#رواية_خيط_ضعيف
الحلقة التاسعة والعاشرة
في حاجات بتخلص علشان نبدأ حاجات جديدة بس دايما بيكون جوانا قلق غصب عننا من الجديد يا تري الجديد دا هيفرح قلوبنا ولا هيوجعها دا دايما السؤال اللي بيدور في عقلنا ..
وجاء يوم فرحي مع خالد …..يوم الفرح وفرحه الفستان الابيض اليوم اللي بتسناه كل بنت علشان تبقي ملكه الليلة دي وتبدأ حياة جديدة
وقبل ما ندخل القاعة وانا بفستان الفرح شوفت أخر شخص اتوقع اني اشوفه في يوم زي دا ..
وليد وبعد السنين دي كلها أكيد جاي صدفة اكيد انا رفضت الاعلان عن مكان الفرح علشان اعتبرت انها حاجه خاصه بيا رفضت ادخل اي تصوير.
حاولت اتفادي اني أحط عيني في عينه علشان عارفة ان اللي هشوفه ممكن يوجعني وانا داخلة حياه جديدة مع انسان يستحق مني الاحترام ،كملت الفرح عادي وروحت مع خالد علي بيتنا .
تاني يوم واحنا بنفطر اتفاجأت بخالد
خالد : نغم .
انا : نعم .
خالد : إنتي كنتي مخطوبه قبلي صح .
أنا : اه يا خالد أستاذ منير كان عارف واعتقد انك عارف من قبل ما نتجوز انت عمرك ما سألتني بس لو كنت سألتني كنت هقولك مش حاجة اكسف منها يعني بس مش شايف انه سؤال مش مناسب يوم الصباحية بتاعنا ولا ايه .
خالد : انا مش قصدي حاجة يا نغم دا كان مجرد سؤال مش أكتر واعتقد أنه مافيش مبرر انك تضايقي .
انا : ماشي يا خالد انا هقوم أكمل تحضير الشنط علشان شهر العسل .
خالد : ماشي لو محتاجة اساعدك في حاجه قولي
انا: لا شكرا كمل فطارك بس لحد ما أخلص علشان نلحق الطيارة .
فتره شهر العسل كانت جميله اوي يمكن من احلى فترات حياتي مع خالد انا بحب اسافر وأتفسح
وبعد ها رجعنا كل واحد فينا لشغله .
وفي يوم خرجت مع صافي
صافي : انتى مبسوطة يا نغم .
أنا : اه طبعا يا صافي مبسوطة جدا الحمدلله خالد محترم وكويس معايا مش بيخلني محتاجة حاجة
صافي :بجد يا نغم يعني كل المخاوف اللي جواكي طلعت خوف بس .
انا : اه الحمدلله يا صافي
داخليا انا كنت بكدب علي صافي في حاجة مش مريحاني بس مش قادره أحدد ايه ولا ازاي
مرت الأيام على وتيرة واحدة وتيرة باردة مفيهاش حياة كل واحد في شغله أخلص اطبخ احضر شغلى خالد يرجع على معاد النوم .
بعد 6 شهور من جوازنا
ماما : نغم يا حبيتي مافيش حاجه جاية في السكة
انا : قصدك بيبي يا ماما لا لو في اكيد هقول
ماما : طيب مفكرتيش تروحي لدكتور
انا : لا يا ماما لسه بدري انا وخالد متفقين اننا نسيب موضوع الخلفه دا يجي علي مهله احنا مش مستعجلين .
ماما : بس انا نفسي أشوفلك حته عيل يا نغم .
انا : يا ماما قولي ان شاء الله كل حاجة بتجي بوقتها
مقدرش انكر اني من جوايا نفسي في بيبي صغير بس مش مستعجله عاوزة اركز شويه في مستقبلي وجوايا حاجه بتقولي إستني شوية.
عدت سنة في خلال السنة دي زادت التساؤلات عن موضوع الخلفة وإمتي ولازم تشوفي دكتور حتي خالد بعد ما كان مش مهتم لاقته يوم جاي يكلمني .
خالد : نغم عاوز أكلمك في موضوع
انا : نعم يا خالد
خالد: انا عاوز طفل يا نغم وأنتي مطنشة الموضوع خالص زي ما تكوني مش عاوزة اطفال مني .
أنا: ازاي يا خالد تفكر فيها كدا اكيد طبعا عاوزه اكون أم ويكونلي طفل منك بس انا سيبها لربنا .
