قصة الكاشف

الكاشف

٣

“معقول يكون لؤي قاتل!… طب ولو هو اللي قتلها، قتلها ليه وازاي؟!.. وبعدين ريحة الكولونيا دي معناها ايه!.. انا هتجنن!!”

فضلت اتكلم مع نفسي وانا قاعد على كنبة الصالة لحد ما حسيت إن دماغي واحدة واحدة بتتقل، فردت جسمي على الكنبة وقولت اريح شوية لأن الظاهر كده ماعرفتش انام كويس بسبب الحلم او الكابوس اللي عيشته من شوية… وقبل ما تسأل نفسك انا زي عيشت كابوس، فانا هجاوبك.. الشخص اللي بيتولد كفيف بيحلم زيه زيك، لكن احلامه بتبقى شبه حياته بالظبط، اصوات واحاسيس وروايح.. إنما ألوان ونور، لأ.. انا ماعرفش يعني ايه نور، ماعرفش يعني ايه ألوان ولا ملامح.. انا لما بحلم بحس واسمع واشم، إنما مابشوفش في الحلم.. وده على عكس الشخص اللي اتولد بيشوف وبعد كده اتعرض لحادثة او لأي حاجة خلته يبقى كفيف، الشخص ده لما بيجي يحلم، ذاكرته وعقله الباطن، بيخلوه يشوف ألوان وصور حتى لو هو كفيف في الحقيقة.. وعشان كده انا سمعت وشميت وحسيت في الحلم اللي حلمته قبل ما اصحى على خبطات فهيم، وبرضه نفس اللي حصل في الحلم او الكابوس الأولاني.. حصل في الحلم التاني، اه.. ما انا لما فردت جسمي على كنبة الصالون، سمعت وقتها صوت باب شقتي بيتفتح، ومع صوت فتح الباب.. شميت نفس الريحة، ريحة الكولونيا!

قعدت في مكاني وابتديت اركز مع الأصوات اللي سمعتها، والأصوات دي كانت جاية من أوضة النوم، كانوا صوتين بالتحديد.. صوت واحدة ست، وصوت راجل.. وشوية شوية ابتدت الأصوات تقرب وتوضح اكتر..

-يلا.. هسيبك انا بقى واطلع للبقف اللي فوق ده عشان اخد منه الإيجار المتأخر.

كان صوت مين بقى.. مش لؤي لأ، ده كان صوت استاذ أمين، ابوه!

ورد عليه صوت الست، اللي هو كان صوت فاطمة..

-ماشي.. خلص وانزل لي عشان عاوزة ابلغك بخبر هيفرحك.

-خبر!.. خبر ايه ده؟

-لما تنزل هبقى اقولك.

وقتها حسيت بصوت استاذ أمين وهو متعصب لما رد عليها..

-مابحبش المفاجأت.. قولي واخلصي.

سكتت شوية وبعد كده ردت عليه بسعادة..

-انا حامل يا سي أمين.

بعد كلامها ده ماسمعتش حاجة.. السكوت دام لفترة، بعدها اتكلم أمين وقال لها..

-والمطلوب؟!

-نتجوز يا اخويا.. اطلق من جوزي ونتجوز، هو كده كده مابيخلفش، وبعدين هو مسافر بقاله ست شهور.. يعني لا هينفع اكدب عليه واقوله إن ربنا استجاب لدعواته وبقيت حامل منه، ولا حتى هينفع البسه العيل، انا كده هتفضح.

-تتفضحي!.. ما انتي اصلًا مفضوحة.. انتي شمال.. انا يا روح امك مابخلفش، شوفي انتي غلطتي مع مين وعاوزة تلبسيني غلطتك.

قصة الكاشف

اتعصبت فاطمة وقالتله بغضب وهي موطية صوتها..

-انت هتصيع عليا انا يا أمين.. اُمال لؤي ده يبقى ابن مين، ولا هي بقى الله يرحمها كانت بتستغفلك هي كمان و..

اول ما قالت كده سمعت صوت ضرب.. وكأن أمين بيضرب فاطمة وهو بيقولها..

-اوعي تجيبي سيرتها على لسانك النجس ده، دي كانت ست الستات..

ومع كلامه ده سمعت صوت خبطة قوية، بعدها ماسمعتش اي حاجة، غير بس صوت باب الشقة وهو بيتفتح وبيتقفل تاني!

ومن بعد صوت قفل الباب المرة دي، ابتديت احس بحركة حد معايا في الشقة، وفي نفس الوقت كنت سامع صوت خطوات بتقرب مني.. خطوات مع قرب صاحبهم، حسيت بهوا سخن بيقرب مني، حاولت اقوم من مكاني ماعرفتش، زي ما اكون اتشليت او جسمي لصق في الكنبة..

