ملف الحرامي

ويمكن الي هحكيه ده غريب اكتر من الحكاية الاولنية ومش مفهوم بس الي عاوز اقولهولك ان محدش من اهل البلد ربط الي حصل ده بالطريق وكلهم قالوا عادي اتلبس لما وقف في الضلمة لوحده… وطبعا محدش كان فاكر ان الي حصل ممكن يحصل تانى لكن في يوم كان وحيد في زيارة لاخته المتجوزة في مرسي علم معرفش هو اتأخر ليه… في اليوم ده انا وكام راجل من البلد ومنهم الحج سيد سهرانين ومولعين نار وبندفي عشان الجو برد… والساعة كانت عدت 12 بليل.. الحج سيد لقي ابنه بيرن عليه وكان فاكر ان ابنه في البيت من بدري… رد الحج سيد علي ابنه وقاله في اي بتتصل دلوقتي ليه… رد عليه وقاله ان العربية عطلانة بيه في ملف الحرامي وانه عاوزه يبعتله اخوه بسرعة… الحج سيد قاله حاضر هبعتلك اخوك.وفعلا شقيق وحيد اسمه شعبان… شعبان اخد العربية وطلع بيها على ملف الحرامي مفيش ساعتين لقيت الباب بتاع البيت بيخبط ويرزع فتحت كان الحج سيد وقلي

_ الحقني يا ابو فهد الواد شعبان راح الملف لقي العربية وملقيش وحيد

_ ازاي يعني هيكون راح فين؟ طيب محولتش تتصل بيه؟

_ حاولت بيديني الرقم مغلق انا هموت من القلق يا ابو فهد

_متخفش واهدي بس

لميت كام راجل من البلد وكل واحد اخد عربيته واتحركنا علي الطريق… بعد ساعتين وصلنا كان الصبح طلع لقينا شعبان في العربية مستني واول ما شافنا نزل وبدأنا ندور وننادي عليه… انت فين يا وحيد انت فين يبني رد علينا.. مفيش صوت ومحدش عارف هو اختفي راح فين!!!

وبعد تدوير فوق الساعتين ملقناش وحيد ورجعنا البلد محدش فاهم ولا مستوعب اي الي حصل.. وبدأت الناس تربط الي حصل لوحيد بالي حصل لعبد الباسط بس الفرق ان عبدالباسط رجع لكن ده لا وحيد مرجعش.. فات اسبوع ومفيش جديد لحد ما قرر ابوه انه هيعملوا عزا وقال انا ابني مات خلاص

وفعلا عمل عزا كبير والناس اتجمعت لكن طبعاً مفيش جثة ادفنت.. ومر اسبوع كمان ولكن في اخر الاسبوع التاني صحيت علي صراخ.. صراخ كتير من ناس كتير والي بيجري خرجت من باب البيت لقيت وحيد رجع لكن كان مش وحيد الي نعرفه.. وحيد كان جلد علي عضم والعضم بارز وظاهر.. المنظر كان صعب ده غير الكدمات الموجودة علي جسمه.. واحد ابن حلال لقيه مرمي علي الطريق ورجعه البلد… ابوه لما شافوا كان خايف منه وامه وقعت من طولها ودخلت في غيبوبة وهو كمان اتحجز في المستشفى.. والغريب ان جسمه كان مسحوب منه دم كتير وفي اثار ضرب علي جسمه

زي عبد الباسط.. فضل وحيد في المستشفى شهرين كل يوم يقوم يصرخ ويقول سبوني انا عاوز ارجع وينادي علي ابوه واخوه.. حالته كانت صعبة بجد

لحد ما خرج من المستشفى والي فهمناه منه انه شاف نور قريب منه لما نزل من العربية ومشي وراه لقي نفسه في كهف وانه شاف هناك ناس كتير ميته وبتصحي وانه مكنش عارف يخرج وانهم كانوا بيضربوه

كلام بعيد عن العقل ومحدش يصدقه ولا يقتنع بيه وزي ما حصل ما عبدالباسط.. جابوا الشيخ عبدالتواب يشوفه ويعالجه وللاسف حصلت اكتر حاجة مرعبة ممكن اي حد كان يتخيلها… الشيخ عبدالتواب لما دخل الاوضه قال سبوني لوحدي معاه.. وقعد معاه لحد ما اتأخر ساعة كاملة.. اهل وحيد قلقوا عليه وقرروا انهم يفتحوا الباب ولما فتحوا الباب اكتشفوا الكارثة

وحيد قتل الشيخ عبدالتواب خنقه لحد ما مات… اهل البلد كلهم اتجمعوا عند بيت سيد التربي عشان يشوفوا اي الي حصل واتقبض علي وحيد.. لكن اتحول لمستشفي الامراض النفسيةالعقلية بعد ما تم ثبوت انه غير سوي نفسيا. بس هي دي حكاية وحيد ابن التربي

_اممم حكاية غريبة فعلاً لكن برضو مش مقتنع

_ يبني ومش هتقتنع وده الطبيعي وانا لو حد حكالي الكلام ده هقول عليه مجنون

_بس انا عندي سؤال.. هو ليه شعبان محصلهوش حاجة رغم انه راح بليل برضو؟!

