قصه حارة ايوب (كامله)

ـ معقولة اللي حصل كان كارثي بالشكل ده؟!.. لدرجة انه يغير معالم البيت لكهف اشباح.

حط ايده ورا ضهره، شبك ايده في بعضهم واتنفس بعمق، حسيت انه بيسترجع اصعب ذكرى مؤلمة مرت عليه، عدت ثواني بعدها لف وشه ناحيتي، اتكلم بثبات وهو بيركز عينه عليا، عيونه اللي كانت بتلمع لمعان غريب، ماكنتش فاهم اللمعة الغريبة دي دموع مثلا، ولا توهج نار حرقت اجسام ودوبتها، قال بعد ثواني صمت:

ـ فاكر اللي حكتهولك من سنة ونص، وقتها طلبت منك تبعد عن مراتك عشان ماكنتش عاوزها تسمع، وطلبت من مراتي واهلها ما يحكوش حاجة، وده برضه كان رأي امك، بس اللي سمعته افظع من كلمة كارثة بمراحل، دي مجزرة واللي نفذها “اشباح”، والاشباح يا ابن ولدي ماحدش يقدريمسكهم، وللسبب ده الشرطة قفلت القضية بدون متهم.

لف جسمه وشاور على كنبه مركونة قصاد بيتنا عشان نروح نقعد عليها، اعترضت لاني كنت عاوز ادخل بيت “ولاد ابو حجر”، بس هو رفض رفض قاطع، بعد ما قعدنا قال:

ـ مستحيل ندخل البيت ده، المنظر جوه ماحدش يتحمله، ميل نص ميلة وخد حاجة من على الارض، فتح كف ايده وقربه مني، كان حصوات ملح ابيض، قال وهو بيلفت انتباهي للي في كف ايده:

ـ مسألتش نفسك ليه الملح مالي الحارة!؟

هزيت راسي بعدم فهم فكمل كلامه:

ـ بسبب اللي بنشوفه في البيت وبنسمعه من وقت اللي حصل، من وقتها وامك بترش الملح في الحارة، عشان تمنعهم عننا، وللسبب ده مراتي خافت لما المطر نزل ودوب الملح.

استغربت من كلامه فسألته:

ـ هم مين؟

رد وهو بيحدف حصوات الملح ناحية بيت “ولاد ابو حجر”:

ـ ولاد “ابو حجر”.. وبالتحديد اشباحهم.

جسمي اتنفض من جملته، مش خوف.. قد ما هو عدم استيعاب لخطورة الكلام اللي بيقوله، وده اللي قراه اخويا على ملامحي، ركن ضهره لورا وبدأ يحكي:

ـ امك بعد اللي حصل، قعدت معايا وحكتلي حاجات كنت اول مرة اسمعها، لما قالت:

ـ “البيت ده زمان تقريبا من 10 سنين، يمكن اكتر من كده بسنتين ولا حاجة، كانوا ساكنينه ناس طيبين وجيران عشرتهم طيبة، بس الظروف حكمت عليهم انهم يعرضوه للبيع، عشان سفرهم المفاجئ بسبب شغل ولادهم، والبيت عشان حلو ومساحته كويسة، جاله بدل المشتري عشرة، بس اللي هيدفع فيه اكتر يشيل، لحد ما ظهر واحد اسمه “عاشور حجر”، دفع فيه مبلغ كبير جدا، يمكن اكتر من السعر المطلوب في البيعة، وطبعا البيعة تمت لصالحه بدون تفكير، الراجل ده ماكنش لوحده زي ما انت عارف، كان معاه مراته وولاده التلاته “فضل اكبرهم، وضاحي، وزكريا”.

لما جم الحارة كانوا في بداية شبابهم، اعقلهم كان فضل، واللي كان يبان عليه لعنة ابليس الواد ضاحي، اما زكريا ده لاكان بيهش ولا بينش، ماشي طول الوقت جنب اخوه “فضل” زي ضله، خاصة انه كان اصغر واحد فيهم، الغريب بقى انهم لما سكنوا الحارة، كان حالهم مبهدل، ولبسهم وهيئتهم مايبينوش اللي عملوه بعد كده.

ولما لاحظت عليا امك اني مش فاهم قصدها، كملت كلامها المباشر في صلب الموضوع:

ـ هدوا البيت من اساسه، وبنوه من جديد بيت كبير اربع ادوار، زي ما انت شايفه.. ودي حاجة غريبة بالنسبة لواحد زي “عاشور”، بس لا انا ولا انا ابوك اهتمينا، كل واحد ادرى بخبياه ربنا، يوم يجر شهر.. ولقينا الراجل ده وعياله بان عليهم العز والعيشة المرتاحة، فتحوا تجارة كبيرة لبيع الخضار والفاكهة، وبين يوم وليلة بقيوا معلمين.. والحتة كلها ماكنش عندها سيرة غير “ولاد ابو حجر”.

وده اللي حكيتهولي امك عن اساسهم، وبداية ظهورهم في الحارة بالشكل الغريب والمريب ده.

