في سنة 2009 بمحافظة الباحة السعودية كان ف طفلة اسمها “زهور” عندها ٨ سنين.. كانت الطفلة زهور رايحة مدرستها مع اختها الكبيرة… زهور كانت بتدرس في مدرسة خاصة لتحفيظ القرآن… المدرسة دي كانت موجودة في منطقة جبلية في الباحة السعودية..
زهور كانت ماسكة ايد اختها الكبيرة وماشيين.. فجأة وهما ماشيين وقبل ما يوصلو للمدرسة.. زهور فجأة شالت ايديها من ايد اختها وراحت جارية في طريق عكس الطريق اللي ف المدرسة! اخت زهور انصدمت لما شافت اختها بتجري بطريقة غريبة جدا! كانت بتجري بسرعه ماتناسبش عمرها خالص! دي في لحظات بقت بعيدة عنها! اخت زهور جريت وراها ومقدرتش تلحقها من سرعتها الغريبة واللي كانت فعلا سرعة مستحيل طفل في عمر ال ٨ سنين يجريها!…
اخت زهور رجعت البيت لما خلاص فقدت الامل في انها تلاقي اختها زهور! روحت البيت واول ما امها شافتها جايه ومن غير اختها قالت لها:
– فين اختك؟ ومال وشك اصفر كده ليه؟
مكانتش عارفه ترد ع أمها تقولها ايه؟ كان وشها مخطوف ومرعوبة جدا.. ف الاخر حكت لامها كل اللي حصل من اول ما زهور سابت ايدها ولحد ما جريت بسرعة جنونية ماتناسبش سنها! الأم صرخت لما سمعت كلامها! بسرعه اتصلت ب الأب ف شغله وبدوره جه اول ما عرف ان بنته تاهت!…
جه الأب وبدأ البحث عن بنته زهور.. اتصل بكل المعارف اللي كانوا قريبين من منطقة الباحة يمكن يعني تكون راحت لهم.. بس هي مارحتش لحد من قرايبهم.. بدأ يسأل الجيران اذا كان حد شافها.. بس برده محدش شافها خالص.. وراح للمدرسة ودور في المنطقة كلها وملقيش ليها اثر؟ راحت فين زهور؟
فضل اليوم كله يدور ع زهور ولما خلاص فقد الامل في انه يلاقي بنته رجع البيت وهو حزين جدا ع فقدانه لبنته.. الأم فضلت تعيط طول الليل.. لحد ما فجأة بليل الباب خبط وكانت هي زهور بنتهم! شكلها كان يخوف.. شعرها منكوش وهدومها متبهدله ومقطعه! دخلت زهور والام فضلت تحضن فيها والاب يسأل اختفت وراحت فين؟ زهور ردت عليهم وقالت:
– مش فاكرة حاجة! كل اللي فاكراه اني لقيت نفسي في وسط الوادي… وبعدها لقيت نفسي قدام باب البيت ومعرفش مين جابني عند الوادي ومين رجعني للبيت!…
الاب كان مصدوم لأن الوادي ده مكان بعيد جدا ف اخر الجبل وصعب ان بنته تروح للمكان ده! ازاي هي راحت هناك؟ ده لغز!…
حكت البنت زهور كمان انها كانت سمعه صوتهم؟ صوت الاب والأهالي اللي كانوا بيدوروا عليها بس مكانتش شيفاهم!..
بعدها الام اخدت البنت ودخلتها الحمام وبعد ما استحمت لبستها هدومها…
زهور من يوم ما رجعت ومبقتش طبيعية خالص؟ كانت بتفضل قاعدة في اوضتها ونايمة ع السرير وبتبص للسقف وتفضل تحرك راسها يمين وشمال كأنها بتراقب حد! ده غير انها كانت بليل ساعات امها تسمعها بتعيط وساعات تسمعها بتضحك وساعات تانية كانت بتكلم حد مش موجود!…
زهور بقت واحدة تانية خالص من يوم ما رجعت.. مبقتش تاكل وجسمها قل جدا! وكمان مبقتش تتكلم وده كان غريب ع زهور لانها معروفه انها بنت بتتكلم كتير وشقيه جدا! ودوها لأطباء نفسيين وموصلوش لحاجة.. وودوها لمعالجين وشيخ منهم قال انها ممسوسة!…
الشيخ قالهم ان بنتكم زهور ممسوسة ب جن ! قالهم كمان ان علاجها انكم تسيبو المنطقة كلها وتروحوا تعيشو ف مكان تاني! يعني الشيخ كان عايز يقولهم انهم يسيبو منطقة الباحة ويروحوا مكان تاني!..
