(8)
رجعت “ريم” سعيدة برجوع السلسلة وقالت ل “رنا” اللى حصل واتصلت ب “رامي” وعرفته ان السلسلة رجعت .. واستمر نزول “ريم” كل يوم مع “مريم” الصبح للتمشية وبليل معاها فى المطعم ,,,
فى يوم وهما فى الحديقة “ريم” كانت لوحدها بتسمع ميوزك من الهاند فري ورافعه راسها للسما ومغمضه فى وش الشمس فجاءه حست بضل فتحت شافت ايد شخص بتبعد اشعه الشمس عنها واتخضت وبتبص وكان الشاب :
ب ابتسامه : هاي
اتفأجت “ريم” وبعدت خطوتين : هاي .
_ سوري ع انك اتخضيتي لكن محبتش ازعجك ومحبتش اشعه الشمس تزعجك
_ مفيش مشاكل ..
ب ابتسامه : صدفة تانيه
سكتت “ريم” لحظات تتذكره : اها ..
مد ايده : “لوهان” ممكن تقوليلي “ليو”
“ريم” بصت ع ايدة وسكتت :
لوهان ب ابتسامه :اخر مره متعرفناش وانا قدمت نفسي وانتي ..؟
ريم بتردد مدت ايديها : ريم وممكن تقولي روما
لوهان : اه السلسله بحرف ال r_ ايوه
_ واضح جدااا انك مش من هنا اول مره اشوفك هنا .. عربيه… شرق الاوسط..؟
ريم با ابتسامه: مصريه وهنا ف زياره ل اختى ..
_ كنت فاكر بتدرسى فى عرب كتير هنا لدراسه
_ لا انا خلصت دراسه ..مبريال كوليدج في لندن
_ بجد.. انا كمان كنت هناك ..انا اساسا كنت عايش ف لندن عمرى كله ورجعت كوريا من 5 سنين ..
بطريقه غير مباشرة حب يعرف عمرها : بس ال يشوفك يقول عمرك 21
ريم تلقائى : 24
_ وانا 27
ريم: اهلا بيك
لوهان قدر يعرف معلومات عن “ريم” منها من خلال الكلام وعرف عنها معلومات الاساسيه ,, وحس انها هتقوم وبسرعة مد ايده : اصدقاء
اتفاجئت “ريم” من تصرفه وكمل “لوهان” كلامه:
_ بدون مقدمات ,, بصراحه حاسس انك انسانه جميله وشرف ليا اننا نكون اصدقاء ..انا لما كنت فى لندن كان عندى اصدقاء عرب كتير لكن لما رجعت “كوريا” افتقدت وجودي وحواري معاهم افتقدتهم ,,انا ليا اصدقاء من كل الدول العربية ,, ولما شوفتك حسيت اننا ممكن نكون ,, ممكن ..؟
ريم اتفاجئت من كلامه : انت فاجئتنى بالكلام دا ..انا بصراحه… …لوهان قاطعها : انتى قولتيلى مش عارفه تعملى ايه ليا لما السلسله رجعتهالك ..اعتبري ان دا طلبي وكمان مقابل حاجه ليا عندك ..؟
ريم متفاجئه : حاجه ليك عندى ..؟
_ ايوه .. ومش عاوزها عاوز بس صداقتك ممكن ؟
ريم متفاجئه : ممكن تقولى ايه هى وارجعالك انا مش فاكره ,,
_ لو وافقتى ع صداقتنا هقولك عليها …
ريم متوتره ومش فاهمه حاجه :
لوهان بيضحك: اوكيه اوكيه ..هنعمل اتفاق لو اتقابلنا 3 مرات صدفه يبقى القدر بيجمعنا ودى اشاره ولا مفر وقتها توافقى ع صداقتى وهقولك اوكيه…؟
“ريم” متفاجئة” من طريقته وحبت تنسحب من الحوار ول احساسها انه مفيش صدف هتحصل وافقت
_ اتفقنا همشى انا واشوفك ف الصدفه الجايه ..باى
ريم باصه عليه وهو ماشى بيلبس النضاره وبينزل الكاب ع عينه : شخصيه غريبه
رجعت قعدت ع المقعد وبتسمع الميوزك قربت منها ” مريم” :
_ سورى يا روما قابلت واحده صاحبتى واتكلمنا فتاخرت عليكى ..يلا بينا
_ مفيش مشاكل يلا .. مريم..؟
_ها..؟
_ حصلك قبل كده وواحد متعرفهوش جه يكلمك يعرض صداقته عليكى ..؟
_ صداقه ..امممم بتحصل عادى
ريم متفاجئه : بتحصل عادى…؟
_ اه يا بنتى ..انتى عايشه ف لندن ومتعرفيش انه عادى ولا ايه ..؟
_اه عايشه ف لندن بس محصلش ان واحد ميعرفنيش ولا اعرفه فجاءة يطلب صداقه
مريم بتضحك: لا عادى هنا الشاب يتعرف ع البنت لو موافقه اوكيه ..رفضتى عادى ..فكرتينى بنفسى اول يوم ارتباطى…!
