العائدون
انا ادهم عايش حالياً في مدينة اوروبيه
كنت اعيش حياه هادئه جداً يعني بالبلدي في حالي لا ليا دعوه بحد ولا حد ليه دعوه بيا انطوائي بحب العزله لحد ماجه يوم من الايام لقيت باب البيت عندي بيخبط بافتح لقيته عم سلامه ده جاري من زمان اوي وبيحبني جداً خدني بالحضن ووحشتني ياابني وانت عامل ايه واسئله بقي وحركات المهم قعد معايا شويه وقاللي معلش ياادهم ياابني انا رايح اعمل عمره وعايز اخلي الحاجه دي عندك .. اه عم سلامه ده راجل عجوز في الستينات من عمره بس بيحبني جداً وكان في محاولات زمان كده انه يجوزني بنته بس محصلش نصيب وهي اتجوزت وربنا توفاها هي وجوزها وابنها في حادثه ..
عم سلامه اداني حاجه كده عامله زي عارفين المزهريه بتاع الورد اللي بتتحط في البلكونات دي هي حاجه زيها بس بغطا فكرتني بالاواني اللي الهنود بيحطوا فيها تراب الاموات بتاعهم اخدتها منه ومن يومها حياتي اتقلبت رأساً علي عقب .. كنت باصحي من نومي علي واحده واقفه ادام السرير بتاعي شايله عيل صغير في ايديها ولما اركز فيها الاقيها بتبصلي بعيون ناريه وتختفي ..
كتير اوي حصل معايا الموقف ده .. وكمان كنت اصحي الساعه 3 بالليل علي صوت ابويا بينده عليا .. وابويا وامي ماتوا الله يرحمهم من خمس سنين .. ومره صحيت ووانا بنزل من علي السرير حسيت اني نازل في ميه دافيه جداً ولعت النور لقيت السرير عايم وسط بحيره من الدم السخن اللي فعلاً طالع منه بخار من شدة سخونيته باغمض عيني وافتح ماالاقيش حاجه .. باسمع اصوات كتيره بتناديني وابص حواليا مش شايف غير خيالات سودا بتلف حواليا في الاوضه .. انا مش عارف ايه ده ولا بيحصل ايه ..
قعدت مع نفسي بعد ماكنت هاتجنن بجد فكرت اتصل بواحد صاحبي من القليلين اوي واتصلت بيه
الوو ايمن
ايوه مين معايا
انا ادهم حماد
ياااااااه ياندل فينك ياد من زمان والله زعلان منك
بقولك ايه انا عايزك تجيلي محتاج لمساعدتك جداً
في ايه خير
انا بموت ياايمن ومحتاج مساعدتك
بصراحه ايمن ماكدبش خير وتاني يوم لقيت الباب بيخبط بفتح لقيته هو خدني بالحضن وقعدنا بقي نسترجع ذكريات زمان في محاوله منه انه يهديني شويه .. اه نسيت اقولكم ان في الليله اللي قبل ماايمن ييجي فيها حسيت بحاجه سخنه اوي علي صدري وتاني يوم صحيت لقيت علامه حرق علي صدري وخمس صوابع معلمين اوي
المهم جه ايمن وقعدنا وقاللي ايه اللي حصل حكيتله استغرب اوي وقاللي هو كان في جن بيتحضر في البيت ده ولا حاجه قلتله مانت عارف ابويا وامي تفتكر يعني انهم كانوا بيحضروا جن قاللي خلاص المهم اهو انا معاك ونشوف ايه اللي بيحصل