فعلا الاب اخد بنصيحة الشيخ وسابو الباحة كلها وراحو يعيشو في منطقة تانية….
لما سابو المنطقة زهور بدأت تتحسن.. هي اه مش تحسن كبير لكنها بدأت تأكل وتتكلم مع أهلها زي الاول بس لسه بتسرح وتبص ف السقف!…
ف المنطقة الجديدة أبو زهور رفض انه يودي بنته للمدرسة لانه كان خايف عليها جدا! خايف تضيع منهم تاني… مر فتره وهي مش بتروح المدرسة.. فهنا الأم بدأت تكلم الأب ان كده كفاية وخلاص زهور بقت كويسة نرجعها للمدرسة بقى وتعيش حياتها… بس الاب كان رافض.. هو معذور خايف ع بنته… بس مع إلحاح الأم والأقارب الأب وافق ان بنته تروح المدرسة بشرط انه هو اللي يوديها المدرسه!..
بالفعل الأب قدم لبنته في مدرسة لتحفيظ القرآن بالمنطقة الجديدة.. وراح اول يوم يوديها المدرسة بالعربية.. اول ما وصل نزل من العربية ومسك ايد بنته ومشي لحد بوابة المدرسة.. عشان فجأة البنت تسيب ايد ابوها وتجري بعيد عن المدرسة بسرعة كبيرة جدا متناسبش سنها! الاب انصدم! ركب عربيته وبدأ يجري وراها بالعربية! متخيلين ان الاب بيجري ورا بنت عندها 8 سنين ب عربية! وده معناه ان البنت كانت بتجري بسرعة أكبر من العربية؟ وده شيء غريب معناه الوحيد ان البنت تحت تأثير قوة خارقة!…
فضل يجري وراها والبنت كانت بتدخل تدخل في شوارع! كل ما كان الأب يقرب ع بنته تبعد فجأة! يفضل يجري بالعربية اكتر والبنت تبعد وتعبد لحد ما البنت اختفت! اختفت و مبقاش ليها اثر!…
صدمة اتعرض لها الأب! واللي حصل بعد كده كان مرعب جدا وغريب؟!
ايه اللي حصل؟ ده هنعرفه بكرة ف الجزء التاني…
القصة دي حقيقية كل حرف مكتوب مش من تأليفي انا مجرد ناقل للحكاية بس بأسلوبي 
الجزء التاني والاخير من حكاية زهور ومارد الجن
اختفت الطفلة “زهور” من قدام أبوها.. لما وصلت المدرسة وكانت ماسكة فى ايد ابوها.. فجأة شالت ايديها زي ما عملت مع اختها ف أول مرة اختفت فيها ! البنت شالت ايدها من ايد ابوها وجريت في الطريق المعاكس للمدرسة بسرعة غريبة جدا! الاب انصدم من اللي شايفه .. هو شايف بنته بتجري كأن رجليها مرفوعه من الأرض وبتطير بسرعة كبيرة جدا مستحيل أن طفلة في عمرها تجري كده!..
الأب ركب العربية بسرعة وجري وراها.. كانت بتجري ف اماكن كتير.. تجري وسط الشوارع والبيوت.. وهو كان وراها باعلى سرعة.. فضلت تجري وتجري لحد ما فجأة غابت عن عين الأب واختفت!.. الأب انصدم.. نزل من عربيته.. وحاطت ايده الاتنين ع راسه وعمال يتلفت حواليه.. البنت اختفت كأن الأرض انشقت وبلعتها!..
رجع الأب للبيت وهو حزين ع فقدانه لبنته! الام اول ما سمعت الخبر انهارت ف العباط.. هما ما صدقو ان الايام الصعبة اللي عاشوها في وقت اختفاء بنتهم راحت.. واهو البنت اختفت تاني وهترجع تاني الايام الصعبة.. مكانوش متأكدين من ان البنت هترجع فجأة زي ما رجعت المرة اللي فاتت ولا المرة دي الغياب هيستمر لفترة أطول؟!
أهل زهور في قريتهم القديمة اللي في الباحة عرفوا باختفاء زهور للمرة التانية… جم بسرعة وانضموا مع الأب بالبحث عن زهور… بحثوا عنها ف المنطقة القريبة من المدرسة اللي اختفت فيها… بحثوا في كل حته و البنت ملهاش إثر!….
