المقبره الفرعونيه
انا جاي احكيلك قصه حقيقيه ويعلم الله اني لا اكذب في ولا حرف من اللي هحكيه ده
انا يحيي ٢٤ سنه من اسيوط وقصتي بدأت من حوالي ٤ سنين تقريبا انا علي قد حالي باكل لقمتي بالحلال شاب بسيط زي اي حد عندي واحد صاحبي اسمه محمود
محمود ده عنده اخت من وقت للتاني بيقولي أنها تعبانه وبتعمل تصرفات غريبه ومش طايقه تقعد في البيت وبتحلم احلام غريبه المهم انا مش متطفل فكنت بقوله ربنا يشفيها من غير ما اقترح عليه حل ،الامر ده استمر مع اخت صاحبي فتره لدرجه ان والد صاحبي ده عرض البيت للبيع علشان يخرجوا من الجحيم ده لان اوقات كتير البنت تقعد تصوت وتبقا مش طايقه اخوها وشيفاه مره بشكل شيطان ومره قرد المهم ناس من الجيران قالوا لوالد البنت اعرضها علي شيخ واحنا نعرف شيخ كويس من بلد جنبنا
نفد الوالد كلام الجيران وجاب الشيخ واللي كان اسمه فوزي دخل علي البنت وقرا عليها وقالهم بنتكم بتحلم بعرايس وبيلفوا حواليها
رد الاب والام :ايوا بتحلم الحلم ده كتير
الشيخ فوزي :قالهم العرايس اللي بتحلم بيهم بنتكم دول عرايس دهب من مقبره فرعونيه والمقبره دي تحت البيت وعمار المكان بيبعتوا رسائل عن طريق البنت علشان تخرجوا المقبره والعرايس الدهب
الاب والام والابن اللي هو صاحبي في حاله ذهول
الابن قال :مقبره ايه يا عم انت بتقول اي كلام وخلاص
الشيخ فوزي رد عليه :قال شايف كل حاجه في المقبره بعيني دلوقتي وانتوا براحتكم ولو حبيتوا بنتكم ترجع طبيعيه لازم المقبره دي تتفتح وعموما انا مستعد لكل تكاليف الحفر لحد لما نطلع الخير اللي في المقبره وهسيبكوا يومين تفكروا مستني قراركم
سيد مصطفيبيت محمود اللي هو صاحبي أنقسم في الرأي
الام موافقه بقلب جامد أنهم يحفروا ويخرجوا الخير اللي في المقبره وتتغير حياتهم ٣٦٠ درجه ويبقوا من الأغنياء وتضحكلهم الدنيا وكمان بنتها تخلص من اللي هي فيه
اما الاب كان معترض وشايف ان الراجل مش شيخ ده ساحر وأنه ده حرام وممكن يئذينا ومش هناخد من المقبره حاجه في الاخر ده هي موجوده فعلا
الابن محمود مش مصدق أن في مقبره إن الراجل ولا شيخ وساحر وبيقول اي كلام وخلاص
اليوم ده عدي عادي جدا وناموا
صحيوا الصبح علي صراخ محمود وهو بيقول الحقوني
جريوا عليه لقوا أخته معاها سكينه وعايز تقتله
حاولوا يهدوها تقول لازم اقتله علشان اخلص من اللي انا فيه
هديت بالعافيه بعد الجيران اتلمت وما هربوا اخوها من البيت هديت بدأت تشاور علي اماكن في البيت وتقول هما موجودين هنا
هما موجودين هنا الكل متنح ومحدش فاهم حاجه
الاب قال للناس خلاص يا جماعه شكرا ليكم وبدأ يخرج الناس بره البيت
الاب في حيره وفي حاله لا يحسد عليها
الام: مش قولتلك لازم تجيب الشيخ فوزي علشان نخلص من الهم ده
ولا عايز تفضل مستني لما تموت حد فينا
الاب :يا ستي ده مش شيخ ده ساحر وممكن يسيطر علينا كلنا
انتهي الحوار بين الأب والام وهما في حاله حيره وخوف من المجهول ولكن كانت الأم مصره علي أن لازم الشيخ فوزي يجي ويخرج المقبره وبنتها تتعالج .الاب في حاله غليان مش عارف يجيب الشيخ فوزي ويشارك باستخدام السحر ولكنه اخد القرار انه هيتصل بالشيخ فوزي يقوله ان احنا مش هنخرج حاجه من تحت البيت
وفعلا اتصل بالشيخ فوزي
..ايوا يا شيخ فوزي احنا فكرنا ومش هنحفر ..وبنتا ربنا وحده قادر يشفيها
الشيخ فوزي؛براحتك يا حاج انا كنت عايز الخير ليك ولينا كلنا وقفل السكه
حسيت أن جبل من علي صدري اتشال وقعدت ادعي ربنا يشفي بنتي طول الليل ،صليت الفجر ونمت
ولكن قلقت علي صوت التليفزيون
مين اللي مشغل التليفزيون في الوقت ده والصوت عالي جدا
قمت علشان اشوف مين اللي مشغل
التليفزيون لقيت بنتي مشغله قناه مسيحيه ومركزه جدا معاها بقولها الصوت عالي جدا يا بنتي والوقت متاخر وانتي مشغله القناه دي ليه
بصلتي بنظره حاده عينيها مبرقه وكلها غل وقالتلي علشان ربنا يهدينا
ماشي يا بنتي بس دي قناه مسيحيه بصتلي ومردتش
احنا مؤمنين بربنا وبنحب نسمع عنه في أي دين ولكن ده شئ غريب ومخيف
قولتلها طيب اتفرجي علي اللي انتي عايزاه بس وطي الصوت شويه ،الجيران هتشتكي ،مردتش
بصتلي نفس النظره انا خوفت بصراحه ودخلت انام
بس هنام ازاي وبنتي في الحال ده
قومت اشوفها اول ما النهار طلع
دخلت الأوضه مش لاقي حد خالص هي راحت فين !!
دورت في البيت كله مش موجوده خرجت بره البيت زي المجنون بسأل الناس عليها
حد قالي :انا شوفتها وهي داخله الكنيسه
انا قولت :داخله الكنيسه!!!
بقلمي 
سيد مصطفي
سيد مصطفيالمقبره الفرعونيه
الجزء الثالث
دخلت الكنيسه بعد ما فهمت الأمن اللي واقف علي الباب وانا حاسس بإحراج شديد ومش عارف هدخل الاقيها بتعمل ايه؟
لقيتها واقفه بثبات قدام صوره السيد المسيح روحت عليها قولتلها خرجتي من غير ما تقولي ليه يا بنتي وايه اللي جابك هنا ؟
بصتلي وقالتلي امشي امشي
بعدت عنها ورحت للقس الموجود في الكنيسه حاولت أفهمه قالي متقلقش انا هتكلم معاها
وفعلا راح عندها واتكلم معاها شويه وشاورلي
روحتله وانا بجري في لهفه
قالي بنتنا هتروح معاك وهتبقي كويسه وبصلها وقالها مش كده
حركت رأسها بالموافقه علي كلامه ومشيت معايا
روحت بيها امها من كتر القلق عليها واقفه في الشارع مستنياها اول ما شافت امها جريت عليها وحضنتها
انا قولتلهم ندخل جوه
دخلنا وقعدت معانا بقت هاديه بس بتنجنب الكلام معايا وجاه علينا الليل ودخلنا ننام انا دخلت انام وحسيت اني اطمنت شويه قبل اذان الفجر قمت علشان اتوضا واصلي الاقي بنتي مشغله نفس القناه بس مش معليا الصوت قولتلها عامله ايه
بصتلي وكانت مكان عينيها فاضي من غير عيون
انا اتسمرت مكاني حسيت من الرعب أن عيني هتخرج من وشي من هول اللي انا شوفته وبعد لحظات رجعت تاني طبيعيه ،انا الخوف اتملك مني رجعت علي السرير وانا مش مدرك اللي انا شوفته مش عارف اقوم اشوف فيها ايه ولا هعرف انام
انا بنتي جرالها ايه ؟!!
ايه اللي بيحصل لنا ده ؟!!