قاطعت كلام اخويا:

ـ وايه السبب اللي خلا امي توصفهم بغرابة ظهورهم.

رد وهو بيبص ناحية البيت:

ـ ما هو ده السبب الرئيسي للي حصل جوه البيت، هتفهم لما كملك.. زي ما انت فاكر عشرتنا بيهم كجيران كانت كويسة، هم الشهادة لله مش بتوع مشاكل وده كان معروف عنهم، وانت بنفسك “فضل” برغم السن اللي بينكم كنت بتحبه، حياتهم ما بين تجارتهم وبيوتهم بعد جوازهم من بنات المنطقة، لحد اليوم المشئوم الله لا يعيد ذكراه، كنا قاعدين كعادتنا انا وامك في الاوضة اللي ع الشارع، مقفلين الشبابيك بسبب المطر اللي كان مغرق الدنيا يومها، الوقت كان متأخر والدنيا كانت ساكته وهادية بسبب شدة المطر، وبدون مقدمات قطع كلامي مع امك صوت عربية داخلة الحارة، لا عربية ايه.. ده صوت فرملة اكتر من عربية، قومت من مكاني مفزوع وروحت ناحية الباب، كانت ورايا مراتي ماسكة في دراعي، سحبته منها وفتحت الباب بهدوء، عشان اسمع صوت حد بيصرخ فيا بقوة “ادخل جوه بيتك والا هرقدك مكانك”.

لو عليا ولوحدي في اللحظة دي كنت خرجت شوفت في ايه، بس اللي جه ببالي وقتها امك وولادي ومراتي، فقفلت الباب بسرعة ودخلت، جريت ناحية السلم وكانت ورايا مراتي وابني الكبير “يوسف”، دخلت شقتك.. وقتها سمعت صوت عكاز امك جاي ناحيتي، شاورت لهم ماحدش ينطق و طفيت نور الشقة بالكامل، بعدها فتحت باب البلكونة ووقفنا بزاوية نشوف منها اللي بيحصل، زي ما توقعت.. كان في بدل العربية اتنين، من اكبر وافخم العربيات اللي في السوق، واقفين قصادهم خمس رجالة، من نوعية الرجالة اللي لو ادوا حيط خبطة بكتفهم هيساووها بالارض، طول بعرض.. لابسين اسود في اسود، كانوا خافيين ملامحهم بشال مايتناسبش ابدا مع لبسهم المودرن، ماكنش ظاهر منه غير عيونهم، والله يا “سليم” لو اقولك انهم شبه المافيا اللي بنسمع عنهم، يمكن تقول اخويا بيزود ويأفور في الوصف، بس ده اللي شوفته بالظبط.. واللي بيأكد وصفي، طريقة وقفتهم والسلاح الالي اللي عمري ما شوفته غير بافلام حرب العصابات، كل ده انساه.. الاغرب اللي جاي، الرجالة دي كانوا ماكنوش بينطقوا.

هزيت راسي بعدم الفهم فكمل “شريف” كلامه:

ـ اقصد المعنى الحرفي للكلمة، الرجالة كانوا بيتفاهموا مع بعض بلغة الاشارات، اللغة الخاصة “بالصم والبكم”، اكيد انت عارفها بحكم دراستك الجامعية، وانا كمان عارفها كويس وعرفت اترجمها بسهولة، بمجرد ما البرق ضرب في السما ووراه الرعد، شاور واحد فيهم للسما وبص للي كان جنبه بالاشارت، وكان معناه “اكسر الباب ونزلهم”.. هز الراجل راسه وعيونه بتبرق بحماس مرعب، شاور لواحد من اللي معاهم، اللي فهم حوارهم كان داير على ايه، جريوا بأعصاب من حديد ورجلين بتغوص في المايه اللي مغرقة الحارة، ناحية بيت “ولاد ابو حجر”.. الباب المصفح ماخدش من كتفهم غلوة، من تلات خبطات اتفتح على اخره.

قاطعت اخويا في كلامه:

ـ كل ده وماحدش جه الحارة ولا انتبه للي بيحصل؟

ـ الرجالة دول كانوا عارفين بيعملوا ايه كويس، والجو العام من مطر وتوابعه، خلا من المستحيل حد يخرج بره بيته، والاهم.. انهم لو حد فكر يقرب من الحارة، كانوا هيجيبوا اجله مش هيسموا عليه، بعد ما اتفتح الباب، سمعنا صوت الموجودين جوه البيت بيصرخوا، من حريم لعيال صغيرة، انوار البيت كلها طفت.. ماعدا نور بسيط كان موجود في صالة شقة الدور التاني.

وشاور بأيده على شقة “فضل”، الشقة اللي قصاد شقتي.