-أشرف.. انت سمعت كل حاجة، هو السبب.. هو اللي القاتل يا أشرف.. هو اللي قتل يا أشرف.. هو اللي قتل…

وعند كلمة هو اللي قتل دي، سمعت صوت خبط على الباب!

في اللحظي دي حسيت إن روحي بتتسحب مني، او كأن روحي كانت برة جسمي وبترجعلي من تاني.. احساس غريب ماعرفتش افسره، انا كل اللي عرفت افسره كويس، هو إن بعد الإحساس ده، اكتشفت إنِ لسه نايم على كنبة والباب عمال يخبط.

روحت بسرعة فتحت الباب وسألت..

-مين؟!

رد عليا صوت راجل غريب..

-انا الأمين محمد.. انت أشرف عواد؟!

رديت عليه وانا ببلع ريقي..

-ايوة انا.. خير؟!

-حضرة الظابط عُمر بيه ناجي عاوزك في القسم، بيقولك هياخد اقوالك في حاجة مهمة بخصوص المتهم لؤي وهيمشيك على طول.

قصة الكاشف

اول ما أمين الشرطة قال جُملة المتهم لؤي دي، حسيت إن انا اتجمدت في مكاني والكلام بقى بيخرج مني بالعافية..

-المتهم.. لؤي!.. هو لؤي بقى متهم امتى وازاي؟!

-ماعرفش.. تعالى معايا القسم وابقى اسأل البيه بنفسك.

-حاضر.. اديني بس ثواني اغير هدومي واجيلك.

قفلت الباب ودخلت غيرت هدومي وخرجت لأمين الشرطة اللي روحت معاه القسم ودخلت لمكتب الظابط عُمر، رحب بيا وطلبلي حاجة ساقعة كمان، بس قبل ما يقول لي اي حاجة سألته..

-أمين الشرطة يا فندم بيقول إن لؤي متهم.. ازاي، لؤي بقى متهم امتى وازاي؟!

-اه متهم يا أشرف.. وعشان كده انا استدعيتك، انت اكتر واحد كان على علاقة قوية بلؤي.. وبيني وبينك كده، انا حاسس إنك كنت عارف، بإنه كان على علاقة بالقتيلة.

-علاقة!.. علاقة ايه يا فندم بس، ده لؤي خاطب وبيحب خطيبته جدًا وكمان..

قاطعني بسرعة..

-وايه يعني خاطب.. هو كل واحد خاطب يعني مستحيل يلعب بديله!.. وبعدين يا أشرف احنا ماتهمناش لؤي من غير أدلة.. لؤي كان على اتصال بالقتيلة، لقينا رقمه في سجل المكالمات بتاعت الموبايل، وكمان لقينا رقم غريب كده مش متسجل بأسم، لما اتصلنا بيه لقيناه مقفول واخر مرة تم استخدامه كان في نفس المنطقة اللي هو ساكن فيها.. يعني كان بيكلمها من رقمين، وكمان القتيلة كانت حامل، وجوزها مابيخلفش.. ده غير عينات ال.. السائل المنوي اللي لقيناها في رحم القتيلة جنب الجنين اللي عمره تلات شهور واسبوعين… كل دي حاجات بتؤكد إنه هو اللي قتلها، بس تعرف بقى الحاجة الغريبة فين.. لؤي لما قبضنا عليه الضهر بعد ما نزل من عندك، قال لنا قصة غريبة اوي.. قال لنا إنه كان بيكلمها اه بس ماكنش في ما بينهم علاقة، دي كانت على علاقة بواحد صاحبه إسمه أكرم.. وصاحبه ده مات أوفر دوس مخدرات من اكتر من اربعين يوم.. وقال لنا كمان إن اكرم قبل ما يموت، قال له إن فاطمة كانت حامل منه وهو كان على علاقة بيها، ف لؤي بيقول إنه كان بيتصل بيها عشان تنزل الجنين، وحاول كتير يتواصل معاها واتخانق معاها اكتر مرة في التليفون، وهي تملي كانت بتقوله لأ.. وكمان كانت بتقوله إنها هتحتفظ بالجنين وهتقول لجوزها إنه يبقى إبنه.. بس طبعًا لؤي كان بيقولها لأ، لأن ده من وجهة نظره يعني هيشيل صاحبه ذنوب وهو ميت اكتر ما هو شايل.. بس تعرف، كل الحدوتة دي مادخلتش دماغي بمليم احمر.. انا شايف إن لؤي بيكدب وبيقول أي كلام عشان يطلع منها، وكمان انا شايف إنك عندك كلام مهم ممكن يفيدني.

