ممكن تصدق انك تتعامل مع جن في يوم.. الاجابه لا ويمكن معظم الناس من كتر ما بتسمع عنهم بيقولوا ده خيال محدش شافهم غير ناس نادره تتعد علي الصوابع… حكمه ربنا للي اتعامل معاهم وضع علي عينينا غشاء عشان منشوفهمش عشان مش هنستحمل بشاعه مناظرهم ولكن هم يرونا من حيث لا نراهم
……
حاسس ان فيه حاجه مش مظبوطه الي بيحصل ده مش طبيعي اكيد انا مش مجنون… قطع تفكيري صوت رنه تليفوني كان رقم غريب فتحت الو… الو استاذ سعيد.. ايوه مين… انا احلام الممرضه المسئوله عن حاله مرات حضرتك لو ينفع تيجي المستشفى ضروري في حاجه مهمه لازم تعرفها… بصيت في الساعه كانت 12 منتصف الليل… قولتلها الوقت متأخر…. قلتلي المره دي بصوت مهزوز وخايف ارجوك تعالي بسرعه واخر حاجه سمعتها صرخه الممرضه.. نزلت بسرعه من البيت ركبت عربيتي ووصلت المستشفى الي في الشارع الي ورانا… الدنيا هاديه تماما وصلت لاوضه الممرضات وفتحت باب الاوضه وهنا كانت المفاجأه
……
زوجتي من الجن
الجزء الاول
انا مش هبدأ بدايه تقليدية احكي بيها احداث قصتي يمكن الكل او المعظم هيكدبني وهيقولي ده تأليف لكن صدقوني كل حاجه هحكيها حصلت… انا اسمي سعيد نصر من احدي محافظات مصر عايش مع ابويا وامي مليش اخوات وحيد طول عمري.. ابويا الحج نصر كان امام الجامع الحكاية بتبدأ من زمان كان سني وقتها 16 سنه فاكر اليوم ده كويس فاكر اني دخلت الحمام عشان اخد دش وبعد ما خلصت رجلي اتزحلقت ووقعت علي ارض الحمام ساعتها ابويا سمع صوت ارتطام وخرجني من الحمام ومن يومها وانا بشوف حلم غريب بشوف نفسي قاعد علي الارض ومتربع وواقف فوق راسي ظل لواحده وحاطه ايديها علي دماغي كنت بصحي من الحلم ده مخنوق لحد لما قررت اقول لابويا علي الحلم.. ابويا حاول يطمني وقلي بكره هقرالك شويه قرآن وارقيك… تاني يوم حصلت حاجه غريبه وصعبه عليا في نفس الوقت ابويا مات امي راحت تصحيه الصبح لقيته ميت ربنا يرحمه ويرحم موتانا جميعا… ومرت السنين وجبت مجموع حلو جدا في ثانوية عامة ودخلت كليه هندسه وحققت حلم ابويا بعد دراسه سنتين في الكليه شوفتها ايوه شوفتها اجمل بنت شوفتها في حياتي حاولت اتقرب منها كتير وعرفت ان اسمها حنان وبعد محاولات اني اكلمها قررت ادخل البيت من بابه واتقدمت ليها رسمي بعد ما خلصت الكليه نسيت اقولكم اني اشتغلت في شركه كبيرة من شركات المقاولات گانت حنان كانت بالنسبالي حلم ونفسي احققه وفعلا الحلم بقي حقيقه واتجوزنا انا وحنان مكنتش مصدق… كل الي اقدر اقوله ان الحياة كانت سعيده بجد وكملت السعادة لما خلفنا فيروز بنتي هديه ربنا ليا خمس سنين عايشين مع بعض حياه سعيده مفهاش مشاكل لكن كل ده اتغير ايوه.. ازاي…. هتعرفوا……. في يوم قررت اني اخد اجازه من الشغل واخد حنان وفيروز ونتفسح ونسافر اي مكان وفعلا عملت كده لما حنان عرفت كانت طايره من الفرحة وقلتلي انها عاوزه تروح شرم الشيخ…. وحجزت فعلا اسبوع في فندق في شرم.. نمت في اليوم ده عشان المفروض هنتحرك بكره علي شرم لكني حلمت اه حلمت بس الحلم المره دي كان مختلف تماما… حلمت اني قاعد في كوشه وقاعده جمبي