القصة اللي هحكيهالكم حقيقية وحصلت في دبي من سنة تقريبا.. واحد متجوز وحده اوكرانيا.. هو بيحمل الجنسية الاوكرانيا لكنه عربي الاصل.. المهم الشخص ده ممكن نقول عليه ان اسمه الوهمي ” طلال ” وزوجته الاوكرانيا ” نيكول ” انا هحكي القصة بلسان طلال…
طلال بيقول انا كان كنت بحب نيكول حب جنون واتجوزتها حسب الشريعة الاسلامية بورق رسمي وعشنا مع بعض في شقة في دبي..
نيكول كانت بنت جميلة جدا وحبي ليها كان حب جنون…
اول ايام ليا مع نيكول في اوضه واحده بدأت أشوف حاجات غريبة جدا في نيكول! في يوم كنا نايمين مع بعض في الاوضة وده كان في اول اسبوع جواز.. صحيت من النوم على منظر بسببه قلبي كان هيقف! شفت نيكول واقفه على السرير وكانت رافعه هدومها يعني كان نص جسمها التحتاني مكشوف! وكانت بتبص للسقف! كان جسمها متخشب وبتبص للسقف! اول ما شفت المنظر ده قومت منفوض من مكاني وفضلت اكلم في نيكول لكنها مكانتش بتتكلم! كانت في عالم تاني جسمها معايا لكن عقلها مش موجود معايا! فضلت انا اقرا قران .. وهي فضلت ع الحالة دي دقائق وبعدها بكل هدوء رجعت وغطت نفسها بالغطه ونامت! …
تاني يوم الصبح قلت ل نيكول على اللي حصل امبارح وهي مكانتش فاكره اي حاجة من اللي حصلت.. حتى انها استغربت وقالت:
– مستحيل اعمل كده هو انا مجنونة!
قلت لنفسي جايز كانت بتحلم ومش فاكره حاجة من الحلم.. ماهتمتش باللي حصل وكملنا يومنا انا ونيكول.. وجه الليل ونمنا وكنت ناسي اللي حصل .. نمت وصحيت على صوت حد بيئن بصوت هادي ومخيف جدا! فتحت عيني والاوضة كانت مضلمة.. مديت ايدي ع السرير اشوف نيكول جنبي .. اكتشفت ان نيكول مش نايمه جنبي! ولعت الاباجورة اللي جانبي عشان اشوف بنورها الخيف اللي صدمني! نيكول كانت فوق الدولاب واخده وضعية القطط في قعدتها وشعرها منكوش! منظرها كان زي المناظر اللي بنشوفها ف افلام الرعب! انا حرفيا كنت مخضوض من اللي شايفه ومصدوم.. مش عارف اتصرف.. لكن حاولت اسيطر ع خوفي ورحت ناحيتها ومديت ايدي بهدوء وكنت خايف احسن انها تعمل اي رد فعل مش محسوب وتخليني اخاف زيادة! لكن هي معملتش اي رد فعل.. مسكت ايديها ونزلتها براحة من ع الدولاب وراحت هي ع السرير وفردت البطانية ونامت بكل هدوء! اللي بيحصل مش مفهوم ومرعب جدا وعشان كده مبقتش انام معاها في الاوضة.. لما كان يجي الليل كنت بكره اللحظة دي لان عارف اللي هيحصل.. فقررت وقلتلها:
– نيكول مش هنام معاكي هنام هنا في الصالة وانتي اقفلي باب الاوضة عليكي لان مش مستعد ان قلبي يقف من الحركات الغريبة اللي بتعمليها… مرة الاقي انك فوق السرير.. ومرة فوق الدولاب.. معرفش المرة الجاية هلاقيكي فين!..