_انتى مرتبطه …؟
مريم باابتسامه: ايوه .. وهعرفك عليه قريب ,,يلا علشان “رنا” بتتصل من بدري محسساني انا خطفاكي
_ يلا ..
فى البيت و”ريم” قبل ما تنام تذكرت الموقف واستغربها من جراءه”لوهان” ,, فى لندن كان محيط اصدقائها بسيط وكانت بتتجنب الاختلاط مع اى شخص متعرفوش وكانت بترفض اى طلبات اعجاب او ارتباط ,, وتذكرت اتفاق الصدف وقررت تغير مكان تجنبا لمقابلته ,,,!.لوهان رجع البيت ودخل ع غرفته يغير ودخل الحمام,, باب غرفه خبط ودخلت “يومي” ( بنت صديق مقرب وشريك والد “لوهان )
يو مى: اوبا
(اوبا كلمه بتقولها البنت فى كوريا لشاب لما يكون مقرب منها واكبر منها فى العمر اخ او صديق او حبيب )
_ لحظه وخارج
_ اوكيه مستنياك
لوهان خرج من الحمام وخرج ف الصاله ل يومى : صاحيه بدرى انهارده ..؟
_عرفت انك رايح تسجيل انهارده ..فقولت نفطر سوا
لوهان قرب من يومى ومسك خدها وبيقرصها: كان فين النشاط دا ف دراستك والذكاء دا .._ اوبا .. بتوجع ..الحركه دى بتضايقى بطلها بقى..
لوهان بيضحك: لما تكبرى..
يومى بتلف وهى واقفه: اكبر .. انا كبيره جدااا كمان
لوهان بيضحك: خلصى دراستك علشان تبقى كبيره
_ الدراسه ف لندن صعبه اوى
_ الدراسه ولا خروجك وسهراتك..نصحتك تنقلي جامعه تانيه اسهل ورفضتي
يومى بنعومه: لا انا عاوزه الجامعه ال درس فيها اوبا
لوهان بيضحك: انا داخل البس علشان نازل
_وهكون حضرت الفطار انا جبته معايا
_ اوكية
“لوهان” خلص فطار ونزل وصل “يومى” لبيتها واتجهه الى الشركة ودخل ع استوديو التسجيل وكان فيه تسجيل اغنيه جديده لفرقته .. خلص التسجيل وقف ف الشباك يشم هوا لفت نظره بنوته بتاكل قطه صغيره ,,افتكر “ريم” فمسك موبيل وفتح البوم الصور وابتدا يقلب فى صور “ريم” وثبت ع صورة وهى بتضحك وابتسم ,, دخل عليه واحد من اعضاء فرقته وصاحبه اسمه (جو وون)
_هاااى لوهان
لوهان سرحان..خبطه ف كتفه : هاى
لوهان انتبه: هاى
_ سرحان ف ايه اكيد فى الاغنيه الجديده ..؟
لوهان بيضحك: اه فعلا
جو وون لاحظ الصوره ع الموبيل :مين دي ..؟
حكي “لوهان” لصديقة عن الصدفه اللى قابل “ريم” ورجعلها السلسلة اللى حافظ عليها رغم عدم معرفتة بشخصية صاحبتها …!
تجاهلت “ريم” كلام “لوهان” وغيرت مكان نزولها الصبح ,, فى يوم وهى راجعه من تمشية الصباح اتفاجئت من وجود “امير”:.._ مفاجئه
_ امير
امير با ابتسامه: ايه رايك فى المفاجاءه وحشتيني ..
_ ال يسمع كده يقول هتقعد معانا يومين مش مسافر بكره بليل
ريم: حمد الله ع سلامتك
رنا: روما ..امير جبلك هدايا حلوه اوى ف اوضتك
ريم بصت ل امير : هنا كمان هدايا..؟
_ اى مكان تروحيه يا روما ..مبقدرش امسك نفسى لما بشوف حاجه بشوفها انها لكى بشتريها ع طول
ريم باابتسامه: ميرسى لذوقك بجد ..بس كده كتير وبعدين انا راجعه قريب لندن كنت احتفظ بيهم هناك
_ مش مهم المهم انهم وصلولك وحشتيني ,,
“ريم” استغربت من تصرفات “امير” الغير متوقعه ,, استاذنت وغيرت ملابسها وخرجت قعدوا ورجع “فريد” واتغدوا مع بعض ..:
فريد: بعد غياب الفتره دى من وقت ما جينا هنا مجتش ومقضيها تليفونات
ياريت ريم كانت جت من زمان كنا نشوفك
امير بيضحك: يا حضره الدبلوماسى فين دبلوماسيتك ف الكلام مش الهجوم كده
فريد بيضحك: مش دا اسلوبك فى الحياه هاجم ومتصبرش
امير بيبص ل ريم: مطلعش ينفع مع كل حاجات ف حاجات محتاجه وقت
رجع بص ل فريد: انا عارف انك زعلان منى يا فريد ومقصر معاكم بس فعلا مشغول الشركه والمسئوليات ال عليا ..دى فلوسنا وانتوا سايبنها امانه عندى مينفعش استهتر بيها واول ما جت فرصه يوم اجازه قلت استغلها واجى اشوفكم
فريد: بيزنس ..بيزنس ..بيزنس ارحم نفسك عمرك هيضيع ف البيزنس
امير : الحياه ايه غير كفاح ومستقبل .. عاصم بيه مهدلنا الطريق وانا همهد الطريق ل اولادنا ولا ايه يا ريم
ريم حست بتلميح امير :ها.. ان شاء الله
اتكلموا شويا واستاذنت “ريم” ودخلت بصت ع الهدايا ونامت ..1
سافر “امير” فجر اليوم التالي ,,غيرت “ريم” مكان التمشية الصباحية وفى يوم نزلت هى و”مريم” و”رنا” وكانت نسيت “لوهان” واتفاقهم وع يقين انها استحالة تقابله صدفة ,,وهى بتتمشي ومعاها الهاند فري فجاءه شاب وقف شاب بكاب وماسك متخفي يربط رباط الشوز وشاور ل “ريم” بصباعه رقم 1 واتحرك ومشي واستغربت “ريم” وجمعت كان اختفي ,,, بعد اسبوع نزلت “ريم” مع “مريم” واتجهوا للمطعم وهى قاعده معاهم وسط اصدقاء مريم وبيتكلم منهم العربى والاجنبى والكورى
وبتبص عادى فى المكان لمحت شافت “لوهان” قاعد ع ترابيزه وقام وعملها بصوابعه رقم 2 وقام خرج,, اضايقت “ريم” من تصرفاته الغير متوقعه وخرجت تتكلم معاه وملحقتهوش كان اختفي ..!
