وفاة شاب بطريقة غريبة جدا والسبب كان مفاجأة؟! في المشرحة جت جثة لشاب في حالة غريبة جدا … طبيب التشريح استلم الجثة وكانت العلامات الاولية للجثة أن الشاب ده حالته الجسدية ضعيفة جدا بيعاني من النحافة لكن بطريقة مش طبيعية.. يعني رفيع اوي عضم على جلد! ده غير وشه المسفوط!.. وكمان كان في علامات خنق في رقبته!
اهل الشاب ده اخدوه المستشفى لما صحيوا لقوه بيصرخ من الالم وكان بيرجع دم! وفي المستشفى علقوله محالين عشان بعدها بيوم يلاقوه ميت ف المستشفى! و الدكتور المستشفى هو اللي طلب تشريح الجثة وكتب تقرير أن حالة الشاب دي غريبة!…
لما دكتور المستشفى طلب أن الجثة تتشرح اتحولت للتشريح.. وهناك دكتور التشريح استلم الجثة.. واستلم معاها تقرير الدكتور عن الجثة دي..
الدكتور بيقول أن دي اغرب جثة اشرحها وهي اللي خلتني اكتشف سبب وفاتها اللي مكنتش تتوقعها ولا كنت اصدق ان حد ممكن يعمل كده!…
بدأ الدكتور شغله بفحص الجثة … كانت الجثة نحيفة جدا .. علامات خنق في رقابتها ووش أزرق وعيون جاحظة كأنها شافت اكتر حاجة مرعبه قبل موتها! بيكمل دكتور التشريح وبيقول اثناء ما كنت بشرح الجثة فتحت بوقها قلت عادي ساما شفت من ده كتير.. وده بيكون بسبب أن الجثة بتدخل في مرحلة تخشب للعضلات وبعدها تفك.. فقلت أكيد العضلات فكت وهي السبب ف ده! بس الغريب بقى أن بدأ يخرج من الجثة سائل أسود!! بينزل كتير جدا.. وبعد السائل ده خرج من بوق الجثة شعر كتير!…
ايه اللي يخلي جثه يخرج منها شعر بالطريقة الغريبة دي! …
خلينا نرجع لورا شوية ونعرف ايه حكاية الشاب ده وعشان تتخيلوا القصة اكتر هنسمي الشاب شريف…
شريف من إحدى قرى الصعيد كان بيدرس في جامعة القاهرة كلية حقوق.. هو كان مقيم في القاهرة وقاعد في السكن الجامعي وكان بينزل لأهله كل فترة…
أثناء دراسته دي أتعرف على صديقته في الكلية.. كانت بنت جميلة جدا ومن المعاملة اللي كانت بتتعامل بيها البنت مع شريف قدر يعرف انها بنت محترمة جدا … اتعرفوا ببعض وخلال شهر واحد اعترف لها بحبه ليها.. عارفين الحب اللي من أول نظره… هو كده بظبط شريف حب البنت الجميلة اللي كانت اسمها ” ساجدة” وهي كمان كانت بتحبه بس طبعا ماعترفتش بده بس بابتسامه منها لما اعترف شريف بحبها عرف انها بتبدله نفس الشعور…
شريف في أول إجازة قال لولدته وأبوه أنه أتعرف ببنت محترمة جدا وحبها وعايز يتقدم لها.. وبعد ما يخصلوا دراسة يتجوزوا.. الأم والاب فرحوا طبعا.. ما ابنهم الوحيد عايز يتجوز… قالت له أمه أشوفها الأول واحكم.. وراها صورتها وقالت له ماشاءالله عليها يارب تكون اخلقها جميلة زي جمالها البراني… الأم طبعا قالت له مافيش خطوبه غير لما أشوفها بنفسي ونعرف أهلها مين لان ده جواز مش لعب عيال…
شافتها فعلا الأم لما اخدها شريف للقاهرة.. واخد معاد مع أمها.. هي وحيدة أمها وابوها متوفي… المهم امه اطمنت.. وبعدها تمت الخطوبة بحضور ابوه وامه…
شريف عنده بنت عمته.. كانت بتحبه بس هو كان شايفها أخته اللي اتربى معاها… بس هي مكانتش قادرة تطلعو من دماغها ومش شايفاه أخوها.. هي شيفاه حبيبها وجوزها غير كده لا… اول ما عرفت أنه خطب راحت له وباركت له.. وفي عقلها كانت بتقول مش هسيبك تتهنى يوم وانت ليا انا بس!…
من بعدها شريف صحته اتدهورت جدا! هو أصلا كان حد رياضي محافظ على جسمه … لكن فجأة اتصاب بمرض مجهول! في الاول بدأ أنه يشتكي بوجع في بطنه.. وكان بيزيد اكتر لما كان بياكل اي لقمه بيحطها في بوقه كان بيرجعها على طول! وبقى يرجع دم! أمه اتخضت عليه وودته دكاترة كتير ومحدش عارف ايه اللي جراله! كل يوم حالته بتسوء.. وامه وأبوه يودوه شيوخ وبرضه مافيش اي حل!… جسمه بدأ يضعف مع الوقت لحد ما اتحول لهيكل عضمي! جسم عبارة عن عضم وشوية لحم!…
يتبع…
شريف صحته اتدهورت جدا! هو أصلا كان حد رياضي محافظ على جسمه … لكن فجأة اتصاب بمرض مجهول! في الاول بدأ أنه يشتكي بوجع في بطنه.. وكان بيزيد اكتر لما كان بياكل اي لقمه بيحطها في بوقه كان بيرجعها على طول! وبقى يرجع دم! أمه اتخضت عليه وودته دكاترة كتير ومحدش عارف ايه اللي جراله! كل يوم حالته بتسوء.. وامه وأبوه يودوه شيوخ وبرضه مافيش اي حل!… جسمه بدأ يضعف مع الوقت لحد ما اتحول لهيكل عضمي! جسم عبارة عن عضم وشوية لحم!…
لحد ما في يوم أهل شريف صحيوا من النوم على صوت صريخه! وكان عمال يرجع دم وماسك باطنه! أهله ودوه للمستشفى لحد ما مات فيها هناك!…
ولما جثت شريف اتحولت للتشريح وبعد تشريحها عرفوا أهله نتيجة التشريح ده.. والدكتور قال لولدته على اللي شافه وهو بيشرح الجثة… لما شاف بقو بينزل سائل أسود وشعر كتير!..