بعد ما الظابط قال كلامه ده، رديت عليه بسرعة..

-صح يا عُمر بيه، انا عندي كلام هيفيدك.. بس الكلام اللي هقوله ده مش هيرجح كلامك ولا ظنك بأن لؤي هو القاتل.

-اُمال؟!

قصة الكاشف

-هقول لحضرتك، هحكيلك على كل حاجة وارجو منك إنك تصدقني، بس قبل ما احكيلك خليني اقولك حاجة بسيطة في الأول، انا يا فندم كفيف.. من يوم ما اتولدت والدنيا حواليا ضلمة، بس ربنا عز وجل زي ما أخد مني نعمة البصر لحكمة لا يعلمها سواه.. ف برضه اداني او عوضني عنها يعني بنعمة البصيرة..

وكملت كلامي وحكيت له على كل حاجة، حكيتله على الحلمين وعلى موضوع ريحة الكولونيا وعلى كل اللي مريت بيه، وبعد ما خلصت كلامي عن الاحلام وعن اللي شكيت فيه، كملت كلامي وقولتله..

-انا يا فندم شايف إن القاتل يبقى استاذ أمين لأن الكولونيا دي بتاعته هو اصلًا ولؤي مش من عادته يحلق في البيت.. وحقيقي انا ماعرفش هو ازاي مابيخلفش ولؤي ابنه، وبرضه ماعنديش أي اجابة عن اي حاجة ممكن حضرتك تسألهالي، انا اصلًا ماكنتش اعرف إن لؤي يعرف فاطمة ومعاه رقمها.. بس أظن إن حضرتك لو جيبت استاذ أمين وضغطت عليه، ممكن يعترف بكل حاجة.

ضحك الظابط بعد ما قولت كده وقال لي..

-انت بتقول ايه بس.. ماهو لو أمين القاتل، ازاي هيسيب ابنه يروح في داهية وهو واقف بيتفرج عليه!

-يا بيه ما انا قولت لحضرتك إن أمين مابيخلفش، انا سمعته في الحلم بيقولها كده.

-ايووه.. في الحلم، ده لو هنفترض إن الهري اللي انت قولته ده صح يعني، فهو في الأخر حلم.. إنما الحقيقة بقى هي إن لؤي هو اللي قتلها، وكمان دقايق هتجيلي نتيجة تحاليل السائل المنوي بتاعت لؤي، التحاليل اللي عن طريقها هتأكد بأنه فعلًا كان على علاقة بفاطمة قبل ما..

مالحقش الظابط يكمل كلامه، سكت لما تليفونه رن، والظاهر كده إنه رد عليه لأن بعد ما صوت الرنة سكت، سمعته بيقول..

-ايوة يا دكتور هنائي.. اه اه.. هو.. ايه!.. ازاي يعني عينة السائل المنوي مش متطابقة!.. طيب طيب، ابعتلي التقرير يا دكتور عشان ابعته للنيابة الصبح مع المتهم.

بعد كده سكت شوية وقال لي..

-العينات مش متطابقة يا أشرف.

رديت عليه بسرعة..

-ما انا قولت لحضرتك يا فندم.. اللي كان على علاقة بيها هو أمين مش لؤي، وموضوع إن لؤي مش ابنه ده.. والله العظيم انا ماعرفش عنه اي حاجة غير اللي سمعته في الحلم وحكتهولك، بس الظاهر كده إنه سابه يروح في داهية لأنه مش ابنه.. ده التفسير الوحيد يعني.

سكت الظابط شوية وبعد كده سمعته بيقول وكأنه بيتكلم في التليفون..

-ايوة يا محمد.. خد الرجالة وروح هات لي أمين ابو لؤي من البيت، بسرعة..

سكت شوية وبعد كده قال لي..

-اديني بعتت اجيبه وهاخد منه عينة، ولو طلعت متطابقة، ساعتها بقى هتبقى الجريمة لبساه لبساه، وكمان هنقدر نعرف منه هو ازاي لؤي مش ابنه زي ما انت قولت.

