعنا البيت وقعدنا كلنا سوا، بص معتصم لعبد المنعم جوزي وقال له..

-بقولك ايه يا جدع انت.. انا مش هقعد ولا يوم زيادة في المخروب ده، وسواء بقى جه اللي اسمه مصطفى ده النهاردة او ماجاش، ف انا مش هقعد.. انا عاوز ورث مراتي عشان اخدها ونغور من هنا، الظاهر إن عمرو كان معاه لما شك فيك.. وانا بصراحة بقى مش هستنى لما اموت في البيت ده زي ماهو مات، اه.. ماهو الله اعلم هو مات ازاي، جايز يكون حد هو اللي حطله تذكرة بودرة مغشوشة بدل التذكرة اللي معاه عشان يخلص منه، حد له مشاكل معاه وتملي واقف له زي الديك الشركسي.

اتنرفز جوزي وقام وقف قصاد معتصم..

-ما تغوور.. غور يا عم وسيب مراتك قاعدة في بيت امها لحد ما نلاقي ورثها وتاخده، انت قارفنا ليه.. وبعدين انت بتتهمني بقتل عمرو!.. طب يا أخي انا لو هقتل حد، يبقى على الأقل اقتل بتاع الحريم اللي كان بيبص على مراتي من ورا الباب في عز الليل، مش هقتل حتة عيل برشمجي مايسواش تلاتة ابيض في سوق الرجالة، طب والله ده الظاهر إن مصطفى كان معاه حق في كل اللي قاله عنكوا.

اول ما جوزي قال لمعتصم كده، معتصم اتعصب ومسك فيه، وابتدت ما بينهم بقى خناقة كبيرة وصوتهم بقى عالي، لحد ما اتدخلت انا وهدى ورانيا وبعدناهم عن بعض، بس معتصم لما بِعد عن عبد المنعم ماسكتش، ده راح ناحية السكينة اللي كانت موجودة جنب طبق فاكهة على الترابيزة اللي قصادنا، وابتدا يهاجم جوزي بيها بعد ما زق مراته ورانيا، وقتها وقفت انا قصاده وفي حركة غبية منه قرب السكينة من بطني وخدت انا الضربة بدل جوزي!

وقعت على الأرض وانا بتوجع وبنزف.. اما رانيا، فكانت اتخبطت في الترابيزة لما وقعت وراسها وفقدت الوعي، وبالنسبة لهدى، فهدى قربت من جوزها وحاولت تاخد منه السكينة، لكنه مسكها بعصبية وفضل يضرب فيها بهيستريا وهو بيقولها..

(منك لله انتي واخواتك والدهب بتاعكوا.. انتي السبب.. انتي اللي خلتيني قاتل، انا كنت عاوز اقتله هو.. هو اللي اتهمني بمصيبة ماعملتهاش لما قال إني بصيت على مراته).. وبعد ضربه ليها، وقعت هدى وغابت عن الدنيا هي كمان، بس في الوقت ده قام جوزي من جنبي وخد السكينة منه وضربه بيها في بطنه، وبعد ما معتصم اتضرب بالسكينة، مسك رقبة عبد المنعم وفضل يخنقه بكل قوته وهو بيقاومه، لحد ما الاتنين وقعوا من طولهم.. واحد اتخنق وتقريبًا مات، والتاني وقع بسبب السكينة اللي انضرب بيها في بطنه وتقريبًا مات هو كمان، اما انا بقى.. فانا فقدت الوعي بعد ما نزفت كتير اوي، وحقيقي مش فاكرة من اللي حصل بعد كده الا صور.. صور لشخص دخل البيت وكان في إيده شنطة سودة.. شاورتله وقولتله يلحقني، فسابني وطلع يجري، ولما فوقت تمامًا، لقيت نفسي في المستشفى والحمد لله الدكاترة لحقوني، اما معتصم، فعرفت إنه موجود في المستشفى هو ورانيا وهدى، بس حالته خطرة على عكس حالتي انا واخواتي، اما جوزي بقى.. فده بسبب إنه كان عنده مشكله في التنفس، وبسبب سنه الكبير وتدخينه بشراهة، فماستحملش لما معتصم خنقه بكل قوته وقطع النفس!

عدت فترة بعد ما فوقت وابتديت استوعب الدنيا من حواليا، واللي عرفته بعد كده كان هو العجب بعينه.

انا بعد ما فوقت جه ظابط واستجوبني، وبصراحة انا ماخبتش عنه حاجة، حكيتله كل اللي حصل بالظبط من اول ما اتجمعنا لحد الخناقة واللي حصل فيها، وبعد ما خلصت كلامي، بص لي الظابط وقال لي…

-شوفي يا ست سماح.. الراجل اللي دخل عليكوا البيت ده وبلغ البوليس، هو مش حرامي ولا الراجل اللي اسمه مصطفى جار اختك رانيا، ده دكتور من اسكندرية اسمه دكتور خالد، بيقول إنه قريبكوا وإنه كان جاي عشان يديكوا الدهب اللي والدتك الحاجة فضة الله يرحمها، كانت سايباه أمانة مع والدته.

