رواية ( ومازال قلبي ينزف ) الفصل الثالث عشر

رواية ( ومازال قلبي ينزف ) الفصل الثالث عشر رواية ( ومازال قلبي ينزف ) الفصل الثالث عشر بقلم :- أسماء أبوشادي
_______________________
سما / أنا أخدت قرار مهم
أنس / وإيه بقى هو القرار المهم دا
سما / إني مش هسيب ماما لوحدها هنا
مديحة / ومين قالك يا حبيبتي أننا هنسيبها لوحدها
سلوى / سما أنا مش هسيب المكان اللي عيشت فيه عمري كله مع أبوكي وأسافر

سما / ومين قال لحضرتك أني بطلب منك تسافري وتسيبي المكان ده
ساهر / سما قصدك إيه
سما / ما حضرتكوا لو توقفوا التحقيق شوية وتسمعوني هكمل كلامي علشان تفهموا
تالين / خلص أحكي سما
سما / أنا قررت أفتح شركة صغيرة هنا أبدأ منها شغل جديد
أنس قام وقف وبصوت عالي / ومين قالك أني هسمحلك تقعدي هنا أصلا لوحدك
سما ببرود / ومين قالك أني هبقي لوحدي أنا معايا ماما
سلوى / بس يا حبيبتي الشركة دي محتاجة فلوس كتير
أنس / يا طنط أنتي بتقولي إيه هي المشكلة فلوس ‘ المشكلة أنا مش هقدر أسيبكوا تقعدوا هنا لوحدكوا
سما / ماتقلقيش يا ماما من جهة الفلوس أنا معايا مبلغ كويس من شغلي في دبي وبابا سايبلي مبلغ في حسابي في البنك وهاخد قرض صغير وأبتدي واحدة واحدة

أنس / سما أنسي اللي في دماغك دا مستحيل يحصل
مديحة / وليه مستحيل يا أنس
أنس / أنتي بتقولي إيه يا ماما دي عايزة تفضل هنا هي وطنط لوحدهم

مديحة / طيب وليه ما نفضلش أحنا كمان معاهم هنا وكفاية سفر بقى وبدل ما سما تاخد قرض من البنك تفتح أنت معاها الشركة وتكونوا مع بعض هنا
أنس / وشغلي هناك يا ماما أعمل فيه إيه ما ترد يا ساهر أنت ساكت ليه
ساهر / أرد أقول إيه يا أنس الفكرة حلوة جدا هي إينعم هتتسبب في خسارة لشركتي لأن أتنين من أكبر مهنديسنها هيسبونا بس الفكرة جامدة وأنا كمان أعرف ناس كتير هنا وهساعدكوا

( أنس سابهم ودخل البلكونة وتالين أستأذنت وقالتلهم إن هي عايزة تتكلم معاه )
تالين / أنس ممكن أتكلم معاك شوية
أنس / مش وقته يا تالين أنا عايز أبقى لوحدي شوية
تالين تجاهلت رده ووقفت جنبه / أنت ليه مش موافق على الشغل هنا في مصر
أنس أتفاجئ من كلامها / نعم إنتي اللي بتقولي كدة
تالين / أيوة يا أنس أنا بقول كدة لأني حاسة أني السبب في رفضك
أنس / تالين أنا ماينفعش أسيب سما هنا لوحدها وكمان مقدرش أتخلى عنك وأسيبك أنتي كمان هناك لوحدك
تالين / ومين قالك إني أنا هفضل هناك لوحدي
أنس / تالين أرجوكي أتكلمي علطول
تالين / أنس أنا كمان هشتغل معاكوا هنا وهدخل شريكة معاكوا كمان

أنس / تالين أنتي بتتكلمي جد هتسيبي دبي وتشتغلي هنا علشاني
تالين / لا يا أنس قبل ما يكون علشانك هو علشان نفسي
أنس / قصدك إيه
تالين / قصدي أني لوحدي طول عمري وأنا لوحدي بس من يوم ماعرفتك أنت وسما وطنطا مديحة وأنا حاسة أني ليا أهل وعيلة زي كل الناس وخصوصا وأنا بقعد وياكوا على السفرة وناكل كلنا مع بعض أنت متخيل أن دي حاجة أنا ممكن أسافر وأسيبها

