قصه البالطو الاحمر (كامله)

“تلك القصة للكبار فقط.. يعني أي حد بيقرف او بيضايق او عمره اقل من ٢١ سنة مايقراش..”

اشتغلت اغنية صباح، صوتها كان بيدخل جوة قلب احمد كروان وبيحسسه بخوف غريب، خوف لأول مرة في حياته كان بيحس بيه.. ومع صوت الأغنية وريحة الدم وشكل الميزان واللحم اللي عليه، وكمان مع جسم فضل اللي بيترعش وخالد اللي بيستسلم للموت من كتر النزيف، ابتدت دماغ احمد كروان تتقل والغاز المخدر ابتدا مفعوله يشتغل، الدنيا بتزغلل في عينيه، بيغمض وبيتوه لحد ما بيغيب عن الوعي وكُل حاجة بتبقى ضلمة.

بعد فترة، ابتدا صوت صباح يقرب، ومعاه النور كان بيرجع من تاني.. فتح احمد كروان عينيه، كان جوة نفس الأوضة، بس المرة دي كانت مختلفة.. الأوضة ماكنش فيها حد غيره، كان نايم على الأرض وقصاده نفس السكينة اللي قطع بيها اصحابه، اما جنبها، فكان في كوز بلاستك!

اتعدل، قعد وسند ضهره على الحيطة، ماكنش قادر يقف من قلة الأكل ومن كل اللي مر بيه، وقبل ما يسأل عن اللي هيحصل معاه، سكت صوت صباح اللي خارج من السماعة واتكلم نفس الصوت اللي بيكلمه من اول ما دخل الأوضة…

(صباحية مباركة يابيه.. ايه القمر ده؟.. وشك وانت صاحي من النوم ايه.. يقطع الخميرة من البيت العَمران)

بص كروان ناحية السماعة واتكلم بصوت ضعيف..

-وأخرتها ايه؟!.. هتعمل فيا ايه تاني؟.. لا.. الأهم من هتعمل ايه، انت بتعمل كده ليه، والأغنية، كل حُب وانت طيب، هي كانت حطاها نغمة تليفونها.. انت كنت تعرفها!.. مش كده؟

رد عليه الصوت..

(اعرف مين ياعم، ومين دي اصلًا اللي كانت حاطة الأغنية نغمة تليفونها!.. دي اغنيتي المُفضلة، وبعدين جرى ايه دكتور، هو في حد مابيحبش الشحرورة؟!)

بص احمد كروان قصاده وضحك ضحكة مليانة يأس وتعب..

-شحرورة!.. طب وحياة أمي لو خرجت من هنا حي، لا هكون مشحررك ومقطعك زي اللي قطعتهم وماتوا قصادي دول.

(كداب ياكركر.. انت مش هتعرف تعمل حاجة، او اقولك، مش هتقدر تعمل حاجة، وبالنسبة بقى لموضوع خروجك من هنا، فده في ايدك، ودلوقتي جينا لأخر لعبة.. لعبة الدم.. اللي قصادك ده كوز بلاستيك، بيشيل اتنين لتر من السوايل، واللي جنبه زي ما انت شايف كده، سكينة حامية، طب هتعمل بيهم ايه؟!.. انا اقولك… انت زي الشاطر كده هتمسك السكينة وهتجرح جسمك وهتخليه ينزف، وعن طريق النزيف والدم اللي هينزل منك، هيبقى مطلوب انك تملى تلات تربع الكوز.. ووعد مني ياعم، لو قدرت تعمل ده، انا بنفسي هجيلك وهخرجك.. عيش يادوك.. واه، لو مابدأتش تنفذ في خلال دقيقتين، هتموت، وهنا ماقصدش انك هتموت بالغاز المخدر ولا بالكهربا.. انا اقصد بالغاز السام.. يلا.. شد حيلك.. عاوزك تقطع بضمير واوعى تقرب من أي وريد، ما انت دكتور وعارف، ماينفعش، والا.. والا هتموت ياكوكو)