مريم: فى ايه يا روما
ريم: كنت بشبه على حد اعرفه ومش لاقيته
مريم بتضحك : هنا يخلق من الشبهه كتير عادى تعالى
راحت قعدت ريم شويا ومريم كانت واقفه مع شاب وشويا ندت ع ريم
ريم راحت ناحيتهم .. مريم ابتدت تتكلم بالانجليش
مريم: بما ان الغه الوحيده ال هتفهموها انتم الاتنين من غير ما اقعد اترجم الانجليش هتكلم بالانجليش اعرفكم ببعض .. روما اجدد صديقه وجارتى .. اعرفك يا روما دا ادمز حبيببى اللى حكتلك عنه
ريم حركت راسها: هاى
_ هاى .. ريمو حكتلى كتير عنك الفتره الاخيره فحبيت اعرف مين اللى طول الوقت بتتكلم عنها
ريم باابتسامه : وانا كمان فرصه سعيده ..
فى الطريق و”ريم” راجعه مع “مريم” :.._ مريم هو باباكى ومامتك متقبلين فكره ارتباطك كده يعني مفيش حاجه رسمي خطوبه ..؟
_ بابا وماما مأمنين بحاجه واحده وهى الحب .. يعني اى اتنين يكونوا مع بعض لازم يكون الرابط حب بينهم ودا مش هيحصل غير لما يعرفوا بعض ويتاكدوا انهم اختارو صح ,, هما سيبلي حرية اختياري لشريك حياتي زى ماهما كان احرار فى اختيارهم وكل حاجه قدام عينيهم وعارفين كل حاجه وانا اساسا مبخبيش حاجه لانهم علموني كده ,, ادمز مش اول شخص لكن هو الشخص الوحيد اللى حسسني ان هو دا اللى مستنياه ,,, وهما حابينه وهو كمان بيحبهم والخطوه الرسمي قريب هتحصل هو اتكلم مع بابا لكن فى حاجات تتظبط الاول وكل حاجه هتم ,, بس ليه سألتي .. احنا فى كوريا ؟
_ اصل باباكى مصرى واستغربت يعني …
مريم بتضحك: لالالا بابا يعتبر صاحبى علاقتنا ثقه متبادله وانا محافظه عليها ولما بحتاجه اول حد بروحله ..شخصيتى ال انتى شيفاها دى هو ال ساعدنى اكون كده محبوبه من الكل وصاحبه قرارى لانى عارفه انى لو غلطت هيقومنى مش هيعاقبنى ..انا بسمع عن ابهات تانيه بيعاملوا ولادهم معامله سيئه جدااا مش مصريين بالعكس هنا كمان اجانب وكوريين ..انا بشكر ربنا ع هديته ماما وبابا وادمز واكيد انتى يا روما
ريم حست بوجع من كلام مريم ووصفها لعلاقه باباها معاها بتسمع كلام عمرها ما حسته وحساه غريب عنها : فعلا فى ابهات من النوع التانى واولادهم بيعانوا باقى عمرهم
مريم لاحظت ملامح وش ريم اتغيرت : روما ..هو انتى محبتيش قبل كده قولى قولى متخبيش ..؟
ريم بتضحك : لا ابدا
_ اومال مين امير ال انا شفته عندكم ورنا حكتلى عنه وعنك كتير وهى بصراحه قالتلي انه بيحبك و..
ريم باابتسامه : علاقتى ب امير عيله لا تخيلته ولا شوفته يكون غير كده ..وفكره الجواز مستبعده سواء ل امير او غيره حاليا
مريم مستغربه : ف بنت مش تحب انها تتحب وحاجات الحلوه دى
ريم بتضحك: انا .. ويلا بقى علشان هتاخر ع رنا وعاوزه اكلم رامى قبل ما ينام..