الموضوع بدا يبقى مرعب جدا بعد كده وبدأت تصرفتها تبقى غريبة جدا! في يوم جالي صديقي للشقة يباركلي على الزواج.. اول ما نيكول شافته وهي متعرفوش ولا عمرها شافته .. بدات تتجنن وتصرخ وتقول:
كانت بتقول الكلام ده لصديقي وكنت ف وضع مخجل جدا ومكسوف من اللي نيكول عملته ف صديقي.. اعتذرت منه ع اللي حصلت وقلتله يمشي… مشي صاحبي وكلمت نيكول وحاولت افهم منها ليه عملت كده.. مردتش عليها وسابتني ودخلت الاوضة! انا مستحيل اسيب الموضوع كده لازم افهم هي بتعمل كده ليه وايه اللي صابها.. بدات ابحث على النت واشوف حالات شبه حالة نيكول.. لقيت بلاوي.. وعرفت ان ده تلبس من جن.. والملبوسين بيتصرفوا بطريقة مش طبيعية بسبب الجن اللي مسيطر عليهم.. وعرفت ان ممكن الجن ف النهاية يوصل المتلبس بالجن انه يقتل اقرب الناس ليه او انه يقتل نفسه! اترعبت من اللي قريته وقررت ان لازم اوديها لشيخ يعالجها.. بس انا عارف نيكول مستحيل تروح معايا.. فقلت اروح لاصحابها وهما يقنعوها.. لما رحت لهم وحكت لهم ان نيكول بتتصرف بطريقة غريبه وانا ممسوسة بجن وعايزكم تقنعوها انها تيجي معايا لشيخ يرقيها ويعالجها قبل ما تعمل ف نفسها حاجة.. اصحابها قالوا اننا مش شايفين ف نيكول اي تصرفات غريية .. انا قلتلهم انا شفت بلاوي.. قالو اصحابها ملناش دعوة طلعنا من الحوار ده لان نيكول مش هتقتنع وهي مش بتؤمن بالحاجات دي!…
انا قررت ابحث اكتر واعرف ممكن اساعد نيكول ازاي.. انا مش هاسبها لاني بعشقها ومستحيل اسيبها…
نيكول كنت نايم معاها ف الاوضة وكررت نفس اللي بتعمله .. صحيت لقيتها قالعه نص هدومها وواقفه المرة دي عند باب الاوضة.. واقفه متخشبه وشكلها كان مرعب جدا وعماله تطلع صوت زي زمجرت الكلاب! في اللحظة دي تجرأت ورحت عليها ومسكتها من راسها وفضلت اقرا عليها قران.. نيكول بدات تصرخ ويتغير لون جسمها كله اتغير ! نيكول بيضه اصلا.. وانا لقيت جسمها كان بيتغير للون الازرق وبعدها يقلب ع اخضر ! وعنيها كانت هي كمان بتتغير وتبقى حمرة زي الدم! وكانت تفضل تصرخ جامد وتتنفض من مكانها.. هنا وقفت القراية فهي هديت خالص.. قلت اروح اجيبلها ماية وامسح وشها.. بس هي كانت فايقه وقالتلي:
– انا هروح الحمام استحمى
ودتها الحمام واستنتها ف الصالة.. نص ساعة عدت ومطلعتش.. ساعة عدت ومطلعت! غابت نيكول جامد ف الحمام! فهنا قررت ان اروح اشوفها.. رحت للحمام وخبطت عليها ومكانتش بترد! نيكول افتحي طمنيني عليكي؟ مكانتش بترد! هنا قلت لا مابدهاش .. فتحت باب الحمام.. اتخشبت من الصدمة! شفت مشهد من اغرب المشاهد اللي ممكن تشوفها… مكنتش متخيل اللي شوفته..
شوفت نيكول كانت……
يتبع…
الجزء التاني
وديت نيكول الحمام واستنتها ف الصالة.. نص ساعة عدت ومطلعتش.. ساعة عدت ومطلعت! غابت نيكول جامد ف الحمام! فهنا قررت ان اروح اشوفها.. رحت للحمام وخبطت عليها ومكانتش بترد! نيكول افتحي طمنيني عليكي؟ مكانتش بترد! هنا قلت لا مابدهاش .. فتحت باب الحمام.. اتخشبت من الصدمة! شفت مشهد من اغرب المشاهد اللي ممكن تشوفها… مكنتش متخيل اللي شوفته..
شوفت نيكول كانت جوه البانيو.. البانيو كان مليان ماية وهي كانت في وضعية غريبة جدا.. كانت مرتفعه فوق الماية وساجدة! كانت في وضعية السجود وراسها وكل جسمها مرتفعه لفوق الماية! اتجمدت مكاني ومبقتش عارف اعمل ايه.. فضلت استعيذ من الشيطان الرجيم ودخلت للحمام بهدوء.. ومديت ايدي بشويش ناحيتها وحطيت ايدي ع جسمها.. اول ما عملت كده ايدي اتشلت!..
.
.
كان في جارة سمعت صوت قران وصوت صريخ.. واصوات حاجات بتتكسر.. الجارة دي راحت ع بوابة العمارة وقالتله ان في اصوات غريبة جاية من شقة الاوكرانيا وجوزها.. لما راحو للشقة الصوت سكت فالبواب قال للجارة دي ان جايز كانوا مختلفين وبيتخانقوا واتصالحو… فالبواب رجع لاوضته اللي تحت.. والجارة رجعت لشقتها.. بس لما رجعت للشقة سمعت صوت حاجة بتتهبد بقوة جايه من الشقة اللي فوقيها ودي شقة الاوكرانيا.. الجارة اتصلت بالشرطة والشرطة جت وخبطت ع شقة الاوكرانيا….
.
.
طلال بيكمل حكايته وبيقول…
اول ما شفت الشرطة اخدت نفسي وفضلت اقولهم جيتو في وقتكم الله يخليكم تعالو ساعدوها.. مراتي عايزه تنتحر وهي فيها جن…
الشرطة اتصلت بالاسعاف وجم يشفوها… طلال بقى فضل يصرخ ويقولهم ساعدوها ارجوكم اعملولها طيب تنفس صناعي.. فضل يصرخ زي المجانين.. الشرطة اضطرت انها تكلبش طلال عشان مايعتديش ع رجال الاسعاف!..
رجال الاسعاف قالو ان نيكول ميته اصلا! ..