استنيت لما طلع الصبح حاسس ان قلبي هيقف من الخوف قولت لازم اتكلم مع حد ابني عند اخويا هربان منها صحيت امها وحكيت لها علي اللي شوفته قامت امها جريت عليها لقيتها قاعده نفس القاعده ومشغله نفس القناه ولكن طبيعيه جدا كلمتها قالتها انتي كويسه ؟
ردت عليها :انا كويسه بس هما موجودين هنا وبيلفوا حواليا
انا حسيت أن الموضوع بيكبر ومش فاهم ايه السبب
لازم فعلا ننفذ كلام الشيخ فوزي ونحفر تحت البيت ودي كلها علامات علشان انا معترض؟
ولا الشيخ اللي هو مش شيخ اصلا عمل حاجه في بنتي؟
الاب في حيره كبيره لو ساب بنته بالوضع ده الله اعلم ايه ممكن يحصل ايه تاني ومفيش قدامه حل غير الشيخ فوزي وبالمناسبة احنا عرضناها علي شيوخ كتير قبل الشيخ فوزي ومحدش عرف يعالجها
اعمل ايه: يا رب ….
فجاه دخلت عليا بنتي الأوضه امها كانت في المطبخ
..انا متأهب لقيتها قعدت جنبي علي السرير وبكل هدوء
قالتلي :بابا انا عايزه اخف عايز أخرج من اللي انا فيه ده ..
خدتها في حضني قعدت تبكي وانا بحاول أهديها مش عارف أهديها ولا اهدي نفسي وعقدت النيه اني لازم بنتي تخف حتي لو هحط ايدي في ايد الشيطان نفسه …
ساحر بقا شيخ، جن ، المهم بنتي تخف
اتصلت بالشيخ فوزي قولتله:ايوا يا شيخ فوزي انت متاكد ان بنتي هتخف لما نلاقي المقبره
الشيخ فوزي:كله بمشيئه الله ،انا مش بقول اي كلام وخلاص وانت هتشوف بنفسك. نتوكل علي الله ونبدا…
الاب بصوت كله خوف: توكلنا على الله
هنحتاج شويه معدات وشويه ادوات انا هوفرها بس محتاجينك تقنع ابنك محمود أنه يشارك معانا في الحفر لان لازم اللي يشارك معانا يبقي محل ثقه واحنا هنجيب معانا رجاله تساعده
الاب :انتوا هتجيبوا انت مش هتبقي لوحدك يا شيخ فوزي
الشيخ فوزي: لا هيبقي معايا واحد تاني اسمه الشيخ جمال
الاب :وده ليه يعني
الشيخ فوزي: علشان نقدر نسيطر علي المكان كله ومحدش مننا يتئذي لان الرصد في المقبره قوي جدا
الاب :ايه الرصد ده
الشيخ فوزي:الرصد هما حراس المقبره ……
الأب: دلوقتي انا هرجع محمود البيت ازاي ده اخر مره أخته شافته فيها كانت هتقتله ؟
الشيخ فوزي:هي كانت هتقتله ،متقلقش، سيب الموضوع ده عليا
انا كلمت محمود وفهمته كل اللي حصل لأخته من وقت ما ساب البيت لحد كلامي مع الشيخ فوزي وقولتله إنه لازم يكون موجود في البيت معانا علشان هنبدا الحفر
محمود قال:انت عايزها تموتني انت نسيت هي كانت هتعمل فيا ايه
قولتله افهم يا بني انا الشيخ فوزي مأكدلي أنه مش هيخليها تئذيك
محمود :دلوقتي بتقول عليه شيخ مش ده اللي كان ساحر انا مش هرجع …..
بعد ما اتكلمت ما ابني محمود حسيت أنه كلامه صح وان أنا مقتنع أنه الشيخ فوزي ساحر مش شيخ طيب بس بنتي هعمل معاها ايه ومفيش قدامنا حل تاني الوضع بيسوء معاها وانا مش هفضل مكتوف الأيدي ومعملش حاجه
كلمت الشيخ فوزي
الاب :ايوا يا شيخ فوزي ابني محمود رافض يشارك معانا وخايف من أخته وهو حقه انا مش بلوم عليه البنت حالها بيتغير في ثانيه
الشيخ فوزي قالي :وانا مش هسيبها تئذيه اديني رقم محمود وانا هاقنعه
الاب :تقنعه بايه ياشيخ فوزي ده هو مش مقتنع انك شيخ اصلا
الشيخ فوزي :معلش حضرتك اديني الرقم وسيب الباقي علي الله ثم عليا
الاب :ماشي خد الرقم اهو
خلصت المكالمه بيني وبين الشيخ فوزي وانا بضحك في نفسي واقول يقنع محمود
ده محمود لو سمع صوته ممكن يهذئه ويشتمه هو حر ياخد اللي في النصيب منه ده ابني وانا عارفه ..
رحت اطمن علي بنتي لقيتها مع امها وقاعدين في هدوء تام قلت الحمد لله ربنا يهديكي يا بنتي لقيت بنتي بتقولي هو محمود خايف مني انا مش هعمله حاجه خليه يجي
قولتلها وانا مرتبك : لا هو مش خايف منك ولا حاجه هو جاي ان شاء الله هو بس مع عمه وقالي أنهم هيباتوا يومين في الشغل
بصت في عيني ..وقالتلي متكدبش عليا هو قالك أنه مش هيرجع تاني
انا هنا بان عليا الارتباك اكتر وبصيت بعيد عن عنيها وكأني طالب يقف أمام مدير المدرسه الذي يرتعب منه ويخاف أن يعاقبه أن كذب عليه
قولتلها بصوت خافت وخوف من عاقبه كدبي عليها :صدقيني يا بنتي انا مش بكدب عليكي
فضلت مثبته نظرها عليا لثواني وانا باعد عيني عنها وخايف من العواقب
حاولت أتوه مع مراتي وسالتها علشان تبعد نظرها عني
وانتوا عملتوا العشاء ولا لسه؟
ردت عليا الحاجه وبدأت تتكلم وانا قاعد معاهم وعقلي شارد بعيد هي عرفت منين ان اخوها مش عايز يرجع تاني؟ انا كنت بتكلم في غرفه بعيده عنها وصوتي كان واطي جدا وبدأت الاسئله تدور في دماغي بدون أي اجابات …..
دخلت نمت وقرأت قران كتير قبل ما انام علشان دماغي تقف عن التفكير
صحيت على تليفوني بيرن الشيخ فوزي بيرن عليا
…الو السلام عليكم ايوا يا شيخ فوزي
…ايوا يا بابا انا محمود
… الاب :محمود مين
محمود : محمود ابنك انا هجيلك انهارده أنا والشيخ فوزي علشان نبدأ الحفر
انا خلصت المكالمه مع محمود ابني وحاسس اني بحلم هو ابني محمود ده اللي كلمني ولا انا بيتهيألي هو الشيخ فوزي اقنعه إزاي؟؟
لا وكمان بيتكلم من تليفونه انا مبقتش فاهم حاجه خالص
خرجت لقيت بنتي قاعده في الصاله
قولتلها :محمود جاي انهارده اهو علشان متقوليش اني بكدب عليكي
بصت في عيني
وقالتلي :جاي لوحده
قولتلها بإرتباك :اه ..لا.. جاي مع الشيخ فوزي اللي جه قبل كده وقرأ عليكي قران
وطول ما انا بتكلم معاها بصه في عيني زي ما كون تحت جهاز كشف الكذب
ردت عليا وقالتلي :الشيخ فوزي ماشي
وكانت ملامح وشها ثابته لا انا فاهم هي زعلانه ولا فرحانه
بعد مرور ساعتين
الباب بيخبط قولت لبنتي ومراتي ادخلوا جوه علشان ممكن يبقي الشيخ فوزي
فتحت الباب لقيت ابني محمود والشيخ فوزي
بس محمود شكله متغير
اتفضلوا اتفضلوا
قعدوا
الاب : عامل ايه يا محمود
محمود :الحمد لله يا بابا
محمود قاعد يبص علي اركان الأوضه
الاب :هو في حاجه يا محمود انت كويس
الشيخ فوزي رد: هو محمود متوتر شويه بس من وقت اللي حصل بينه وبين أخته وهو كان خايف يجي بس انا كلمته وطمنته أن مفيش حاجه هتئذيه
طيب الحمد لله أنه رجع وان شاء الله ربنا ميجبش حاجه وحشه
الشيخ فوزي قالي انا هكتب شويه طلاسم ورموز علي الحيطه والسقف علشان اعمل حمايه للمكان
انا قولتله وانا مغلوب علي امري :ماشي اللي انت شايفه
بدأ يرسم الرموز علي الحيطه والطلاسم وانا حاسس ان قلبي بينقبض
قالي فين الأوضه اللي بتنام فيها بنتك قولتله هنا بس هما موجودين جوه
قالي خلاص خرجهم من الأوضه وندخل نكمل لان دي اهم اوضه
دخلت علي مراتي وبنتي قولتلهم اخرجوا علشان محتاجين ندخل الأوضه دي
خرجت مراتي ورمت السلام عليكم
ردوا وعليكم من السلام
خرجت بنتي واول ما شافت الشيخ فوزي فضلت تزوم عليه وعنيها مبرقه وهتطق شرار
هو مبصش عليها وقعد يقرا في سره حاجات مش مفهومه وبدأ يشاور علي الطلاسم اللي علي الحيطه انا شايف الطلاسم اللي بيشاور عليها بتنور !!!!