خالد : من فضلك يا نغم عاوزين نروح للدكتور مفياش حاجه لما نطمن .
انا : حاضر يا خالد أنا معنديش مشكلة الي يريحك .
خالد : خلاص أنا هشوف دكتور كويس واخدك بكره بعد شغلك ونروحله .
أنا: تمام
تاني يوم كنا عند الدكتور
وهناك اخدت الصدمة.
الدكتور : مدام نغم في عند حضرتك مشكلة هي دي الي مأخرة الحمل .
وليد : يعني ايه يا دكتور يعني أنا مش هكون اب
الدكتور : كل حاجه ليها علاج باذن الله هو العلاج بياخد شويه وقت بس بإذن الله يجيب نتيجة
أنا: طيب يا دكتور والحقن المجهري .
الدكتور : لاسف يا مدام نغم المشكله عندك في االرحم محتاجة علاج وإنتظام وان شاء الله مع الانتظام هتجيب نتيجة.
خرجنا من عند الدكتور انا وخالد وفي احنا في صدمة طول الطريق ساكتين
ولما روحنا
خالد: لازم تنتظمي علي االادوية يا نغم لو سمحتي
أنا: حاضر يا خالد خالد أنا اسفه دي حاجة مش بايدي
خالد : عارف يا نغم وانا مقولتلكيش حاجه ولا لومت عليكي .
انا : طريقه كلامك يا خالد بتقول كدا
خالد بعصبية : ما أنا من حقي اكون اب يا نغم .
انا: وانا كمان من حقك اكون ام وافتكر لو الوضع اتعكس ما بنا عمري ما هتعصب عليك ولا احملك اي حاجة.
خالد انا نازل شوية وراجع حضري العشا
بعد ما خالد نزل كلمت صافي وحكتلها اللي حصل وانا بعيط
وفي مكالمتى معها
أنا لسه راجعة من عند الدكتور حالا الدكتور قالي اني عندي مشكلة كبيرة هتأخر الخلفة وخالد متعصب عليا جامد تعبانة أوى
صافي : هجيلك يا نغم حالا
انا : لا لا يا صافي متجيش خالد ممكن يجي في اي وقت وانا عاوزه خناق ولا وجع دماغ .
صافي : هجيلك وحتي لو جيه نقوله كنتي تعبانه
أنا : ماشي .
بعد نص ساعه صافي جاتلي
اترمت في حضنها وقعدت أعيط أنا ظاهريا كنت بعيط علي الخلفة بس داخليا كنت موجوعة من حاجات كتير اوي .
طريقه خالد الجافة معايا في التعامل إحساسي بالوحده مع إني حواليا ناس كتير .
خالد جيه وانا بعيط في حضن صافي .
خالد : ازيك يا صافي في إيه نغم مالها .
صافي : مخنوقه يا خالد من كلام االدكتور هي كان نفسها في نونو يملي عليكوا البيت .
خالد : كل شئ نصيب هي بس تسمع الكلام وتاخد العلاج بإنتظام .
لما قلوبنا بتتعود علي قسوة الى أدمنا قلوبنا بتزهق وتبطل تشكي او تحس بالوجع بيجلها حاجه كدا زي الامبالاه اللي هو اعمل الي تعمله مش فارقة
نهايه الحلقه التاسعة
الحلقة العاشرة
وبعد أن عرف والدي ووالدتي كلام الطبيب عن صعوبة الحمل كانوا اليد الحانية التي لامست قلبي في عز الضيق
كانت الحاجه الوحيدة اللي طيبت قلبي في اللحظة دي كل اللي عملوا أنهم أخدوني في حضنهم جامد وبابا قالي يا نغم مدام ربنا أراد ليك تأخير الخلفة اوعي تزعلي دا كدا رزق مش وجع زي ما أنتي فاهمة يمكن ربنا عارف انك مش جاهزة دلوقتي لا أنتي ولا خالد أنك تكونوا مسؤلين عن طفل دلوقتي يمكن ربنا بيحضركم الخلفة مش طفل وبس دا انسان تكوني مسؤلة عنه مسولية كاملة عن حياته عن بكره بتاعه تربي زي ما انا ربتك يا نغم اوعي تزعلي ومدام بتعملي الي عليكي وتاخد اللعلاج يبقي أتاكدي ان ربنا هيكرمك في الوقت المناسب لكي .
