قصه العقار المسموم ( كامله)

العقار المسموم

(ورم خبيث)

الجزء الثاني

بصيت ورايا عشان الاقي مراتي لكن كان شكلها صعب مش قادر اتحمله.. وشها متأكل والعضم باين جلدها كله مسلوخ.. بتقرب مني وهي بتترنح زي افلام الزومبي بالظبط

قولتلها

_ أنتي عاوزة اي؟ ابعدي عني ابعدي عني

_ أنت بتبعد عنى يا حازم.. أنا مراتك

_ أنا معرفكيش انتي مش مراتي.. اعوذ بالله من الشيطان الرجيم

_ لا انا مراتك يا حازم متخفش

…

الصوت اللي كان طالع منها مش صوت مراتي أبداً.. كان صوت تخين وانا مش عارف افسر ده اي

وفي لحظة لقيت نفسي بصحي من النوم.. كابوس كابوس مزعج ومخيف

بصيت جمبي كانت مراتي نايمة ومفيش اي حاجة.. قومت من السرير وروحت الحمام

لكن ريحة العفن اللي شميتها في الكابوس ظهرت من تاني.. بصيت في سبت الهدوم وكان فيه هدوم مراتي اللي رجعت بيها من المستشفى.. ومسكتها وشميتها وفعلا الريحة طالعة منها

لكن لاحظت ان علي الهدوم في مادة غريبة ولزجة ولونها اسود… معرفش دي جات هنا أزاي ولا اي دي أصلا؟

حاولت أرجع انام.. رجعت السرير ونمت لكني حسيت ان مراتي بدأت تتألم وكأنها بتتضرب وهي نايمة.. صحيتها وانا بسألها مالك في اي يا حبييتي؟

..

فتحت عينيها وكانت مبرقة وسألتني أغرب سؤال سمعته في حياتي.. لما قلتلي

_ أنت مين؟

_ أنا مين أزاي!.. أنا جوزك انتي نستيني ولا أي؟

بصتلي كده باستغراب وقالت

_ أنا بعمل اي هنا؟.. أنا المفروض دلوقتي أكون في المعمل.. محتاجيني هناك

_ اهدي بس تروحي فين؟ أنا جيت أخدتك من المستشفى بعد الحادثة اللي حصلت في البث

_ حادثة.. حادثة أي؟

_ حبييتي مالك؟ أنتي لسه تعبانه.. بس انتي ازاي مش فاكرة الحادثة اللي مسببة اصابة في ايديك دي

..

بمجرد ما بصت علي الجرح اللي في دراعها.. صرخت ومسكت دماغها وجالها نوع من أنواع الهياج الغير مبرر

حاولت أني أسيطر عليها.. كنت كل ما أحاول اني امسكها كانت تزقني بعنف اتقلب علي الارض.. وبعد عشر دقايق بدأت تهدي وترجع لطبيعتها تماماً

طلعت قعدت في الصالة وانا مش فاهم اي حاجة من اللي حصلها ده؟

هو في اي؟ الاول تسألني انا مين؟ وبعدين تسأل عن الحادثة اللي هي كانت طرف فيها من الاساس.. واتصابت ولما شافت الاصابة حصلها الهياج والتكسير ده

لا كده في حاجه غلط بتحصل وانا لازم اعرفها

..

وفي وسط سرحاني.. لقيت هدي خارجة من الاوضة وبتقولي

_ صباح الخير يا حبيبي.. أنت صحيت أمتي؟

_ هدي أنتي مش فاكرة اي حاجة حصلت

_ لا.. هو حصل اي؟ انت بعد ما جبتني من المستشفى اخدت دش ودخلت نمت.. معرفش اي حصل بعدها

هو حصل أي؟

_ لا يا حببيتي خير.. محصلش حاجه المهم أنتي نمتي كويس

_ اه يا حبيبي تمام.. فطرت ولا احضرلك الفطار

_ لا يا هدي انا مش جعان.. أنا هدخل اكمل نوم انا قلقان ومنمتش كويس طول الليل

_ طيب يا حازم ادخل نام انت.. وانا هفطر وهبدأ اجهز الاكل بتاع النهارده

…

دخلت الاوضه وانا محتار أكتر.. هي فاكرة ولا لا.. ولو فاكرة اومال اللي حصل من شويه ده اسميه اي؟

حاولت اطرد كل الهواجس دي من دماغي انا لو فضلت افكر كده كتير ممكن اتجنن

رميت جسمي علي السرير وانا بفكر في اللي جاي وهيحصل اي تاني.. ونمت

نمت معرفش قد اي؟.. وصحيت علي صوت مراتي بتعيط في الصالة.. قومت بسرعة وروحتلها وانا بسألها مالك في أي؟ بتعيطي ليه؟

ردت عليا وهي منهارة وقلتلي

_ فتحت التليفزيون وشوفت اللي بيحصل بره.. افتكرت الحادثة وانهرت.. حسبي الله ونعم الوكيل في اللي كان السبب

_ هو مين يا هدي.. مين السبب؟

_ ها.. لا لا مفيش حاجه… سبب اي انا قولت سبب

_انتي مخبية اي عليا يا هدي؟.. أتكلمي يمكن اعرف اساعدك

_ انا مكنتش عاوزة اتكلم.. لكن انا مش هقدر استحمل اكتر من كده

_ أتكلمي يا هدى .. في اي؟

…

الدكتور سعيد هو السبب في الوباء الجديد وموت الناس دي كلها.. واحد معندهوش ضمير كان بيعمل تجارب علي الحيوانات المصابة بجروح خطيرة واخترع زي عقار بيعالج الاصابات دي بعد مرور اسبوع .. الموضوع كان غريب لكنه عمل اكتر حاجه كانت غير متوقعة.