لما الظابط قالي كده، كنت مذهولة ومش فاهمة، وفضلت في حالة الذهول دي لحد ما خرجت من المستشفى وروحت البيت انا ورانيا وهدى، وبعد ما روحنا وجالنا اللي اسمه خالد ده، واللي بالمناسبة يعني تبقى امه مرات ابن عم امي، وهي عايشة في اسكندرية من بعد موت جوزها.. قعد خالد قصادنا وفتح شنطة سودة كانت معاها، وبعد ما فتحها وشوفنا جواها الدهب قال لنا…

-ده الورث بتاعكوا.. امكم الحاجة فضة لما راحت العمرة اخر مرة، كانت امي معاها، وفي رحلتهم سوا.. الحاجة قالت لأمي إنها عايشة لوحدها وخايفة لا حد يدخل يسرق الدهب منها وهي نايمة، او يعمل فيها حاجة، وعشان كده قالت لامي إنها تخلي الدهب معاها كأمانة، ولأنها بتثق في امي وفيا وبتحبني زي ما بتحبكوا تمام.. فهي ادتني الدهب لما جيت وصلتها بعد العُمرة وانا روحت اسكندرية اديته لامي، وبعد كده جت لي سفرية تبع شغلي وفضلت برة مصر لفترة، وبعد ما رجعت على تعب امي فجأة، قالتلي إنها عرفت بموت الحاجة فضة، بس ماقدرتش تيجي تعزي لأنها تعبانة اوي، وطبعًا بعتتني بالدهب ليكوا.. بس اول ما جيت البيت وجيت اخبط على الباب، لقيته اتفتح!

زقيته بالراحة ودخلت، كنت حاسس إني داخل مدبح مش بيت!.. ريحة الدم كانت نفاذة اوي للدرجة اللي خلتني دخلت بسرعة عشان اعرف سببها، وبمجرد ما دخلت، شوفت كارثة!.. مدبحة زغللت عيني، اقل وصف يتقال عليها إنها مدبحة؛ جثث لستات ولرجالة وحواليهم الدم مغرق المكان.. فضلت مبرق للمنظر وانا في إيدي الشنطة، لحد ما في لحظة فوقت من الصدمة وكنت هطلع جري عشان ابلغ عن اللي شوفته، بس قبل ما اخرج، وبعد ما اديت ضهري للجثث، وقفت فجأة في مكاني لما سمعت صوت واحدة ست بتقولي.. (ال.. ال.. الحححقني، الحقني).. لفيت عشان اشوف مين مصدر الصوت، وبمجرد ما بصيت شوفتك انتي يا ست سماح، كنتي بتنازعي الموت وانا مش عارف مين اللي عمل فيكوا كده، وقتها جريت على برة وندهت لأهل البلد وبلغت البوليس، والحمد لله إنهم جم في الوقت المناسب ولحقوا منكوا اللي قدروا يلحقوه.

بصيت لخالد والدموع في عينيا وانا بقول جوة راسي.. (وقت مناسب ايه ولحقوا مين.. احنا ضيعنا واترملنا)

بص لنا خالد وسكت بعد ما خلص كلامه، وبعد سكوته لثواني، سألنا لو عاوزين حاجة وبعد كده عزانا وسابنا ومشي، مشي وسابنا في البيت انا واختي هدى واختي رانيا، كنا كلنا بنبص لبعض وبنبص للدهب والدموع في عنينا.. مش دموع الفرح بأننا لقينا ورثنا اللي كنا بندور عليه، لا.. دي دموع الحسرة والموت.. دموع خلتني قومت وقفت وقولت لهدى..

-انا هدخل انام في أوضة امك شوية ومش عاوزة حد يصحيني، ولما اقوم نبقى نشوف هنقسم الزفت ده ازاي.

دخلت أوضة امي وحطيت راسي على مخدتها وانا ببكي، وفضلت ابكي بحرقة لحد ما غفلت، بس تغفيلتي مادامتش كتير لأني صحيت من النوم على صوت هدى اللي كانت بتصحيني…

-يا سماح.. يا سماح.. قومي شوفي المصيبة اللي حطت على دماغنا.

قومت وانا متوقعة اي بلوة، اه.. ما خلاص بقى، مهما كان اللي حصل، فبالتأكيد مش هيبقى أبشع من اللي عيشناه، لكن اللي حصل فعلًا كان بلوة… هدى لما دخلت المطبخ عشان تعملنا لقمة نتقوت بيها بعد ما رجعنا من المستشفى، وسابت رانيا قاعدة جنب الدهب، خرجت مالقتهاش ولا لقت الدهب!