سكت الصوت، ومع سكوته سرح احمد كروان، بص للسكينة وللكوز واتشجع، مسكها وقربها من دراعه، جرح نفسه وهو بيصرخ وابتدا يضغط عالجرح، الدم بدأ يسيل وينزل جوة الكوز، لكن للأسف، النزيف وقف والجرح بطل ينزل دم بسبب قلة الأكل والضعف اللي جسمه فيه، وبسبب وقوف النزيف، جرح كروان دراعه التاني وابتدا يضغط عالجرح، ومن جرح لجرح ووجود دم كتير، جسمه ابتدا يضعف من كُتر النزيف، الكوز تقريبًا كان اتملى نصه وزيادة، وفي لحظة، فرد جسمه على الأرض.. رمى السكينة ورفع إيده واتكلم بصوت ضعيف..

-مش.. مش قادر.. خلاص.. موتني.. الموت ارحم.

بعد ما قال كده ورمى راسه على الأرض، اتفتح جزء من الحيطة اللي قصاد كروان، كان زي باب مخفي، دخل منه شاب لابس تي شيرت بزونط، خطواته كانت تقيلة وهادية، قرب من احمد اللي رفع راسه وبص له، وعند نظرة احمد له، شال الشاب الزونط وراسه بانت..

-انت مين وعملت فينا كده ليه؟.. انا ماعرفكش!

ابتسم الشاب وهو حاطط ايديه في جيوب التيشيرت وقاله..

-بس انا اعرفك يااحمد ياكروان.. وماعرفكش انت وبس، انا اعرف خالد وسعدني وفضل وبلال، واه.. هي كمان كنت اعرفها.

ابتسم احمد كروان بحُزن..

-كنت عارف.. كنت عارف انك تعرفها.. بس ازاي؟!