كلام بابا طيب قلبي في الوقت المناسب حست كأن ربنا بيطبب علي قلبي في عز ما كنت محتاجه لمسة حنان.
عادت يدي مرة اخري لصندوق الصور لتقع عيني علي صورة عمر وصافي
عمر كان زميلي في المجلة شاف صافي معايا كتير واتعرفوا علي بعض .
عمر كان شخص كويس جدا ابن حلال ومحترم وبيحب صافي وشاريها ، عمر كان عاوز يجيب لصافي نجمه من السما من كتر حبه فيها كل حاجه كانت عاوزها .
يوم فرح صافي
أنا : صافي أنا فرحانة بيكي اوي مش مصدقه نفسي انا مفرحتش كدا يوم فرحي .
صافي : نغم إنتي السبب في الجوازة دي أحلي هدية ليا منك يا حبيتي .
أنا: ربنا يباركلك في عمر شاريكي وبيحبك طول اليوم في المجله ملوش سيرة غير صافي لما جنني
يلا بقي علشان تطلعي لعريسك وضمتها بين حضني في فستانها الأبيض.
صافي إتجوزت بعدها بفترة قصيرة مكملتش 3 شهور بعدت عني الفترة دي بحكم أنها لسة عروسة وكدا
بعدها بفترة بدات الاحظ عمر علي طول ساكت
أنا : مالك يا عمر .
عمر : مفيش يا نغم .
أنا : لا في يا عمر علي طول ساكت ومش طبيعي مالك في حاجه مضايقك .
عمر : لا يا نغم بس اصل وقد زاد الضيق على ملامحه .
أنا : أصل ايه يا عمر مالك مش بقولك فيك حاجة زعلان مع صافي ولا ايه
عمر: صافي مش معايا من الاساس يا نغم انا مش حاسس اني متجوز مش حاسس اني عريس بتصحي الصبح تنزل تجري في النادي تخلص ترجع تفطر وتنزل تخرج تعمل شوبينج ترجع جايبه اكل من بره نتغدي وعاوزه تخرج نتفسح بقولها انا اقدر يوم اتنين مقدرش علي طول انتي عارفه احنا في المجله من 8 الصبح لحد 4 العصر وفي اوقات كتير بيكون عندنا تحضيرات شغل بليل هي فاكرني فاضي ولو معملتش اللي يرضيها تزعل وتتقمص وأنا تعبت من كتر ما بجي علي نفسي علشانها وهي ولا بتفكر فيا .
انا : معلش يا عمر متزعلش نفسك انا هتكلم معاها
عمر : ملوش فايدة يا نغم صافي مش بتسمع الا نفسها
أنا: أنا هحاول معاها متقلقش هكلمها بعد الشغل واروحلها كدا كدا خالد مسافر علي طول .
بعد الشغل خلصت وعدت علي صافي
أنا : إيه يا صافي الغيبه الطويله دي .
صافي : والله مشغولة علي طول يا نغم
أنا: أه ما أنا عرفت .
صافي : عرفتي من مين عمر قالك حاجة ؟
أنا : قالي بما اني اختك يا صافي مش بيشكي منك طبعا بس عاوزك بس تقدري شويه .
صافي: دي حياتي ومش هغيرها يا نغم انتي عارفه انا طول عمري عايشة كدا .
أنا : أيوه يا حبيتي بس الحياه قبل الجواز حاجة وبعدها حاجه تانية.
صافي : بقولك ايه يا نغم أنا مش عاوزة وجع دماغ حاضر حاول قدره ربنا يسهل ، المهم طمنني أنتي عليكي عامله ايه مع خالد والعلاج بتاع لحمل لسه برضه مافيش .
أنا : خالد تمام مسافر معظم الوقت وسايبني لوحدي وحتي وهوا موجود علي طول في شغله بيرجع علي النوم بس الحياة ماشيه العلاج أنا ماشيه عليه والله اهو يا صافي بقالي اكتر من سنة ولسه مافيش فايدة بس انا مش بفقد الامل .
صافي : ان شا الله يا حبيتي ربنا هيكرمك
أنا : يا رب يا صافي انا هروح بقي
صافي : ماتخليكي يا نغم شوية هتروحي تعملي ايه لوحدك .
انا : هحضر شغل بكرة وبنام بدري ما انتي عارفه مدام خالد مسافر بنام من بدري هقعد اعمل ايه لوحدي .