ولحد هنا كان خلص الكلام ما بيني وما بين الظابط عُمر.. واللي حصل بعد كده كان زي ما توقعت بالظبط، الحكومة لما قبضت على أمين وخدوا منه عينة وقارنوها بالعينة اللي كانت في رحم فاطمة.. طلعت متطابقة، ومش بس كده.. ده كمان لقوا بصمات له في الشقة، وطبعًا بعد كل الادلة دي اعترف.. اعترف بإنه كان على علاقة بفاطمة اللي في نفس الوقت كانت على علاقة بأكرم صاحب لؤي وبقت حامل منه هو مش من أمين.. وده ببساطة لأن أمين فعلًا مابيخلفش، ولؤي مايبقاش إبنه.. هو ابن مراته، مراته اللي اتجوزها وقت ما كانت حامل من راجل غلط معاها وساب لها قرشين وهرب.. فاتجوزها أمين وكتب الواد بأسمه عشان الست ماتتفضحش، وفي نفس الوقت، خد منها كل اللي حيلتها واشترى العمارة اللي انا ساكن فيها دي، وكمان اشترى محلين وفتحهم سوبر ماركت.. ومن بعد ما الست ماتت وهو بقى مقضيها مع الستات من غير ما الناس تعرف عنه حاجة.. هو بس كل اللي كان باين منه، هو استاذ أمين الشخص المحترم البخيل صاحب الأملاك.. وهو في الحقيقة كان شيطان، شيطان بسببه اتكسر استاذ فهيم وساب العمارة ومشي.. وبسببه كمان لؤي باع العمارة والمحلات وخد بعضه وسافر هو وخطيبته بعد ما اتجوزها ونسي موضوع ابوه الحقيقي ده خالص، لأنه لما سأل أمين.. قال له إن ده كان سر امه ماقالتهوش لحد، واندفن معاها، اما بقى أمين نفسه.. فهو من بعد اللي حصل وبعد ما اعترف بكل حاجة واتسجن.. من بعدها وهو تعب جدًا واتنقل للمستشفى ومات فيها… وبالنسبة لوضعي انا بقى؛ فانا لؤي بعد ما العمارة بقت بتاعته من بعد ما أمين كتبها بإسمه هي والمحلات.. وقبل ما يبيعهم ويسافر، كتب لي الشقة اللي انا عايش فيها دي بإسمي بيع وشرا.. ودلوقتي.. اديني اهو، لوحدي.. لسه عايش لوحدي، ولسه برضه شغال في النايت كلوب زي ما انا ومابقتش بحلم بأي حاجة تخص فاطمة او جريمة قتلها.. بس تعرف، انا من بعد اللي حصل ده، اتعلمت حاجة مهمة اوي؛ احنا كل واحد فينا جواه بلاوي متدراية، تمام زي أمين اللي ربنا أراد إن كشف مصايبه تبقى بسبب أحلام شخص كفيف زي حالاتي.. بس البلاوي دي، ربنا عز وجل بيخليها مستورة عن عيون الناس عشان العبد يتوب ويرجع عنها قبل فوات الأوان.. واللي مابيستغلش المهلة اللي ربنا بيديهاله عشان يفوق ويرجع عن الغلط اللي هو فيه، وبيتمادى بقى وبيفتكر إن ربنا مش شايفه، في النهاية بيقع في شر بلاويه وبتكون نهايته يا أما زي أكرم اللي مات أوفر دوس مخدرات بعد ما فاطمة بقت حامل منه، او فاطمة او اللي استغلت غياب جوزها وعملت علاقة مع امين واكرم، او أمين اللي فاطمة انت عاوزة تلبسه ابن مش ابنه بسبب مشيه المنيل واللي بسببه قتل واتسجن.. بس ايه ده.. ده صوت الباب بيخبط، ثواني هفتح..

-مين؟!

-ازيك يا أستاذ أشرف.. مش حضرتك برضه استاذ أشرف بتاع الناي.. انا الحاج رؤوف صاحب العمارة الجديد، جيت عشان ارحب بيك واقولك إنك لو تعرف حد ممكن ياخد الشقة الفاضية اللي تحتك ابقى قول لي.. استاذ اشرف.. يا أستاذ.. سرحت في ايه!

-ها.. لا لا مافيش.. اهلًا وسهلًا بيك.. حاضر.. لو.. لو عرفت إن حد عاوز شقة، اوعدك إن انا مش هقوله على الشقة دي مهما حصل، حتى لو ببلاش… وعن إذنك عشان عاوز انام.

قفلت الباب وانا سامعه من برة بيقول وهو نازل على السلم..

-استغفر الله العظيم يارب.. الناس اتجننت! ولا هو الراجل ده مغفل ولا ايه!

انا برضه اللي مغفل.. ولا اللي اشترى العمارة من غير ما يعرف أن اتقتلت فيها واحدة ست هو اللي مُغفل!

تمت

محمد_شعبان

قصة الكاشف