ـ شقة “فضل”، صوت الصرخات كان جاي من ناحيتها، لمحتهم بيجمعوا كل الستات وحتى العيال الصغيرة في الصاله، قعدوهم ع الارض، بعد لحظات.. الصرخات العالية اتقلبت لصرخات مكتومة خارجة من حناجر الرعب والخوف اتحكم فيهم، شوية ولقينا اول راجل خارج من باب البيت، ووراه “عاشور حجر وولاده التلاتة” بهدوم نومهم، وراهم الراجل التاني بسوقهم قصاده زي الخرفان اللي بتتساق لدب*حها، شاور الراجل اللي كان واقف قصاد العربية بلغة الاشارة انهم يقعدوهم ع الارض، وفعلا.. بخبطات من الالي اللي كانوا ماسكينه في ايدهم، نزل عاشور وولاده بركبهم على الارض قصاد الرجالة اللي كانوا قصاد العربيات، بص الراجل اللي حسيت انه كبيرهم للي كان واقف على روسهم، شاورله بحاجة مافهمتش قصده بيها، بس فهمت معناها اللي هو “نفذت اللي قولتلك عليه”، رد عليه باشارة واحدة “تمام”.

وقتها ما تحملتش اللي بيجرى، لفيت وشي ناحية باب البلكونة ونويت انزل، سمي اللي كنت ناوي اعمله اللي تسميه.. جنان، نخوة راجل شايف قصاده جيرانه بالحال ده، بس لقيت اللي جاي ورايا وبصوت بيهمس قالت:

ـ اوعى تتحرك من مكانك.

عرفتها وسط الضلمة، كانت امك.. وقفت مكاني وقبل ما ارد كملت كلامها:

ـ انت لو نزلت تحت وخرجت من البيت، هترجعله جثة، انت شايف الناس اللي تحت شكلهم عامل ازاي، دول ما بيفهموش ولا بيتفاهموا، بعد غربة اخوك ماليش غيرك يا ابني بعد ربنا.

كلام امي في اللحظة دي فوقني، مر قصادي حالها لو جرالي حاجة، وحال مراتي وولادي لما يتيمتوا، الناس دي فعلا ما بيهزروش، والرصاصة من بندقيتهم ارخص من روحي بكتير، وقتها سمعت صوت ابني بيقول بهمس” الحق يا بابا”.. جريت بسرعة ودخلت البلكونة، مراتي كانت حاطة ايد على صدرها، والايد التانية على بوقها، امي وقفت جنبي بثبات غريب وهي بتتشاهد، واما ابن اخوك شغل موبايلها عن بعد وكان بيصور، اخر حاجة شوفناها.. “ضاحي” وهو بيصرخ في اخوه “فضل” وبيقوله:

ـ شاور ” لاسماعيل” يا “فضل”، انت الوحيد اللي بتفهم وتعرف اشاراتهم، قوله حقك عليا يا “سمعه”، خلوهم يسامحونا.

وفعلا.. كلم “فضل” الراجل اللي اسمه “اسماعيل” بلغة الاشارة،عشان يسامحوهم، بس الراجل وزع نظراته عليهم بعدها رفع كف ايده، وحرك ايده على رقبته بأشارة الدبح، الرعب اتملك من ولاد ابو حجر وجسمهم اترعش، رجع فضل يشاور على ابوه، بعد كلم الراجل بالاشارة، وكان معنى كلامه “سيبوا ابويا هو مالوش ذنب”، بس الراجل اتملك منه الشيطان، شاوره بالبندقية اللي في ايده عليهم واحد واحد، بعدها لف وشه ناحية اللي كان واقف جنبه، وشاورله عشان ينفذ حاجة معينة، هز الراجل راسه.. خرج من جيبه مسدس وبطلقه منه كسر الكاميرا اللي كنا حطينها في مدخل الحارة، لف وشه الناحية التانية وكسر لمبات العواميد، وفي لحظة.. الحارة بقت ضلمة كحل، لحد ما نوروا كشافات العربيات اللي كانت متثبتة على “عاشور حجر وولاده”، عدت ثواني بعدها لمحتهم بيتحركوا ناحية ولاد “ابو حجر”، وبحركة سريعة خرجوا حاجة من جيبهم كانت بتلمع في الضلمة، الحكاية ماكنتش محتاجة تخمين، كان في ايدهم سك*اكين.. كل سكين منهم حطوها على رقبة واحد من البيت، بداية من “عاشور” الراجل العجوز، اللي كان مستسلم للي بيحصل من وقت ما بدأ، زي ما يكون عارف ان دي النهاية الحتمية ليه ولولاده، لحد اصغر واحد فيهم “زكريا”، واللي كان الخوف افقده كل الحواس وسلمها للامر الواقع، وفي اقل من الثانية.. نح*روا الرجالة رقاب “ولاد ابو حجر”.