نفس الظل الي ملهوش ملامح كل المعازيم لابسين اسود كنت حاسس اني في فرح في زمن تاني ودنيا تاني غير الدنيا لكن فجأه كل المعازيم دي بدأت تصرخ تصرخ بهيستريه حطيت ايديا علي وداني من بشاعه الصوت مش قادر استحمل… صحيت علي صوت حنان بتقولي قوم بقا عشان نجهز الشنط… كنت لاول مره احس بخنقه معرفش مالي.. قومت من النوم وحاولت محطش في بالي قومت دخلت الحمام اخدت دش كنت حاسس بارهاق كأني خارج من خناقه جهزنا الشنط واخيرا اتحركنا على شرم الشيخ عاوز افصل بقا واحاول استمتع وسافرنا.. قضيت اجمل اسبوع في حياتي كنت حاسس ان مفيش حاجه علي وجه الارض ممكن تزعلني وفي اخر يوم في الاجازه حنان قلتلي سعيد انا حامل مكنتش مصدق نفسي من الفرحة ربنا هيكرمنا بمولود جديد جهزنا الشنط واستعدينا عشان نرجع ركبنا العربيه وكانت الساعه 3 العصر واتحركنا طول الطريق بنتكلم عن الطفل الجديد وياتري ولد ولا بنت لكن حنان نامت مني الي اخدت بالي منه في الوقت ده ان الوقت جري بسرعه وبقينا بليل خلاص وانا سايق علي طريق صحراوي غير مبشر بالمره وانا سايق لاحظت ان فيه ناس كتير واقفه في نص الطريق نزلت وانا بقول هو فيه ايه حادث ده لكن الغريب في الموضوع ان الطريق كان فاضي ركبت العربيه تاني وانا مش فاهم حاجه لقيت حنان صحيت وبتقولي في اي في اللحظه دي ايدخبطت علي الازاز كانت ايد غرقانه دم… صرخت حنان وانا دوست بنزين وفقدت السيطرة علي العربيه وللاسف اتقلبت بينا… اخر حاجه سمعتها كانت صرخه مراتي حنان وبعدها محستش بالدنيا فتحت عينيا علي سرير في مستشفى… واقف قدامي دكتور سألته انا فين قلي انت في المستشفى.. هو اي الي حصل… انت حصلك حادثه وبقالك شهر في غيبوبه.. ومراتي وبنتي… اطمن هما بخير وهتشوفهم… بعد عشر دقايق دخلت الاوضه حنان وقلتلي حمدالله على السلامة حبيبي… انتي كويسه.. قلتلي اه كويسه وفيروز كمان كويسه اطمن سألتها عن الحمل قلتلي ملناش نصيب الحمل سقط…. قعدت في المستشفى اسبوع وبعدها خرجنا رغم الحادث والي حصل لكن حاولت ارجع امارس حياتي زي الاول… بدأت انزل الشغل زي الاول وحاولت اتناسي الحادث لكن في يوم رجعت من الشغل لقيت نور الشقه كله مطفي غريبه فضلت انادي علي حنان واقولها انتي فين لكن مفيش اجابه… دخلت الاوضه بتاعتي واتصدمت لان في حد مشنوق مشنوق في سقف الاوضه.. رجعت خطويتين لورا وانا ببلع ريقي بالعافيه وقبل ما اشغل النور ايد اتحطت علي كتفي اتلفت وكانت الصدمه….. يتبع الجزء التاني
زوجتي من الجن
الجزء الثاني
اتلفت ورايا كانت حنان وبتقولي مالك واتأخرت كده ليه… بصيت قدامي بسرعه مفيش حاجه في سقف الاوضه انا كنت بتخيل معقول.. قولت جايز من ضغط الشغل خصوصا اني مأخدتش الراحه الكافيه بعد ما فوقت من الغيبوبه…. قطع تفكيري صوت حنان بتقولي سعيد مالك انت مسهم كده ليه… ها لا ابدا انا بس كان ورايا شغل كتير وتعبان محتاج انام… ردت عليا سعيد انت لازم ترتاح شويه انت لسه خارج من غيبوبه… قولتلها حاضر هاخد اجازه وهرتاح دخلت عشان انام وحاسس اني مشوش مش عارف افكر انا عمري ما اتخيلت حاجه زي دي اترميت علي