قصه مدافن الصدفي ( كامله)

عمرك سمعت حد بيقولك(اذكروا محاسن موتاكم).. كتير مش كده واكيد الكلام ده عشان الشخص ده مشي خلاص وملهوش لازمة انك تجيب سيرته بكلام مش كويس.. لكن تعمل اي لو عرفت ان في حد نزل القبر مع حد ميت وطلع وقال كلام غريب حصل جوه القبر

…

_ ازيك يا سيد.. اومال والدك فين؟

_ والدي.. والدي مات يا حسن مات وسبلك رسالة قبل ما يموت.. بيقولك كفاية الي عرفته وروح بيتك ومتسألش تاني في الموضوع ده

_ احكيلي والدك مات ازاي يا سيد ده كان معايا امبارح

…

وبدأ سيد يحكي الي حصل.. وقررت ارجع بعد ما سمعت الحقيقة لكن وانا معدي من قدام قبر مفتوح سمعت صوت واحد بيثتغيث ان حد يلحقه.. قربت من القبر ودخلته وكانت المفاجأة

….

مدافن الصدفي

مبدئيا كده انا مش صاحب القصة انا واحد لقيت القصة دي متسجلة علي تليفون واقع قدام قبر مفتوح وسمعت الي فيه وياريتني ما سمعته وعاوز اقول لكل شخص بيسمع او بيقرأ الكلام دلوقتي.. استعيذ بالله من الشيطان الرجيم وحصن نفسك عشان هحكيلك اكتر حاجة مرعبة سمعتها في حياتي.. اسمعوا

..

انا مش عارف ابدأ منين كفاية اقولكم اني بسجل الكلام ده وانا قاعد في قبر مفتوح ايوة في قبر مكنتش اعرف ان الحكاية دي هتوصلني للوضع ده بس انا اتحذرت ومسمعتش الكلام.. انا اسمي حسن عبدالله الصدفي عندي 24 سنة عايش مع والدي ووالدتي في القاهرة ومليش اخوات.. بشتغل صحفي بس لسه تحت التمرين حلمي اكون صحفي كبير وليا شعبية.. من غير كلام كتير ملهوش اي لازمة.. قصتي بتبدأ من يوم كنت في الشغل واتصل بيا والدي.. رديت عليه

_ الو ايوة يا بابا

_ ايوة يابني تعالي بسرعة.. عمك فوزي مات

..

قفلت السكة ونزلت جري بعد ما استأذنت من مديري.. ركبت تاكسي وطيران علي البيت

وصلت.. صراخ وعويل وعياط.. كنت ببكي من غير ما احس علي فراق عمي.. اغلي الناس علي قلبي دخلت البيت كان عمي اتغسل وبيتكفن واتحط في النعش عشان نتحرك بعمي لمثواه الاخير.. القبر، اتحركنا وكل الناس بتقول

لا إله إلا الله.. ان لله وإن إليه راجعون

وصلنا المقابر .. نزلنا النعش على الارض لكن انا لاحظت حاجة في شاب هو الي واقف هينزل الجثة معايا بمعني اصح ده التربي وفي راجل كبير واقف وراه رجله مقطوعة.. الراجل ده انا عارفوا كويس ده عبدالتواب التربي واكيد ده ابنه بس انا اخر مرة شوفتوا يوم وفاة جدي مكنش كده كان سليم

نزلت جثة عمي القبر مع الولد ده واتقلي زي المتعارف عليه انزل بضهرك واخرج بوشك

نزلنا الجثة علي الارض وخرجنا

وقرينا الفاتحة لعمي ومشينا.. واحنا ماشيين عدينا علي مساكن متواضعة جداً جمب الترب هي مش بيوت تقدر تقول عشش او اكواخ

وسمعت اتنين بيتكلموا وداير ما بينهم الحوار ده

..