رانيا سرقت الدهب ومشيت من البيت، بس ياريتها لحقت تتهنى بيه، ده في نفس اليوم بالليل، عرفنا إنهم لقوها مقتولة في الطريق المقطوع اللي على أول البلد، ولما الحكومة حققت في الموضوع وفتشوا تليفون رانيا اللي كان معاها، عرفوا عن طريق تسجيلات كانت عليه إنها كانت على علاقة باللي اسمه مصطفى ده وإنها حكياله كل حاجة من الأول، وملخص المكالمات اللي البوليس سمعمهم لنا كان كالأتي..

(ايوة.. انا قولتلهم زي ما اتفقنا إن عمرو هيروح يجيبك، ولما انت تيجي بقى تبقى توقعهم في بعض لحد ما نعرف إذا كان الدهب معاهم ولا لا.. هتوحشني يا حبيبي)

وده كان ملخص اللي دار في المكالمة الاولى، اما المكالمة التانية بقى فكانت قايلة له فيها..

(ايوة مات.. مات يا مصطفى، انا اللي حطيتله السم في الشاي وغسلت الكوباية، وبعد كده فتحت تذكرة البودرة وحطيتها جنبه عشان يبان إنه مات اوفر دوس او متسمم بالبودرة المغشوشة اللي بيشمها وسيبته ونزلت، النجس ابن الأنجاس قام بالليل يبص على سماح اللي عينه عليها من وقت ما جينا.. مش كفاية، مش كفاية إنه على قده وعامل زي اختي وانا مستحملاه وماطلقتش منه، لا.. ده كمان بيبص على اختي، اه.. ماهو اخره فُرجة، بس بقولك ايه.. انت تيجي وتحاول تخلص موضوع الدهب ده وتعمل اي حاجة وتخلي اللي واخده منهم او مخبيه يعترف، وانا لما اخد نصيبي في الدهب بعد ما نلاقيه، ونصيبي في البيت لما نبيعه، هتجوزك وهعيش معاك)

وبعد كده كانت اخر مكالمة ما بينهم، ملخصها إنها هتسرق الدهب وهتقابله عند اخر البلد، والظاهر كده إنه كان بيلعب بيها واول ما اتقابلوا قتلها وخد الدهب وهرب.. وطبعًا الحكومة لما سمعت المكالمات دي راحتله البيت، والمصيبة بقى إنهم لقوهفي بيته، بس لقوه مقتول.. واللي عرفناه عن طريق الحكومة إن اللي اسمه مصطفى ده لا ساحر ولا دجال ولا نيلة، ده راجل نصاب وبتاع ستات وعلاقاته بيهم كتير، ومن ضمن الستات دول كانت اختي رانيا اللي استغل إن جوزها كان ضايع بسبب اللي بيشربه، وكان على علاقة بيها، وكمان من ضمن الستات دول، واحدة كانت عنده في البيت، وأكيد لما لقت الدهب معاه ولأنها أصغر منه زي اختي، خدته منه وقتلته زي ما قتل رانيا.. والحقيقة إن الست اللي عملت كده ماقدروش يوصلوا لها ولا قدروا يوصلوا للدهب لأنها اختفت وماحدش فاكر ملامحها.. واتقفل موضوع الدهب على كده، بس تعرفوا، انا مش مستغربة من إن الدهب ده راح.. الدهب ده كان ورثنا من ابونا الراجل البخيل اللي كان بيسلف الناس فلوس وكان بيرجعها منهم أضعاف، الله يرحمه ويسامحه هو وامي بقى.. هم الاتنين الربا كان لعبتهم وقدروا عن طريقه وطريق بخلهم وحرماننا من اي حاجة نحتاجها، إنهم يجمعوا فلوسهم اللي حولتهم امي لدهب وبعد كده راح.. اما بقى عن الوضع الحالي، فانا دلوقتي عايشة في البيت انا واختي هدى وعيالها وحماتي وعيالي، وبالنسبة لمعتصم، فمافضلش في المستشفى فترة كبيرة لأنه مات بعد كده، واهو.. ادي الحياة ماشية واديني بشتغل وبراعي ارض جوزي وبربي عيالي وعيال هدى.. بشتغل بربيهم على حبهم لبعض، وكمان على إنهم يحطوا الدهب والفلوس تحت رجليهم والحب فوق راسهم، وده عشان لما السنين تجري ويكبروا، مايعيشوش نفس اللعنة اللي احنا عيشناها، لعنة دهب فضة، لعنة ميراث الدهب والدم.

تمت

قصه دهب فضه كامله

قصه دهب فضه كامله

قصه دهب فضه كامله

قصه دهب فضه كامله

قصه دهب فضه كامله

محمد_شعبان

عزيز_ياقوت

دهب_فضة