-هقولك ازاي.. فاكر الحدوتة اللي حكيتهالك انت والاتنين قبل ما تقطعهم؟.. حدوتة الوالا بتاع اسكندرية!.. اهو الواد ده بقى يبقى انا.. انا اللي ولعت في امي وعشيقها وهربت، نزلت على القاهرة، وبعد هروبي، اتمرمطت، اشتغلت في كل حاجة لحد ما اتعرفت على جماعة ليهم علاقة بالهكر والدارك ويب، كنت بهكر، بسرق، بقتل، لكن مش مهم، المهم اني عايش وبكسب فلوس كتير، لكن وسط عيشتي المقرفة والماضي اللي مليان رماد، كان في حاجة حلوة في حياتي.. جيراني، الست فدوى وبنتها نرمين وجوزها نعيم، التلاتة كانوا طيبين، او يبانوا كده، لكن في الحقيقة، فدوى كانت غلبانة ومكسورة ومغلوبة على أمرها، ست بتسمع كلام جوزها وبتطيعه لانها مالهاش حد غيره، اما جوزها بقى واللي اتجوزها بعد ما صاحبه مات، فكان راجل دِني، زيه زي ابويا، بتاع حريم، ابوه وامه الكيف، اما البنت، بنت فدوى من جوزها الأولاني، فكانت ملاك في صورة بني أدمة.. نرمين، البنت الوحيدة اللي حبتها في حياتي، مارضتش اقرب منها اكتر ولا اعترفلها بحبي بسبب شغلي الخطر، انا بس كنت صاحبها وجارها اللي بتشتكيله من هم حياتها مع جوز امها، وساعات من هم شغلها.. فاكر شغلها ياكروان؟.. فاكر كانت فرحانة ازاي لما كانت بتقول انها بتشتغل عندكوا في العيادة!.. بس للأسف، فرحتها دي ماكملتش.. في يوم وانا قاعد في البيت، سمعتها وهي بتتخانق مع جوز امها، كان بيتحرش بيها، وبعد الخناقة اللي طولت كتير اوي، خدت بعضها ونزلت، وقتها اتصلت بيها وسألتها، انتي رايحة فين؟، ردت وقالتلي انها كلمتك وقالتلك انها عايزة فلوس، ولما قولتلها انك في العيادة، قالت انها هتعدي عليك وبعد كده هتروح تبات عند واحدة صاحبتها.. لكن للأسف، من بعد المكالمة دي وهي اختفت، ماحدش عرف يوصلها، ولما البوليس عرف وامها قدمت بلاغ باختفائها، ماوصلوش لحاجة، حتى العيادة، كاميراتها كانت بتقول انها كانت مقفولة وانك ماكنتش موجود، ولما راجعوا اخر المكالمات، طلبوني للتحقيق وروحت، روحت بشخصيتي وببطاقتي المزيفين اللي طلعتهم من بعد ما اشتغلت مع الناس اللي بشتغل معاهم دول، ولما اتكلمت وقولتلهم اللي حصل في المكالمة اللي دارت بيني وبينها، قالوا لي انها فعلًا كلمتك بس ماراحتش عندك، دي حتى كاميرات العيادة كانت بتقول ان المكان مقفول.. لكن لأ، انا ماصدقتش، حوار الكاميرات ده مادخلش عليا، وعشان كده ومن عند تسجيلات الكاميرات، ابتديت ادور.. ومع تدويري وطرقي الشمال، وصلت للواد اللي فبركلكوا الفيديوهات بتاعت الكاميرات، كان بيشتغل في الشركة اللي ركبت انظمة المراقبة في العيادة، وبشوية ضغط وكام ذلة مسكتهم عليه، طلعلي الفيديوهات الأصلية، الفيديوهات اللي بتبين ان انتوا مش فاتحين العيادة دي للعيانين وبس، انتوا بالليل بتقلبوها مكان لسهراتكوا الحمرا.. يعني، تشربوا فيها، تجيبوا فيها ستات شمال شبهكوا، وطبعًا ليلتها كنتوا قاعدين بتشربوا، ولما نرمين كلمتك وطلبت منك فلوس، قولتلها تجيلك، وياريتها ما راحت، كانت فاكراكوا بني أدمين، كانت بتعتبرك اخوها الكبير، لكن انت لا اخ ولا كبير ولا بني أدم من اصله، انت واصحابك الأنجاس اغتصبتوها، كنتوا شاربين لما معمين، ولما خلصتوا معاها وحاولت تهرب، جيبتها من شعرها وفضلت تخنق فيها لحد ما ماتت، وبعد ما عملت عملتك السودا، قولتلهم انك هتشيلها وهتنزلها من باب العمارة الوراني وهتروحوا تدفنوها في مكان مش معروف، وفعلا نزلتوا.. ولحد هنا الليلة بتخلص.. لكن قبل ما تسألني وتقولي انا ليه ماوديتش الفيديوهات للبوليس، هقولك انا ماعملتش كده ليه، انتوا اللي زيكوا ماينفعش يتقدم للحكومة، انتوا كان لازم يتلعب بيكوا وبحياتكوا وكمان الناس تتفرج عليكوا.. اه، ما انا نسيت اقولك، الأوضة اللي انتوا فيها دي مرشقة كاميرات، والكاميرات دي متوصلة ببث مباشر على الدارك ويب، يعني اللي بيدخل وبيبقى عاوز يتفرج على ناس بتتعذب في مقابل فلوس، شافكوا واستمتع بتقطيعكوا لبعض، اما دلوقتي بقى، وبعد ما اللعبة خلصت، خليني اقولك انا هعمل فيك ايه.. انت خلاص، هتموت، ومش هتموت لأنك قتلت نرمين وبس، لأ، انت كمان خسرت في اللعبة ووسخت البالطو الابيض بتاعك ومليته دم، وسخته لحد ما بقى لونه أحمر.. شبه دمها، وماتخافش، هريحك على طول، هفتحلك الغاز السام وبعد كده هدفنك جنب اصحابك، ابسط، هتدفن انت وهم في مكان مقطوع زي ما عملتوا في نرمين.. نرمين اللي شبحها ماسابنيش ولا ليلة من بعد ما شوفت الفيديوهات.. لكن خلاص، انا كده جيبت حقها، بالظبط زي ما اللي في الأوضة اللي جنبي جاب حق ابوه من المحامي المعروف، وحيد.. او وحوح زي ما بيقوله.. الفرق بس اللي بيني وبينه انه ماقتلش بجد، اما انا، فكان لازم اشوفكوا وانتوا بتموتوا لأن ده اللي انتوا تستحقوه.. انا خارج ياكركر.. وبالنسبة لنرمين، فلما تقابلها هناك ابقى قولها اني عمري في حياتي ما حبيت ولا هحب غيرها.. وقولها كمان اني لسه بسمع الاغنية اللي كانت بتحب تسمعها طول عمرها.. يلا.. اسيبك تموت وانت بتسمع الأغنية المُفضلة عندها وعندي.. لأخر مرة.. لكن العزول الله يجازيه.. صُعُب عليه اللي احنا فيه..

