قصه القرينة القصة اللي هحكيهالكم حقيقية بعتهالي بنت على الخاص وطلبت مني اني مقولش على اسمها.. فاحنا ممكن نسميها باسم وهمي نسميها ( سارة ) …
سارة بتقول انا دايما بشوف قطه في بيتنا ومش بتظهر القطه دي غير وانا موجودة لكن لما مابكونش في البيت مش بتظهر.. القطة دي شفتها في الضلمة عدت من اوضتي وطلعت الصالة.. رحت للصالة وفتحت النوم وملقتهاش! فضلت ادور في كل حته.. تحت الكنب والكراسي وفي المطبخ والحمام.. القطة ملهاش اثر! قلت لنفسي اكيد متهيالي… ولما طلعت الصبح من الشقة لقيت نفس القطة اللي شفتها ف شقتنا وفضلت ادور عليها وملقتلهاش اثر واقفه عند عتبة الشقة.. امي حاولت تهشها لكن مكانتش بتتحرك خالص! ترميلها اكل كانت بتسيبه ومتاكلش! المهم انا مشيت ولما رجعت امي قالتلي ان بمجرد ما مشيت القطة مشيت! هي فعلا القطة فضلت متبعاني مكان ما انا ماشيه حتى اني ركبت موصلات ولما نزلت لقيتها مستنياني عند عمود نور! فضلت ماشية ورايا مكان ما انا ماشية ورجعت معايا للببت! مش فاهمه هي ليه متبعاني كده! حتى الجيران لاحظو ان القطة دي دايما ماشيه ورايا ومش بتظهر غير معايا وطول ما انا مش موجودة فهي مش معايا!…
فضلت القطة دي معايا فترة كبيرة لحد ما اتجوزت اختفت.. الخلفة اخرت اوي تلات سنين لفينا ع الدكاترة وكلهم قالوا ان مافيش مشكلة معينة في الخلفة هي مجرد وقت.. وفعلا عرفت ان حامل وفرحت جدا بس للاسف الحمل سقط بعد الشهر التاني الدكتورة اللي متابعه معاها قالتلي اني عندي مشكلة في وصول الغذا للجنين.. الجنين مش بيوصله الغذا فعشان كده بيسقط الحمل ومش بيكمل شهرين! …
استعوضت ربنا في الجنين اللي نزل وقلت ده قدري ونصيبي واكيد ربنا شايلي حاجة احسن.. بس انا كنت زعلانه اوي ونفسيتي كانت تعبانه جدا! في الفترة دي حلمت بحلم غريب اوي! حلمت بنفس القطة اللي كنت دايما بشوفها ودايما كانت متبعاني مترح ما انا رايحه بس القطة دي كانت بتكلمني! شفتها في الحلم انها جيالي الاوضة وطلعت فوق سرير وقالتلي انها غيرانه مني واني مش هاشوف حمل طول ماهي موجودة! …
بعد الحلم الغريب ده جت ست خياطة لامي في البيت.. والفترة دي كنت قاعدة عندها لاني كنت تعبانه نفسيا بسبب الخلفة.. الست اول ما شافتني قالت لماما هي دي بنتك؟ كانت بتبصلي وعنيها كانت حمرة اوي ! انا خفت منها اوي من شكل عنيها! المهم ماما قالتلها ايوة بنتي.. الست سكتت شوية وقالتلها:
– متخليش بنتك تبص للمراية كتير وتعجب بنفسها لان اختها اللي تحت الارض غيرانة منها وهي سبب تاخر الحمل! قرينتها بتدخل جوه الرحم وبتقطع الجنين من قبل ما يكتمل!
انا خفت من كلامها اوي لان قبل ما تيجي الخياطة لينا كنت حلمانة بحلم شبه اللي هي قالته لما شفت القطة جتلي في الحلم وقالتلي انها غيرانة مني ومش هاشوف خلفة!.. ماما اول ما سمعت كلامها قررت انها توديني لشيخ! وفي نفس الوقت احنا سافرنا انا وماما وبابا لدولة عريبة شغال بابا فيها.. سافرت معاهم عشان اغير جو عشان نفسيتي تظبط … هناك واحدة صاحبة ماما هي عارفه بموضوع تاخر الخلفة.. صاحبة ماما قالتلها انها تعرف شيخ كان في بنت بنت صحبتها عندها نفس مشكلة بنتك والشيخ ده حلها.. ماما اول ما سمعت الكلام ده قالت لصحبتها يلا الحقيني بالشيخ ده.. فعلا تاني يوم رحت غصب عني مع ماما وصحبتها للشيخ ده.. ولقيت عند بيت الشيخ اغرب حاجة! عارفين القطة اللي كنت دايما بشوفها .. لقيت القطة واقفه عند بيت الشيخ.. وهناك هجمت ع صاحبة ماما وفضلت تخربش فيها .. مشيناها من عند صاحبة ماما بالعافية! واول ما جينا ندخل لقيت القطة بصالي جامد كأنها بتقولي ما ادخلش! القطة راحت نامة تحت شجرة موجودة عند حوش بيت الشيخ.. واحنا دخلنا للشيخ..
كان شيخ عجوز عنده يجي 100 سنة! ونظره كان ضايع مش بيشوف خالص… قعدنا انا وامي وصاحبتي في اوضة والشيخ كان قاعد ع مرتبة او قعدة عربي… الشيخ مستناش حتى يسمع الحكاية او يعرف احنا جايين ليه.. لقيته باصصلي وهو اصلا ما بيشوفش وراح ناطق اسمي وقال:
– سارة وانتي داخله مش كان في شجرة ف الحوش ؟ عايزك تروحي لواحدك وتجيبي منها سبع ورقات غار وتجيلي… انتي لوحدك اللي تروحي امك ماتجيش معاكي ولا صابحتها!
مكنتش عايزة اروح بس امي بصتلي جامد وقالتلي اسمعي الكلام…
مشيت عند الشجرة والقطة كانت هناك! بصتلي جامد ولقيتها بتقولي انتي فاكرة ان العجوز ده هبخلصك مني! مش هسيبك ومش هتشوفي خلفة! خفت اوي .. قطفت السبع ورقات وجريت للشيخ! اديهملو وبعدها هو فضل يتمتم بكلام غريب ويقرا قران ع السبع ورقات.. وقسم بقسم سليمان ان القطة تبعد عني.. وبعده والله سمعت صوت القطة اللي لقيتها جمبي.. نطت القطة من شباك ومشيت من البيت .. ومن ساعتها ماشفتهاش!…
رجعت مصر ورجعت لبيت جوزي لان لقيت نفسيتي مرتاحة.. والحمد الله بعد شهرين من زيارتي للشيخ حملت .. الحمل كمل وجبت بنوته … ودلوقتي انا معايا تلت عيال بنين وولد….