“مريم” اقنعت “ريم” تطول اقامتها فى “كوريا” ولحظت “رنا” تحسن حالتها النفسية وكانت “غادة” متابعاها وشجعتها تقعد اكتر ,,,تعبت “ريم” بسبب دور انفلونزا ومنزلتش من البيت لمده اسبوع وفى اخر الاسبوع اصرت “مريم” انها تنزل تتمشي معاها الصبح وتعبت من التمشية وقعدت تنتظر “مريم” ,,مسكت الهاند فري وشغلت الميوزك ,,حست بشخص قعد بجوارها مهتمتش ,,حرك ايده امام عينيها وانتبهت وكان “لوهان” شالت سماعات من ودانها وابتدى الحوار بينهم بالانجليش :
ريم متفاجئه : انت.. .؟
لوهان ب ابتسامه: كده بقت 3 والاتفاق تم .. اصدقاء
ريم متفاجئه: انت بتتكلم ع ايه ..؟
_ ع اتفاقنا اتفاق الصداقه مرت 3 صدف و ..
_ اسفه ..
_ ع ايه ..؟
_ الصداقه بتكون بين طرفين وبموافقتهم وانا مش موافقه ..اسفه
لوهان بااستغراب : ليه .. احنا اتفقنا وانتى وافقتي ع الاتفاق ..
ريم بتتمالك نفسها لكن بتتكلم بنبرة حادة : انا مش عاوزه صداقتك وبشكرك جداا انك حافظت ع سلسلتى ورجعتهالى والحاجه ال اخدتها منك عرفنى ايه هى وارجعهالك لكن مش هتقول اوكيه …
لوهان بيضحك: انتى واضح فهتى غلط ..انا بطلب صداقه انا مش بعاكس ..
ريم قامت وقفت: وانا ماشيه
لوهان قرب يمسك دراعها راحت اتنفضت وزقته: ايه ال بتعمله دا..؟
لوهان اتفاجئ : سوري ..
ريم بعصبيه : انا مبحبش اتجبر ع حاجه اعملها ..صداقه انا مش بعمل صداقه مع حد معرفوش…انت عرضت وانا رفضت يبقى خلاص .وبعد اذنك بلاش احساس انى متراقبه دا بيضايقنى وياريت ياريت منتقابلش تانى لو صدفه اتجنبها ..باى
لوهان اتفاجي من طريقتها الحادة وعصبيتها و”ريم” مشيت..!
رغم “ريم” كانت حره لكن كانت حاسه بضيق بسبب تصرفها الحاد ,,دخلت غرفتها وونامت ع السرير وشغلت ميوزك بصوت عالي وغمضت عينيها تنام …:
رنا دخلتلها الاوضه: ريم
ريم مش سامعاها قربت منها رنا خبطت ع كتفها : رنا
_ مالك فى ايه ..؟
ريم بعصبيه: رنا انا عاوزه ارجع لندن ..
_ ليه مش اتفقنا هتقعدى هو ف حاجه زعلتك ف حد ضايقك عرفينى
_ لا مفيش بس انا زهقت وعاوزه ارجع ممكن ..؟
رنا حست بان ريم مخنوقه : اوكيه .. هقول ل فريد يحجزلك قريب
_ ياريت
خرجت رنا ومش فاهمه وريم مضايقه اتصلت ع غاده كان موابيلها مقفول فقررت متكلمهاش غير لما ترجع لندن افضل من كلام التليفون ….!!
رد فعل “ريم” كان غريب بالنسبه ل “لوهان” ,,تانى يوم حضر جلسه تصوير اعلان وبعدها اتجهه لبيت (جو وون).. وهما قاعدين لاحظ جو وون ان لوهان متغير وسرحان :
_ ليو فينك ؟
لوهان بص ل جو وون: انا كنت اوفر صح..؟
جو وون مستغرب بص ع الكاس ف ايده : اوفر .. دا اول كاس
_ لا اوفر واوفر اوى كمان
جو وون لاحظ لوهان اتعصب: اوكيه اوكيه اهدى اوفر فعلا كده
_ لكن دا مش سبب يخليها تتعصب عليا كده ..؟ كان بهدوء ترفض من غير عصبية وتسيبني وتمشي ومتسمعنيش ..!
جو وون بص ل لوهان: ليوو ..مين دى..؟
لوهان تلقائي : انا قايم ..سلام ..!تم حجز سفر “ريم” بعد اسبوعين وعرفت “مريم” فقررت تعمل جولة سياحية اخيره ل “ريم” قبل رجوعها لندن ,, ففى يوم كانت “ريم” مع “رنا” فى البيت زارتهم “مريم” واقترحت ع “ريم” تطلع معاها رحلة تخييم مع اصدقائها قبل سفرها للندن ,, رفضت “ريم” لكن بعد الحاح من “مريم” و”رنا” وافقت ع انها تكون اخر رحله ليها فى “كوريا ” ,,!
“ريم” بتجهز شنطتها للتخييم موابيلها رن وكان “امير” :
_ اخيرا رديتي انتي عارفه المره الكام اللى كلمتك ومردتيش ..؟
_ الموبيل كان سيلنت ومشغول فى تجهيز شنطتي علشان التخييم بكره
_ وحشتيني ..