في يوم جيه واحد مصاب اصابة خطيرة ولازم يدخل العمليات لكن دكتور سعيد حقنه بالعقار ده

ومكنش يعرف التوابع دي.. وحصل اللي حصل ومحدش فاهم لحد دلوقتي الاعراض دي.. اعراض غريبة ومحدش كان فاهم في اي

انا كنت اعرف كل ده وساكتة.. وانا حذرته وقولتله

اني هبلغ عنه وهو دلوقتي بيحاول يتخلص مني..

..

يعني انتي عاوزة تفهميني انك كنتي شايفة الغلط وساكتة

انتي شايفة ان ده صح.. انا بجد مش مصدق

_ حازم ارجوك متتخلاش عني أنا حاسة بالذنب واني انا السبب في موت الناس دي

_ طيب واي الحل دلوقتي.. احنا لازم نتصرف عشان الاصابات اللي بتزيد دي

_ للاسف مفيش حل.. لازم المصابين كلهم يتعزلوا عن الناس.. مستحيل هنعرف نعمل ده العدد كبير ومش في مكان واحد

..

سبت هدي ودخلت الأوضة مكنتش مصدق ان مراتي هدي يكون ليها دخل بالمرض ده.. كنت مصدوم فيها بجد.. فكرت اني اطلقها ولكن ده مش وقته

بدأت اتصل بكل الناس اللي اعرفها واحذرهم من الخروج والاختلاط بحد.. ودخلت علي السوشيال ميديا وبدأت احذر الناس من النزول للشارع.. كنت حاسس ان في ايدي حاجة ممكن اعملها

وفات اسبوع كنت مش بكلم مراتي غير في اديق الحدود.. زعلان منها جداً علي اللي عملته

لحد ما حصلت الكارثة.. كنت نايم وصحيت على ريحة العفن من تاني.. نفس الريحة القذرة اللي شميتها قبل كده

بصيت علي هدي جسمي تلج شعر جسمي وقف.. هدي كانت ميتة وكل حتة في جسمها فيها ورم وعفن وشها كان نصه مسلوخ.. منظر مفزع والمرة دي بجد انا مش بحلم

رجعت لورا ووقعت من علي السرير وانا بصرخ من بشاعة المنظر اللي شايفه مش عارف اتصرف ازاي ولا اعمل اي؟

..

مكنش عندي حل.. جبت جونتي ولبسته وكمامه واكياس رابش ودخلتها كويس في اكياس الرابش وشلتها وانا هموت من ريحة العفن اللي لا تحتمل.. حطيتها في شنطة عربيتي وبسرعة البرق كنت في المستشفي اللي كانت بتشتغل فيها.. كل حاجه كانت جاهزة بسرعة الصاروخ اتكفنت هدي واخدت جثتها وروحت عشان ادفنها لوحدي.. مفيش جنازة ولا عزا ولا اي حاجة ومحدش دلوقتى شاغل باله من مين مات ولا مين لسه عايش؟

الشوارع فاضية تماما.. كنت حاسس اني عايش في بلد تاني مفهاش ناس معزولة عن البشر

وصلت المقابر وبمساعدة التربي دفنت هدي.. الدموع كانت مغرقة وشي.. الست اللي حبيتها ماتت.. كنت عاوز اصالحها واطايب خاطرها بس هي مستنتش ومشيت

…

مشيت من قدام القبر ورجعت البيت.. ومبقاش معايا غير المشوار ده كل يوم.. ايوة اني اروح قدام قبرها ابكي وافضفض معاها

لكن حصلت حاجة معايا ملهاش تفسير.. كنت واقف قدام قبرها كل يوم.. لقيت التربي بيقولي

_ وبعدين يا ابني هتفضل كل يوم تاجي قدام القبر بقالك 3 سنين علي الحال ده.. واخرتها

_ 3 سنين اي؟! انا مراتي ميتة من 3 ايام

_ 3 ايام ازاي يبني هو انت مش عايش معانا في الدنيا

_ بقولك اي.. أنت شكلك راجل مجنون ولا شارب حاجه ابعد عني

_ طيب لو مش مصدقني بص علي الشاهد بتاع القبر وانت هتعرف

…

لما قال كده بصيت علي الشاهد وبلمت عشان التاريخ اللي علي الشاهد كان… يتبع الجزء الثالث والاخير