حاسس ان رجلي مش قادر اقف عليها
وعيني بتزغلل ومش شايف كويس
وفجاه وقعت علي الارض..
بقلمي سيد مصطفى
سيد مصطفىالمقبره الفرعونيه
الجزء السابع
يلا بينا…
وقعت علي الارض وفقدت الوعي
وبدأت افتح عيني لقيت الشيخ فوزي وابني محمود ومراتي حواليا
الام :اهو بدأ يفوق الحمد لله
الشيخ فوزي:حمد لله على السلامه
الاب :انا إيه اللي حصلي ؟؟
الاب :لا مخدتوش بس اللي حصلي ده مش من الضغط انا شوفت بنتي مبرقه للشيخ فوزي ولقيت الشيخ فوزي بيقرأ حاجات مش مفهومه وبيشاور علي طلاسم علي الحيطه وفجاه الطلاسم نورت
انا حسيت كأن في حرب بتحصل ومره واحده كأن صاعقه نزلت علي راسي وبعدها مدرتش بالدنيا
هي فين بنتي ؟؟
الام : البنت في الأوضه الشيخ فوزي قرأ عليها ونامت
بس انا مشوفتش اللي انت بتقول عليه ده ممكن يكون بيتهيالك
انت شوفت حاجه من اللي قال عليها أبوك يا محمود؟؟
محمود :لا
الاب : أنتوا هتجننوني انا شوفت كل ده بعيني مش صح يا شيخ فوزي ولا انا اتجننت
بس المهم أن بنتك في حد بعت لها جن مسيحي وانا مش عارف ليه
هو مرديش يبوح بكل اللي عنده فأنا سبته وقلت المهم أن البنت تهدأ واجي أشوف حصلك ايه ؟؟
الام :جن مسيحي إزاي ومين هيعمل فيها كده ؟؟
وانا مشوفتش اي حاجه من اللي انتوا بتقولوا عليها أنها حصلت
البنت كانت ماشيه معايا عادي وخرجنا من الاوضه !!
الشيخ فوزي:انا بقولك أن كل اللي شافه الحاج حصل والتفسير الوحيد لأنه شاف ده أن في بعض الأشخاص بيبقي عندهم طاقه روحانيه بتخليهم يشوفوا حاجات غيرهم ميقدروش يشوفها ومفيش تفسير تاني
الاب :بس انت بتقول أن بنتي حد بعت لها جن مسيحي ومين اللي هيعمل كده وليه ؟؟
الشيخ فوزي:ليه ؟؟؟هو ده السؤال اللي مش هسيبه غير لما أعرف إجابته
بس انا لما قريت عليها عرفت أن هو من الجن المارده والموضوع مش هيبقي سهل بس متقلقش الله المستعان
أسيبك يا حج علشان ترتاح عايزك تشد حيلك علشان بكره هجيب الرجاله ونبدا حفر سلام عليكم
********
الشيخ فوزي مشي وانا بدل ما كان عندي هم بقوا جبل هموم مراتي قامت علشان ارتاح
قعدت أفكر هو ليه حد يبعت جن مسيحي لبنتي ومين؟؟ احنا عمرنا مأذينا حد وبنتي من أطيب خلق الله والناس كلها بتحبها
بس ده ممكن يفسر سبب أنها كانت بتشغيل قنوات مسيحيه وانها راحت الكنيسة!!!
وابني كمان اللي حاله متغير ومش فاهم ماله
وسيل من الاسئله اللي كانت هتجنني
بصت للحيطان لقيت الطلاسم والرموز والأشكال الغريبه مغرقه الحيطه حسيت بضيق في صدري ودماغي بدأت توجعني من كتر التفكير ودخلت في النوم زي المغمي عليه
نمت وحلمت حلم غريب انا وبنتي ومحمود ابني في مركب بالليل في عرض البحر معرفش احنا رايحين فين ولا جايين منين
شكل البحر بالليل مخيف وبدأ الموج يزيد والمركب بدأنا نفقد السيطره عليها الموج بيزيد اكتر وحسيت بصوت خبط من تحت المركب الخبط زاد المركب بتتهزر وكان حد عايز يقلبها ومره واحده لقيت بنتي وقعت في المايه
انا زي المجنون أاااالحق يا محمود أختك بتغرق ومحمود ابني واقف متسمر مكانه وبنتي بترفع أيدها وتقول ألحقني يا بابا وهي بتغرق ومحمود هو الوحيد اللي بيعرف يعوم قعدت أهز في جسمه واقول له وأنا بصرخ في وشه يااا محمود أختك بتغرق ومحمود ابني مبيتحركش وزي ما يكون حد منيمه تنويم مغناطيسي انا مبقتش عارف اعمل ايه !!
ملقتش حل غير اني ارمي نفسي في المايه وانا مبعرفش أعوم وفعلا نزلت المايه كنت بحاول اسيطر علي نفسي ولكن مقدرتش وفضلت أطلع وأنزل ..كنت بغرق وحسيت أن روحي بتتسحب مني
قومت من النوم مفزوع وانا باخد نفسي كاني كنت بغرق فعلاً أعوذ بالله ايه الكابوس ده
ايه الكابوس ده
ايه الحلم الغريب ده هو غريب لاني كنت في الحلم مبعرفش أعوم علي الرغم من إني بعرف أعوم كويس جداً وانا اه راجل كبير بس دي حاجه الواحد مبيفقدهاش حتي لو بقا عمره ١٠٠سنه ليه كنت مش عارف أعوم وغرقت ؟؟؟
وليه ابني كان طالع بالمنظر ده في الحلم واقف متسمر مكانه وهائم علي وجهه مش بيرمش حتي وكأنه مش معانا !!!
وبنتي ليه مندهتش علي محمود علشان ينقذها وندهت عليا انا بس !!!