ايمن من صغره وهو بيهتم بالجن والعفاريت وبيحب يقرأ ويدرس ويعرف عن العالم ده أكتر مما ينبغي اننا نعرفه المهم واحنا قاعدين الكلام خدنا ودخل الليل وفتحنا التليفزيون نتفرج وفجأه الكهربا قطعت لقيت ايمن بيقوللي عادي ياابني ماالكهربا بتقطع كتير دلوقتي قلتله بص وشاورتله علي اللمبه اللي ادام الحمام اللمبه كانت بتشتغل وتطفي ولونها يتغير من اللون الابيض للون الاحمر قام وراح ناحية اللمبه لقيته واقف متسمر ادام باب الحمام اللي اتفتح لوحده بهدوء شديد جداً طلعت اجري عليه وبابص جوه الحمام اللي ايمن شاورلي عليه من غير مايتكلم وكانت الصدمه البشعه اللي شوفناها .. لقينا واحده ست واقفه قدام البانيو ومشغله الدش وبتحمي عيل صغير بس الدش
مكانش بينزل ميه .. كان بينزل دم لونه احمر غامق جداً لقيناها فجأه بصت لينا وكأنها انتبهت لوجودنا وكان المنظر الابشع اللي ممكن تتخيله في حياتك الست بعين واحده مفيش شفايف السنان كلها طالعه بره نص راسها من قدام مش موجوده نص شعرها نازل من نص الراس اللي باقي وبقية الشعر نازل من بقها بشكل خلاني ارجع وانا واقف وكان هيغمي عليا .. بس استنوا المنظر ده ميجيش حاجه الي جانب منظر الولد او الطفل الصغير ..
الطفل الصغير بص لينا وهو بيبتسم ولقينا عينه اليمين اتخلعت واتنطرت قدامنا ولقيناه بص لأمه او الست اللي بتحميه دي ومسك ايده الشمال بايده اليمين وخلعها وبدء ياكل فيها لأ والظريف بقي انه كان بيأكل الست دي من دراعه انا طلعت اجري وبابص ورايا لقيت ايمن اتنفض مكانه وبصلي وضحك ابتسامه مرعبه نفس الابتسامه اللي اترسمت علي وش العيل الصغير وبيقوللي انت شايلهم عندك لازم تحررهم والا مش هيسيبوك ووقع قدامي ..
قعدت افوق فيه وبدأ يفوق شويه بشويه وبيقوللي أدهم انا لقيت الست دي فجأه واقفه قدامي واتحولت لطيف دخان اسود وبدأت تدخل من بوقي وبعد كده معرفش ايه اللي حصل .. قعدت معاه لحد مافاق وحكيتله قاللي أدهم بص الموضوع كبير اوي في حاجه غلط حصلت في البيت هنا هي ايه انا مش عارف بس لازم نعرفها وفجأه واحنا بنتكلم خطر في بالي حاجه حكيت لأيمن علي المزهريه اللي عم سلامه ادهاني لقيته بيضحك وبيقوللي ياعم مزهرية ايه يعني هيكون مخبيلك فيها جن ولا حاجه .في حاجه بتحصل وان شاء الله هعرفها خليني بس اقوم انام وارتاح شويه قلتله وانا كمان عايز انام والله يالا نطلع ننام وبكره نشوف هنعمل ايه وطلعنا علي اوضه لأننا قررنا ننام في اوضه واحده وفي نص الليل صحيت من نومي علي صوت عارف لما تكون قاعد علي السرير وبتتهز لأدام وورا كده نفس الصوت بابص جمبي لقيت ايمن قاعد وشايل طفل صغير علي ايده زي مايكون بينيمه بقوله ايه ده ياايمن بتعمل ايه بصلي ماشوفتش غير عنيه اللي كانت بيضه تماماً ولعت النور لقيت ايمن وشه اسود تماماً وكأنه محروق وعنيه بيضا تماماً ومنوره بشكل بشع ونازل منها من الجمب خيوط دم والطفل الصغير اللي علي ايده نفس الطفل اللي