سكتت “ريم”: ….
_ ريم .. روحتي فين ..؟
_ موجوده يا “امير” ..
_ انتي عارفه ان انا هاخد اجازة طويله ومرتبها انا ورامي نقضيها احنا التلاته مع بعض لما ترجعي لندن
_ يبقي دى مفاجاءه “رامي” ..؟
_ اوووبس انا كده بوظتها ..
_ لا عادي ولا عرفت حاجه متقلقش ,,
_ انا واثق ان البروجرم اللى انا مجهزه هيعجبك و ..
_ ملوش لازمه يا “امير” متتعبش نفسك ..
_ لو متعبتش علشانك هتعب علشان مين ,, وبعدين دا انا ورامي بنعد الايام اللى هترجعي فيها ..
_ هانت .
_ انتي بجد وحشاني جدا يا “ريم” البيت من غيرك ملوش لا طعم انتي حاجه مهمه فى حياتي وبتوحشيني ع طول ,, وامنية حياتي تكملي معاي حياتي ومتغبيش عني ابدا و..
_ “امير” ..احنا اتفقنا ع ايه ..؟
_ منستعجلش ونسيب كل حاجه لوقتها بس انا دا اللى حاسس به دلواقتي ومشاعري
بصت “ريم” ع الساعه: دلواقتي ميعاد دوا “رنا” لازم اقولها قبل ما تنام ..
_ تمام يا “ريم” هسيبك دلواقتي و لو مرحتيتش فى الكامب ارجعي ..
_ ان شاء الله ..
قفل امير مع ريم وبيضحك ..وكان قاعد مع صديقة “مراد” :
_ لا يا “امير” انت ميتخفش عليك ,,دا انا صدقت انك مهتم بيها بجد امير بيضحك وقام ماسك الكاس وبيشرب: هى سيباها للوقت ولغايه ما يجي الوقت دا هتكون دايبه فى حاجه اسمها “امير” ,,هى فاكره انها لما ترفض انا هستسلم ع طول ,,انا السنين دى كلها وتعبي فيهم وانتظاري ليها مش هيضيعوا كده ,,
_ طيب افرض لو ظهر حد وقربلها وحبته ..
بنبرة ثقه : ومين دا اصلا اللى هيستحمل حالتها دى ,,مفيش حد هيستحمل ظروفها غيري وكل اللى حواليها عارفين كده ,هى نفسها عارفه وبتقاوح ,, هى نفسها بترفض اى حد يقربلها بتبعد ,,ولو حد فكر يقرب وعرف انها مريضه نفسية وبتتعالج هيبعد , ولو طمع بقي فى املاكها انا مش هسمح بكده ,,فى جميع الحالات مش هسمح بحد يقرب ل ريم ,, “ريم” ليا لوحدي انا …!
_انت فعلا يتخاف منك يا “امير” ..
_ ماهو انا اتعب واكبر فى الفلوس واشتغل ويجي حد غريب ياخد ع الجاهز ,,”ريم” وكل حاجه تخصها وتملكها ليا انا وبس…!
_معان فى قدامك فرص اكبر رجال اعمال يتمنو تتقدم لبنت من بناتهم وطبيعيين
_ لو كنت عاوز كنت اتجوزت من زمان لكن ارتبط ببنت رجل اعمال وتيجى تقولى بعد فتره نتطلق وتاخد منى مبلغ كبير ..ليه ابص بره وانا معايا فلوسى ومعايا ال عمرها ما هتسئل عنهم .. .._بس ع كلامك هى رفضتك ورفضت عرض الجواز وعاوزاك صديق..
امير بيصب كاس تانى لنفسه: هى تقوله ال تقوله وانا اعمل ال عاوز اعمله … والشاطر ال يكسب وكلامه بيتنفذ ف الاخر
مراد : NO COMMENTامير بيغمزله: ف صحتك
وكمل امير سهرته مع صاحبه يشربوا ويتكلموا ..!
حاولت تنام “ريم” لكن كانت قلقانه من الكامب ,,خبطت “رنا” ع باب غرفتها ودخلت:
_انتي لسه منمتيش يا “روما”
_بحاول .. لكن مش عارفه انام
_من الفرحه ولا ايه ..؟
اتنهدت “ريم”: قصدك من الخوف ..
_ خوف ليه ..انتي رايحة رحله يعني متعه ومكان مفتوح واكتفيتي كتير ..
_مكان بعيد وضلمة وناس اغراب و..
_ ريم .. لكامب مش زى ماانتي خايفه منه كده ,,مش ضلمة لدرجة اللى متخيلاها وهتكوني وسط ناس مش لوحدك ومنهم عارفاهم وعادي اتعرفي ع اللى مش عارفاه ,,وبعدين انا عرفت “مريم” وهى اكدتلي انك هتكوني فى أمان وهترجعي مبسوطة ,,
سكتت”ريم”:…
_متقلقيش ونامي علشان “مريم” بدري هتلاقيها ع راسك دى مجنونه ,,
ابتسمت”ريم” وخرجت “رنا” وحاولت تنام مسكت الهاند فري وشغلت الميوزك ,,!