مر يوم كامل والبنت مرجعتش… زهور مرجعتش زي ما رجعت المرة اللي فاتت.. الايام بتمر.. يوم والتاني واسبوع شهور ع اختفاء زهور! كان الأهل والجيران طول الشهور دي بيدور ع زهور كل يوم صبح وليل بين الجبال والوديان وف كل حته .. لكنها مرجعتش.. امها كانت بتروح هي كمان تدور عليها بين الجبال وكانت بتبقى معاها المصحف تفضل تقرأ فيه وتنادي عليها لكن من غير فايده..
مر ع اختفائها ٨ شهور كاملين!….
مر ال ٨ شهور ع اهل زهور كأنهم ٨ سنين… وفي يوم من الايام جه اتصال لابو زهور بيقول المتصل أن زهور موجودة في منطقة “تهامة” ودي منطقة بعيدة جدا بتبعد عن المنطقة اللي هما قاعدين فيها ب 100 مرت! انصدم الأب ازاي بنته هتقدر تمشي المسافة دي كلها!..
الأب مكانش قدامه غير انه يصدق كلام المتصل حتى لو كلام مش منطقي! مهو اللي بيحصل مع بنته مش منطقي اصلا! راح له ع تهامة وهناك. قابل الراجل اللي اتصل بيه وقاله ان بنتك موجودة بالبيت اللي موجود في المنطقة الفلانية عند الجبل… البيت ده بيت صغير قاعدة فيه ست عجوزة… راحلها الأب وهناك العجوزة قالت له ان ف يوم من الايام الباب خبط عليا ف وقت متأخر من الليل.. لما فتحت لقيت بنت صغيرة لابسة لبس مدرسه ومقطع.. وشكلها كان متبهدل! شعرها منكوش وعليه وساخة!…
المهم البنت طلبت مني اشربها مايه واول ما دخلت عشان اجبلها مية… خرجت ملقتهاش.. وده كان غريب لان مغبتش عنها غير ثواني!….
العجوزة أول ما البنت اختفت راحت ع جارتها وحكت لها اللي حصل.. جارتها قالت لها ان دي اكيد البنت زهور اللي مختفيه عن أهلها من ٨ شهور.. وقالت لها ازاي متعرفيش قصة البنت دي.. ده كل سعودي عارف قصتها!…
العجوزة ع طول بلغت الراجل اللي اتصل ب ابوها وبدوره هو اتصل بيه….
والعجوزة كمان قالت للأب دور ع بنتك ولازم تلاقيها البنت عطشانة جدا!..
الأب اتصل بكل معارفه وكلهم جم لمنطقة تهامة.. فضلو يدورو في الجبال والوديان.. منطقة تهامة منطقة معروف انها فيها وديان كتير.. الغريب لما كانوا بيدوروا ف الليل وف وسط الجبال كانو طول الطريق بيسمعوا أصوات بكاء زهور! كانت زهور بتعيط وتستنجد بامها وابوها! لما كانوا يروحوا ورا الصوت.. يلاقو الصوت اختفى وبقى ف مكان تاني.. بيروحوا ورا الصوت وبرضو يختفي ويظهر ف مكان تاني.. فضلو كده كتير وللأسف ملقيوش البنت زهور برضه!…
ابو زهور مبقاش عارف يعمل ايه.. هو سامع صوت بنته بس مش قادر يوصلها! ملقاش غير حل واحد وهو انه يجيب شيخ ويحكي له كل حاجة جايز يساعده… فعلا جاب الشيخ للمنطقة اللي بيسمعو فيها صوت زهور.. والشيخ قالهم ان بنتكم ف المكان ده بس مستحيل تقدرو توصلو لها؟! وده عشان هي ممسوسة بجن عاشق! جن بيعشق بنتكم ومتملكها ورافض انه يسبها!…. وجاب شيخ تاني وقالو الشيخ ان بنتكم مخطوفة من مارد قوي جدا من جن المنطقة! الجن اللي مسيطر ع المنطقة اللي اختفت فيها زهور هو اللي خاطفها!…
فجأة في يوم من الايام زهور ظهرت! رجعت ف يوم بليل وخبطت ع الباب ولما الاب فتح لقي بينته واقفه قدام باب البيت! زهور كان شكلها بخوف جدا! شعرها منكوش وهدومها مقطعه وريحتها وحشه جدا غير عينيها اللي كانت سرحانه!..
الأب انصدم لما شافها والام جريت ع بنتها وفضلت تقولها ليه يا بنتي تعملي فينا ده كله! كنتي فين يا زهور؟! اخوات زهور خافو يقربو لاختهم لان منظرها حرفيا كانت عفريتة من اللي بنشفهم ف افلام الرعب! اللي قرب عليها بس الاب والام لان مستحيل يخافو من بنتهم!..