كان في الحمام بابص قدامي علي سريري لقيت واحده قاعده ومدياني ضهرها وبتمد ايديها لايمن تاخد منه الطفل الطفل وهو بيتاخد من ايمن لقيته مسك ايمن من راسه وخلعها وانفجر الدم في وشي وانا قاعد علشان انط مفزوع من علي السرير وطالع اجري وفتحت باب الاوضه علشان الاقي ايمن مقابلني وبيقوللي مالك في ايه انا كنت بشرب شاورتله علي الاوضه بيبص ملقاش حاجه طبعاً قاللي تلاقيه كان حلم بس ولا حاجه قلتله حلم واللي في وشك ده ايه حط ايده علي وشه لقي زي خيط دم نازل من عنيه قاللي أدهم انا مش فاهم حاجه بس ده جن في جن هنا في البيت الجن ده متوحش لدرجة انه ممكن يقتلنا في حاجه غلط تمت في البيت وكل شويه بنقرب منها اكتر قاللي الكلمه دي من هنا وسمعنا صوت من تحت زي صوت حاجه بتتسحب علي الارض بنبص من فوق لقينا الطفل الصغير ده ساحب في ايده حاجه مش عارفين هي ايه نزلنا تحت شويه علي السلالم اكتشفنا ان الطفل ده بيجر جثه .. جثة راجل بنركز في الجثه اوي لقيت ايمن بيبصلي وبيقوللي ده انت
ايوه كان بيجر جثتي وبيبصلي ويبتسم ابتسامه كلها شر وخوف وفزع وقعد قدام جثتي وبدء ياكل منها ومستمتع اوي وهو بياكل منها وفجأه لقيته قام من مكانه وطلع يجري علي الحمام طلعنا نجري وراه وفتحنا باب الحمام لقينا كمية مهوله ياجدعان من الكلاب السودا احجامها صغيره جداً بس اسنانها اللي باينه من الواضح اننا هنتاكل واحنا واقفين بنلف علشان نطلع نجري المفروض ان قدام الحمام في طرقه كبيره بس لما لفينا لقينا حيطه سده الطرقه يعني الحيطه من امامنا والكلاب من خلفنا وفجأه نار شديده اوي ولعت في الكلاب والنار بدات تقرب مننا تقرب تقرب لقيت ايمن بيشدني وخبطنا في الحيطه دي والمفاجأه اننا عدينا منها بسهوله وخرجنا بره البيت ومن بره شوفنا البيت كله بيولع بس الغريبه محدش من الجيران اتحرك من مكانه .. فضلنا قاعدين قدام البيت للصبح ونمنا واحنا قاعدين وفوقنا علي صوت واحد بيقولنا ايه ياابني انتوا نايمين كده ليه .. ده الشيخ نعمان شيخ الجامع بنقوله البيت ولع ..
بيت ايه اللي ولع ياابني البيت زي الفل اهوه بنبص لقينا البيت وكأنه مغسول من بره قلتله عم الشيخ عايز احكيلك عن حاجه قاللي احكي ياابني قلتله اللي حصل كله من طقطق لسلاموا عليكوا قاللي عمك سلامه ؟؟ عمك سلامه مات ياابني من ييجي 3 سنين بعد بنته ماماتت
مات ازاي ده جالي واداني حاجه كده عامله زي المزهريه
هنا قاطعني الشيخ وقاللي ادالك إيه
قلتله مزهريه
قاللي مقفوله من فوق وعليها رسومات غريبه كده
قلتله اه
قاللي هي فين ياابني المزهريه اللي بتتكلم عنها دي محبوس فيها جن من اقوي وابشع الجن اللي ممكن تقابلهم في حياتك
هي فين
قلتله تعالي معايا
دخلنا نجيبها وكانت المفاجأه
المزهريه مفتوحه ونازل منها دم ..