انا خلاص دماغي هتنفجر من التفكير
اذان الفجر
هقوم أصلي بس أصلي إزاي في وسط الطلاسم دي انا بيتي بقا عامل زي بيت عبده الشيطان
انا هصلي في البلكونه ده المكان الوحيد اللي مفيهوش طلاسم علي الحيطان
روحت أتوضا وبصيت علي بنتي في اوضتها لقيتها نايمه زي الملائكه بنتي زي القمر ومن جميلات القريه أن مكنتش أجملهم ربنا يشفيها بس موضوع الجن المسيحي ده هيجنني
انا اول ما النهار يطلع هتصل بالشيخ فوزي يجي واشوف حكايه الجن اللي علي بنتي ده علشان اتاكد هي فعلا عليها جن مسيحي
طلع النهار
اتصلت بالشيخ فوزي
…ايوا يا شيخ فوزي انت هتيجي أمتي
… انا قدامي ساعه واجيلك أنا والشيخ جمال
…تمام انا عايز احضر معاك وانت بتحضر الجن المسيحي اللي بتقول أنه علي بنتي
…بلاش يا حاج علشان ميحصلكش حاجه تاني
…لا انا لازم ابقي معاك علشان افهم ايه الموضوع ده
…تمام اللي يريحك
بعد ساعه
وصل الشيخ فوزي والشيخ جمال ولكن الشيخ جمال كان شكله مريب شويه ملامح وشه تخوف ملامح حاده لو هتقولي ليه هقولك معرفش هو إحساس
المهم دخلوا
الشيخ فوزي: قالي الرجاله هتيجي اخر النهار واحنا من انهارده هنقيم معاك في البيت علشان مش هينفع نفضل ندخل ونخرج كل شويه وخصوصا أن في ناس تعرفني هنا في الشارع وهما اللي دلوك عليا وهيبقي الخروج في اضيق الحدود ممكن انا أخرج وادخل علي فترات بحجه اني باجي ادي جلسات لبنتك
انما الشيخ جمال والرجاله وهما اتنين مش هينفع يدخلوا ويخرجوا كل شويه علشان محدش يحس بحاجه ويبلغ عنا
الاب :مفيش مشكله البيت كبير وتقدروا تقعدوا في شقه محمود في الدور اللي فوق
الشيخ فوزي :تمام
الاب :دلوقتي انا هاصحي بنتي من النوم علشان نشوف قصه الجن اللي عليها ومين بعته
الشيخ فوزي:تمام صحيها
انا دخلت صحيت بنتي قولت للشيخ فوزي اتفضل
وبدات الطلاسم في الاوضه تنور وانا متماسك بالعافيه وأقرأ قران وأقرأ قران في سري لحد لما بنتي بدأت عنيها تبرق بشكل غير طبيعي وسابت الشيخ فوزي وهجمت عليا وقالتلي بصوت مخيف اسكت اسكت …
انا جسمي كله نمل من الخوف أعصابي مش ملموم عليها قاعد ابصلها وانا مرعوب ومش قادر ادي اي رده فعل إتخشبت حرفيا
الشيخ فوزي قالها خليك معايا انا
قامت قالتلته بصوت غريب عن صوت بنتي : انت عايز ايه ؟؟
الشيخ فوزي:انت اللي عايز ايه منها وجيت ليه ومين اللي بعتك
رد عليه وقاله انت مش هتعرف مني اي معلومه تاني غير اللي انا قولتلك عليه انا جن مسيحي وانا من الجن المارده من الملوك
الشيخ فوزي :مين اللي بعتك
الجن :بقولك مش هقولك حاجه تاني
الشيخ فوزي :انا بأمرك انت متعرفش انا مين واقدر اعمل ايه ؟؟
انا شايف المشهد ده قدامي وحاسس إني بحلم
وبعد مشادات بينهم وتحدي ووعيد بدأ الشيخ جمال والشيخ فوزي يقروا كلام غريب ورسم الشيخ فوزي علي الارض رموز وأشكال غريبه ،،وفجاه الرسوم طلعت طاقه نار انا اترعبت…
بدأ الجن يقوله انا هتكلم بس مش هخرج منها ولا هقولك مين اللي بعتني بس هقولك حاجه مهمه ليك
انا اللي بعتني.. بعتني ليها علشان أوقف الحفر اللي أنتوا هتبدأوا ..
بقلمي سيد مصطفى
سيد مصطفىمن هنا احداث القصه هتاخد مسار مختلف
انا هقولك علي حاجه مهمه ليك ..انا اللي بعتني ..بعتني علشان اوقف الحفر اللي انتوا هتبدأوا فيه
الجن قال الكلمتين دول علي لسان البنت وبعدها البنت إترمت علي السرير وبدأت تتشنج بشكل غريب وبعدها أغمي عليها
انا جريت علي بنتي
الشيخ فوزي قالي أهدا هتبقا كويسه قرأ عليها وقالي اعدلها هي نايمه دلوقتي وقال يلا نطلع بره
عدلت جسم بنتي وغطتها وخرجنا
انا سألته معناه ايه الكلام ده يا شيخ فوزي أن اللي بعته مش عايزنا نبدأ الحفر
الشيخ فوزي قال معناه أن في حد عرف بإننا هنبدأ حفر والحد ده إستعان بساحر وعرف بموضوع المقبره وعايز يوصل للمقبره قبلنا والحد ده أكيد ومن دون شك هو حد من الجيران اللي حوالينا والساحر بعت جن من المارده للبنت لان هي اللي عندها كل علامات وطرق الوصول للمقبره لان عمار المكان بيبعتوا عن طريق البنت رسايل الوصول للمقبره وبكده يبقا عطلنا وبدل ما تبقا البنت معانا تبقي ضدنا
احنا دلوقتي بقا عندنا عقبتين
الاولي من الجن اللي مع البنت واللي واضح أنه قوي وهيتعبنا
والتانيه أن احنا لازم نسابق الوقت ونوصل للمقبره قبل ما حد يوصل قبلنا فلازم نبدأ حالا
الشيخ فوزي قالي هطلع للرجاله اقولهم يجهزوا وقول يا حج لمحمود يجهز وانت برضه كمان علشان هتشارك معانا
انا سألت هشارك معاكم في ايه انا راجل كبير مقدرش أشتغل
_وانت هتحفر معانا يا شيخ فوزي
= لا ..انا والشيخ جمال هنبقا علي بوابه الحفر علشان نحميكم ومحدش منكم يتأذي
وفعلا جهزنا كل حاجه وبدأنا الحفر من غرفه معينه حددها الشيخ فوزي وخرجنا أول شوال من التراب مكان الحفر لقيت الشيخ فوزي قال للشيخ جمال أبدأ
والشيخ جمال قعد يكتب علي الشوال طلاسم ورموز
قالي علشان نحافظ على اللي احنا حفرناه
قولتله مش فاهم
قالي لان احنا ممكن بعد ما نحفر نقوم الصبح نلاقي كل اللي احنا حفرناه رجع تاني ولا كأننا عملنا حاجه
بصتله بإندهاش وقولتله انت بتتكلم بجد ولا بتهزر
قالي بملامحه الحاده انا مبهزرش احنا في ساحر بيحاول يعطلنا ولازم نعمل حساب كل حاجه
انا هنا سكت وسيبته ورحت أكمل حفر
وفضلنا نحفر انا ومحمود ابني اللي مش فاهم ماله ومعانا اتنين واحد اسمه صفوت وهو في الاربعين من العمر والتاني اسمه حلمي وده في التلاتين من العمر
الحاجه جابت الغدا أكلنا واحنا بنشرب الشاي عرفت من كلامي معاهم أنهم بيشتغلوا من زمان مع الشيخ فوزي ولكن باليوميه وملهمش دعوه بايه هيخرج من المقبره والشيخ فوزي بيدينا إختيار اما أننا نحفر معاه للأخر بدون مقابل ونشارك في الخير اللي بيطلع من المقبره او نشتغل باليوميه واحنا كنا بنختار الشغل باليوميه وده لسبيبن
الاول الموضوع ده بياخد وقت كبير ممكن شهور واحنا مش هنقدر نشتغل كل الفتره دي من غير مقابل لأننا محتاجين فلوس علشان نقدر نعيش عندنا مسئوليات وزوجه واولاد
السبب التاني لان ممكن بعد كل الحفر ده كله منلقيش حاجه
انا قولتلتهم يا سلام يعني ممكن بعد الحفر منلقيش حاجه
رد صفوت: ممكن… في ناس كتير بتحفر وفي الأخر مبيلقوش حاجه وفي ناس تحفر وتلاقي وتتغير حياتهم تماما
رجعنا للحفر تاني
وبدانا نخرج شوال ورا شوال والشيخ جمال يرسم الرموز ويكتب الطلاسم وتترص بطريقه معينه
والشيخ فوزي قاعد يعزم ويقول كلام مش مفهوم
وفجاه لقينا نار قامت في شوال واحنا لسه بنملاه احنا مش عارفين جت منين النار و لا ايه مصدرها وبدأنا نطفي فيها بالتراب اللي خارج من المقبره ولكن مش عايزه تنطفي وتحس انها بتزيد وهنا الشيخ فوزي والشيخ جمال قعدوا يقروا بصوت اعلي لحد لما النار خمدت وانطفت
صفوت قال للشيخ فوزي اول مره يحصل معانا حاجه زي كده المكان أمان يا شيخ فوزي ولا احنا في خطر
الشيخ فوزي قال في أمان متقلقش
بس في خطوتين لازم نعملهم علشان نبقي في أمان فعلا