أنس / طيب وحياتنا اللي هناك وشغلنا وشقتنا
تالين / نسافر نخلص كل حاجة في أسبوع أو أتنين بالكتير ونرجع علطول نبدأ هنا
أنس حضن تالين / أنا بحبك أوي و مش عارف أقولك إيه
سما دخلت عليهم فجأة / أنا متقولش حاجة يا بشمهندس أنس أنا اللي هقول

تالين زقت أنس بعيد / سمااااااا
سما / أيوة يا أختي سما أتخضيتي ولا إيه
وأنا اللي جاية أشوفك يا أنس بحسبك متضايق أتاريك مصدقت دخلت البلكونة
أنس / بس يا بت أجري غوري من هنا
سما / لا يا برنس أنت اللي هتغور وتسافر وتعمل زي البت دي ما قالتلك وترجعوا علطول علشان هتيجوا تلاقوني جهزت الشركة وجهزت كل حاجة
أنس / أنتي كنتي بتتجسسي علينا يا سما وتسمعي أحنا بنقول إيه
سما / طبعا أومال أنت فاكر هسيبك تستفرد بأختي لوحدكوا
أنس / أختك. أختك منين إن شاء الله إذا كنتي أنتي مصرية وهي لبنانية
سما / وانت مالك متدايق ليه ولا منغاظ علشان طلع عندي أخوات غيرك

تالين الدموع نزلت من عنيها وحضنت سما جامد / سما أنا مش عارفة أقولك إيه
سما / لا يا حبيبتي ما تقوليش أي حاجة أنا اللي هقول
( سما بعدتها عنها شوية ومسحت دموعها وبعد كدة بصت لانس وقالتله )
بشمهندس أنس مافيش أحضان وكلام من دا تاني غير بعد كتب الكتاب مفهوم ولا أفركش الجوازة دي
أنس / تفركشي إيه يا أختي دا لا أنتي ولا عشرة زيك أجرى غوري يا بت مالكيش دعوة بينا أنتي
تالين / لأ طبعا ليها مليون دعوة دي أختي
أنس / من أولها كدة بتتفقي معاها عليا

( خلص النقاش بين الكل في الموضوع ده وقرروا أن أنس وتالين هيسافروا مع ساهر علشان يخلصوا كل حاجة هناك في دبي وأنس قرر إنه هيبيع شقته اللي هناك وعربيته وينهي شغله في الشركة ويسلم الاوراق اللي معاه هناك وتالين قررت أنها هتبيع عربيتها والذهب اللي ورثته عن مامتها وكانت محتفظة بيه للوقت ده وهتاخد كل حاجتها من الشقة اللي كانت ساكنة فيها وهتجمع كل الفلوس اللي عندها علشان تدخل بيها الشركة مع أنس وسما
أما ساهر فكان راجع وهو متضايق جدا أن خلاص بعد ما أتصاحب عليهم وأقرب منهم وأتعود عليهم خلاص هيسيبوه ويرجعوا مصر ومش هيشوفهم غير كل فين وفين لما يزوروه أو هو يزورهم )
وبعد أسبوع أستعدوا التلاتة للسفر على دبي على أتفاق أن تالين وأنس راجعين تاني بعد أسبوعين وساهر وعد سما إنه هييجي يزورهم علطول كل شهر
وسافروا وسابوا سما تجهز الشركة وتدور على مكان مناسب ينفع يكون شركة وتجهز كل حاجة علشان يبدءوا شغلهم في مصر

وبعد أسبوعين رجع أنس وتالين بعد ماجمعوا فلوسهم كلها وحولوها في حسابات بأسمائهم في البنك في مصر
وكانت سما جهزت كل شئ والأوراق المطلوبة وأختارت مكان الشركة وكانت عبارة عن فيلا صغيرة جدا مكونة من طابقين بجنينة صغيرة
بس موقعها كويس ليهم جدا وأنس وتالين عجبهم المكان جدا وكملوا الإجراءات كلها
وأنس كان مستغرب جدا إن كل حاجة بتخلص معاهم بسهولة كبيرة بس ما شغلش دماغوا بالموضوع ده
وبعد شهر من بعد موت عادل تم اأفتتاح الشركة وبدءوا شغل وبقى يجيلهم شغل كتير وكأن الناس كانت مستنياهم يفتحوا الشركة دي علشان يروحلهم بالشغل و في يوم ساهر أتصل ب أنس