نزلت من عند صافي قعدت ألف شويه بالعربية ورورحت نمت علي طول من تعب اليوم والارهاق .
تاني يوم صحيت علي تليفون من عمر الساعه 7 الصبح .
عمر : نغم صباح الخير ممكن تنزلي بدري شوية عن معاد الشغل محتاج اتكلم معاكي
انا: أكيد يا عمر طبعا في ايه .
عمر : انا طلقت صافي يا نغم
انا: ايه؟؟؟؟؟؟؟؟ ايه اللي حصل
عمر : لما اشوفك
انا : جايه حالا يا عمر
اتصلت بصافي كتير مكنتش بترد عليا قولت يمكن نايمه هخلص مع عمر واروحلها علي طول
روحت لعمر لاقته مستني تحت المجلة.
عمر في ايه تعالي نطلع لسه مافيش حد جيه تعال اهدي وإحكلي .
أنا: في ايه يا عمر
عمر: طلقت صافي
أنا: ما انت قولتلي في ايه حصل تاني انا لسه مكلمة معاها امبارح
عمر : صافي بتخوني يا نغم .
انا: بتخونك ازاي يا عمر الكلام دا مفيوش هزار .
عمر : انا متاكد امبارح بعد ما نمنا سمعتها بتكلم حد في التليفون بتقوله أد إيه هي مش مبسوطة معايا وانها بس اتجوزتني علشان تنساه .
انا : ايه ؟؟؟؟؟ صافي عمر ما كان في حد حياتها ولو في حد كنت أنا أول واحدة هعرف يا عمر صدقني
انا : طيب إنت واجهتها .
عمر : لا يا نغم لو واجهتها كنت هقتلها انا كل الي عملته اني إستنت لما صحيت وقولتها انا مش مرتاح معاكي ولا انتي بتحافظي علي اسم الراجل الي معاكي انتي طالق .
انا وقد إحتل الذهول ملامحى : طيب رد فعلها كان ايه .
عمر : ولا حاجه قالتلي انها كمان مش مرتاحة معايا وكويس انها جت مني.
انا : مش مصدقة الي بتحكي عن صافي اكيد في حاجه غلط .
عمر : لا يا نغم مفيش حاجه غلط صدقني انا هسافر الأسبوع الجاي يا نغم أنا كلمت أستاذ منير وقولت له اني موافق علي السفر لمده 6 شهور تبع فرع المجلة في لندن وصلي لصافي اني هديلها كل مستحقاتها ونفقتها بعد كل اللي عملته علشان انا راجل وعلشان للأسف لسه جوايا جزء بيحبها أشوف وشك علي خير ..
أنا :أنا مصدومة من كل اللي الكلام الي بتقوله يا عمر اكيد في حاجه غلط .
سبت الشغل وروحت لصافي خبطت الباب جامد علشان تفتحلي .
انا: ممكن افهم ايه الكلام الي عمر بيقولوا دا يا صافي .
صافي : كلام ايه .
أنا: إنتي بتخوني عمر يا صافي
صافي وقد تبدلت ملامحها إرتباكا : انتي بتقولي ليه لا طبعا دا كداب صدقني يا نغم انا عمري ما اعمل كدا انتي اكتر واحده عرفاني .
أنا : علشان اكتر واحدة عرفاكي مش مصدقة يا صافي .
صافي : د ا بيفتري عليا علشان يطلع نفسه برئ أدامك .
انا : ازاي يا صافي وهو قالي إنه هيديكي حقوقك كاملة.
صافي : أنا قولتله مش عاوزة حاجة منه .
انا : صافي انتي بتحبي عمر ؟
صافي : لا يا نغم مش بحبه ومكنتش مرتاحه معاه دا الي انتي عاوزه تسمعي هو كان جوازة مناسبة ليا وخلاص .
ممكن يلا بقي تساعديني ألم هدومي ولا هترجعي شغلك ..
انا متنهدة في حيرة : هساعدك يا صافي أنا هاخد النهاردة اجازة
جوايا حاجة بتقولي أن في حاجه كبيرة وراه صافي بس في نفس متاكدة أن صافي صاحبه عمري مش ممكن تعمل كدا او حتي تكدب عليا .
و كم كنت غبية ومغفلة 💌….
نهايه الحلقه 10
بقلمي
#الكاتبة_نور_البشرى
#رواية_خيط_ضعيف
