قصه هرم الرفاعي كامله

قبل ما احكيلكوا حكاية الهرم و اللي عاوز يندفن فيه هقولكم أنا مين…

أنا نورهان أنور

أيام الجامعة قابلت شخص في كلية هندسة أسمه أحمد رفاعي، كان شخص طيب و ابن ناس اوي و كمان مستواه الاجتماعي و المادي كانوا كويسين جدًا جدًا، المهم بقينا اصحاب انا و هو لحد ما اتخرجنا بالرغم من أن انا كنت في كلية تجارة، بصراحة هو كان بيعاملني أن احنا اصحاب أه بس انا كنت بحبه لكن هو ماكنش شايف الحب ده أو كان شايفه بس عامل مش واخد باله لأنه ماحبنيش زي ما انا حبيته… يعني كان بيحبني أه لكن كصديقة أو أخت، المهم اتخرجنا من الجامعة و احمد اشتغل في شركة المقاولات بتاعت عيلته و بما إني صديقته المقربة ف شغلني موظفة في فرع من فروع الشركة الكبيرة اللي عيلته فضلت بتمتلكها لحد ما حصلت المصيبة.

في يوم صحيت من النوم على صوت رنة موبايلي و كانت الكارثة لما عرفت أن أحمد و كل الكبار في عيلته حصلهم حادثة كبيرة موتتهم كلهم إلا أحمد هو الوحيد اللي نجي منها، الحادثة كانت حادثة سير حصلت لعيلة الرفاعي كلهم و هم رايحين عزا لشخص صديق للعيلة في أحدى محافظات الصعيد، هي مش العيلة كلها اللي ماتت لأ ده كبار العيلة أو حجر الأساس بالنسبة ل (أل رفاعي) هم اللي ماتوا و اللي اتبقى منهم ناس عادية أو قرايب من بعيد يعني؛ ف بموت الناس دول العيلة كانت هتقع هي و الشركات لولا أن احمد ربنا نجاه و عاش، خرج احمد من الحادثة متدمر نفسيًا و قعد فترة طويلة مابيتكلمش مع حد لأن كل أهله ماتوا و ماتبقاش غيره، في الوقت ده انا حاولت اقرب منه بحكم صداقتنا، روحت له البيت و حاولت اتكلم معاه عشان اخرجه من اللي هو فيه لكني اتفاجأت من طريقة تفكيره بعد الحادثة اللي بقت طريقة مجنونة و مش طبيعية و ده عرفته لما في مرة روحتله الفيلا اللي كانت متبهدلة بسبب إنه كان مهملها و مركز في اللي بيفكر فيه، قعدت يومها اتكلمت معاه لكنه في وسط الكلام قال لي سؤال غريب اوي عرفت منه هو بيفكر في أيه…

– تفتكري يا نورهان انا لو موتت الناس هتفتكرني بأيه ولا أيه هي الطريقة اللي ممكن يفتكروني بيها؟!

وقتها رديت عليه و قولتله…

– بعد الشر عنك يا احمد، انت لسه شاب و لسه قدامك كتير و بكرة تتجوز و تخلف و تكون أسرة و تبقى…

قاطعني أحمد…

– لأ… انا مش هينفع اتجوز ولا حتى اخلف، نورهان انا بعد الحادثة بقيت للأسف عاجز جنسيًا و كل الفلوس اللي انا ورثتها من أهلي بعد موتي هيروحوا لناس غريبة أكيد أو لناس من مقاطيع عيلة الرفاعي، نورهان انا مش هخلي حياتي حياة عادية ولا هسمح لفلوس عيلة الرفاعي إنها تبقى ملك لغيرهم أو لشوية ناس مايعرفوش عننا حاجة غير إن أخر أسمنا الرفاعي و بس… انا اشتريت حتة أرض في الصحرا الغربية و هبني عليها مقبرة كبيرة ليا زي ما الفراعنة كانوا بيعملوا، أنا هبني هرم و هبني تحته أوضة اندفن فيها لما اموت و كمان هحول كل السيولة اللي ورثتها من عيلتي لسبايك دهب و الدهب ده هيندفن معايا… ماتقلقيش من التصاريح و من أعمال البنا بتاعت الهرم… حتة الأرض متطرفة و بعيدة و العمال اللي هيبنوه كلهم من شركتي، و ماتقلقيش كمان من أي مشاكل تانية ممكن تواجهنا، انا مخطط لكل حاجة و هرم الرفاعي هيتبني يعني هيتبني.

وقتها برقت له و قولت باستغراب…

– أحمد انت بتقول أيه؟!

رد عليا…

– زي ما سمعتي كده… هتساعديني لحد ما اعمل اللي انا عاوزه ولا لأ؟!