سكت اخويا بعد ما خلص اخر جملة قالها، وبرغم انه حكالي اللي حصل، او بمعنى ادق حكالي مجمل اللي كان في الليلة دي، بس التفاصيل في حد ذاتها مرعبة، التفاصيل بتخلي الواحد كأنه كان موجود، شايفهم، حاسس بوجعهم ولحظة موتهم، شايف نظراتهم اللي جحظت وقت خروج روحهم، سامع صوت د، مهم وهو بيخرج عشان يختلط بماية المطر تحتهم، وزي ما يكون في اللحظة دي حصل توارد افكار بيني وبين اخويا، وده لما قال:

ـ اللي اتخيلته هو بالظبط كان احساسنا في اللحظة دي، لدرجة ان مراتي خرج منها صرخة مكتومة، فلفيت وشي بسرعة ناحيتها وحطيت ايدي على بوقها، والا هيكون مصيرنا مايقلش بشاعة عن اللي حصل وشوفناه من دقايق، وياريت اكتفوا باربع جثث لاربع رجالة غرقانين في د*مهم ع الارض، دول بعد ما خلصوا شاور الراجل لواحد منهم يطلع فوق، بعد ما طلع بصله من البلكونة، خرج الراجل اللي كان واقف في الحارة من جيبه “ولاعه” وشغلها، وبس.. بعد دقيقة بالظبط كان خارج الراجل يجري من البيت، وفي الدقيقة التانية، الشقة انفجرت.. الازاز بتاع الشبابيك من قوة الانفجار اتفتت في الحارة، الشقة باللي جواها اتحرق، عفش وستات واطفال اتفحموا.. حتى صراخ مالحقوش يصرخوا.

بعد ما خلصوا المهمة اللي كانوا جايين عشانها، شاور الراجل للباقيين يركبوا العربيات، وفعلا.. في ثواني لفوا بالعربيات لفه كاملة ناحية مخرج الحارة، وزي ما ظهروا فجأة اختفوا برضه فجأة، شبه الشياطين اللي ساكنين تحت الارض، كنت واقف مكاني من الصدمة مش عارف اتحرك، ذهول وخوف خلوا عقلي وقف عن التفكير، فضلت واقف وعيني بتبص لحظة على مكان الجثث اللي ريحة د*مهم ماليه الحارة، واللحظة التانية برفع عيني ناحية الشقة اللي النار قايدة فيها، ماكنتش سامع صوت مراتي وهي بتعيط وتصرخ جنبي، لحد ما امي فوقتني وقالت:

ـ اتصل بالشرطة بسرعة يا “شريف”.

خدت نفسي عشان استرد وعيي، دخلت من البلكونة وروحت ناحية التليفون الارضي، اتصلت بنمرة النجدة وبلغتهم ان في جر*يمة ق*تل حصلت في الحارة، خدوا مني العنوان، وفي خلال فترة بسيطة كانت الحارة مليانة بافراد الشرطة والامن، وطبعا اتفاجئوا باللي شافوه، كانوا جايين على بلاغ عادي بيحصل كل يوم، لجر*يمة ق*تل برضه بتحصل كل يوم، لكن مجزرة لافراد عيلة بالكامل ده اللي ماكنوش يتوقعوه نهائي، كان الوقت بعد نص الليل بشوية، المطر كان بدأ يهدى، ومع دوشة عربيات الشرطة، في ناس من اهل المنطقة بدأوا يتجمعوا في مدخل الحارة، وفي ناس كتبت عن الجر، يمة زي ما قريت انت ومراتك، بس الشرطة طلبت بحذف اللي اتكتب لحد ما يعرفوا مين ورا الجريمة اللي حصلت، بعد ما طفوا النار اللي كانت في الشقة بصعوبة، جت الاسعاف وبدأت تنقل الج، ثث اللي اتحرقت للمشرحة، وبعد معاينات فضلت لوقت متأخر، عرفوا ان سبب الحريق انفجار انبوبة غاز كانت جوه البيت، شوية وخدت الاسعاف جث، ث ولاد “ابو حجر”، بعدها طلب الظابط عربية تيجي الحارة عشان تشفط المايه والد*م اللي كانوا جواها، من بعدها وقف الظابط معايا وسألني الاسئلة المعتادة، كنت فين؟.. شوفت ايه؟.. وشوفت مين اللي عمل كده؟.. كل الاجابات كانت محدده باللي شوفته وحكيته بالتفصيل، بس لحد شوفت مين، لساني وقف.. لاني فعلا ماشوفتش حاجة، وده اللي قولته:

ـ يا فندم كانوا مغطيين وشهم بالكامل، ماشوفتش ملامحهم وواضح انهم مش اهل منطقتنا خالص.

وعرفته انهم كانوا من “الصم والبكم”، بسبب الاشارات اللي كانوا بيتكلموا بيها، بس كلامي مش خيط قوي يقدر بيه يوصل للي ارتكب الجريمة، بالعكس ده كان خيط عنكبوت هش ضعيف، مايصلحش كدليل في محضر جريمة ق*تل، فسألني الظابط:

ـ مالهمش قرايب او معارف، يعني نقدر نسألهم لو كان لهم اي اعداء او خصومات مع حد، ماهم كانوا تجار في السوق، وتجار معناه ان كان لهم منافسين، والحاجات دي بتعمل ضغائن بين التجار، فاهم طبعا اللي اقصده.