_مش عارف يبني هو فعلاً سؤال ملهوش اجابة عندي

_تمام يا ابو فهد الي بعدوا بقا

_ههههه واللهى ما عارف اقولك اي… بص انت زي ابني وانا بقول كده كفاية الي انت عرفتوا الفضول اخرته وحشه

_ لا ارجوك احكيلي يا ابو فهد انا هموت واعرف اي الي حصل تاني

_ حاضر هحكيلك بس لازم تعرف ان الي هحكيلك عليه هو الي زود الطينة بلة ووقعنا في مشاكل كتير اوي

_وده مين ده يا ابو فهد

_ عتمان الدجال او زي ما بيسموه البعض الشيخ عتمان وده مات من شهر لكن الي عملوا زود الشر اكتر

عتمان دجال معروف من زمان في بلدنا واتسجن كذا مرة بتهم نصب لكن كان بيخرج منها.. واخر مرة خرج كان لسه موضوع وحيد مسمع في البلد.. عتمان قال ان المكان مسكون وانا هو يعني الي هيحل المشكلة

فضل عتمان حابس نفسه في بيته مش بيخرج لمدة شهر وكل يوم نسمع اصوات غريبة طالعة من بيته ومحدش ادخل ولا قال الراجل ده بيعمل اي.. كل النااس كانت عارفة انه دجال ومؤذي وان اي حد هيدخل معاه.. هيكون مصيره اي

وبعد شهر خرج علينا عتمان وقال سبب اللعنة انا عرفته خلاص بس محتاج المساعدة منكم

محدش كان بيرد عليه غير قلة من الناس.. ناس جاهلة آمنت بكلامه وسمعت كلامه.. وقلهم

هتاجوا معايا الطريق هنطلع الجثث الي مدفونة علي جمب الطريق وهنولع فيها وفي الطريق كلوا

بدأت الناس تخاف من كلامه لكن هو بدأ يقول للناس متخفوش وتعالوا معايا.. وفعلا راحو معاه رغم تحذير الناس الي فاهمة وعارفة خطورة الي هيعملوه… عدت خمس ساعات وكلنا مستنيين المعجزة الي هتحصل علي ايد النصاب الي اسمه عتمان..وشوية وسمعنا صوت الناس جاية تهلل وتقول ربنا يخليك لينا يا مولانا ربنا يخليك لينا يا شيخنا.. وقالوا ان كلام الشيخ عتمان كان صح وانهم خرجوا جثث كانت مدفونة علي جمب الطريق وان الشيخ عتمان ولع في الطريق وانهم سمعوا صرخات الجن وهما بيتحرقوا… كل الكلام ده مكنش داخل ذمتي بمليم وكنت عارف خدع عتمان.. عتمان كان عامل زي الشيطان بيخدع الناس عشان تأمن بيه وتنسي ربنا… لكن الي حصل بعد كده كان صعب كان مخيفبعد ما اليوم ده خلص صحينا علي صوت الناس دي بتصرخ وبتقول.. بيوتنا بتتحرق بيوتنا بتتحرق.. خرجت للشارع هرج ومرج وناس بتجري يمين وشمال مزعورة والي حصل ان كل واحد راح مع عتمان الدجال بيته كان بيتحرق ماعدا بيت عتمان النار مقربتش منه.. في ناس جريت علي بيته وفضلت تخبط وتقول افتح الباب افتحلنا الباب انت السبب في كل حاجة افتح الباب يا جبان.. لكن عتمان كان متجاهل كل حاجة ومكنش بيرد عليهم.. يوم والتاني والموضوع مش بيهمد والنار الي بتمسك في بيت مش بتسيبه غير لما تخلص عليه ويبقي رماد كانت نار مش بتطفي نار من الجحيم حاولنا نطفيها وكنا بنفشل دايما يبني.. لحد مع رابع يوم.. بدأنا نشم ريحة وحشة اوي طالعة من بيت عتمان ريحة اشبه بريحة العفن.. قررنا بعد تفكير اننا لازم نكسر الباب الريحة وحشة وخارجة للشارع.. وكسرنا الباب وشوفنا اكتر حاجة مرعبة ممكن حد يتخيلها

…

يتبع الجزء الثالث والاخير