الخطوه الاولي لازم كل الاشوله اللي معانا نكتب عليها الطلاسم قبل ما نستخدمها
والخطوه التانيه لازم نسيطر أكتر علي المارد اللي مع بنتك يا حاج
صفوت وحلمي في نفس واحد ….هو في مارد مع بنتك يا حاج ؟؟؟
بقلمي سيد مصطفى
سيد مصطفىالمقبره الفرعونيه
الجزء الثاني
صفوت وحلمي في نفس واحد …انت بنتك عليها مارد يا حاج ؟؟؟
الشيخ فوزي :قال اه عليها مارد وانا هسيطر عليه متقلقوش
صفوت قال : بس احنا كده في خطىر يا شيخ فوزي وممكن يهاجمنا واحنا تحت في المقبره
الشيخ فوزي لسه هيرد عليه
فجاه هدوم صفوت ولعت وقامت النار في رجله من غير سبب وهو بيحاول يطفي نفسه مش عارف وحلمي قام جاب شوال وقام كاتم النار ولكن النار قامت تاني ومسكت في ايد حلمي والاب مش عارف يعمل ايه بيحاول يطفي النار مش راضيه تنتطفي الشيخ فوزي كان جانبه ازازاه مايه قرأ عليها بسرعه وقام رماها علي النار اللي ماسكه فيهم النار هديت وإنطفت
ولكن إيد حلمي ورجل صفوت إتصابوا بحروق قويه
بسرعه نقلناهم علي المستشفي والشيخ فوزي قال لصفوت وحلمي تكاليف علاجكم عليا واليوميه بتاعكم هدفعها لحد لما تقوموا بالسلامه وساب لهم مبلغ
ومشي
انا قولت للشيخ فوزي دلوقتي الموضوع بقا خطر وممكن حد مننا يتأذي كفايه لحد هنا وبلاش نكمل الموضوع ده
الشيخ فوزي قالي وهو كله غضب متقلقش انا هروح أحرق الجن اللي علي بنتك وانهي موضوعه ده
انا اول مره اشوفه بالغضب ده
قولتله :كفايه اللي حصل للناس مش عايزين الموضوع يكبر اكتر من كده
رد عليا انت مش عايز بنتك يخرج منها الجن ده وتخلص منه
قولتله ايوا بس
الشيخ فوزي من غير بس انا هخلصك منه
طلب الشيخ فوزي شويه حاجات من الشيخ جمال يحضرهاله
واللي كانت عباره عن صحيفه قديمه غريبه وعليها كلام مش مفهوم وبخور ومسك أسود وإزازه ميه
انا مغلوب علي أمري وافقت علشان بنتي يخرج منها الجن ده
دخلنا البيت الشيخ فوزي ولع عود البخور ريحته كانت غريبه وكان ماسك المسك في إيده والصحيفه في الايد التانيه وقالي هات بنتك
انا رايح أجبها ومرعوب دخلت علي بنتي
قالتلي ايه الريحه دي أطفي البخور ده وقالت انا هخرج اطفيه
وجريت علي بره من قبل حتي ما اقولها حاجه
لقت الشيخ فوزي في وشها قالتله اطفي البخور ده
قالها لا انت قدامك اختيارين اما تخرج منها أو هحرقك وقام حط من المسك الاسود علي انف بنتي
بنتي هنا اتحولت ملامحها بقا وشها شاحب زي الاموات وعنيها هتخرج من وشها
وقالت بصريخ مش هخررررررررج
قال خلاص يبقا انت اختارت الموت
بدأ يقرا في الصحيفة هو والشيخ جمال بصوت عالي الطلاسم كلها في السقف والحيطان نورت لقيت بنتي هجمت عليا ومسكت إيدي
حسيت جسمي زي ما يكون وصله كهربا وبدأت أتشنج بس واعي للي بيحصل حواليا
لقيته بيقول للشيخ فوزي لو مسكتش هسكن عشيرتي في ابوها وبدأت الكهربا تزيد في جسمي
الشيخ فوزي ولا كأنه سامع حاجه كمل قراءه هو الشيخ جمال وقام راشش بالميه علي وشها ووشي
وهنا انا فقدت الوعي
بعدها لقيت الشيخ فوزي بيفوقني وقالي قوم بنتك بقت كويسه
انا قومت بسرعه بس حاسس بصداع رهيب مش مخليني قادر أقف
الشيخ فوزي قالي أقعد
قعدت قدام بنتي بدأت تفوق امها دخلت علينا ومحمود ابني
انا سألتها انتي كويسه
قالتلي انا كويسه يا بابا وبدأت عينيها تدمع وإترمت في حضني
الف حمد وشكر ليك يا رب
الف حمد وشكر ليك يا رب
الشيخ فوزي بنتكم اللي كان عليها خرج منها .. كان بيحاول يهددني بس لما لقانا أقوى منه خرج وهرب دلوقتي نقدر نكمل الحفر بدون ما حاجه تعطلنا ولكن لازم نبدأ بسرعه
بقلمي سيد مصطفى
سيد مصطفىالمقبره الفرعونيه
الجزء الحادي عشر
الشيخ فوزي :احنا دلوقتي لازم نبدأ حفر بسرعه علشان نلحق نوصل للمقبره قبل ما أي حد يوصلها قبلنا
الأب : معلش يا شيخ فوزي وهو إزاي المقبره ممكن حد يوصل لها قبلنا أو حتي يوصلها بعدنا وهي تحت بيتنا مين هيقدر يدخل لتحت بيتنا واحنا عايشين فيه أكيد هنحس بيه
الشيخ فوزي : كلامك منطقي جدا بس اللي انت متعرفوش أن المقبره مش تحت بيتك بالظبط المقبره في الشارع
ولازم نعمل نفق تحت بيتك علشان نوصل لها وده اللي خلي المقبره متاحه للجميع ولازم نتحرك بسرعه
ونوصل للمقبره من أقصر الطرق وده اللي هتبلغنا بيه بنتك
الاب : يعني المقبره مش تحت البيت علي طول وهنعمل نفق كمان يوصلنا للشارع علشان نوصل للمقبره الموضوع هياخد وقت كتير ومجهود كبير
الشيخ فوزي :وعلشان كده مفيش وقت للكلام ولازم نتحرك في أسرع وقت
الاب : بس احنا عددنا قليل مفيش غيري انا ومحمود
الشيخ فوزي ما هو محمود هيجيب لنا ٢من أصحابه بس أهم حاجه ميكنش طبعهم الغدر وتكون ظروفهم الماديه صعبه ومحتاجين أي شغل هيقولهم في مصلحه عندي في البيت بس من غير ما يقولهم أي تفاصيل وانا هقابلهم وهاتكلم معاهم وهافهمهم القصه كلها ,بس أهم حاجه يا محمود محدش منهم يفهم منك أي نوع المصلحه اللي هما جايين ليها سيبني انا اكلمهم , تمام يا محمود
محمود: حاضر يا شيخ فوزي
الأب : وانت هتجيب مين من أصحابك يا محمود ؟؟
بص قول ليحيي وإبراهيم دول طيبين ومش هيغدروا بينا وحالتهم الماديه زفت
محمود : خلاص ماشي هقولهم
الشيخ فوزي: أهم حاجه زي ما قولتلك متقولش ليهم أي تفاصيل
محمود : حاضر يا شيخ فوزي
وفعلا راح محمود عند أصحابه يحيي وإبراهيم
ومن هنا انا هكون معاك في القصه انا يحيي اللي كنت بحكيلك القصه في اول جزء
واللي يا ريت ما كنت دخلت فيها
دخل علينا محمود
انا وإبراهيم كنا قاعدين علي القهوه ودار الحوار ده
محمود: عاملين ايه يا رجاله
يحيي: الحمد لله علي كل حال
ابراهيم :انت كنت فينك يا محمود بقالك فتره مختفي
محمود :كنت مشغول شويه وايه اخبار الشغل معاكم
يحيي :مفيش شغل واحنا زي ما انت شايف قاعدين طول اليوم علي القهوه
محمود:طيب في مصلحه حلوه تعالوا معايا البيت نشرب الشاي مع بعض وانا هفهمكم كل حاجه
ابراهيم :طيب ما تقول ما احنا مع بعض أهو
محمود :مينفعش الكلام هنا تعالوا وهتفهموا كل حاجه
يحيي:هو سر يعني مالك يا محمود ما تنجز
محمود :يا جدعان والله الموضوع مش هينفع اتكلم فيه هنا احنا نروح عندي في البيت نشرب كوبايه شاي وهتفهموا كل حاجه
يحيي خلاص ماشي هنروح معاك ياعم لما نشوف أخر الموضوع بتاعك ده ايه
محمود : تمام يلا بينا
فعلا اتحركنا ورحنا بيت محمود دخلنا قعدنا ودخل علينا الشيخ فوزي والشيخ جمال ومن غير أي كلام
الشيخ فوزي :اذيك يا يحيي
اذيك يا إبراهيم
يحيي: مش تعرفنا يا محمود علي الأستاذ اللي عارفنا واحنا مش عارفينه
الشيخ فوزي قال بثقه :انت يحيي ساكن في شارع زغلول وبتشتغل في المباني والشغل واقف معاك اليومين دول
وانت إبراهيم شغال في مصنع ملابس وساكن في نفس الشارع مع يحيي ومتجوز والشغل مريح معاك
إبراهيم : ايه محمود انتي حكيت عننا للاستاذ
انا اسمي الشيخ فوزي وده الشيخ جمال ومحمود محكاش عنكم أي حاجه واسالوه اهو
محمود والله مقولتله حاجه عنكم
يحيي :وانت عرفت الحاجات دي عننا إزاي .. أنت مخاوي ولا ايه ؟!