الشرطة طلبت الادلة الجنائية واللي جم ورفعو الجثة عشان يتم تشرحها ويعرفو سبب الوفاة.. وطلال اخدوه عشان يتم التحقيق معاه… وف التحقيق حكى كل الحكاية اللي حكتهالكم ان مراته ملبوسة بجن وكل ما يصحى يلاقيها في وضعيه غريبة.. مرة واقفه ع السرير.. ومرة فوق الدولاب.. واخر مرة ف البانيو وساجده فوق الماية.. وكمان قال في التحقيقات ان مراته في مرة من المرات ادعت النبوة وقالتله انها مرسلة من الله !..
طبعا الشرطة ماصدقتش كلام طلال وقالتله ان اللي بتقوله مايدخلش العقل وان ده جنان.. واحنا هنستنى الادلة الجنائية بعد ما يفحصو الجثه ونشوف كلامك صح ولا غلط… وقالهم كمان انه عنده شهود ع كلامه؟ الشرطة قالتله مين الشهود دول؟ فرد وقالهم الشهود هما صديقاتها.. لما جابو الشرطة اصدقاء نيكول.. قالو للشرطة انه فعلا جه وقالهم ان نيكول بتتصرف بغرابة وانها ممسوسة وعايز ياخدها لشيخ.. بس احنا ماشفناش اي حاجة غريبة ف نيكول…
بعد ما تم فحص الجثة تبين ان نيكول ميته بقالها 9 ساعات يعني ميته قبل ما الشرطة تيجي ب9 ساعات! وتبين كمان انها ميته نتيجة للغرق! وكان ف اثار عنف وان حد مسكها وجرها للحمام وحط جسمها بالقوة ف الحمام لحد ما ماتت نتيجه للاختناق داخل البانيو!..
وكمان كان في كدمات ف اماكن متفرقه ف جسمها.. ف رقبتها وسحل لجسمها! وكل ده يبين ان حد قتلها والقاتل هو جوزها مش انتحار زي ما هو ادعى!..
طلال اصر ع كلامه ومعترفش باي حاجة! ف الشرطة دورت ورا نيكول عشان يعرفو مين هي .. ويدوروا وورا خلفيتها عشان يفهمو القضية الغريبة دي… مع البحث وصلو لمعلومة وهي ان نيكول لسه متعرفه من فترة صغيرة ع صديق وف بنهم علاقة.. الشرطة دورت عليه ولقيته وحققو معاه ووصلو لمعلومات تانيهمنه .. صديق نيكول ده قال للشرطة انها لسه متعرفه عليه من فترة صغيرة وقالت انها متعرفه ع واحد اسمه طلال من تلات سنين وديما بيعاملها بقسوة وهو بيحبها حب جنون وبيحبسها ف البيت! ولما عرف انها اتعرفت عله وانها رفضه تعيش معاه معاه.. فبدا انه يطاردها ف كل مكان ويروح لصديقاتها ويشوه صورتها ويقولهم انها ممسوسة بجن! وكمان صديقها قال لنيكول ان علاقتنا تفضل ف السر وماتقولش لاي حد ولا اصدقائها لانه متجوز ودينه مش بيسمح له انه يتجوز ولا يطلق غير بعد مده كبيرة من جوازه… وقال كمان للشرطة ان طلال ده كذاب ومخادع وانه هو اللي قتلها!…
هنا الشرطة واجهت طلال بالكلام ده وهنا انهار طلال واعترف انه هو اللي قتلها ! قال انه بيعشقها.. علاقته معاها من تلات سنين .. وبعد التلات سنين دول تيجي بكل بساطة وتقول مش عيزاني … لما خلاص اتاكدت انها خلاص مش عايزاني .. بدات انشر بين صديقتها انها ملبوسة وبتعمل حركات غريبة .. واستدرجتها وقلتلها انا عايز تجيلي البيت عشان نتفاهم ونفصل العلاقة اللي بينا ودي هتكون اخر مرة تقبليني فيها! جتلي واول ما دخلت الشقة ضربتها ف بطنها وسحبتها للحمام.. وحطت راسها ف البانيو اللي كان مليان ماية! وبعد ما اتاكدت انها ماتت عريت جسمها وحطيتها ع ارضية الحمام عشان يبان انها كانت بتستحمى وهي اللي انتحرت! بعدها لقيت الشرطة جت! انا كنت هبلغ الشرطة بس مش دلوقتي.. واتفاجئة بيهم جم ! فانهرت قدام الشرطة وقلت ان مراتي جوه بتنتحر وهي ملبوسة! انا رتبت كل الحكاية دي ان انشر بين صديقتها انها مجنونة عشان لما تموت ميكونش ف اي اتهام ليا وانها هي اللي موتت نفسها!..
تم تقديمه للمحاكمة وبعدها اتحكم عليه ب 25 سنة سجن وبعد ما يقضي عقوبته يتم ترحيله لبلاده!…
ودي كانت قصتنا اللي كل حرف فيها حصل فعلا مم سنة في دبي….
محمد_مهني
الملبوسة