هزيت راسي بعد الموافقة على كلامه، وكان المبرر ورا رفضي لما قولتله بأستنكار:

ـ ضغائن!!.. ضغائن ايه اللي بتتكلم عنها يا فندم؟!.. مهما كانت المنافسة في التجارة او المال، ماتوصلش ابدا اي حد انه يرتكب جريمة بالبشاعة دي، ولو هفترض ان كلام حضرتك صح، فهيكون الانتقام في الرجالة نفسهم، مش يعملوا تصفية للبيت كله بالستات وكمان الاطفال اللي مالهمش ذنب، اللي عمل كده واللي شوفته، ده حقد وكره وغل، ابليس بذات نفسه كان حاضر الجريمة، لا لا مستحيل يكون اللي حصل وراه منافسة سوق، والاهم يا حضرة الظابط، ان ولاد “ابو حجر”، كانوا معروفين بسمعتهم الطيبة وانهم في حالهم، حتى ماكنش في حد يعرفلهم قرايب ولا معارف، ده ماكنش في حد بيزورهم لحد ما اتجوزوا من بنات منطقتنا، من وقتها نسايبهم بدأوا يترددوا على البيت عشان يزورا بناتهم، ومن بعدهم احفادهم.

هز الظابط راسه كان بيحاول يقنع نفسه باللي قولته، بس كانت محاولات فاشلة لانه ماقتنعش بحرف منه، عذرته طبعا.. كلامي بالنسباله كلام انشا عابر بيخلص في وقته، اما مهنته اللي اساسها الشك في كل حاجة بتدور حوالين الجريمة، خلاه هراني تحقيق لاكتر من يومين، س و ج.. تقريبا كلها بتدور على نفس الاسئلة، وانا طبعا ماعنديش غير نفس الاجابات اللي هي في الاساس لا عجباه ولا مقتنع بيها، ونفس الكلام بينطبق على نسايبهم، انهم جوزوهم بناتهم بناءا على سيرتهم الكويسة وعيشتهم المرتاحة، لكن اصلهم وفصلهم ايه، ماحدش يعرف.

لحد ما في يوم سمعنا صوت عربية الشرطة داخلة الحارة، خرجت بره البيت عشان افهم اللي بيحصل، شاورلي الظابط اروح ناحيته، فعلا روحتله.. دخلنا بيت “ولاد ابو حجر”، وهو بيتكلم معايا عن الحريق اللي حصل، قولتله انه كان في شقة الدور التاني، لكن باقي البيت سليم الي حد ما، بعد ما فتش البيت كله، دخل شقة “فضل”، وبالتحديد اوضته.. شاف زي “سحارة” او صندوق من بتاع زمان، واللي اساسه بيكون عند اهل الصعيد، قرب منها وتقريبا ماتحرقش منها جزء كبير، بسبب انها كانت مصنوعة من خشب عتيق، فتح الظابط السحارة كان فيها حاجات برضه قديمة، وكان في بينهم “صندوق” صغير، مد الظابط ايده وخده، فضل يقلب في شمال ويمين وبعدها فتحه، كان جواه اوراق كتير.. والاهم من الاوراق بطاقات شخصية، لف وشه وحط الصندوق على السحارة بعد ما خد منها الورق والبطاقات، اللي اتعرف منها انها الاصلية “لفضل وضاحي وزكريا وحتى ابوهم”.. بمكان ولادتهم واساسهم، وكانت المفاجأة اللي خلت الظابط وقف للحظات بيقلب في الورق، عشان يتأكد ان اللي بيقراه صح.

قاطعت كلام اخويا وسألته:

ـ اساميهم كانت مختلفة؟

ـ لا لا خالص، اساميهم واحدة.. بس هم غيروا في البطاقات الجديده محل اقامتهم بالمنطقة هنا.

ـ طيب ما كل الناس اللي بتنقل بتعمل كده.

رد عليا وهو بينفي كلامي:

ـ لا دول كمان زوروا محل ميلادهم، عشان بدل ما يبقوا من اهل الصعيد، يتحولوا لاهل المدينة هنا.

عقدت حواجبي بتعجب، بحاول استوعب اللي بيقوله:

ـ هم من الصعيد؟!

ـ ده اللي كان بيقوله الورق الاصلي بتاعهم، وده مالوش الا معنى واحد، انهم جم البلد هربانين من حاجة، ومش اي حاجة ومش من اي حد، دول هربانين من شياطين الانس بعينهم.

قاطعت اخويا بلهفة واحد بيفك لغز، بعد ما الخيوط اتجمعت في ايده:

ـ تقصد عليهم تار؟

رد عليا وهو بياخد نفس عميق:

ـ التار بيتاخد من صاحب التار، اقصد من القا*تل نفسه، لكن مش من عيلة بأكملها، ركز يا “سليم” قبل ما تسأل.

هزيت راسي فكمل كلامه:

ـ برق الظابط وكأنه عتر وسط الورق على حل القضية، وبصراحة كان عنده حق.. كان في ورقة بين الاوراق، مكتوب عليها نمرة تليفون وتحت منها كلمة “الخال”.