السرير ونمت نمت بعمق صحيت بصيت في الساعه كانت 2 بعد منتصف الليل.. ازاي انا حسيت اني نمت سنه بصيت جمبي لقيت حنان نايمه ومفيش حاجه غريبه.. لا فيه حاجه غريبه الي نايمه جمبي ملامحها متغيره مش دي حنان مراتي.. فتحت عينيها كانت مشقوقه بالطول زي التعابين وقبضت علي رقبتي.. فضلت اعافر عشان اخلص نفسي منها… وصحيت ها ها انا كنت بحلم اعوذ بالله من الشيطان الرجيم.. اعوذ بالله من الشيطان الرجيم.. كابوس بصيت جمبي كانت حنان مش موجوده.. قومت وانا بنادي عليها حنان حنان انتي فين… في الوقت ده الفجر اذن.. قولت هروح اتوضي عشان اصلي الفجر لكن الحمام مقفول ومنور اكيد حنان في الحمام.. استنيت شويه دقيقه اتنين عشر دقايق ربع ساعة.. لا كده كتير خبطت علي الباب ونديت عليها حنان حنان ردي عليا.. حاولت افتح باب الحمام كان مش عايز يتفتح حاولت مره واتنين لحد ما اتفتح… شوفت حنان قاعده علي الارض وسانده ضهرها علي الحيطه وايديها علي وشها.. حنان مالك انتي قاعده كده ليه ومش بتردي عليا ليه.. رفعت وشها ناحيتي وش اقل ما يقال عليه وش قرد العينين حمرا زي الدم بيخرج منها صوت اشبه بصراخ مكتوم.. رجعت لورا وانا بقول انا بحلم انا لسه بحلم.. صرخت وقامت وقفت ولقيتها جايه تجري ناحيتي.. غمضت عينيا وانا بتشاهد فتحت مكنش فيه حد.. اخدت نفسي ورجعت الاوضه لقيت حنان نايمه صحيتها وانا بقولها انتي قومتي من جمبي ورحتي فين… قلتلي انها مقمتش من السرير.. ازاي انا خلاص هتجنن انا ابتديت اشك اني عندي هلاوس وان الغيبوبه مأثره عليا.. رحت صليت الفجر ورجعت انام.. تانى يوم كان يوم جمعه يعني هقضي اليوم كله في البيت لقيت فيروز بتصحيني وبتقولي اصحي يا بابا عشان نفطر.. قومت وقعدنا احنا التلاته نفطر كنا ساكتين مفيش حد بيتكلم لحد ما خلصنا فطار ودخلت فيروز اوضتها وحنان اخدت الاطباق ودخلت المطبخ.. فتحت التليفزيون علي قناة الحرم المكي وكان عليها سوره البقره… حسيت ان الجو بقي حر حر جدا بطريقه مستفزه وسمعت صوت اطباق بتتكسر.. جريت علي المطبخ حنان كانت واقعه علي الارض وبتتشنج.. شلتها دخلتها الاوضه وطلبت دكتور زميلي جيه وكشف عليها وقال لازم تتنقل المستشفى عندها هبوط حاد في الدوره الدموية… طلبت الاسعاف وجات واخدتها علي المستشفى وديت فيروز عند امي ورحت المستشفى واتقلي ان حالتها استقرت… الدكتور قلي فيه ممرضه مسئوله عن حالتها تقدر تروح دلوقتي عشان ميعاد الزيارة خلص وتاجي بكره ان شاءلله ولو فيه حاجه هنتصل بيك… رجعت البيت بفكر في الي بيحصل حاسس ان فيه حاجه مش مظبوطه الي بيحصل ده مش طبيعي اكيد انا مش مجنون… قطع تفكيري صوت رنه تليفوني كان رقم غريب فتحت الو… الو استاذ سعيد.. ايوه مين… انا احلام الممرضه المسئوله عن حاله مرات حضرتك لو ينفع تيجي المستشفى ضروري في حاجه مهمه لازم تعرفها… بصيت في الساعه كانت 12 منتصف الليل… قولتلها الوقت متأخر…. قلتلي المره دي بصوت مهزوز وخايف ارجوك تعالي بسرعه واخر حاجه سمعتها صرخه الممرضه.. نزلت بسرعه من البيت ركبت عربيتي ووصلت المستشفى الي في الشارع الي ورانا… الدنيا