ومع صوت الاغنية اللي اشتغل من السماعة لأخر مرة، خرج الشاب من الباب اللي دخل منه وبعد كده اتقفل، وبمجرد ما الباب اتقفل، اتملت الأوضة بالغاز السام واحمد كروان جسمه ابتدا يتنفض لحد ما سكت خالص.. سكت للأبد.

********

(بعد شهر.. في مكتب حمدي مراد وكيل النيابة)

بص حمدي وهو قاعد على كرسي مكتبه واتكلم مع عبد الرحمن زميله..

-وبعدين ياعبد الرحمن.. اللي حصل لوحيد والخمس دكاترة مش هيعدي بالساهل، الفيديوهات انتشرت واخرها مش باين.. يعني اللي عمل كده مابيتشافش، دي كارثة، احنا لازم نوصل للي عمل كده.

سرح عبد الرحمن لثواني وبعد كده بص لحمدي..

-تفتكر ياحمدي الناس دي كانت مظلومة ولا ظالمة، يعني.. يستاهلوا اللي حصلهم ولا لا؟

-والله ما عارف.. احنا مهمتنا ان احنا ندور على اللي..

فجأة رن تليفون حمدي..

-الو.. ايوه يافندم؟.. فيديو؟!.. تاني؟.. طيب طيب، هبص عالواتس.

قفل حمدي المكالمة وفتح الواتس، وقتها عبد الرحمن جري ووقف جنبه، الفيديو كان فيه واحدة ست بتتعذب!.. لما عبد الرحمن شاف الفيديو برق وبص لحمدي..

-ده فيديو تاني واللي عمل كده هو نفس الشخص تقريبًا!

-تاني ايه بقى؟.. قول تالت، بس خد بالك.. المرة دي الست اللي في الفيديو مش ست عادية، دي غادة الكامل، صاحبة أكبر صالات للمساچ في الوطن العربي.. احنا لازم ندور على اللي عمل كده ونلاقيه في أسرع وقت… وألا..

-وألا ايه ياحمدي؟.. هيفضل يخلص على الأوباش اللي في البلد؟!

سكت حمدي وسرح، اما عبد الرحمن، فرجع قعد مكانه وسرح هو كمان.. كانوا بيفكروا في غادة وفي اللي حصلها، لكن اللي حصلها هنعرفه قريب اوي.. وكمان هنعرف ازاي جلسة مساچ، حولت حياتها، غيرتها، خلتها من أكبر سيدة أمال في الوطن العربي، لواحدة من اللي جواها.. جوة اللعبة.. سلام.

تمت

محمد_شعبان