قصه كان لازم يحصل كامله

كان_لازم_يحصل
الجزء_الأول
ياااه أخيرًا اليوم اللي بحلم به.كان نفسي أمي تكون معايا و تكون فرحانة بيا ، طول عمرها كان نفسها أطلع زي أبويا الله يرحمه دكتور جلدية ما أنا ابنها الوحيد على ٣ بنات . لكن أنا بقيت متخصص في الطب الشرعي. المهم خرجت أشم هوا بس للأسف لوحدي ما أنا من ساعة ما ابن عمي مات و أنا مليش أصحاب اه هو كان أكبر مني بسبع سنين بس كان حد ذكي متفتح كنا قريبين من بعض جدًا (طبيعي يعني مفيش غيرنا شباب في العيلة) الله يرحمه مات و خد كل الحلو معاه. روحت البيت بعد شوية علشان ارتاح و اقوم الصبح اشوف هبدأ ازاي.
بدأت ادور على المكان اللي جالي فيه التدريب، كانت قرية كده بعيدة جدًا و أكيد هحتاج سكن بس مش مهم كله يهون في سبيل الحلم.
قلت أشوف سكن قبل بداية الموضوع، روحت المكان كان قديم أوي مشرحة كده ملحقة بمستشفى الاتنين أول ما تشوفهم تحس أنهم هيقعوا على دماغك. مخدتش وقت كتير بصراحة لأنهم كانوا موفرين سكن جمب المشرحة بفلوس بسيطة كده و كتر خير عم أشرف حارس المشرحة هو اللي دلني عليه، كان مبنى قديم شوية، دورين كل دور فيه شقة ،الدور الأول كان يعتبر مقفول مجرد بيخزنوا فيه حاجات خاصة بالمستشفى، و الدور التاني الشقة كانت ست أوض خمسة منهم قاعد فيهم دكاترة من المستشفى و الأوضة الباقية اللي أنا هخدها. قبل ما أمشي قعدت شوية مع عم أشرف فهمني شوية حاجات عن المنطقة بالرغم إنه مش قديم أوي في المكان إلا أنه كان عارف المنطقة كلها. و قالي كل اللي أحتاجه هيساعدني فيه. بعدها خدت بعضي و روحت البيت كنت مبسوط أوي إني خلاص قربت أوصل لهدفي.

بعد أسبوع روحت المكان و عم أشرف خدني الشقة، دخلت الأوضة و استقريت فيها و شبه اتعرفت على زمايلي في السكن و فهمت شوية حاجات عن نظامهم زي الأكل و التنضيف و كده.
كل واحد هنا له طبع مختلف تمامًا عن التاني مش عارف ازاي دول كانوا أصحاب و شلة واحدة في الكلية يعني مثلاً عمرو ده دكتور تحاليل هو المسئول عن المعمل بتاع المستشفى و أكتر حد بحسه مش مريح فيهم ، شريف و ناصر الإتنين دول شرعي زيي يمكن دول شخصيتهم شبه بعض شوية أنهم جد عمليين مش بيهزروا كتير، يوسف كان غريب جدًا انطوائي مش بيتكلم كتير دايمًا في أوضته مع أن المفروض أنه دكتور أمراض نفسية يعني يكون عكس كده خالص و كل ما أسأل حد ماله يقولي بقى كده من بعد الحادثة و محدش بيقول الحادثة دي ايه و طبعًا كواحد غريب عنهم اتكسفت اسأل،أما بقى آخر أوضة كانت من نصيب مصطفى و ده بقى هزار و ضحك طول الوقت بالرغم أنه مكنش في بشري و كان في صيدلة إلا إنه كان يعرف يوسف من ثانوي و بحكم أنهم نفس الجامعة فكان دايمًا معاهم. على الرغم من أنهم أكبر مني بكام سنة كده إلا أني عرفت اتعايش معاهم و الكل تقبلني و قربت منهم أوي.
كل يوم كنت بروح بدري و الشغل بيكون قليل بس جيه يوم كان في حادثة كبيرة و كان الشغل كتير أوي روحت متأخر هلكان مش شايف قدامي نمت على طول من كتر التعب. ايه ده أنا لحقت أنزل المشرحة و ايه ده كمان جثتين على الصبح واحدة منهم فيها حوالي ٢٠ طعنة و التانية محروقة لا محروقة ايه دي شبه الفحمة طب والله حرام ينزلوني الصبح كده بعد تعب امبارح. أحمد أحمد اصحى يبني ..ده كان صوت مصطفى اللي بيصحيني بعد ما بقينا الضهر ياااه الحمدلله أنه كان حلم و بعدين أنا ازاي مركزتش أنه مش يومي النهارده في المشرحة. المهم قلت أقوم أفطر و أنزل أعمل أي حاجة مش هقعد لوحدي في الشقة ايه الملل ده حتى مصطفى صحاني و نزل. خلصت و نزلت دخلت المستشفى قلت أقعد مع عمرو شوية بعد ما كلمته و عرفت أن عنده حاجات بسيطة بس بيخلصها في المعمل.
قعدت ارغي مع عمرو حوالي ساعة مثلاً و بعد كده ضغط الشغل زاد عليه فسبته و روحت. على العصر كده كنت قاعد أنا و يوسف في الشقة طبعًا كان في أوضته كالعادة و أنا كنت بتفرج على التليفزيون في الصالة فجأة سمعت صوت عالي ف الشارع و ناس بتصوت و بتقول حريقة. نزلت أشوف في ايه لقيت حد بيقول فى حريقة في المستشفى اللي على أول الشارع
يتبع…