اتحركوا مع اول ساعه من شروق الشمس واتجهوا فى باص لمكان الكامب وفى الباص كان موجود “ادمز” واشخاص تعرفهم من مطعم اتكلمت معاهم قبل كده ,,, كان المكان بعيد عن المدينه وسط الجبال ومحاط بغابه وبحيرة صغيره ,, كانت الخيم جاهزة وابتدا كل شخصين يتجهه للخيمه الخاصه بيهم ,,وقفت “ريم” بتاخد نفس وتبعد التوتر مسكت ايديها “مريم” واتجهوا لخيمتهم ,,!
مريم قربت من ريم : روما عاوزاكى تنطلقى متخافيش ولا تقلقي من اى حاجه تمام استمتعي بس
ابتسمت “ريم”: حاضر ..
غيرو ملابسهم وخرجوا بره و”ريم” خارجه خبطت فى شاب لابس كاب ومتخفي نوعا ما ملامحه غير وضحه :
_ سوري ..
بص الشاب ل “ريم”: اوك,,, “ريم”..؟
“ريم” اتفاجئت واترسمت ملامح غضب : انت ..؟
وقف “لوهان” متفاجئ بوجودها:
_انتي بتعملي ايه هنا ..؟
_ انا هنا مع اصحابي ,,انت بتعمل ايه ولا …
لوهان لاحظ تغيير ملامحها : تقصدي ايه بالنظره دى ..؟
_ هتقول صدفه دى كمان صح
_ مش عارف هتصدقيني ولا لا لكن هى فعلا صدفه وصدفه متوقعتهاش اطلاقا ..
_والمطلوب اصدق ..
_ دا شئ يرجعلك تصدقي او متصدقيش ..
لسه هترد “ريم” سمعت “ادمز” بينده ع “لوهان”:
ادمز : ليو ..هات الخشب وتعالى يلا النار هتنطفى ..
ريم متفاجئه : انت صاحب ادمز..؟
_ ايوه وبعد اذنك .
اتحرك “لوهان” ووقفت” ريم” وقربت منها “مريم”:
_ يلا يا “روما” علشان نجهز الاكل معاهم يلا ..
_ هو مين دا ..؟
_ دا “لوهان” صديق “ادمز” اغلب رحلات الكامب بيكون فيها مع “ادمز” لانه عاش اغلب حياته بره والمطعم ورحلات الكامب بيبقي فيها جنسيات تانيه غير الكوري وهو بيحب يتواجد ويكون صداقات ,,شخصية لذيذه لما تعرفيها هتحبيها ..يلا ..
رؤية”ريم” ل “لوهان” ضايقتها وقررت تتجنبهوتتجاهل وجوده منعا ل اى حوار يحصل بينهم ..! .
ابتدوا ياكلوا وقدت “مريم” ل “ريم” اكل مخصوص ليها لان فى من الاكل الموجود حاجات مينفعش تاكله ..انهوا اكلهم وكل شخص اهتم بطبقه وغسله واتجهوا للخيم يناموا ..المكان كان غريب ع “ريم” رغم ان الخيمة كانت الوحيد اللى فيها نور طول الليل ,,مع محاولاتها اخدت المهدئ ومسكت الهاند فري وحاولت تنام ..!
تاني يوم استيقظوا الصبح وكل شخص اهتم برياضته الصباحية ع طريقته الخاصة وابتدا يحضروا الفطار ,, ابتدوا يتكلموا مع بعض وطول اليوم “ريم” و”لوهان” قرروا يتجنبوا بعض منعا ل اى انصدام اخر بينهم ..وقت العشا قعدوا كلهم حوالين نار وابتدوا يتناولوا مارشيملو بعيدان وبالشيكولاته يسخنوه ع النار ويشربوا قهوه ويهزرو ويتكلموا ,,
مريم بصوت عالى : مينفعش نكون هنا وليو هنا ومنسمعش منه اغنيه..!
ادمز: وانا هجيب الجيتار بتاعه ..