يانهار اسود ايه اللي فتحها استر يارب استر يارب
بصيت لأيمن
قاللي انا مافتحتهاش ولا كنت اعرف مكانها انت الوحيد اللي تعرف مكانها
وانا كمان والله مافتحتها
ياابني ممكن الجن يكون لبسك وسخرك انك تفتحها
دلوقتي هنعمل ايه ياعم الشيخ
بصوا ياولاد احنا لازم نروح قبر سلامه اكيد هنلاقي فيه اي اجابه
ورحنا ملقناش اي حاجه بس اللي استغربناه ان سلامه كان مدفون مش متكفن مفيش كفن عليه
وكمان انتوا عارفين اننا بندفن موتانا ناحية القبله
عم سلامه كان مدفون العكس عكس القبله
الشيخ نعمان اقسملنا بالله انه هو اللي دافنه وكان متكفن ومدفون ناحية القبله
عمك سلامه في حد دخل قبره
هيدخل يسرق كفنه يعني
مش عارف بس دي الحاجه اللي لازم نعرفها وهنشتغل عليها
ايمن قاللي انا هروح انا بقي ياعم انا شكلي هموت
مشينا انا وايمن والشيخ نعمان ويااعالم ايه اللي هيحصل ..
الشيخ نعمان طول اليوم شايفه قاعد يبص لأيمن من بعيد لبعيد كده
في ايه ياعم الشيخ
خير ياادهم ياابني
هو حضرتك بتبص لأيمن كده ليه
أيمن صاحبك ياابني فيه حاجه غريبه عنيه مش مستقره وبيتلفت حواليه كتير ايمن شايف حاجه احنا مش شايفنها وخايف يتكلم
مره من المرات ياعم نعمان قاللي انه شاف الست اللي واقفه دي بقت عامله زي الطيف ودخلت في بقه
ايه ؟؟!!
اه والله هو قاللي كده
عم الشيخ نعمان قام وشغل الراديو علي اذاعة القرأن الكريم وكانت بالصدفه سورة الجن اللي شغاله
فجأه لقيت ايمن مش قاعد علي بعضه وقام بسرعه طفي الراديو
قام الشيخ نعمان بكل هدوء وشغل الراديو تاني
لقينا ايمن بصلنا احنا الاتنين وعنيه بقت بيضا تماماً وقالنا انتوا فاكرين انكم بكده بتصرفوني ولا بتأذوني وضحك ضحكه شيطانيه فجأه لقيت الشيخ نعمان قام بسرعه ومسك ايمن وكتفه مش عارف ازاي الشيخ نعمان بقي قوي جداً كده كتفه ونيمه علي الارض وبدء يقرا عليه ايات قرأن لحد ماايمن هدي خالص وفاق وقال هو في ايه انتوا بتعملوا ايه فيا
الشيخ نعمان بصله وقاله انت اتلبست ياايمن وانت اللي فتحت المزهريه وحررت منها الكائن اللي فيها
لأ ازاي انت بتكذب
قاطعته في الكلام وقلتله اللي حصل
انا مش زعلان انا نفسي اعيش مغامره كده من زمان قالها ايمن وهو زي مايكون مبسوط انه اتلبس
ايمن انت ممكن تموت
بس ممكن اشوف العالم بتاعهم واعيش فيه
اعرف بيعملوا ايه وعايشين ازاي ؟؟
رد عليه الشيخ نعمان وقاله ياابني انتي كده ممكن تأذي نفسك
ماهو مش بمزاجي ياعم الشيخ
طيب احنا هنساعدك بس لازم تساعدنا ياابني
انا معاك ياعم الشيخ في اي حاجه
قالها ايمن وهو بيبص حواليه الشيخ نعمان قاله انت شايف ايه
شايفه بيلف حوالينا ومبسوط اني فرحان بوجوده جوايا
حاول تطرده ياايمن حاول
في اللحظه دي وفي لمح البصر ايمن طلع يجري ونط من شباك البيت
البيت دور ارضي بس هو نط وطلع يجري
طلع يجري ناحية المقابر
طلعنا نجري وراه وفجأه اختفي من قدامنا هو راح فين