زهور مكانتش بتنطق! زهور حتى مكانتش بتبص ع امها وابوها ولا اخوتها! زهور حاضرة بجسمها لكن وعيها وعقلها مش معاها! عقلها ف عالم تاني خالص!….
الأم دخلت زهور الحمام تستحمى ولبستها لبس نضيف وتاني يوم الصبح بدأوا يودوها لشيوخ.. شيخ قالهم ان بنتكم عليها جن عاشق والسبيل الوحيد لعدم سيطرة الجن على زهور هو انها متخرجش من بره باب البيت! لان لما بتخرج من البيت بتكون فريسة سهلة للجن!…
زهور رجعت بعد 8 شهور ولما اختفت كان عندها حوالي 9 سنين يعني دلوقتي بقت 10 سنين الا كام شهر… زهور مخرجتش من البيت نهائي.. حالتها بالتدريج. بدأت تتحسن رجعت تأكل وتتكلم وتلعب.. لحد ما رجعت زهور اللي يعرفوها….
فضلت زهور محبوسة ف البيت لحد ما بقت ف سن ال 15 سنة.. زهقت زهور من قعدت البيت نفسها تطلع وتعيش حياتها.. قالت لابوها انها عايزه ترجع للدراسة وأنها زهقت من حبست البيت… الأب زعق لها وقالها خروج من البيت مافيش مش مستعد اخسرك تاني.. المرة اللي فاتت انا كنت السبب لما وافقت انك ترجعي للمدرسة واختفيتي ل 8 شهور.. مش مستعد اخسرك تاني.. زهور مفيش خروج من البيت!…
زهور بدأت حالتها تسوء جدا.. مبقتش بتاكل.. مبقتش تتكلم.. قاعدة في اوضتها وباصه للسقف… الام كانت بتضغظ عليه والأهل والجيران بيكلموا الاب انه يرجع بنته للمدرسة وان خلاص الموضوع فات عليه خمس سنين.. الأب ف الاخر استسلم للضغوطات دي ووافق انه يودي بنته للمدرسه…
وصل بنته للمدرسة بالعربية و استناها لحد ما تدخل.. كان خايف جدا انه يتكرر نفس المشهد بأن البنت تسيب ايده وتروح جارية زي المرات السابقة.. بس ده محصلش.. البنت فعلا دخلت المدرسة.. والاب اطمن عليها وحمد ربنا.. قال ان خلاص طالما ما اتكررش نفس المشهد يبقى كده مش هيحصل حاجة… بس بعد ساعه لقي تليفون بيرن عليه.. كانت المدرسة هي اللي بتتصل بيه وبتقولو بنتك اختفت من المدرسة!..
الأب انصدم.. نفس المعاناة هتتكرر تاني… الاب فضل يؤنب في نفسه أنه هو السبب في أن البنت تختفي للمرة التالته!…
المرة دي كل الاهالي والجيران والشرطة بدأو يدوروا ع زهور… مكانش ليها وجود في ولا مكان ومرجعتش زي كل مره.. الاب خاف احسن بنته تفضل تاني ٨ شهور زي المرة اللي فاتت.. كل يوم كانوا بيدوروا عليها.. وكان في ناس بتقول انهم شافوها في المكان الفداني!..
وست تقول اني شوفتها.. خبطت عليها بليل ولما طلعت لقيتها واقفه وهدومها متقطعة وشكلها مخيف جدا! قالت لي انها عايزه تشرب مية.. رحتاجيب لها مايه وملقتهاش لما رجعت لها! وواحد من الأهالي قال جت لي بليل.. الباب خبط وطلعت افتح لقيتها واقفه! قالت لي عايزة اشرب انا مدخلتش اجيب لها ماية لان عارف اني لما ادخل اجيب لها مويه هتهرب! لان كنت بسمع الناس بتقول انها بتيجي نص الليل تخبط ع بيبان الاهالي وتطلب مايه ولما يروح يجيب الماية يطلع ملقيوهاش! فهنا الجار ده قالها ادخلي جوه وانا هجبلك ماية! زهور هنا اتضايقة ووشها قلب وعنيها بقت سودة قالت لي بنبرة صوت راجل ( مش هدخل جوه انت جبلي الماية) هو خاف منها فدخل فلما طلع ملقهاش!….
حتى ان ف شرطي بيقول أثناء مناوبتي في تأمين أحد الشوارع في تهامة.. شاف بنت لابسة عباية سودة جياله بتقولة عايزة ماية.. راح الشرطي يجب لها مايه فرجع ولقيها بتجري بشكل مخيف.. كانت بتطير عن الأرض! الشرطي من خوفه فقد الوعي!..