كنت لسه هتكلم وسأله، قاطعني بأجابة سريعة مع حركة بكف ايده:

ـ ايوه بالظبط زي ما فهمت، النمرة كانت تخص خال ولاد “عاشور ابو حجر”، بدون تفكير كتير، مسك الظابط تليفونه واتصل بالنمرة اللي كانت في الورقة، اول اتصال ماكنش في رد، الاتصال التاني رد واحد بصوت جهوري بيتكلم بلهجة الصعيد الجواني، برغم انه يبان من صوته كبر السن، بس كانت ردوده شديدة واضحة، بعد ما سأله الظابط عن هويته، رفض الاول انه يقول هو مين، لحد ما سأله الظابط:

ـ انت نسيب “عاشور حجر”؟

سكت الراجل لثواني، وبعدها رد بأحساس واحد اتملكه القلق من السؤال، لدرجة انه كان بيرد وهو بيتهته:

ـ ايوه ، ايوه انا نسيبه، انت تبقى مين؟

رد الظابط بحزم عشان ينهي الحوار، ويجبره انه ييجي لحد عنده:

ـ ولاد اختك عملوا حادثة، البقاء لله وحده، لازم تيجي حالا عشان تعمل تصريح دفن وتستلم جث*ثهم، والا هندفنهم في مقابر الصدقة.

طبعا الظابط قاله الكلام ده عشان زي ماقولتلك يجبره ييجي، برغم انه عارف انهم بيمتلكوا مقابر خاصة بيهم، كان بناها “عاشور ابو حجر” من فترة قريبة، بس استغرب الظابط من سؤال الخال لما قال بحزن:

ـ لا حول ولا قوة الا بالله، طيب هو ايه العنوان لو سمحت؟

التعجب طبعا كان بسبب سؤال مهم، “ازاي خالهم وازاي مايعرفش عنوانهم؟”.. وده اللي قاله الظابط للراجل، اللي رد عليه بتوتر:

ـ ها، لا يا بيه اصل نسيته.

ودي اجابة مش مقنعة بالمرة، بس زي ما بيقولوا مش ده “بيت القصيد” بالنسبة للظابط، الاهم عنده ان الراجل ييجي عشان هو اللي عنده بداية الخيط، وفعلا.. رد عليه الظابط بكل ثبات وهدوء بالعنوان، بعدها قفل المكالمة معاه بعد ما أكد عليه انه لازم يحضر فورا، وقتها كنا لسه في اول اليوم، وعلى قرب المغرب.. سمعت صوت عربية بتضرب فرامل ووقفت قصاد الحارة، تقريبا بسبب اللي حصل جالي “فوبيا” من صوت العربيات، خرجت بسرعة بره عشان اشوف اللي بيحصل، نزل من العربية راجل ستيني، ملامحه جامدة ومش متفسره، لابس جلابية واسعة المعروفه عند اهل الصعيد، ماسك في ايده عكاز اثري نادر لما تلاقيه في ايد حد الايام دي، وملفوف على راسه شال ابيض، وعلى كتافه شال مطرز بنفس لون الجلابية، دخل الحارة وفضل يتلفت حواليه في كل زاوية فيها، لحد ما جت عينه على بيت “ولاد ابو حجر”.. لاحظت انه بدأ جسمه يتهز هزات خفيفة، والملامح الجامدة بدأت تلين وتتبدل بحزن واضح في عيونه، فضل لثواني واقف مكانه وعينه متثبته على البيت، اتمشيت بهدوء وروحت ناحيته، اتنحنحت عشان اخليه ينتبه وقولت بصوت هادي:

ـ حضرتك عاوز حاجة يا حاج؟.. اؤمريني يابلدينا.

لف وشه ناحيتي فلمحت عينه مليانه بالدموع، رفع ايده وبطرف جلابيته مسح عنيه، رجع لحالة الجمود اللي كان عليه، بس ده مامنعش ظهور الحزن في الكلام اللي قاله:

ـ الامر لله وحده يا ابني، انا ابقى نسيب الحج “عاشور حجر”.. خدت عنوان بيته من نقطة الشرطة وجيت اطل عليه، كان نفسي اشوفهم ولو لمرة واحدة، بس مالحقتش اودعهم لا دلوك ولا زمان.

استغربت من كلامه اللي معناه انه ماشوفهمش بقاله سنين، فسألته:

ـ حضرتك بقالك كتير ماشوفتهمش؟

ـ سنين يا ولدي، سنين كتير من وقت ما فروا هربانين من البلد.