انا عارف هو فين ورحنا جري علي تربة سلامه لقينا باب التربه مكسور بنبص جوه لقيناه قاعد وبياكل بقايا جثه كانت قدامه انا هيغمي عليا لقيت الشيخ نعمان دخله جوه وضربه علي دماغه وسحبه وهو بيحاول يفك منه وبيقوله مش هتقدروا عليه ده اقوي منكم سلامه حضره وقدم بنته وجوزها وابنها قرابين ليه علشان يحضر ويحققله طلباته مش هتقدروا عليه لوهله من الوقت الشيخ نعمان قاللي سلامه في اخر ايامه مكانش مركز في اي حاجه وتحت عنيه اسود جداً وبقي مش طبيعي وبدأ يزور مقابر كتير وكنت سمعت انه راح لدجال ورحتله وقلتله حرام قاللي في كنوز هنا لازم اطلعها والشيخ ( الدجال يعني ) قاللي هنعقد صفقه مع جن يدلنا عليه وياخد حسابه اللي هو ايه معرفش بس من كلام صاحبك دلوقتي عرفت الحساب ده كان بنته وجوزها وابنها اللي سلامه ومن غير مايقصد قدر انه يرجع ارواحهم تاني وهم اللي قتلوه وقدروا بطريقه من الطرق يحبسوا الجني اللي الدجال حضره في المزهريه اللي كانت معاك وبطريقه برضه قدروا يكتبوا علها طلاسم علشان ميقدرش يتحرر منها بس ايمن لما اتلبس وفي حالة اللاوعي قدر يحرره من الحبس بتاعه وبينتقم منكم كلكم ودلوقتي كمان هينتقم مني
ايمن في الوقت ده كان بدأ يرجع لحالته الطبيعيه وقلناله اللي حصل اللي في ساعتها علطول بدأ يرجع كل اللي في بطنه
انا كنت باكل جثه
مش انت مبسوط انك ملبوس
بس مش لدرجة اني أكل جثه
لأ لدرجة انك تاكل جثه وكمان لدرجة انك تقتل
لحد مانخرج اللي فيك ده هتتحبس لأنك ممكن تأذينا
لأ انا مااتحبسش وفجأه عينه ابيضت تاني وبدأ يقطع او بمعني اصح يسلخ جلد وشه بايده
في الوقت ده حسيت انا والشيخ نعمان بحاجه بتخنقنا وبدأت انزف من مناخيري دم كتير والشيخ نعمان بيقرا ايه الكرسي وبيتخنق وايمن نازل سلخ في وشه لحد ماشال الجلد خالص من عليه وبقي شكله مرعب وفي لحظة اتحول شكل ايمن لشكل الست اللي بتظهرلنا واللي عرفت من الشيخ نعمان ان دي بنت سلامه بتبص بتحدي لينا وبتقولنا سبتوه يموتنا وانت ساعدته
قاطعتها وبقولها ساعدته فى ايه انا مكنتش هنا اصلاً
سايبله مفتاح بيتك البيت اللي تم فيه كل حاجه قتلنا فيه وقطع جثثنا ومرحمش ابني الصغير ولا جوزي
طيب انا هعرف منين
هتموت وتتقطع زي ماعمل فينا هو مثل بجثثنا واحنا هنمثل بجثتك في نفس الوقت باب الحمام في بيت الشيخ نعمان اتفتح علشان يظهر منه الطفل الصغير ومن وراه .. ظهر الاب اللي كان اول مره نشوفه .. كائن فظيع عارفين الغول اللي بيخوفونا منه .. انسان براس زي راس الثور وليه قرنين كبار اوي وماشي ورا الطفل الصغير اللي هو ابنه اصلاً