_ هو عبدالتواب علم ابنه الشغلانة بعد الي حصلوا

_ اه بس ياريت ميكونش علموا طول اللسان

_اه علي رأيك الواد لسه صغير ومش حمل عقاب الاموات

_ ربنا يسترها

…

هو ده الحوار الي سمعتوا ولفت انتباهي كلمة عقاب الاموات يعني اي.. هي الاموات هتعمل ايه دول اموات.. انا لازم اعرف اي الحكاية بالظبط ولازم ارجع تاني

رجعت البيت وانا مش عارف ادور ورا الموضوع ده ولا بلاش بس ده هيكون اول تحقيق صحفي ليا.. لا انا هرجع وهسمع وهيبقي سبق صحفي كبير جداً انا متأكد انه موضوع كبير

…

استنيت 3 ايام العزا خلصوا وروحت المقابر من تاني بس المرة دي روحت ناحية المساكن وخبطت علي باب بيت عشوائي.. فتحلي واحد في الاربعينات من عمره وقلي

_ نعم.. اؤمر

_ انا اسمي حسن وبصراحة كده بدون مقدمات انا جاي اسأل حضرتك عن حاجه بس

_حاجة اي اتفضل الاول

_ هو اي حكاية عبدالتواب التربي واي موضوع عقاب الاموات ده

_ انا معرفش حاجه يا استاذ اتفضل مع السلامه

_ حضرتك انا مش طالب حاجة غير اني اعرف بس انا سمعت كلام وانا صحفي وده شغلي.. احكيلي ارجوك

…

بعد الحاح وضغط مني الراجل بدأ يتكلم ويقول

_ عبد التواب ده كان التربي بتاع المقابر دي وهو وراث الشغلانة دي عن جدود جدوده لكن هو كان عنده مشكلة ولسه عنده ان لسانه طويل.. مش تسمع دايما يقولك لما تاجي تدفن حد لو سمعت حاجة جوه متحكيش

عبدالتواب بقا كان ماشي بالعكس كان الي يشوفوا يحكيه وللناس كلها.. والكل حذره من الي بيعملوا ده لحد ما في يوم كان بيعدي الطريق ووالله يا استاذ خبطتوا عربية كانت من غير سواق.. احنا كلنا شوفنا العربية واتسببت الحادثة في بتر رجله.. الغريبة ان عبدالتواب مربطش الي حصلوا بالمصايب الي بيعملها وحاليا ابنه سيد هو الي ماسك الشغلانة

بس يبني هي دي كل حاجة اعرفها

_طيب ممكن توصلني لبيت عبدالتواب التربي انا عاوز اشوفوا واتكلم معاه

…

فعلاً الراجل وصلني لبيت عبدالتواب التربي.. خبطت فتحلي واحد ده سيد وقلي

_ اهلا وسهلا بحضرتك.. في حالة وفاة عندكم؟

_ لا انا جاي اسأل علي السيد الوالد لو موجود

_ اه موجود اتفضل طبعا

…

دخلت البيت وشوفت عبد التواب قاعد علي كنبة صغيرة وجنبوا العكاز بتاعه وقلي

_اهلا وسهلا بيك نورت يا ابني خير سمعت انك عاوزني!!

_ انا بصراحة كده هاجي معاك دوغري وهقولك اني صحفي وسمعت كلام كتير عن حضرتك وعاوز اسمع منك وبالتحديد موضوع عقاب الاموات

_ دي ناس مجنونة يا استاذ مفيش حاجة اسمها عقاب الاموات والي حصلي حادثة قضاء وقدر

بس بما انك عاوز تسمع.. فشوف يا سيدي انت واحد فضولك جابك لحد هنا انا ممكن اكون راجل جاهل لكن صدقني الي هحكيه حصل.. رغم الي هحكيه صعب لكنه مخيف اكتر

…

انا اسمي عبد التواب التربي وارث الشغلانه دي عن جدود جدودي.. اجيال بتسلم اجيال اسرار وقصص وحكايات ودايما كانت التحذيرات لو شوفت حاجه جوة القبر اعرف انك عندك شفافية لكن اوعي تطلع تحكي الي حصل لاي حد مهما كان هما هيزعلوا وهينتقمو ا.. طبعاً انا كنت بسمع الكلام ده وبضحك والله