وفعلا ابتدا لوهان يغنى اغنيه اجنبيه اغلبهم عارفينها والكل منسجم معاه وشويا ادمز اتكلم:
_ اعتقد النهارده كلنا عرفنا بعض مش محتاجين نتعرف ,,ف ايه رايكم نلعب واللى هيخسر هنحكم عليه ..؟
مريم فرحت : ايوه حلوه الفكره ال هيخسر هيبقى عقابه يغسل اطباق العشا والكوبيات ف الجو البارد دا
الكل: اوكييييه
ادمزمسكت ورق ووزعه عليهم: اكتبوا ف ورقه العبه ال هتلعبوها وهنشوف الاغلب ايه؟
ابتدا الكل يفكر وكتبوا وكانت لعبتين متساوييتين الصراحة ولعبه لا اكذب
ادمز: دلواقتى 5 اختاروا صراحه و5 اختاروا لا اكذب
مريم:اكتب الاتنين ف ورقه وانا هختار اليوم هيطير كده بسرعه
كتب “ادمز” فى ورقتين اسم اللعب واختار “مريم” وكانت “لا اكذب”
مريم مسكت الورقه وابتدت تشرحلهم : لعبه انا لا اكذب علشان ال مش عارفها هى نرفع ايدينا الاتنين واننا هنسئل 8 اسئله ع عددنا كل واحد هيسئل سؤال للكل ونجاوب بصراحه من غير كذب ال عمل الحاجه يفضل رافع صوابعه لكن ال معملهاش ينزل صباع وهكذا واول واحد صوابعه ال 8 هتنزل يبقى هو الخسران …لوهان: بس دى عقابها شرب من غسيل الاطباق
مريم بتضحك: ممنوع الشرب هنا
لوهان : مره واحده بس ها ايه راى الجميع
الكل: اوكيه اوكيه مره واحده
مريم:اوكيه بعد اللعبه فى اطباق العشا متغسلوش يلا نبتدى
ريم استوعبت اللعبه وابتدا بالدور كل واحد بيقول حاجه
1_ انا كدبت علشان اجى … ريم نزلت صباع وتلاته معاها
2_ حصلت ع القبله الاولى .. ريم نزلت صباع
لوهان سئل متعمد :
3_عملت حاجه مضايق عليها قريب … ريم بتردد نزلت صباع واتنين معاها
4_ قابلت حبى الاول .. ريم لوحدها نزلت صباع
5_ اخاف من الضلمه … ريم واتنين معاها
6_باكل فرخه كامله .. ريم ولوهان وتلاته نزلوا صباع
مريم بتضحك: سؤالين وننتهى من العبه ومعروفه مين سؤالين جامدين ليندا ومارك
7_نطيت ف المحيط … ريم و4 نزلوا صباعهم
8_اقمت علاقه حميميه قريب … ريم ولوهان ومريم وادمز واتنين تانين تزلوا صباع
“لوهان” كان بيراقب ردود افعال “ريم”:
مريم بتحضن ريم: مبروووووك عليكى السقعه والبرد يا “روما”
اتكلم شخص : معقول معملتيش اى حاجه من اللى اتقالت انتي عايشه ازاى
سكتت “ريم” وحاولت “مريم” تغيير الموضوع :
_فى اختيار بيحصل هنا لو عاوز تنقذ صاحبك قول حصان الاسود فهل من حصان اسود موجود ..؟
الكل ساكت .. : لا عادي يا “مريم”
لسه هتتكلم “مريم” وهتقول “حصان ايود سبقها “لوهان”: حصان اسود
الكل بص عليه ..: مينفعش بنت تسهر والجو برد انا هغسلهم
ريم استغربت ولسه هتتكلم مريم لحقتها: ياااااااه ومن المعجزات تبرع “ليو” بعمل خيري اوكيه اوكيه
وعلشان حركه الرجوله دى هنلعب لعبه المشروب بتاعه لوهان كجائزه ليه موافقين ..؟
الكل وافق واتحمس ..
بص “ادمز” ع الساعه : الوقت متاخر بكره نبقى نلعبها يلا علشان ننام
قاموا واتجهوا للخيم وكانت “ريم” محروجه من “لوهان” نظرت اتجاهه وكان واقف باصص عليها حركت راسها ودخلت الخيمة ..مكنتش عارفه تنام ولاحظتها “مريم” :
_فى ايه مالك ..؟
_ انا المفروض ارفض انه ينفذ عقابي
_ لا بالعكس سبيه يتعاقب ع مصايبه ,,المره اللى فاتت كان معانا بنوته اتعاقبت انها تغسل الاطباق فى البرد وهو صمم انها تنفذ العقاب وتاني يوم كانت البنت مريضه ,,سبيه يكفر عن غلطاته ..متقلقيش مش هيحصله حاجه نامي نامي ..!
تاني يوم خرجت “ريم” وكان “لوهان” قاعد ماسك كتاب بيقرا فيه ,,مرت من جواره واتجنبته ودا ضايق “لوهان” وردد : مفيش شكرا ..
قضوا اليوم وكانت “ريم” بتتجنب اى حوار مع “لوهان” وبليل اتجمعوا وابتدوا يلعبو لعبه المشروب وكانت عاباره عن مجموعه ورق ينكتب فيها اسماء الموجودين ويختارو ورقه ويتوجه سؤال للشخص دا وبيكون امامه اختيارين يااما يجاوب بصراحه او يرفض ويشرب المشروب ,, ابتدوا يلعبوا واختارو ورقه وكانت اول شخص “ريم” :
ادمز ضحك : اووووبس باين القدر عاوز يعاقبك باى طريقه
ريم اعترضت : بس انا مش بشرب كحول
مارك: دا مش هيسكرك متقلقيش ودى قانون اللعبه
اتكلمت “مريم” :اوكيه نختار حاجه تانيه ليها ..
مارك بخبس لما عرف ان ريم بتخاف من الضلمه وكنوع من الهزار : اوكيه … .. عارفه المكان الضلمه ال هناك دا روحى وعدى ل 50 وتعالى
ريم بصت ع المكان كان فعلا ضلمه خافت وارتعبت وهى باصه لمكان: لالالالا لا
مارك: روما مينفعش كده احنا بنلعب
_ لالالا
اضايقت “مريم”: مارك مينفعش نهزر كده
ليندا: يبقي يا يا تشرب يا تروح هناك..