الشيخ فوزي :اه بس في الخير
يحيي: في الخير ازاي يعني ؟!
يحيي: خير فين الخير ده ؟!
الشيخ فوزي في مقبره فرعونيه تحت البيت هي مش تحت البيت بالظبط ولكن هي موجوده هنا واحنا هنكمل حفر علشان نوصل للمقبره وانتوا هتشاركوا معانا وانتوا عندكوا إختيار اما تشتغلوا باليوميه وتاخدوا أجر وفي الحاله دي أي حاجه هتخرج من المقبره مش هيبقي ليكوا نصيب فيها
او تشتغلوا معانا بدون مقابل وهتاخدوا مبلغ بسيط مصاريف يعني واحنا مش هنطول لان احنا مستعجلين واللي هيخرج من المقبره هتشاركوا معانا في الخير اللي هيطلع منها
احنا كنا متنحين مش عارفين ايه الكلام ده
يحيي : انت بتتكلم جد ولابتهزر
الشيخ فوزي : انا بتكلم جد وانا مش بتاع هزار ومعنديش وقت للكلام ده ….عايز ردكم حالا موافقين ولا لا وافتكروا أن بعد ما الخير يطلع من المقبره انتوا حياتكم هتتغير تماما يعني الواحد منكم هيعيش حياه تانيه خالص لان في البدايه في خمس عرايس دهب ودي هديه المكان وده غير اللي داخل المقبره واللي هيكون كنز احنا لسه هنكتشفه
انا بصراحه سرحت بخيالي وقولت لو قدرنا نوصل فعلاً للمقبره دي هتبقا حياه الواحد عامله إزاي والطمع إتملك مني وزي ميكون كلامه سحرني
انا ردت : انا معاك
الشيخ فوزي:وانت يا إبراهيم
ابراهيم رد :وانا كمان معاك
قالنا خلاص تمام هنبدا الحفر انهارده علشان مفيش وقت
احنا فعلا بدأنا نحفر ولقيت الطلاسم اللي شكلها غريب والاشوله اللي مكتوب عليها الطلاسم وسالت كل الاسئله عن كل الحاجات الغريبه اللي حواليا ايه الطلاسم دي ؟؟ليه الاشوله عليها طلاسم ؟؟؟ جاوبوا عليا نفس الاجابات اللي اتقالت كلها قبل كده واتحكتلي القصه من اولها لحد وقتنا الحالي وانا كنت متحمس بس في نفس الوقت حاسس بخوف وكنت كل شويه اقول أذكار في سري وانا شغال الاقي الشيخ فوزي يقولي متقلقش مفيش حاجه هتأذيك
انا اقول في نفسي هو سمعني إزاي ده انا بتكلم في سري فاقوله لا انا مش خايف
والشيخ جمال كانت ملامحه حاده ومنطقش كلمه من ساعه ما جينا وانا مش عارف حد غير محمود ومحمود متغير وتحسه فيه حاجه فالجو المحيط بينا كان مخيف
وعرفنا من الشيخ فوزي أن احنا هنعمل نفق تحت البيت علشان نوصل لمكان معين وهو اللي فيه المقبره
خلصنا حفر في البيت ودلوقتي هنبدا نعمل النفق اللي هيوصلنا للمقبره و احنا هنا هنحفر بشكل عرضي بحيث نعمل نفق يسمح لشخص واحد أنه يمشي فيه علي إيده وركبته وفعلا بدانا نفتح النفق ودخلت جوه النفق وأول ما دخلت النفق شوفت جماجم كتير قدامي حسيت أن الجماجم ظهر لها عيون وبتبصلي وبدأت أتخنق ..الأكسجين مش واصل…
فضلت أكح وقولت بصوت مبحوح
خرجوني بسرعه من هنا ..خرجوني بسرعه
بقلمي سيد مصطفى
سيد مصطفىالمقبره الفرعونيه
الجزء الثاني عشر
الاول عايزك تتخيل معايا الوضع اللي احنا كنا فيه في الوقت ده احنا حفرنا تقريبا ٦متر في البيت لتحت والشيخ فوزي هو والشيخ جمال علي أول الحفر من فوق ومبينزلوش تحت خالص أما انا وإبراهيم ومحمود وأبو محمود شغالين بالتناوب إتنين يشتغلوا جوه النفق وإتنين واقفين بره واللي يتعب يخرج يرتاح ويدخل حد مكانه بره ..وكان الدور عليا انا وإبراهيم وأول ما دخلت النفق من جوه والي كان طوله مترين تقريبا لقيت جماجم كتير وكأن بقا ليها عيون وبتبصلي وبدأت أتخنق.. وقولت طلعوني بسرعه
طلعوني بسرعه قام ابراهيم صاحبي واللي كان ورايا وبيحفر معايا ساحبني لبره بسرعه وابو محمود ومحمود ساعدوه لأنهم كانوا واقفين بره النفق شدوني بسرعه وخرجوني من النفق
الشيخ فوزي بصوت عالي من علي أول الحفر من فوق إيه اللي حصل ؟؟انا كنت حاسس بدوار شديد وصداع مش قادر أوصفه وبنهج زي ما أكون قطعت كيلو جري مش قادر أخد نفسي والكلام مش راضي يطلع
أبو محمود رد علي الشيخ فوزي مش عارفين ماله
الشيخ فوزي قال خليه يهدي واطلعوا
بعد ما طلعت سألني الشيخ فوزي عن اللي حصلي تحت حكيتله بالعافيه عن اللي شوفته وقولتله أن الصداع هيفرتك دماغي
الشيخ فوزي حط إيده علي دماغي وقرأ حاجات بصوت ضعيف جدا ..الصداع فك كأنه لم يكن انا بدأت أفوق
سأل ابراهيم انت شوفت حاجه
ابراهيم قاله لا
انا قولت بس والله انا شوفت ده
الشيخ فوزي قالي مصدقك وده معناه أن احنا ماشين صح وبنقرب والرصد عامل موانع وتأمينات للمقبره اي حد يقرب تظهرله الأشياء دي فيخاف وميكملش
ابومحمود يعني الرصد عارف أننا بنحفر دلوقتي
الشيخ فوزي لا مش حاسس بينا وده اللي أكدته بنتك ليا
انا قولتله انا خايف ومش عايز انزل تاني
وفي الوقت ده دخلت أخت محمود صاحبي علينا واللي بقت كويسه بشكل كبير ومعاها الشاي قالت في إيه ؟؟ايه اللي حصل ؟؟
الشيخ فوزي قالها يحيي بس شاف حاجات وخايف يكمل
وأبوكي خايف أن الرصد يكون حاسس بينا
ردت هي وقالت لا هو مش حاسس بينا ولو في خطر عليكم انا هقولكم توقفوا علي طول
الشيخ فوزي قال ياريت تكونوا اطمنتوا
وقام جايب خيط وجاب حديده وقرا عليها وربط الحديده بالخيط وعملها علي شكل عقد وقالي إلبسها في رقبتك وانت جوه النفق بس أوعى الحديده دي تلمس المايه أنت فاهم أوعى تلمس المايه
وقالنا ارتاحوا انهارده وبكره نكمل
انا قبل ما انام قعدت مع ابو محمود واتكلمت معاه وسألته انت شايف ان احنا هنلاقي المقبره فعلاً
قالي والله يا ابني انا مش فارق معايا المقبره
قالي لان الشيخ فوزي قالي بنتك بقت كويسه علشان احنا شغالين في الحفر ولو أتوقف الحفر بنتك هترجع تتعب تاني
انا قولتله انت راجل مؤمن بالله كل شي بإيد ربنا
قالي ونعم بالله بس اللي انا شوفته مع بنتي خلاني بقيت أخاف اخد أي قرار عكس اللي بيقوله الشيخ فوزي ومكمل معاه ومش عارف أخر القصه دي هيودينا علي فين
أذان العشاء
قولتله يلا نصلي قالي مبقتش أعرف أصلي في البيت من الطلاسم والرسومات الغريبه دي.