ومن يوم ما استلمت الشغلانة دي مكان ابويا وانا بشوف حاجات غريبة لكن كنت بطلع وبحكي للناس وكانت الناس بتصرخ في وشي وتقولي حرام عليك مش عاوزين نسمع انت كده بتغضب ربنا.. لكن كانت في ناس بتسمعني.. الموضوع بدأ معايا بعد وفاة ابويا علي طول ولحد دلوقتي فاكر جثتها.. جثة الست عواطف واحنا ما شاء الله عندنا ميزة كدة الجنازة الي بتبقي جاية علينا.. الناس بتعرف هي مين واي حصل معاها قبل موتها فكانت بتوصلني الاخبار والجنازة في الطريق للمقابر.الست عواطف كانت ست مكروها من الكل بسبب لسانها كانت بتأذي الناس مش كويسة لمجرد رفضهم انهم يساعدوها… وصلت جثة الست عواطف ونزلنا النعش علي الارض وفتحنا باب القبر ودخلنا نزلنا جثتها علي الارض وريخت الكفن عن وشها.. اعوذ بالله اي ده الست دي ميتة وفي عينيها نظرة خوف وفزع.. لكن حصلت حاجة غريبة ومخيفة جداً.. بوقها اتفتح ودود.. دود مقرف جداً بدأ يخرج من بوقها.. منظر مقرف جداً مش قادر استحمل بصيت علي ابنها الي كان واقف جمبي لكن واضح انه مش شايف حاجة.. رجعت بصيت للجثة تاني.. الجثة سليمة مليون في المية ومفيش اي حاجة من الي انا شوفتوا ده

خرجت بره القبر.. وبدأت احمي للناس الي شوفتوا تحت فرد وقال حرام متحكيش حاجة يا عبدالتواب انت مش قد اذاهم.. كنت بضحك عليهم واقولهم كفاية جهل دول اموات هيعملوا اي يعني

رجعت البيت في اليوم ده وانا مش مصدق الي شوفتوا في القبر وبقول كل دي اوهام مفيش حاجة من دي اكيد انا من الحكايات الي سمعتها عن الست ومنظرها المخيف وهي ميتة هو السبب.. عملي تهيؤات

وعلي بليل لقيت باب البيت بيخبط فتحت كان شيخ البلد الحج بسطاوي وكان باين علي وشه انه زعلان ومدايق وقلي

_ ازيك يا عبدالتواب عامل اي؟

_ الحمدلله يا حج تمام والله

_انت عارف انا جيلك ليه مش كده؟

_ لا بصراحة يا حج مش عارف بس احب اعرف لو كان في الامكان يعني

_ اي الي انت عملتوا في اخر جنازة ده بقي كده تطلع تحكي الي شوفتوا جوه.. انت مش عارف ان الاموات ليهم حرمة ومش عارف انك كده بتأذي نفسك والجهلة الي قعدوا وسمعوك

_ انت كمان هتقول كده يا حج.. طيب دول اموات هيعملوا اي يعني

_ حرام يبني انت عارف انت بتقول اي.. حرام عليك انت لو فضلت باسلوبك ده هتخسر الدنيا والاخرة انا همشي دلوقتي وربنا يهديك واتمني متحصلش تاني

..