كلامه شدني، والحوار خد منحنى تقريبا مشابه لتوقعاتي، وده خلاني اشاور على الكنبة اللي قاعدين عليها انا وانت، واطلب منه ييجي يرتاح شويه عشان افهم منه، وافق على طلبي باستسلام غريب، اتسند على عكازه ومشي ورايا بخطوات واحد رجليه شيلاه بالعافية، لحد ما وصل للكنبة ورما جسمه عليها، استأذنته لدقيقة دخلت البيت وطلبت من مراتي تعمل كوباية شاي، وفي خلال دقايق جابها ابني واديهالي ورجع البيت، قدمتها للراجل اللي عرفني باسمه الحج “فضل”.. اللي اتسمى باسمه ابن اخته الكبير.

قاطعت كلام اخويا:

ـ انت لدلوقتي ماقلتليش هو ولا هم منين؟

سكت اخويا لثواني وقال:

ـ الطلب الوحيد اللي طلبه الحج “فضل” اني ما احكيش اللي قاله لمخلوق، واهو هحكيلك.. والطلب التاني ان ما اجبش سيرة بلدهم مهما حصل، وهتعرف السبب لما احكيلك اللي قاله، ف كفاية عليك تعرف انهم من الصعيد وبس، بعد ما شرب الحج “فضل” من كوباية الشاي، لف وشه ناحية البيت وقال:

ـ الله يسامحك يا ولدي.

بعدها رفع ايده وحطها على مكان في راسه، بان على ملامحه التأثر بذكرى مرت قصاده، نزل دراعه جنبه وقال:

ـ من زمن الزمن، ماكنتش انت اتوجدت في الدنيا، كان النجع اللي اتولدنا فيه له كبير، وكبيره ما اقصدش بيه انه العمدة مثلا، لا.. اقصد كبير النجع بماله وسطوته ومساحة اطيانه، اللي كانت بتحاوط قبلي النجع لحد بحري، معظم الفلاحين اللي ما يمتلكوش ارض، كانوا بيشتغلوا حداه في ارضه، حتى نسيبي وانا كنا شغالين عنده، وبعد جوازه من اختي الله يرحمها، اشتغلنا تحت يده في القصر بتاعه، البيه “حارث” كان بيعاملنا احسن معاملة وبيكرمنا اخر كرم، كان متجوز هانم وست ماتقلش عنه في اخلاقه، خلف منها ولدين زينه الشباب، بس النصيب خلاه يشوف بت من بنات البلد، كانت بتيجي مع ابوها اللي شغال عند البيه، فعجبته وطلب من ابوها يتجوزها، الناس لما عرفت استغربوا.. صحيح البت كانت كيف البدر المنور في ليلة تمامه، بس ابوها شغال اجري عنده، والاهم ان كان فيها عيب مولودة بيه، كانت “خرسه” ما بتتكلمش.

بس زي ما بيقولوا “القلب وما يريد”.. البت عجبته ومافرقش معاه كل الكلام ده، وفعلا ابوها ماصدق والفرحة كانت هطير عقله، وافق على الجوازة اللي تمت في خلال ايام، وعاشت معاه ومع مراته الهانم في مكان واحد، كانت بتعاملها كويس بعكس ما كنا متوقعين، ومرت الايام وخلفت منه تلات بطون، اول خلفتها توأم صبيان بس ماكنوش شبه بعض، والتاني برضه ولد، واخرهم كانت بت ما تقلش عن جمال امها، ده اذا ماكنتش تزيد وتفوقها جمال.. والقدر بيكمل دايرته كل خلفتها ورثوا منها نفس اللي اتولدت بيه “الخرس”، كانوا ينطقوا كلمات بسيطة ومن بعدها يقطعوا النطق خالص، وداهم ابوهم لدكاترة كتير بس النتيجة واحدة، الموضوع وراثة.. سلم امره لله واتربوا عياله وكبروا مع بعض، ما يفرقش بينهم غير اختلاف اسم الام، طلعوا سند لبعض وايد واحدة، واللي كبر معاهم ولاد اختي ” فضل وضاحي وزكريا”، كانوا اصحابهم ومقربين لبعض حتى في الشغل، والوحيد من ولاد اختي اللي كان فاهم لغة الاشارة هو “فضل”، من عشرته بولاد البيه “حارث”.. كان هو دايما اللي بيترجملنا كلامهم واللي بيطلبوه، واتوطدت علاقتهم اكتر بعد موت البيه، كانوا عارفين كل حاجة عن تجارتهم.. التجارة اللي ماكنتش اكتر من ستار بيخبوا وراه شغلهم في تجارة “السلاح”.. وولاد اختي ماكنش فارق معاهم غير الفلوس الكتير اللي بياخدوها من ولاد البيه، اما شغلهم نوعيته ايه ما يخصهمش ولا يهمهم، كان بيورد على القصر اشكال كتير من البشر، الاجنبي والعربي، واللي من الجنوب واللي من الشمال، لحد ما في ليلة كنا سهرانين كالعادة، وده بسبب الضيوف الاجانب اللي كانوا في ضيافة ولاد البيه، وطبعا الضيافة معناه وجود كل انواع المشروبات، خمرة وشيشة عليها حشيش وافيون، لزوم الترحيب لعقد صفقة بيع وشرا سلاح، لمحت “اسماعيل” بيشاور لضاحي ابن اختي، اداه في يده مفاتيح الخزنة عشان يجيب منها فلوس، خد منه المفاتيح وراح يجيب طلب البيه، بس الواد كان ماشي يطوح، عميان من اللي الهباب اللي شاربه، بس راح مارجعش، عدا اكتر من نص ساعة وضاحي ماعودش، فقومت اتسحبت عشان اشوفه، لقيته واقف في نص الاوضة وقصاده حد ممدد ع الارض، بصيت بطرف عيني وركزت كانت “حورية” بت البيه، واصغر اخوات عياله، دخلت بسرعة عشان افهم اللي بيحصل، اول ما شافني “ضاحي” ارتبك ورجع لورا كام خطوة، سألته بخوف:

