قصه صوت المقص بيجيب الفقر
مين فينا مسمعش الجملة دي من أمه أو أبوه والأجيال القديمة عمومًا.. خلينا متفقين دي خرافة ملهاش أي أساس من الصحة.. بس ايه يخلي العدد ده كله من الناس ومحدش فيهم يعرف التاني ويتفقوا على حاجة واحدة وهي أن صوت المقص بيجيب الفقر!
أنا كنت طفل عنيد جدًا وفي مرة من المرات كأي طفل كنت مستمتع بقفل وفتح المقص لحد ما ابويا زعقلي “يابني بطل الزفت ده وسيب المقص”
في الأول إفتكرت إنه خايف عليا وبيزعق عادي زي ما بيزعق كل ما بمسك حاجة حادة
وفي يوم تاني اتكرر نفس الموقف مع أمي بس المرادي سمعت جملة مخي مبطلش تفكير فيها “سيب يابني المقص مش ناقصين فقر”
سألت ببراءة الأطفال: فقر ايه يا ماما؟
امي: الفقر ده حاجة وحشة لما بنقعد نفتح ونقفل في المقص بيجي الفقر.
سألت تاني: الفقر ده عفريت؟
امي: حاجة زي كده.. متعملش كده تاني بقى عشان العفريت ميجيش!
سيبت أمي وتفكيري اتشغل بالجملة دي لفترة طويلة دي لحد ما سمعت كلمة فقر في المدرسة وعرفت ان معناها قلة الفلوس.
قومت وقتها في نص الفصل سألت المدرس بتاعي بكل براءة: مستر هو مش الفقر ده عفريت؟
ووسط ضحك كل زمايلي جاوبني المدرس: لا يا كريم الفقر ده معناه أن واحد ميكونش معاه فلوس وساعات بنقولها على حد لما يكون نحس او بتحصله حاجات وحشة كتير.
سألت: وصوت المقص بيجيب اني فقر فيهم؟
المدرس: مين قالك كده؟
قولت: ماما
المدرس: ايوة مامتك صح.. المقص بيجيب الحاجات الوحشة.. متلعبش بيه بقى.
وطبعًا ده مشبعش فضولي وبما أن الصوت طلع مبيجبش عفريت قبل ما ادخل انام خدت المقص معايا اوضتي واستنيت لما البيت كله نام ومسكت المقص وفضلت أقفل وافتح فيه بسرعة شديدة.. محصلش حاجة في الٱخر فسيبته ونمت.. لكن قبل ما انام سمعت صوت مقص جاي من الشارع!
قومت بصيت من الشباك لقيت واحد شكله غريب ومرعب ماسك مقص وعمال يقفل ويفتح فيه!!
إتسمرت مكاني من الرعب متحركتش غير لما لقيته بصلي!
جريت تحت البطانية إستخبيت ونمت وأنا بعيط وجسمي بيترعش من الرعب
تاني يوم صحيت على صوت عياط وصريخ من البيت اللي قدامنا.. عرفت انهم لقوا جارنا ابو محمد صاحبي مات مقتول.. مقتول بمقص في رقبته!
فضلت طول اليوم ساكت وجسمي بيترعش لحد ما جه الليل.. مكنتش عارف انام من كتر الخوف.. واللي رعبني أكتر اني بدأت أسمع صوت مقص بيقرب.. الصوت كان بعيد.. بعد فترة قصيرة سمعته في الشارع تحت البيت.. بعد شوية سمعته جاي من صالة بيتنا!
صوت المقص بيقرب ومعاه صوت خطوات ثابتة.. عارفه طريقها ناحيتي.. الباب اتفتح ولقيته هو.. من اقرب كان شكله مرعب أكتر.. وشه مليان جروح وهدومه متبهدلة.. قرب مني وهو بيبتسم ومادد أيده.. في الأول خوفت لكني سمعت صوت طفل بيقول “متخافش يا كريم” الصوت ده كان خارج منه هو!
معرفش ليه صوته الطفولي ده طمني ولقيتني بمدله ايدي.. خدني معاه لبرا الاوضة بس الغريبة ان دي مكنتش شقتنا خالص.. باب الشقة اتفتح ودخل منه اب ومعاه ابنه.. الاب زق ابنه ورماه على الأرض بقسوة.. الأم خرجت من اوضة من اوض الشقة وهي بتصرخ على ابنها وبتحضنه.. والأب دخل المطبخ.. الغريب ان محدش فيهم كان شايفنا.. خرج الأب من المطبخ وفي ايده مقص.. وقرب من الطفل.. حاولت الأم تمنعه لكنه زقها بعيد وخد الطفل.. في الأول قصله شعره.. بعد كده بدأ يمشي بالمقص على جسمه ووشه!
كانت نفس الجروح اللي شوفتها على وش الغريب.. بصيت عليه لقيته بيعيط.. فهمت انه بيوريني طفولته وبيفهمني هو ليه بيعمل كده.
حاولت الأم تدخل مرة تانية لكنه بدأ يضرب فيها بعنف.. الطفل زعل على أمه وبدأ يضرب في أبوه ضربات من قبضة طفل مٱثرتش فيه لكنه ٱثارت عصبيته اكتر وفي لحظة عدم إدراك من الأب غرس المقص في رقبة ابنه.. الدم ملى المكان كله والإبن مات.. بصيت على الغريب اللي جنبي لقيته بيوريني رقبته.. كان فيها نفس الجرح ولسه بينزف!!
سيبته وجريت على اوضتي.. فضلت اصرخ واعيط.. دخل عليا ابويا.. مكنش فاهم مالي.. زعقلي عشان اسكت وابطل عياط.. حاولت اسكت وانام.. خرج ابويا من الاوضة وبمجرد خروج سمعت صوت المقص.. افتكرت ان محمد صاحبي كان بيشتكيلي ان أبوه بيعامله بقسوة.. وده اكيد اللي خلى الغريب يقتله!
جريت على بابا بسرعة لكني ملحقتش أعمل حاجة.. اول ما خرجت من الاوضة لقيت الغريب قاعد فوق جسم بابا وبيضربه بالمقص ضربات متكررة في رقبته!!
كانت حادثة صعبة.. لسه منستش المشهد ده طول حياتي.. عمري ما هنساه.. ومش هنسى ان صوت المقص بيجيب.. الأشباح!