هاديه تماما وصلت لاوضه الممرضات وفتحت باب الاوضه وهنا كانت المفاجأه… الممرضه كانت مشنوقه في سقف الاوضه لا والاصعب من كده ان بوقها مفتوح ولسانها مقطوع… رجعت لورا من المنظر اكيد هيتهموني بقتلها.. خرجت من المستشفى جري محدش كان موجود وكأننا في صحرا مش في مستشفى حتي الامن نايم…. رجعت البيت مش عارف اعمل ايه ولا اتصرف ازاي… تاني يوم الصبح لقيت جيلي استدعي من النيابه رحت وانا عارف ليه… اتقلي ان اخر رقم مكلماه الممرضه انا وان الوقت متأخر وكان ردي انها كانت بتطمني علي مراتي.. لكن الوقت ده مش اي حد يتصل فيه غير لو كانت فيه مصيبه… قولتله السؤال ده مش ليا هي الي اتصلت ومعرفش ليه في الوقت ده.. مكنش فيه دليل ضدي وبعد ما خدوا بصماتي افرجوا عني ورجعت البيت… الدكتور كلمني وقال تقدر تاجي وتاخد مراتك… روحت فاقت حنان وبقيت كويسه اخدتها ورجعت البيت.. طلبت منها ترتاح ومتعملش اي مجهود.. في الوقت ده الباب خبط روحت افتح الي كان علي الباب حماتي يااه لينا كتير مشوفنهاش لانها منفصله عن والد حنان وكانت مسافره بره مصر.. دخلتها ورحبت بيها ودخلت لبنتها واطمنت عليها لكن الي لاحظته برود حنان الي مش مفهوم مع امها دي حتي معزمتش عليها تبات محبتش ادخل ما بينهم… الست مشيت كنت حاسس بارهاق وتعب دخلت السرير ونمت لكن واضح اني مش هرتاح ابدا حلمت اني واقف وسط مقابر كتير.. مقابر انا عارفها كويس… مقابر العيله فضلت ماشي وبتلفت حواليا لحد ما وصلت لقبر واقف قدامه نفس الي شوفته في الحمام القرد من تاني… اول ما شافني دخل القبر المفتوح.. دخلت وراه وانا مسلوب الاراده تماما ونزلت جوه القبر ورغم الضلمة الرهيبه كنت شايف.. شايف جثه متكفنه علي الارض والقرد ده مقرب وشه منها… وكأنه بيقولها حاجه… لكن الجثه بدأت تتحرك وتقطع الكفن من عليها لحد لما كشفت وشها والي شوفته كان صادم لاني شوفت…. يتبع الجزء الثالث والاخير
زوجتي من الجن
الجزء الثالث والاخير
الجثه دي جثه مراتي ايوه جثه مراتي حنان وكان شكلها مخيف مرعب.. عينيها كانت بيضه تماما عروق ناشعه من رقبتها لونها احمر وطالع منها صوت زمجره غريب مش مفهوم وبعدين الصوت بقا مفهوم وقالت بصوت اشبه بالفحيح خرجني من هنا… خرجني من هنا… اعوذ بالله من الشيطان الرجيم… صرخت ومش هيا بس صرخات انطلقت من القبر كله من كل ركن… خرجت اجري من القبر… لكن لقيتها واقفه في وشي وشها شاحب جدا وراسها غرقانه دم وقلتلي باسلوب من الاستعطاف انقذني يا سعيد انقذني…. صحيت من النوم علي ايد بتهز في كتفي فتحت عينيا كانت فيروز بنتي… اصحي يابابا اصحي يابابا…. مالك يا فيروز في اي… ماما خرجت وسبتني لوحدي.. راحت فين.. قلتلي معرفش….. قومت من النوم طلبت من فيروز انها تروح تنام… عملت فنجان قهوه وقعدت في البلكونه مستني حنان عاوز اعرف راحت فين…. بعد ساعه لقيت باب الشقه بيتفتح ودخلت حنان… قومت من مكاني وانا بقولها كنتي فين.. مردتش عليا وكأني مش موجود ودخلت اوضتها… اتعصبت ودخلت وراها وانا بزعق وبقولها انا مش بكلمك لكن الصدمه ان الاوضه فاضيه مفهاش حد… ازاي دي