فترة اختفاء زهور المرة دي استمرت ل سنة و 3 شهور! معاناة عاشوها الأهل والجيران والأقارب طول المدة. دي كان ف ناس بتقول انها ظهرت لهم وكانت تختفي لما يروحوا يجبولها مية!…
وفي يوم من الأيام في بيت قريب من المنطقة اللي ساكنة فيها زهور كان ف وليمة ف البيت ده… بعد ما الوليمة خلصت أهل البيت سمعوا صوت بنت بتعيط وبتستنجد.. الصوت جاي من حظيرة متربي فيها غنم ومواشي.. لما راحو هناك لقيو بنت قاعده وحاطه راسها بين رجليها وعمالة تعيط.. الاهل شافو مين دي فلقوها زهور! طلبت منهم مائة زي العادة! واحد راح يجيب لها ماية وف اتنين قعدو عشان البنت متهربش منهم المرة دي.. زهور محاولتش انها تهرب.. الست صاحبة البيت اخدتها وحمتها ولبستها لبس جديد.. واتصلو بالأهل وجم اخدوها و ميشو….
قطعو الاهل عهد ع نفسهم ان زهور ملهاش خروج من البيت!….
ولما راحت لاهلها ابوها حبسها ف الاوضة ورفض انها تخرج مهما كان السبب! كان لما ينام بيخلي مراته صاحية تراقب البنت وهو ف النهار يراقبها والام تنام والاخت كانت بتتناوب معاهم برضه ف مراقبة زهور!….
زهور مكانتش واعيه ولا فاكرة اي حاجة حصلت.. متعرفش انها اختفت لفترات كبيرة.. كانت بتقولهم مش فاكرة اي حاجة من اللي بتقولوها!…
زهور اتحبست ف اوضتها الاكل كانت بتكلو جوه الاوضة بس هي زهقت من الحبسة دي…. ف يوم جت لابوها وكان وقتها عندها 20 سنة.. ابوها كان نايم.. راحت لابوها وصحته من النوم و ودعته وقالت انها هتسافر لليمن! الأب رد عليها حاضر ونام! هو مكانش واعي بالي بيقولو.. بس زهور خرجت من البيت.. والفجر صحي يصلي.. ولما خلص صلى افتكر الحلم الغريب اللي حلمت بيه ان بنته بتودعو انها مسافره لليمن! ف اللحظة دي وصل البيت وسمع صوت صرخت الأم! هنا اتأكد ان اللي شافو مكانش حلم ده كان واقع بس هو كان نايم ورد عليها من غير ما يحس باي حاجة!….
زهور اختفت تاني لشهور وكانت برضه تيجي للأهالي تطلب منهم مية! بس ف مرة جت لواحد وقالت له عايزة ماية ف الراجل ده عارف انها لما تظهر زهور ومجرد ما تدي ضهرك ليها وتروح تجبلها الماية هترجع ومش هتلاقيها! هو مدخلش قالها لو عايزة ماية ادخلي اديهالك جوه.. زهور كانت تتعصب وتقوله مش هادخل جب لي انت الماية كانت بتقول كده بنبرة صوت خشنه زي الراجل!…
الراجل دخل لجوه واتصل بأهل زهور وقالهم زهور في القرية عندهم.. الاهل اتصلو بناس يعرفوهم ف القرية انهم يجمعو نفسهم ويحاولو يقللو نسبة هروب زهور.. بالفعل كل الناس خرجت من البيوت و زهور ظهرت في السوق فيها الأهالي
اتجمعوا عليها وبدأوا انهم يحصروها… مسكوها بس هي كانت قوية جدا.. قوة وماتناسبش بنت دي قوة راجل او اكتر من راجل! بعد معاناة قدروا يكتفوها وودوها لاهلها!
لما رجعت زهور اتحبست ف الاوضة وكان ف شيوخ بيجو لها.. شيخ من الشيوخ عالم كبير في السعودية قالهم ان زهور معاها جن عاشق من صغرها… والحل الوحيد انكم تجوزوها!! طبعا محدش اتجوزها لأنها في نظرهم هي مخيفة! الشيخ اللي قالهم انها عليها جن عاشق ولازم تتجوز عرض على أهلها الجواز وأنه هيتولى علاجها.. بالفعل الاهل وافقه والشيخ اتجوزها وبدأ رحلة كبيرة لعلاج زهور.. زهور خفت مع الايام وبقت تطلع عادي من البيت وتشتري أغراضها ومبقتش تختفي.. حتى انها خلفت من الشيخ طفلين.. حياتها استقرت وبقت طبيعية جدا بفضل من ربنا والشيخ!…