ووقفوا وكأنهم مستنيين الاوامر .. ايمن انت بتعمل ايه ,, انا اتصدمت لما عرفت ان ايمن بيستخدم السحر الاسود علشان يقضي علي اللعنه اللي احنا فيها دي وعلي حد قول ايمن ان اللي بيحصل ده سحر اسود ومش هيقضي عليه غير سحر اسود اقوي منه وبدأ يقول طلاسم وتعاويذ والكائنات اللي ظهرت واتجسدت قدامنا دول بدأوا يتحركوا في شكل زي الدواير كده وعملوا دايره كبيره واترفعوا فوق في وسط المكان اللي احنا فيها وحصل بينهم زي انفجار ضوئي بسيط كده واختفوا من قدامنا وفجأه وبدون مقدمات لقينا الست جايه هي وابنها .. وجوزها .. والكائن الغريب اللي اطلقه ايمن من المزهريه وهاجمين علينا وكأنهم اتحدوا مع بعض علشان يقضوا علينا ويقضوا علي اللي حضرهم ايمن وحضروا لما اتأكدوا ان الجن التاني انصرف .. بس المفاجأه انهم مكانوش انصرفو كانوا موجودين وبمجرد مالتانيين دول حضروا هم جوم في نفس شكل الدايره اللي عملوها قبل مايختفوا وحاوطوا الاربعه وبدأوا يلفوا بسرعه جداً حواليهم عارفين العاصفه الهوائيه اللي بتبقي في شكل دايره نفس الكلام بالظبط وبدأ الاربعه الست وجوزها وابنها والكائن اللي معاهم يترفعوا من علي الارض ويدوروا في الدايره دي وبدأت السنه من اللهب والنار الشديد تظهر وسط الدايره واحنا واقفين وكأننا بنتفرج علي فيلم رعب بنبص وبنلف بعنينا مع لهب النار اللي بدأ يمسك بالست دي وجوزها وابنها والكائن اللي معاهم وسمعنا اصوات صراخ وعياط شديده اوي لدرجة اننا مااتحملناش وكان هيغمي علينا من شدة الاصوات اللي كانت بتخرج منهم وفجأه وفي لمح البصر .. اختفي كل شئ من قدامنا ومعاهم .. اختفي ايمن
اختفي ايمن وهو سايب علامة استفهام كبيره اوي ازاي قدر يعمل كده وازاي قدر يحضر الجن القوي ده وازاي قدر يقنعهم يساعدوه
لغز كان هيجنني بجد معرفش ايمن راح فين ولا عمل ايه
وبعد ماانتهي كل شئ قررت اني اسافر وماارجعش هنا تاني ابداً
وفعلاً حجزت وسافرت ووانا في المطار باطلع الجواز بتاعي وقع منه ورقه صغيره اخدتها حطيتها في جيبي قلت يمكن فيها عنوان او حاجه ولما ركبت الطياره واتحركت بينا حسيت بسخونه في جيبي افتكرت الورقه خرجتها من جيبي لقيتها فاضيه مفيش فيها اي حاجه خالص لسه هاحطها في جيبي تاني فجأه بدأ يظهر فيها كلام وكأن واحد ماسك قلم وبيكتب
( صديقي العزيز : أدهم .. بعد التحيه .. اعلم انك تتسائل الان عما حدث وكيف حدث .. اليك الامر بكل بساطه وتلخيص
منذ زيارتي الاولي لك وانا اعلم انه يوجد قوي شريره جداً في المكان هدفها القضاء عليك وعلي كل من حولك لذلك قررت مساعدتك والانتقام ممن يريدون القضاء عليك فعقدت صفقه مع ملك الجن الاحمر الناري ان يخلصنا منهم علي ان نقوم بسداد ضريبه صغيره وهي اضحيه بشريه حيه وما لاتعلمه انني فقدت ابنتي وزوجتي في حادث فأضحيت وحيداً في الدنيا لذلك قررت ان اضحي بنفسي لأعيش في عالم الجن واترك هذا العالم الي الابد واخلصك من لعنة العائدون صديقي العزيز اعلم ان مافعلته قد يكون خطأ لكنه من وجهة نظري كل الصواب واعلم انني معك دائماً في اي يوم تحتاج مساعدة صديقك ايمن )
وانتهت الرساله ومعاها اتحرقت الورقه في ايديا ورمتها علي الارض علشان تختفي تماماً
والان وبعد مرور اكثر من 8 سنوات علي هذه الحادثه قررت ان أكتب ماذا حدث لأعلن امام الجميع ان الصديق في معظم الاوقات يبرر بعض المواقف ليضحي من اجل صديقه.
تمت.
محمد_أحمد_عباس