لسه داخله قدامي حالا ايوه انا متأكد مش مجنون… قطع تفكيري صوت الباب بيفتح تاني ودخلت منه حنان تاني… المره دي كنت خايف اقرب قربت منها بحذر وانا بسألها كنتي فين.. ردت عليا مبروك يا حبيبي انا حامل… علي قد ما كنت مستني الخبر ده بفارغ الصبر لكن انا قلقان مش عارف ليه…. حاولت اتناسي اي حاجه وافكر في المولود الي جاي واننا لازم ناخد بالنا المره دي… عدي شهر والدنيا ماشيه وهاديه… لحد ما في يوم لقيت تليفوني بيرن كانت حماتي رديت عليها قلتلي سعيد انا عاوزه اقابلك ضروري.. هو في حاجه ولا اي… لما تاجي هفهمك.. لبست ونزلت ورحت لحماتي استقبلتني وبدأت كلامها وقالت يمكن تستغرب كلامي بس انا مستغربه من تصرفات حنان في الفتره الاخيره.. حنان كانت بتكلمني قبل الحادثه وعلاقتنا كانت كويسه جدا لكن دلوقتي انا حاسه ان دي مش بنتي البنت اتبدلت تماما… قولتلها انا كمان ملاحظ حاجات غريبه بتحصل وحكيت كل حاجة.. حسيت على ملامح حماتي الخوف والقلق وقولتلها ان شاءلله هنعرف قريب فيه اي.. مشيت من عندها لكن كلامها لسه في دماغي… لحد ما حصلت حاجه اكدت شكوك حماتي… كان يوم عيد جوازنا نزلت من البيت ورحت محل دهب وجبتلها سلسله جميله جدا ورجعت البيت.. قلتلي كنت فين.. قولتلها هو النهارده مش بيفكرك بحاجه.. سكتت شويه وقلتلي مش فاكره وده غريب عشان حنان عمرها ما نسيت مناسبه… اخدتها من ايديها ووقفتها قدام المرايا عشان البسها السلسله ببص في المرايا بشكل تلقائي السلسله وقعت مني رجعت لورا من الرعب عشان احنا كنا واقفين قدام المرايا لكن الانعكاس انا بس الي واقف… اتلفتت وقلتلي مالك… خرجت بره البيت مش فاهم حاجه ولا مصدق.. ركبت عربيتي ورحت علي بيت حماتي عشان اقولها شكك طلع في محله وصلت البيت ولسه هخبط لقيت الباب موارب مش مطمن.. زقيت الباب ودخلت لا حول ولاقوة الابالله.. لا حول ولاقوة الابالله.. حماتي مشنوقه في السقف ولسانها مقطوع… لسه هعمل اي رد فعل سمعت صوت من ورايا بيقولي ده تمن الي يحاول يبعدني عنك.. اتلفت كانت حنان وعلى وشها ابتسامه ابليس وقلتلي انا مش هبعد عنك ابدا انت ملكي انا اتمردت علي عشيرتي علشانك عملت كل حاجه عشانك انت هتعيش معايا بارادتك او غصب عنك.. حنان ابعدي عني انا مش عاوز اذيكي.. ضحكت وقالت انا مش حنان مش حنان في الوقت ده بدأ جلدها يسيح وظهر وش مسخ دميم مقرف وقلتلي انا اسمي نائله…. واختفت خرجت اجري من بيت حماتي رجعت البيت ملهاش اثر اخدت فيروز ورحت عند امي حكتلها كل حاجه وانا ببكي زي الاطفال.. قلتلي روح يبني للشيخ غريب جارنا واحكيله… الشيخ غريب جارنا راجل بيعالج من المس والسحر بكتاب ربنا روحتله وحكتله
