الرساله كانت بتقول
هتوحشني يا عمار يا صاحبي
رساله مكتوبه بأيد طفل صغير.. كنت عاجز عن التفكير ويا ترى ده عمار الشخص اللي قتل مراته وعياله واخوه ولا دي مجرد صدفه وعمار ده غير عمار ده
رجعت وخرجت من الاوضه ومن البيت كله… وركبت عربيتي عشان اتحرك لكن لقيت حد بيخبط على ازاز العربيه
فتحت الازاز لقيت راجل كبير في السن وبيسألني
_ حضرتك كنت بتعمل ايه جوه؟… وازاي دخلت وخرجت كده ومفيش حاجه اذتك؟
= وايه جوه هياذيني؟ وبعدين انا جاي هنا عشان عايز اعرف حاجه معينه وعرفتها خلاص
_ وحضرتك تبقى مين؟
= انت اللي مين وبتسالني بصفتك ايه؟
_ انا واحد من اهل المنطقه هنا وحضرتك دخلت بيت عندنا بدون اذن والمفروض ان البيت ده مهجور من سنين فممكن اعرف حضرتك مين؟
…
حسيت اني هعمل لنفسي مشكله فاضطريت احكيله على اللي حصل، وبعد ما خلصت كلامي.. اتكلم وقال
_ اه فعلا كان في هنا طفل اسمه قابيل.. وفي ولد كان جيرانهم اسمه عمار ومكنوش بيفترقوا عن بعض.. بس الكلام اللي كان بيتقال وقتها ان
عمار كان ممسوس من جنيه وعشان كده دايما اهل قابيل كانوا بيبعدوه عنه لحد ما اهل عمار اخدوا عيالهم وسافروا ومسمعناش عنهم حاجه من سنين.. وبعدها حصلت الحادثه اللي مات فيها اهل قابيل وهو دخلوه ده دار رعايه ده اللي سمعته ومن بعدها اتقطعت اخبار قابيل والبيت فضل مهجور زي ما هو
شكرت الراجل على كلامه واخدت عربيتي ورجعت على المصحه.. الدنيا كانت مقلوبه والشرطه ماليه المكان بسبب انتحار الدكتور سعد اللي ماسك ملف المريض من بعدي.. الله اعلم اي اللي خلى سعد ينتحر بس اكيد الموضوع يتعلق بقابيل، اكيد سعاده غلط جوه او قال حاجه مينفعش تتقال
وعشان كده اتسالت كام سؤال كده… زي اني كنت مثلا بلاحظ حاجه على الدكتور سعد، او هو قالى حاجه قبل كده انه مثلا مكتئب او تعبان
هو كان الرد اني لسه متعين جديد في المستشفى هنا ومعرفش دكتور سعد
وبعد ما التحقيق خلص.
…
دكتور رشوان طلبي يشوفني في مكتب.. وفعلا روحتله المكتب
بدا كلامه وقال
_ الظاهر كده كان عندك حق.. فعلا قابيل ده مش طبيعي، بس انا مكنتش متصور انها توصل لموت حد من الدكاترة
= طيب انا عندي حاجه عايز اوريهالك
_ حاجه ايه دي؟
…
مديت ايدي جوه جيبي وخرجت الصوره وحطيتها قدامه.. دي صوره قابيل واللي معاه في الصوره ده عمار
الدكتور رشوان ماسك الصوره وفضل متنح فيها وهو مش فاهم حاجه
وبعدها اتكلم وقال
_ معناه ايه الكلام ده؟
= ده معناه انه عمار وقابيل يعرفوا بعض من زمان هما متعرفوش على بعض في المصحه هم اتقابلوا صدفه بعد السنين دي كلها في المصحه
ويمكن هو ده السبب اللي مخلي قابيل ينتحل شخصيه عمار
بس في حاجه ناقصه انا عرفتها بس مش مصدقها
_ حاجه اي دي كمان؟
= انا عرفت انه عمار كان ممسوس من الجن.. وده خلي اهل قابيل يبعدوه عنه وبعدها اهل عمار سافروا وبعدها حصلت الحادثه لاهل قابيل لو الكلام ده صح يبقى اللي هيحل الموضوع ده حد يعرف عمار كويس وكان قريب منه السنين اللي فاتت
_ انت جبت المعلومات دي منين؟
= مش مهم جبتها منين يا دكتور، المهم دلوقتي انت تعرف حد من اهل عمار او في حد جه سأل على عمار هنا قبل كده؟
…
الدكتور رشوان سكت شويه وهو بيفكر وبعدها قال
_ اه انا افتكرت.. عمار ليه اخت جت زارته قبل ما يتحول للمحكمه انا فاكر انها كان اسمها سمر
= طيب معاك رقم تليفون ليها او عنوان؟
_ اعتقد انها سابت رقم تليفونها في الريسبشن.. لانها كان عندها امل ان الحكم يتأجل وكانت فاكره عمار هيرجع المستشفى تاني
= طيب انا هروح الريسبشن وهحاول اجيب الرقم.. لازم نفهم اي الموضوع بالظبط
…
خرجت من مكتب الدكتور رشوان على الريسبشن.. وبعد بحث طال لمده ساعتين لقيت رقم سمر اخت عمار
اتصلت بالرقم وردت عليا واحده فعلاً وكانت هي سمر
طلبت اني اقابلها في امر مهم جداً… ده طبعاً بعد ما عرفتها بنفسي