قولتله خلاص نروح نصلي في الجامع وندعي ربنا ينور بصيرتنا
قالي يلا بينا يا بني
رجعنا من الصلاه وطول الطريق بنتكلم مع بعض وكلمني عن ابنه محمود اللي متغير حاله وأنه خايف عليه
انا ردت عليه وقولتله انا حاسس بده برضو ومش فاهم ماله
قولتله بس ممكن الأحداث اللي شافها برضو تكون أثرت عليه
قالي الشيخ فوزي قال كده برضو
وصلنا البيت وقالي تصبح علي خير يا يحيي انا ارتحت لما اتكلمت معاك وربنا معانا في الجاي
رديت عليه وأنت من أهله
ودخلت علشان انام وكان معايا ابراهيم في الأوضه اللي بنام فيها
ابراهيم قالي انت كلامك خوفني
قولتله والله انا مش ناقصك نام وانت ساكت.. بس ايه حكايه الحديده اللي ألبسها قبل ما أدخل الحفر .. سحر ده ولا عمل ولا ايه وليه متلمسش المايه انا خوفت من الشيخ فوزي اكتر من اللي شوفته في النفق فنام بالله عليك علشان انا دماغي مش مستحمله كلام
وخلينا نشوف هنعمل ايه بكره
طلع النهار علينا واليوم ده كان أغرب يوم في حياتي
بدانا الشغل وعملنا فرع إناره داخل النفق وحطينا مروحه لان التنفس جوه صعب محمود وابو محمود خرجوا من النفق وكانوا قطعوا شوط كبير من الحفر والشيخ فوزي قالنا نوسع مساحه النفق بالعرض علشان لو في حد عايز يخرج يقدر يلف ويبقا في سهوله في الحركه جوه النفق وده اللي عملوا محمود وابو محمود ودلوقتي تعبوا والدور عليا انا وإبراهيم انا قولت لابراهيم خوش انت الأول وقولي إيه الاخبار وطمني وانا هالبس العقد الجميل اللي عملهولي المبروك
محمود ضحك وقالي ماشي انا هدخل قدامك
فضلنا شغالين والحديده اللي انا كنت لبسها كل شويه ألقيها تترفع من علي صدري لفوق أنزلها تترفع تاني..كانت بتترفع زي رأس الأفعى وكأنها بتستكشف اللي قدامها ..خوفا من حركتها بس حاولت اركز مع الحفر وسبتها تعمل اللي هي عايزاه
تعبنا والشيخ فوزي قال احنا قربنا خلاص انا قولتله احنا بقالنا أكتر من شهر في الموضوع ده وكل شويه تقولنا احنا قربنا ومبنلقيش حاجه وانت بتضيع وقتك ووقتنا
الشيخ فوزي قالي انت متعب وكلامك كتير انا هوريك حاجه تخليك تصدق كلامي اطلعوا
طلعنا كلنا وقالنا أقعدوا علي شكل دايره ومحدش ينطق كلمه وقال اطفوا النور
وحط إيده علي راسي وقعد يعزم ويتمم ويتكلم بصوت ضعيف جدا يشبه الهمهمات انا مكنتش سامعه
ومره واحده لقيت نفسي انا والشيخ فوزي تحت في النفق
ايه ده احنا جينا هنا إزاي؟؟ده السؤال اللي سألته ولكن الشيخ فوزي مردش عليا ..بصيت علي النفق النفق كان أطول شويه من الطول اللي كنا وصلنا ليه
والشيخ فوزي قالي امسح التراب اللي علي الارض
مسحت التراب لقيت عتبه حجريه بزلت لونها جميل جدا
قالي ارفع العتبه رفعت العتبه لقيت العرائس الدهب
عيني زغللت من منظر الدهب
انا قولت ايه ده العرايس موجوده هنا انا شايفها ولسه هلمسها
قام مزعقلي وقال أرجع أرجع
ومره واحده لقيت نفسي فوقت في ثانيه ورجعت تاني في الأوضه
الشيخ فوزي قال أنت اتجننت انت بتلمسهم هتخلي الرصد يحس بينا
انا قولت انا معرفش بس انا شوفت العرايس الدهب بعيني وكانوا بيبرقوا والله شوفتهم
ابو محمود وهو مرتبك قال نشغل النور بقا
الشيخ فوزي قال لا انا معايا ضيوف يخرجوا وبعدين شغلوا النور انا حسيت طيف بيعدي من جنبي بيخرج من جنب الباب وهنا الشيخ فوزي قال شغلوا النور
انا قولت احنا نزلنا انا وانت عند المقبره يا شيخ فوزي وشوفت العرايس الدهب
قالي ياريت بقا تكون صدقت وتشتغل وانت ساكت
انا بقيت متحمس جدا والتعب راح وقولت انا هنزل اشتغل دلوقتي
وفعلا نزلت اكمل ومعايا إبراهيم
ابراهيم قالي انت شوفت العرايس فعلاً
قولتله اه والله شوفتها زي ما انا شايفك دلوقتي
اشتغلنا وبدأنا نقرب ونقرب وانا كلي حماس وقاعد بحلم هعمل ايه لما نوصل للدهب ..وفجاه النور قطع
انا حسيت اني في حد بيمسك رجلي إتفزعت ولفيت جسمي وبدأت ارجع وانا خايف وهنا لقيت إبراهيم بيصرخ النور كان قاطع ومش شايف حاجه ..وهما بره بيقولوا فيه ايه في ايه
انا قولت شغلوا النور وحاولت أخرج وفعلا النور اشتغل لقيت إبراهيم نايم علي الارض جسمه كله عرق ..حاولت افوقه وبعد لحظات بدأ يفوق وقالي خرجني خرجني
فضلت اسحب فيه وخرجنا
الشيخ فوزي قاله ايه اللي حصل ؟؟
ابراهيم قال شوفت تعبان
بس تعبان حجمه عشر أضعاف حجم التعبان الطبيعي حاجه كده زي الاناكوندا وفضل يقرب مني والغضب مسيطر علي وشه
الدنيا ضلمه ولكن انا شايفه كويس عينه حمره بلون الدم ولما قرب مني انا صرخت بس اول ما النور اشتغل اختفي
الشيخ فوزي قال الرصد حس بينا
ابو محمود قال واحنا هنعمل ايه دلوقتي
الشيخ فوزي قال
لازم نعرف طلبات الرصد ايه ؟؟
أحداث الجزء الأخير هتكون صادمه وغير متوقعه فبعتذر لانها هضايقكم بس ده الواقع واللي حصل وبيحصل
بتمني تفهموا هدفي من عرض القصه وهو أخد العظه والعبره من الأحداث ونتعلم من أخطاء الغير
المقبره الفرعونيه
الجزء الرابع عشر والاخير
الشيخ فوزي قال
لازم نعرف طلبات الرصد ايه ؟؟
ابو محمود قال والرصد ممكن يطلب ايه ؟؟
الشيخ فوزي قال في أوقات بيطلب بخور والبخور ده غالي جدا
وأوقات بيطلب قربان ..دم لشخص برئ معملش معصيه في حياته زي الأطفال
انا قولت نقتل طفل يعني !!!