أنس / حبيب قلبى أزيك
ساهر / أنا الحمد لله كويس أنتوا الشغل عامل معاكوا إيه
أنس / الحمد لله تمام الشغل نازل علينا زي المطر كأنه كان مستنينا
ساهر / ربنا معاكوا أتمنالكوا التوفيق يارب
أنس / بس يا ساهر أنا شاكك في حاجة
ساهر / إيه هي
أنس / أحنا كل حاجة معانا كانت سهلة أوي وكمان الإجراءات خلصت في أقل من شهر وأحنا أهوه بقالنا شهر وكام يوم بدئين والشغل يعتبر جالنا من تاني يوم
ساهر / يا بني دي تسهيلات من ربنا
أنس / ونعم بالله يا ساهر بس صدقني الموضوع في حاجة غلط ودا قالقني أوي

ساهر / طيب وسما رأيها إيه في الموضوع دا
أنس / سما ‘ههههههه سما مين يا ساهر هي سما بقت بتاخد بالها من حاجة خالص غير الشغل يا أبني دي أوقات بتنام في مكتبها
ساهر / طيب يا أنس هو أنت مابتشوفش نور
أنس / نور. وإيه اللي هيخليني أشوفه أنا من يوم ما سما تعبت وأحنا في المقابر ماشفتهوش بس ليه بتسأل عنه
ساهر / لا اأبدا أنا بس بسأل
أنس / ساهر أنت قصدك إيه ريحني
ساهر / يا بني ماتقلقش المهم بس قبل ما أنسى أنا بكلمك ليه
أنس / خير يا ساهر في حاجة
ساهر / العميل اللي سما أشتغلت معاه مرتين قبل كدة فاكره
أنس / طبعا فاكره ماله يعني
ساهر / قابلته بالصدفة وسئل على سما وفرح جدا لما عرف إنها فتحت شركة في مصر وأخد منى عنوانكوا ولما ينزل مصر هيجيلكوا في شغل
أنس / أنت بتتكلم جد العميل دا عايز يشتغل مع شركتنا
ساهر / أيوة طبعا بتكلم جد هي الحاجات دي فيها هزار
أنس / الخبر دا هيبسط سما أوي
ساهر / هي عاملة إيه دلوقتي يا أنس
أنس / والله ما عارف أقولك إيه يا ساهر دي بقت بتشتغل ليل مع نهار لدرجة أنها أوقات بتنسي تاكل أو تشرب و اأمها قلقانة عليها أوي لأنها بقت بتتجنب الكل
ساهر / وانت فين يا أنس أزاي تسمحلها تعمل كدة أزاي تسيبها في الحالة دى
أنس / والله يا أبني أنا حاولت كتير معاها بس هي أسلوبها أتغير أوي وبتتجاهل كلامي وكلام أي حد تاني كأنها عايشة في دنيا لوحدها
ساهر / طيب أقفل يا أنس أقفل
أنس / ماشي سلام بس ماتحاولش تتصل بيها لأن هي بتقفل موبايلها طول ما هي بتشتغل

( دا كان حال سما من يوم وفاة أبوها واللي هو بقالوا شهرين
نشوف بقى حال نور بعد الشهرين دول إيه *”

أبو نور / نور أنت مالك اليومين دول حالك مش عاجبني
نور بلا مبالاة / ماله حالي مش عجبك في إيه
أبو نور / يا أبني أنا شايفك علطول تايه وسرحان وعصبي على أتفه الأسباب من يوم البنت المجنونة دي اللي اسمها سما ماجت هنا وانت مش طبيعي

نور وقد ترك الاوراق التي كان يمسكها / بابا لو سمحت ماينفعش تتكلم عنها بالطريقة دي وياريت لو ماتتكلمش عنها خالص
أبو نور / أنت بتعلي صوتك عليا يا نور طب ما تضربني أحسن
نور وهو يهدأ من نفسه / بابا لو سمحت أنا عملتلك اللي أنت عايزه وسبتها وبعدت عنها فياريت أنت كمان ماتجبش سيرتها وشيلها من دماغك خالص

أبو نور / مش لما أنت تشيلها من دماغك الاول أبقى أنا أشيلها
نور والحزن باين في عنيه / هي مش في دماغي علشان أسيبها دي في قلبي يا بابا