وقتها لقيت نفسي برد عليه تلقائيًا و بقول له…

– حاضر حاضر هساعدك بس قولي اساعدك ازاي؟!

جاوبني احمد و قال…

– انا هكتبلك مبلغ بأسمك و هحول معظم الفلوس اللي في البنوك لسبايك دهب و ده طبعًا أثناء ما العمال هيكونوا بيبنوا الهرم، و بعد كده انا هديكي سبايك الدهب تشيليهم معاكي و إذا موتت قبل ما الهرم يكتمل بناه و اتدفنت في مقابر عيلتي ف انتي مطلوب منك إنك تخلي العمال يكملوا البنا بتوكيل هكون عاملهولك هيسري بعد موتي و بعد ما الهرم يتبني هتاخدي جثتي و تدفنيها هي و الدهب في الأوضة اللي تحت الهرم و بعد كده اتصرفي في اللي متبقي من الممتلكات بمعرفتك، أه بس في حاجة كمان… انا هعرفك على رجل المفروض انه هيخلي حارس من الجن على قبري اللي هيبقى تحت الهرم عشان مايتسرقش… نورهان انا عاوزك تركزي و عاوزك دايمًا تكوني مستعدة لأي حاجة ف أي وقت، نورهان انا حالتي الصحية مش تمام من بعد الحادثة و ممكن في أي وقت اموت قبل ما الهرم يكتمل بناه ف بالله عليكي ركزي و خليكي دايمًا مستعدة للحظة دي.

قال احمد كلامه ده ف هزيتله راسي بالموافقة و فعلًا قررت اسمع كلامه و اساعده، احمد فعلًا اشترى حتة أرض و بدأ يبني عليها الهرم و فعلًا حول فلوس كتير من فلوسه لسبايك دهب و اداهملي علشان اشيلهم في خزنة بأسمي علشان لو اتوفى قبل ما الهرم يكتمل أدفنهم معاه، و كمان عرفني على الرجل الدجال اللي المفروض هيحضر جن عشان يحرس المقبرة اللي هتبقى تحت الهرم..

كل حاجة كانت ماشية تمام لكن احمد صحته كانت كويسة و ماكنش في حاجة بتدل إنه هيموت و ف نفس الوقت كمان انا مليت… مليت من أهماله ليا و من حبه لنفسه و من الملاليم اللي باخدها مقابل وجودي جنبه اللي كان بيموتني لأنه ماكنش شايف حبي له، وقتها قررت قراري… اشتريت سم و حطيته جوة سرنجة (محقن) و يوم ما روحت استلم التوكيل منه في الفيلا حقنت علبة العصير بتاعته بالسم و خدت التوكيل و مشيت… روحت البيت و انا مفزوعة و خايفة لا يكون ماشربش من العصير لكن بعد ساعات لقيت تليفوني بيرن، كان المتصل هو دكتور في المستشفى اللي جنب فيلا أحمد، الدكتور كان بيكلمني و بيقولي أن احمد مات و بيرجح إنه انتحر بسبب الحادثة اللي راحوا فيها اهله و بعدها حالته النفسية بقت سيئة، خدت بعضي و روحت المستشفى و وقفت لحد ما جثمان احمد خرج و اندفن في مقابر عيلته و بكده بقيت انا المتحكمة في كل ثروة ال رفاعي و ده لأن التوكيل اللي عملهولي و بيه بقيت بمتلك كل ممتلكاته اصبح ساري من بعد موته… هو ماكنش توكيل قد ما كان وصية بنقل كل ممتلكات عيلة الرفاعي اللي هو ورثها ليا بعد موته، أخيرًا بقيت زي الأغنيا.. بقيت سيدة أعمال و بمتلك ثروة تقدر بالمليارات، وقتها الدجال اللي احمد عرفني عليه جالي الشركة و سألني عن الهرم ف رديت عليه و قولتله إنه مش هيكمل و جثة احمد مش هتتنقل من مكانها، وقتها هو طلب مني مبلغ كان اتفق مع احمد عليه ف انا رفضت و قولتله أن انا ماليش دعوة باتفاق احمد معاه

لكنه قبل ما يمشي من الشركة قال لي إنه مش هيخليني اشوف النوم لو ماديتلهوش الفلوس، بصراحة وقتها اتعصبت و طلبت من الأمن إنهم يخرجوه برة الشركة و لو شافوه تاني فيها يبقوا يبلغوا البوليس، مشي الدجال و انا روحت بيتي اللي هو كان فيلا آل رفاعي سابقًا و بقى فيلا نورهان أنور حاليًا….