بصراحه كانت متعاونه جدا ووافقت
وبعد ساعتين بالضبط كنت قاعد قدام سمر في كافيه وبدأت معاها الكلام
_ استاذه سمر البقاء لله.. شد حيلك
= سبحان من له الدوام.. خير حضرتك كنت عاوزني في ايه معلش على اسلوبي بس انا مش عايزة اي حاجه تفكرني بعمار، فلو ممكن تسالني حضرتك عاوز ايه بالظبط عشان اجاوب على اسألتك وامشي
_ انا مقدر طبعاً الحاله اللي انتي فيها… وعشان كده كنت عايز اعرف منك ايه اللي حصل بالظبط من عمار من فتره السفر لحد الرجوع لمصر
يعني من الاخر… عمار كان بيعاني من ايه خلاه يعمل كده؟
= عمار اخويا ومن وهو صغير.. كان ممسوس من الجن مكنش طبيعي
ومحدش كان عارف السبب ايه؟… لفينا بيه على دكاتره وشيوخ لكن مكنش في فايده لحد ما والدي اخد القرار ان احنا نسافر بره وفعلا سافرنا دوله عربيه وعشنا هناك فتره كبيره وبعدها رجعنا مصر طول الفتره دي كان عمار بيتعرض على اكبر الشيوخ وللاسف محدش عرف يحل مشكلته.. المشكله اللي زادت وخلت عمار يشك في صوابع ايده
لحد ما اتجوز سماح وخلف منها ولد وبنت زي القمر.. ومن هنا اتفاجئنا ان عمار بيشك في مراته ومش اي شك ده بيشك انها بتخونها مع اخوه عمر.. بس محدش كان متخيل انها توصل للقتل وبس.. قدام النيابه قال ان هو مظلوم وان اللي قتلهم الجن اللي عليه
وعشان كده اتحول للمصحه
_ انا بشكرك جداً استاذه سمر.. واسف اني ضيعت وقت حضرتك
= لا أبداً مفيش حاجه
…
خرجت من الكافيه بعد ما خلصت مقابلتي مع سمر.. وطلعت على المصحه دخلت لدكتور رشوان وقلتله
_ مفيش غير حل واحد، لازم نواجه قابيل بحقيقته.. انا فهمت كل حاجه بس لو حكيتلك مش هتصدقني.. بس كل اللي اقدر اقولهولك ان قابيل بيتعذب.. الجن اللي كان على عمار خرج من جسمه بمجرد موته ودخل جسم قابيل.. ومن الواضح ان هو جن مؤذي عشان كده لازم اتكلم مع قابيل الانسان مش مع جن لازم اقول لقابيل حقيقته ساعتها هنشوف وش قابيل مش وش الجن
= انا مش فاهم اي حاجه من اللي انت بتقولها.. بس اللي اعرفه ان مواجهه قابيل بحقيقته ممكن تنهي حياته
_ حياتي تنتهي.. احسن ما يكون اداة بيستعملها جن عشان يقتل البشر اللي حواليه
…
لقيت قابيل رفع راسه وبصلي
فاتكلمت وقولت
_ ازيك يا عمار.. انت عمار مش كده، الشخص اللي قتل مراته وعياله واخوه صح
=ايوه انا قتلت مراتي وعيالي، الهانم كانت بتخوني ومش مع اي حد لا مع اخويا.. اه انا اللي قتلته هو كمان وانا مش ندمان هما يستاهلوا اللي عملته فيهم وانا ماستاهلش اكون موجود هنا
انا مش عارف انتوا بتحاسبوني على ايه؟
على اني دافعت عن شرفي وبتتهموني بالجنون والله ما في حد مجنون غيركم
بعد ما قابيل خلص كلامه بصتله وقلتله
قابيل انا عارف انك عشت صدمه كبيره، ويمكن وجودك هنا من زمان هو اصعب حاجه حصلتلك بس انا عايز اقولك حاجه
انت شوفت عيلتك بتتقتل قدام عينيك.. وعشان كده جتلك صدمه عصبيه حادة ومسح مؤقت للذاكره ومن بعدها دخلت دار رعايه ولما كبرت جابوك المصحه وهنا بقى اتعرفت على عمار او قابلت عمار
عمار اللي كان صديقك وانت صغير.. ولما مات قولت على نفسك عمار عشان تعمل لنفسك ماضي وعشان تبني حياه لنفسك بدل الحياه اللي انت فقدتها
…
في اللحظه دي حصل المتوقع قابيل مسك راسه وفضل يصرخ وكانه افتكر اللي حصل زمان.. افتكر عيلته اللي ماتت قدام عينيه وافتكر السنين اللي قضاها ما بين دار الرعايه والمصحة
وفي لحظه واقع على الارض وكل شيء انتهى
قابيل دخل في غيبوبه عشان مقدرش يستحمل اللي سمعه وفضل في الغيبوبه دي اسبوع كامل.. لحد ما اتصل بينا الدكتور المسؤول عن حالته في المستشفى وقال
البقاء لله المريض توفى النهارده.. قلبه وقف وحاولنا انعاشه لكن قدر ربنا كان نفذ
…
يمكن فات على قضيه قابيل سنين كتير وانا دلوقتي هتسلم مكتب مدير المصحه بس كل اللي اقدر اقوله انها اغرب حاله عدت عليا طوال دراستي وعملي في الطب النفسي
…
تمت