( ثم أكمل وهو يشاور على قلبه والدموع في عنيه وملامحه أتغيرت )
هي هنا يا بابا وعمرها ما هتطلع أبدا و هتفضل طول العمر في أعلى مكانة في قلبي وماحدش هيدخله غيرها

أبو نور أتآثر جدا بحالة أبنه وقال وهو سرحان وعقله بعيد / فعلا اللي بيكون في القلب صعب أوي يتنسي
نور لاحظ حالة أبوه / بابا عمر ما حد هيحس باللي أنا فيه يا بابا أبدا

( دا كان حال نور وسما بعد الشهرين دول )

ساهر بعد مكالمته مع أنس قرر ينزل مصر تاني يوم بعد ما خلص الاوراق اللي ممكن الشغل يقف عليها و سافر ووصل مصر الساعة 8 باليل وراح على فندق حجز فيه قبل ما ينزل غير هدومه وبعد كدة راح على بيت سما )

في بيت سما الكل متجمع على السفرة بيتعشوا بس سما طبعا مش معاهم لأنها في الشركة
رن الجرس وأنس فتح الباب

أنس / ساهر إيه دا جيت أمتي
ساهر / يا أبني طيب سلم عليا و دخلني الأول وبعد كدة اسأل
( دخلوا هما الاتنين وساهر سلم على الكل )
ساهر / علشان كدة مادخلتنيش علطول أتاري الموضوع في أكل
أنس / عيب عليك تقول كدة
سلوى / أقعد يا حبيبي يلا علشان تتعشي
ساهر / طبعا هقعد دا أنا هموت من الجوع وبعدين ألاكل دا وحشني أوي
مديحة / بالهنا والشفا يا حبيبي
ساهر / أومال فين سما هي لسه بردو مابطلتش عادت أنها تنام من غير عشا
أنس / ههههههههههههه هي فعلا ما بتحبش تتعشا أبدا بتخاف على نفسها لا تتخن
تالين / سما في الشركة و زمانها جاية
ساهر / في الشركة دلوقتي دي الساعة قربت على 10
سلوى / والنبي يا ابني أنت طيب أوي دي أوقات بتيجي الساعة 12 وأوقات تانية بتبات هناك في الشركة
ساهر / يعني هي ممكن تبات هناك النهاردة
تالين / لأ هي قالتلي هتيجي الساعة 10
سلوى / ربنا يهديكي يا سما يا بنتي ويحمكيي ويشيل الحزن من قلبك
أنس / آيوة يا طنط أدعيلها
( وبعد نص ساعة سما دخلت البيت وكانت الساعة 10 بالضبط )
سما / سلام عليكم إيه دا ساهر أنت جيت أمتي
ساهر / هو في إيه هو أنا وجودي مضايقوا أوي كدة كل اللي يشوفني يقولي جيت أمتي
سما سلمت عليه / لا والله دا أنا مبسوطة جدا أني شوفتك بس كنت قولتلنا علشان نستنالك في المطار
ساهر / لا أنا قولت أعملها مفاجأة وبعدين كنت هقول لحضرتك أزاي وأنتي موبايلك دايما مقفول
سما / والله غصب عني أنت عارف أحنا لسه في أول الطريق ولازم نجتهد علشان نعمل لنفسنا أسم ولا أنت مش عايز حد يكبر غيرك يا أستاذ ساهر
ساهر / والله ربنا اللي يعلم أنا بتمنالكوا النجاح أد إيه كلكم
( بعد ساعة كلام ورغي كتير )
ساهر / طيب أستأذن أنا بقى علشان أسيبكوا ترتاحوا
سما / تسيب مين وتستأذن مين أنت
ساهر / يا بنتي أنا حجزت في فندق وهقعد فيه
أنس / نعم فندق إيه يا ساهر أنت بتهزر ولا إيه أحنا فينا من كدة
سلوى / ليه كدة بس يا حبيبي طيب ما البيت أهوه
مديحة / أنت مش هتمشي من هنا هتقعد معانا
ساهر / والله يا طنط ما هينفع وبعدين شنطتي هناك في الفندق
سما / مش مشكلة الصبح تروح حضرتك تجيبها
ساهر / يا بنتي أنا خلاص بقى مش مشكلة
أنس / سيبيه يا سما شكل البيت مش من مقامه علشان كدة مش عايز يقعد فيه
سما / لا يا أنس أنا عرفت هو مش عايز يقعد هنا ليه ‘ علشان مش عايز ينام معاك في أوضة واحدة بس بصراحة معاه حق