نظرت “ريم” للمكان الضلمه وللكوبايه ووضح عليها ملامح توتر وخوف ولسه هتتكلم “مريم”:
_ اوكيه .. هشرب ..
قربت منها “مريم”: مفيش داعي وتعالي نقوم وهما يلعبوا براحتهم ..
_لالالا انا عاوزه اكون معاهم مش عاوزه حد يقول حاجه وانا هجاوب ع اى سؤال ..يلا مين هيسئل ..؟
رفع ايده “لوهان”: لو فى شخص عاوزه تعتذريله دلواقتي اعتذريله..؟
لاحظت انه بيلمح عليه وكعند : لا مفيش ..
_ مفيش ..؟
_ يبقي اشربي يلا ..
بملامح توتر بصت ع الكوبايه وبتردد وفجاءه نطق”لوهان”: حصان اسود
وشرب كوبايه مشروب واتفاجئ الكل من تصرفه :
لوهان بيضحك: العبه فكرتى وبصراحه عاوز اشرب
ادمز بيضحك : دى جوله من 8 جولات ..وانت ممكن يطلع اسمك كذا مره ؟
لوهان باابتسامه : مفيش مشاكل .. يلا مين اللى بعدها ..
“ريم” استغربت من رد فعل “لوهان” واستمرو اللعبه وظهر اسم “ريم” 3 مرات وفى ال 3 مرات قال “لوهان” حصان اسود ” وشرب مكانها وظهر اسمه مره ,,ظهر ع “لوهان” عدم اتزان من المشروب وساعدوه يدخل خيمته ,,رجعت “ريم” خيمتها تنام وقررت اول حاجه هتعملها هتشكره ..!
فعلا اول حاجه صحيت وعملتها دورت ع “لوهان” ولكن كان خرج للجبل مع الشباب ,, انتظرت رجوعه وكانت البنات بتجهز العشا ولاحظوا الخشب قرب يخلص ..:
“مريم” وجهت كلامها للبنات: يا بنات “ادمز” كسر خشب كتير جوه عند الاشجار فى الغابه حد يروح يجيب منهم ..
ليندا: هروح انا
_ “ريم” وانتي روحي هاتي الرز من الخيمة
_ اوكيه ..
| “ليندا” وهى ماشيه بجانب “ريم” وبيتكلموا اتكعبلت وسندتها “ريم” وعرضت “ريم” انها تروح تجيب الخشب وترتاح “ليندا”,, وصفتلها الطريق واتجهت لمكان الاشجار وبعدت عن المخيم ..
مريم واقفه ادمز رجع هو والشباب : لسه مخلصتوش الاكل احنا جعانين والجو ليل
_ اخر خشب خلص والنار ضعيفه ومستنيه ليندا ترجع بالخشب
_ ليندا بره قاعده يا “مريم”
خرجت بعصبيه ومتجهه ل “ليندا”:
_ فين الخشب يا ليندا
حكتلها اللى حصل وان “ريم” عرضت عليها تروح مكانها وفعلا اتاخرت ,,اتصلوا ع موابيلها كان فى الخيمة وابتدت “مريم” تقلق لان ابتدا الليل والغابه ضلمه :
_ انا هروح ادور عليها
_ رايحه فين لوحدك كده
_ انت متعرفش يا “ادمز” اصل مينفعش “ريم” تكون لوحدها فى ضلمه و..
سمع “لوهان” كلامها :
_ استني هنا وهنروح ندور احنا واول ما ترجع بلغونا
بخطوات سريعه اتجه “لوهان” والشباب للغابه ومعاهم كشافات والوقت كان ضلمه فعلا ,, ابتدوا يندهو ع “ريم” وسط الاشجار ,,, “لوهان” وهو ماشي سمع صوت تمتمه بخطوات بطيئه قرب اتجاة الصوت ووجه الضوء اتجاه الصوت واتفاجئ ب “ريم” قاعده سانده ع شجرة وضامه نفسها وحاطه راسها بين رجليها ,,قرب بسرعه اتجاهها :ريم.. ريم ..
قرب ليها يمسكها من دراعها جسمها وقع ع الارض فقدت الوعي .. بسرعة شالها واتجه لكامب ودخلها خيمتها وبهدوؤ نايمها ع السرير وقاموا بالاسعافات الاوليه لان كان فى جروح من وقعات وكانوا ملاحظين تمتمتها ,, بسرعه “مريم” مسكت حقنة مهدئ واعطتها ل “ريم” ,, بملامح حزينه مسكت “مريم” ايد “ريم” :
_ اسفه يا “ريم” بجد اسفه ..
وجهه “لوهان” سؤال ل “ادمز”: هى مريم بتتاسف ليه ؟
_ “ريم” عندها مشكله مع الضلمه وبتتعب ,,كويس ان فى دكتور معانا طمنا ان ع الصبح هتكون كويسة
لاحظ “لوهان” ملامح “ريم” المتوتره وتمتمتها المستمره وجسمها بينتفض ,, طلب الدكتور خرجو الجميع من الخيمه لترتاح ,, قعد ع كرسي “لوهان” قرب “خيمه” ريم” من القللق اختفي النوم ..!