المهم استمرت الحياة لأيام لحد ما ف يوم كنت نايمة في الفيلا بالليل و صحيت على صوت خبط جاي من برة أوضة النوم، قومت من عالسرير و نزلت اشوف صوت الخبط ده جاي منين، بس اول ما نزلت من الدور اللي فيه أوضة النوم للدور الأرضي اللي فيه الصالون.. النور اتقطع و مع قطع النور دخلت جري للمطبخ عشان ادور على شمعة و فعلًا لقيتها و ولعتها بس أول ما ولعتها لقيت شبح في وشي… كان شبح احمد، كان شكله مرعب و وشه أسود و كان لابس كفن لونه رمادي، كان بيخرج منه صوت غريب ف غصب عني بسبب شكله و صوته وقعت على ضهري و انا برجع لورا بس أول ما وقعت سمعت صوته و هو بيقولي…

(الشيخ راضي… خليه يكمل و كملي الهرم… انقلي الجثة)

أول ما قال كده حطيت أيدي على وشي و فضلت اصرخ لحد ما فجأة صوته سكت و نور الفيلا رجع تاني، وقتها طلعت على أوضة النوم و فضلت سهرانة لحد تاني يوم الصبح و مع طلوع النهار روحت عالشركة و بعد ما خلصت شغل روحت عالفيلا تاني و بالليل بدأت اسمع أصوات صرخات في أوضتي و سمعت صوت احمد و هو بيقول نفس الكلام اللي قالهوللي لما شوفته شبحه في المطبخ، وقتها قومت جري و مسكت موبايلي و اتصلت بالرجل الدجال اللي اسمه راضي و قولتله إنه لو مابطلش شغل السحر و الدجل بتاعه ده انا هقتله لأني كنت مقتنعة إن هو اللي بيعمل فيا كده و إن ده أكيد جن هو حضره و اتشبه لي في صورة شبح احمد، وقتها هو ضحك و قال لي إنه مش هامه ف قفلت التليفون في وشه و انا بقول لنفسي إن انا لازم اخلص منه زي ما خلصت من احمد، عدى الليل طويل و انا قاعدة في الأوضة و مشغلة قرأن لحد ما النهار طلع، و مع طلوع النهار نزلت ركبت عربيتي و روحت عالشركة و أول ما وصلت لقيت عربيات شرطة قصاد الشركة!!

دخلت الشركة و لما جيت اسأل في ايه لقيتهم قبضوا عليا و بعد كده عرفت إن حد بلغهم أن انا بتاجر في المخدرات و فعلًا لما فتشوا في مكتبي لقوا مخدرات بكميات كبيرة و كمان لقوا في الفيلا و ف عربيتي كميات مشابهة للي لقوها في المكتب، وقتها انا بقيت مش عارفة اعمل أيه لأن كده بقى احتمال كبير يتحكم عليا بحكم يخليني اقضي اللي باقي من عمري في السجن، قعدت في الزنزلنة بعيط و انا مش فاهمة حاجة لحد ما جه العسكري و قالي إن في حد اسمه راضي جايلي زيارة، خرجت و قابلت راضي اللي أول ما شافني بصلي و هو بيبتسم و قال….

– انا الوحيد اللي هعرف اخرجك منها زي ما دخلتك… الجن لهم قدرة عجيبة و زي ما قدروا يدخلوا فيلتك و مكتبك و يحطولك فيهم هيروين ممكن كمان يدخلوا لمعامل الداخلية و يحولوه لدقيق… هطلعك منها بس لو…

وقتها رديت عليه و انا بعيط و قولتله…

– لو أيه يا نصاب يا دجال!

رد عليا و هو بيضحك و قال…

– لو مضيتي على الورق ده… ده تنازل منك على كل ممتلكاتك، لو مضيتيه ف انا هخرجك منها زي ما دخلتك.. ها هتمضي؟!

رديت عليه وقولتله و انا بفكر في كلامه…

– و انا أيه يضمنني انك هتخرجني، مش يمكن..!

قاطعني…

– لأ مش يمكن… و مافيش ضمانات لأني مش مضطر اكدب عليكي، انا بس عاوز الفلوس و مش عاوز منك أي حاجة بعد كده… سجنك لا هيضرني ولا هينفعني.

وقتها مسكت الورق و القلم اللي خدتهم من راضي و مضيت و انا ببكي عشان اخرج من الورطة اللي وقعت فيها، و بعد ما مضيت خد راضي الورق و قال لي…

– ثواني و هرجع لك….

هخرج راضي لثواني و انا فضلت قاعدة في أوضة الزيارة مستنية لحد ما بعد شوية باب الأوضة اتفتح و لقيت قصادي راضي اللي برقتله و لقيت نفسي غصب عني بقول له بصوت عالي…

– أزاي….!

يتبع