أنس / لا والله شايف يا ساهر
ساهر / إيه أنتوا هتعملوا عليا حفلة ولا إيه
تالين / ريح دماغك مش هتخلص معاهم
ساهر / أمري إلى الله هقعد معاكوا هنا

( وافق ساهر وقعد معاهم وبعدين دخلوا ناموا كلهم والصبح صحيوا وكانوا قاعدين بيفطروا كلهم وبردو سما مش موجودة وساهر سئل وعرف أنها تقريبا مابتقعدش في البيت خالص وبتيجي بس علشان تنام وتغير هدومها

بعد الفطار أنس وساهر نزلوا علشان يجيبوا شنطة ساهر من الفندق وتالين راحت الشركة لوحدها
وبعد ما جابوا الشنطة راحوا على الشركة علشان ساهر يشوفها
المكان عجب ساهر جدا وكل حاجة فيه كانت جميلة
وطلعوا على مكتب أنس و فضلوا يتكلموا مع بعض وأنس بيحكيله عن الشغل اللي قاموا بيه وساهر فعلا أستغرب إن الشغل دا جلهم في شهر واحد
وبدءو يبحثوا في الموضوع دا سوى وبعدين

ساهر / أحنا كدة عرفنا مين ورا كل التسهيلات دي والشغل دا كله
أنس / أنا مش مصدق نفسي ومش قادر أفهم هو ليه بيعمل كدة
ساهر / اللي بيحب بيعمل أكتر من كدة
أنس / يحب هو مين دا اللي يحب لو كان بيحبها ماكنش بعد عنها وسابها بعد مازهق منها
ساهر / طيب تفسر دا بأيه واللي عمله لما عمي عادل مات
أنس / أحساس بالذنب
ساهر / لا يا أنس أنت ما شوفتش اللي أنا شفته
أنس / وأنت شوفت إيه أنا مشفتوش
ساهر / فاكر يوم الوفاة لما سما تعبت وهو شالها وداها اأوضة في المستشفى
أنس / أيوة فاكر هو دا يوم يتنسي
ساهر / يومها بعد ما طلب مننا نسيبها لوحدها
أنا روحت معاك ولما أنت أخدت المهدأ ونمت أنا سبتك وروحت أشوف طنط وأطمن عليها لقيته دخل أوضة سما وقعد جنبها وفضل يعيط

( ساهر حكي لانس كل اللي سمع نور بيقولوا لسما )
أنس / طيب لو هو بيحبها بجد سابها ليه وأتخلي عنها
ساهر / دا اللي أحنا لازم نعرفه
أنس / ولازم ليه ماخلاص مش هيفيد بحاجة
ساهر / مين قالك أنه مش هيفيد أنت مش شايف سما حالتها عاملة أزاي
أنس / عاملة أزاي يعني ماهي كويسة أهي ونسيته ومابتفكرش في حاجة غير شغلها

ساهر / لا يا أنس سما ما نسيتش نور ولا لحظة ولا عمرها هتنساه هي بتضحك أدامنا وبتبين نفسها قوية بس هي من جواها في حزن كبير دفناه جواها وخوف كبير كل يوم بيكبر أكتر
أنس / خوف وهي سما هتخاف من إيه
ساهر / من كل اللي حوليها خايفة ان حد تاني يسيبها زي ما نور سابها وأبوها كمان هي معندهاش ثقة في حد بدليل أنها بتتجنب حتى أنها تقعد معانا
أنس / طيب وأحنا نقدر نعمل إيه علشان تثق فينا
ساهر / نحاول نقرب منها على أد ما نقدر ونخليها تخرج معانا وتغير جو الشغل
أنس / أزاي وهي دايما في مكتبها ونازلة رسم في تصميمات ورسومات
ساهر / نخرجها أحنا من المكتب وكمان في حاجة تانية أهم لازم نعملها
أنس / إيه هي الحاجة دي
ساهر / نعرف إيه السبب اللي خلي نور يسيب سما
أنس / طيب أزاي
ساهر / سيب الموضوع دا عليا أنا
_____________________