الشيخ فوزي قال أنا بتمني أنه يطلب البخور
اطلعوا ريحوا انهارده وبكره نشوف إيه المطلوب مننا
أنا كنت مش مستوعب كلامه
وقولت لإبراهيم هي وصلت لأننا نقتل
إبراهيم قال ما ممكن يطلب البخور ويبقي الموضوع سهل
انا قولتله ياريت
نمنا وصحينا الصبح لقيت الشيخ فوزي بيقولنا وهو فرحان الرصد طلب البخور هو غالي بس انا هتصرف
انا قولت الحمد لله
الشيخ فوزي قال انا هخرج اجيب البخور من عن واحد انا أعرفه وهرجع
***********
علي الجانب الآخر
الشيخ فوزي قرب من أم محمود وبصوت واطي قالها انا عايز اقابلك انهارده الساعه 8 في العنوان اللي في الورقه دي
ام محمود وانت عايز تقابلني ليه
قالها لما تيجي هتعرفي كل حاجه وياريت متعمليش شوشره وده علشان مصلحتك
أم محمود مكنتش فاهمه هو عايز ايه بالظبط بس هي سمعت كلامه ومن غير شوشره
قابلت الشيخ فوزي في المكان اللي كان مكتوب في الورقه
أم محمود :انت عايز ايه فهمني وليه من غير ما حد يعرف ؟؟
الشيخ فوزي : الرصد طلب دم بنتك وانتي اللي تقتليها
الشيخ فوزي قال بخبث : انتي هتعملي كده زي ما عملتي ما بنتك الصغيره زمان
مش انتي قتلتي بنتك الصغيره زمان ولا هتنكري
أم محمود :بس انا مكنش قصدي ودي غلطه وانا ندمت عليها عمري كله
الشيخ فوزي : ما هو انتي لو ما نفذتيش كلامي انا هبلغ جوزك وابنك انك قتلتي بنتك علشان شافتك مع عشيقك وزي ما عملتي ده قبل كده هتعمليه دلوقتي
ام محمود : انت عرفت الموضوع ده إزاي
الرصد هو اللي بلغنا بده واحنا هنفتح المقبره وناخد الدهب ونهرب انا وانتي وانا مظبط كل حاجه ولو وافقتي هقولك علي الخطوات اللي هنعملها علشان نخرج بسلام.. بس لو رفضتي متزعليش من اللي هيحصل
ام محمود سابت الشيطان ده ومش عارفه تعمل ايه ؟
*************
الشيخ فوزي رجع وقال أنا جبت البخور وسعره ٢٠٠,٠٠٠جنيه وهقدمه للرصد
احنا قولنا تمام
علي الجانب الآخر
أم محمود دافنه نفسها في سريرها وبتبكي وبتفكر هتعمل ايه هتقتل بنتها
دي هي عايشه طول عمرها ندمانه علي اللي حصل
*******
احنا صحينا الصبح علي صراخ ام محمود
جرينا علي الصوت
لقينا ام محمود غارزه السكينه في قلب الشيخ فوزي وبتصرخ وبتقول قتلته ….قتلته ده شيطان
الشيخ جمال قام مفزوع وجري بره البيت
احنا في حاله ذهول ومنظر الدم شي يقبض القلب
قعدناها علشان…نفهم في ايه
هي قالت انا هقول كل حاجه وهي في بتضحك بهستيريا
وبدأت تحكي وتقول
في الوقت اللي كان أبو محمود مسافر أنا غلطت وقتلت بنتي الصغيره بعد ما شافتني في وضع مخل،، البنت فضلت تصرخ وانا حاولت اسكتها حطيت إيدي علي بؤها إتكتم نفسها وماتت في إيدي
أخدت جثه بنتي انا وعشيقي ودفناها في الصحرا وقطعت علاقتي بالراجل ده نهائيا وندمت علي اللي عملته وقلت لابو محمود انا بنتنا تاهت وهو فضل يدور عليها سنين وانا مكنتش أقدر أقول الحقيقه
ومرت السنين وجبنا بنتنا ولكن يشاء ربنا أن السر ده ينكشف بعد السنين دي كلها والشيخ فوزي يطلب مني إني أقتل بنتي علشان الرصد طالب روح بنتي ولو رفضت هيفضحني
انا قررت اقتله ومغلطتش مرتين وأدفع تمن غلطتي
ابو محمود هجم عليها زي المجنون : اااانتي خونتيني وقتلتي بنتي
احنا حوشناه عنها بالعافيه
وفي وسط الخناق والصوت العالي الناس إتلمت
وهي تقول بهسيتريا
أنا قتلته أنا قتلته كان عايزني أقتل بنتي..ده شيطان ..هههههه
الناس بلغت الشرطه وتم القبض علينا
المحامي قال ام محمود هتاخد حكم لأن الجريمه كامله أما انتم فهنقول انكم كنتوا بتحفروا علشان تعملوا حمام تحت البيت( طرنش) وده سبب الحفر وحصل تعدي من الشيخ فوزي علي بنتك فامها قتلته
وده اللي هتقولوه بدون أي كلمه زياده
احنا قضينا ١٥ يوم في الحجز كانت ايام صعبه جدا الكوابيس لا تفارقني اخدت إفراج بكفاله خرجت انا ومحمود وابو محمود وإبراهيم ومحمود رجع لطبيعته ولكن بعد فوات الأوان وكأن الشيخ فوزي كان مسيطر عليه بقوه خفيه خرجت وانا حاسس إني مش إنسان انا كنا حطام إنسان
كل يوم كابوس اي شي بيحصل يمكن أنه يدخل عليا الفرحه مبحسش بيه وبحس أن في كارثه بعدها هتحصل
الايام تشبه بعضها وصوره الشيخ فوزي وهو مقتول مش بتفارقني وبشوفه في أحلامي كل يوم
بس بعد ما إنتهت القصه واتبخرت فكره العرايس الدهب اللي كانت مسيطره علي عقلي لقيت أن كل خطوه في سير القصه كان السحر هو السبيل والحل الأول في كل تحرك لينا بدايه من البنت اللي خرج منها الشيخ فوزي الجن واللي مكنش بإستخدام القران ولا بالانجيل ولا حتي بالتوراه صحيفه قديمه منعرفش مصدرها ..وصولنا لنزولي انا والشيخ فوزي عند العرايس الدهب واني اشوفها بعيني
هل كل ده ممكن يحصل بدون إستخدام السحر
وهل في حد ممكن يكون معاه خدمه من الجن لمجرد أنه بقا شيخ أو قال علي نفسه شيخ ولا الخدمه بتشترط أمور أخري ….
بس الغريب أن الجيران اللي قالنا عليهم الشيخ فوزي أنهم بيحفروا وبيحاولوا يوصلوا قبلنا للمقبره اتغير حالهم فجأه وظهر عليهم غنا مفاجئ ومش عارف هل وصلوا للمقبره فعلا ؟؟؟؟
وهنا انتهت قصتي