ومشي كنت مستغرب من رد فعلوا بصراحة دول اموات هيعملوا اي هيطلعوا من قبرهم مثلا

بعدها بيومين لقيت الباب بيخبط الساعة كانت 8الصبح وعرفنا ان واحد اسمه رضا مات مقتول والكل عارف ان رضا ده كان دجال وكان مؤذي بطريقة متتوصفش

خرجنا انا وسيد الي كان بيساعدني في النظافة قدام القبر ونظفنا قدام القبر والغريب ان الجنازة مكنش فيها حد مفيش غير الناس الي شايلة النعش

نزلوا النعش وواحد منهم شال معايا الجثمان عشان ننزلوا القبر.. نزلناه علي الارض ورخيت الكفن عن وشه… ها الراجل ده وشه كان متشوه مقتول محروق ولا اي.. منظره صعب.. لكن مش ده المرعب في الموضوع.. المرعب ان الجثة قطعت الكفن ومسكت ايدي وصرخت.. انا كمان صرخت وطلعت اجري بره القبر والي كان معايا طلع يجري هو كمان بس لما خرجنا الراجل قال انه مشفش حاجة هو خاف من رد فعلي

بدأت الناس الي ساكنة جمبي تقرب وتسأل هو في اي بالظبط.. بدأت احكي لكن في ناس بمجرد ما جبت سيرة القبر والي حصل جوه مشيت وهي بتقول حسبي الله ونعم الوكيل فيك كفاية كده حرام عليك مش عاوزين نسمع تاني.. وفي ناس وقفت وسمعت وكانت خايفة من الي بحكيه لكن انا نزلت القبر تاني عشان ابص علي الجثة كانت سليمة والكفن سليم.. هو في اي انا أي الي بشوفه ده معقول يكون بيتهيألي لا اكيد انا شوفت ده بجد.. رجعت البيت وانا مرهق وسيد عمال يقولي يا بابا الكلام ده محدش يصدقه انت تعبان ومحتاج ترتاح.. ارتاح بس كده وانا هباشر الشغل اليومين دول مكانك… رفضت وقولتله لا يبني انا كويس ومش هقعد في البيت.. الموضوع ده مرفوض

..

بصراحه يبني كنت خايف عليه جداً وهو مش

هيستحمل الي انا بشوفه… ريحت في البيت اليوم ده وتاني يوم الصبح لقيت باب البيت بيخبط.. فتح سيد الباب كان واحد جارنا ومعاه الشيخ مالك امام الجامع.. قولتلهم اهلا اهلا اتفضلوا.. دخلوا وقعدوا وبدأ الكلام الشيخ مالك وقال

_ شوف يا عبدالتواب انت زي ابني انت عارف ده انا راجل كبير وعالم وفاهم كل كلمة هقولها.. انت ربنا اعطاك شفافية انك تشوف حاجات محدش يشوفها غيرك ودي حاجة مش سهلة أبداً دي مسؤولية وحمل من عند ربنا… بس للأسف انت بتعمل الي بيغضب ربنا وهيضيع الهبة دي منك

_ هبة اي ومسؤولية اي ويا تري انا بعمل اي غلط يا عم الشيخ؟

_ انت مش عاجبك كلامي انا عارف ده.. بس انا قولتلك الحقيقة وانك تطلع من القبر تحكي للناس الي شوفتوا ده انت كده بتأذيهم وبتأذي نفسك والناس الي حواليك الي بيسمعوك ومصدقين.. هياجي يوم ويدعوا عليك

_ انا مش شايف نفسي بعمل حاجة غلط يا مولانا ولو بتقولوا عليا جاهل فأنتوا الي جهلة عشان فاكرين ان في ميت هيأذيني

_ خلاص يبني احنا جهلة وهنمشي وهنسيبك بس هياجي اليوم الي هتعرف في ان احنا علي حق

…

قام الشيخ مالك ومشي وبدأت افكر في كلامه يعني اي انا مش قادر اصدق موضوع ان الاموات هينتقموا ده مش داخل دماغي

بعد كام ساعة.. جالي سيد وقال ان في جنازة جاية علينا من بعيد.. طلعنا انا وسيد عشان نجهز التربة.. ووصلت الجنازة ونزلوا النعش علي الارض واتفتح النعش ونزلناها القبر… وكالعادة رخيت الكفن عن وشها كانت بنت في العشرينات من عمرها مدبوحة.. لكن حصلت اكتر حاجة مرعبة شوفتها في حياتي

…

يتبع الجزء الثاني