ـ انت عملت ايه؟

فضل يتهته وماكنش عارف يجمع كلمتين على بعض، الحكاية كانت واضحة وفهمتها من البهدلة والحالة اللي كانت فيها البت، الخمرة كانت مغيبة عقله، شافها حليت في عينه فاعتدى على شرفها، وفي عرفنا ده الخراب بعينه، اما في عرف ولاد البيه خراب وموت، وده اللي افتكره ابن اختي بعد ما فاق ووعي لعملته، عشان ماكتفاش باغت*صابها ده كمان قت، لها، استغل انها مابتنطقش ولا تقدر تصرخ تستنجد، وقتها ماكنتش عارف اتصرف ازاي، كان الحل الوحيد قصادي اروح اشوف ابوه، بس مالحقتش.. يادوب لفيت عشان اخرج بره الاوضة، حسيت بضربة قوية على راسي ضلمت الدنيا قصادي، من بعدها مادرتش بحاجة، لما فوقت لقيت ولاد البيه حواليا، ونار خارجة من عيونهم، اللي بيتكلم منهم سألني اذا كنت اعرف مكان اختي وولادها، استغربت لكلامه.. بس فهمت بعد كده، ان “ضاحي” سرق الفلوس اللي بالخزنة، بعد ما ضربني على راسي، وخد امه وابوه واخواته وهربوا من البلد، هم كانوا عارفين لو قعدوا هيكون مصيرهم ايه، اللي مهما طال الزمن هيصيبهم مهما هربوا، واللي برأني وخلاهم سابوني، الكاميرات اللي كانت ماليه الاوضة وصورت كل اللي حصل، من اغتصاب اختهم وقتلها لحد ضربي والسرقة، فشالوا جواهم الكره لحد ما الوشوش تتقابل، ومن اللي حصل وعرفته من الظابط، اتأكدت انهم عتروا عليهم وخدوا بتارهم.

بعد ما خلص كلامه، سألته:

ـ حكيت للظابط الكلام ده يا حج “فضل”؟

بان على ملامحه الذعر من سؤالي، اتكلم بخوف:

ـ بتقول ايه يا ولدي؟.. ده لا يمكن ابدا، يعني يق*تلوني ومايكونش ليا عندهم ديه، الكلام ده بس انت اللي تعرفه، خليني اقابل وجه كريم على فرشتي، كل اللي قولته للظابط ان ما عرفش حاجة عن شغلهم، واكيد اللي عملوا كده حد بينافسهم في السوق، الله يرحمهم ويغفرلهم، استأذن انا عشان الحق ارجع قبل الفجر.

حاولت اخليه يبات والصبح اشوفله مواصلة، بس رفض خالص، سلم عليا وهو بيودع بنظراته بيت اخته وولادها، اللي اغلبهم راحوا ضحايا ظلم بدون اي ذنب، استأذن ومشي ناحية العربية اللي كانت مستنياه، فضلت متابعة لحد ما العربية طلعت وصوتها اختفى، بس.. ومن الوقت ده اتقفلت قضية “ولاد حجر” بدون متهم مدان، اما احنا ربنا يتولانا، البيت اتسكن بالاشباح اللي مابتنيمناش طول الليل، اللي قدرت عليه امي، تمنع ظهورهم في الحارة بالملح اللي بترشه مراتي، اما جوه البيت، فالصراخ والبكا ما بيسكتش، ده غير الشبابيك اللي بتفتح وتقفل لوحدها، واصوات لخناقة مش عارفين مصدرها فين بالظبط، بس الحياة ماشية ما بتقفش لا على عفريت ولا حتى بني أدمين.

خلص اخويا كلامه اللي طبعا ما كنش يقدر يروح يقول للشرطة اللي عرفه، خوف او قلق من الناس دي، ولازم اعزره حتى لو رافض ده.. عدا كام شهر فترة اجازتي، اتقضت ما بين اهلي وبين الاصوات اللي كنا بنعمل نفسنا مش سامعينها، لحد ما جه يوم سفري ورجوعي للشغل، سلمت على اهلي وودعتهم، واخر حاجة وقعت عليها عيني وقت خروجي من الحارة بيت “ولاد ابو حجر”..

“تمت”..

#حارة_أيوب

#لمياءالكاتب