أمه انصدمت من اللي قاله الدكتور وغير كمان إنها سمعت من خطيبته حكاية غريبة وهي إنها إنها شافت حلم غريب… شريف جالها في الحلم وكان بينطق إسم بنت عمته.. وكان برضه عمال يرجع نفس السائل الاسود والشعر! الأم ربطت كلام الدكتور باللي شافته خطيبة ابنها.. فبقى عندها يقين أن بنت عمتو عملت حاجة فيه!..
راحت لها فعلا وقعدت معاها .. اتكلمت معاها بهدوء وقالت لها:
– انتي كنتي بتحبي شريف الله يرحمه صح؟
= أيوة يا عمتو اوي وزعلت اوي على موته
– طب فيه حد يحب حد ويأذية؟ انتي اذيتي ابني الله أعلم عملتي فيه ايه… شريف حالته اتغيرت من بعد ما خطب.. مرض ومبقاش ياكل غير لحد ما حالة بدأت تسوء اكتر واكتر…
في اللحظة دي بنت عمت شريف بدأت تتهته في الكلام وتتوتر اكتر وده خلاه ام شريف تتأكد اكتر إنها عملت فيه حاجة.. مع الضغط خلوها تحكي كل حاجة… حكت اللي صدم الأم!..
بدات تحكي بنت عمت شريف وتقول:
-أنا كنت بحب شريف اوي من صغير .. بس هو كان شايفني أخته.. وكل ما بنكبر حبي ليه بيزيد اكتر… اعترفت له بحبس اكتر من مره وهو كان بيقولي احنا أخوات.. لحد ما دخل الجامعة في القاهرة وعرفت انه خلاص حب بنت زميلة وخطبها كمان… جيت وباركت له بس كنت حاطة في دماغي اني هخليه يجيلي ويقولي بحبك! رحت لدجال بس والله ماكنتش عايزه ااذيه .. انا بس قلت الدجال ده انه يعمل عمل يخلي شريف يكره البنت دي ويجيلي… الدجال طلب مني اجيب حاجة من ريحة شريف.. شعر او هدوم أو حتى صورة ليه… وكان سهل اجيب ده كله بحكم اني بنت عمته.. دخلت اوضته وجبت من فرشة الشعر بتاعته خصل الشعر اللي ف الفرشه وحطتها بس ف منديل وجبت كمان صورة كانت معايا محتفظة بيها وادتها للدجال.. ومن بعدها شريف تعب جدا .. رحت الدجال ده وقلت له انت عملت ايه ف ابن عمتي… ده بيموت! قالي الدجال ده انه عمل سحر فعلا ودفنه في جثة لسه مدفونه.. كل ما كانت الجثة تتحلل.. شريف هيتعب اكتر لحد ما يموت! الدجال عمل شريف قربان لشطان كان عايز يحضره! واستغل حبي الأعمى ليه!.. قلت له لازم يبطل السحر ده بس هو بكل برود قالي ماينفعش! وقلت له هفضحك .. فقالي الدجال خلاص روحي قولي لاهلك انك سحرتي ابن عمتك وهتكوني انتي السبب ومش بعيد عمتك تقتلك فيها! خفت وماقلتش لحد وكنت شيفا شريف بيموت قدامي ومش عارفه اعمل له ايه!..
أول ما أم شريف سمعت الكلام ده فضلت تضرب فيها لحد ما أختها جت وعرفت هي كمان الحكاية والموضوع كبر ! وبقت خصومه دائما بين الاختين طول العمر لان بنتها سبب موت ابنها الوحيد…
الدجال ده أهل شريف راحوا بيته واعتدوا عليه بالضرب وكمان حرقوله بيته وهو جواه!..
حب أعمى يوصل البنت إنها تلجأ للسحر الاسود.. ودجال شيطان استغل عمى البنت وحبها المجنون لابن عمتها.. وحقق غرضه المجنون…
الحكاية دي حصلت من كذا سنة في إحدى قرى الصعيد مش هذكر اسمها وعملت ضجة كبيرة.. انا بس غيرت الأسماء…
#محمد_مهني
#جثة_المشرحة_سحر_أسود