الراجل كان بيسمع الكلام وهو مبرق وبعد ما خلصت قلي انا عاوزك توديني المستشفى عشان بس عاوز اتأكد من حاجه… حاجه اي… هقولك بعدين… خرجنا انا والشيخ غريب ورحنا المستشفى لقيت الشيخ بيسأل عن زمايل الممرضه احلام وسألهم حد يعرف احلام ماتت ازاي… محدش رد قلي يلا بينا لقينا صوت بينادي علينا وبيقول ممكن اقعد معاكم علي انفراد… قعدنا وقالت انا اماني اقرب صاحبه للمرحومه الموضوع بدأ بحادث حصل للاستاذ ومراته وبنته الاستاذ وبنته عاشوا لكن مراته ماتت وكانت المشرفه عن الحاله احلام.. الحاله وصلت عندها كسر في الجمجمه ونزيف وللاسف ماتت بعد فتره احلام جتلي وكانت مرعوبه وقلتلي ان الست الي ماتت في الحادثه عايشه وانها في الاوضه وعندها هبوط في الدورة الدموية وللاسف انا الي شورت عليها تبلغ حضرتك مكنتش اعرف ان التمن حياه صاحبتي…. الشيخ قام ومشي من غير اي رد شكرتها ومشينا… الشيخ اتكلم وقال الصوره وضحت يبني انت عليك مس من جنيه عاشقه وكانت بتحاول تتواصل معاك لحد ما جتلها الفرصه بموت مراتك اتشكلت في شكلها او عاشت جوه جسدها عشان تقدر تعيش معاك قتلت كل الي كان بيحاول يوصلك الحقيقه ودلوقتي هتحاول تجبرك تعيش معاها بس اطمن انا هرقيك واحصنك وان شاءلله خير…. وصلنا بيت الشيخ غريب ودخلنا الاوضه المخصصه بتاعته حط الشيخ ايده على دماغي وقال بسم الله ارقيك من كل شئ يؤذيك.. اعوذ بالله من كل شيطان مريد اعوذ بالله من الشيطان الرجيم.. سمعتها بتصرخ في وداني وقف الي انت بتعمله يا سعيد اياااك تفتكر اني هخرج ايااك… الشيخ علي صوته وهو بيقول ليس لكي سيطره علي عباد الرحمن.. بسم الله العزيز الجبار ترسل عليكي شزايا من النار….. صرخات في وداني لدرجه اني وداني نزفت دم وسمعت صوتها وهي بتقول هرجع وهنتقم منك…. الشيخ قلي خرجت يبني الحمدلله صلي يبني صلي واعرف ربنا عشان يباركلك في حياتك… من يومها وانا بصلي وملتزم وعشت مع بنتي فيروز وامي في بيت واحد… لكن الحكاية منتهتش بعد مرور سنه بدأت اهمل في الصلاه ورجعت تاني زي الاول والشغل بقي واخد كل وقتي وفي يوم رجعت البيت دخلت مباشره علي الاوضه اترميت علي السرير من التعب ونمت لكن لما فوقت لقيت نفسي علي سرير في مستشفى اي ده انا الي جابني هنا جيت اقوم اي ده انا مش قادر اقوم زي ما اكون اتشليت… دخل عليا دكتور وبيقولي استاذ سعيد انت بتعمل ايه… قولتله عاوز اقوم قلي تقوم ازاي بس… قولتله انا اي جابني هنا.. قلي تانى يا استاذ سعيد.. قولتله تاني اي… رد عليا بكلام اغرب من الخيال انت في المستشفى هنا بقالك خمس سنين بعد ما عملت حادثه انت ومراتك وبنتك.. انت عشت لكن عاجز عن الحركه ومراتك وبنتك ماتوا… بنت مين الي ماتت؟… بنتك…. اصيبت باكتئاب مزمن وجالك مرض نفسي بيخليك تنسي الي حصل لما مش بتاخد العلاج…. فضلت ابكي واقوله بنتي ماتت فيروز ماتت كنت ببكي زي الاطفال قولتله الجنيه هي الي قتلت بنتي… الدكتور تاني هتقول جن وكلام فاضي تاني ولقيته بيخرج حقنه وبيدهاني نمت معرفش قد اي… لكن لما فوقت لقيت الدنيا ضلمه وفيه حد قاعد قدامي ركزت كانت هي الجنيه وشايله طفل وهما الاتنين محروقين… وقالت مش قولتلك هنتقم منك يا سعيد مش قولتلك مش هسيبك انت بقيت عاجز يا سعيد ومجنون… لا لا انا هقوم اصلي… ضحكت بهيستريا تقوم انت عاجز يا حبيبي مش هتعرف تقوم… فضلت ازعق واقولها امشي… اتفتح الباب والدكاتره والممرضين داخلين عليا عشان يدوني حقنه تاني فضلت اصرخ كانت هنا دلوقتي والله كانت هنا انا مش مجنون انا مش مجنون…. تمت
